੬. ਉਪਸੀਵਮਾਣਵਪੁਚ੍ਛਾ

੧੦੭੫. ‘‘ਏਕੋ ਅਹਂ ਸਕ੍ਕ ਮਹਨ੍ਤਮੋਘਂ, (ਇਚ੍ਚਾਯਸ੍ਮਾ ਉਪਸੀਵੋ)

ਅਨਿਸ੍ਸਿਤੋ ਨੋ ਵਿਸਹਾਮਿ ਤਾਰਿਤੁਂ;

ਆਰਮ੍ਮਣਂ ਬ੍ਰੂਹਿ ਸਮਨ੍ਤਚਕ੍ਖੁ, ਯਂ ਨਿਸ੍ਸਿਤੋ ਓਘਮਿਮਂ ਤਰੇਯ੍ਯਂ’’.

੧੦੭੬. ‘‘ਆਕਿਞ੍ਚਞ੍ਞਂ ਪੇਕ੍ਖਮਾਨੋ ਸਤਿਮਾ, (ਉਪਸੀਵਾਤਿ ਭਗਵਾ)

ਨਤ੍ਥੀਤਿ ਨਿਸ੍ਸਾਯ ਤਰਸ੍ਸੁ ਓਘਂ;

ਕਾਮੇ ਪਹਾਯ ਵਿਰਤੋ ਕਥਾਹਿ, ਤਣ੍ਹਕ੍ਖਯਂ ਨਤ੍ਤਮਹਾਭਿਪਸ੍ਸ’’ [ਰਤ੍ਤਮਹਾਭਿਪਸ੍ਸ (ਸ੍ਯਾ.), ਰਤ੍ਤਮਹਂ ਵਿਪਸ੍ਸ (ਕ.)].

੧੦੭੭. ‘‘ਸਬ੍ਬੇਸੁ ਕਾਮੇਸੁ ਯੋ ਵੀਤਰਾਗੋ, (ਇਚ੍ਚਾਯਸ੍ਮਾ ਉਪਸੀਵੋ)

ਆਕਿਞ੍ਚਞ੍ਞਂ ਨਿਸ੍ਸਿਤੋ ਹਿਤ੍ਵਾ ਮਞ੍ਞਂ;

ਸਞ੍ਞਾਵਿਮੋਕ੍ਖੇ ਪਰਮੇ ਵਿਮੁਤ੍ਤੋ [ਧਿਮੁਤ੍ਤੋ (ਕ.)], ਤਿਟ੍ਠੇ ਨੁ ਸੋ ਤਤ੍ਥ ਅਨਾਨੁਯਾਯੀ’’ [ਅਨਾਨੁਵਾਯੀ (ਸ੍ਯਾ. ਕ.)].

੧੦੭੮. ‘‘ਸਬ੍ਬੇਸੁ ਕਾਮੇਸੁ ਯੋ ਵੀਤਰਾਗੋ, (ਉਪਸੀਵਾਤਿ ਭਗਵਾ)

ਆਕਿਞ੍ਚਞ੍ਞਂ ਨਿਸ੍ਸਿਤੋ ਹਿਤ੍ਵਾ ਮਞ੍ਞਂ;

ਸਞ੍ਞਾਵਿਮੋਕ੍ਖੇ ਪਰਮੇ ਵਿਮੁਤ੍ਤੋ, ਤਿਟ੍ਠੇਯ੍ਯ ਸੋ ਤਤ੍ਥ ਅਨਾਨੁਯਾਯੀ’’.

੧੦੭੯. ‘‘ਤਿਟ੍ਠੇ ਚੇ ਸੋ ਤਤ੍ਥ ਅਨਾਨੁਯਾਯੀ, ਪੂਗਮ੍ਪਿ ਵਸ੍ਸਾਨਂ ਸਮਨ੍ਤਚਕ੍ਖੁ;

ਤਤ੍ਥੇਵ ਸੋ ਸੀਤਿਸਿਯਾ ਵਿਮੁਤ੍ਤੋ, ਚਵੇਥ ਵਿਞ੍ਞਾਣਂ ਤਥਾਵਿਧਸ੍ਸ’’.

੧੦੮੦. ‘‘ਅਚ੍ਚੀ ਯਥਾ ਵਾਤਵੇਗੇਨ ਖਿਤ੍ਤਾ [ਖਿਤ੍ਤਂ (ਸ੍ਯਾ.), ਖਿਤ੍ਤੋ (ਪੀ.)], (ਉਪਸੀਵਾਤਿ ਭਗਵਾ)

ਅਤ੍ਥਂ ਪਲੇਤਿ ਨ ਉਪੇਤਿ ਸਙ੍ਖਂ;

ਏਵਂ ਮੁਨੀ ਨਾਮਕਾਯਾ ਵਿਮੁਤ੍ਤੋ, ਅਤ੍ਥਂ ਪਲੇਤਿ ਨ ਉਪੇਤਿ ਸਙ੍ਖਂ’’.

੧੦੮੧. ‘‘ਅਤ੍ਥਙ੍ਗਤੋ ਸੋ ਉਦ ਵਾ ਸੋ ਨਤ੍ਥਿ, ਉਦਾਹੁ ਵੇ ਸਸ੍ਸਤਿਯਾ ਅਰੋਗੋ;

ਤਂ ਮੇ ਮੁਨੀ ਸਾਧੁ ਵਿਯਾਕਰੋਹਿ, ਤਥਾ ਹਿ ਤੇ ਵਿਦਿਤੋ ਏਸ ਧਮ੍ਮੋ’’.

੧੦੮੨. ‘‘ਅਤ੍ਥਙ੍ਗਤਸ੍ਸ ਨ ਪਮਾਣਮਤ੍ਥਿ, (ਉਪਸੀਵਾਤਿ ਭਗਵਾ)

ਯੇਨ ਨਂ ਵਜ੍ਜੁਂ ਤਂ ਤਸ੍ਸ ਨਤ੍ਥਿ;

ਸਬ੍ਬੇਸੁ ਧਮ੍ਮੇਸੁ ਸਮੂਹਤੇਸੁ, ਸਮੂਹਤਾ ਵਾਦਪਥਾਪਿ ਸਬ੍ਬੇ’’ਤਿ.

ਉਪਸੀਵਮਾਣਵਪੁਚ੍ਛਾ ਛਟ੍ਠੀ ਨਿਟ੍ਠਿਤਾ.