੩. ਤੇਲਕਾਨਿਤ੍ਥੇਰਗਾਥਾ

੭੪੭. ‘‘ਚਿਰਰਤ੍ਤਂ ਵਤਾਤਾਪੀ, ਧਮ੍ਮਂ ਅਨੁਵਿਚਿਨ੍ਤਯਂ;

ਸਮਂ ਚਿਤ੍ਤਸ੍ਸ ਨਾਲਤ੍ਥਂ, ਪੁਚ੍ਛਂ ਸਮਣਬ੍ਰਾਹ੍ਮਣੇ.

੭੪੮. ‘‘‘ਕੋ ਸੋ ਪਾਰਙ੍ਗਤੋ ਲੋਕੇ, ਕੋ ਪਤ੍ਤੋ ਅਮਤੋਗਧਂ;

ਕਸ੍ਸ ਧਮ੍ਮਂ ਪਟਿਚ੍ਛਾਮਿ, ਪਰਮਤ੍ਥਵਿਜਾਨਨਂ’.

੭੪੯. ‘‘ਅਨ੍ਤੋਵਙ੍ਕਗਤੋ ਆਸਿ, ਮਚ੍ਛੋਵ ਘਸਮਾਮਿਸਂ;

ਬਦ੍ਧੋ ਮਹਿਨ੍ਦਪਾਸੇਨ, ਵੇਪਚਿਤ੍ਯਸੁਰੋ ਯਥਾ.

੭੫੦. ‘‘ਅਞ੍ਛਾਮਿ ਨਂ ਨ ਮੁਞ੍ਚਾਮਿ, ਅਸ੍ਮਾ ਸੋਕਪਰਿਦ੍ਦਵਾ;

ਕੋ ਮੇ ਬਨ੍ਧਂ ਮੁਞ੍ਚਂ ਲੋਕੇ, ਸਮ੍ਬੋਧਿਂ ਵੇਦਯਿਸ੍ਸਤਿ.

੭੫੧. ‘‘ਸਮਣਂ ਬ੍ਰਾਹ੍ਮਣਂ ਵਾ ਕਂ, ਆਦਿਸਨ੍ਤਂ ਪਭਙ੍ਗੁਨਂ.

ਕਸ੍ਸ ਧਮ੍ਮਂ ਪਟਿਚ੍ਛਾਮਿ, ਜਰਾਮਚ੍ਚੁਪਵਾਹਨਂ.

੭੫੨. ‘‘ਵਿਚਿਕਿਚ੍ਛਾਕਙ੍ਖਾਗਨ੍ਥਿਤਂ, ਸਾਰਮ੍ਭਬਲਸਞ੍ਞੁਤਂ;

ਕੋਧਪ੍ਪਤ੍ਤਮਨਤ੍ਥਦ੍ਧਂ, ਅਭਿਜਪ੍ਪਪ੍ਪਦਾਰਣਂ.

੭੫੩. ‘‘ਤਣ੍ਹਾਧਨੁਸਮੁਟ੍ਠਾਨਂ, ਦ੍ਵੇ ਚ ਪਨ੍ਨਰਸਾਯੁਤਂ [ਦ੍ਵੇਧਾਪਨ੍ਨਰਸਾਯੁਤਂ (?)];

ਪਸ੍ਸ ਓਰਸਿਕਂ ਬਾਲ਼੍ਹਂ, ਭੇਤ੍ਵਾਨ ਯਦਿ [ਯਦ (ਸੀ. ਅਟ੍ਠ.) ਹਦਿ (?) ‘‘ਹਦਯੇ’’ਤਿ ਤਂਸਂਵਣ੍ਣਨਾ] ਤਿਟ੍ਠਤਿ.

੭੫੪. ‘‘ਅਨੁਦਿਟ੍ਠੀਨਂ ਅਪ੍ਪਹਾਨਂ, ਸਙ੍ਕਪ੍ਪਪਰਤੇਜਿਤਂ;

ਤੇਨ ਵਿਦ੍ਧੋ ਪਵੇਧਾਮਿ, ਪਤ੍ਤਂਵ ਮਾਲੁਤੇਰਿਤਂ.

੭੫੫. ‘‘ਅਜ੍ਝਤ੍ਤਂ ਮੇ ਸਮੁਟ੍ਠਾਯ, ਖਿਪ੍ਪਂ ਪਚ੍ਚਤਿ ਮਾਮਕਂ;

ਛਫਸ੍ਸਾਯਤਨੀ ਕਾਯੋ, ਯਤ੍ਥ ਸਰਤਿ ਸਬ੍ਬਦਾ.

੭੫੬. ‘‘ਤਂ ਨ ਪਸ੍ਸਾਮਿ ਤੇਕਿਚ੍ਛਂ, ਯੋ ਮੇਤਂ ਸਲ੍ਲਮੁਦ੍ਧਰੇ;

ਨਾਨਾਰਜ੍ਜੇਨ ਸਤ੍ਥੇਨ [ਨਾਰਗ੍ਗੇਨ ਨ ਸਤ੍ਥੇਨ (?)], ਨਾਞ੍ਞੇਨ ਵਿਚਿਕਿਚ੍ਛਿਤਂ.

੭੫੭. ‘‘ਕੋ ਮੇ ਅਸਤ੍ਥੋ ਅਵਣੋ, ਸਲ੍ਲਮਬ੍ਭਨ੍ਤਰਪਸ੍ਸਯਂ;

ਅਹਿਂਸਂ ਸਬ੍ਬਗਤ੍ਤਾਨਿ, ਸਲ੍ਲਂ ਮੇ ਉਦ੍ਧਰਿਸ੍ਸਤਿ.

੭੫੮. ‘‘ਧਮ੍ਮਪ੍ਪਤਿ ਹਿ ਸੋ ਸੇਟ੍ਠੋ, ਵਿਸਦੋਸਪ੍ਪਵਾਹਕੋ;

ਗਮ੍ਭੀਰੇ ਪਤਿਤਸ੍ਸ ਮੇ, ਥਲਂ ਪਾਣਿਞ੍ਚ ਦਸ੍ਸਯੇ.

੭੫੯. ‘‘ਰਹਦੇਹਮਸ੍ਮਿ ਓਗਾਲ਼੍ਹੋ, ਅਹਾਰਿਯਰਜਮਤ੍ਤਿਕੇ;

ਮਾਯਾਉਸੂਯਸਾਰਮ੍ਭ, ਥਿਨਮਿਦ੍ਧਮਪਤ੍ਥਟੇ.

੭੬੦. ‘‘ਉਦ੍ਧਚ੍ਚਮੇਘਥਨਿਤਂ, ਸਂਯੋਜਨਵਲਾਹਕਂ;

ਵਾਹਾ ਵਹਨ੍ਤਿ ਕੁਦ੍ਦਿਟ੍ਠਿਂ [ਦੁਦ੍ਦਿਟ੍ਠਿਂ (ਸੀ. ਧ. ਪ. ੩੩੯)], ਸਙ੍ਕਪ੍ਪਾ ਰਾਗਨਿਸ੍ਸਿਤਾ.

੭੬੧. ‘‘ਸਵਨ੍ਤਿ ਸਬ੍ਬਧਿ ਸੋਤਾ, ਲਤਾ ਉਬ੍ਭਿਜ੍ਜ ਤਿਟ੍ਠਤਿ;

ਤੇ ਸੋਤੇ ਕੋ ਨਿਵਾਰੇਯ੍ਯ, ਤਂ ਲਤਂ ਕੋ ਹਿ ਛੇਚ੍ਛਤਿ.

੭੬੨. ‘‘ਵੇਲਂ ਕਰੋਥ ਭਦ੍ਦਨ੍ਤੇ, ਸੋਤਾਨਂ ਸਨ੍ਨਿਵਾਰਣਂ;

ਮਾ ਤੇ ਮਨੋਮਯੋ ਸੋਤੋ, ਰੁਕ੍ਖਂਵ ਸਹਸਾ ਲੁਵੇ.

੭੬੩. ‘‘ਏਵਂ ਮੇ ਭਯਜਾਤਸ੍ਸ, ਅਪਾਰਾ ਪਾਰਮੇਸਤੋ;

ਤਾਣੋ ਪਞ੍ਞਾਵੁਧੋ ਸਤ੍ਥਾ, ਇਸਿਸਙ੍ਘਨਿਸੇਵਿਤੋ.

੭੬੪. ‘‘ਸੋਪਾਣਂ ਸੁਗਤਂ ਸੁਦ੍ਧਂ, ਧਮ੍ਮਸਾਰਮਯਂ ਦਲ਼੍ਹਂ;

ਪਾਦਾਸਿ ਵੁਯ੍ਹਮਾਨਸ੍ਸ, ‘ਮਾ ਭਾਯੀ’ਤਿ ਚ ਮਬ੍ਰਵਿ.

੭੬੫. ‘‘ਸਤਿਪਟ੍ਠਾਨਪਾਸਾਦਂ, ਆਰੁਯ੍ਹ ਪਚ੍ਚਵੇਕ੍ਖਿਸਂ;

ਯਂ ਤਂ ਪੁਬ੍ਬੇ ਅਮਞ੍ਞਿਸ੍ਸਂ, ਸਕ੍ਕਾਯਾਭਿਰਤਂ ਪਜਂ.

੭੬੬. ‘‘ਯਦਾ ਚ ਮਗ੍ਗਮਦ੍ਦਕ੍ਖਿਂ, ਨਾਵਾਯ ਅਭਿਰੂਹਨਂ;

ਅਨਧਿਟ੍ਠਾਯ ਅਤ੍ਤਾਨਂ, ਤਿਤ੍ਥਮਦ੍ਦਕ੍ਖਿਮੁਤ੍ਤਮਂ.

੭੬੭. ‘‘ਸਲ੍ਲਂ ਅਤ੍ਤਸਮੁਟ੍ਠਾਨਂ, ਭਵਨੇਤ੍ਤਿਪ੍ਪਭਾਵਿਤਂ;

ਏਤੇਸਂ ਅਪ੍ਪਵਤ੍ਤਾਯ [ਅਪ੍ਪਵਤ੍ਤਿਯਾ (?)], ਦੇਸੇਸਿ ਮਗ੍ਗਮੁਤ੍ਤਮਂ.

੭੬੮. ‘‘ਦੀਘਰਤ੍ਤਾਨੁਸਯਿਤਂ, ਚਿਰਰਤ੍ਤਮਧਿਟ੍ਠਿਤਂ;

ਬੁਦ੍ਧੋ ਮੇਪਾਨੁਦੀ ਗਨ੍ਥਂ, ਵਿਸਦੋਸਪ੍ਪਵਾਹਨੋ’’ਤਿ.

…ਤੇਲਕਾਨਿ ਥੇਰੋ….