੧. ਪਠਮਵਗ੍ਗੋ

੧. ‘‘ਛਨ੍ਨਾ ਮੇ ਕੁਟਿਕਾ ਸੁਖਾ ਨਿਵਾਤਾ, ਵਸ੍ਸ ਦੇਵ ਯਥਾਸੁਖਂ;

ਚਿਤ੍ਤਂ ਮੇ ਸੁਸਮਾਹਿਤਂ ਵਿਮੁਤ੍ਤਂ, ਆਤਾਪੀ ਵਿਹਰਾਮਿ ਵਸ੍ਸ ਦੇਵਾ’’ਤਿ.

ਇਤ੍ਥਂ ਸੁਦਂ [ਇਤ੍ਥਂ ਸੁਮਂ (ਕ. ਅਟ੍ਠ.)] ਆਯਸ੍ਮਾ ਸੁਭੂਤਿਤ੍ਥੇਰੋ ਗਾਥਂ ਅਭਾਸਿਤ੍ਥਾਤਿ.

੨. ‘‘ਉਪਸਨ੍ਤੋ ਉਪਰਤੋ, ਮਨ੍ਤਭਾਣੀ ਅਨੁਦ੍ਧਤੋ;

ਧੁਨਾਤਿ ਪਾਪਕੇ ਧਮ੍ਮੇ, ਦੁਮਪਤ੍ਤਂਵ ਮਾਲੁਤੋ’’ਤਿ.

ਇਤ੍ਥਂ ਸੁਦਂ ਆਯਸ੍ਮਾ ਮਹਾਕੋਟ੍ਠਿਕੋ [ਮਹਾਕੋਟ੍ਠਿਤੋ (ਸੀ. ਸ੍ਯਾ.)] ਥੇਰੋ ਗਾਥਂ ਅਭਾਸਿਤ੍ਥਾਤਿ.

੩. ‘‘ਪਞ੍ਞਂ ਇਮਂ ਪਸ੍ਸ ਤਥਾਗਤਾਨਂ, ਅਗ੍ਗਿ ਯਥਾ ਪਜ੍ਜਲਿਤੋ ਨਿਸੀਥੇ;

ਆਲੋਕਦਾ ਚਕ੍ਖੁਦਦਾ ਭਵਨ੍ਤਿ, ਯੇ ਆਗਤਾਨਂ ਵਿਨਯਨ੍ਤਿ ਕਙ੍ਖ’’ਨ੍ਤਿ.

ਇਤ੍ਥਂ ਸੁਦਂ ਆਯਸ੍ਮਾ ਕਙ੍ਖਾਰੇਵਤੋ ਥੇਰੋ ਗਾਥਂ ਅਭਾਸਿਤ੍ਥਾਤਿ.

੪. ‘‘ਸਮ੍ਭਿਰੇਵ ਸਮਾਸੇਥ, ਪਣ੍ਡਿਤੇਹਤ੍ਥਦਸ੍ਸਿਭਿ;

ਅਤ੍ਥਂ ਮਹਨ੍ਤਂ ਗਮ੍ਭੀਰਂ, ਦੁਦ੍ਦਸਂ ਨਿਪੁਣਂ ਅਣੁਂ;

ਧੀਰਾ ਸਮਧਿਗਚ੍ਛਨ੍ਤਿ, ਅਪ੍ਪਮਤ੍ਤਾ ਵਿਚਕ੍ਖਣਾ’’ਤਿ.

ਇਤ੍ਥਂ ਸੁਦਂ ਆਯਸ੍ਮਾ ਪੁਣ੍ਣੋ ਮਨ੍ਤਾਣਿਪੁਤ੍ਤੋ [ਮਨ੍ਤਾਨਿਪੁਤ੍ਤੋ (ਸ੍ਯਾ. ਕ.)] ਥੇਰੋ ਗਾਥਂ ਅਭਾਸਿਤ੍ਥਾਤਿ.

੫. ‘‘ਯੋ ਦੁਦ੍ਦਮਿਯੋ ਦਮੇਨ ਦਨ੍ਤੋ, ਦਬ੍ਬੋ ਸਨ੍ਤੁਸਿਤੋ ਵਿਤਿਣ੍ਣਕਙ੍ਖੋ;

ਵਿਜਿਤਾਵੀ ਅਪੇਤਭੇਰਵੋ ਹਿ, ਦਬ੍ਬੋ ਸੋ ਪਰਿਨਿਬ੍ਬੁਤੋ ਠਿਤਤ੍ਤੋ’’ਤਿ.

ਇਤ੍ਥਂ ਸੁਦਂ ਆਯਸ੍ਮਾ ਦਬ੍ਬੋ ਥੇਰੋ ਗਾਥਂ ਅਭਾਸਿਤ੍ਥਾਤਿ.

੬. ‘‘ਯੋ ਸੀਤਵਨਂ ਉਪਗਾ ਭਿਕ੍ਖੁ, ਏਕੋ ਸਨ੍ਤੁਸਿਤੋ ਸਮਾਹਿਤਤ੍ਤੋ;

ਵਿਜਿਤਾਵੀ ਅਪੇਤਲੋਮਹਂਸੋ, ਰਕ੍ਖਂ ਕਾਯਗਤਾਸਤਿਂ ਧਿਤਿਮਾ’’ਤਿ.

ਇਤ੍ਥਂ ਸੁਦਂ ਆਯਸ੍ਮਾ ਸੀਤਵਨਿਯੋ ਥੇਰੋ ਗਾਥਂ ਅਭਾਸਿਤ੍ਥਾਤਿ.

੭. ‘‘ਯੋਪਾਨੁਦੀ ਮਚ੍ਚੁਰਾਜਸ੍ਸ ਸੇਨਂ, ਨਲ਼ਸੇਤੁਂਵ ਸੁਦੁਬ੍ਬਲਂ ਮਹੋਘੋ;

ਵਿਜਿਤਾਵੀ ਅਪੇਤਭੇਰਵੋ ਹਿ, ਦਨ੍ਤੋ ਸੋ ਪਰਿਨਿਬ੍ਬੁਤੋ ਠਿਤਤ੍ਤੋ’’ਤਿ.

ਇਤ੍ਥਂ ਸੁਦਂ ਆਯਸ੍ਮਾ ਭਲ੍ਲਿਯੋ ਥੇਰੋ ਗਾਥਂ ਅਭਾਸਿਤ੍ਥਾਤਿ.

੮. ‘‘ਯੋ ਦੁਦ੍ਦਮਿਯੋ ਦਮੇਨ ਦਨ੍ਤੋ, ਵੀਰੋ ਸਨ੍ਤੁਸਿਤੋ ਵਿਤਿਣ੍ਣਕਙ੍ਖੋ;

ਵਿਜਿਤਾਵੀ ਅਪੇਤਲੋਮਹਂਸੋ, ਵੀਰੋ ਸੋ ਪਰਿਨਿਬ੍ਬੁਤੋ ਠਿਤਤ੍ਤੋ’’ਤਿ.

ਇਤ੍ਥਂ ਸੁਦਂ ਆਯਸ੍ਮਾ ਵੀਰੋ ਥੇਰੋ ਗਾਥਂ ਅਭਾਸਿਤ੍ਥਾਤਿ.

੯. ‘‘ਸ੍ਵਾਗਤਂ ਨ ਦੁਰਾਗਤਂ [ਨਾਪਗਤਂ (ਸੀ. ਸ੍ਯਾ.)], ਨਯਿਦਂ ਦੁਮਨ੍ਤਿਤਂ ਮਮ;

ਸਂਵਿਭਤ੍ਤੇਸੁ ਧਮ੍ਮੇਸੁ, ਯਂ ਸੇਟ੍ਠਂ ਤਦੁਪਾਗਮਿ’’ਨ੍ਤਿ.

ਇਤ੍ਥਂ ਸੁਦਂ ਆਯਸ੍ਮਾ ਪਿਲਿਨ੍ਦਵਚ੍ਛੋ [ਪਿਲਿਨ੍ਦਿਵਚ੍ਛੋ (ਸੀ.)] ਥੇਰੋ ਗਾਥਂ ਅਭਾਸਿਤ੍ਥਾਤਿ.

੧੦. ‘‘ਵਿਹਰਿ ਅਪੇਕ੍ਖਂ ਇਧ ਵਾ ਹੁਰਂ ਵਾ, ਯੋ ਵੇਦਗੂ ਸਮਿਤੋ ਯਤਤ੍ਤੋ;

ਸਬ੍ਬੇਸੁ ਧਮ੍ਮੇਸੁ ਅਨੂਪਲਿਤ੍ਤੋ, ਲੋਕਸ੍ਸ ਜਞ੍ਞਾ ਉਦਯਬ੍ਬਯਞ੍ਚਾ’’ਤਿ.

ਇਤ੍ਥਂ ਸੁਦਂ ਆਯਸ੍ਮਾ ਪੁਣ੍ਣਮਾਸੋ ਥੇਰੋ ਗਾਥਂ ਅਭਾਸਿਤ੍ਥਾਤਿ.

ਵਗ੍ਗੋ ਪਠਮੋ ਨਿਟ੍ਠਿਤੋ.

ਤਸ੍ਸੁਦ੍ਦਾਨਂ –

ਸੁਭੂਤਿ ਕੋਟ੍ਠਿਕੋ ਥੇਰੋ, ਕਙ੍ਖਾਰੇਵਤਸਮ੍ਮਤੋ;

ਮਨ੍ਤਾਣਿਪੁਤ੍ਤੋ ਦਬ੍ਬੋ ਚ, ਸੀਤਵਨਿਯੋ ਚ ਭਲ੍ਲਿਯੋ;

ਵੀਰੋ ਪਿਲਿਨ੍ਦਵਚ੍ਛੋ ਚ, ਪੁਣ੍ਣਮਾਸੋ ਤਮੋਨੁਦੋਤਿ.