੧੦. ਸਮੁਦ੍ਦਕਸੁਤ੍ਤਂ

੨੫੬. ਸਾਵਤ੍ਥਿਯਂ. ‘‘ਭੂਤਪੁਬ੍ਬਂ, ਭਿਕ੍ਖਵੇ, ਸਮ੍ਬਹੁਲਾ ਇਸਯੋ ਸੀਲਵਨ੍ਤੋ ਕਲ੍ਯਾਣਧਮ੍ਮਾ ਸਮੁਦ੍ਦਤੀਰੇ ਪਣ੍ਣਕੁਟੀਸੁ ਸਮ੍ਮਨ੍ਤਿ. ਤੇਨ ਖੋ ਪਨ ਸਮਯੇਨ ਦੇਵਾਸੁਰਸਙ੍ਗਾਮੋ ਸਮੁਪਬ੍ਯੂਲ਼੍ਹੋ ਅਹੋਸਿ. ਅਥ ਖੋ, ਭਿਕ੍ਖਵੇ, ਤੇਸਂ ਇਸੀਨਂ ਸੀਲਵਨ੍ਤਾਨਂ ਕਲ੍ਯਾਣਧਮ੍ਮਾਨਂ ਏਤਦਹੋਸਿ – ‘ਧਮ੍ਮਿਕਾ ਖੋ ਦੇਵਾ, ਅਧਮ੍ਮਿਕਾ ਅਸੁਰਾ. ਸਿਯਾਪਿ ਨੋ ਅਸੁਰਤੋ ਭਯਂ. ਯਂਨੂਨ ਮਯਂ ਸਮ੍ਬਰਂ ਅਸੁਰਿਨ੍ਦਂ ਉਪਸਙ੍ਕਮਿਤ੍ਵਾ ਅਭਯਦਕ੍ਖਿਣਂ ਯਾਚੇਯ੍ਯਾਮਾ’’’ਤਿ. ‘‘ਅਥ ਖੋ, ਭਿਕ੍ਖਵੇ, ਤੇ ਇਸਯੋ ਸੀਲਵਨ੍ਤੋ ਕਲ੍ਯਾਣਧਮ੍ਮਾ – ਸੇਯ੍ਯਥਾਪਿ ਨਾਮ ਬਲਵਾ ਪੁਰਿਸੋ ਸਮਿਞ੍ਜਿਤਂ ਵਾ ਬਾਹਂ ਪਸਾਰੇਯ੍ਯ, ਪਸਾਰਿਤਂ ਵਾ ਬਾਹਂ ਸਮਿਞ੍ਜੇਯ੍ਯ ਏਵਮੇਵ – ਸਮੁਦ੍ਦਤੀਰੇ ਪਣ੍ਣਕੁਟੀਸੁ ਅਨ੍ਤਰਹਿਤਾ ਸਮ੍ਬਰਸ੍ਸ ਅਸੁਰਿਨ੍ਦਸ੍ਸ ਸਮ੍ਮੁਖੇ ਪਾਤੁਰਹੇਸੁਂ. ਅਥ ਖੋ, ਭਿਕ੍ਖਵੇ, ਤੇ ਇਸਯੋ ਸੀਲਵਨ੍ਤੋ ਕਲ੍ਯਾਣਧਮ੍ਮਾ ਸਮ੍ਬਰਂ ਅਸੁਰਿਨ੍ਦਂ ਗਾਥਾਯ ਅਜ੍ਝਭਾਸਿਂਸੁ –

‘‘ਇਸਯੋ ਸਮ੍ਬਰਂ ਪਤ੍ਤਾ, ਯਾਚਨ੍ਤਿ ਅਭਯਦਕ੍ਖਿਣਂ;

ਕਾਮਂਕਰੋ ਹਿ ਤੇ ਦਾਤੁਂ, ਭਯਸ੍ਸ ਅਭਯਸ੍ਸ ਵਾ’’ਤਿ.

‘‘ਇਸੀਨਂ ਅਭਯਂ ਨਤ੍ਥਿ, ਦੁਟ੍ਠਾਨਂ ਸਕ੍ਕਸੇਵਿਨਂ;

ਅਭਯਂ ਯਾਚਮਾਨਾਨਂ, ਭਯਮੇਵ ਦਦਾਮਿ ਵੋ’’ਤਿ.

‘‘ਅਭਯਂ ਯਾਚਮਾਨਾਨਂ, ਭਯਮੇਵ ਦਦਾਸਿ ਨੋ;

ਪਟਿਗ੍ਗਣ੍ਹਾਮ ਤੇ ਏਤਂ, ਅਕ੍ਖਯਂ ਹੋਤੁ ਤੇ ਭਯਂ.

‘‘ਯਾਦਿਸਂ ਵਪਤੇ ਬੀਜਂ, ਤਾਦਿਸਂ ਹਰਤੇ ਫਲਂ;

ਕਲ੍ਯਾਣਕਾਰੀ ਕਲ੍ਯਾਣਂ, ਪਾਪਕਾਰੀ ਚ ਪਾਪਕਂ;

ਪਵੁਤ੍ਤਂ ਤਾਤ ਤੇ ਬੀਜਂ, ਫਲਂ ਪਚ੍ਚਨੁਭੋਸ੍ਸਸੀ’’ਤਿ.

‘‘ਅਥ ਖੋ, ਭਿਕ੍ਖਵੇ, ਤੇ ਇਸਯੋ ਸੀਲਵਨ੍ਤੋ ਕਲ੍ਯਾਣਧਮ੍ਮਾ ਸਮ੍ਬਰਂ ਅਸੁਰਿਨ੍ਦਂ ਅਭਿਸਪਿਤ੍ਵਾ – ਸੇਯ੍ਯਥਾਪਿ ਨਾਮ ਬਲਵਾ ਪੁਰਿਸੋ ਸਮਿਞ੍ਜਿਤਂ ਵਾ ਬਾਹਂ ਪਸਾਰੇਯ੍ਯ, ਪਸਾਰਿਤਂ ਵਾ ਬਾਹਂ ਸਮਿਞ੍ਜੇਯ੍ਯ ਏਵਮੇਵ – ਸਮ੍ਬਰਸ੍ਸ ਅਸੁਰਿਨ੍ਦਸ੍ਸ ਸਮ੍ਮੁਖੇ ਅਨ੍ਤਰਹਿਤਾ ਸਮੁਦ੍ਦਤੀਰੇ ਪਣ੍ਣਕੁਟੀਸੁ ਪਾਤੁਰਹੇਸੁਂ. ਅਥ ਖੋ, ਭਿਕ੍ਖਵੇ, ਸਮ੍ਬਰੋ ਅਸੁਰਿਨ੍ਦੋ ਤੇਹਿ ਇਸੀਹਿ ਸੀਲਵਨ੍ਤੇਹਿ ਕਲ੍ਯਾਣਧਮ੍ਮੇਹਿ ਅਭਿਸਪਿਤੋ ਰਤ੍ਤਿਯਾ ਸੁਦਂ ਤਿਕ੍ਖਤ੍ਤੁਂ ਉਬ੍ਬਿਜ੍ਜੀ’’ਤਿ.

ਪਠਮੋ ਵਗ੍ਗੋ.

ਤਸ੍ਸੁਦ੍ਦਾਨਂ –

ਸੁਵੀਰਂ ਸੁਸੀਮਞ੍ਚੇਵ, ਧਜਗ੍ਗਂ ਵੇਪਚਿਤ੍ਤਿਨੋ;

ਸੁਭਾਸਿਤਂ ਜਯਞ੍ਚੇਵ, ਕੁਲਾਵਕਂ ਨਦੁਬ੍ਭਿਯਂ;

ਵੇਰੋਚਨ ਅਸੁਰਿਨ੍ਦੋ, ਇਸਯੋ ਅਰਞ੍ਞਕਞ੍ਚੇਵ;

ਇਸਯੋ ਚ ਸਮੁਦ੍ਦਕਾਤਿ.