੧. ਵਡ੍ਢਮਾਤੁਥੇਰੀਗਾਥਾ

੨੦੪. ‘‘ਮਾ ਸੁ ਤੇ ਵਡ੍ਢ ਲੋਕਮ੍ਹਿ, ਵਨਥੋ ਆਹੁ ਕੁਦਾਚਨਂ;

ਮਾ ਪੁਤ੍ਤਕ ਪੁਨਪ੍ਪੁਨਂ, ਅਹੁ ਦੁਕ੍ਖਸ੍ਸ ਭਾਗਿਮਾ.

੨੦੫. ‘‘ਸੁਖਞ੍ਹਿ ਵਡ੍ਢ ਮੁਨਯੋ, ਅਨੇਜਾ ਛਿਨ੍ਨਸਂਸਯਾ;

ਸੀਤਿਭੂਤਾ ਦਮਪ੍ਪਤ੍ਤਾ, ਵਿਹਰਨ੍ਤਿ ਅਨਾਸਵਾ.

੨੦੬. ‘‘ਤੇਹਾਨੁਚਿਣ੍ਣਂ ਇਸੀਭਿ, ਮਗ੍ਗਂ ਦਸ੍ਸਨਪਤ੍ਤਿਯਾ;

ਦੁਕ੍ਖਸ੍ਸਨ੍ਤਕਿਰਿਯਾਯ, ਤ੍ਵਂ ਵਡ੍ਢ ਅਨੁਬ੍ਰੂਹਯ’’.

੨੦੭. ‘‘ਵਿਸਾਰਦਾਵ ਭਣਸਿ, ਏਤਮਤ੍ਥਂ ਜਨੇਤ੍ਤਿ ਮੇ;

ਮਞ੍ਞਾਮਿ ਨੂਨ ਮਾਮਿਕੇ, ਵਨਥੋ ਤੇ ਨ ਵਿਜ੍ਜਤਿ’’.

੨੦੮. ‘‘ਯੇ ਕੇਚਿ ਵਡ੍ਢ ਸਙ੍ਖਾਰਾ, ਹੀਨਾ ਉਕ੍ਕਟ੍ਠਮਜ੍ਝਿਮਾ;

ਅਣੂਪਿ ਅਣੁਮਤ੍ਤੋਪਿ, ਵਨਥੋ ਮੇ ਨ ਵਿਜ੍ਜਤਿ.

੨੦੯. ‘‘ਸਬ੍ਬੇ ਮੇ ਆਸਵਾ ਖੀਣਾ, ਅਪ੍ਪਮਤ੍ਤਸ੍ਸ ਝਾਯਤੋ;

ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

੨੧੦. ‘‘ਉਲ਼ਾਰਂ ਵਤ ਮੇ ਮਾਤਾ, ਪਤੋਦਂ ਸਮਵਸ੍ਸਰਿ;

ਪਰਮਤ੍ਥਸਞ੍ਹਿਤਾ ਗਾਥਾ, ਯਥਾਪਿ ਅਨੁਕਮ੍ਪਿਕਾ.

੨੧੧. ‘‘ਤਸ੍ਸਾਹਂ ਵਚਨਂ ਸੁਤ੍ਵਾ, ਅਨੁਸਿਟ੍ਠਿਂ ਜਨੇਤ੍ਤਿਯਾ;

ਧਮ੍ਮਸਂਵੇਗਮਾਪਾਦਿਂ, ਯੋਗਕ੍ਖੇਮਸ੍ਸ ਪਤ੍ਤਿਯਾ.

੨੧੨. ‘‘ਸੋਹਂ ਪਧਾਨਪਹਿਤਤ੍ਤੋ, ਰਤ੍ਤਿਨ੍ਦਿਵਮਤਨ੍ਦਿਤੋ;

ਮਾਤਰਾ ਚੋਦਿਤੋ ਸਨ੍ਤੋ, ਅਫੁਸਿਂ ਸਨ੍ਤਿਮੁਤ੍ਤਮਂ’’.

… ਵਡ੍ਢਮਾਤਾ ਥੇਰੀ….

ਨਵਕਨਿਪਾਤੋ ਨਿਟ੍ਠਿਤੋ.