੮. ਹੇਮਕਮਾਣਵਪੁਚ੍ਛਾ

੧੦੯੦. ‘‘ਯੇ ਮੇ ਪੁਬ੍ਬੇ ਵਿਯਾਕਂਸੁ, (ਇਚ੍ਚਾਯਸ੍ਮਾ ਹੇਮਕੋ)

ਹੁਰਂ ਗੋਤਮਸਾਸਨਾ;

ਇਚ੍ਚਾਸਿ ਇਤਿ ਭਵਿਸ੍ਸਤਿ, ਸਬ੍ਬਂ ਤਂ ਇਤਿਹੀਤਿਹਂ;

ਸਬ੍ਬਂ ਤਂ ਤਕ੍ਕਵਡ੍ਢਨਂ, ਨਾਹਂ ਤਤ੍ਥ ਅਭਿਰਮਿਂ.

੧੦੯੧. ‘‘ਤ੍ਵਞ੍ਚ ਮੇ ਧਮ੍ਮਮਕ੍ਖਾਹਿ, ਤਣ੍ਹਾਨਿਗ੍ਘਾਤਨਂ ਮੁਨਿ;

ਯਂ ਵਿਦਿਤ੍ਵਾ ਸਤੋ ਚਰਂ, ਤਰੇ ਲੋਕੇ ਵਿਸਤ੍ਤਿਕਂ’’.

੧੦੯੨. ‘‘ਇਧ ਦਿਟ੍ਠਸੁਤਮੁਤਵਿਞ੍ਞਾਤੇਸੁ, ਪਿਯਰੂਪੇਸੁ ਹੇਮਕ;

ਛਨ੍ਦਰਾਗਵਿਨੋਦਨਂ, ਨਿਬ੍ਬਾਨਪਦਮਚ੍ਚੁਤਂ.

੧੦੯੩. ‘‘ਏਤਦਞ੍ਞਾਯ ਯੇ ਸਤਾ, ਦਿਟ੍ਠਧਮ੍ਮਾਭਿਨਿਬ੍ਬੁਤਾ;

ਉਪਸਨ੍ਤਾ ਚ ਤੇ ਸਦਾ, ਤਿਣ੍ਣਾ ਲੋਕੇ ਵਿਸਤ੍ਤਿਕ’’ਨ੍ਤਿ.

ਹੇਮਕਮਾਣਵਪੁਚ੍ਛਾ ਅਟ੍ਠਮਾ ਨਿਟ੍ਠਿਤਾ.