੭. ਸੁਦ੍ਧਿਕਸੁਤ੍ਤਂ

੧੯੩. ਸਾਵਤ੍ਥਿਨਿਦਾਨਂ. ਅਥ ਖੋ ਸੁਦ੍ਧਿਕਭਾਰਦ੍ਵਾਜੋ ਬ੍ਰਾਹ੍ਮਣੋ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਤਾ ਸਦ੍ਧਿਂ ਸਮ੍ਮੋਦਿ. ਸਮ੍ਮੋਦਨੀਯਂ ਕਥਂ ਸਾਰਣੀਯਂ ਵੀਤਿਸਾਰੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਸੁਦ੍ਧਿਕਭਾਰਦ੍ਵਾਜੋ ਬ੍ਰਾਹ੍ਮਣੋ ਭਗਵਤੋ ਸਨ੍ਤਿਕੇ ਇਮਂ ਗਾਥਂ ਅਜ੍ਝਭਾਸਿ –

‘‘ਨ ਬ੍ਰਾਹ੍ਮਣੋ [ਨਾਬ੍ਰਾਹ੍ਮਣੋ (?)] ਸੁਜ੍ਝਤਿ ਕੋਚਿ, ਲੋਕੇ ਸੀਲਵਾਪਿ ਤਪੋਕਰਂ;

ਵਿਜ੍ਜਾਚਰਣਸਮ੍ਪਨ੍ਨੋ, ਸੋ ਸੁਜ੍ਝਤਿ ਨ ਅਞ੍ਞਾ ਇਤਰਾ ਪਜਾ’’ਤਿ.

‘‘ਬਹੁਮ੍ਪਿ ਪਲਪਂ ਜਪ੍ਪਂ, ਨ ਜਚ੍ਚਾ ਹੋਤਿ ਬ੍ਰਾਹ੍ਮਣੋ;

ਅਨ੍ਤੋਕਸਮ੍ਬੁ ਸਙ੍ਕਿਲਿਟ੍ਠੋ, ਕੁਹਨਂ ਉਪਨਿਸ੍ਸਿਤੋ.

‘‘ਖਤ੍ਤਿਯੋ ਬ੍ਰਾਹ੍ਮਣੋ ਵੇਸ੍ਸੋ, ਸੁਦ੍ਦੋ ਚਣ੍ਡਾਲਪੁਕ੍ਕੁਸੋ;

ਆਰਦ੍ਧਵੀਰਿਯੋ ਪਹਿਤਤ੍ਤੋ, ਨਿਚ੍ਚਂ ਦਲ਼੍ਹਪਰਕ੍ਕਮੋ;

ਪਪ੍ਪੋਤਿ ਪਰਮਂ ਸੁਦ੍ਧਿਂ, ਏਵਂ ਜਾਨਾਹਿ ਬ੍ਰਾਹ੍ਮਣਾ’’ਤਿ.

ਏਵਂ ਵੁਤ੍ਤੇ, ਸੁਦ੍ਧਿਕਭਾਰਦ੍ਵਾਜੋ ਬ੍ਰਾਹ੍ਮਣੋ ਭਗਵਨ੍ਤਂ ਏਤਦਵੋਚ – ‘‘ਅਭਿਕ੍ਕਨ੍ਤਂ, ਭੋ ਗੋਤਮ…ਪੇ… ਅਞ੍ਞਤਰੋ ਚ ਪਨਾਯਸ੍ਮਾ ਭਾਰਦ੍ਵਾਜੋ ਅਰਹਤਂ ਅਹੋਸੀ’’ਤਿ.