੧੧. ਪਠਮਪਤਿਬ੍ਬਤਾਵਿਮਾਨਵਤ੍ਥੁ

੯੩. ‘‘ਕੋਞ੍ਚਾ ਮਯੂਰਾ ਦਿਵਿਯਾ ਚ ਹਂਸਾ, ਵਗ੍ਗੁਸ੍ਸਰਾ ਕੋਕਿਲਾ ਸਮ੍ਪਤਨ੍ਤਿ;

ਪੁਪ੍ਫਾਭਿਕਿਣ੍ਣਂ ਰਮ੍ਮਮਿਦਂ ਵਿਮਾਨਂ, ਅਨੇਕਚਿਤ੍ਤਂ ਨਰਨਾਰਿਸੇਵਿਤਂ [ਨਰਨਾਰੀਭਿ ਸੇਵਿਤਂ (ਕ.)].

੯੪. ‘‘ਤਤ੍ਥਚ੍ਛਸਿ ਦੇਵਿ ਮਹਾਨੁਭਾਵੇ, ਇਦ੍ਧੀ ਵਿਕੁਬ੍ਬਨ੍ਤਿ ਅਨੇਕਰੂਪਾ;

ਇਮਾ ਚ ਤੇ ਅਚ੍ਛਰਾਯੋ ਸਮਨ੍ਤਤੋ, ਨਚ੍ਚਨ੍ਤਿ ਗਾਯਨ੍ਤਿ ਪਮੋਦਯਨ੍ਤਿ ਚ.

੯੫. ‘‘ਦੇਵਿਦ੍ਧਿਪਤ੍ਤਾਸਿ ਮਹਾਨੁਭਾਵੇ, ਮਨੁਸ੍ਸਭੂਤਾ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

੯੬. ਸਾ ਦੇਵਤਾ ਅਤ੍ਤਮਨਾ, ਮੋਗ੍ਗਲ੍ਲਾਨੇਨ ਪੁਚ੍ਛਿਤਾ;

ਪਞ੍ਹਂ ਪੁਟ੍ਠਾ ਵਿਯਾਕਾਸਿ, ਯਸ੍ਸ ਕਮ੍ਮਸ੍ਸਿਦਂ ਫਲਂ.

੯੭. ‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤਾ, ਪਤਿਬ੍ਬਤਾਨਞ੍ਞਮਨਾ ਅਹੋਸਿਂ;

ਮਾਤਾਵ ਪੁਤ੍ਤਂ ਅਨੁਰਕ੍ਖਮਾਨਾ, ਕੁਦ੍ਧਾਪਿਹਂ [ਕੁਦ੍ਧਾਪਹਂ (ਸੀ.)] ਨਪ੍ਫਰੁਸਂ ਅਵੋਚਂ.

੯੮. ‘‘ਸਚ੍ਚੇ ਠਿਤਾ ਮੋਸਵਜ੍ਜਂ ਪਹਾਯ, ਦਾਨੇ ਰਤਾ ਸਙ੍ਗਹਿਤਤ੍ਤਭਾਵਾ;

ਅਨ੍ਨਞ੍ਚ ਪਾਨਞ੍ਚ ਪਸਨ੍ਨਚਿਤ੍ਤਾ, ਸਕ੍ਕਚ੍ਚ ਦਾਨਂ ਵਿਪੁਲਂ ਅਦਾਸਿਂ.

੯੯. ‘‘ਤੇਨ ਮੇਤਾਦਿਸੋ ਵਣ੍ਣੋ, ਤੇਨ ਮੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਮੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

੧੦੦. ‘‘ਅਕ੍ਖਾਮਿ ਤੇ ਭਿਕ੍ਖੁ ਮਹਾਨੁਭਾਵ, ਮਨੁਸ੍ਸਭੂਤਾ ਯਮਕਾਸਿ ਪੁਞ੍ਞਂ;

ਤੇਨਮ੍ਹਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

ਪਠਮਪਤਿਬ੍ਬਤਾਵਿਮਾਨਂ ਏਕਾਦਸਮਂ.