੩. ਧਜਗ੍ਗਸੁਤ੍ਤਂ

੨੪੯. ਸਾਵਤ੍ਥਿਯਂ. ਤਤ੍ਰ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸਿ – ‘‘ਭਿਕ੍ਖਵੋ’’ਤਿ. ‘‘ਭਦਨ੍ਤੇ’’ਤਿ ਤੇ ਭਿਕ੍ਖੂ ਭਗਵਤੋ ਪਚ੍ਚਸ੍ਸੋਸੁਂ. ਭਗਵਾ ਏਤਦਵੋਚ –

‘‘ਭੂਤਪੁਬ੍ਬਂ, ਭਿਕ੍ਖਵੇ, ਦੇਵਾਸੁਰਸਙ੍ਗਾਮੋ ਸਮੁਪਬ੍ਯੂਲ਼੍ਹੋ ਅਹੋਸਿ. ਅਥ ਖੋ, ਭਿਕ੍ਖਵੇ, ਸਕ੍ਕੋ ਦੇਵਾਨਮਿਨ੍ਦੋ ਦੇਵੇ ਤਾਵਤਿਂਸੇ ਆਮਨ੍ਤੇਸਿ –

‘ਸਚੇ, ਮਾਰਿਸਾ, ਦੇਵਾਨਂ ਸਙ੍ਗਾਮਗਤਾਨਂ ਉਪ੍ਪਜ੍ਜੇਯ੍ਯ ਭਯਂ ਵਾ ਛਮ੍ਭਿਤਤ੍ਤਂ ਵਾ ਲੋਮਹਂਸੋ ਵਾ, ਮਮੇਵ ਤਸ੍ਮਿਂ ਸਮਯੇ ਧਜਗ੍ਗਂ ਉਲ੍ਲੋਕੇਯ੍ਯਾਥ. ਮਮਞ੍ਹਿ ਵੋ ਧਜਗ੍ਗਂ ਉਲ੍ਲੋਕਯਤਂ ਯਂ ਭਵਿਸ੍ਸਤਿ ਭਯਂ ਵਾ ਛਮ੍ਭਿਤਤ੍ਤਂ ਵਾ ਲੋਮਹਂਸੋ ਵਾ, ਸੋ ਪਹੀਯਿਸ੍ਸਤਿ’.

‘ਨੋ ਚੇ ਮੇ ਧਜਗ੍ਗਂ ਉਲ੍ਲੋਕੇਯ੍ਯਾਥ, ਅਥ ਪਜਾਪਤਿਸ੍ਸ ਦੇਵਰਾਜਸ੍ਸ ਧਜਗ੍ਗਂ ਉਲ੍ਲੋਕੇਯ੍ਯਾਥ. ਪਜਾਪਤਿਸ੍ਸ ਹਿ ਵੋ ਦੇਵਰਾਜਸ੍ਸ ਧਜਗ੍ਗਂ ਉਲ੍ਲੋਕਯਤਂ ਯਂ ਭਵਿਸ੍ਸਤਿ ਭਯਂ ਵਾ ਛਮ੍ਭਿਤਤ੍ਤਂ ਵਾ ਲੋਮਹਂਸੋ ਵਾ, ਸੋ ਪਹੀਯਿਸ੍ਸਤਿ’.

‘ਨੋ ਚੇ ਪਜਾਪਤਿਸ੍ਸ ਦੇਵਰਾਜਸ੍ਸ ਧਜਗ੍ਗਂ ਉਲ੍ਲੋਕੇਯ੍ਯਾਥ, ਅਥ ਵਰੁਣਸ੍ਸ ਦੇਵਰਾਜਸ੍ਸ ਧਜਗ੍ਗਂ ਉਲ੍ਲੋਕੇਯ੍ਯਾਥ. ਵਰੁਣਸ੍ਸ ਹਿ ਵੋ ਦੇਵਰਾਜਸ੍ਸ ਧਜਗ੍ਗਂ ਉਲ੍ਲੋਕਯਤਂ ਯਂ ਭਵਿਸ੍ਸਤਿ ਭਯਂ ਵਾ ਛਮ੍ਭਿਤਤ੍ਤਂ ਵਾ ਲੋਮਹਂਸੋ ਵਾ, ਸੋ ਪਹੀਯਿਸ੍ਸਤਿ’.

‘ਨੋ ਚੇ ਵਰੁਣਸ੍ਸ ਦੇਵਰਾਜਸ੍ਸ ਧਜਗ੍ਗਂ ਉਲ੍ਲੋਕੇਯ੍ਯਾਥ, ਅਥ ਈਸਾਨਸ੍ਸ ਦੇਵਰਾਜਸ੍ਸ ਧਜਗ੍ਗਂ ਉਲ੍ਲੋਕੇਯ੍ਯਾਥ. ਈਸਾਨਸ੍ਸ ਹਿ ਵੋ ਦੇਵਰਾਜਸ੍ਸ ਧਜਗ੍ਗਂ ਉਲ੍ਲੋਕਯਤਂ ਯਂ ਭਵਿਸ੍ਸਤਿ ਭਯਂ ਵਾ ਛਮ੍ਭਿਤਤ੍ਤਂ ਵਾ ਲੋਮਹਂਸੋ ਵਾ, ਸੋ ਪਹੀਯਿਸ੍ਸਤੀ’’’ਤਿ.

‘‘ਤਂ ਖੋ ਪਨ, ਭਿਕ੍ਖਵੇ, ਸਕ੍ਕਸ੍ਸ ਵਾ ਦੇਵਾਨਮਿਨ੍ਦਸ੍ਸ ਧਜਗ੍ਗਂ ਉਲ੍ਲੋਕਯਤਂ, ਪਜਾਪਤਿਸ੍ਸ ਵਾ ਦੇਵਰਾਜਸ੍ਸ ਧਜਗ੍ਗਂ ਉਲ੍ਲੋਕਯਤਂ, ਵਰੁਣਸ੍ਸ ਵਾ ਦੇਵਰਾਜਸ੍ਸ ਧਜਗ੍ਗਂ ਉਲ੍ਲੋਕਯਤਂ, ਈਸਾਨਸ੍ਸ ਵਾ ਦੇਵਰਾਜਸ੍ਸ ਧਜਗ੍ਗਂ ਉਲ੍ਲੋਕਯਤਂ ਯਂ ਭਵਿਸ੍ਸਤਿ ਭਯਂ ਵਾ ਛਮ੍ਭਿਤਤ੍ਤਂ ਵਾ ਲੋਮਹਂਸੋ ਵਾ, ਸੋ ਪਹੀਯੇਥਾਪਿ ਨੋਪਿ ਪਹੀਯੇਥ [ਨੋ ਪਹੀਯੇਥ (ਕ.)].

‘‘ਤਂ ਕਿਸ੍ਸ ਹੇਤੁ? ਸਕ੍ਕੋ ਹਿ, ਭਿਕ੍ਖਵੇ, ਦੇਵਾਨਮਿਨ੍ਦੋ ਅਵੀਤਰਾਗੋ ਅਵੀਤਦੋਸੋ ਅਵੀਤਮੋਹੋ ਭੀਰੁ ਛਮ੍ਭੀ ਉਤ੍ਰਾਸੀ ਪਲਾਯੀਤਿ.

‘‘ਅਹਞ੍ਚ ਖੋ, ਭਿਕ੍ਖਵੇ, ਏਵਂ ਵਦਾਮਿ – ‘ਸਚੇ ਤੁਮ੍ਹਾਕਂ, ਭਿਕ੍ਖਵੇ, ਅਰਞ੍ਞਗਤਾਨਂ ਵਾ ਰੁਕ੍ਖਮੂਲਗਤਾਨਂ ਵਾ ਸੁਞ੍ਞਾਗਾਰਗਤਾਨਂ ਵਾ ਉਪ੍ਪਜ੍ਜੇਯ੍ਯ ਭਯਂ ਵਾ ਛਮ੍ਭਿਤਤ੍ਤਂ ਵਾ ਲੋਮਹਂਸੋ ਵਾ, ਮਮੇਵ ਤਸ੍ਮਿਂ ਸਮਯੇ ਅਨੁਸ੍ਸਰੇਯ੍ਯਾਥ – ਇਤਿਪਿ ਸੋ ਭਗਵਾ ਅਰਹਂ ਸਮ੍ਮਾਸਮ੍ਬੁਦ੍ਧੋ ਵਿਜ੍ਜਾਚਰਣਸਮ੍ਪਨ੍ਨੋ ਸੁਗਤੋ ਲੋਕਵਿਦੂ ਅਨੁਤ੍ਤਰੋ ਪੁਰਿਸਦਮ੍ਮਸਾਰਥਿ ਸਤ੍ਥਾ ਦੇਵਮਨੁਸ੍ਸਾਨਂ ਬੁਦ੍ਧੋ ਭਗਵਾ’ਤਿ. ਮਮਞ੍ਹਿ ਵੋ, ਭਿਕ੍ਖਵੇ, ਅਨੁਸ੍ਸਰਤਂ ਯਂ ਭਵਿਸ੍ਸਤਿ ਭਯਂ ਵਾ ਛਮ੍ਭਿਤਤ੍ਤਂ ਵਾ ਲੋਮਹਂਸੋ ਵਾ, ਸੋ ਪਹੀਯਿਸ੍ਸਤਿ.

‘‘ਨੋ ਚੇ ਮਂ ਅਨੁਸ੍ਸਰੇਯ੍ਯਾਥ, ਅਥ ਧਮ੍ਮਂ ਅਨੁਸ੍ਸਰੇਯ੍ਯਾਥ – ‘ਸ੍ਵਾਕ੍ਖਾਤੋ ਭਗਵਤਾ ਧਮ੍ਮੋ ਸਨ੍ਦਿਟ੍ਠਿਕੋ ਅਕਾਲਿਕੋ ਏਹਿਪਸ੍ਸਿਕੋ ਓਪਨੇਯ੍ਯਿਕੋ ਪਚ੍ਚਤ੍ਤਂ ਵੇਦਿਤਬ੍ਬੋ ਵਿਞ੍ਞੂਹੀ’ਤਿ. ਧਮ੍ਮਞ੍ਹਿ ਵੋ, ਭਿਕ੍ਖਵੇ, ਅਨੁਸ੍ਸਰਤਂ ਯਂ ਭਵਿਸ੍ਸਤਿ ਭਯਂ ਵਾ ਛਮ੍ਭਿਤਤ੍ਤਂ ਵਾ ਲੋਮਹਂਸੋ ਵਾ, ਸੋ ਪਹੀਯਿਸ੍ਸਤਿ.

‘‘ਨੋ ਚੇ ਧਮ੍ਮਂ ਅਨੁਸ੍ਸਰੇਯ੍ਯਾਥ, ਅਥ ਸਙ੍ਘਂ ਅਨੁਸ੍ਸਰੇਯ੍ਯਾਥ – ‘ਸੁਪ੍ਪਟਿਪਨ੍ਨੋ ਭਗਵਤੋ ਸਾਵਕਸਙ੍ਘੋ ਉਜੁਪ੍ਪਟਿਪਨ੍ਨੋ ਭਗਵਤੋ ਸਾਵਕਸਙ੍ਘੋ ਞਾਯਪ੍ਪਟਿਪਨ੍ਨੋ ਭਗਵਤੋ ਸਾਵਕਸਙ੍ਘੋ ਸਾਮੀਚਿਪ੍ਪਟਿਪਨ੍ਨੋ ਭਗਵਤੋ ਸਾਵਕਸਙ੍ਘੋ, ਯਦਿਦਂ ਚਤ੍ਤਾਰਿ ਪੁਰਿਸਯੁਗਾਨਿ ਅਟ੍ਠ ਪੁਰਿਸਪੁਗ੍ਗਲਾ ਏਸ ਭਗਵਤੋ ਸਾਵਕਸਙ੍ਘੋ, ਆਹੁਨੇਯ੍ਯੋ ਪਾਹੁਨੇਯ੍ਯੋ ਦਕ੍ਖਿਣੇਯ੍ਯੋ ਅਞ੍ਜਲਿਕਰਣੀਯੋ ਅਨੁਤ੍ਤਰਂ ਪੁਞ੍ਞਕ੍ਖੇਤ੍ਤਂ ਲੋਕਸ੍ਸਾ’ਤਿ. ਸਙ੍ਘਞ੍ਹਿ ਵੋ, ਭਿਕ੍ਖਵੇ, ਅਨੁਸ੍ਸਰਤਂ ਯਂ ਭਵਿਸ੍ਸਤਿ ਭਯਂ ਵਾ ਛਮ੍ਭਿਤਤ੍ਤਂ ਵਾ ਲੋਮਹਂਸੋ ਵਾ, ਸੋ ਪਹੀਯਿਸ੍ਸਤਿ.

‘‘ਤਂ ਕਿਸ੍ਸ ਹੇਤੁ? ਤਥਾਗਤੋ ਹਿ, ਭਿਕ੍ਖਵੇ, ਅਰਹਂ ਸਮ੍ਮਾਸਮ੍ਬੁਦ੍ਧੋ ਵੀਤਰਾਗੋ ਵੀਤਦੋਸੋ ਵੀਤਮੋਹੋ ਅਭੀਰੁ ਅਚ੍ਛਮ੍ਭੀ ਅਨੁਤ੍ਰਾਸੀ ਅਪਲਾਯੀ’’ਤਿ. ਇਦਮਵੋਚ ਭਗਵਾ. ਇਦਂ ਵਤ੍ਵਾਨ ਸੁਗਤੋ ਅਥਾਪਰਂ ਏਤਦਵੋਚ ਸਤ੍ਥਾ –

‘‘ਅਰਞ੍ਞੇ ਰੁਕ੍ਖਮੂਲੇ ਵਾ, ਸੁਞ੍ਞਾਗਾਰੇਵ ਭਿਕ੍ਖਵੋ;

ਅਨੁਸ੍ਸਰੇਥ [ਅਨੁਸ੍ਸਰੇਯ੍ਯਾਥ (ਕ.) ਪਦਸਿਦ੍ਧਿ ਪਨ ਚਿਨ੍ਤੇਤਬ੍ਬਾ] ਸਮ੍ਬੁਦ੍ਧਂ, ਭਯਂ ਤੁਮ੍ਹਾਕ ਨੋ ਸਿਯਾ.

‘‘ਨੋ ਚੇ ਬੁਦ੍ਧਂ ਸਰੇਯ੍ਯਾਥ, ਲੋਕਜੇਟ੍ਠਂ ਨਰਾਸਭਂ;

ਅਥ ਧਮ੍ਮਂ ਸਰੇਯ੍ਯਾਥ, ਨਿਯ੍ਯਾਨਿਕਂ ਸੁਦੇਸਿਤਂ.

‘‘ਨੋ ਚੇ ਧਮ੍ਮਂ ਸਰੇਯ੍ਯਾਥ, ਨਿਯ੍ਯਾਨਿਕਂ ਸੁਦੇਸਿਤਂ;

ਅਥ ਸਙ੍ਘਂ ਸਰੇਯ੍ਯਾਥ, ਪੁਞ੍ਞਕ੍ਖੇਤ੍ਤਂ ਅਨੁਤ੍ਤਰਂ.

‘‘ਏਵਂ ਬੁਦ੍ਧਂ ਸਰਨ੍ਤਾਨਂ, ਧਮ੍ਮਂ ਸਙ੍ਘਞ੍ਚ ਭਿਕ੍ਖਵੋ;

ਭਯਂ ਵਾ ਛਮ੍ਭਿਤਤ੍ਤਂ ਵਾ, ਲੋਮਹਂਸੋ ਨ ਹੇਸ੍ਸਤੀ’’ਤਿ.