੨. ਸੁਭੂਤਤ੍ਥੇਰਗਾਥਾ

੩੨੦. ‘‘ਅਯੋਗੇ ਯੁਞ੍ਜਮਤ੍ਤਾਨਂ, ਪੁਰਿਸੋ ਕਿਚ੍ਚਮਿਚ੍ਛਕੋ [ਕਿਚ੍ਚਮਿਚ੍ਛਤੋ (ਸੀ.), ਕਿਚ੍ਚਮਿਚ੍ਛਯਂ (ਕਤ੍ਥਚਿ)];

ਚਰਂ ਚੇ ਨਾਧਿਗਚ੍ਛੇਯ੍ਯ, ‘ਤਂ ਮੇ ਦੁਬ੍ਭਗਲਕ੍ਖਣਂ’.

੩੨੧. ‘‘ਅਬ੍ਬੂਲ਼੍ਹਂ ਅਘਗਤਂ ਵਿਜਿਤਂ, ਏਕਞ੍ਚੇ ਓਸ੍ਸਜੇਯ੍ਯ ਕਲੀਵ ਸਿਯਾ;

ਸਬ੍ਬਾਨਿਪਿ ਚੇ ਓਸ੍ਸਜੇਯ੍ਯ ਅਨ੍ਧੋਵ ਸਿਯਾ, ਸਮਵਿਸਮਸ੍ਸ ਅਦਸ੍ਸਨਤੋ.

੩੨੨. ‘‘ਯਞ੍ਹਿ ਕਯਿਰਾ ਤਞ੍ਹਿ ਵਦੇ, ਯਂ ਨ ਕਯਿਰਾ ਨ ਤਂ ਵਦੇ;

ਅਕਰੋਨ੍ਤਂ ਭਾਸਮਾਨਂ, ਪਰਿਜਾਨਨ੍ਤਿ ਪਣ੍ਡਿਤਾ.

੩੨੩. [ਧ. ਪ. ੫੧ ਧਮ੍ਮਪਦੇਪਿ] ‘‘ਯਥਾਪਿ ਰੁਚਿਰਂ ਪੁਪ੍ਫਂ, ਵਣ੍ਣਵਨ੍ਤਂ ਅਗਨ੍ਧਕਂ;

ਏਵਂ ਸੁਭਾਸਿਤਾ ਵਾਚਾ, ਅਫਲਾ ਹੋਤਿ ਅਕੁਬ੍ਬਤੋ.

੩੨੪. [ਧ. ਪ. ੫੨] ‘‘ਯਥਾਪਿ ਰੁਚਿਰਂ ਪੁਪ੍ਫਂ, ਵਣ੍ਣਵਨ੍ਤਂ ਸੁਗਨ੍ਧਕਂ [ਸਗਨ੍ਧਕਂ (ਸੀ. ਸ੍ਯਾ. ਪੀ.)];

ਏਵਂ ਸੁਭਾਸਿਤਾ ਵਾਚਾ, ਸਫਲਾ ਹੋਤਿ ਕੁਬ੍ਬਤੋ’’ਤਿ [ਸਕੁਬ੍ਬਤੋ (ਸੀ. ਪੀ.), ਸੁਕੁਬ੍ਬਤੋ (ਸ੍ਯਾ.)].

… ਸੁਭੂਤੋ ਥੇਰੋ….