੫. ਕੁਞ੍ਜਰਵਿਮਾਨਵਤ੍ਥੁ

੩੧. ‘‘ਕੁਞ੍ਜਰੋ ਤੇ ਵਰਾਰੋਹੋ, ਨਾਨਾਰਤਨਕਪ੍ਪਨੋ;

ਰੁਚਿਰੋ ਥਾਮਵਾ ਜਵਸਮ੍ਪਨ੍ਨੋ, ਆਕਾਸਮ੍ਹਿ ਸਮੀਹਤਿ.

੩੨. ‘‘ਪਦੁਮਿ ਪਦ੍ਮ [ਪਦੁਮ… (ਸੀ. ਸ੍ਯਾ.) ਏਵਮੁਪਰਿਪਿ] ਪਤ੍ਤਕ੍ਖਿ, ਪਦ੍ਮੁਪ੍ਪਲਜੁਤਿਨ੍ਧਰੋ;

ਪਦ੍ਮਚੁਣ੍ਣਾਭਿਕਿਣ੍ਣਙ੍ਗੋ, ਸੋਣ੍ਣਪੋਕ੍ਖਰਮਾਲਧਾ [… ਮਾਲਵਾ (ਸੀ. ਸ੍ਯਾ.)].

੩੩. ‘‘ਪਦੁਮਾਨੁਸਟਂ ਮਗ੍ਗਂ, ਪਦ੍ਮਪਤ੍ਤਵਿਭੂਸਿਤਂ.

ਠਿਤਂ ਵਗ੍ਗੁਮਨੁਗ੍ਘਾਤੀ, ਮਿਤਂ ਗਚ੍ਛਤਿ ਵਾਰਣੋ.

੩੪. ‘‘ਤਸ੍ਸ ਪਕ੍ਕਮਮਾਨਸ੍ਸ, ਸੋਣ੍ਣਕਂਸਾ ਰਤਿਸ੍ਸਰਾ;

ਤੇਸਂ ਸੁਯ੍ਯਤਿ ਨਿਗ੍ਘੋਸੋ, ਤੁਰਿਯੇ ਪਞ੍ਚਙ੍ਗਿਕੇ ਯਥਾ.

੩੫. ‘‘ਤਸ੍ਸ ਨਾਗਸ੍ਸ ਖਨ੍ਧਮ੍ਹਿ, ਸੁਚਿਵਤ੍ਥਾ ਅਲਙ੍ਕਤਾ;

ਮਹਨ੍ਤਂ ਅਚ੍ਛਰਾਸਙ੍ਘਂ, ਵਣ੍ਣੇਨ ਅਤਿਰੋਚਸਿ.

੩੬. ‘‘ਦਾਨਸ੍ਸ ਤੇ ਇਦਂ ਫਲਂ, ਅਥੋ ਸੀਲਸ੍ਸ ਵਾ ਪਨ;

ਅਥੋ ਅਞ੍ਜਲਿਕਮ੍ਮਸ੍ਸ, ਤਂ ਮੇ ਅਕ੍ਖਾਹਿ ਪੁਚ੍ਛਿਤਾ’’ਤਿ;

੩੭. ਸਾ ਦੇਵਤਾ ਅਤ੍ਤਮਨਾ, ਮੋਗ੍ਗਲ੍ਲਾਨੇਨ ਪੁਚ੍ਛਿਤਾ;

ਪਞ੍ਹਂ ਪੁਟ੍ਠਾ ਵਿਯਾਕਾਸਿ, ਯਸ੍ਸ ਕਮ੍ਮਸ੍ਸਿਦਂ ਫਲਂ.

੩੮. ‘‘ਦਿਸ੍ਵਾਨ ਗੁਣਸਮ੍ਪਨ੍ਨਂ, ਝਾਯਿਂ ਝਾਨਰਤਂ ਸਤਂ;

ਅਦਾਸਿਂ ਪੁਪ੍ਫਾਭਿਕਿਣ੍ਣਂ, ਆਸਨਂ ਦੁਸ੍ਸਸਨ੍ਥਤਂ.

੩੯. ‘‘ਉਪਡ੍ਢਂ ਪਦ੍ਮਮਾਲਾਹਂ, ਆਸਨਸ੍ਸ ਸਮਨ੍ਤਤੋ;

ਅਬ੍ਭੋਕਿਰਿਸ੍ਸਂ ਪਤ੍ਤੇਹਿ, ਪਸਨ੍ਨਾ ਸੇਹਿ ਪਾਣਿਭਿ.

੪੦. ‘‘ਤਸ੍ਸ ਕਮ੍ਮਕੁਸਲਸ੍ਸ [ਕਮ੍ਮਸ੍ਸ ਕੁਸਲਸ੍ਸ (ਸੀ. ਪੀ.)], ਇਦਂ ਮੇ ਈਦਿਸਂ ਫਲਂ;

ਸਕ੍ਕਾਰੋ ਗਰੁਕਾਰੋ ਚ, ਦੇਵਾਨਂ ਅਪਚਿਤਾ ਅਹਂ.

੪੧. ‘‘ਯੋ ਵੇ ਸਮ੍ਮਾਵਿਮੁਤ੍ਤਾਨਂ, ਸਨ੍ਤਾਨਂ ਬ੍ਰਹ੍ਮਚਾਰਿਨਂ;

ਪਸਨ੍ਨੋ ਆਸਨਂ ਦਜ੍ਜਾ, ਏਵਂ ਨਨ੍ਦੇ ਯਥਾ ਅਹਂ.

੪੨. ‘‘ਤਸ੍ਮਾ ਹਿ ਅਤ੍ਤਕਾਮੇਨ [ਅਤ੍ਥਕਾਮੇਨ (ਕ.)], ਮਹਤ੍ਤਮਭਿਕਙ੍ਖਤਾ;

ਆਸਨਂ ਦਾਤਬ੍ਬਂ ਹੋਤਿ, ਸਰੀਰਨ੍ਤਿਮਧਾਰਿਨ’’ਨ੍ਤਿ.

ਕੁਞ੍ਜਰਵਿਮਾਨਂ ਪਞ੍ਚਮਂ.