੮. ਤਤਿਯਨਾਵਾਵਿਮਾਨਵਤ੍ਥੁ

੬੩. ‘‘ਸੁਵਣ੍ਣਚ੍ਛਦਨਂ ਨਾਵਂ, ਨਾਰਿ ਆਰੁਯ੍ਹ ਤਿਟ੍ਠਸਿ;

ਓਗਾਹਸਿ ਪੋਕ੍ਖਰਣਿਂ, ਪਦ੍ਮਂ ਛਿਨ੍ਦਸਿ ਪਾਣਿਨਾ.

੬੪. ‘‘ਕੂਟਾਗਾਰਾ ਨਿਵੇਸਾ ਤੇ, ਵਿਭਤ੍ਤਾ ਭਾਗਸੋ ਮਿਤਾ;

ਦਦ੍ਦਲ੍ਲਮਾਨਾ [ਦਦ੍ਦਲ਼੍ਹਮਾਨਾ (ਕ.)] ਆਭਨ੍ਤਿ, ਸਮਨ੍ਤਾ ਚਤੁਰੋ ਦਿਸਾ.

੬੫. ‘‘ਕੇਨ ਤੇਤਾਦਿਸੋ ਵਣ੍ਣੋ, ਕੇਨ ਤੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਤੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

੬੬. ‘‘ਪੁਚ੍ਛਾਮਿ ਤਂ ਦੇਵਿ ਮਹਾਨੁਭਾਵੇ, ਮਨੁਸ੍ਸਭੂਤਾ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

੬੭. ਸਾ ਦੇਵਤਾ ਅਤ੍ਤਮਨਾ, ਸਮ੍ਬੁਦ੍ਧੇਨੇਵ ਪੁਚ੍ਛਿਤਾ;

ਪਞ੍ਹਂ ਪੁਟ੍ਠਾ ਵਿਯਾਕਾਸਿ, ਯਸ੍ਸ ਕਮ੍ਮਸ੍ਸਿਦਂ ਫਲਂ.

੬੮. ‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤਾ, ਪੁਰਿਮਾਯ ਜਾਤਿਯਾ ਮਨੁਸ੍ਸਲੋਕੇ;

ਦਿਸ੍ਵਾਨ ਭਿਕ੍ਖੂ ਤਸਿਤੇ ਕਿਲਨ੍ਤੇ, ਉਟ੍ਠਾਯ ਪਾਤੁਂ ਉਦਕਂ ਅਦਾਸਿਂ.

੬੯. ‘‘ਯੋ ਵੇ ਕਿਲਨ੍ਤਾਨ ਪਿਪਾਸਿਤਾਨਂ, ਉਟ੍ਠਾਯ ਪਾਤੁਂ ਉਦਕਂ ਦਦਾਤਿ;

ਸੀਤੋਦਕਾ ਤਸ੍ਸ ਭਵਨ੍ਤਿ ਨਜ੍ਜੋ, ਪਹੂਤਮਲ੍ਯਾ ਬਹੁਪੁਣ੍ਡਰੀਕਾ.

੭੦. ‘‘ਤਂ ਆਪਗਾ ਅਨੁਪਰਿਯਨ੍ਤਿ ਸਬ੍ਬਦਾ, ਸੀਤੋਦਕਾ ਵਾਲੁਕਸਨ੍ਥਤਾ ਨਦੀ;

ਅਮ੍ਬਾ ਚ ਸਾਲਾ ਤਿਲਕਾ ਚ ਜਮ੍ਬੁਯੋ, ਉਦ੍ਦਾਲਕਾ ਪਾਟਲਿਯੋ ਚ ਫੁਲ੍ਲਾ.

੭੧. ‘‘ਤਂ ਭੂਮਿਭਾਗੇਹਿ ਉਪੇਤਰੂਪਂ, ਵਿਮਾਨਸੇਟ੍ਠਂ ਭੁਸਸੋਭਮਾਨਂ;

ਤਸ੍ਸੀਧ ਕਮ੍ਮਸ੍ਸ ਅਯਂ ਵਿਪਾਕੋ, ਏਤਾਦਿਸਂ ਪੁਞ੍ਞਕਤਾ ਲਭਨ੍ਤਿ.

੭੨. ‘‘ਕੂਟਾਗਾਰਾ ਨਿਵੇਸਾ ਮੇ, ਵਿਭਤ੍ਤਾ ਭਾਗਸੋ ਮਿਤਾ;

ਦਦ੍ਦਲ੍ਲਮਾਨਾ ਆਭਨ੍ਤਿ, ਸਮਨ੍ਤਾ ਚਤੁਰੋ ਦਿਸਾ.

੭੩. ‘‘ਤੇਨ ਮੇਤਾਦਿਸੋ ਵਣ੍ਣੋ, ਤੇਨ ਮੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਮੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

੭੪. ‘‘ਅਕ੍ਖਾਮਿ ਤੇ ਬੁਦ੍ਧ ਮਹਾਨੁਭਾਵ, ਮਨੁਸ੍ਸਭੂਤਾ ਯਮਕਾਸਿ ਪੁਞ੍ਞਂ;

ਤੇਨਮ੍ਹਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤਿ;

ਏਤਸ੍ਸ ਕਮ੍ਮਸ੍ਸ ਫਲਂ ਮਮੇਦਂ, ਅਤ੍ਥਾਯ ਬੁਦ੍ਧੋ ਉਦਕਂ ਅਪਾਯੀ’’ਤਿ [ਅਪਾਸੀਤਿ (ਸੀ. ਸ੍ਯਾ. ਪੀ.)].

ਤਤਿਯਨਾਵਾਵਿਮਾਨਂ ਅਟ੍ਠਮਂ.