੮. ਪਿਣ੍ਡਪਾਤਿਕਸੁਤ੍ਤਂ

੨੮. ਏਵਂ ਮੇ ਸੁਤਂ – ਏਕਂ ਸਮਯਂ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਸਮ੍ਬਹੁਲਾਨਂ ਭਿਕ੍ਖੂਨਂ ਪਚ੍ਛਾਭਤ੍ਤਂ ਪਿਣ੍ਡਪਾਤਪਟਿਕ੍ਕਨ੍ਤਾਨਂ ਕਰੇਰਿਮਣ੍ਡਲਮਾਲ਼ੇ ਸਨ੍ਨਿਸਿਨ੍ਨਾਨਂ ਸਨ੍ਨਿਪਤਿਤਾਨਂ ਅਯਮਨ੍ਤਰਾਕਥਾ ਉਦਪਾਦਿ –

‘‘ਪਿਣ੍ਡਪਾਤਿਕੋ, ਆਵੁਸੋ, ਭਿਕ੍ਖੁ ਪਿਣ੍ਡਾਯ ਚਰਨ੍ਤੋ ਲਭਤਿ ਕਾਲੇਨ ਕਾਲਂ ਮਨਾਪਿਕੇ ਚਕ੍ਖੁਨਾ ਰੂਪੇ ਪਸ੍ਸਿਤੁਂ, ਲਭਤਿ ਕਾਲੇਨ ਕਾਲਂ ਮਨਾਪਿਕੇ ਸੋਤੇਨ ਸਦ੍ਦੇ ਸੋਤੁਂ, ਲਭਤਿ ਕਾਲੇਨ ਕਾਲਂ ਮਨਾਪਿਕੇ ਘਾਨੇਨ ਗਨ੍ਧੇ ਘਾਯਿਤੁਂ, ਲਭਤਿ ਕਾਲੇਨ ਕਾਲਂ ਮਨਾਪਿਕੇ ਜਿਵ੍ਹਾਯ ਰਸੇ ਸਾਯਿਤੁਂ, ਲਭਤਿ ਕਾਲੇਨ ਕਾਲਂ ਮਨਾਪਿਕੇ ਕਾਯੇਨ ਫੋਟ੍ਠਬ੍ਬੇ ਫੁਸਿਤੁਂ. ਪਿਣ੍ਡਪਾਤਿਕੋ, ਆਵੁਸੋ, ਭਿਕ੍ਖੁ ਸਕ੍ਕਤੋ ਗਰੁਕਤੋ ਮਾਨਿਤੋ ਪੂਜਿਤੋ ਅਪਚਿਤੋ ਪਿਣ੍ਡਾਯ ਚਰਤਿ. ਹਨ੍ਦਾਵੁਸੋ, ਮਯਮ੍ਪਿ ਪਿਣ੍ਡਪਾਤਿਕਾ ਹੋਮ. ਮਯਮ੍ਪਿ ਲਚ੍ਛਾਮ ਕਾਲੇਨ ਕਾਲਂ ਮਨਾਪਿਕੇ ਚਕ੍ਖੁਨਾ ਰੂਪੇ ਪਸ੍ਸਿਤੁਂ, ਮਯਮ੍ਪਿ ਲਚ੍ਛਾਮ ਕਾਲੇਨ ਕਾਲਂ ਮਨਾਪਿਕੇ ਸੋਤੇਨ ਸਦ੍ਦੇ ਸੋਤੁਂ, ਮਯਮ੍ਪਿ ਲਚ੍ਛਾਮ ਕਾਲੇਨ ਕਾਲਂ ਮਨਾਪਿਕੇ ਘਾਨੇਨ ਗਨ੍ਧੇ ਘਾਯਿਤੁਂ, ਮਯਮ੍ਪਿ ਲਚ੍ਛਾਮ ਕਾਲੇਨ ਕਾਲਂ ਮਨਾਪਿਕੇ ਜਿਵ੍ਹਾਯ ਰਸੇ ਸਾਯਿਤੁਂ, ਮਯਮ੍ਪਿ ਲਚ੍ਛਾਮ ਕਾਲੇਨ ਕਾਲਂ ਮਨਾਪਿਕੇ ਕਾਯੇਨ ਫੋਟ੍ਠਬ੍ਬੇ ਫੁਸਿਤੁਂ; ਮਯਮ੍ਪਿ ਸਕ੍ਕਤਾ ਗਰੁਕਤਾ ਮਾਨਿਤਾ ਪੂਜਿਤਾ ਅਪਚਿਤਾ ਪਿਣ੍ਡਾਯ ਚਰਿਸ੍ਸਾਮਾ’’ਤਿ. ਅਯਞ੍ਚਰਹਿ ਤੇਸਂ ਭਿਕ੍ਖੂਨਂ ਅਨ੍ਤਰਾਕਥਾ ਹੋਤਿ ਵਿਪ੍ਪਕਤਾ.

ਅਥ ਖੋ ਭਗਵਾ ਸਾਯਨ੍ਹਸਮਯਂ ਪਟਿਸਲ੍ਲਾਨਾ ਵੁਟ੍ਠਿਤੋ ਯੇਨ ਕਰੇਰਿਮਣ੍ਡਲਮਾਲ਼ੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ. ਨਿਸਜ੍ਜ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸਿ – ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ, ਕਾ ਚ ਪਨ ਵੋ ਅਨ੍ਤਰਾਕਥਾ ਵਿਪ੍ਪਕਤਾ’’ਤਿ?

‘‘ਇਧ, ਭਨ੍ਤੇ, ਅਮ੍ਹਾਕਂ ਪਚ੍ਛਾਭਤ੍ਤਂ ਪਿਣ੍ਡਪਾਤਪਟਿਕ੍ਕਨ੍ਤਾਨਂ ਕਰੇਰਿਮਣ੍ਡਲਮਾਲ਼ੇ ਸਨ੍ਨਿਸਿਨ੍ਨਾਨਂ ਸਨ੍ਨਿਪਤਿਤਾਨਂ ਅਯਮਨ੍ਤਰਾਕਥਾ ਉਦਪਾਦਿ –

‘ਪਿਣ੍ਡਪਾਤਿਕੋ, ਆਵੁਸੋ, ਭਿਕ੍ਖੁ ਪਿਣ੍ਡਾਯ ਚਰਨ੍ਤੋ ਲਭਤਿ ਕਾਲੇਨ ਕਾਲਂ ਮਨਾਪਿਕੇ ਚਕ੍ਖੁਨਾ ਰੂਪੇ ਪਸ੍ਸਿਤੁਂ, ਲਭਤਿ ਕਾਲੇਨ ਕਾਲਂ ਮਨਾਪਿਕੇ ਸੋਤੇਨ ਸਦ੍ਦੇ ਸੋਤੁਂ, ਲਭਤਿ ਕਾਲੇਨ ਕਾਲਂ ਮਨਾਪਿਕੇ ਘਾਨੇਨ ਗਨ੍ਧੇ ਘਾਯਿਤੁਂ, ਲਭਤਿ ਕਾਲੇਨ ਕਾਲਂ ਮਨਾਪਿਕੇ ਜਿਵ੍ਹਾਯ ਰਸੇ ਸਾਯਿਤੁਂ, ਲਭਤਿ ਕਾਲੇਨ ਕਾਲਂ ਮਨਾਪਿਕੇ ਕਾਯੇਨ ਫੋਟ੍ਠਬ੍ਬੇ ਫੁਸਿਤੁਂ. ਪਿਣ੍ਡਪਾਤਿਕੋ, ਆਵੁਸੋ, ਭਿਕ੍ਖੁ ਸਕ੍ਕਤੋ ਗਰੁਕਤੋ ਮਾਨਿਤੋ ਪੂਜਿਤੋ ਅਪਚਿਤੋ ਪਿਣ੍ਡਾਯ ਚਰਤਿ. ਹਨ੍ਦਾਵੁਸੋ, ਮਯਮ੍ਪਿ ਪਿਣ੍ਡਪਾਤਿਕਾ ਹੋਮ. ਮਯਮ੍ਪਿ ਲਚ੍ਛਾਮ ਕਾਲੇਨ ਕਾਲਂ ਮਨਾਪਿਕੇ ਚਕ੍ਖੁਨਾ ਰੂਪੇ ਪਸ੍ਸਿਤੁਂ…ਪੇ… ਕਾਯੇਨ ਫੋਟ੍ਠਬ੍ਬੇ ਫੁਸਿਤੁਂ. ਮਯਮ੍ਪਿ ਸਕ੍ਕਤਾ ਗਰੁਕਤਾ ਮਾਨਿਤਾ ਪੂਜਿਤਾ ਅਪਚਿਤਾ ਪਿਣ੍ਡਾਯ ਚਰਿਸ੍ਸਾਮਾ’ਤਿ. ਅਯਂ ਖੋ ਨੋ, ਭਨ੍ਤੇ, ਅਨ੍ਤਰਾਕਥਾ ਵਿਪ੍ਪਕਤਾ, ਅਥ ਭਗਵਾ ਅਨੁਪ੍ਪਤ੍ਤੋ’’ਤਿ.

‘‘ਨ ਖ੍ਵੇਤਂ, ਭਿਕ੍ਖਵੇ, ਤੁਮ੍ਹਾਕਂ ਪਤਿਰੂਪਂ ਕੁਲਪੁਤ੍ਤਾਨਂ ਸਦ੍ਧਾ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਿਤਾਨਂ ਯਂ ਤੁਮ੍ਹੇ ਏਵਰੂਪਿਂ ਕਥਂ ਕਥੇਯ੍ਯਾਥ. ਸਨ੍ਨਿਪਤਿਤਾਨਂ ਵੋ, ਭਿਕ੍ਖਵੇ, ਦ੍ਵਯਂ ਕਰਣੀਯਂ – ਧਮ੍ਮੀ ਵਾ ਕਥਾ ਅਰਿਯੋ ਵਾ ਤੁਣ੍ਹੀਭਾਵੋ’’ਤਿ.

ਅਥ ਖੋ ਭਗਵਾ ਏਤਮਤ੍ਥਂ ਵਿਦਿਤ੍ਵਾ ਤਾਯਂ ਵੇਲਾਯਂ ਇਮਂ ਉਦਾਨਂ ਉਦਾਨੇਸਿ –

‘‘ਪਿਣ੍ਡਪਾਤਿਕਸ੍ਸ ਭਿਕ੍ਖੁਨੋ,

ਅਤ੍ਤਭਰਸ੍ਸ ਅਨਞ੍ਞਪੋਸਿਨੋ;

ਦੇਵਾ ਪਿਹਯਨ੍ਤਿ ਤਾਦਿਨੋ,

ਨੋ ਚੇ ਸਦ੍ਦਸਿਲੋਕਨਿਸ੍ਸਿਤੋ’’ਤਿ. ਅਟ੍ਠਮਂ;