੧੧. ਦ੍ਵਾਦਸਕਨਿਪਾਤੋ

੧. ਉਪ੍ਪਲਵਣ੍ਣਾਥੇਰੀਗਾਥਾ

੨੨੪. ‘‘ਉਭੋ ਮਾਤਾ ਚ ਧੀਤਾ ਚ, ਮਯਂ ਆਸੁਂ [ਆਭੁਂ (ਸੀ.)] ਸਪਤ੍ਤਿਯੋ;

ਤਸ੍ਸਾ ਮੇ ਅਹੁ ਸਂਵੇਗੋ, ਅਬ੍ਭੁਤੋ ਲੋਮਹਂਸਨੋ.

੨੨੫. ‘‘ਧਿਰਤ੍ਥੁ ਕਾਮਾ ਅਸੁਚੀ, ਦੁਗ੍ਗਨ੍ਧਾ ਬਹੁਕਣ੍ਟਕਾ;

ਯਤ੍ਥ ਮਾਤਾ ਚ ਧੀਤਾ ਚ, ਸਭਰਿਯਾ ਮਯਂ ਅਹੁਂ.

੨੨੬. ‘‘ਕਾਮੇਸ੍ਵਾਦੀਨਵਂ ਦਿਸ੍ਵਾ, ਨੇਕ੍ਖਮ੍ਮਂ ਦਟ੍ਠੁ ਖੇਮਤੋ;

ਸਾ ਪਬ੍ਬਜ੍ਜਿਂ ਰਾਜਗਹੇ, ਅਗਾਰਸ੍ਮਾਨਗਾਰਿਯਂ.

੨੨੭. ‘‘ਪੁਬ੍ਬੇਨਿਵਾਸਂ ਜਾਨਾਮਿ, ਦਿਬ੍ਬਚਕ੍ਖੁਂ ਵਿਸੋਧਿਤਂ;

ਚੇਤੋਪਰਿਚ੍ਚਞਾਣਞ੍ਚ, ਸੋਤਧਾਤੁ ਵਿਸੋਧਿਤਾ.

੨੨੮. ‘‘ਇਦ੍ਧੀਪਿ ਮੇ ਸਚ੍ਛਿਕਤਾ, ਪਤ੍ਤੋ ਮੇ ਆਸਵਕ੍ਖਯੋ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ.

੨੨੯. ‘‘ਇਦ੍ਧਿਯਾ ਅਭਿਨਿਮ੍ਮਿਤ੍ਵਾ, ਚਤੁਰਸ੍ਸਂ ਰਥਂ ਅਹਂ;

ਬੁਦ੍ਧਸ੍ਸ ਪਾਦੇ ਵਨ੍ਦਿਤ੍ਵਾ, ਲੋਕਨਾਥਸ੍ਸ ਤਾਦਿਨੋ’’ [ਸਿਰੀਮਤੋ (ਸ੍ਯਾ. ਕ.)].

੨੩੦. ‘‘ਸੁਪੁਪ੍ਫਿਤਗ੍ਗਂ ਉਪਗਮ੍ਮ ਪਾਦਪਂ, ਏਕਾ ਤੁਵਂ ਤਿਟ੍ਠਸਿ ਸਾਲਮੂਲੇ [ਰੁਕ੍ਖਮੂਲੇ (ਸ੍ਯਾ. ਕ.)];

ਨ ਚਾਪਿ ਤੇ ਦੁਤਿਯੋ ਅਤ੍ਥਿ ਕੋਚਿ, ਨ ਤ੍ਵਂ ਬਾਲੇ ਭਾਯਸਿ ਧੁਤ੍ਤਕਾਨਂ’’.

੨੩੧. ‘‘ਸਤਂ ਸਹਸ੍ਸਾਨਿਪਿ ਧੁਤ੍ਤਕਾਨਂ, ਸਮਾਗਤਾ ਏਦਿਸਕਾ ਭਵੇਯ੍ਯੁਂ;

ਲੋਮਂ ਨ ਇਞ੍ਜੇ ਨਪਿ ਸਮ੍ਪਵੇਧੇ, ਕਿਂ ਮੇ ਤੁਵਂ ਮਾਰ ਕਰਿਸ੍ਸਸੇਕੋ.

੨੩੨. ‘‘ਏਸਾ ਅਨ੍ਤਰਧਾਯਾਮਿ, ਕੁਚ੍ਛਿਂ ਵਾ ਪਵਿਸਾਮਿ ਤੇ;

ਭਮੁਕਨ੍ਤਰੇ ਤਿਟ੍ਠਾਮਿ, ਤਿਟ੍ਠਨ੍ਤਿਂ ਮਂ ਨ ਦਕ੍ਖਸਿ.

੨੩੩. ‘‘ਚਿਤ੍ਤਮ੍ਹਿ ਵਸੀਭੂਤਾਹਂ, ਇਦ੍ਧਿਪਾਦਾ ਸੁਭਾਵਿਤਾ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ.

੨੩੪. ‘‘ਸਤ੍ਤਿਸੂਲੂਪਮਾ ਕਾਮਾ, ਖਨ੍ਧਾਸਂ ਅਧਿਕੁਟ੍ਟਨਾ;

ਯਂ ਤ੍ਵਂ ‘ਕਾਮਰਤਿਂ’ ਬ੍ਰੂਸਿ, ‘ਅਰਤੀ’ ਦਾਨਿ ਸਾ ਮਮ.

੨੩੫. ‘‘ਸਬ੍ਬਤ੍ਥ ਵਿਹਤਾ ਨਨ੍ਦੀ, ਤਮੋਖਨ੍ਧੋ ਪਦਾਲਿਤੋ;

ਏਵਂ ਜਾਨਾਹਿ ਪਾਪਿਮ, ਨਿਹਤੋ ਤ੍ਵਮਸਿ ਅਨ੍ਤਕਾ’’ਤਿ.

… ਉਪ੍ਪਲਵਣ੍ਣਾ ਥੇਰੀ….

ਦ੍ਵਾਦਸਨਿਪਾਤੋ ਨਿਟ੍ਠਿਤੋ.