੧. ਬ੍ਰਹ੍ਮਾਯੁਸੁਤ੍ਤਂ
੩੮੩. ਏਵਂ ਮੇ ਸੁਤਂ – ਏਕਂ ਸਮਯਂ ਭਗਵਾ ਵਿਦੇਹੇਸੁ ਚਾਰਿਕਂ ਚਰਤਿ ਮਹਤਾ ਭਿਕ੍ਖੁਸਙ੍ਘੇਨ ਸਦ੍ਧਿਂ ਪਞ੍ਚਮਤ੍ਤੇਹਿ ਭਿਕ੍ਖੁਸਤੇਹਿ. ਤੇਨ ਖੋ ਪਨ ਸਮਯੇਨ ਬ੍ਰਹ੍ਮਾਯੁ ਬ੍ਰਾਹ੍ਮਣੋ ਮਿਥਿਲਾਯਂ ਪਟਿਵਸਤਿ ਜਿਣ੍ਣੋ ਵੁਡ੍ਢੋ ਮਹਲ੍ਲਕੋ ਅਦ੍ਧਗਤੋ ਵਯੋਅਨੁਪ੍ਪਤ੍ਤੋ, ਵੀਸਵਸ੍ਸਸਤਿਕੋ ਜਾਤਿਯਾ, ਤਿਣ੍ਣਂ ਵੇਦਾਨਂ [ਬੇਦਾਨਂ (ਕ.)] ਪਾਰਗੂ ਸਨਿਘਣ੍ਡੁਕੇਟੁਭਾਨਂ ਸਾਕ੍ਖਰਪ੍ਪਭੇਦਾਨਂ ਇਤਿਹਾਸਪਞ੍ਚਮਾਨਂ, ਪਦਕੋ, ਵੇਯ੍ਯਾਕਰਣੋ, ਲੋਕਾਯਤਮਹਾਪੁਰਿਸਲਕ੍ਖਣੇਸੁ ਅਨਵਯੋ. ਅਸ੍ਸੋਸਿ ਖੋ ਬ੍ਰਹ੍ਮਾਯੁ ਬ੍ਰਾਹ੍ਮਣੋ – ‘‘ਸਮਣੋ ਖਲੁ ਭੋ, ਗੋਤਮੋ ਸਕ੍ਯਪੁਤ੍ਤੋ ਸਕ੍ਯਕੁਲਾ ਪਬ੍ਬਜਿਤੋ ਵਿਦੇਹੇਸੁ ਚਾਰਿਕਂ ਚਰਤਿ ਮਹਤਾ ਭਿਕ੍ਖੁਸਙ੍ਘੇਨ ਸਦ੍ਧਿਂ ਪਞ੍ਚਮਤ੍ਤੇਹਿ ਭਿਕ੍ਖੁਸਤੇਹਿ. ਤਂ ਖੋ ਪਨ ਭਵਨ੍ਤਂ ਗੋਤਮਂ ਏਵਂ ਕਲ੍ਯਾਣੋ ਕਿਤ੍ਤਿਸਦ੍ਦੋ ਅਬ੍ਭੁਗ੍ਗਤੋ – ‘ਇਤਿਪਿ ਸੋ ਭਗਵਾ ਅਰਹਂ ਸਮ੍ਮਾਸਮ੍ਬੁਦ੍ਧੋ ਵਿਜ੍ਜਾਚਰਣਸਮ੍ਪਨ੍ਨੋ ਸੁਗਤੋ ਲੋਕਵਿਦੂ ਅਨੁਤ੍ਤਰੋ ਪੁਰਿਸਦਮ੍ਮਸਾਰਥਿ ਸਤ੍ਥਾ ਦੇਵਮਨੁਸ੍ਸਾਨਂ ਬੁਦ੍ਧੋ ਭਗਵਾਤਿ. ਸੋ ਇਮਂ ਲੋਕਂ ਸਦੇਵਕਂ ਸਮਾਰਕਂ ਸਬ੍ਰਹ੍ਮਕਂ ਸਸ੍ਸਮਣਬ੍ਰਾਹ੍ਮਣਿਂ ਪਜਂ ਸਦੇਵਮਨੁਸ੍ਸਂ ਸਯਂ ਅਭਿਞ੍ਞਾ ਸਚ੍ਛਿਕਤ੍ਵਾ ਪਵੇਦੇਤਿ. ਸੋ ਧਮ੍ਮਂ ਦੇਸੇਤਿ ਆਦਿਕਲ੍ਯਾਣਂ ਮਜ੍ਝੇਕਲ੍ਯਾਣਂ ਪਰਿਯੋਸਾਨਕਲ੍ਯਾਣਂ ਸਾਤ੍ਥਂ ਸਬ੍ਯਞ੍ਜਨਂ, ਕੇਵਲਪਰਿਪੁਣ੍ਣਂ ਪਰਿਸੁਦ੍ਧਂ ਬ੍ਰਹ੍ਮਚਰਿਯਂ ਪਕਾਸੇਤਿ. ਸਾਧੁ ਖੋ ਪਨ ਤਥਾਰੂਪਾਨਂ ਅਰਹਤਂ ਦਸ੍ਸਨਂ ਹੋਤੀ’’’ਤਿ.
੩੮੪. ਤੇਨ ਖੋ ਪਨ ਸਮਯੇਨ ਬ੍ਰਹ੍ਮਾਯੁਸ੍ਸ ਬ੍ਰਾਹ੍ਮਣਸ੍ਸ ਉਤ੍ਤਰੋ ਨਾਮ ਮਾਣਵੋ ਅਨ੍ਤੇਵਾਸੀ ਹੋਤਿ ਤਿਣ੍ਣਂ ਵੇਦਾਨਂ ਪਾਰਗੂ ਸਨਿਘਣ੍ਡੁਕੇਟੁਭਾਨਂ ਸਾਕ੍ਖਰਪ੍ਪਭੇਦਾਨਂ ਇਤਿਹਾਸਪਞ੍ਚਮਾਨਂ, ਪਦਕੋ, ਵੇਯ੍ਯਾਕਰਣੋ, ਲੋਕਾਯਤਮਹਾਪੁਰਿਸਲਕ੍ਖਣੇਸੁ ਅਨਵਯੋ. ਅਥ ਖੋ ਬ੍ਰਹ੍ਮਾਯੁ ਬ੍ਰਾਹ੍ਮਣੋ ਉਤ੍ਤਰਂ ਮਾਣਵਂ ਆਮਨ੍ਤੇਸਿ – ‘‘ਅਯਂ, ਤਾਤ ਉਤ੍ਤਰ, ਸਮਣੋ ਗੋਤਮੋ ਸਕ੍ਯਪੁਤ੍ਤੋ ਸਕ੍ਯਕੁਲਾ ਪਬ੍ਬਜਿਤੋ ਵਿਦੇਹੇਸੁ ਚਾਰਿਕਂ ਚਰਤਿ ਮਹਤਾ ਭਿਕ੍ਖੁਸਙ੍ਘੇਨ ਸਦ੍ਧਿਂ ਪਞ੍ਚਮਤ੍ਤੇਹਿ ਭਿਕ੍ਖੁਸਤੇਹਿ. ਤਂ ਖੋ ਪਨ ਭਵਨ੍ਤਂ ਗੋਤਮਂ ਏਵਂ ਕਲ੍ਯਾਣੋ ਕਿਤ੍ਤਿਸਦ੍ਦੋ ਅਬ੍ਭੁਗ੍ਗਤੋ – ‘ਇਤਿਪਿ ਸੋ ਭਗਵਾ ਅਰਹਂ ਸਮ੍ਮਾਸਮ੍ਬੁਦ੍ਧੋ…ਪੇ… ਸਾਧੁ ਖੋ ਪਨ ਤਥਾਰੂਪਾਨਂ ਅਰਹਤਂ ਦਸ੍ਸਨਂ ਹੋਤੀ’ਤਿ. ਏਹਿ ਤ੍ਵਂ, ਤਾਤ ਉਤ੍ਤਰ, ਯੇਨ ਸਮਣੋ ਗੋਤਮੋ ਤੇਨੁਪਸਙ੍ਕਮ; ਉਪਸਙ੍ਕਮਿਤ੍ਵਾ ਸਮਣਂ ਗੋਤਮਂ ਜਾਨਾਹਿ ਯਦਿ ਵਾ ਤਂ ਭਵਨ੍ਤਂ ਗੋਤਮਂ ਤਥਾ ਸਨ੍ਤਂਯੇਵ ਸਦ੍ਦੋ ਅਬ੍ਭੁਗ੍ਗਤੋ, ਯਦਿ ਵਾ ਨੋ ਤਥਾ; ਯਦਿ ਵਾ ਸੋ ਭਵਂ ਗੋਤਮੋ ਤਾਦਿਸੋ, ਯਦਿ ਵਾ ਨ ਤਾਦਿਸੋ. ਤਥਾ ਮਯਂ ਤਂ ਭਵਨ੍ਤਂ ਗੋਤਮਂ ਵੇਦਿਸ੍ਸਾਮਾ’’ਤਿ. ‘‘ਯਥਾ ਕਥਂ ਪਨਾਹਂ, ਭੋ, ਤਂ ਭਵਨ੍ਤਂ ਗੋਤਮਂ ਜਾਨਿਸ੍ਸਾਮਿ ਯਦਿ ਵਾ ਤਂ ਭਵਨ੍ਤਂ ਗੋਤਮਂ ਤਥਾ ਸਨ੍ਤਂਯੇਵ ਸਦ੍ਦੋ ਅਬ੍ਭੁਗ੍ਗਤੋ, ਯਦਿ ਵਾ ਨੋ ਤਥਾ; ਯਦਿ ਵਾ ਸੋ ਭਵਂ ਗੋਤਮੋ ਤਾਦਿਸੋ, ਯਦਿ ਵਾ ਨ ਤਾਦਿਸੋ’’ਤਿ. ‘‘ਆਗਤਾਨਿ ਖੋ, ਤਾਤ ਉਤ੍ਤਰ, ਅਮ੍ਹਾਕਂ ਮਨ੍ਤੇਸੁ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਾਨਿ, ਯੇਹਿ ਸਮਨ੍ਨਾਗਤਸ੍ਸ ਮਹਾਪੁਰਿਸਸ੍ਸ ਦ੍ਵੇਯੇਵ ਗਤਿਯੋ ਭਵਨ੍ਤਿ ਅਨਞ੍ਞਾ. ਸਚੇ ਅਗਾਰਂ ਅਜ੍ਝਾਵਸਤਿ, ਰਾਜਾ ਹੋਤਿ ਚਕ੍ਕਵਤ੍ਤੀ ਧਮ੍ਮਿਕੋ ਧਮ੍ਮਰਾਜਾ ਚਾਤੁਰਨ੍ਤੋ ਵਿਜਿਤਾਵੀ ਜਨਪਦਤ੍ਥਾਵਰਿਯਪ੍ਪਤ੍ਤੋ ਸਤ੍ਤਰਤਨਸਮਨ੍ਨਾਗਤੋ. ਤਸ੍ਸਿਮਾਨਿ ਸਤ੍ਤ ਰਤਨਾਨਿ ਭਵਨ੍ਤਿ, ਸੇਯ੍ਯਥਿਦਂ – ਚਕ੍ਕਰਤਨਂ, ਹਤ੍ਥਿਰਤਨਂ, ਅਸ੍ਸਰਤਨਂ, ਮਣਿਰਤਨਂ, ਇਤ੍ਥਿਰਤਨਂ, ਗਹਪਤਿਰਤਨਂ, ਪਰਿਣਾਯਕਰਤਨਮੇਵ ਸਤ੍ਤਮਂ. ਪਰੋਸਹਸ੍ਸਂ ਖੋ ਪਨਸ੍ਸ ਪੁਤ੍ਤਾ ਭਵਨ੍ਤਿ ਸੂਰਾ ਵੀਰਙ੍ਗਰੂਪਾ ਪਰਸੇਨਪ੍ਪਮਦ੍ਦਨਾ. ਸੋ ਇਮਂ ਪਥਵਿਂ ਸਾਗਰਪਰਿਯਨ੍ਤਂ ਅਦਣ੍ਡੇਨ ਅਸਤ੍ਥੇਨ ਧਮ੍ਮੇਨ [ਧਮ੍ਮੇਨ ਸਮੇਨ (ਕ.)] ਅਭਿਵਿਜਿਯ ਅਜ੍ਝਾਵਸਤਿ. ਸਚੇ ਖੋ ਪਨ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਤਿ, ਅਰਹਂ ਹੋਤਿ ਸਮ੍ਮਾਸਮ੍ਬੁਦ੍ਧੋ ਲੋਕੇ ਵਿਵਟ੍ਟਚ੍ਛਦੋ. ਅਹਂ ਖੋ ਪਨ, ਤਾਤ ਉਤ੍ਤਰ, ਮਨ੍ਤਾਨਂ ਦਾਤਾ; ਤ੍ਵਂ ਮਨ੍ਤਾਨਂ ਪਟਿਗ੍ਗਹੇਤਾ’’ਤਿ.
੩੮੫. ‘‘ਏਵਂ, ਭੋ’’ਤਿ ਖੋ ਉਤ੍ਤਰੋ ਮਾਣਵੋ ਬ੍ਰਹ੍ਮਾਯੁਸ੍ਸ ਬ੍ਰਾਹ੍ਮਣਸ੍ਸ ਪਟਿਸ੍ਸੁਤ੍ਵਾ ਉਟ੍ਠਾਯਾਸਨਾ ਬ੍ਰਹ੍ਮਾਯੁਂ ਬ੍ਰਾਹ੍ਮਣਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਵਿਦੇਹੇਸੁ ਯੇਨ ਭਗਵਾ ਤੇਨ ਚਾਰਿਕਂ ਪਕ੍ਕਾਮਿ. ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਤਾ ਸਦ੍ਧਿਂ ਸਮ੍ਮੋਦਿ. ਸਮ੍ਮੋਦਨੀਯਂ ਕਥਂ ਸਾਰਣੀਯਂ ਵੀਤਿਸਾਰੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਉਤ੍ਤਰੋ ਮਾਣਵੋ ਭਗਵਤੋ ਕਾਯੇ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਾਨਿ ਸਮਨ੍ਨੇਸਿ. ਅਦ੍ਦਸਾ ਖੋ ਉਤ੍ਤਰੋ ਮਾਣਵੋ ਭਗਵਤੋ ਕਾਯੇ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਾਨਿ, ਯੇਭੁਯ੍ਯੇਨ ਥਪੇਤ੍ਵਾ ਦ੍ਵੇ. ਦ੍ਵੀਸੁ ਮਹਾਪੁਰਿਸਲਕ੍ਖਣੇਸੁ ਕਙ੍ਖਤਿ ਵਿਚਿਕਿਚ੍ਛਤਿ ਨਾਧਿਮੁਚ੍ਚਤਿ ਨ ਸਮ੍ਪਸੀਦਤਿ – ਕੋਸੋਹਿਤੇ ਚ ਵਤ੍ਥਗੁਯ੍ਹੇ, ਪਹੂਤਜਿਵ੍ਹਤਾਯ ਚ. ਅਥ ਖੋ ਭਗਵਤੋ ਏਤਦਹੋਸਿ – ‘‘ਪਸ੍ਸਤਿ ਖੋ ਮੇ ਅਯਂ ਉਤ੍ਤਰੋ ਮਾਣਵੋ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਾਨਿ, ਯੇਭੁਯ੍ਯੇਨ ਥਪੇਤ੍ਵਾ ਦ੍ਵੇ. ਦ੍ਵੀਸੁ ਮਹਾਪੁਰਿਸਲਕ੍ਖਣੇਸੁ ਕਙ੍ਖਤਿ ਵਿਚਿਕਿਚ੍ਛਤਿ ਨਾਧਿਮੁਚ੍ਚਤਿ ਨ ਸਮ੍ਪਸੀਦਤਿ – ਕੋਸੋਹਿਤੇ ਚ ਵਤ੍ਥਗੁਯ੍ਹੇ, ਪਹੂਤਜਿਵ੍ਹਤਾਯ ਚਾ’’ਤਿ. ਅਥ ਖੋ ਭਗਵਾ ਤਥਾਰੂਪਂ ਇਦ੍ਧਾਭਿਸਙ੍ਖਾਰਂ ਅਭਿਸਙ੍ਖਾਸਿ ਯਥਾ ਅਦ੍ਦਸ ਉਤ੍ਤਰੋ ਮਾਣਵੋ ਭਗਵਤੋ ਕੋਸੋਹਿਤਂ ਵਤ੍ਥਗੁਯ੍ਹਂ. ਅਥ ਖੋ ਭਗਵਾ ਜਿਵ੍ਹਂ ਨਿਨ੍ਨਾਮੇਤ੍ਵਾ ਉਭੋਪਿ ਕਣ੍ਣਸੋਤਾਨਿ ਅਨੁਮਸਿ ਪਟਿਮਸਿ [ਪਰਿਮਸਿ (ਸੀ. ਕ.)]; ਉਭੋਪਿ ਨਾਸਿਕਸੋਤਾਨਿ [ਨਾਸਿਕਾਸੋਤਾਨਿ (ਸੀ.)] ਅਨੁਮਸਿ ਪਟਿਮਸਿ; ਕੇਵਲਮ੍ਪਿ ਨਲਾਟਮਣ੍ਡਲਂ ਜਿਵ੍ਹਾਯ ਛਾਦੇਸਿ. ਅਥ ਖੋ ਉਤ੍ਤਰਸ੍ਸ ਮਾਣਵਸ੍ਸ ਏਤਦਹੋਸਿ – ‘‘ਸਮਨ੍ਨਾਗਤੋ ਖੋ ਸਮਣੋ ਗੋਤਮੋ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣੇਹਿ. ਯਂਨੂਨਾਹਂ ਸਮਣਂ ਗੋਤਮਂ ਅਨੁਬਨ੍ਧੇਯ੍ਯਂ, ਇਰਿਯਾਪਥਮਸ੍ਸ ਪਸ੍ਸੇਯ੍ਯ’’ਨ੍ਤਿ. ਅਥ ਖੋ ਉਤ੍ਤਰੋ ਮਾਣਵੋ ਸਤ੍ਤਮਾਸਾਨਿ ਭਗਵਨ੍ਤਂ ਅਨੁਬਨ੍ਧਿ ਛਾਯਾਵ ਅਨਪਾਯਿਨੀ [ਅਨੁਪਾਯਿਨੀ (ਸ੍ਯਾ. ਕਂ. ਕ.)].
੩੮੬. ਅਥ ਖੋ ਉਤ੍ਤਰੋ ਮਾਣਵੋ ਸਤ੍ਤਨ੍ਨਂ ਮਾਸਾਨਂ ਅਚ੍ਚਯੇਨ ਵਿਦੇਹੇਸੁ ਯੇਨ ਮਿਥਿਲਾ ਤੇਨ ਚਾਰਿਕਂ ਪਕ੍ਕਾਮਿ. ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਯੇਨ ਮਿਥਿਲਾ ਯੇਨ ਬ੍ਰਹ੍ਮਾਯੁ ਬ੍ਰਾਹ੍ਮਣੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਬ੍ਰਹ੍ਮਾਯੁਂ ਬ੍ਰਾਹ੍ਮਣਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਂ ਖੋ ਉਤ੍ਤਰਂ ਮਾਣਵਂ ਬ੍ਰਹ੍ਮਾਯੁ ਬ੍ਰਾਹ੍ਮਣੋ ਏਤਦਵੋਚ – ‘‘ਕਚ੍ਚਿ, ਤਾਤ ਉਤ੍ਤਰ, ਤਂ ਭਵਨ੍ਤਂ ਗੋਤਮਂ ਤਥਾ ਸਨ੍ਤਂਯੇਵ ਸਦ੍ਦੋ ਅਬ੍ਭੁਗ੍ਗਤੋ, ਨੋ ਅਞ੍ਞਥਾ? ਕਚ੍ਚਿ ਪਨ ਸੋ ਭਵਂ ਗੋਤਮੋ ਤਾਦਿਸੋ, ਨੋ ਅਞ੍ਞਾਦਿਸੋ’’ਤਿ? ‘‘ਤਥਾ ਸਨ੍ਤਂਯੇਵ, ਭੋ, ਤਂ ਭਵਨ੍ਤਂ ਗੋਤਮਂ ਸਦ੍ਦੋ ਅਬ੍ਭੁਗ੍ਗਤੋ, ਨੋ ਅਞ੍ਞਥਾ; ਤਾਦਿਸੋਵ [ਤਾਦਿਸੋਵ ਭੋ (ਸੀ. ਪੀ.), ਤਾਦਿਸੋ ਚ ਖੋ (ਸ੍ਯਾ. ਕਂ. ਕ.)] ਸੋ ਭਵਂ ਗੋਤਮੋ, ਨੋ ਅਞ੍ਞਾਦਿਸੋ. ਸਮਨ੍ਨਾਗਤੋ ਚ [ਸਮਨ੍ਨਾਗਤੋ ਚ ਭੋ (ਸਬ੍ਬਤ੍ਥ)] ਸੋ ਭਵਂ ਗੋਤਮੋ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣੇਹਿ.
‘‘ਸੁਪ੍ਪਤਿਟ੍ਠਿਤਪਾਦੋ ਖੋ ਪਨ ਭਵਂ ਗੋਤਮੋ; ਇਦਮ੍ਪਿ ਤਸ੍ਸ ਭੋਤੋ ਗੋਤਮਸ੍ਸ ਮਹਾਪੁਰਿਸਸ੍ਸ ਮਹਾਪੁਰਿਸਲਕ੍ਖਣਂ ਭਵਤਿ.
‘‘ਹੇਟ੍ਠਾ ਖੋ ਪਨ ਤਸ੍ਸ ਭੋਤੋ ਗੋਤਮਸ੍ਸ ਪਾਦਤਲੇਸੁ ਚਕ੍ਕਾਨਿ ਜਾਤਾਨਿ ਸਹਸ੍ਸਾਰਾਨਿ ਸਨੇਮਿਕਾਨਿ ਸਨਾਭਿਕਾਨਿ ਸਬ੍ਬਾਕਾਰਪਰਿਪੂਰਾਨਿ…
‘‘ਆਯਤਪਣ੍ਹਿ ਖੋ ਪਨ ਸੋ ਭਵਂ ਗੋਤਮੋ…
‘‘ਦੀਘਙ੍ਗੁਲਿ ਖੋ ਪਨ ਸੋ ਭਵਂ ਗੋਤਮੋ…
‘‘ਮੁਦੁਤਲੁਨਹਤ੍ਥਪਾਦੋ ਖੋ ਪਨ ਸੋ ਭਵਂ ਗੋਤਮੋ…
‘‘ਜਾਲਹਤ੍ਥਪਾਦੋ ਖੋ ਪਨ ਸੋ ਭਵਂ ਗੋਤਮੋ…
‘‘ਉਸ੍ਸਙ੍ਖਪਾਦੋ ਖੋ ਪਨ ਸੋ ਭਵਂ ਗੋਤਮੋ…
‘‘ਏਣਿਜਙ੍ਘੋ ਖੋ ਪਨ ਸੋ ਭਵਂ ਗੋਤਮੋ…
‘‘ਠਿਤਕੋ ਖੋ ਪਨ ਸੋ ਭਵਂ ਗੋਤਮੋ ਅਨੋਨਮਨ੍ਤੋ ਉਭੋਹਿ ਪਾਣਿਤਲੇਹਿ ਜਣ੍ਣੁਕਾਨਿ ਪਰਿਮਸਤਿ ਪਰਿਮਜ੍ਜਤਿ…
‘‘ਕੋਸੋਹਿਤਵਤ੍ਥਗੁਯ੍ਹੋ ਖੋ ਪਨ ਸੋ ਭਵਂ ਗੋਤਮੋ…
‘‘ਸੁਵਣ੍ਣਵਣ੍ਣੋ ਖੋ ਪਨ ਸੋ ਭਵਂ ਗੋਤਮੋ ਕਞ੍ਚਨਸਨ੍ਨਿਭਤ੍ਤਚੋ…
‘‘ਸੁਖੁਮਚ੍ਛਵਿ ਖੋ ਪਨ ਸੋ ਭਵਂ ਗੋਤਮੋ. ਸੁਖੁਮਤ੍ਤਾ ਛਵਿਯਾ ਰਜੋਜਲ੍ਲਂ ਕਾਯੇ ਨ ਉਪਲਿਮ੍ਪਤਿ…
‘‘ਏਕੇਕਲੋਮੋ ਖੋ ਪਨ ਸੋ ਭਵਂ ਗੋਤਮੋ; ਏਕੇਕਾਨਿ ਲੋਮਾਨਿ ਲੋਮਕੂਪੇਸੁ ਜਾਤਾਨਿ…
‘‘ਉਦ੍ਧਗ੍ਗਲੋਮੋ ਖੋ ਪਨ ਸੋ ਭਵਂ ਗੋਤਮੋ; ਉਦ੍ਧਗ੍ਗਾਨਿ ਲੋਮਾਨਿ ਜਾਤਾਨਿ ਨੀਲਾਨਿ ਅਞ੍ਜਨਵਣ੍ਣਾਨਿ ਕੁਣ੍ਡਲਾਵਟ੍ਟਾਨਿ ਦਕ੍ਖਿਣਾਵਟ੍ਟਕਜਾਤਾਨਿ…
‘‘ਬ੍ਰਹ੍ਮੁਜੁਗਤ੍ਤੋ ਖੋ ਪਨ ਸੋ ਭਵਂ ਗੋਤਮੋ…
‘‘ਸਤ੍ਤੁਸ੍ਸਦੋ ਖੋ ਪਨ ਸੋ ਭਵਂ ਗੋਤਮੋ…
‘‘ਸੀਹਪੁਬ੍ਬਦ੍ਧਕਾਯੋ ਖੋ ਪਨ ਸੋ ਭਵਂ ਗੋਤਮੋ…
‘‘ਚਿਤਨ੍ਤਰਂਸੋ ਖੋ ਪਨ ਸੋ ਭਵਂ ਗੋਤਮੋ…
‘‘ਨਿਗ੍ਰੋਧਪਰਿਮਣ੍ਡਲੋ ਖੋ ਪਨ ਸੋ ਭਵਂ ਗੋਤਮੋ; ਯਾਵਤਕ੍ਵਸ੍ਸ ਕਾਯੋ ਤਾਵਤਕ੍ਵਸ੍ਸ ਬ੍ਯਾਮੋ, ਯਾਵਤਕ੍ਵਸ੍ਸ ਬ੍ਯਾਮੋ ਤਾਵਤਕ੍ਵਸ੍ਸ ਕਾਯੋ…
‘‘ਸਮਵਟ੍ਟਕ੍ਖਨ੍ਧੋ ਖੋ ਪਨ ਸੋ ਭਵਂ ਗੋਤਮੋ…
‘‘ਰਸਗ੍ਗਸਗ੍ਗੀ ਖੋ ਪਨ ਸੋ ਭਵਂ ਗੋਤਮੋ…
‘‘ਸੀਹਹਨੁ ਖੋ ਪਨ ਸੋ ਭਵਂ ਗੋਤਮੋ…
‘‘ਚਤ੍ਤਾਲੀਸਦਨ੍ਤੋ ਖੋ ਪਨ ਸੋ ਭਵਂ ਗੋਤਮੋ…
‘‘ਸਮਦਨ੍ਤੋ ਖੋ ਪਨ ਸੋ ਭਵਂ ਗੋਤਮੋ…
‘‘ਅਵਿਰਲ਼ਦਨ੍ਤੋ ਖੋ ਪਨ ਸੋ ਭਵਂ ਗੋਤਮੋ…
‘‘ਸੁਸੁਕ੍ਕਦਾਠੋ ਖੋ ਪਨ ਸੋ ਭਵਂ ਗੋਤਮੋ…
‘‘ਪਹੂਤਜਿਵ੍ਹੋ ਖੋ ਪਨ ਸੋ ਭਵਂ ਗੋਤਮੋ…
‘‘ਬ੍ਰਹ੍ਮਸ੍ਸਰੋ ਖੋ ਪਨ ਸੋ ਭਵਂ ਗੋਤਮੋ ਕਰਵਿਕਭਾਣੀ…
‘‘ਅਭਿਨੀਲਨੇਤ੍ਤੋ ਖੋ ਪਨ ਸੋ ਭਵਂ ਗੋਤਮੋ…
‘‘ਗੋਪਖੁਮੋ ਖੋ ਪਨ ਸੋ ਭਵਂ ਗੋਤਮੋ…
‘‘ਉਣ੍ਣਾ ਖੋ ਪਨਸ੍ਸ ਭੋਤੋ ਗੋਤਮਸ੍ਸ ਭਮੁਕਨ੍ਤਰੇ ਜਾਤਾ ਓਦਾਤਾ ਮੁਦੁਤੂਲਸਨ੍ਨਿਭਾ…
‘‘ਉਣ੍ਹੀਸਸੀਸੋ ਖੋ ਪਨ ਸੋ ਭਵਂ ਗੋਤਮੋ; ਇਦਮ੍ਪਿ ਤਸ੍ਸ ਭੋਤੋ ਗੋਤਮਸ੍ਸ ਮਹਾਪੁਰਿਸਸ੍ਸ ਮਹਾਪੁਰਿਸਲਕ੍ਖਣਂ ਭਵਤਿ.
‘‘ਇਮੇਹਿ ਖੋ, ਭੋ, ਸੋ ਭਵਂ ਗੋਤਮੋ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣੇਹਿ ਸਮਨ੍ਨਾਗਤੋ.
੩੮੭. ‘‘ਗਚ੍ਛਨ੍ਤੋ ਖੋ ਪਨ ਸੋ ਭਵਂ ਗੋਤਮੋ ਦਕ੍ਖਿਣੇਨੇਵ ਪਾਦੇਨ ਪਠਮਂ ਪਕ੍ਕਮਤਿ. ਸੋ ਨਾਤਿਦੂਰੇ ਪਾਦਂ ਉਦ੍ਧਰਤਿ, ਨਾਚ੍ਚਾਸਨ੍ਨੇ ਪਾਦਂ ਨਿਕ੍ਖਿਪਤਿ; ਸੋ ਨਾਤਿਸੀਘਂ ਗਚ੍ਛਤਿ, ਨਾਤਿਸਣਿਕਂ ਗਚ੍ਛਤਿ; ਨ ਚ ਅਦ੍ਦੁਵੇਨ ਅਦ੍ਦੁਵਂ ਸਙ੍ਘਟ੍ਟੇਨ੍ਤੋ ਗਚ੍ਛਤਿ, ਨ ਚ ਗੋਪ੍ਫਕੇਨ ਗੋਪ੍ਫਕਂ ਸਙ੍ਘਟ੍ਟੇਨ੍ਤੋ ਗਚ੍ਛਤਿ. ਸੋ ਗਚ੍ਛਨ੍ਤੋ ਨ ਸਤ੍ਥਿਂ ਉਨ੍ਨਾਮੇਤਿ, ਨ ਸਤ੍ਥਿਂ ਓਨਾਮੇਤਿ; ਨ ਸਤ੍ਥਿਂ ਸਨ੍ਨਾਮੇਤਿ, ਨ ਸਤ੍ਥਿਂ ਵਿਨਾਮੇਤਿ. ਗਚ੍ਛਤੋ ਖੋ ਪਨ ਤਸ੍ਸ ਭੋਤੋ ਗੋਤਮਸ੍ਸ ਅਧਰਕਾਯੋਵ [ਅਡ੍ਢਕਾਯੋਵ (ਕ.), ਆਰਦ੍ਧਕਾਯੋਵ (ਸ੍ਯਾ. ਕਂ.)] ਇਞ੍ਜਤਿ, ਨ ਚ ਕਾਯਬਲੇਨ ਗਚ੍ਛਤਿ. ਅਪਲੋਕੇਨ੍ਤੋ ਖੋ ਪਨ ਸੋ ਭਵਂ ਗੋਤਮੋ ਸਬ੍ਬਕਾਯੇਨੇਵ ਅਪਲੋਕੇਤਿ; ਸੋ ਨ ਉਦ੍ਧਂ ਉਲ੍ਲੋਕੇਤਿ, ਨ ਅਧੋ ਓਲੋਕੇਤਿ; ਨ ਚ ਵਿਪੇਕ੍ਖਮਾਨੋ ਗਚ੍ਛਤਿ, ਯੁਗਮਤ੍ਤਞ੍ਚ ਪੇਕ੍ਖਤਿ; ਤਤੋ ਚਸ੍ਸ ਉਤ੍ਤਰਿ ਅਨਾਵਟਂ ਞਾਣਦਸ੍ਸਨਂ ਭਵਤਿ. ਸੋ ਅਨ੍ਤਰਘਰਂ ਪਵਿਸਨ੍ਤੋ ਨ ਕਾਯਂ ਉਨ੍ਨਾਮੇਤਿ, ਨ ਕਾਯਂ ਓਨਾਮੇਤਿ; ਨ ਕਾਯਂ ਸਨ੍ਨਾਮੇਤਿ, ਨ ਕਾਯਂ ਵਿਨਾਮੇਤਿ. ਸੋ ਨਾਤਿਦੂਰੇ ਨਾਚ੍ਚਾਸਨ੍ਨੇ ਆਸਨਸ੍ਸ ਪਰਿਵਤ੍ਤਤਿ, ਨ ਚ ਪਾਣਿਨਾ ਆਲਮ੍ਬਿਤ੍ਵਾ ਆਸਨੇ ਨਿਸੀਦਤਿ, ਨ ਚ ਆਸਨਸ੍ਮਿਂ ਕਾਯਂ ਪਕ੍ਖਿਪਤਿ. ਸੋ ਅਨ੍ਤਰਘਰੇ ਨਿਸਿਨ੍ਨੋ ਸਮਾਨੋ ਨ ਹਤ੍ਥਕੁਕ੍ਕੁਚ੍ਚਂ ਆਪਜ੍ਜਤਿ, ਨ ਪਾਦਕੁਕ੍ਕੁਚ੍ਚਂ ਆਪਜ੍ਜਤਿ; ਨ ਅਦ੍ਦੁਵੇਨ ਅਦ੍ਦੁਵਂ ਆਰੋਪੇਤ੍ਵਾ ਨਿਸੀਦਤਿ; ਨ ਚ ਗੋਪ੍ਫਕੇਨ ਗੋਪ੍ਫਕਂ ਆਰੋਪੇਤ੍ਵਾ ਨਿਸੀਦਤਿ; ਨ ਚ ਪਾਣਿਨਾ ਹਨੁਕਂ ਉਪਦਹਿਤ੍ਵਾ [ਉਪਾਦਿਯਿਤ੍ਵਾ (ਸੀ. ਪੀ.)] ਨਿਸੀਦਤਿ. ਸੋ ਅਨ੍ਤਰਘਰੇ ਨਿਸਿਨ੍ਨੋ ਸਮਾਨੋ ਨ ਛਮ੍ਭਤਿ ਨ ਕਮ੍ਪਤਿ ਨ ਵੇਧਤਿ ਨ ਪਰਿਤਸ੍ਸਤਿ. ਸੋ ਅਛਮ੍ਭੀ ਅਕਮ੍ਪੀ ਅਵੇਧੀ ਅਪਰਿਤਸ੍ਸੀ ਵਿਗਤਲੋਮਹਂਸੋ. ਵਿਵੇਕਵਤ੍ਤੋ ਚ ਸੋ ਭਵਂ ਗੋਤਮੋ ਅਨ੍ਤਰਘਰੇ ਨਿਸਿਨ੍ਨੋ ਹੋਤਿ. ਸੋ ਪਤ੍ਤੋਦਕਂ ਪਟਿਗ੍ਗਣ੍ਹਨ੍ਤੋ ਨ ਪਤ੍ਤਂ ਉਨ੍ਨਾਮੇਤਿ, ਨ ਪਤ੍ਤਂ ਓਨਾਮੇਤਿ; ਨ ਪਤ੍ਤਂ ਸਨ੍ਨਾਮੇਤਿ, ਨ ਪਤ੍ਤਂ ਵਿਨਾਮੇਤਿ. ਸੋ ਪਤ੍ਤੋਦਕਂ ਪਟਿਗ੍ਗਣ੍ਹਾਤਿ ਨਾਤਿਥੋਕਂ ਨਾਤਿਬਹੁਂ. ਸੋ ਨ ਖੁਲੁਖੁਲੁਕਾਰਕਂ [ਬੁਲੁਬੁਲੁਕਾਰਕਂ (ਸੀ.)] ਪਤ੍ਤਂ ਧੋਵਤਿ, ਨ ਸਮ੍ਪਰਿਵਤ੍ਤਕਂ ਪਤ੍ਤਂ ਧੋਵਤਿ, ਨ ਪਤ੍ਤਂ ਭੂਮਿਯਂ ਨਿਕ੍ਖਿਪਿਤ੍ਵਾ ਹਤ੍ਥੇ ਧੋਵਤਿ; ਹਤ੍ਥੇਸੁ ਧੋਤੇਸੁ ਪਤ੍ਤੋ ਧੋਤੋ ਹੋਤਿ, ਪਤ੍ਤੇ ਧੋਤੇ ਹਤ੍ਥਾ ਧੋਤਾ ਹੋਨ੍ਤਿ. ਸੋ ਪਤ੍ਤੋਦਕਂ ਛਡ੍ਡੇਤਿ ਨਾਤਿਦੂਰੇ ਨਾਚ੍ਚਾਸਨ੍ਨੇ, ਨ ਚ ਵਿਚ੍ਛਡ੍ਡਯਮਾਨੋ. ਸੋ ਓਦਨਂ ਪਟਿਗ੍ਗਣ੍ਹਨ੍ਤੋ ਨ ਪਤ੍ਤਂ ਉਨ੍ਨਾਮੇਤਿ, ਨ ਪਤ੍ਤਂ ਓਨਾਮੇਤਿ; ਨ ਪਤ੍ਤਂ ਸਨ੍ਨਾਮੇਤਿ, ਨ ਪਤ੍ਤਂ ਵਿਨਾਮੇਤਿ. ਸੋ ਓਦਨਂ ਪਟਿਗ੍ਗਣ੍ਹਾਤਿ ਨਾਤਿਥੋਕਂ ਨਾਤਿਬਹੁਂ. ਬ੍ਯਞ੍ਜਨਂ ਖੋ ਪਨ ਭਵਂ ਗੋਤਮੋ ਬ੍ਯਞ੍ਜਨਮਤ੍ਤਾਯ ਆਹਾਰੇਤਿ, ਨ ਚ ਬ੍ਯਞ੍ਜਨੇਨ ਆਲੋਪਂ ਅਤਿਨਾਮੇਤਿ. ਦ੍ਵਤ੍ਤਿਕ੍ਖਤ੍ਤੁਂ ਖੋ ਭਵਂ ਗੋਤਮੋ ਮੁਖੇ ਆਲੋਪਂ ਸਮ੍ਪਰਿਵਤ੍ਤੇਤ੍ਵਾ ਅਜ੍ਝੋਹਰਤਿ; ਨ ਚਸ੍ਸ ਕਾਚਿ ਓਦਨਮਿਞ੍ਜਾ ਅਸਮ੍ਭਿਨ੍ਨਾ ਕਾਯਂ ਪਵਿਸਤਿ, ਨ ਚਸ੍ਸ ਕਾਚਿ ਓਦਨਮਿਞ੍ਜਾ ਮੁਖੇ ਅਵਸਿਟ੍ਠਾ ਹੋਤਿ; ਅਥਾਪਰਂ ਆਲੋਪਂ ਉਪਨਾਮੇਤਿ. ਰਸਪਟਿਸਂਵੇਦੀ ਖੋ ਪਨ ਸੋ ਭਵਂ ਗੋਤਮੋ ਆਹਾਰਂ ਆਹਾਰੇਤਿ, ਨੋ ਚ ਰਸਰਾਗਪਟਿਸਂਵੇਦੀ.
‘‘ਅਟ੍ਠਙ੍ਗਸਮਨ੍ਨਾਗਤਂ [ਅਟ੍ਠਙ੍ਗਸਮਨ੍ਨਾਗਤੋ (ਕ.)] ਖੋ ਪਨ ਸੋ ਭਵਂ ਗੋਤਮੋ ਆਹਾਰਂ ਆਹਾਰੇਤਿ – ਨੇਵ ਦਵਾਯ, ਨ ਮਦਾਯ ਨ ਮਣ੍ਡਨਾਯ ਨ ਵਿਭੂਸਨਾਯ, ਯਾਵਦੇਵ ਇਮਸ੍ਸ ਕਾਯਸ੍ਸ ਠਿਤਿਯਾ ਯਾਪਨਾਯ, ਵਿਹਿਂਸੂਪਰਤਿਯਾ ਬ੍ਰਹ੍ਮਚਰਿਯਾਨੁਗ੍ਗਹਾਯ – ‘ਇਤਿ ਪੁਰਾਣਞ੍ਚ ਵੇਦਨਂ ਪਟਿਹਙ੍ਖਾਮਿ ਨਵਞ੍ਚ ਵੇਦਨਂ ਨ ਉਪ੍ਪਾਦੇਸ੍ਸਾਮਿ, ਯਾਤ੍ਰਾ ਚ ਮੇ ਭਵਿਸ੍ਸਤਿ ਅਨਵਜ੍ਜਤਾ ਚ ਫਾਸੁਵਿਹਾਰੋ ਚਾ’ਤਿ. ਸੋ ਭੁਤ੍ਤਾਵੀ ਪਤ੍ਤੋਦਕਂ ਪਟਿਗ੍ਗਣ੍ਹਨ੍ਤੋ ਨ ਪਤ੍ਤਂ ਉਨ੍ਨਾਮੇਤਿ, ਨ ਪਤ੍ਤਂ ਓਨਾਮੇਤਿ; ਨ ਪਤ੍ਤਂ ਸਨ੍ਨਾਮੇਤਿ, ਨ ਪਤ੍ਤਂ ਵਿਨਾਮੇਤਿ. ਸੋ ਪਤ੍ਤੋਦਕਂ ਪਟਿਗ੍ਗਣ੍ਹਾਤਿ ਨਾਤਿਥੋਕਂ ਨਾਤਿਬਹੁਂ. ਸੋ ਨ ਖੁਲੁਖੁਲੁਕਾਰਕਂ ਪਤ੍ਤਂ ਧੋਵਤਿ, ਨ ਸਮ੍ਪਰਿਵਤ੍ਤਕਂ ਪਤ੍ਤਂ ਧੋਵਤਿ, ਨ ਪਤ੍ਤਂ ਭੂਮਿਯਂ ਨਿਕ੍ਖਿਪਿਤ੍ਵਾ ਹਤ੍ਥੇ ਧੋਵਤਿ; ਹਤ੍ਥੇਸੁ ਧੋਤੇਸੁ ਪਤ੍ਤੋ ਧੋਤੋ ਹੋਤਿ, ਪਤ੍ਤੇ ਧੋਤੇ ਹਤ੍ਥਾ ਧੋਤਾ ਹੋਨ੍ਤਿ. ਸੋ ਪਤ੍ਤੋਦਕਂ ਛਡ੍ਡੇਤਿ ਨਾਤਿਦੂਰੇ ਨਾਚ੍ਚਾਸਨ੍ਨੇ, ਨ ਚ ਵਿਚ੍ਛਡ੍ਡਯਮਾਨੋ. ਸੋ ਭੁਤ੍ਤਾਵੀ ਨ ਪਤ੍ਤਂ ਭੂਮਿਯਂ ਨਿਕ੍ਖਿਪਤਿ ਨਾਤਿਦੂਰੇ ਨਾਚ੍ਚਾਸਨ੍ਨੇ, ਨ ਚ ਅਨਤ੍ਥਿਕੋ ਪਤ੍ਤੇਨ ਹੋਤਿ, ਨ ਚ ਅਤਿਵੇਲਾਨੁਰਕ੍ਖੀ ਪਤ੍ਤਸ੍ਮਿਂ. ਸੋ ਭੁਤ੍ਤਾਵੀ ਮੁਹੁਤ੍ਤਂ ਤੁਣ੍ਹੀ ਨਿਸੀਦਤਿ, ਨ ਚ ਅਨੁਮੋਦਨਸ੍ਸ ਕਾਲਮਤਿਨਾਮੇਤਿ. ਸੋ ਭੁਤ੍ਤਾਵੀ ਅਨੁਮੋਦਤਿ, ਨ ਤਂ ਭਤ੍ਤਂ ਗਰਹਤਿ, ਨ ਅਞ੍ਞਂ ਭਤ੍ਤਂ ਪਟਿਕਙ੍ਖਤਿ; ਅਞ੍ਞਦਤ੍ਥੁ ਧਮ੍ਮਿਯਾ ਕਥਾਯ ਤਂ ਪਰਿਸਂ ਸਨ੍ਦਸ੍ਸੇਤਿ ਸਮਾਦਪੇਤਿ ਸਮੁਤ੍ਤੇਜੇਤਿ ਸਮ੍ਪਹਂਸੇਤਿ. ਸੋ ਤਂ ਪਰਿਸਂ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਤ੍ਵਾ ਸਮਾਦਪੇਤ੍ਵਾ ਸਮੁਤ੍ਤੇਜੇਤ੍ਵਾ ਸਮ੍ਪਹਂਸੇਤ੍ਵਾ ਉਟ੍ਠਾਯਾਸਨਾ ਪਕ੍ਕਮਤਿ. ਸੋ ਨਾਤਿਸੀਘਂ ਗਚ੍ਛਤਿ, ਨਾਤਿਸਣਿਕਂ ਗਚ੍ਛਤਿ, ਨ ਚ ਮੁਚ੍ਚਿਤੁਕਾਮੋ ਗਚ੍ਛਤਿ; ਨ ਚ ਤਸ੍ਸ ਭੋਤੋ ਗੋਤਮਸ੍ਸ ਕਾਯੇ ਚੀਵਰਂ ਅਚ੍ਚੁਕ੍ਕਟ੍ਠਂ ਹੋਤਿ ਨ ਚ ਅਚ੍ਚੋਕ੍ਕਟ੍ਠਂ, ਨ ਚ ਕਾਯਸ੍ਮਿਂ ਅਲ੍ਲੀਨਂ ਨ ਚ ਕਾਯਸ੍ਮਾ ਅਪਕਟ੍ਠਂ; ਨ ਚ ਤਸ੍ਸ ਭੋਤੋ ਗੋਤਮਸ੍ਸ ਕਾਯਮ੍ਹਾ ਵਾਤੋ ਚੀਵਰਂ ਅਪਵਹਤਿ; ਨ ਚ ਤਸ੍ਸ ਭੋਤੋ ਗੋਤਮਸ੍ਸ ਕਾਯੇ ਰਜੋਜਲ੍ਲਂ ਉਪਲਿਮ੍ਪਤਿ. ਸੋ ਆਰਾਮਗਤੋ ਨਿਸੀਦਤਿ ਪਞ੍ਞਤ੍ਤੇ ਆਸਨੇ. ਨਿਸਜ੍ਜ ਪਾਦੇ ਪਕ੍ਖਾਲੇਤਿ; ਨ ਚ ਸੋ ਭਵਂ ਗੋਤਮੋ ਪਾਦਮਣ੍ਡਨਾਨੁਯੋਗਮਨੁਯੁਤ੍ਤੋ ਵਿਹਰਤਿ. ਸੋ ਪਾਦੇ ਪਕ੍ਖਾਲੇਤ੍ਵਾ ਨਿਸੀਦਤਿ ਪਲ੍ਲਙ੍ਕਂ ਆਭੁਜਿਤ੍ਵਾ ਉਜੁਂ ਕਾਯਂ ਪਣਿਧਾਯ ਪਰਿਮੁਖਂ ਸਤਿਂ ਉਪਟ੍ਠਪੇਤ੍ਵਾ. ਸੋ ਨੇਵ ਅਤ੍ਤਬ੍ਯਾਬਾਧਾਯ ਚੇਤੇਤਿ, ਨ ਪਰਬ੍ਯਾਬਾਧਾਯ ਚੇਤੇਤਿ, ਨ ਉਭਯਬ੍ਯਾਬਾਧਾਯ ਚੇਤੇਤਿ; ਅਤ੍ਤਹਿਤਪਰਹਿਤਉਭਯਹਿਤਸਬ੍ਬਲੋਕਹਿਤਮੇਵ ਸੋ ਭਵਂ ਗੋਤਮੋ ਚਿਨ੍ਤੇਨ੍ਤੋ ਨਿਸਿਨ੍ਨੋ ਹੋਤਿ. ਸੋ ਆਰਾਮਗਤੋ ਪਰਿਸਤਿ ਧਮ੍ਮਂ ਦੇਸੇਤਿ, ਨ ਤਂ ਪਰਿਸਂ ਉਸ੍ਸਾਦੇਤਿ, ਨ ਤਂ ਪਰਿਸਂ ਅਪਸਾਦੇਤਿ; ਅਞ੍ਞਦਤ੍ਥੁ ਧਮ੍ਮਿਯਾ ਕਥਾਯ ਤਂ ਪਰਿਸਂ ਸਨ੍ਦਸ੍ਸੇਤਿ ਸਮਾਦਪੇਤਿ ਸਮੁਤ੍ਤੇਜੇਤਿ ਸਮ੍ਪਹਂਸੇਤਿ.
‘‘ਅਟ੍ਠਙ੍ਗਸਮਨ੍ਨਾਗਤੋ ਖੋ ਪਨਸ੍ਸ ਭੋਤੋ ਗੋਤਮਸ੍ਸ ਮੁਖਤੋ ਘੋਸੋ ਨਿਚ੍ਛਰਤਿ – ਵਿਸ੍ਸਟ੍ਠੋ ਚ, ਵਿਞ੍ਞੇਯ੍ਯੋ ਚ, ਮਞ੍ਜੁ ਚ, ਸਵਨੀਯੋ ਚ, ਬਿਨ੍ਦੁ ਚ, ਅਵਿਸਾਰੀ ਚ, ਗਮ੍ਭੀਰੋ ਚ, ਨਿਨ੍ਨਾਦੀ ਚ. ਯਥਾਪਰਿਸਂ ਖੋ ਪਨ ਸੋ ਭਵਂ ਗੋਤਮੋ ਸਰੇਨ ਵਿਞ੍ਞਾਪੇਤਿ, ਨ ਚਸ੍ਸ ਬਹਿਦ੍ਧਾ ਪਰਿਸਾਯ ਘੋਸੋ ਨਿਚ੍ਛਰਤਿ. ਤੇ ਤੇਨ ਭੋਤਾ ਗੋਤਮੇਨ ਧਮ੍ਮਿਯਾ ਕਥਾਯ ਸਨ੍ਦਸ੍ਸਿਤਾ ਸਮਾਦਪਿਤਾ ਸਮੁਤ੍ਤੇਜਿਤਾ ਸਮ੍ਪਹਂਸਿਤਾ ਉਟ੍ਠਾਯਾਸਨਾ ਪਕ੍ਕਮਨ੍ਤਿ ਅਵਲੋਕਯਮਾਨਾਯੇਵ [ਅਪਲੋਕਯਮਾਨਾਯੇਵ (ਸੀ. ਕ.)] ਅਵਿਜਹਿਤਤ੍ਤਾ [ਅਵਿਜਹਨ੍ਤਾਭਾਵੇਨ (ਸੀ. ਸ੍ਯਾ. ਕਂ. ਪੀ.)]. ਅਦ੍ਦਸਾਮ ਖੋ ਮਯਂ, ਭੋ, ਤਂ ਭਵਨ੍ਤਂ ਗੋਤਮਂ ਗਚ੍ਛਨ੍ਤਂ, ਅਦ੍ਦਸਾਮ ਠਿਤਂ, ਅਦ੍ਦਸਾਮ ਅਨ੍ਤਰਘਰਂ ਪਵਿਸਨ੍ਤਂ, ਅਦ੍ਦਸਾਮ ਅਨ੍ਤਰਘਰੇ ਨਿਸਿਨ੍ਨਂ ਤੁਣ੍ਹੀਭੂਤਂ, ਅਦ੍ਦਸਾਮ ਅਨ੍ਤਰਘਰੇ ਭੁਞ੍ਜਨ੍ਤਂ, ਅਦ੍ਦਸਾਮ ਭੁਤ੍ਤਾਵਿਂ ਨਿਸਿਨ੍ਨਂ ਤੁਣ੍ਹੀਭੂਤਂ, ਅਦ੍ਦਸਾਮ ਭੁਤ੍ਤਾਵਿਂ ਅਨੁਮੋਦਨ੍ਤਂ, ਅਦ੍ਦਸਾਮ ਆਰਾਮਂ ਗਚ੍ਛਨ੍ਤਂ, ਅਦ੍ਦਸਾਮ ਆਰਾਮਗਤਂ ਨਿਸਿਨ੍ਨਂ ਤੁਣ੍ਹੀਭੂਤਂ, ਅਦ੍ਦਸਾਮ ਆਰਾਮਗਤਂ ਪਰਿਸਤਿ ਧਮ੍ਮਂ ਦੇਸੇਨ੍ਤਂ. ਏਦਿਸੋ ਚ ਏਦਿਸੋ ਚ ਸੋ ਭਵਂ ਗੋਤਮੋ, ਤਤੋ ਚ ਭਿਯ੍ਯੋ’’ਤਿ.
੩੮੮. ਏਵਂ ਵੁਤ੍ਤੇ, ਬ੍ਰਹ੍ਮਾਯੁ ਬ੍ਰਾਹ੍ਮਣੋ ਉਟ੍ਠਾਯਾਸਨਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਯੇਨ ਭਗਵਾ ਤੇਨਞ੍ਜਲਿਂ ਪਣਾਮੇਤ੍ਵਾ ਤਿਕ੍ਖਤ੍ਤੁਂ ਉਦਾਨਂ ਉਦਾਨੇਤਿ –
‘‘ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ.
‘‘ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ.
‘‘ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸਾ’’ਤਿ.
‘‘ਅਪ੍ਪੇਵ ਨਾਮ ਮਯਂ ਕਦਾਚਿ ਕਰਹਚਿ ਤੇਨ ਭੋਤਾ ਗੋਤਮੇਨ ਸਮਾਗਚ੍ਛੇਯ੍ਯਾਮ? ਅਪ੍ਪੇਵ ਨਾਮ ਸਿਯਾ ਕੋਚਿਦੇਵ ਕਥਾਸਲ੍ਲਾਪੋ’’ਤਿ!
੩੮੯. ਅਥ ਖੋ ਭਗਵਾ ਵਿਦੇਹੇਸੁ ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਯੇਨ ਮਿਥਿਲਾ ਤਦਵਸਰਿ. ਤਤ੍ਰ ਸੁਦਂ ਭਗਵਾ ਮਿਥਿਲਾਯਂ ਵਿਹਰਤਿ ਮਘਦੇਵਮ੍ਬਵਨੇ. ਅਸ੍ਸੋਸੁਂ ਖੋ ਮਿਥਿਲੇਯ੍ਯਕਾ [ਮੇਥਿਲੇਯ੍ਯਕਾ (ਸੀ. ਪੀ.)] ਬ੍ਰਾਹ੍ਮਣਗਹਪਤਿਕਾ – ‘‘ਸਮਣੋ ਖਲੁ, ਭੋ, ਗੋਤਮੋ ਸਕ੍ਯਪੁਤ੍ਤੋ ਸਕ੍ਯਕੁਲਾ ਪਬ੍ਬਜਿਤੋ ਵਿਦੇਹੇਸੁ ਚਾਰਿਕਂ ਚਰਮਾਨੋ ਮਹਤਾ ਭਿਕ੍ਖੁਸਙ੍ਘੇਨ ਸਦ੍ਧਿਂ ਪਞ੍ਚਮਤ੍ਤੇਹਿ ਭਿਕ੍ਖੁਸਤੇਹਿ ਮਿਥਿਲਂ ਅਨੁਪ੍ਪਤ੍ਤੋ, ਮਿਥਿਲਾਯਂ ਵਿਹਰਤਿ ਮਘਦੇਵਮ੍ਬਵਨੇ. ਤਂ ਖੋ ਪਨ ਭਵਨ੍ਤਂ ਗੋਤਮਂ ਏਵਂ ਕਲ੍ਯਾਣੋ ਕਿਤ੍ਤਿਸਦ੍ਦੋ ਅਬ੍ਭੁਗ੍ਗਤੋ – ‘ਇਤਿਪਿ ਸੋ ਭਗਵਾ ਅਰਹਂ ਸਮ੍ਮਾਸਮ੍ਬੁਦ੍ਧੋ ਵਿਜ੍ਜਾਚਰਣਸਮ੍ਪਨ੍ਨੋ ਸੁਗਤੋ ਲੋਕਵਿਦੂ ਅਨੁਤ੍ਤਰੋ ਪੁਰਿਸਦਮ੍ਮਸਾਰਥਿ ਸਤ੍ਥਾ ਦੇਵਮਨੁਸ੍ਸਾਨਂ ਬੁਦ੍ਧੋ ਭਗਵਾਤਿ. ਸੋ ਇਮਂ ਲੋਕਂ ਸਦੇਵਕਂ ਸਮਾਰਕਂ ਸਬ੍ਰਹ੍ਮਕਂ ਸਸ੍ਸਮਣਬ੍ਰਾਹ੍ਮਣਿਂ ਪਜਂ ਸਦੇਵਮਨੁਸ੍ਸਂ ਸਯਂ ਅਭਿਞ੍ਞਾ ਸਚ੍ਛਿਕਤ੍ਵਾ ਪਵੇਦੇਤਿ. ਸੋ ਧਮ੍ਮਂ ਦੇਸੇਤਿ ਆਦਿਕਲ੍ਯਾਣਂ ਮਜ੍ਝੇਕਲ੍ਯਾਣਂ ਪਰਿਯੋਸਾਨਕਲ੍ਯਾਣਂ ਸਾਤ੍ਥਂ ਸਬ੍ਯਞ੍ਜਨਂ, ਕੇਵਲਪਰਿਪੁਣ੍ਣਂ ਪਰਿਸੁਦ੍ਧਂ ਬ੍ਰਹ੍ਮਚਰਿਯਂ ਪਕਾਸੇਤਿ. ਸਾਧੁ ਖੋ ਪਨ ਤਥਾਰੂਪਾਨਂ ਅਰਹਤਂ ਦਸ੍ਸਨਂ ਹੋਤੀ’’’ਤਿ.
ਅਥ ਖੋ ਮਿਥਿਲੇਯ੍ਯਕਾ ਬ੍ਰਾਹ੍ਮਣਗਹਪਤਿਕਾ ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ; ਉਪਸਙ੍ਕਮਿਤ੍ਵਾ ਅਪ੍ਪੇਕਚ੍ਚੇ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ; ਅਪ੍ਪੇਕਚ੍ਚੇ ਭਗਵਤਾ ਸਦ੍ਧਿਂ ਸਮ੍ਮੋਦਿਂਸੁ, ਸਮ੍ਮੋਦਨੀਯਂ ਕਥਂ ਸਾਰਣੀਯਂ ਵੀਤਿਸਾਰੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ; ਅਪ੍ਪੇਕਚ੍ਚੇ ਯੇਨ ਭਗਵਾ ਤੇਨਞ੍ਜਲਿਂ ਪਣਾਮੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ; ਅਪ੍ਪੇਕਚ੍ਚੇ ਭਗਵਤੋ ਸਨ੍ਤਿਕੇ ਨਾਮਗੋਤ੍ਤਂ ਸਾਵੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ; ਅਪ੍ਪੇਕਚ੍ਚੇ ਤੁਣ੍ਹੀਭੂਤਾ ਏਕਮਨ੍ਤਂ ਨਿਸੀਦਿਂਸੁ.
੩੯੦. ਅਸ੍ਸੋਸਿ ਖੋ ਬ੍ਰਹ੍ਮਾਯੁ ਬ੍ਰਾਹ੍ਮਣੋ – ‘‘ਸਮਣੋ ਖਲੁ, ਭੋ, ਗੋਤਮੋ ਸਕ੍ਯਪੁਤ੍ਤੋ ਸਕ੍ਯਕੁਲਾ ਪਬ੍ਬਜਿਤੋ ਮਿਥਿਲਂ ਅਨੁਪ੍ਪਤ੍ਤੋ, ਮਿਥਿਲਾਯਂ ਵਿਹਰਤਿ ਮਘਦੇਵਮ੍ਬਵਨੇ’’ਤਿ. ਅਥ ਖੋ ਬ੍ਰਹ੍ਮਾਯੁ ਬ੍ਰਾਹ੍ਮਣੋ ਸਮ੍ਬਹੁਲੇਹਿ ਸਾਵਕੇਹਿ ਸਦ੍ਧਿਂ ਯੇਨ ਮਘਦੇਵਮ੍ਬਵਨਂ ਤੇਨੁਪਸਙ੍ਕਮਿ. ਅਥ ਖੋ ਬ੍ਰਹ੍ਮਾਯੁਨੋ ਬ੍ਰਾਹ੍ਮਣਸ੍ਸ ਅਵਿਦੂਰੇ ਅਮ੍ਬਵਨਸ੍ਸ ਏਤਦਹੋਸਿ – ‘‘ਨ ਖੋ ਮੇਤਂ ਪਤਿਰੂਪਂ ਯੋਹਂ ਪੁਬ੍ਬੇ ਅਪ੍ਪਟਿਸਂਵਿਦਿਤੋ ਸਮਣਂ ਗੋਤਮਂ ਦਸ੍ਸਨਾਯ ਉਪਸਙ੍ਕਮੇਯ੍ਯ’’ਨ੍ਤਿ. ਅਥ ਖੋ ਬ੍ਰਹ੍ਮਾਯੁ ਬ੍ਰਾਹ੍ਮਣੋ ਅਞ੍ਞਤਰਂ ਮਾਣਵਕਂ ਆਮਨ੍ਤੇਸਿ – ‘‘ਏਹਿ ਤ੍ਵਂ, ਮਾਣਵਕ, ਯੇਨ ਸਮਣੋ ਗੋਤਮੋ ਤੇਨੁਪਸਙ੍ਕਮ; ਉਪਸਙ੍ਕਮਿਤ੍ਵਾ ਮਮ ਵਚਨੇਨ ਸਮਣਂ ਗੋਤਮਂ ਅਪ੍ਪਾਬਾਧਂ ਅਪ੍ਪਾਤਙ੍ਕਂ ਲਹੁਟ੍ਠਾਨਂ ਬਲਂ ਫਾਸੁਵਿਹਾਰਂ ਪੁਚ੍ਛ – ‘ਬ੍ਰਹ੍ਮਾਯੁ, ਭੋ ਗੋਤਮ, ਬ੍ਰਾਹ੍ਮਣੋ ਭਵਨ੍ਤਂ ਗੋਤਮਂ ਅਪ੍ਪਾਬਾਧਂ ਅਪ੍ਪਾਤਙ੍ਕਂ ਲਹੁਟ੍ਠਾਨਂ ਬਲਂ ਫਾਸੁਵਿਹਾਰਂ ਪੁਚ੍ਛਤੀ’ਤਿ. ਏਵਞ੍ਚ ਵਦੇਹਿ – ‘ਬ੍ਰਹ੍ਮਾਯੁ, ਭੋ ਗੋਤਮ, ਬ੍ਰਾਹ੍ਮਣੋ ਜਿਣ੍ਣੋ ਵੁਡ੍ਢੋ ਮਹਲ੍ਲਕੋ ਅਦ੍ਧਗਤੋ ਵਯੋਅਨੁਪ੍ਪਤ੍ਤੋ, ਵੀਸਵਸ੍ਸਸਤਿਕੋ ਜਾਤਿਯਾ, ਤਿਣ੍ਣਂ ਵੇਦਾਨਂ ਪਾਰਗੂ ਸਨਿਘਣ੍ਡੁਕੇਟੁਭਾਨਂ ਸਾਕ੍ਖਰਪ੍ਪਭੇਦਾਨਂ ਇਤਿਹਾਸਪਞ੍ਚਮਾਨਂ, ਪਦਕੋ, ਵੇਯ੍ਯਾਕਰਣੋ, ਲੋਕਾਯਤਮਹਾਪੁਰਿਸਲਕ੍ਖਣੇਸੁ ਅਨਵਯੋ. ਯਾਵਤਾ, ਭੋ, ਬ੍ਰਾਹ੍ਮਣਗਹਪਤਿਕਾ ਮਿਥਿਲਾਯਂ ਪਟਿਵਸਨ੍ਤਿ, ਬ੍ਰਹ੍ਮਾਯੁ ਤੇਸਂ ਬ੍ਰਾਹ੍ਮਣੋ ਅਗ੍ਗਮਕ੍ਖਾਯਤਿ – ਯਦਿਦਂ ਭੋਗੇਹਿ; ਬ੍ਰਹ੍ਮਾਯੁ ਤੇਸਂ ਬ੍ਰਾਹ੍ਮਣੋ ਅਗ੍ਗਮਕ੍ਖਾਯਤਿ – ਯਦਿਦਂ ਮਨ੍ਤੇਹਿ; ਬ੍ਰਹ੍ਮਾਯੁ ਤੇਸਂ ਬ੍ਰਾਹ੍ਮਣੋ ਅਗ੍ਗਮਕ੍ਖਾਯਤਿ – ਯਦਿਦਂ ਆਯੁਨਾ ਚੇਵ ਯਸਸਾ ਚ. ਸੋ ਭੋਤੋ ਗੋਤਮਸ੍ਸ ਦਸ੍ਸਨਕਾਮੋ’’’ਤਿ.
‘‘ਏਵਂ, ਭੋ’’ਤਿ ਖੋ ਸੋ ਮਾਣਵਕੋ ਬ੍ਰਹ੍ਮਾਯੁਸ੍ਸ ਬ੍ਰਾਹ੍ਮਣਸ੍ਸ ਪਟਿਸ੍ਸੁਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਤਾ ਸਦ੍ਧਿਂ ਸਮ੍ਮੋਦਿ. ਸਮ੍ਮੋਦਨੀਯਂ ਕਥਂ ਸਾਰਣੀਯਂ ਵੀਤਿਸਾਰੇਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਏਕਮਨ੍ਤਂ ਠਿਤੋ ਖੋ ਸੋ ਮਾਣਵਕੋ ਭਗਵਨ੍ਤਂ ਏਤਦਵੋਚ – ‘‘ਬ੍ਰਹ੍ਮਾਯੁ, ਭੋ ਗੋਤਮ, ਬ੍ਰਾਹ੍ਮਣੋ ਭਵਨ੍ਤਂ ਗੋਤਮਂ ਅਪ੍ਪਾਬਾਧਂ ਅਪ੍ਪਾਤਙ੍ਕਂ ਲਹੁਟ੍ਠਾਨਂ ਬਲਂ ਫਾਸੁਵਿਹਾਰਂ ਪੁਚ੍ਛਤਿ; ਏਵਞ੍ਚ ਵਦੇਤਿ – ‘ਬ੍ਰਹ੍ਮਾਯੁ, ਭੋ ਗੋਤਮ, ਬ੍ਰਾਹ੍ਮਣੋ ਜਿਣ੍ਣੋ ਵੁਡ੍ਢੋ ਮਹਲ੍ਲਕੋ ਅਦ੍ਧਗਤੋ ਵਯੋਅਨੁਪ੍ਪਤ੍ਤੋ, ਵੀਸਵਸ੍ਸਸਤਿਕੋ ਜਾਤਿਯਾ, ਤਿਣ੍ਣਂ ਵੇਦਾਨਂ ਪਾਰਗੂ ਸਨਿਘਣ੍ਡੁਕੇਟੁਭਾਨਂ ਸਾਕ੍ਖਰਪ੍ਪਭੇਦਾਨਂ ਇਤਿਹਾਸਪਞ੍ਚਮਾਨਂ, ਪਦਕੋ, ਵੇਯ੍ਯਾਕਰਣੋ, ਲੋਕਾਯਤਮਹਾਪੁਰਿਸਲਕ੍ਖਣੇਸੁ ਅਨਵਯੋ. ਯਾਵਤਾ, ਭੋ, ਬ੍ਰਾਹ੍ਮਣਗਹਪਤਿਕਾ ਮਿਥਿਲਾਯਂ ਪਟਿਵਸਨ੍ਤਿ, ਬ੍ਰਹ੍ਮਾਯੁ ਤੇਸਂ ਬ੍ਰਾਹ੍ਮਣੋ ਅਗ੍ਗਮਕ੍ਖਾਯਤਿ – ਯਦਿਦਂ ਭੋਗੇਹਿ; ਬ੍ਰਹ੍ਮਾਯੁ ਤੇਸਂ ਬ੍ਰਾਹ੍ਮਣੋ ਅਗ੍ਗਮਕ੍ਖਾਯਤਿ – ਯਦਿਦਂ ਮਨ੍ਤੇਹਿ; ਬ੍ਰਹ੍ਮਾਯੁ ਤੇਸਂ ਬ੍ਰਾਹ੍ਮਣੋ ਅਗ੍ਗਮਕ੍ਖਾਯਤਿ – ਯਦਿਦਂ ਆਯੁਨਾ ਚੇਵ ਯਸਸਾ ਚ. ਸੋ ਭੋਤੋ ਗੋਤਮਸ੍ਸ ਦਸ੍ਸਨਕਾਮੋ’’’ਤਿ. ‘‘ਯਸ੍ਸਦਾਨਿ, ਮਾਣਵ, ਬ੍ਰਹ੍ਮਾਯੁ ਬ੍ਰਾਹ੍ਮਣੋ ਕਾਲਂ ਮਞ੍ਞਤੀ’’ਤਿ. ਅਥ ਖੋ ਸੋ ਮਾਣਵਕੋ ਯੇਨ ਬ੍ਰਹ੍ਮਾਯੁ ਬ੍ਰਾਹ੍ਮਣੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਬ੍ਰਹ੍ਮਾਯੁਂ ਬ੍ਰਾਹ੍ਮਣਂ ਏਤਦਵੋਚ – ‘‘ਕਤਾਵਕਾਸੋ ਖੋਮ੍ਹਿ ਭਵਤਾ ਸਮਣੇਨ ਗੋਤਮੇਨ. ਯਸ੍ਸਦਾਨਿ ਭਵਂ ਕਾਲਂ ਮਞ੍ਞਤੀ’’ਤਿ.
੩੯੧. ਅਥ ਖੋ ਬ੍ਰਹ੍ਮਾਯੁ ਬ੍ਰਾਹ੍ਮਣੋ ਯੇਨ ਭਗਵਾ ਤੇਨੁਪਸਙ੍ਕਮਿ. ਅਦ੍ਦਸਾ ਖੋ ਸਾ ਪਰਿਸਾ ਬ੍ਰਹ੍ਮਾਯੁਂ ਬ੍ਰਾਹ੍ਮਣਂ ਦੂਰਤੋਵ ਆਗਚ੍ਛਨ੍ਤਂ. ਦਿਸ੍ਵਾਨ ਓਰਮਿਯ [ਓਰਮਤ੍ਥ (ਸ੍ਯਾ. ਕਂ. ਪੀ.), ਓਰਮਥ, ਓਰਮਤਿ (ਕ.), ਅਥ ਨਂ (ਸੀ.), ਓਰਮਿਯਾਤਿ ਪਨ ਤ੍ਵਾਪਚ੍ਚਯਨ੍ਤਤਥਸਂਵਣ੍ਣਨਾਨੁਰੂਪਂ ਵਿਸੋਧਿਤਪਦਂ] ਓਕਾਸਮਕਾਸਿ ਯਥਾ ਤਂ ਞਾਤਸ੍ਸ ਯਸਸ੍ਸਿਨੋ. ਅਥ ਖੋ ਬ੍ਰਹ੍ਮਾਯੁ ਬ੍ਰਾਹ੍ਮਣੋ ਤਂ ਪਰਿਸਂ ਏਤਦਵੋਚ – ‘‘ਅਲਂ, ਭੋ! ਨਿਸੀਦਥ ਤੁਮ੍ਹੇ ਸਕੇ ਆਸਨੇ. ਇਧਾਹਂ ਸਮਣਸ੍ਸ ਗੋਤਮਸ੍ਸ ਸਨ੍ਤਿਕੇ ਨਿਸੀਦਿਸ੍ਸਾਮੀ’’ਤਿ.
ਅਥ ਖੋ ਬ੍ਰਹ੍ਮਾਯੁ ਬ੍ਰਾਹ੍ਮਣੋ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਤਾ ਸਦ੍ਧਿਂ ਸਮ੍ਮੋਦਿ. ਸਮ੍ਮੋਦਨੀਯਂ ਕਥਂ ਸਾਰਣੀਯਂ ਵੀਤਿਸਾਰੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਬ੍ਰਹ੍ਮਾਯੁ ਬ੍ਰਾਹ੍ਮਣੋ ਭਗਵਤੋ ਕਾਯੇ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਾਨਿ ਸਮਨ੍ਨੇਸਿ. ਅਦ੍ਦਸਾ ਖੋ ਬ੍ਰਹ੍ਮਾਯੁ ਬ੍ਰਾਹ੍ਮਣੋ ਭਗਵਤੋ ਕਾਯੇ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਾਨਿ, ਯੇਭੁਯ੍ਯੇਨ ਠਪੇਤ੍ਵਾ ਦ੍ਵੇ. ਦ੍ਵੀਸੁ ਮਹਾਪੁਰਿਸਲਕ੍ਖਣੇਸੁ ਕਙ੍ਖਤਿ ਵਿਚਿਕਿਚ੍ਛਤਿ ਨਾਧਿਮੁਚ੍ਚਤਿ ਨ ਸਮ੍ਪਸੀਦਤਿ – ਕੋਸੋਹਿਤੇ ਚ ਵਤ੍ਥਗੁਯ੍ਹੇ, ਪਹੂਤਜਿਵ੍ਹਤਾਯ ਚ. ਅਥ ਖੋ ਬ੍ਰਹ੍ਮਾਯੁ ਬ੍ਰਾਹ੍ਮਣੋ ਭਗਵਨ੍ਤਂ ਗਾਥਾਹਿ ਅਜ੍ਝਭਾਸਿ –
‘‘ਯੇ ਮੇ ਦ੍ਵਤ੍ਤਿਂਸਾਤਿ ਸੁਤਾ, ਮਹਾਪੁਰਿਸਲਕ੍ਖਣਾ;
ਦੁਵੇ ਤੇਸਂ ਨ ਪਸ੍ਸਾਮਿ, ਭੋਤੋ ਕਾਯਸ੍ਮਿਂ ਗੋਤਮ.
‘‘ਕਚ੍ਚਿ ਕੋਸੋਹਿਤਂ ਭੋਤੋ, ਵਤ੍ਥਗੁਯ੍ਹਂ ਨਰੁਤ੍ਤਮ;
ਨਾਰੀਸਮਾਨਸਵ੍ਹਯਾ, ਕਚ੍ਚਿ ਜਿਵ੍ਹਾ ਨ ਦਸ੍ਸਕਾ [ਨਾਰੀਸਹਨਾਮ ਸਵ੍ਹਯਾ, ਕਚ੍ਚਿ ਜਿਵ੍ਹਾ ਨਰਸ੍ਸਿਕਾ; (ਸੀ. ਸ੍ਯਾ. ਕਂ. ਪੀ.)].
‘‘ਕਚ੍ਚਿ ਪਹੂਤਜਿਵ੍ਹੋਸਿ, ਯਥਾ ਤਂ ਜਾਨਿਯਾਮਸੇ;
ਨਿਨ੍ਨਾਮਯੇਤਂ ਪਹੂਤਂ, ਕਙ੍ਖਂ ਵਿਨਯ ਨੋ ਇਸੇ.
‘‘ਦਿਟ੍ਠਧਮ੍ਮਹਿਤਤ੍ਥਾਯ, ਸਮ੍ਪਰਾਯਸੁਖਾਯ ਚ;
ਕਤਾਵਕਾਸਾ ਪੁਚ੍ਛਾਮ, ਯਂ ਕਿਞ੍ਚਿ ਅਭਿਪਤ੍ਥਿਤ’’ਨ੍ਤਿ.
੩੯੨. ਅਥ ਖੋ ਭਗਵਤੋ ਏਤਦਹੋਸਿ – ‘‘ਪਸ੍ਸਤਿ ਖੋ ਮੇ ਅਯਂ ਬ੍ਰਹ੍ਮਾਯੁ ਬ੍ਰਾਹ੍ਮਣੋ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਾਨਿ, ਯੇਭੁਯ੍ਯੇਨ ਠਪੇਤ੍ਵਾ ਦ੍ਵੇ. ਦ੍ਵੀਸੁ ਮਹਾਪੁਰਿਸਲਕ੍ਖਣੇਸੁ ਕਙ੍ਖਤਿ ਵਿਚਿਕਿਚ੍ਛਤਿ ਨਾਧਿਮੁਚ੍ਚਤਿ ਨ ਸਮ੍ਪਸੀਦਤਿ – ਕੋਸੋਹਿਤੇ ਚ ਵਤ੍ਥਗੁਯ੍ਹੇ, ਪਹੂਤਜਿਵ੍ਹਤਾਯ ਚਾ’’ਤਿ. ਅਥ ਖੋ ਭਗਵਾ ਤਥਾਰੂਪਂ ਇਦ੍ਧਾਭਿਸਙ੍ਖਾਰਂ ਅਭਿਸਙ੍ਖਾਸਿ ਯਥਾ ਅਦ੍ਦਸ ਬ੍ਰਹ੍ਮਾਯੁ ਬ੍ਰਾਹ੍ਮਣੋ ਭਗਵਤੋ ਕੋਸੋਹਿਤਂ ਵਤ੍ਥਗੁਯ੍ਹਂ. ਅਥ ਖੋ ਭਗਵਾ ਜਿਵ੍ਹਂ ਨਿਨ੍ਨਾਮੇਤ੍ਵਾ ਉਭੋਪਿ ਕਣ੍ਣਸੋਤਾਨਿ ਅਨੁਮਸਿ ਪਟਿਮਸਿ; ਉਭੋਪਿ ਨਾਸਿਕਸੋਤਾਨਿ ਅਨੁਮਸਿ ਪਟਿਮਸਿ; ਕੇਵਲਮ੍ਪਿ ਨਲਾਟਮਣ੍ਡਲਂ ਜਿਵ੍ਹਾਯ ਛਾਦੇਸਿ. ਅਥ ਖੋ ਭਗਵਾ ਬ੍ਰਹ੍ਮਾਯੁਂ ਬ੍ਰਾਹ੍ਮਣਂ ਗਾਥਾਹਿ ਪਚ੍ਚਭਾਸਿ –
‘‘ਯੇ ਤੇ ਦ੍ਵਤ੍ਤਿਂਸਾਤਿ ਸੁਤਾ, ਮਹਾਪੁਰਿਸਲਕ੍ਖਣਾ;
ਸਬ੍ਬੇ ਤੇ ਮਮ ਕਾਯਸ੍ਮਿਂ, ਮਾ ਤੇ [ਮਾ ਵੋ (ਕ.)] ਕਙ੍ਖਾਹੁ ਬ੍ਰਾਹ੍ਮਣ.
‘‘ਅਭਿਞ੍ਞੇਯ੍ਯਂ ਅਭਿਞ੍ਞਾਤਂ, ਭਾਵੇਤਬ੍ਬਞ੍ਚ ਭਾਵਿਤਂ;
ਪਹਾਤਬ੍ਬਂ ਪਹੀਨਂ ਮੇ, ਤਸ੍ਮਾ ਬੁਦ੍ਧੋਸ੍ਮਿ ਬ੍ਰਾਹ੍ਮਣ.
‘‘ਦਿਟ੍ਠਧਮ੍ਮਹਿਤਤ੍ਥਾਯ, ਸਮ੍ਪਰਾਯਸੁਖਾਯ ਚ;
ਕਤਾਵਕਾਸੋ ਪੁਚ੍ਛਸ੍ਸੁ, ਯਂ ਕਿਞ੍ਚਿ ਅਭਿਪਤ੍ਥਿਤ’’ਨ੍ਤਿ.
੩੯੩. ਅਥ ਖੋ ਬ੍ਰਹ੍ਮਾਯੁਸ੍ਸ ਬ੍ਰਾਹ੍ਮਣਸ੍ਸ ਏਤਦਹੋਸਿ – ‘‘ਕਤਾਵਕਾਸੋ ਖੋਮ੍ਹਿ ਸਮਣੇਨ ਗੋਤਮੇਨ. ਕਿਂ ਨੁ ਖੋ ਅਹਂ ਸਮਣਂ ਗੋਤਮਂ ਪੁਚ੍ਛੇਯ੍ਯਂ – ‘ਦਿਟ੍ਠਧਮ੍ਮਿਕਂ ਵਾ ਅਤ੍ਥਂ ਸਮ੍ਪਰਾਯਿਕਂ ਵਾ’’’ਤਿ. ਅਥ ਖੋ ਬ੍ਰਹ੍ਮਾਯੁਸ੍ਸ ਬ੍ਰਾਹ੍ਮਣਸ੍ਸ ਏਤਦਹੋਸਿ – ‘‘ਕੁਸਲੋ ਖੋ ਅਹਂ ਦਿਟ੍ਠਧਮ੍ਮਿਕਾਨਂ ਅਤ੍ਥਾਨਂ. ਅਞ੍ਞੇਪਿ ਮਂ ਦਿਟ੍ਠਧਮ੍ਮਿਕਂ ਅਤ੍ਥਂ ਪੁਚ੍ਛਨ੍ਤਿ. ਯਂਨੂਨਾਹਂ ਸਮਣਂ ਗੋਤਮਂ ਸਮ੍ਪਰਾਯਿਕਂਯੇਵ ਅਤ੍ਥਂ ਪੁਚ੍ਛੇਯ੍ਯ’’ਨ੍ਤਿ. ਅਥ ਖੋ ਬ੍ਰਹ੍ਮਾਯੁ ਬ੍ਰਾਹ੍ਮਣੋ ਭਗਵਨ੍ਤਂ ਗਾਥਾਹਿ ਅਜ੍ਝਭਾਸਿ –
‘‘ਕਥਂ ਖੋ ਬ੍ਰਾਹ੍ਮਣੋ ਹੋਤਿ, ਕਥਂ ਭਵਤਿ ਵੇਦਗੂ;
ਤੇਵਿਜ੍ਜੋ ਭੋ ਕਥਂ ਹੋਤਿ, ਸੋਤ੍ਥਿਯੋ ਕਿਨ੍ਤਿ ਵੁਚ੍ਚਤਿ.
‘‘ਅਰਹਂ ਭੋ ਕਥਂ ਹੋਤਿ, ਕਥਂ ਭਵਤਿ ਕੇਵਲੀ;
ਮੁਨਿ ਚ ਭੋ ਕਥਂ ਹੋਤਿ, ਬੁਦ੍ਧੋ ਕਿਨ੍ਤਿ ਪਵੁਚ੍ਚਤੀ’’ਤਿ.
੩੯੪. ਅਥ ਖੋ ਭਗਵਾ ਬ੍ਰਹ੍ਮਾਯੁਂ ਬ੍ਰਾਹ੍ਮਣਂ ਗਾਥਾਹਿ ਪਚ੍ਚਭਾਸਿ –
‘‘ਪੁਬ੍ਬੇਨਿਵਾਸਂ ਯੋ ਵੇਦਿ, ਸਗ੍ਗਾਪਾਯਞ੍ਚ ਪਸ੍ਸਤਿ;
ਅਥੋ ਜਾਤਿਕ੍ਖਯਂ ਪਤ੍ਤੋ, ਅਭਿਞ੍ਞਾ ਵੋਸਿਤੋ ਮੁਨਿ.
‘‘ਚਿਤ੍ਤਂ ਵਿਸੁਦ੍ਧਂ ਜਾਨਾਤਿ, ਮੁਤ੍ਤਂ ਰਾਗੇਹਿ ਸਬ੍ਬਸੋ;
ਪਹੀਨਜਾਤਿਮਰਣੋ, ਬ੍ਰਹ੍ਮਚਰਿਯਸ੍ਸ ਕੇਵਲੀ;
ਪਾਰਗੂ ਸਬ੍ਬਧਮ੍ਮਾਨਂ, ਬੁਦ੍ਧੋ ਤਾਦੀ ਪਵੁਚ੍ਚਤੀ’’ਤਿ.
ਏਵਂ ਵੁਤ੍ਤੇ, ਬ੍ਰਹ੍ਮਾਯੁ ਬ੍ਰਾਹ੍ਮਣੋ ਉਟ੍ਠਾਯਾਸਨਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਭਗਵਤੋ ਪਾਦੇਸੁ ਸਿਰਸਾ ਨਿਪਤਿਤ੍ਵਾ ਭਗਵਤੋ ਪਾਦਾਨਿ ਮੁਖੇਨ ਚ ਪਰਿਚੁਮ੍ਬਤਿ, ਪਾਣੀਹਿ ਚ ਪਰਿਸਮ੍ਬਾਹਤਿ, ਨਾਮਞ੍ਚ ਸਾਵੇਤਿ – ‘‘ਬ੍ਰਹ੍ਮਾਯੁ ਅਹਂ, ਭੋ ਗੋਤਮ, ਬ੍ਰਾਹ੍ਮਣੋ; ਬ੍ਰਹ੍ਮਾਯੁ ਅਹਂ, ਭੋ ਗੋਤਮ, ਬ੍ਰਾਹ੍ਮਣੋ’’ਤਿ. ਅਥ ਖੋ ਸਾ ਪਰਿਸਾ ਅਚ੍ਛਰਿਯਬ੍ਭੁਤਚਿਤ੍ਤਜਾਤਾ ਅਹੋਸਿ – ‘‘ਅਚ੍ਛਰਿਯਂ ਵਤ, ਭੋ, ਅਬ੍ਭੁਤਂ ਵਤ, ਭੋ! ਯਤ੍ਰ ਹਿ ਨਾਮਾਯਂ ਬ੍ਰਹ੍ਮਾਯੁ ਬ੍ਰਾਹ੍ਮਣੋ ਞਾਤੋ ਯਸਸ੍ਸੀ ਏਵਰੂਪਂ ਪਰਮਨਿਪਚ੍ਚਕਾਰਂ ਕਰਿਸ੍ਸਤੀ’’ਤਿ. ਅਥ ਖੋ ਭਗਵਾ ਬ੍ਰਹ੍ਮਾਯੁਂ ਬ੍ਰਾਹ੍ਮਣਂ ਏਤਦਵੋਚ – ‘‘ਅਲਂ, ਬ੍ਰਾਹ੍ਮਣ, ਉਟ੍ਠਹ ਨਿਸੀਦ ਤ੍ਵਂ ਸਕੇ ਆਸਨੇ ਯਤੋ ਤੇ ਮਯਿ ਚਿਤ੍ਤਂ ਪਸਨ੍ਨ’’ਨ੍ਤਿ. ਅਥ ਖੋ ਬ੍ਰਹ੍ਮਾਯੁ ਬ੍ਰਾਹ੍ਮਣੋ ਉਟ੍ਠਹਿਤ੍ਵਾ ਸਕੇ ਆਸਨੇ ਨਿਸੀਦਿ.
੩੯੫. ਅਥ ਖੋ ਭਗਵਾ ਬ੍ਰਹ੍ਮਾਯੁਸ੍ਸ ਬ੍ਰਾਹ੍ਮਣਸ੍ਸ ਅਨੁਪੁਬ੍ਬਿਂ ਕਥਂ ਕਥੇਸਿ, ਸੇਯ੍ਯਥਿਦਂ – ਦਾਨਕਥਂ, ਸੀਲਕਥਂ, ਸਗ੍ਗਕਥਂ; ਕਾਮਾਨਂ ਆਦੀਨਵਂ ਓਕਾਰਂ ਸਂਕਿਲੇਸਂ ਨੇਕ੍ਖਮ੍ਮੇ ਆਨਿਸਂਸਂ ਪਕਾਸੇਸਿ. ਯਦਾ ਭਗਵਾ ਅਞ੍ਞਾਸਿ ਬ੍ਰਹ੍ਮਾਯੁਂ ਬ੍ਰਾਹ੍ਮਣਂ ਕਲ੍ਲਚਿਤ੍ਤਂ ਮੁਦੁਚਿਤ੍ਤਂ ਵਿਨੀਵਰਣਚਿਤ੍ਤਂ ਉਦਗ੍ਗਚਿਤ੍ਤਂ ਪਸਨ੍ਨਚਿਤ੍ਤਂ, ਅਥ ਯਾ ਬੁਦ੍ਧਾਨਂ ਸਾਮੁਕ੍ਕਂਸਿਕਾ ਧਮ੍ਮਦੇਸਨਾ ਤਂ ਪਕਾਸੇਸਿ – ਦੁਕ੍ਖਂ, ਸਮੁਦਯਂ, ਨਿਰੋਧਂ, ਮਗ੍ਗਂ. ਸੇਯ੍ਯਥਾਪਿ ਨਾਮ ਸੁਦ੍ਧਂ ਵਤ੍ਥਂ ਅਪਗਤਕਾਲ਼ਕਂ ਸਮ੍ਮਦੇਵ ਰਜਨਂ ਪਟਿਗ੍ਗਣ੍ਹੇਯ੍ਯ, ਏਵਮੇਵ ਬ੍ਰਹ੍ਮਾਯੁਸ੍ਸ ਬ੍ਰਾਹ੍ਮਣਸ੍ਸ ਤਸ੍ਮਿਂਯੇਵ ਆਸਨੇ ਵਿਰਜਂ ਵੀਤਮਲਂ ਧਮ੍ਮਚਕ੍ਖੁਂ ਉਦਪਾਦਿ – ‘‘ਯਂ ਕਿਞ੍ਚਿ ਸਮੁਦਯਧਮ੍ਮਂ ਸਬ੍ਬਂ ਤਂ ਨਿਰੋਧਧਮ੍ਮ’’ਨ੍ਤਿ. ਅਥ ਖੋ ਬ੍ਰਹ੍ਮਾਯੁ ਬ੍ਰਾਹ੍ਮਣੋ ਦਿਟ੍ਠਧਮ੍ਮੋ ਪਤ੍ਤਧਮ੍ਮੋ ਵਿਦਿਤਧਮ੍ਮੋ ਪਰਿਯੋਗਾਲ਼੍ਹਧਮ੍ਮੋ ਤਿਣ੍ਣਵਿਚਿਕਿਚ੍ਛੋ ਵਿਗਤਕਥਂਕਥੋ ਵੇਸਾਰਜ੍ਜਪ੍ਪਤ੍ਤੋ ਅਪਰਪ੍ਪਚ੍ਚਯੋ ਸਤ੍ਥੁਸਾਸਨੇ ਭਗਵਨ੍ਤਂ ਏਤਦਵੋਚ – ‘‘ਅਭਿਕ੍ਕਨ੍ਤਂ, ਭੋ ਗੋਤਮ, ਅਭਿਕ੍ਕਨ੍ਤਂ, ਭੋ ਗੋਤਮ! ਸੇਯ੍ਯਥਾਪਿ, ਭੋ ਗੋਤਮ, ਨਿਕ੍ਕੁਜ੍ਜਿਤਂ ਵਾ ਉਕ੍ਕੁਜ੍ਜੇਯ੍ਯ, ਪਟਿਚ੍ਛਨ੍ਨਂ ਵਾ ਵਿਵਰੇਯ੍ਯ, ਮੂਲ਼੍ਹਸ੍ਸ ਵਾ ਮਗ੍ਗਂ ਆਚਿਕ੍ਖੇਯ੍ਯ, ਅਨ੍ਧਕਾਰੇ ਵਾ ਤੇਲਪਜ੍ਜੋਤਂ ਧਾਰੇਯ੍ਯ – ਚਕ੍ਖੁਮਨ੍ਤੋ ਰੂਪਾਨਿ ਦਕ੍ਖਨ੍ਤੀਤਿ – ਏਵਮੇਵਂ ਭੋਤਾ ਗੋਤਮੇਨ ਅਨੇਕਪਰਿਯਾਯੇਨ ਧਮ੍ਮੋ ਪਕਾਸਿਤੋ. ਏਸਾਹਂ ਭਵਨ੍ਤਂ ਗੋਤਮਂ ਸਰਣਂ ਗਚ੍ਛਾਮਿ ਧਮ੍ਮਞ੍ਚ ਭਿਕ੍ਖੁਸਙ੍ਘਞ੍ਚ. ਉਪਾਸਕਂ ਮਂ ਭਵਂ ਗੋਤਮੋ ਧਾਰੇਤੁ ਅਜ੍ਜਤਗ੍ਗੇ ਪਾਣੁਪੇਤਂ ਸਰਣਂ ਗਤਂ. ਅਧਿਵਾਸੇਤੁ ਚ ਮੇ ਭਵਂ ਗੋਤਮੋ ਸ੍ਵਾਤਨਾਯ ਭਤ੍ਤਂ ਸਦ੍ਧਿਂ ਭਿਕ੍ਖੁਸਙ੍ਘੇਨਾ’’ਤਿ. ਅਧਿਵਾਸੇਸਿ ਭਗਵਾ ਤੁਣ੍ਹੀਭਾਵੇਨ. ਅਥ ਖੋ ਬ੍ਰਹ੍ਮਾਯੁ ਬ੍ਰਾਹ੍ਮਣੋ ਭਗਵਤੋ ਅਧਿਵਾਸਨਂ ਵਿਦਿਤ੍ਵਾ ਉਟ੍ਠਾਯਾਸਨਾ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ. ਅਥ ਖੋ ਬ੍ਰਹ੍ਮਾਯੁ ਬ੍ਰਾਹ੍ਮਣੋ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਸਕੇ ਨਿਵੇਸਨੇ ਪਣੀਤਂ ਖਾਦਨੀਯਂ ਭੋਜਨੀਯਂ ਪਟਿਯਾਦਾਪੇਤ੍ਵਾ ਭਗਵਤੋ ਕਾਲਂ ਆਰੋਚਾਪੇਸਿ – ‘‘ਕਾਲੋ, ਭੋ ਗੋਤਮ, ਨਿਟ੍ਠਿਤਂ ਭਤ੍ਤ’’ਨ੍ਤਿ.
ਅਥ ਖੋ ਭਗਵਾ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਯੇਨ ਬ੍ਰਹ੍ਮਾਯੁਸ੍ਸ ਬ੍ਰਾਹ੍ਮਣਸ੍ਸ ਨਿਵੇਸਨਂ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ ਸਦ੍ਧਿਂ ਭਿਕ੍ਖੁਸਙ੍ਘੇਨ. ਅਥ ਖੋ ਬ੍ਰਹ੍ਮਾਯੁ ਬ੍ਰਾਹ੍ਮਣੋ ਸਤ੍ਤਾਹਂ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਪਣੀਤੇਨ ਖਾਦਨੀਯੇਨ ਭੋਜਨੀਯੇਨ ਸਹਤ੍ਥਾ ਸਨ੍ਤਪ੍ਪੇਸਿ ਸਮ੍ਪਵਾਰੇਸਿ. ਅਥ ਖੋ ਭਗਵਾ ਤਸ੍ਸ ਸਤ੍ਤਾਹਸ੍ਸ ਅਚ੍ਚਯੇਨ ਵਿਦੇਹੇਸੁ ਚਾਰਿਕਂ ਪਕ੍ਕਾਮਿ. ਅਥ ਖੋ ਬ੍ਰਹ੍ਮਾਯੁ ਬ੍ਰਾਹ੍ਮਣੋ ਅਚਿਰਪਕ੍ਕਨ੍ਤਸ੍ਸ ਭਗਵਤੋ ਕਾਲਮਕਾਸਿ. ਅਥ ਖੋ ਸਮ੍ਬਹੁਲਾ ਭਿਕ੍ਖੂ ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ. ਏਕਮਨ੍ਤਂ ਨਿਸਿਨ੍ਨਾ ਖੋ ਤੇ ਭਿਕ੍ਖੂ ਭਗਵਨ੍ਤਂ ਏਤਦਵੋਚੁਂ – ‘‘ਬ੍ਰਹ੍ਮਾਯੁ, ਭਨ੍ਤੇ, ਬ੍ਰਾਹ੍ਮਣੋ ਕਾਲਙ੍ਕਤੋ. ਤਸ੍ਸ ਕਾ ਗਤਿ, ਕੋ ਅਭਿਸਮ੍ਪਰਾਯੋ’’ਤਿ? ‘‘ਪਣ੍ਡਿਤੋ, ਭਿਕ੍ਖਵੇ, ਬ੍ਰਹ੍ਮਾਯੁ ਬ੍ਰਾਹ੍ਮਣੋ ਪਚ੍ਚਪਾਦਿ ਧਮ੍ਮਸ੍ਸਾਨੁਧਮ੍ਮਂ, ਨ ਚ ਮਂ ਧਮ੍ਮਾਧਿਕਰਣਂ ਵਿਹੇਸੇਸਿ. ਬ੍ਰਹ੍ਮਾਯੁ, ਭਿਕ੍ਖਵੇ, ਬ੍ਰਾਹ੍ਮਣੋ ਪਞ੍ਚਨ੍ਨਂ ਓਰਮ੍ਭਾਗਿਯਾਨਂ ਸਂਯੋਜਨਾਨਂ ਪਰਿਕ੍ਖਯਾ ਓਪਪਾਤਿਕੋ ਹੋਤਿ, ਤਤ੍ਥ ਪਰਿਨਿਬ੍ਬਾਯੀ, ਅਨਾਵਤ੍ਤਿਧਮ੍ਮੋ ਤਸ੍ਮਾ ਲੋਕਾ’’ਤਿ.
ਇਦਮਵੋਚ ਭਗਵਾ. ਅਤ੍ਤਮਨਾ ਤੇ ਭਿਕ੍ਖੂ ਭਗਵਤੋ ਭਾਸਿਤਂ ਅਭਿਨਨ੍ਦੁਨ੍ਤਿ.
ਬ੍ਰਹ੍ਮਾਯੁਸੁਤ੍ਤਂ ਨਿਟ੍ਠਿਤਂ ਪਠਮਂ.