੩. ਗਿਞ੍ਜਕਾਵਸਥਸੁਤ੍ਤਂ

੯੭. ਏਕਂ ਸਮਯਂ ਭਗਵਾ ਞਾਤਿਕੇ ਵਿਹਰਤਿ ਗਿਞ੍ਜਕਾਵਸਥੇ. ਤਤ੍ਰ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸਿ – ‘‘ਭਿਕ੍ਖਵੋ’’ਤਿ. ‘‘ਭਦਨ੍ਤੇ’’ਤਿ ਤੇ ਭਿਕ੍ਖੂ ਭਗਵਤੋ ਪਚ੍ਚਸ੍ਸੋਸੁਂ. ਭਗਵਾ ਏਤਦਵੋਚ –

‘‘ਧਾਤੁਂ, ਭਿਕ੍ਖਵੇ, ਪਟਿਚ੍ਚ ਉਪ੍ਪਜ੍ਜਤਿ ਸਞ੍ਞਾ, ਉਪ੍ਪਜ੍ਜਤਿ ਦਿਟ੍ਠਿ, ਉਪ੍ਪਜ੍ਜਤਿ ਵਿਤਕ੍ਕੋ’’ਤਿ. ਏਵਂ ਵੁਤ੍ਤੇ, ਆਯਸ੍ਮਾ ਕਚ੍ਚਾਨੋ [ਸਦ੍ਧੋ ਕਚ੍ਚਾਨੋ (ਕ.)] ਭਗਵਨ੍ਤਂ ਏਤਦਵੋਚ – ‘‘ਯਾਯਂ, ਭਨ੍ਤੇ, ਦਿਟ੍ਠਿ – ‘ਅਸਮ੍ਮਾਸਮ੍ਬੁਦ੍ਧੇਸੁ ਸਮ੍ਮਾਸਮ੍ਬੁਦ੍ਧਾ’ਤਿ, ਅਯਂ ਨੁ ਖੋ, ਭਨ੍ਤੇ, ਦਿਟ੍ਠਿ ਕਿਂ ਪਟਿਚ੍ਚ ਪਞ੍ਞਾਯਤੀ’’ਤਿ?

‘‘ਮਹਤਿ ਖੋ ਏਸਾ, ਕਚ੍ਚਾਨ, ਧਾਤੁ ਯਦਿਦਂ ਅਵਿਜ੍ਜਾਧਾਤੁ. ਹੀਨਂ, ਕਚ੍ਚਾਨ, ਧਾਤੁਂ ਪਟਿਚ੍ਚ ਉਪ੍ਪਜ੍ਜਤਿ ਹੀਨਾ ਸਞ੍ਞਾ, ਹੀਨਾ ਦਿਟ੍ਠਿ, ਹੀਨੋ ਵਿਤਕ੍ਕੋ, ਹੀਨਾ ਚੇਤਨਾ, ਹੀਨਾ ਪਤ੍ਥਨਾ, ਹੀਨੋ ਪਣਿਧਿ, ਹੀਨੋ ਪੁਗ੍ਗਲੋ, ਹੀਨਾ ਵਾਚਾ; ਹੀਨਂ ਆਚਿਕ੍ਖਤਿ ਦੇਸੇਤਿ ਪਞ੍ਞਪੇਤਿ ਪਟ੍ਠਪੇਤਿ ਵਿਵਰਤਿ ਵਿਭਜਤਿ ਉਤ੍ਤਾਨੀਕਰੋਤਿ; ਹੀਨਾ ਤਸ੍ਸ ਉਪਪਤ੍ਤੀਤਿ ਵਦਾਮਿ.

‘‘ਮਜ੍ਝਿਮਂ, ਕਚ੍ਚਾਨ, ਧਾਤੁਂ ਪਟਿਚ੍ਚ ਉਪ੍ਪਜ੍ਜਤਿ ਮਜ੍ਝਿਮਾ ਸਞ੍ਞਾ, ਮਜ੍ਝਿਮਾ ਦਿਟ੍ਠਿ, ਮਜ੍ਝਿਮੋ ਵਿਤਕ੍ਕੋ, ਮਜ੍ਝਿਮਾ ਚੇਤਨਾ, ਮਜ੍ਝਿਮਾ ਪਤ੍ਥਨਾ, ਮਜ੍ਝਿਮੋ ਪਣਿਧਿ, ਮਜ੍ਝਿਮੋ ਪੁਗ੍ਗਲੋ, ਮਜ੍ਝਿਮਾ ਵਾਚਾ; ਮਜ੍ਝਿਮਂ ਆਚਿਕ੍ਖਤਿ ਦੇਸੇਤਿ ਪਞ੍ਞਪੇਤਿ ਪਟ੍ਠਪੇਤਿ ਵਿਵਰਤਿ ਵਿਭਜਤਿ ਉਤ੍ਤਾਨੀਕਰੋਤਿ; ਮਜ੍ਝਿਮਾ ਤਸ੍ਸ ਉਪਪਤ੍ਤੀਤਿ ਵਦਾਮਿ.

‘‘ਪਣੀਤਂ, ਕਚ੍ਚਾਨ, ਧਾਤੁਂ ਪਟਿਚ੍ਚ ਉਪ੍ਪਜ੍ਜਤਿ ਪਣੀਤਾ ਸਞ੍ਞਾ, ਪਣੀਤਾ ਦਿਟ੍ਠਿ, ਪਣੀਤੋ ਵਿਤਕ੍ਕੋ, ਪਣੀਤਾ ਚੇਤਨਾ, ਪਣੀਤਾ ਪਤ੍ਥਨਾ, ਪਣੀਤੋ ਪਣਿਧਿ, ਪਣੀਤੋ ਪੁਗ੍ਗਲੋ, ਪਣੀਤਾ ਵਾਚਾ; ਪਣੀਤਂ ਆਚਿਕ੍ਖਤਿ ਦੇਸੇਤਿ ਪਞ੍ਞਪੇਤਿ ਪਟ੍ਠਪੇਤਿ ਵਿਵਰਤਿ ਵਿਭਜਤਿ ਉਤ੍ਤਾਨੀਕਰੋਤਿ; ਪਣੀਤਾ ਤਸ੍ਸ ਉਪਪਤ੍ਤੀਤਿ ਵਦਾਮੀ’’ਤਿ. ਤਤਿਯਂ.