੧੫. ਚਤ੍ਤਾਲੀਸਨਿਪਾਤੋ

੧. ਇਸਿਦਾਸੀਥੇਰੀਗਾਥਾ

੪੦੨. ਨਗਰਮ੍ਹਿ ਕੁਸੁਮਨਾਮੇ, ਪਾਟਲਿਪੁਤ੍ਤਮ੍ਹਿ ਪਥਵਿਯਾ ਮਣ੍ਡੇ;

ਸਕ੍ਯਕੁਲਕੁਲੀਨਾਯੋ, ਦ੍ਵੇ ਭਿਕ੍ਖੁਨਿਯੋ ਹਿ ਗੁਣਵਤਿਯੋ.

੪੦੩. ਇਸਿਦਾਸੀ ਤਤ੍ਥ ਏਕਾ, ਦੁਤਿਯਾ ਬੋਧੀਤਿ ਸੀਲਸਮ੍ਪਨ੍ਨਾ ਚ;

ਝਾਨਜ੍ਝਾਯਨਰਤਾਯੋ, ਬਹੁਸ੍ਸੁਤਾਯੋ ਧੁਤਕਿਲੇਸਾਯੋ.

੪੦੪. ਤਾ ਪਿਣ੍ਡਾਯ ਚਰਿਤ੍ਵਾ, ਭਤ੍ਤਤ੍ਥਂ [ਭਤ੍ਤਤ੍ਤਂ (ਸੀ.)] ਕਰਿਯ ਧੋਤਪਤ੍ਤਾਯੋ;

ਰਹਿਤਮ੍ਹਿ ਸੁਖਨਿਸਿਨ੍ਨਾ, ਇਮਾ ਗਿਰਾ ਅਬ੍ਭੁਦੀਰੇਸੁਂ.

੪੦੫. ‘‘ਪਾਸਾਦਿਕਾਸਿ ਅਯ੍ਯੇ, ਇਸਿਦਾਸਿ ਵਯੋਪਿ ਤੇ ਅਪਰਿਹੀਨੋ;

ਕਿਂ ਦਿਸ੍ਵਾਨ ਬ੍ਯਾਲਿਕਂ, ਅਥਾਸਿ ਨੇਕ੍ਖਮ੍ਮਮਨੁਯੁਤ੍ਤਾ’’.

੪੦੬. ਏਵਮਨੁਯੁਞ੍ਜਿਯਮਾਨਾ ਸਾ, ਰਹਿਤੇ ਧਮ੍ਮਦੇਸਨਾਕੁਸਲਾ;

ਇਸਿਦਾਸੀ ਵਚਨਮਬ੍ਰਵਿ, ‘‘ਸੁਣ ਬੋਧਿ ਯਥਾਮ੍ਹਿ ਪਬ੍ਬਜਿਤਾ.

੪੦੭. ‘‘ਉਜ੍ਜੇਨਿਯਾ ਪੁਰਵਰੇ, ਮਯ੍ਹਂ ਪਿਤਾ ਸੀਲਸਂਵੁਤੋ ਸੇਟ੍ਠਿ;

ਤਸ੍ਸਮ੍ਹਿ ਏਕਧੀਤਾ, ਪਿਯਾ ਮਨਾਪਾ ਚ ਦਯਿਤਾ ਚ.

੪੦੮. ‘‘ਅਥ ਮੇ ਸਾਕੇਤਤੋ ਵਰਕਾ, ਆਗਚ੍ਛੁਮੁਤ੍ਤਮਕੁਲੀਨਾ;

ਸੇਟ੍ਠੀ ਪਹੂਤਰਤਨੋ, ਤਸ੍ਸ ਮਮਂ ਸੁਣ੍ਹਮਦਾਸਿ ਤਾਤੋ.

੪੦੯. ‘‘ਸਸ੍ਸੁਯਾ ਸਸ੍ਸੁਰਸ੍ਸ ਚ, ਸਾਯਂ ਪਾਤਂ ਪਣਾਮਮੁਪਗਮ੍ਮ;

ਸਿਰਸਾ ਕਰੋਮਿ ਪਾਦੇ, ਵਨ੍ਦਾਮਿ ਯਥਾਮ੍ਹਿ ਅਨੁਸਿਟ੍ਠਾ.

੪੧੦. ‘‘ਯਾ ਮਯ੍ਹਂ ਸਾਮਿਕਸ੍ਸ, ਭਗਿਨਿਯੋ ਭਾਤੁਨੋ ਪਰਿਜਨੋ ਵਾ;

ਤਮੇਕਵਰਕਮ੍ਪਿ ਦਿਸ੍ਵਾ, ਉਬ੍ਬਿਗ੍ਗਾ ਆਸਨਂ ਦੇਮਿ.

੪੧੧. ‘‘ਅਨ੍ਨੇਨ ਚ ਪਾਨੇਨ ਚ, ਖਜ੍ਜੇਨ ਚ ਯਞ੍ਚ ਤਤ੍ਥ ਸਨ੍ਨਿਹਿਤਂ;

ਛਾਦੇਮਿ ਉਪਨਯਾਮਿ ਚ, ਦੇਮਿ ਚ ਯਂ ਯਸ੍ਸ ਪਤਿਰੂਪਂ.

੪੧੨. ‘‘ਕਾਲੇਨ ਉਪਟ੍ਠਹਿਤ੍ਵਾ [ਉਟ੍ਠਹਿਤ੍ਵਾ (ਸ੍ਯਾ. ਕ.), ਉਪਟ੍ਠਹਿਤੁਂ (?)], ਘਰਂ ਸਮੁਪਗਮਾਮਿ ਉਮ੍ਮਾਰੇ;

ਧੋਵਨ੍ਤੀ ਹਤ੍ਥਪਾਦੇ, ਪਞ੍ਜਲਿਕਾ ਸਾਮਿਕਮੁਪੇਮਿ.

੪੧੩. ‘‘ਕੋਚ੍ਛਂ ਪਸਾਦਂ ਅਞ੍ਜਨਿਞ੍ਚ, ਆਦਾਸਕਞ੍ਚ ਗਣ੍ਹਿਤ੍ਵਾ;

ਪਰਿਕਮ੍ਮਕਾਰਿਕਾ ਵਿਯ, ਸਯਮੇਵ ਪਤਿਂ ਵਿਭੂਸੇਮਿ.

੪੧੪. ‘‘ਸਯਮੇਵ ਓਦਨਂ ਸਾਧਯਾਮਿ, ਸਯਮੇਵ ਭਾਜਨਂ ਧੋਵਨ੍ਤੀ;

ਮਾਤਾਵ ਏਕਪੁਤ੍ਤਕਂ, ਤਥਾ [ਤਦਾ (ਸੀ.)] ਭਤ੍ਤਾਰਂ ਪਰਿਚਰਾਮਿ.

੪੧੫. ‘‘ਏਵਂ ਮਂ ਭਤ੍ਤਿਕਤਂ, ਅਨੁਰਤ੍ਤਂ ਕਾਰਿਕਂ ਨਿਹਤਮਾਨਂ;

ਉਟ੍ਠਾਯਿਕਂ [ਉਟ੍ਠਾਹਿਕਂ (ਕ.)] ਅਨਲਸਂ, ਸੀਲਵਤਿਂ ਦੁਸ੍ਸਤੇ ਭਤ੍ਤਾ.

੪੧੬. ‘‘ਸੋ ਮਾਤਰਞ੍ਚ ਪਿਤਰਞ੍ਚ, ਭਣਤਿ ‘ਆਪੁਚ੍ਛਹਂ ਗਮਿਸ੍ਸਾਮਿ;

ਇਸਿਦਾਸਿਯਾ ਨ ਸਹ ਵਚ੍ਛਂ, ਏਕਾਗਾਰੇਹਂ [ਏਕਘਰੇਪ’ਹਂ (?)] ਸਹ ਵਤ੍ਥੁਂ’.

੪੧੭. ‘‘‘ਮਾ ਏਵਂ ਪੁਤ੍ਤ ਅਵਚ, ਇਸਿਦਾਸੀ ਪਣ੍ਡਿਤਾ ਪਰਿਬ੍ਯਤ੍ਤਾ;

ਉਟ੍ਠਾਯਿਕਾ ਅਨਲਸਾ, ਕਿਂ ਤੁਯ੍ਹਂ ਨ ਰੋਚਤੇ ਪੁਤ੍ਤ’.

੪੧੮. ‘‘‘ਨ ਚ ਮੇ ਹਿਂਸਤਿ ਕਿਞ੍ਚਿ, ਨ ਚਹਂ ਇਸਿਦਾਸਿਯਾ ਸਹ ਵਚ੍ਛਂ;

ਦੇਸ੍ਸਾਵ ਮੇ ਅਲਂ ਮੇ, ਅਪੁਚ੍ਛਾਹਂ [ਆਪੁਚ੍ਛਾਹਂ (ਸ੍ਯਾ.), ਆਪੁਚ੍ਛਹਂ-ਨਾਪੁਚ੍ਛਹਂ (?)] ਗਮਿਸ੍ਸਾਮਿ’.

੪੧੯. ‘‘ਤਸ੍ਸ ਵਚਨਂ ਸੁਣਿਤ੍ਵਾ, ਸਸ੍ਸੁ ਸਸੁਰੋ ਚ ਮਂ ਅਪੁਚ੍ਛਿਂਸੁ;

‘ਕਿਸ੍ਸ [ਕਿਂਸ (?)] ਤਯਾ ਅਪਰਦ੍ਧਂ, ਭਣ ਵਿਸ੍ਸਟ੍ਠਾ ਯਥਾਭੂਤਂ’.

੪੨੦. ‘‘‘ਨਪਿਹਂ ਅਪਰਜ੍ਝਂ ਕਿਞ੍ਚਿ, ਨਪਿ ਹਿਂਸੇਮਿ ਨ ਭਣਾਮਿ ਦੁਬ੍ਬਚਨਂ;

ਕਿਂ ਸਕ੍ਕਾ ਕਾਤੁਯ੍ਯੇ, ਯਂ ਮਂ ਵਿਦ੍ਦੇਸ੍ਸਤੇ ਭਤ੍ਤਾ’.

੪੨੧. ‘‘ਤੇ ਮਂ ਪਿਤੁਘਰਂ ਪਟਿਨਯਿਂਸੁ, ਵਿਮਨਾ ਦੁਖੇਨ ਅਧਿਭੂਤਾ;

‘ਪੁਤ੍ਤਮਨੁਰਕ੍ਖਮਾਨਾ, ਜਿਤਾਮ੍ਹਸੇ ਰੂਪਿਨਿਂ ਲਕ੍ਖਿਂ’.

੪੨੨. ‘‘ਅਥ ਮਂ ਅਦਾਸਿ ਤਾਤੋ, ਅਡ੍ਢਸ੍ਸ ਘਰਮ੍ਹਿ ਦੁਤਿਯਕੁਲਿਕਸ੍ਸ;

ਤਤੋ ਉਪਡ੍ਢਸੁਙ੍ਕੇਨ, ਯੇਨ ਮਂ ਵਿਨ੍ਦਥ ਸੇਟ੍ਠਿ.

੪੨੩. ‘‘ਤਸ੍ਸਪਿ ਘਰਮ੍ਹਿ ਮਾਸਂ, ਅਵਸਿਂ ਅਥ ਸੋਪਿ ਮਂ ਪਟਿਚ੍ਛਰਯਿ [ਪਟਿਚ੍ਛਸਿ (ਸੀ. ਕ.), ਪਟਿਚ੍ਛਤਿ (ਸ੍ਯਾ.), ਪਟਿਚ੍ਛਰਤਿ (ਕ.)];

ਦਾਸੀਵ ਉਪਟ੍ਠਹਨ੍ਤਿਂ, ਅਦੂਸਿਕਂ ਸੀਲਸਮ੍ਪਨ੍ਨਂ.

੪੨੪. ‘‘ਭਿਕ੍ਖਾਯ ਚ ਵਿਚਰਨ੍ਤਂ, ਦਮਕਂ ਦਨ੍ਤਂ ਮੇ ਪਿਤਾ ਭਣਤਿ;

‘ਹੋਹਿਸਿ [ਸੋਹਿਸਿ (ਸਬ੍ਬਤ੍ਥ)] ਮੇ ਜਾਮਾਤਾ, ਨਿਕ੍ਖਿਪ ਪੋਟ੍ਠਿਞ੍ਚ [ਪੋਨ੍ਤਿਂ (ਸੀ. ਸ੍ਯਾ.)] ਘਟਿਕਞ੍ਚ’.

੪੨੫. ‘‘ਸੋਪਿ ਵਸਿਤ੍ਵਾ ਪਕ੍ਖਂ [ਪਕ੍ਕਮਥ (ਸੀ.)], ਅਥ ਤਾਤਂ ਭਣਤਿ ‘ਦੇਹਿ ਮੇ ਪੋਟ੍ਠਿਂ;

ਘਟਿਕਞ੍ਚ ਮਲ੍ਲਕਞ੍ਚ, ਪੁਨਪਿ ਭਿਕ੍ਖਂ ਚਰਿਸ੍ਸਾਮਿ’.

੪੨੬. ‘‘ਅਥ ਨਂ ਭਣਤੀ ਤਾਤੋ, ਅਮ੍ਮਾ ਸਬ੍ਬੋ ਚ ਮੇ ਞਾਤਿਗਣਵਗ੍ਗੋ;

‘ਕਿਂ ਤੇ ਨ ਕੀਰਤਿ ਇਧ, ਭਣ ਖਿਪ੍ਪਂ ਤਂ ਤੇ ਕਰਿਹਿ’ਤਿ.

੪੨੭. ‘‘ਏਵਂ ਭਣਿਤੋ ਭਣਤਿ, ‘ਯਦਿ ਮੇ ਅਤ੍ਤਾ ਸਕ੍ਕੋਤਿ ਅਲਂ ਮਯ੍ਹਂ;

ਇਸਿਦਾਸਿਯਾ ਨ ਸਹ ਵਚ੍ਛਂ, ਏਕਘਰੇਹਂ ਸਹ ਵਤ੍ਥੁਂ’.

੪੨੮. ‘‘ਵਿਸ੍ਸਜ੍ਜਿਤੋ ਗਤੋ ਸੋ, ਅਹਮ੍ਪਿ ਏਕਾਕਿਨੀ ਵਿਚਿਨ੍ਤੇਮਿ;

‘ਆਪੁਚ੍ਛਿਤੂਨ ਗਚ੍ਛਂ, ਮਰਿਤੁਯੇ [ਮਰਿਤਾਯੇ (ਸੀ.), ਮਰਿਤੁਂ (ਸ੍ਯਾ.)] ਵਾ ਪਬ੍ਬਜਿਸ੍ਸਂ ਵਾ’.

੪੨੯. ‘‘ਅਥ ਅਯ੍ਯਾ ਜਿਨਦਤ੍ਤਾ, ਆਗਚ੍ਛੀ ਗੋਚਰਾਯ ਚਰਮਾਨਾ;

ਤਾਤਕੁਲਂ ਵਿਨਯਧਰੀ, ਬਹੁਸ੍ਸੁਤਾ ਸੀਲਸਮ੍ਪਨ੍ਨਾ.

੪੩੦. ‘‘ਤਂ ਦਿਸ੍ਵਾਨ ਅਮ੍ਹਾਕਂ, ਉਟ੍ਠਾਯਾਸਨਂ ਤਸ੍ਸਾ ਪਞ੍ਞਾਪਯਿਂ;

ਨਿਸਿਨ੍ਨਾਯ ਚ ਪਾਦੇ, ਵਨ੍ਦਿਤ੍ਵਾ ਭੋਜਨਮਦਾਸਿਂ.

੪੩੧. ‘‘ਅਨ੍ਨੇਨ ਚ ਪਾਨੇਨ ਚ, ਖਜ੍ਜੇਨ ਚ ਯਞ੍ਚ ਤਤ੍ਥ ਸਨ੍ਨਿਹਿਤਂ;

ਸਨ੍ਤਪ੍ਪਯਿਤ੍ਵਾ ਅਵਚਂ, ‘ਅਯ੍ਯੇ ਇਚ੍ਛਾਮਿ ਪਬ੍ਬਜਿਤੁਂ’.

੪੩੨. ‘‘ਅਥ ਮਂ ਭਣਤੀ ਤਾਤੋ, ‘ਇਧੇਵ ਪੁਤ੍ਤਕ [ਪੁਤ੍ਤਿਕੇ (ਸ੍ਯਾ. ਕ.)] ਚਰਾਹਿ ਤ੍ਵਂ ਧਮ੍ਮਂ;

ਅਨ੍ਨੇਨ ਚ ਪਾਨੇਨ ਚ, ਤਪ੍ਪਯ ਸਮਣੇ ਦ੍ਵਿਜਾਤੀ ਚ’.

੪੩੩. ‘‘ਅਥਹਂ ਭਣਾਮਿ ਤਾਤਂ, ਰੋਦਨ੍ਤੀ ਅਞ੍ਜਲਿਂ ਪਣਾਮੇਤ੍ਵਾ;

‘ਪਾਪਞ੍ਹਿ ਮਯਾ ਪਕਤਂ, ਕਮ੍ਮਂ ਤਂ ਨਿਜ੍ਜਰੇਸ੍ਸਾਮਿ’.

੪੩੪. ‘‘ਅਥ ਮਂ ਭਣਤੀ ਤਾਤੋ, ‘ਪਾਪੁਣ ਬੋਧਿਞ੍ਚ ਅਗ੍ਗਧਮ੍ਮਞ੍ਚ;

ਨਿਬ੍ਬਾਨਞ੍ਚ ਲਭਸ੍ਸੁ, ਯਂ ਸਚ੍ਛਿਕਰੀ ਦ੍ਵਿਪਦਸੇਟ੍ਠੋ’.

੪੩੫. ‘‘ਮਾਤਾਪਿਤੂ ਅਭਿਵਾਦਯਿਤ੍ਵਾ, ਸਬ੍ਬਞ੍ਚ ਞਾਤਿਗਣਵਗ੍ਗਂ;

ਸਤ੍ਤਾਹਂ ਪਬ੍ਬਜਿਤਾ, ਤਿਸ੍ਸੋ ਵਿਜ੍ਜਾ ਅਫਸ੍ਸਯਿਂ.

੪੩੬. ‘‘ਜਾਨਾਮਿ ਅਤ੍ਤਨੋ ਸਤ੍ਤ, ਜਾਤਿਯੋ ਯਸ੍ਸਯਂ ਫਲਵਿਪਾਕੋ;

ਤਂ ਤਵ ਆਚਿਕ੍ਖਿਸ੍ਸਂ, ਤਂ ਏਕਮਨਾ ਨਿਸਾਮੇਹਿ.

੪੩੭. ‘‘ਨਗਰਮ੍ਹਿ ਏਰਕਚ੍ਛੇ [ਏਰਕਕਚ੍ਛੇ (ਸ੍ਯਾ. ਕ.)], ਸੁਵਣ੍ਣਕਾਰੋ ਅਹਂ ਪਹੂਤਧਨੋ;

ਯੋਬ੍ਬਨਮਦੇਨ ਮਤ੍ਤੋ ਸੋ, ਪਰਦਾਰਂ ਅਸੇਵਿਹਂ.

੪੩੮. ‘‘ਸੋਹਂ ਤਤੋ ਚਵਿਤ੍ਵਾ, ਨਿਰਯਮ੍ਹਿ ਅਪਚ੍ਚਿਸਂ ਚਿਰਂ;

ਪਕ੍ਕੋ ਤਤੋ ਚ ਉਟ੍ਠਹਿਤ੍ਵਾ, ਮਕ੍ਕਟਿਯਾ ਕੁਚ੍ਛਿਮੋਕ੍ਕਮਿਂ.

੪੩੯. ‘‘ਸਤ੍ਤਾਹਜਾਤਕਂ ਮਂ, ਮਹਾਕਪਿ ਯੂਥਪੋ ਨਿਲ੍ਲਚ੍ਛੇਸਿ;

ਤਸ੍ਸੇਤਂ ਕਮ੍ਮਫਲਂ, ਯਥਾਪਿ ਗਨ੍ਤ੍ਵਾਨ ਪਰਦਾਰਂ.

੪੪੦. ‘‘ਸੋਹਂ ਤਤੋ ਚਵਿਤ੍ਵਾ, ਕਾਲਂ ਕਰਿਤ੍ਵਾ ਸਿਨ੍ਧਵਾਰਞ੍ਞੇ;

ਕਾਣਾਯ ਚ ਖਞ੍ਜਾਯ ਚ, ਏਲ਼ਕਿਯਾ ਕੁਚ੍ਛਿਮੋਕ੍ਕਮਿਂ.

੪੪੧. ‘‘ਦ੍ਵਾਦਸ ਵਸ੍ਸਾਨਿ ਅਹਂ, ਨਿਲ੍ਲਚ੍ਛਿਤੋ ਦਾਰਕੇ ਪਰਿਵਹਿਤ੍ਵਾ;

ਕਿਮਿਨਾਵਟ੍ਟੋ ਅਕਲ੍ਲੋ, ਯਥਾਪਿ ਗਨ੍ਤ੍ਵਾਨ ਪਰਦਾਰਂ.

੪੪੨. ‘‘ਸੋਹਂ ਤਤੋ ਚਵਿਤ੍ਵਾ, ਗੋਵਾਣਿਜਕਸ੍ਸ ਗਾਵਿਯਾ ਜਾਤੋ;

ਵਚ੍ਛੋ ਲਾਖਾਤਮ੍ਬੋ, ਨਿਲ੍ਲਚ੍ਛਿਤੋ ਦ੍ਵਾਦਸੇ ਮਾਸੇ.

੪੪੩. ‘‘ਵੋਢੂਨ [ਤੇ ਪੁਨ (ਸ੍ਯਾ. ਕ.), ਵੋਧੁਨ (ਕ. ਅਟ੍ਠ.)] ਨਙ੍ਗਲਮਹਂ, ਸਕਟਞ੍ਚ ਧਾਰਯਾਮਿ;

ਅਨ੍ਧੋਵਟ੍ਟੋ ਅਕਲ੍ਲੋ, ਯਥਾਪਿ ਗਨ੍ਤ੍ਵਾਨ ਪਰਦਾਰਂ.

੪੪੪. ‘‘ਸੋਹਂ ਤਤੋ ਚਵਿਤ੍ਵਾ, ਵੀਥਿਯਾ ਦਾਸਿਯਾ ਘਰੇ ਜਾਤੋ;

ਨੇਵ ਮਹਿਲਾ ਨ ਪੁਰਿਸੋ, ਯਥਾਪਿ ਗਨ੍ਤ੍ਵਾਨ ਪਰਦਾਰਂ.

੪੪੫. ‘‘ਤਿਂਸਤਿਵਸ੍ਸਮ੍ਹਿ ਮਤੋ, ਸਾਕਟਿਕਕੁਲਮ੍ਹਿ ਦਾਰਿਕਾ ਜਾਤਾ;

ਕਪਣਮ੍ਹਿ ਅਪ੍ਪਭੋਗੇ, ਧਨਿਕ [ਅਣਿਕ (ਅਟ੍ਠ.), ਤਂਸਂਵਣ੍ਣਨਾਯਮ੍ਪਿ ਅਤ੍ਥਯੁਤ੍ਤਿ ਗਵੇਸਿਤਬ੍ਬਾ] ਪੁਰਿਸਪਾਤਬਹੁਲਮ੍ਹਿ.

੪੪੬. ‘‘ਤਂ ਮਂ ਤਤੋ ਸਤ੍ਥਵਾਹੋ, ਉਸ੍ਸਨ੍ਨਾਯ ਵਿਪੁਲਾਯ ਵਡ੍ਢਿਯਾ;

ਓਕਡ੍ਢਤਿ ਵਿਲਪਨ੍ਤਿਂ, ਅਚ੍ਛਿਨ੍ਦਿਤ੍ਵਾ ਕੁਲਘਰਸ੍ਮਾ.

੪੪੭. ‘‘ਅਥ ਸੋਲ਼ਸਮੇ ਵਸ੍ਸੇ, ਦਿਸ੍ਵਾ ਮਂ ਪਤ੍ਤਯੋਬ੍ਬਨਂ ਕਞ੍ਞਂ;

ਓਰੁਨ੍ਧਤਸ੍ਸ ਪੁਤ੍ਤੋ, ਗਿਰਿਦਾਸੋ ਨਾਮ ਨਾਮੇਨ.

੪੪੮. ‘‘ਤਸ੍ਸਪਿ ਅਞ੍ਞਾ ਭਰਿਯਾ, ਸੀਲਵਤੀ ਗੁਣਵਤੀ ਯਸਵਤੀ ਚ;

ਅਨੁਰਤ੍ਤਾ [ਅਨੁਵਤ੍ਤਾ (ਕ.)] ਭਤ੍ਤਾਰਂ, ਤਸ੍ਸਾਹਂ [ਤਸ੍ਸ ਤਂ (?)] ਵਿਦ੍ਦੇਸਨਮਕਾਸਿਂ.

੪੪੯. ‘‘ਤਸ੍ਸੇਤਂ ਕਮ੍ਮਫਲਂ, ਯਂ ਮਂ ਅਪਕੀਰਿਤੂਨ ਗਚ੍ਛਨ੍ਤਿ;

ਦਾਸੀਵ ਉਪਟ੍ਠਹਨ੍ਤਿਂ, ਤਸ੍ਸਪਿ ਅਨ੍ਤੋ ਕਤੋ ਮਯਾ’’ਤਿ.

… ਇਸਿਦਾਸੀ ਥੇਰੀ….

ਚਤ੍ਤਾਲੀਸਨਿਪਾਤੋ ਨਿਟ੍ਠਿਤੋ.