੩. ਅਸ੍ਸਲਾਯਨਸੁਤ੍ਤਂ
੪੦੧. ਏਵਂ ਮੇ ਸੁਤਂ – ਏਕਂ ਸਮਯਂ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਨਾਨਾਵੇਰਜ੍ਜਕਾਨਂ ਬ੍ਰਾਹ੍ਮਣਾਨਂ ਪਞ੍ਚਮਤ੍ਤਾਨਿ ਬ੍ਰਾਹ੍ਮਣਸਤਾਨਿ ਸਾਵਤ੍ਥਿਯਂ ਪਟਿਵਸਨ੍ਤਿ ਕੇਨਚਿਦੇਵ ਕਰਣੀਯੇਨ. ਅਥ ਖੋ ਤੇਸਂ ਬ੍ਰਾਹ੍ਮਣਾਨਂ ਏਤਦਹੋਸਿ – ‘‘ਅਯਂ ਖੋ ਸਮਣੋ ਗੋਤਮੋ ਚਾਤੁਵਣ੍ਣਿਂ ਸੁਦ੍ਧਿਂ ਪਞ੍ਞਪੇਤਿ. ਕੋ ਨੁ ਖੋ ਪਹੋਤਿ ਸਮਣੇਨ ਗੋਤਮੇਨ ਸਦ੍ਧਿਂ ਅਸ੍ਮਿਂ ਵਚਨੇ ਪਟਿਮਨ੍ਤੇਤੁ’’ਨ੍ਤਿ? ਤੇਨ ਖੋ ਪਨ ਸਮਯੇਨ ਅਸ੍ਸਲਾਯਨੋ ਨਾਮ ਮਾਣਵੋ ਸਾਵਤ੍ਥਿਯਂ ਪਟਿਵਸਤਿ ਦਹਰੋ, ਵੁਤ੍ਤਸਿਰੋ, ਸੋਲ਼ਸਵਸ੍ਸੁਦ੍ਦੇਸਿਕੋ ਜਾਤਿਯਾ, ਤਿਣ੍ਣਂ ਵੇਦਾਨਂ ਪਾਰਗੂ ਸਨਿਘਣ੍ਡੁਕੇਟੁਭਾਨਂ ਸਾਕ੍ਖਰਪ੍ਪਭੇਦਾਨਂ ਇਤਿਹਾਸਪਞ੍ਚਮਾਨਂ, ਪਦਕੋ, ਵੇਯ੍ਯਾਕਰਣੋ, ਲੋਕਾਯਤਮਹਾਪੁਰਿਸਲਕ੍ਖਣੇਸੁ ਅਨਵਯੋ. ਅਥ ਖੋ ਤੇਸਂ ਬ੍ਰਾਹ੍ਮਣਾਨਂ ਏਤਦਹੋਸਿ – ‘‘ਅਯਂ ਖੋ ਅਸ੍ਸਲਾਯਨੋ ਮਾਣਵੋ ਸਾਵਤ੍ਥਿਯਂ ਪਟਿਵਸਤਿ ਦਹਰੋ, ਵੁਤ੍ਤਸਿਰੋ, ਸੋਲ਼ਸਵਸ੍ਸੁਦ੍ਦੇਸਿਕੋ ਜਾਤਿਯਾ, ਤਿਣ੍ਣਂ ਵੇਦਾਨਂ ਪਾਰਗੂ…ਪੇ… ਅਨਵਯੋ. ਸੋ ਖੋ ਪਹੋਤਿ ਸਮਣੇਨ ਗੋਤਮੇਨ ਸਦ੍ਧਿਂ ਅਸ੍ਮਿਂ ਵਚਨੇ ਪਟਿਮਨ੍ਤੇਤੁ’’ਨ੍ਤਿ.
ਅਥ ਖੋ ਤੇ ਬ੍ਰਾਹ੍ਮਣਾ ਯੇਨ ਅਸ੍ਸਲਾਯਨੋ ਮਾਣਵੋ ਤੇਨੁਪਙ੍ਕਮਿਂਸੁ; ਉਪਸਙ੍ਕਮਿਤ੍ਵਾ ਅਸ੍ਸਲਾਯਨਂ ਮਾਣਵਂ ਏਤਦਵੋਚੁਂ – ‘‘ਅਯਂ, ਭੋ ਅਸ੍ਸਲਾਯਨ, ਸਮਣੋ ਗੋਤਮੋ ਚਾਤੁਵਣ੍ਣਿਂ ਸੁਦ੍ਧਿਂ ਪਞ੍ਞਪੇਤਿ. ਏਤੁ ਭਵਂ ਅਸ੍ਸਲਾਯਨੋ ਸਮਣੇਨ ਗੋਤਮੇਨ ਸਦ੍ਧਿਂ ਅਸ੍ਮਿਂ ਵਚਨੇ ਪਟਿਮਨ੍ਤੇਤੂ’’ਤਿ [ਪਟਿਮਨ੍ਤੇਤੁਨ੍ਤਿ (ਪੀ. ਕ.)].
ਏਵਂ ਵੁਤ੍ਤੇ, ਅਸ੍ਸਲਾਯਨੋ ਮਾਣਵੋ ਤੇ ਬ੍ਰਾਹ੍ਮਣੇ ਏਤਦਵੋਚ – ‘‘ਸਮਣੋ ਖਲੁ, ਭੋ, ਗੋਤਮੋ ਧਮ੍ਮਵਾਦੀ; ਧਮ੍ਮਵਾਦਿਨੋ ਚ ਪਨ ਦੁਪ੍ਪਟਿਮਨ੍ਤਿਯਾ ਭਵਨ੍ਤਿ. ਨਾਹਂ ਸਕ੍ਕੋਮਿ ਸਮਣੇਨ ਗੋਤਮੇਨ ਸਦ੍ਧਿਂ ਅਸ੍ਮਿਂ ਵਚਨੇ ਪਟਿਮਨ੍ਤੇਤੁ’’ਨ੍ਤਿ. ਦੁਤਿਯਮ੍ਪਿ ਖੋ ਤੇ ਬ੍ਰਾਹ੍ਮਣਾ ਅਸ੍ਸਲਾਯਨਂ ਮਾਣਵਂ ਏਤਦਵੋਚੁਂ – ‘‘ਅਯਂ, ਭੋ ਅਸ੍ਸਲਾਯਨ, ਸਮਣੋ ਗੋਤਮੋ ਚਾਤੁਵਣ੍ਣਿਂ ਸੁਦ੍ਧਿਂ ਪਞ੍ਞਪੇਤਿ. ਏਤੁ ਭਵਂ ਅਸ੍ਸਲਾਯਨੋ ਸਮਣੇਨ ਗੋਤਮੇਨ ਸਦ੍ਧਿਂ ਅਸ੍ਮਿਂ ਵਚਨੇ ਪਟਿਮਨ੍ਤੇਤੁ [ਪਟਿਮਨ੍ਤੇਤੁਂ (ਸੀ. ਪੀ. ਕ.)]. ਚਰਿਤਂ ਖੋ ਪਨ ਭੋਤਾ ਅਸ੍ਸਲਾਯਨੇਨ ਪਰਿਬ੍ਬਾਜਕ’’ਨ੍ਤਿ. ਦੁਤਿਯਮ੍ਪਿ ਖੋ ਅਸ੍ਸਲਾਯਨੋ ਮਾਣਵੋ ਤੇ ਬ੍ਰਾਹ੍ਮਣੇ ਏਤਦਵੋਚ – ‘‘ਸਮਣੋ ਖਲੁ, ਭੋ, ਗੋਤਮੋ ਧਮ੍ਮਵਾਦੀ; ਧਮ੍ਮਵਾਦਿਨੋ ਚ ਪਨ ਦੁਪ੍ਪਟਿਮਨ੍ਤਿਯਾ ਭਵਨ੍ਤਿ. ਨਾਹਂ ਸਕ੍ਕੋਮਿ ਸਮਣੇਨ ਗੋਤਮੇਨ ਸਦ੍ਧਿਂ ਅਸ੍ਮਿਂ ਵਚਨੇ ਪਟਿਮਨ੍ਤੇਤੁ’’ਨ੍ਤਿ. ਤਤਿਯਮ੍ਪਿ ਖੋ ਤੇ ਬ੍ਰਾਹ੍ਮਣਾ ਅਸ੍ਸਲਾਯਨਂ ਮਾਣਵਂ ਏਤਦਵੋਚੁਂ – ‘‘ਅਯਂ, ਭੋ ਅਸ੍ਸਲਾਯਨ, ਸਮਣੋ ਗੋਤਮੋ ਚਾਤੁਵਣ੍ਣਿਂ ਸੁਦ੍ਧਿਂ ਪਞ੍ਞਪੇਤਿ. ਏਤੁ ਭਵਂ ਅਸ੍ਸਲਾਯਨੋ ਸਮਣੇਨ ਗੋਤਮੇਨ ਸਦ੍ਧਿਂ ਅਸ੍ਮਿਂ ਵਚਨੇ ਪਟਿਮਨ੍ਤੇਤੁ [ਪਟਿਮਨ੍ਤੇਤੁਂ (ਸੀ. ਪੀ. ਕ.)]. ਚਰਿਤਂ ਖੋ ਪਨ ਭੋਤਾ ਅਸ੍ਸਲਾਯਨੇਨ ਪਰਿਬ੍ਬਾਜਕਂ. ਮਾ ਭਵਂ ਅਸ੍ਸਲਾਯਨੋ ਅਯੁਦ੍ਧਪਰਾਜਿਤਂ ਪਰਾਜਯੀ’’ਤਿ.
ਏਵਂ ਵੁਤ੍ਤੇ, ਅਸ੍ਸਲਾਯਨੋ ਮਾਣਵੋ ਤੇ ਬ੍ਰਾਹ੍ਮਣੇ ਏਤਦਵੋਚ – ‘‘ਅਦ੍ਧਾ ਖੋ ਅਹਂ ਭਵਨ੍ਤੋ ਨ ਲਭਾਮਿ. ਸਮਣੋ ਖਲੁ, ਭੋ, ਗੋਤਮੋ ਧਮ੍ਮਵਾਦੀ; ਧਮ੍ਮਵਾਦਿਨੋ ਚ ਪਨ ਦੁਪ੍ਪਟਿਮਨ੍ਤਿਯਾ ਭਵਨ੍ਤਿ. ਨਾਹਂ ਸਕ੍ਕੋਮਿ ਸਮਣੇਨ ਗੋਤਮੇਨ ਸਦ੍ਧਿਂ ਅਸ੍ਮਿਂ ਵਚਨੇ ਪਟਿਮਨ੍ਤੇਤੁਨ੍ਤਿ. ਅਪਿ ਚਾਹਂ ਭਵਨ੍ਤਾਨਂ ਵਚਨੇਨ ਗਮਿਸ੍ਸਾਮੀ’’ਤਿ.
੪੦੨. ਅਥ ਖੋ ਅਸ੍ਸਲਾਯਨੋ ਮਾਣਵੋ ਮਹਤਾ ਬ੍ਰਾਹ੍ਮਣਗਣੇਨ ਸਦ੍ਧਿਂ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਤਾ ਸਦ੍ਧਿਂ ਸਮ੍ਮੋਦਿ. ਸਮ੍ਮੋਦਨੀਯਂ ਕਥਂ ਸਾਰਣੀਯਂ ਵੀਤਿਸਾਰੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਅਸ੍ਸਲਾਯਨੋ ਮਾਣਵੋ ਭਗਵਨ੍ਤਂ ਏਤਦਵੋਚ – ‘‘ਬ੍ਰਾਹ੍ਮਣਾ, ਭੋ ਗੋਤਮ, ਏਵਮਾਹਂਸੁ – ‘ਬ੍ਰਾਹ੍ਮਣੋਵ ਸੇਟ੍ਠੋ ਵਣ੍ਣੋ, ਹੀਨੋ ਅਞ੍ਞੋ ਵਣ੍ਣੋ; ਬ੍ਰਾਹ੍ਮਣੋਵ ਸੁਕ੍ਕੋ ਵਣ੍ਣੋ, ਕਣ੍ਹੋ ਅਞ੍ਞੋ ਵਣ੍ਣੋ; ਬ੍ਰਾਹ੍ਮਣੋਵ ਸੁਜ੍ਝਨ੍ਤਿ, ਨੋ ਅਬ੍ਰਾਹ੍ਮਣਾ; ਬ੍ਰਾਹ੍ਮਣਾਵ ਬ੍ਰਹ੍ਮੁਨੋ ਪੁਤ੍ਤਾ ਓਰਸਾ ਮੁਖਤੋ ਜਾਤਾ ਬ੍ਰਹ੍ਮਜਾ ਬ੍ਰਹ੍ਮਨਿਮ੍ਮਿਤਾ ਬ੍ਰਹ੍ਮਦਾਯਾਦਾ’ਤਿ. ਇਧ ਭਵਂ ਗੋਤਮੋ ਕਿਮਾਹਾ’’ਤਿ? ‘‘ਦਿਸ੍ਸਨ੍ਤਿ [ਦਿਸ੍ਸਨ੍ਤੇ (ਸੀ. ਸ੍ਯਾ. ਕਂ. ਪੀ.)] ਖੋ ਪਨ, ਅਸ੍ਸਲਾਯਨ, ਬ੍ਰਾਹ੍ਮਣਾਨਂ ਬ੍ਰਾਹ੍ਮਣਿਯੋ ਉਤੁਨਿਯੋਪਿ ਗਬ੍ਭਿਨਿਯੋਪਿ ਵਿਜਾਯਮਾਨਾਪਿ ਪਾਯਮਾਨਾਪਿ. ਤੇ ਚ ਬ੍ਰਾਹ੍ਮਣਿਯੋਨਿਜਾਵ ਸਮਾਨਾ ਏਵਮਾਹਂਸੁ – ‘ਬ੍ਰਾਹ੍ਮਣੋਵ ਸੇਟ੍ਠੋ ਵਣ੍ਣੋ, ਹੀਨੋ ਅਞ੍ਞੋ ਵਣ੍ਣੋ; ਬ੍ਰਾਹ੍ਮਣੋਵ ਸੁਕ੍ਕੋ ਵਣ੍ਣੋ, ਕਣ੍ਹੋ ਅਞ੍ਞੋ ਵਣ੍ਣੋ; ਬ੍ਰਾਹ੍ਮਣਾਵ ਸੁਜ੍ਝਨ੍ਤਿ, ਨੋ ਅਬ੍ਰਾਹ੍ਮਣਾ; ਬ੍ਰਾਹ੍ਮਣਾਵ ਬ੍ਰਹ੍ਮੁਨੋ ਪੁਤ੍ਤਾ ਓਰਸਾ ਮੁਖਤੋ ਜਾਤਾ ਬ੍ਰਹ੍ਮਜਾ ਬ੍ਰਹ੍ਮਨਿਮ੍ਮਿਤਾ ਬ੍ਰਹ੍ਮਦਾਯਾਦਾ’’’ਤਿ. ‘‘ਕਿਞ੍ਚਾਪਿ ਭਵਂ ਗੋਤਮੋ ਏਵਮਾਹ, ਅਥ ਖ੍ਵੇਤ੍ਥ ਬ੍ਰਾਹ੍ਮਣਾ ਏਵਮੇਤਂ ਮਞ੍ਞਨ੍ਤਿ – ‘ਬ੍ਰਾਹ੍ਮਣੋਵ ਸੇਟ੍ਠੋ ਵਣ੍ਣੋ, ਹੀਨੋ ਅਞ੍ਞੋ ਵਣ੍ਣੋ…ਪੇ… ਬ੍ਰਹ੍ਮਦਾਯਾਦਾ’’’ਤਿ.
੪੦੩. ‘‘ਤਂ ਕਿਂ ਮਞ੍ਞਸਿ, ਅਸ੍ਸਲਾਯਨ, ਸੁਤਂ ਤੇ – ‘ਯੋਨਕਮ੍ਬੋਜੇਸੁ ਅਞ੍ਞੇਸੁ ਚ ਪਚ੍ਚਨ੍ਤਿਮੇਸੁ ਜਨਪਦੇਸੁ ਦ੍ਵੇਵ ਵਣ੍ਣਾ – ਅਯ੍ਯੋ ਚੇਵ ਦਾਸੋ ਚ; ਅਯ੍ਯੋ ਹੁਤ੍ਵਾ ਦਾਸੋ ਹੋਤਿ, ਦਾਸੋ ਹੁਤ੍ਵਾ ਅਯ੍ਯੋ ਹੋਤੀ’’’ਤਿ? ‘‘ਏਵਂ, ਭੋ, ਸੁਤਂ ਤਂ ਮੇ – ‘ਯੋਨਕਮ੍ਬੋਜੇਸੁ ਅਞ੍ਞੇਸੁ ਚ ਪਚ੍ਚਨ੍ਤਿਮੇਸੁ ਜਨਪਦੇਸੁ ਦ੍ਵੇਵ ਵਣ੍ਣਾ – ਅਯ੍ਯੋ ਚੇਵ ਦਾਸੋ ਚ; ਅਯ੍ਯੋ ਹੁਤ੍ਵਾ ਦਾਸੋ ਹੋਤਿ, ਦਾਸੋ ਹੁਤ੍ਵਾ ਅਯ੍ਯੋ ਹੋਤੀ’’’ਤਿ. ‘‘ਏਤ੍ਥ, ਅਸ੍ਸਲਾਯਨ, ਬ੍ਰਾਹ੍ਮਣਾਨਂ ਕਿਂ ਬਲਂ, ਕੋ ਅਸ੍ਸਾਸੋ ਯਦੇਤ੍ਥ ਬ੍ਰਾਹ੍ਮਣਾ ਏਵਮਾਹਂਸੁ – ‘ਬ੍ਰਾਹ੍ਮਣੋਵ ਸੇਟ੍ਠੋ ਵਣ੍ਣੋ, ਹੀਨੋ ਅਞ੍ਞੋ ਵਣ੍ਣੋ…ਪੇ… ਬ੍ਰਹ੍ਮਦਾਯਾਦਾ’’’ਤਿ? ‘‘ਕਿਞ੍ਚਾਪਿ ਭਵਂ ਗੋਤਮੋ ਏਵਮਾਹ, ਅਥ ਖ੍ਵੇਤ੍ਥ ਬ੍ਰਾਹ੍ਮਣਾ ਏਵਮੇਤਂ ਮਞ੍ਞਨ੍ਤਿ – ‘ਬ੍ਰਾਹ੍ਮਣੋਵ ਸੇਟ੍ਠੋ ਵਣ੍ਣੋ, ਹੀਨੋ ਅਞ੍ਞੋ ਵਣ੍ਣੋ…ਪੇ… ਬ੍ਰਹ੍ਮਦਾਯਾਦਾ’’’ਤਿ.
੪੦੪. ‘‘ਤਂ ਕਿਂ ਮਞ੍ਞਸਿ, ਅਸ੍ਸਲਾਯਨ, ਖਤ੍ਤਿਯੋਵ ਨੁ ਖੋ ਪਾਣਾਤਿਪਾਤੀ ਅਦਿਨ੍ਨਾਦਾਯੀ ਕਾਮੇਸੁਮਿਚ੍ਛਾਚਾਰੀ ਮੁਸਾਵਾਦੀ ਪਿਸੁਣਵਾਚੋ ਫਰੁਸਵਾਚੋ ਸਮ੍ਫਪ੍ਪਲਾਪੀ ਅਭਿਜ੍ਝਾਲੁ ਬ੍ਯਾਪਨ੍ਨਚਿਤ੍ਤੋ ਮਿਚ੍ਛਾਦਿਟ੍ਠਿ ਕਾਯਸ੍ਸ ਭੇਦਾ ਪਰਂ ਮਰਣਾ ਅਪਾਯਂ ਦੁਗ੍ਗਤਿਂ ਵਿਨਿਪਾਤਂ ਨਿਰਯਂ ਉਪਪਜ੍ਜੇਯ੍ਯ, ਨੋ ਬ੍ਰਾਹ੍ਮਣੋ? ਵੇਸ੍ਸੋਵ ਨੁ ਖੋ…ਪੇ… ਸੁਦ੍ਦੋਵ ਨੁ ਖੋ ਪਾਣਾਤਿਪਾਤੀ ਅਦਿਨ੍ਨਾਦਾਯੀ ਕਾਮੇਸੁਮਿਚ੍ਛਾਚਾਰੀ ਮੁਸਾਵਾਦੀ ਪਿਸੁਣਵਾਚੋ ਫਰੁਸਵਾਚੋ ਸਮ੍ਫਪ੍ਪਲਾਪੀ ਅਭਿਜ੍ਝਾਲੁ ਬ੍ਯਾਪਨ੍ਨਚਿਤ੍ਤੋ ਮਿਚ੍ਛਾਦਿਟ੍ਠਿ ਕਾਯਸ੍ਸ ਭੇਦਾ ਪਰਂ ਮਰਣਾ ਅਪਾਯਂ ਦੁਗ੍ਗਤਿਂ ਵਿਨਿਪਾਤਂ ਨਿਰਯਂ ਉਪਪਜ੍ਜੇਯ੍ਯ, ਨੋ ਬ੍ਰਾਹ੍ਮਣੋ’’ਤਿ? ‘‘ਨੋ ਹਿਦਂ, ਭੋ ਗੋਤਮ. ਖਤ੍ਤਿਯੋਪਿ ਹਿ, ਭੋ ਗੋਤਮ, ਪਾਣਾਤਿਪਾਤੀ ਅਦਿਨ੍ਨਾਦਾਯੀ ਕਾਮੇਸੁਮਿਚ੍ਛਾਚਾਰੀ ਮੁਸਾਵਾਦੀ ਪਿਸੁਣਵਾਚੋ ਫਰੁਸਵਾਚੋ ਸਮ੍ਫਪ੍ਪਲਾਪੀ ਅਭਿਜ੍ਝਾਲੁ ਬ੍ਯਾਪਨ੍ਨਚਿਤ੍ਤੋ ਮਿਚ੍ਛਾਦਿਟ੍ਠਿ ਕਾਯਸ੍ਸ ਭੇਦਾ ਪਰਂ ਮਰਣਾ ਅਪਾਯਂ ਦੁਗ੍ਗਤਿਂ ਵਿਨਿਪਾਤਂ ਨਿਰਯਂ ਉਪਪਜ੍ਜੇਯ੍ਯ. ਬ੍ਰਾਹ੍ਮਣੋਪਿ ਹਿ, ਭੋ ਗੋਤਮ…ਪੇ… ਵੇਸ੍ਸੋਪਿ ਹਿ, ਭੋ ਗੋਤਮ…ਪੇ… ਸੁਦ੍ਦੋਪਿ ਹਿ, ਭੋ ਗੋਤਮ…ਪੇ… ਸਬ੍ਬੇਪਿ ਹਿ, ਭੋ ਗੋਤਮ, ਚਤ੍ਤਾਰੋ ਵਣ੍ਣਾ ਪਾਣਾਤਿਪਾਤਿਨੋ ਅਦਿਨ੍ਨਾਦਾਯਿਨੋ ਕਾਮੇਸੁਮਿਚ੍ਛਾਚਾਰਿਨੋ ਮੁਸਾਵਾਦਿਨੋ ਪਿਸੁਣਵਾਚਾ ਫਰੁਸਵਾਚਾ ਸਮ੍ਫਪ੍ਪਲਾਪਿਨੋ ਅਭਿਜ੍ਝਾਲੂ ਬ੍ਯਾਪਨ੍ਨਚਿਤ੍ਤਾ ਮਿਚ੍ਛਾਦਿਟ੍ਠੀ ਕਾਯਸ੍ਸ ਭੇਦਾ ਪਰਂ ਮਰਣਾ ਅਪਾਯਂ ਦੁਗ੍ਗਤਿਂ ਵਿਨਿਪਾਤਂ ਨਿਰਯਂ ਉਪਪਜ੍ਜੇਯ੍ਯੁ’’ਨ੍ਤਿ. ‘‘ਏਤ੍ਥ, ਅਸ੍ਸਲਾਯਨ, ਬ੍ਰਾਹ੍ਮਣਾਨਂ ਕਿਂ ਬਲਂ, ਕੋ ਅਸ੍ਸਾਸੋ ਯਦੇਤ੍ਥ ਬ੍ਰਾਹ੍ਮਣਾ ਏਵਮਾਹਂਸੁ – ‘ਬ੍ਰਾਹ੍ਮਣੋਵ ਸੇਟ੍ਠੋ ਵਣ੍ਣੋ, ਹੀਨੋ ਅਞ੍ਞੋ ਵਣ੍ਣੋ…ਪੇ… ਬ੍ਰਹ੍ਮਦਾਯਾਦਾ’’’ਤਿ? ‘‘ਕਿਞ੍ਚਾਪਿ ਭਵਂ ਗੋਤਮੋ ਏਵਮਾਹ, ਅਥ ਖ੍ਵੇਤ੍ਥ ਬ੍ਰਾਹ੍ਮਣਾ ਏਵਮੇਤਂ ਮਞ੍ਞਨ੍ਤਿ – ‘ਬ੍ਰਾਹ੍ਮਣੋਵ ਸੇਟ੍ਠੋ ਵਣ੍ਣੋ, ਹੀਨੋ ਅਞ੍ਞੋ ਵਣ੍ਣੋ…ਪੇ… ਬ੍ਰਹ੍ਮਦਾਯਾਦਾ’’’ਤਿ.
੪੦੫. ‘‘ਤਂ ਕਿਂ ਮਞ੍ਞਸਿ, ਅਸ੍ਸਲਾਯਨ, ਬ੍ਰਾਹ੍ਮਣੋਵ ਨੁ ਖੋ ਪਾਣਾਤਿਪਾਤਾ ਪਟਿਵਿਰਤੋ ਅਦਿਨ੍ਨਾਦਾਨਾ ਪਟਿਵਿਰਤੋ ਕਾਮੇਸੁਮਿਚ੍ਛਾਚਾਰਾ ਪਟਿਵਿਰਤੋ ਮੁਸਾਵਾਦਾ ਪਟਿਵਿਰਤੋ ਪਿਸੁਣਾਯ ਵਾਚਾਯ ਪਟਿਵਿਰਤੋ ਫਰੁਸਾਯ ਵਾਚਾਯ ਪਟਿਵਿਰਤੋ ਸਮ੍ਫਪ੍ਪਲਾਪਾ ਪਟਿਵਿਰਤੋ ਅਨਭਿਜ੍ਝਾਲੁ ਅਬ੍ਯਾਪਨ੍ਨਚਿਤ੍ਤੋ ਸਮ੍ਮਾਦਿਟ੍ਠਿ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜੇਯ੍ਯ, ਨੋ [ਨੋ ਚ (ਕ.)] ਖਤ੍ਤਿਯੋ ਨੋ ਵੇਸ੍ਸੋ, ਨੋ ਸੁਦ੍ਦੋ’’ਤਿ? ‘‘ਨੋ ਹਿਦਂ, ਭੋ ਗੋਤਮ! ਖਤ੍ਤਿਯੋਪਿ ਹਿ, ਭੋ ਗੋਤਮ, ਪਾਣਾਤਿਪਾਤਾ ਪਟਿਵਿਰਤੋ ਅਦਿਨ੍ਨਾਦਾਨਾ ਪਟਿਵਿਰਤੋ ਕਾਮੇਸੁਮਿਚ੍ਛਾਚਾਰਾ ਪਟਿਵਿਰਤੋ ਮੁਸਾਵਾਦਾ ਪਟਿਵਿਰਤੋ ਪਿਸੁਣਾਯ ਵਾਚਾਯ ਪਟਿਵਿਰਤੋ ਫਰੁਸਾਯ ਵਾਚਾਯ ਪਟਿਵਿਰਤੋ ਸਮ੍ਫਪ੍ਪਲਾਪਾ ਪਟਿਵਿਰਤੋ ਅਨਭਿਜ੍ਝਾਲੁ ਅਬ੍ਯਾਪਨ੍ਨਚਿਤ੍ਤੋ ਸਮ੍ਮਾਦਿਟ੍ਠਿ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜੇਯ੍ਯ. ਬ੍ਰਾਹ੍ਮਣੋਪਿ ਹਿ, ਭੋ ਗੋਤਮ…ਪੇ… ਵੇਸ੍ਸੋਪਿ ਹਿ, ਭੋ ਗੋਤਮ…ਪੇ… ਸੁਦ੍ਦੋਪਿ ਹਿ, ਭੋ ਗੋਤਮ…ਪੇ… ਸਬ੍ਬੇਪਿ ਹਿ, ਭੋ ਗੋਤਮ, ਚਤ੍ਤਾਰੋ ਵਣ੍ਣਾ ਪਾਣਾਤਿਪਾਤਾ ਪਟਿਵਿਰਤਾ ਅਦਿਨ੍ਨਾਦਾਨਾ ਪਟਿਵਿਰਤਾ ਕਾਮੇਸੁਮਿਚ੍ਛਾਚਾਰਾ ਪਟਿਵਿਰਤਾ ਮੁਸਾਵਾਦਾ ਪਟਿਵਿਰਤਾ ਪਿਸੁਣਾਯ ਵਾਚਾਯ ਪਟਿਵਿਰਤਾ ਫਰੁਸਾਯ ਵਾਚਾਯ ਪਟਿਵਿਰਤਾ ਸਮ੍ਫਪ੍ਪਲਾਪਾ ਪਟਿਵਿਰਤਾ ਅਨਭਿਜ੍ਝਾਲੂ ਅਬ੍ਯਾਪਨ੍ਨਚਿਤ੍ਤਾ ਸਮ੍ਮਾਦਿਟ੍ਠੀ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜੇਯ੍ਯੁ’’ਨ੍ਤਿ. ‘‘ਏਤ੍ਥ, ਅਸ੍ਸਲਾਯਨ, ਬ੍ਰਾਹ੍ਮਣਾਨਂ ਕਿਂ ਬਲਂ, ਕੋ ਅਸ੍ਸਾਸੋ ਯਦੇਤ੍ਥ ਬ੍ਰਾਹ੍ਮਣਾ ਏਵਮਾਹਂਸੁ – ‘ਬ੍ਰਾਹ੍ਮਣੋਵ ਸੇਟ੍ਠੋ ਵਣ੍ਣੋ, ਹੀਨੋ ਅਞ੍ਞੋ ਵਣ੍ਣੋ…ਪੇ… ਬ੍ਰਹ੍ਮਦਾਯਾਦਾ’’’ਤਿ? ‘‘ਕਿਞ੍ਚਾਪਿ ਭਵਂ ਗੋਤਮੋ ਏਵਮਾਹ, ਅਥ ਖ੍ਵੇਤ੍ਥ ਬ੍ਰਾਹ੍ਮਣਾ ਏਵਮੇਤਂ ਮਞ੍ਞਨ੍ਤਿ – ‘ਬ੍ਰਾਹ੍ਮਣੋਵ ਸੇਟ੍ਠੋ ਵਣ੍ਣੋ, ਹੀਨੋ ਅਞ੍ਞੋ ਵਣ੍ਣੋ…ਪੇ… ਬ੍ਰਹ੍ਮਦਾਯਾਦਾ’’’ਤਿ.
੪੦੬. ‘‘ਤਂ ਕਿਂ ਮਞ੍ਞਸਿ, ਅਸ੍ਸਲਾਯਨ, ਬ੍ਰਾਹ੍ਮਣੋਵ ਨੁ ਖੋ ਪਹੋਤਿ ਅਸ੍ਮਿਂ ਪਦੇਸੇ ਅਵੇਰਂ ਅਬ੍ਯਾਬਜ੍ਝਂ ਮੇਤ੍ਤਚਿਤ੍ਤਂ ਭਾਵੇਤੁਂ, ਨੋ ਖਤ੍ਤਿਯੋ, ਨੋ ਵੇਸ੍ਸੋ ਨੋ ਸੁਦ੍ਦੋ’’ਤਿ? ‘‘ਨੋ ਹਿਦਂ, ਭੋ ਗੋਤਮ! ਖਤ੍ਤਿਯੋਪਿ ਹਿ, ਭੋ ਗੋਤਮ, ਪਹੋਤਿ ਅਸ੍ਮਿਂ ਪਦੇਸੇ ਅਵੇਰਂ ਅਬ੍ਯਾਬਜ੍ਝਂ ਮੇਤ੍ਤਚਿਤ੍ਤਂ ਭਾਵੇਤੁਂ; ਬ੍ਰਾਹ੍ਮਣੋਪਿ ਹਿ, ਭੋ ਗੋਤਮ… ਵੇਸ੍ਸੋਪਿ ਹਿ, ਭੋ ਗੋਤਮ… ਸੁਦ੍ਦੋਪਿ ਹਿ, ਭੋ ਗੋਤਮ… ਸਬ੍ਬੇਪਿ ਹਿ, ਭੋ ਗੋਤਮ, ਚਤ੍ਤਾਰੋ ਵਣ੍ਣਾ ਪਹੋਨ੍ਤਿ ਅਸ੍ਮਿਂ ਪਦੇਸੇ ਅਵੇਰਂ ਅਬ੍ਯਾਬਜ੍ਝਂ ਮੇਤ੍ਤਚਿਤ੍ਤਂ ਭਾਵੇਤੁ’’ਨ੍ਤਿ. ‘‘ਏਤ੍ਥ, ਅਸ੍ਸਲਾਯਨ, ਬ੍ਰਾਹ੍ਮਣਾਨਂ ਕਿਂ ਬਲਂ, ਕੋ ਅਸ੍ਸਾਸੋ ਯਦੇਤ੍ਥ ਬ੍ਰਾਹ੍ਮਣਾ ਏਵਮਾਹਂਸੁ – ‘ਬ੍ਰਾਹ੍ਮਣੋਵ ਸੇਟ੍ਠੋ ਵਣ੍ਣੋ, ਹੀਨੋ ਅਞ੍ਞੋ ਵਣ੍ਣੋ…ਪੇ… ਬ੍ਰਹ੍ਮਦਾਯਾਦਾ’’’ਤਿ? ‘‘ਕਿਞ੍ਚਾਪਿ ਭਵਂ ਗੋਤਮੋ ਏਵਮਾਹ, ਅਥ ਖ੍ਵੇਤ੍ਥ ਬ੍ਰਾਹ੍ਮਣਾ ਏਵਮੇਤਂ ਮਞ੍ਞਨ੍ਤਿ – ‘ਬ੍ਰਾਹ੍ਮਣੋਵ ਸੇਟ੍ਠੋ ਵਣ੍ਣੋ, ਹੀਨੋ ਅਞ੍ਞੋ ਵਣ੍ਣੋ…ਪੇ… ਬ੍ਰਹ੍ਮਦਾਯਾਦਾ’’’ਤਿ.
੪੦੭. ‘‘ਤਂ ਕਿਂ ਮਞ੍ਞਸਿ, ਅਸ੍ਸਲਾਯਨ, ਬ੍ਰਾਹ੍ਮਣੋਵ ਨੁ ਖੋ ਪਹੋਤਿ ਸੋਤ੍ਤਿਸਿਨਾਨਿਂ ਆਦਾਯ ਨਦਿਂ ਗਨ੍ਤ੍ਵਾ ਰਜੋਜਲ੍ਲਂ ਪਵਾਹੇਤੁਂ, ਨੋ ਖਤ੍ਤਿਯੋ, ਨੋ ਵੇਸ੍ਸੋ, ਨੋ ਸੁਦ੍ਦੋ’’ਤਿ? ‘‘ਨੋ ਹਿਦਂ, ਭੋ ਗੋਤਮ! ਖਤ੍ਤਿਯੋਪਿ ਹਿ, ਭੋ ਗੋਤਮ, ਪਹੋਤਿ ਸੋਤ੍ਤਿਸਿਨਾਨਿਂ ਆਦਾਯ ਨਦਿਂ ਗਨ੍ਤ੍ਵਾ ਰਜੋਜਲ੍ਲਂ ਪਵਾਹੇਤੁਂ, ਬ੍ਰਾਹ੍ਮਣੋਪਿ ਹਿ, ਭੋ ਗੋਤਮ… ਵੇਸ੍ਸੋਪਿ ਹਿ, ਭੋ ਗੋਤਮ… ਸੁਦ੍ਦੋਪਿ ਹਿ, ਭੋ ਗੋਤਮ… ਸਬ੍ਬੇਪਿ ਹਿ, ਭੋ ਗੋਤਮ, ਚਤ੍ਤਾਰੋ ਵਣ੍ਣਾ ਪਹੋਨ੍ਤਿ ਸੋਤ੍ਤਿਸਿਨਾਨਿਂ ਆਦਾਯ ਨਦਿਂ ਗਨ੍ਤ੍ਵਾ ਰਜੋਜਲ੍ਲਂ ਪਵਾਹੇਤੁ’’ਨ੍ਤਿ. ‘‘ਏਤ੍ਥ, ਅਸ੍ਸਲਾਯਨ, ਬ੍ਰਾਹ੍ਮਣਾਨਂ ਕਿਂ ਬਲਂ, ਕੋ ਅਸ੍ਸਾਸੋ ਯਦੇਤ੍ਥ ਬ੍ਰਾਹ੍ਮਣਾ ਏਵਮਾਹਂਸੁ – ‘ਬ੍ਰਾਹ੍ਮਣੋਵ ਸੇਟ੍ਠੋ ਵਣ੍ਣੋ, ਹੀਨੋ ਅਞ੍ਞੋ ਵਣ੍ਣੋ…ਪੇ… ਬ੍ਰਹ੍ਮਦਾਯਾਦਾ’’’ਤਿ? ‘‘ਕਿਞ੍ਚਾਪਿ ਭਵਂ ਗੋਤਮੋ ਏਵਮਾਹ, ਅਥ ਖ੍ਵੇਤ੍ਥ ਬ੍ਰਾਹ੍ਮਣਾ ਏਵਮੇਤਂ ਮਞ੍ਞਨ੍ਤਿ – ‘ਬ੍ਰਾਹ੍ਮਣੋਵ ਸੇਟ੍ਠੋ ਵਣ੍ਣੋ, ਹੀਨੋ ਅਞ੍ਞੋ ਵਣ੍ਣੋ…ਪੇ… ਬ੍ਰਹ੍ਮਦਾਯਾਦਾ’’’ਤਿ.
੪੦੮. ‘‘ਤਂ ਕਿਂ ਮਞ੍ਞਸਿ, ਅਸ੍ਸਲਾਯਨ, ਇਧ ਰਾਜਾ ਖਤ੍ਤਿਯੋ ਮੁਦ੍ਧਾਵਸਿਤ੍ਤੋ ਨਾਨਾਜਚ੍ਚਾਨਂ ਪੁਰਿਸਾਨਂ ਪੁਰਿਸਸਤਂ ਸਨ੍ਨਿਪਾਤੇਯ੍ਯ – ‘ਆਯਨ੍ਤੁ ਭੋਨ੍ਤੋ ਯੇ ਤਤ੍ਥ ਖਤ੍ਤਿਯਕੁਲਾ ਬ੍ਰਾਹ੍ਮਣਕੁਲਾ ਰਾਜਞ੍ਞਕੁਲਾ ਉਪ੍ਪਨ੍ਨਾ, ਸਾਕਸ੍ਸ ਵਾ ਸਾਲਸ੍ਸ ਵਾ [ਉਪ੍ਪਨ੍ਨਾ ਸਾਲਸ੍ਸ ਵਾ (ਸੀ. ਪੀ.)] ਸਲਲ਼ਸ੍ਸ ਵਾ ਚਨ੍ਦਨਸ੍ਸ ਵਾ ਪਦੁਮਕਸ੍ਸ ਵਾ ਉਤ੍ਤਰਾਰਣਿਂ ਆਦਾਯ, ਅਗ੍ਗਿਂ ਅਭਿਨਿਬ੍ਬਤ੍ਤੇਨ੍ਤੁ, ਤੇਜੋ ਪਾਤੁਕਰੋਨ੍ਤੁ. ਆਯਨ੍ਤੁ ਪਨ ਭੋਨ੍ਤੋ ਯੇ ਤਤ੍ਥ ਚਣ੍ਡਾਲਕੁਲਾ ਨੇਸਾਦਕੁਲਾ ਵੇਨਕੁਲਾ [ਵੇਣਕੁਲਾ (ਸੀ. ਪੀ.), ਵੇਣੁਕੁਲਾ (ਸ੍ਯਾ. ਕਂ.)] ਰਥਕਾਰਕੁਲਾ ਪੁਕ੍ਕੁਸਕੁਲਾ ਉਪ੍ਪਨ੍ਨਾ, ਸਾਪਾਨਦੋਣਿਯਾ ਵਾ ਸੂਕਰਦੋਣਿਯਾ ਵਾ ਰਜਕਦੋਣਿਯਾ ਵਾ ਏਰਣ੍ਡਕਟ੍ਠਸ੍ਸ ਵਾ ਉਤ੍ਤਰਾਰਣਿਂ ਆਦਾਯ, ਅਗ੍ਗਿਂ ਅਭਿਨਿਬ੍ਬਤ੍ਤੇਨ੍ਤੁ, ਤੇਜੋ ਪਾਤੁਕਰੋਨ੍ਤੂ’ਤਿ.
‘‘ਤਂ ਕਿਂ ਮਞ੍ਞਸਿ, ਅਸ੍ਸਲਾਯਨ, ਯੋ ਏਵਂ ਨੁ ਖੋ ਸੋ [ਯੋ ਚ ਨੁ ਖੋ (ਸ੍ਯਾ. ਕਂ. ਕ.)] ਖਤ੍ਤਿਯਕੁਲਾ ਬ੍ਰਾਹ੍ਮਣਕੁਲਾ ਰਾਜਞ੍ਞਕੁਲਾ ਉਪ੍ਪਨ੍ਨੇਹਿ ਸਾਕਸ੍ਸ ਵਾ ਸਾਲਸ੍ਸ ਵਾ ਸਲਲ਼ਸ੍ਸ ਵਾ ਚਨ੍ਦਨਸ੍ਸ ਵਾ ਪਦੁਮਕਸ੍ਸ ਵਾ ਉਤ੍ਤਰਾਰਣਿਂ ਆਦਾਯ ਅਗ੍ਗਿ ਅਭਿਨਿਬ੍ਬਤ੍ਤੋ, ਤੇਜੋ ਪਾਤੁਕਤੋ, ਸੋ ਏਵ ਨੁ ਖ੍ਵਾਸ੍ਸ ਅਗ੍ਗਿ ਅਚ੍ਚਿਮਾ ਚੇਵ [ਚ (ਸੀ. ਪੀ.)] ਵਣ੍ਣਵਾ [ਵਣ੍ਣਿਮਾ (ਸ੍ਯਾ. ਕਂ. ਪੀ. ਕ.)] ਚ ਪਭਸ੍ਸਰੋ ਚ, ਤੇਨ ਚ ਸਕ੍ਕਾ ਅਗ੍ਗਿਨਾ ਅਗ੍ਗਿਕਰਣੀਯਂ ਕਾਤੁਂ; ਯੋ ਪਨ ਸੋ ਚਣ੍ਡਾਲਕੁਲਾ ਨੇਸਾਦਕੁਲਾ ਵੇਨਕੁਲਾ ਰਥਕਾਰਕੁਲਾ ਪੁਕ੍ਕੁਸਕੁਲਾ ਉਪ੍ਪਨ੍ਨੇਹਿ ਸਾਪਾਨਦੋਣਿਯਾ ਵਾ ਸੂਕਰਦੋਣਿਯਾ ਵਾ ਰਜਕਦੋਣਿਯਾ ਵਾ ਏਰਣ੍ਡਕਟ੍ਠਸ੍ਸ ਵਾ ਉਤ੍ਤਰਾਰਣਿਂ ਆਦਾਯ ਅਗ੍ਗਿ ਅਭਿਨਿਬ੍ਬਤ੍ਤੋ, ਤੇਜੋ ਪਾਤੁਕਤੋ ਸ੍ਵਾਸ੍ਸ ਅਗ੍ਗਿ ਨ ਚੇਵ ਅਚ੍ਚਿਮਾ ਨ ਚ ਵਣ੍ਣਵਾ ਨ ਚ ਪਭਸ੍ਸਰੋ, ਨ ਚ ਤੇਨ ਸਕ੍ਕਾ ਅਗ੍ਗਿਨਾ ਅਗ੍ਗਿਕਰਣੀਯਂ ਕਾਤੁ’’ਨ੍ਤਿ? ‘‘ਨੋ ਹਿਦਂ, ਭੋ ਗੋਤਮ! ਯੋਪਿ ਹਿ ਸੋ [ਯੋ ਸੋ (ਸੀ. ਪੀ.)], ਭੋ ਗੋਤਮ, ਖਤ੍ਤਿਯਕੁਲਾ ਬ੍ਰਾਹ੍ਮਣਕੁਲਾ ਰਾਜਞ੍ਞਕੁਲਾ ਉਪ੍ਪਨ੍ਨੇਹਿ ਸਾਕਸ੍ਸ ਵਾ ਸਾਲਸ੍ਸ ਵਾ ਸਲਲ਼ਸ੍ਸ ਵਾ ਚਨ੍ਦਨਸ੍ਸ ਵਾ ਪਦੁਮਕਸ੍ਸ ਵਾ ਉਤ੍ਤਰਾਰਣਿਂ ਆਦਾਯ ਅਗ੍ਗਿ ਅਭਿਨਿਬ੍ਬਤ੍ਤੋ, ਤੇਜੋ ਪਾਤੁਕਤੋ ਸ੍ਵਾਸ੍ਸ [ਸੋ ਚਸ੍ਸ (ਸੀ. ਪੀ.), ਸੋਪਿਸ੍ਸ (ਸ੍ਯਾ. ਕਂ.)] ਅਗ੍ਗਿ ਅਚ੍ਚਿਮਾ ਚੇਵ ਵਣ੍ਣਵਾ ਚ ਪਭਸ੍ਸਰੋ ਚ, ਤੇਨ ਚ ਸਕ੍ਕਾ ਅਗ੍ਗਿਨਾ ਅਗ੍ਗਿਕਰਣੀਯਂ ਕਾਤੁਂ; ਯੋਪਿ ਸੋ ਚਣ੍ਡਾਲਕੁਲਾ ਨੇਸਾਦਕੁਲਾ ਵੇਨਕੁਲਾ ਰਥਕਾਰਕੁਲਾ ਪੁਕ੍ਕੁਸਕੁਲਾ ਉਪ੍ਪਨ੍ਨੇਹਿ ਸਾਪਾਨਦੋਣਿਯਾ ਵਾ ਸੂਕਰਦੋਣਿਯਾ ਵਾ ਰਜਕਦੋਣਿਯਾ ਵਾ ਏਰਣ੍ਡਕਟ੍ਠਸ੍ਸ ਵਾ ਉਤ੍ਤਰਾਰਣਿਂ ਆਦਾਯ ਅਗ੍ਗਿ ਅਭਿਨਿਬ੍ਬਤ੍ਤੋ, ਤੇਜੋ ਪਾਤੁਕਤੋ, ਸ੍ਵਾਸ੍ਸ ਅਗ੍ਗਿ ਅਚ੍ਚਿਮਾ ਚੇਵ ਵਣ੍ਣਵਾ ਚ ਪਭਸ੍ਸਰੋ ਚ, ਤੇਨ ਚ ਸਕ੍ਕਾ ਅਗ੍ਗਿਨਾ ਅਗ੍ਗਿਕਰਣੀਯਂ ਕਾਤੁਂ. ਸਬ੍ਬੋਪਿ ਹਿ, ਭੋ ਗੋਤਮ, ਅਗ੍ਗਿ ਅਚ੍ਚਿਮਾ ਚੇਵ ਵਣ੍ਣਵਾ ਚ ਪਭਸ੍ਸਰੋ ਚ, ਸਬ੍ਬੇਨਪਿ ਸਕ੍ਕਾ ਅਗ੍ਗਿਨਾ ਅਗ੍ਗਿਕਰਣੀਯਂ ਕਾਤੁ’’ਨ੍ਤਿ. ‘‘ਏਤ੍ਥ, ਅਸ੍ਸਲਾਯਨ, ਬ੍ਰਾਹ੍ਮਣਾਨਂ ਕਿਂ ਬਲਂ, ਕੋ ਅਸ੍ਸਾਸੋ ਯਦੇਤ੍ਥ ਬ੍ਰਾਹ੍ਮਣਾ ਏਵਮਾਹਂਸੁ – ‘ਬ੍ਰਾਹ੍ਮਣੋਵ ਸੇਟ੍ਠੋ ਵਣ੍ਣੋ, ਹੀਨੋ ਅਞ੍ਞੋ ਵਣ੍ਣੋ; ਬ੍ਰਾਹ੍ਮਣੋਵ ਸੁਕ੍ਕੋ ਵਣ੍ਣੋ, ਕਣ੍ਹੋ ਅਞ੍ਞੋ ਵਣ੍ਣੋ; ਬ੍ਰਾਹ੍ਮਣਾਵ ਸੁਜ੍ਝਨ੍ਤਿ, ਨੋ ਅਬ੍ਰਾਹ੍ਮਣਾ; ਬ੍ਰਾਹ੍ਮਣਾਵ ਬ੍ਰਹ੍ਮੁਨੋ ਪੁਤ੍ਤਾ ਓਰਸਾ ਮੁਖਤੋ ਜਾਤਾ ਬ੍ਰਹ੍ਮਜਾ ਬ੍ਰਹ੍ਮਨਿਮ੍ਮਿਤਾ ਬ੍ਰਹ੍ਮਦਾਯਾਦਾ’’’ਤਿ? ‘‘ਕਿਞ੍ਚਾਪਿ ਭਵਂ ਗੋਤਮੋ ਏਵਮਾਹ, ਅਥ ਖ੍ਵੇਤ੍ਥ ਬ੍ਰਾਹ੍ਮਣਾ ਏਵਮੇਤਂ ਮਞ੍ਞਨ੍ਤਿ – ‘ਬ੍ਰਾਹ੍ਮਣੋਵ ਸੇਟ੍ਠੋ ਵਣ੍ਣੋ, ਹੀਨੋ ਅਞ੍ਞੋ ਵਣ੍ਣੋ…ਪੇ… ਬ੍ਰਹ੍ਮਦਾਯਾਦਾ’’’ਤਿ.
੪੦੯. ‘‘ਤਂ ਕਿਂ ਮਞ੍ਞਸਿ, ਅਸ੍ਸਲਾਯਨ, ਇਧ ਖਤ੍ਤਿਯਕੁਮਾਰੋ ਬ੍ਰਾਹ੍ਮਣਕਞ੍ਞਾਯ ਸਦ੍ਧਿਂ ਸਂਵਾਸਂ ਕਪ੍ਪੇਯ੍ਯ, ਤੇਸਂ ਸਂਵਾਸਮਨ੍ਵਾਯ ਪੁਤ੍ਤੋ ਜਾਯੇਥ; ਯੋ ਸੋ ਖਤ੍ਤਿਯਕੁਮਾਰੇਨ ਬ੍ਰਾਹ੍ਮਣਕਞ੍ਞਾਯ ਪੁਤ੍ਤੋ ਉਪ੍ਪਨ੍ਨੋ, ਸਿਯਾ ਸੋ ਮਾਤੁਪਿ ਸਦਿਸੋ ਪਿਤੁਪਿ ਸਦਿਸੋ, ‘ਖਤ੍ਤਿਯੋ’ਤਿਪਿ ਵਤ੍ਤਬ੍ਬੋ ‘ਬ੍ਰਾਹ੍ਮਣੋ’ਤਿਪਿ ਵਤ੍ਤਬ੍ਬੋ’’ਤਿ? ‘‘ਯੋ ਸੋ, ਭੋ ਗੋਤਮ, ਖਤ੍ਤਿਯਕੁਮਾਰੇਨ ਬ੍ਰਾਹ੍ਮਣਕਞ੍ਞਾਯ ਪੁਤ੍ਤੋ ਉਪ੍ਪਨ੍ਨੋ, ਸਿਯਾ ਸੋ ਮਾਤੁਪਿ ਸਦਿਸੋ ਪਿਤੁਪਿ ਸਦਿਸੋ, ‘ਖਤ੍ਤਿਯੋ’ਤਿਪਿ ਵਤ੍ਤਬ੍ਬੋ ‘ਬ੍ਰਾਹ੍ਮਣੋ’ਤਿਪਿ ਵਤ੍ਤਬ੍ਬੋ’’ਤਿ.
‘‘ਤਂ ਕਿਂ ਮਞ੍ਞਸਿ, ਅਸ੍ਸਲਾਯਨ, ਇਧ ਬ੍ਰਾਹ੍ਮਣਕੁਮਾਰੋ ਖਤ੍ਤਿਯਕਞ੍ਞਾਯ ਸਦ੍ਧਿਂ ਸਂਵਾਸਂ ਕਪ੍ਪੇਯ੍ਯ, ਤੇਸਂ ਸਂਵਾਸਮਨ੍ਵਾਯ ਪੁਤ੍ਤੋ ਜਾਯੇਥ; ਯੋ ਸੋ ਬ੍ਰਾਹ੍ਮਣਕੁਮਾਰੇਨ ਖਤ੍ਤਿਯਕਞ੍ਞਾਯ ਪੁਤ੍ਤੋ ਉਪ੍ਪਨ੍ਨੋ, ਸਿਯਾ ਸੋ ਮਾਤੁਪਿ ਸਦਿਸੋ ਪਿਤੁਪਿ ਸਦਿਸੋ, ‘ਖਤ੍ਤਿਯੋ’ਤਿਪਿ ਵਤ੍ਤਬ੍ਬੋ ‘ਬ੍ਰਾਹ੍ਮਣੋ’ਤਿਪਿ ਵਤ੍ਤਬ੍ਬੋ’’ਤਿ? ‘‘ਯੋ ਸੋ, ਭੋ ਗੋਤਮ, ਬ੍ਰਾਹ੍ਮਣਕੁਮਾਰੇਨ ਖਤ੍ਤਿਯਕਞ੍ਞਾਯ ਪੁਤ੍ਤੋ ਉਪ੍ਪਨ੍ਨੋ, ਸਿਯਾ ਸੋ ਮਾਤੁਪਿ ਸਦਿਸੋ ਪਿਤੁਪਿ ਸਦਿਸੋ, ‘ਖਤ੍ਤਿਯੋ’ਤਿਪਿ ਵਤ੍ਤਬ੍ਬੋ ‘ਬ੍ਰਾਹ੍ਮਣੋ’ਤਿਪਿ ਵਤ੍ਤਬ੍ਬੋ’’ਤਿ.
‘‘ਤਂ ਕਿਂ ਮਞ੍ਞਸਿ, ਅਸ੍ਸਲਾਯਨ ਇਧ ਵਲ਼ਵਂ ਗਦ੍ਰਭੇਨ ਸਮ੍ਪਯੋਜੇਯ੍ਯੁਂ [ਸਂਯੋਜੇਯ੍ਯ (ਕ.)], ਤੇਸਂ ਸਮ੍ਪਯੋਗਮਨ੍ਵਾਯ ਕਿਸੋਰੋ ਜਾਯੇਥ; ਯੋ ਸੋ ਵਲ਼ਵਾਯ ਗਦ੍ਰਭੇਨ ਕਿਸੋਰੋ ਉਪ੍ਪਨ੍ਨੋ, ਸਿਯਾ ਸੋ ਮਾਤੁਪਿ ਸਦਿਸੋ ਪਿਤੁਪਿ ਸਦਿਸੋ, ‘ਅਸ੍ਸੋ’ਤਿਪਿ ਵਤ੍ਤਬ੍ਬੋ ‘ਗਦ੍ਰਭੋ’ਤਿਪਿ ਵਤ੍ਤਬ੍ਬੋ’’ਤਿ? ‘‘ਕੁਣ੍ਡਞ੍ਹਿ ਸੋ [ਵੇਕੁਰਞ੍ਜਾਯ ਹਿ ਸੋ (ਸੀ. ਪੀ.), ਸੋ ਕੁਮਾਰਣ੍ਡੁਪਿ ਸੋ (ਸ੍ਯਾ. ਕਂ.), ਵੇਕੁਲਜੋ ਹਿ ਸੋ (?)], ਭੋ ਗੋਤਮ, ਅਸ੍ਸਤਰੋ ਹੋਤਿ. ਇਦਂ ਹਿਸ੍ਸ, ਭੋ ਗੋਤਮ, ਨਾਨਾਕਰਣਂ ਪਸ੍ਸਾਮਿ; ਅਮੁਤ੍ਰ ਚ ਪਨੇਸਾਨਂ ਨ ਕਿਞ੍ਚਿ ਨਾਨਾਕਰਣਂ ਪਸ੍ਸਾਮੀ’’ਤਿ.
‘‘ਤਂ ਕਿਂ ਮਞ੍ਞਸਿ, ਅਸ੍ਸਲਾਯਨ, ਇਧਾਸ੍ਸੁ ਦ੍ਵੇ ਮਾਣਵਕਾ ਭਾਤਰੋ ਸਉਦਰਿਯਾ, ਏਕੋ ਅਜ੍ਝਾਯਕੋ ਉਪਨੀਤੋ ਏਕੋ ਅਨਜ੍ਝਾਯਕੋ ਅਨੁਪਨੀਤੋ. ਕਮੇਤ੍ਥ ਬ੍ਰਾਹ੍ਮਣਾ ਪਠਮਂ ਭੋਜੇਯ੍ਯੁਂ ਸਦ੍ਧੇ ਵਾ ਥਾਲਿਪਾਕੇ ਵਾ ਯਞ੍ਞੇ ਵਾ ਪਾਹੁਨੇ ਵਾ’’ਤਿ? ‘‘ਯੋ ਸੋ, ਭੋ ਗੋਤਮ, ਮਾਣਵਕੋ ਅਜ੍ਝਾਯਕੋ ਉਪਨੀਤੋ ਤਮੇਤ੍ਥ ਬ੍ਰਾਹ੍ਮਣਾ ਪਠਮਂ ਭੋਜੇਯ੍ਯੁਂ ਸਦ੍ਧੇ ਵਾ ਥਾਲਿਪਾਕੇ ਵਾ ਯਞ੍ਞੇ ਵਾ ਪਾਹੁਨੇ ਵਾ. ਕਿਞ੍ਹਿ, ਭੋ ਗੋਤਮ, ਅਨਜ੍ਝਾਯਕੇ ਅਨੁਪਨੀਤੇ ਦਿਨ੍ਨਂ ਮਹਪ੍ਫਲਂ ਭਵਿਸ੍ਸਤੀ’’ਤਿ?
‘‘ਤਂ ਕਿਂ ਮਞ੍ਞਸਿ, ਅਸ੍ਸਲਾਯਨ, ਇਧਾਸ੍ਸੁ ਦ੍ਵੇ ਮਾਣਵਕਾ ਭਾਤਰੋ ਸਉਦਰਿਯਾ, ਏਕੋ ਅਜ੍ਝਾਯਕੋ ਉਪਨੀਤੋ ਦੁਸ੍ਸੀਲੋ ਪਾਪਧਮ੍ਮੋ, ਏਕੋ ਅਨਜ੍ਝਾਯਕੋ ਅਨੁਪਨੀਤੋ ਸੀਲਵਾ ਕਲ੍ਯਾਣਧਮ੍ਮੋ. ਕਮੇਤ੍ਥ ਬ੍ਰਾਹ੍ਮਣਾ ਪਠਮਂ ਭੋਜੇਯ੍ਯੁਂ ਸਦ੍ਧੇ ਵਾ ਥਾਲਿਪਾਕੇ ਵਾ ਯਞ੍ਞੇ ਵਾ ਪਾਹੁਨੇ ਵਾ’’ਤਿ? ‘‘ਯੋ ਸੋ, ਭੋ ਗੋਤਮ, ਮਾਣਵਕੋ ਅਨਜ੍ਝਾਯਕੋ ਅਨੁਪਨੀਤੋ ਸੀਲਵਾ ਕਲ੍ਯਾਣਧਮ੍ਮੋ ਤਮੇਤ੍ਥ ਬ੍ਰਾਹ੍ਮਣਾ ਪਠਮਂ ਭੋਜੇਯ੍ਯੁਂ ਸਦ੍ਧੇ ਵਾ ਥਾਲਿਪਾਕੇ ਵਾ ਯਞ੍ਞੇ ਵਾ ਪਾਹੁਨੇ ਵਾ. ਕਿਞ੍ਹਿ, ਭੋ ਗੋਤਮ, ਦੁਸ੍ਸੀਲੇ ਪਾਪਧਮ੍ਮੇ ਦਿਨ੍ਨਂ ਮਹਪ੍ਫਲਂ ਭਵਿਸ੍ਸਤੀ’’ਤਿ?
‘‘ਪੁਬ੍ਬੇ ਖੋ ਤ੍ਵਂ, ਅਸ੍ਸਲਾਯਨ, ਜਾਤਿਂ ਅਗਮਾਸਿ; ਜਾਤਿਂ ਗਨ੍ਤ੍ਵਾ ਮਨ੍ਤੇ ਅਗਮਾਸਿ; ਮਨ੍ਤੇ ਗਨ੍ਤ੍ਵਾ ਤਪੇ ਅਗਮਾਸਿ; ਤਪੇ ਗਨ੍ਤ੍ਵਾ [ਮਨ੍ਤੇ ਗਨ੍ਤ੍ਵਾ ਤਮੇਤਂ ਤ੍ਵਂ (ਸੀ. ਪੀ.), ਮਨ੍ਤੇ ਗਨ੍ਤ੍ਵਾ ਤਮੇਵ ਠਪੇਤ੍ਵਾ (ਸ੍ਯਾ. ਕਂ.)] ਚਾਤੁਵਣ੍ਣਿਂ ਸੁਦ੍ਧਿਂ ਪਚ੍ਚਾਗਤੋ, ਯਮਹਂ ਪਞ੍ਞਪੇਮੀ’’ਤਿ. ਏਵਂ ਵੁਤ੍ਤੇ, ਅਸ੍ਸਲਾਯਨੋ ਮਾਣਵੋ ਤੁਣ੍ਹੀਭੂਤੋ ਮਙ੍ਕੁਭੂਤੋ ਪਤ੍ਤਕ੍ਖਨ੍ਧੋ ਅਧੋਮੁਖੋ ਪਜ੍ਝਾਯਨ੍ਤੋ ਅਪ੍ਪਟਿਭਾਨੋ ਨਿਸੀਦਿ.
੪੧੦. ਅਥ ਖੋ ਭਗਵਾ ਅਸ੍ਸਲਾਯਨਂ ਮਾਣਵਂ ਤੁਣ੍ਹੀਭੂਤਂ ਮਙ੍ਕੁਭੂਤਂ ਪਤ੍ਤਕ੍ਖਨ੍ਧਂ ਅਧੋਮੁਖਂ ਪਜ੍ਝਾਯਨ੍ਤਂ ਅਪ੍ਪਟਿਭਾਨਂ ਵਿਦਿਤ੍ਵਾ ਅਸ੍ਸਲਾਯਨਂ ਮਾਣਵਂ ਏਤਦਵੋਚ – ‘‘ਭੂਤਪੁਬ੍ਬਂ, ਅਸ੍ਸਲਾਯਨ, ਸਤ੍ਤਨ੍ਨਂ ਬ੍ਰਾਹ੍ਮਣਿਸੀਨਂ ਅਰਞ੍ਞਾਯਤਨੇ ਪਣ੍ਣਕੁਟੀਸੁ ਸਮ੍ਮਨ੍ਤਾਨਂ [ਵਸਨ੍ਤਾਨਂ (ਸੀ.)] ਏਵਰੂਪਂ ਪਾਪਕਂ ਦਿਟ੍ਠਿਗਤਂ ਉਪ੍ਪਨ੍ਨਂ ਹੋਤਿ – ‘ਬ੍ਰਾਹ੍ਮਣੋਵ ਸੇਟ੍ਠੋ ਵਣ੍ਣੋ, ਹੀਨੋ ਅਞ੍ਞੋ ਵਣ੍ਣੋ…ਪੇ… ਬ੍ਰਹ੍ਮਦਾਯਾਦਾ’ਤਿ. ਅਸ੍ਸੋਸਿ ਖੋ, ਅਸ੍ਸਲਾਯਨ, ਅਸਿਤੋ ਦੇਵਲੋ ਇਸਿ – ‘ਸਤ੍ਤਨ੍ਨਂ ਕਿਰ ਬ੍ਰਾਹ੍ਮਣਿਸੀਨਂ ਅਰਞ੍ਞਾਯਤਨੇ ਪਣ੍ਣਕੁਟੀਸੁ ਸਮ੍ਮਨ੍ਤਾਨਂ ਏਵਰੂਪਂ ਪਾਪਕਂ ਦਿਟ੍ਠਿਗਤਂ ਉਪ੍ਪਨ੍ਨਂ – ਬ੍ਰਾਹ੍ਮਣੋਵ ਸੇਟ੍ਠੋ ਵਣ੍ਣੋ…ਪੇ… ਬ੍ਰਹ੍ਮਦਾਯਾਦਾ’ਤਿ. ਅਥ ਖੋ, ਅਸ੍ਸਲਾਯਨ, ਅਸਿਤੋ ਦੇਵਲੋ ਇਸਿ ਕੇਸਮਸ੍ਸੁਂ ਕਪ੍ਪੇਤ੍ਵਾ ਮਞ੍ਜਿਟ੍ਠਵਣ੍ਣਾਨਿ ਦੁਸ੍ਸਾਨਿ ਨਿਵਾਸੇਤ੍ਵਾ ਪਟਲਿਯੋ [ਅਟਲਿਯੋ (ਸੀ. ਪੀ.), ਅਗਲਿਯੋ (ਸ੍ਯਾ. ਕਂ.)] ਉਪਾਹਨਾ ਆਰੁਹਿਤ੍ਵਾ ਜਾਤਰੂਪਮਯਂ ਦਣ੍ਡਂ ਗਹੇਤ੍ਵਾ ਸਤ੍ਤਨ੍ਨਂ ਬ੍ਰਾਹ੍ਮਣਿਸੀਨਂ ਪਤ੍ਥਣ੍ਡਿਲੇ ਪਾਤੁਰਹੋਸਿ. ਅਥ ਖੋ, ਅਸ੍ਸਲਾਯਨ, ਅਸਿਤੋ ਦੇਵਲੋ ਇਸਿ ਸਤ੍ਤਨ੍ਨਂ ਬ੍ਰਾਹ੍ਮਣਿਸੀਨਂ ਪਤ੍ਥਣ੍ਡਿਲੇ ਚਙ੍ਕਮਮਾਨੋ ਏਵਮਾਹ – ‘ਹਨ੍ਦ, ਕੋ ਨੁ ਖੋ ਇਮੇ ਭਵਨ੍ਤੋ ਬ੍ਰਾਹ੍ਮਣਿਸਯੋ ਗਤਾ [ਗਨ੍ਤਾ (ਸ੍ਯਾ. ਕਂ. ਕ.)]; ਹਨ੍ਦ, ਕੋ ਨੁ ਖੋ ਇਮੇ ਭਵਨ੍ਤੋ ਬ੍ਰਾਹ੍ਮਣਿਸਯੋ ਗਤਾ’ਤਿ? ਅਥ ਖੋ, ਅਸ੍ਸਲਾਯਨ, ਸਤ੍ਤਨ੍ਨਂ ਬ੍ਰਾਹ੍ਮਣਿਸੀਨਂ ਏਤਦਹੋਸਿ – ‘ਕੋ ਨਾਯਂ ਗਾਮਣ੍ਡਲਰੂਪੋ ਵਿਯ ਸਤ੍ਤਨ੍ਨਂ ਬ੍ਰਾਹ੍ਮਣਿਸੀਨਂ ਪਤ੍ਥਣ੍ਡਿਲੇ ਚਙ੍ਕਮਮਾਨੋ ਏਵਮਾਹ – ‘ਹਨ੍ਦ, ਕੋ ਨੁ ਖੋ ਇਮੇ ਭਵਨ੍ਤੋ ਬ੍ਰਾਹ੍ਮਣਿਸਯੋ ਗਤਾ; ਹਨ੍ਦ, ਕੋ ਨੁ ਖੋ ਇਮੇ ਭਵਨ੍ਤੋ ਬ੍ਰਾਹ੍ਮਣਿਸਯੋ ਗਤਾਤਿ? ਹਨ੍ਦ, ਨਂ ਅਭਿਸਪਾਮਾ’ਤਿ. ਅਥ ਖੋ, ਅਸ੍ਸਲਾਯਨ, ਸਤ੍ਤ ਬ੍ਰਾਹ੍ਮਣਿਸਯੋ ਅਸਿਤਂ ਦੇਵਲਂ ਇਸਿਂ ਅਭਿਸਪਿਂਸੁ – ‘ਭਸ੍ਮਾ, ਵਸਲ [ਵਸਲੀ (ਪੀ.), ਵਸਲਿ (ਕ.), ਚਪਲੀ (ਸ੍ਯਾ. ਕਂ.)], ਹੋਹਿ; ਭਸ੍ਮਾ, ਵਸਲ, ਹੋਹੀ’ਤਿ [ਭਸ੍ਮਾ ਵਸਲ ਹੋਹੀਤਿ ਅਭਿਸਪਵਚਨਂ ਸੀ. ਪੀ. ਪੋਤ੍ਥਕੇਸੁ ਸਕਿਦੇਵ ਆਗਤਂ]. ਯਥਾ ਯਥਾ ਖੋ, ਅਸ੍ਸਲਾਯਨ, ਸਤ੍ਤ ਬ੍ਰਾਹ੍ਮਣਿਸਯੋ ਅਸਿਤਂ ਦੇਵਲਂ ਇਸਿਂ ਅਭਿਸਪਿਂਸੁ ਤਥਾ ਤਥਾ ਅਸਿਤੋ ਦੇਵਲੋ ਇਸਿ ਅਭਿਰੂਪਤਰੋ ਚੇਵ ਹੋਤਿ ਦਸ੍ਸਨੀਯਤਰੋ ਚ ਪਾਸਾਦਿਕਤਰੋ ਚ. ਅਥ ਖੋ, ਅਸ੍ਸਲਾਯਨ, ਸਤ੍ਤਨ੍ਨਂ ਬ੍ਰਾਹ੍ਮਣਿਸੀਨਂ ਏਤਦਹੋਸਿ – ‘ਮੋਘਂ ਵਤ ਨੋ ਤਪੋ, ਅਫਲਂ ਬ੍ਰਹ੍ਮਚਰਿਯਂ. ਮਯਞ੍ਹਿ ਪੁਬ੍ਬੇ ਯਂ ਅਭਿਸਪਾਮ – ਭਸ੍ਮਾ, ਵਸਲ, ਹੋਹਿ; ਭਸ੍ਮਾ, ਵਸਲ, ਹੋਹੀਤਿ ਭਸ੍ਮਾਵ ਭਵਤਿ ਏਕਚ੍ਚੋ. ਇਮਂ ਪਨ ਮਯਂ ਯਥਾ ਯਥਾ ਅਭਿਸਪਾਮ ਤਥਾ ਤਥਾ ਅਭਿਰੂਪਤਰੋ ਚੇਵ ਹੋਤਿ ਦਸ੍ਸਨੀਯਤਰੋ ਚ ਪਾਸਾਦਿਕਤਰੋ ਚਾ’ਤਿ. ‘ਨ ਭਵਨ੍ਤਾਨਂ ਮੋਘਂ ਤਪੋ, ਨਾਫਲਂ ਬ੍ਰਹ੍ਮਚਰਿਯਂ. ਇਙ੍ਘ ਭਵਨ੍ਤੋ, ਯੋ ਮਯਿ ਮਨੋਪਦੋਸੋ ਤਂ ਪਜਹਥਾ’ਤਿ. ‘ਯੋ ਭਵਤਿ ਮਨੋਪਦੋਸੋ ਤਂ ਪਜਹਾਮ. ਕੋ ਨੁ ਭਵਂ ਹੋਤੀ’ਤਿ? ‘ਸੁਤੋ ਨੁ ਭਵਤਂ – ਅਸਿਤੋ ਦੇਵਲੋ ਇਸੀ’ਤਿ? ‘ਏਵਂ, ਭੋ’. ‘ਸੋ ਖ੍ਵਾਹਂ, ਭੋ, ਹੋਮੀ’ਤਿ. ਅਥ ਖੋ, ਅਸ੍ਸਲਾਯਨ, ਸਤ੍ਤ ਬ੍ਰਾਹ੍ਮਣਿਸਯੋ ਅਸਿਤਂ ਦੇਵਲਂ ਇਸਿਂ ਅਭਿਵਾਦੇਤੁਂ ਉਪਕ੍ਕਮਿਂਸੁ.
੪੧੧. ‘‘ਅਥ ਖੋ, ਅਸ੍ਸਲਾਯਨ, ਅਸਿਤੋ ਦੇਵਲੋ ਇਸਿ ਸਤ੍ਤ ਬ੍ਰਾਹ੍ਮਣਿਸਯੋ ਏਤਦਵੋਚ – ‘ਸੁਤਂ ਮੇਤਂ, ਭੋ, ਸਤ੍ਤਨ੍ਨਂ ਕਿਰ ਬ੍ਰਾਹ੍ਮਣਿਸੀਨਂ ਅਰਞ੍ਞਾਯਤਨੇ ਪਣ੍ਣਕੁਟੀਸੁ ਸਮ੍ਮਨ੍ਤਾਨਂ ਏਵਰੂਪਂ ਪਾਪਕਂ ਦਿਟ੍ਠਿਗਤਂ ਉਪ੍ਪਨ੍ਨਂ – ਬ੍ਰਾਹ੍ਮਣੋਵ ਸੇਟ੍ਠੋ ਵਣ੍ਣੋ, ਹੀਨੋ ਅਞ੍ਞੋ ਵਣ੍ਣੋ; ਬ੍ਰਾਹ੍ਮਣੋਵ ਸੁਕ੍ਕੋ ਵਣ੍ਣੋ, ਕਣ੍ਹੋ ਅਞ੍ਞੋ ਵਣ੍ਣੋ; ਬ੍ਰਾਹ੍ਮਣਾਵ ਸੁਜ੍ਝਨ੍ਤਿ, ਨੋ ਅਬ੍ਰਾਹ੍ਮਣਾ; ਬ੍ਰਾਹ੍ਮਣਾਵ ਬ੍ਰਹ੍ਮੁਨੋ ਪੁਤ੍ਤਾ ਓਰਸਾ ਮੁਖਤੋ ਜਾਤਾ ਬ੍ਰਹ੍ਮਜਾ ਬ੍ਰਹ੍ਮਨਿਮ੍ਮਿਤਾ ਬ੍ਰਹ੍ਮਦਾਯਾਦਾ’ਤਿ. ‘ਏਵਂ, ਭੋ’.
‘‘‘ਜਾਨਨ੍ਤਿ ਪਨ ਭੋਨ੍ਤੋ – ਯਾ ਜਨਿਕਾ ਮਾਤਾ [ਜਨਿਮਾਤਾ (ਸੀ. ਸ੍ਯਾ. ਕਂ. ਪੀ.)] ਬ੍ਰਾਹ੍ਮਣਂਯੇਵ ਅਗਮਾਸਿ, ਨੋ ਅਬ੍ਰਾਹ੍ਮਣ’ਨ੍ਤਿ? ‘ਨੋ ਹਿਦਂ, ਭੋ’.
‘‘‘ਜਾਨਨ੍ਤਿ ਪਨ ਭੋਨ੍ਤੋ – ਯਾ ਜਨਿਕਾਮਾਤੁ [ਜਨਿਮਾਤੁ (ਸੀ. ਸ੍ਯਾ. ਕਂ. ਪੀ.)] ਮਾਤਾ ਯਾਵ ਸਤ੍ਤਮਾ ਮਾਤੁਮਾਤਾਮਹਯੁਗਾ ਬ੍ਰਾਹ੍ਮਣਂਯੇਵ ਅਗਮਾਸਿ, ਨੋ ਅਬ੍ਰਾਹ੍ਮਣ’ਨ੍ਤਿ? ‘ਨੋ ਹਿਦਂ, ਭੋ’.
‘‘‘ਜਾਨਨ੍ਤਿ ਪਨ ਭੋਨ੍ਤੋ – ਯੋ ਜਨਕੋ ਪਿਤਾ [ਜਨਿਪਿਤਾ (ਸੀ. ਸ੍ਯਾ. ਕਂ. ਪੀ.)] ਬ੍ਰਾਹ੍ਮਣਿਂਯੇਵ ਅਗਮਾਸਿ, ਨੋ ਅਬ੍ਰਾਹ੍ਮਣਿ’ਨ੍ਤਿ? ‘ਨੋ ਹਿਦਂ, ਭੋ’.
‘‘‘ਜਾਨਨ੍ਤਿ ਪਨ ਭੋਨ੍ਤੋ – ਯੋ ਜਨਕਪਿਤੁ [ਜਨਿਪਿਤੁ (ਸੀ. ਸ੍ਯਾ. ਕਂ. ਪੀ.)] ਪਿਤਾ ਯਾਵ ਸਤ੍ਤਮਾ ਪਿਤੁਪਿਤਾਮਹਯੁਗਾ ਬ੍ਰਾਹ੍ਮਣਿਂਯੇਵ ਅਗਮਾਸਿ, ਨੋ ਅਬ੍ਰਾਹ੍ਮਣਿ’ਨ੍ਤਿ? ‘ਨੋ ਹਿਦਂ, ਭੋ’.
‘‘‘ਜਾਨਨ੍ਤਿ ਪਨ ਭੋਨ੍ਤੋ – ਯਥਾ ਗਬ੍ਭਸ੍ਸ ਅਵਕ੍ਕਨ੍ਤਿ ਹੋਤੀ’ਤਿ [ਨ ਮਯਂ ਜਾਨਾਮ ਭੋ ਯਥਾ ਗਬ੍ਭਸ੍ਸ ਅਵਕ੍ਕਨ੍ਤਿ ਹੋਤੀਤਿ. ਯਥਾ ਕਥਂ ਪਨ ਭੋ ਗਬ੍ਭਸ੍ਸ ਅਵਕ੍ਕਨ੍ਤਿ ਹੋਤੀਤਿ. (ਕ.)]? ‘ਜਾਨਾਮ ਮਯਂ, ਭੋ – ਯਥਾ ਗਬ੍ਭਸ੍ਸ ਅਵਕ੍ਕਨ੍ਤਿ ਹੋਤਿ [ਨ ਮਯਂ ਜਾਨਾਮ ਭੋ ਯਥਾ ਗਬ੍ਭਸ੍ਸ ਅਵਕ੍ਕਨ੍ਤਿ ਹੋਤੀਤਿ. ਯਥਾ ਕਥਂ ਪਨ ਭੋ ਗਬ੍ਭਸ੍ਸ ਅਵਕ੍ਕਨ੍ਤਿ ਹੋਤੀਤਿ. (ਕ.)]. ਇਧ ਮਾਤਾਪਿਤਰੋ ਚ ਸਨ੍ਨਿਪਤਿਤਾ ਹੋਨ੍ਤਿ, ਮਾਤਾ ਚ ਉਤੁਨੀ ਹੋਤਿ, ਗਨ੍ਧਬ੍ਬੋ ਚ ਪਚ੍ਚੁਪਟ੍ਠਿਤੋ ਹੋਤਿ; ਏਵਂ ਤਿਣ੍ਣਂ ਸਨ੍ਨਿਪਾਤਾ ਗਬ੍ਭਸ੍ਸ ਅਵਕ੍ਕਨ੍ਤਿ ਹੋਤੀ’ਤਿ.
‘‘‘ਜਾਨਨ੍ਤਿ ਪਨ ਭੋਨ੍ਤੋ – ਤਗ੍ਘ [ਯਗ੍ਘੇ (ਸੀ. ਸ੍ਯਾ. ਕਂ. ਪੀ.)], ਸੋ ਗਨ੍ਧਬ੍ਬੋ ਖਤ੍ਤਿਯੋ ਵਾ ਬ੍ਰਾਹ੍ਮਣੋ ਵਾ ਵੇਸ੍ਸੋ ਵਾ ਸੁਦ੍ਦੋ ਵਾ’ਤਿ? ‘ਨ ਮਯਂ, ਭੋ, ਜਾਨਾਮ – ਤਗ੍ਘ ਸੋ ਗਨ੍ਧਬ੍ਬੋ ਖਤ੍ਤਿਯੋ ਵਾ ਬ੍ਰਾਹ੍ਮਣੋ ਵਾ ਵੇਸ੍ਸੋ ਵਾ ਸੁਦ੍ਦੋ ਵਾ’ਤਿ. ‘ਏਵਂ ਸਨ੍ਤੇ, ਭੋ, ਜਾਨਾਥ – ਕੇ ਤੁਮ੍ਹੇ ਹੋਥਾ’ਤਿ? ‘ਏਵਂ ਸਨ੍ਤੇ, ਭੋ, ਨ ਮਯਂ ਜਾਨਾਮ – ਕੇ ਮਯਂ ਹੋਮਾ’ਤਿ. ਤੇ ਹਿ ਨਾਮ, ਅਸ੍ਸਲਾਯਨ, ਸਤ੍ਤ ਬ੍ਰਾਹ੍ਮਣਿਸਯੋ ਅਸਿਤੇਨ ਦੇਵਲੇਨ ਇਸਿਨਾ ਸਕੇ ਜਾਤਿਵਾਦੇ ਸਮਨੁਯੁਞ੍ਜੀਯਮਾਨਾ ਸਮਨੁਗ੍ਗਾਹੀਯਮਾਨਾ ਸਮਨੁਭਾਸੀਯਮਾਨਾ ਨ ਸਮ੍ਪਾਯਿਸ੍ਸਨ੍ਤਿ; ਕਿਂ ਪਨ ਤ੍ਵਂ ਏਤਰਹਿ ਮਯਾ ਸਕਸ੍ਮਿਂ ਜਾਤਿਵਾਦੇ ਸਮਨੁਯੁਞ੍ਜੀਯਮਾਨੋ ਸਮਨੁਗ੍ਗਾਹੀਯਮਾਨੋ ਸਮਨੁਭਾਸੀਯਮਾਨੋ ਸਮ੍ਪਾਯਿਸ੍ਸਸਿ, ਯੇਸਂ ਤ੍ਵਂ ਸਾਚਰਿਯਕੋ ਨ ਪੁਣ੍ਣੋ ਦਬ੍ਬਿਗਾਹੋ’’ਤਿ.
ਏਵਂ ਵੁਤ੍ਤੇ, ਅਸ੍ਸਲਾਯਨੋ ਮਾਣਵੋ ਭਗਵਨ੍ਤਂ ਏਤਦਵੋਚ – ‘‘ਅਭਿਕ੍ਕਨ੍ਤਂ, ਭੋ ਗੋਤਮ…ਪੇ… ਉਪਾਸਕਂ ਮਂ ਭਵਂ ਗੋਤਮੋ ਧਾਰੇਤੁ ਅਜ੍ਜਤਗ੍ਗੇ ਪਾਣੁਪੇਤਂ ਸਰਣਂ ਗਤ’’ਨ੍ਤਿ.
ਅਸ੍ਸਲਾਯਨਸੁਤ੍ਤਂ ਨਿਟ੍ਠਿਤਂ ਤਤਿਯਂ.