੧੩. ਉਦਯਮਾਣਵਪੁਚ੍ਛਾ

੧੧੧੧. ‘‘ਝਾਯਿਂ ਵਿਰਜਮਾਸੀਨਂ, (ਇਚ੍ਚਾਯਸ੍ਮਾ ਉਦਯੋ) ਕਤਕਿਚ੍ਚਂ ਅਨਾਸਵਂ;

ਪਾਰਗੁਂ ਸਬ੍ਬਧਮ੍ਮਾਨਂ, ਅਤ੍ਥਿ ਪਞ੍ਹੇਨ ਆਗਮਂ;

ਅਞ੍ਞਾਵਿਮੋਕ੍ਖਂ ਪਬ੍ਰੂਹਿ, ਅਵਿਜ੍ਜਾਯ ਪਭੇਦਨਂ’’.

੧੧੧੨. ‘‘ਪਹਾਨਂ ਕਾਮਚ੍ਛਨ੍ਦਾਨਂ, (ਉਦਯਾਤਿ ਭਗਵਾ) ਦੋਮਨਸ੍ਸਾਨ ਚੂਭਯਂ;

ਥਿਨਸ੍ਸ ਚ ਪਨੂਦਨਂ, ਕੁਕ੍ਕੁਚ੍ਚਾਨਂ ਨਿਵਾਰਣਂ.

੧੧੧੩. ‘‘ਉਪੇਕ੍ਖਾਸਤਿਸਂਸੁਦ੍ਧਂ, ਧਮ੍ਮਤਕ੍ਕਪੁਰੇਜਵਂ;

ਅਞ੍ਞਾਵਿਮੋਕ੍ਖਂ ਪਬ੍ਰੂਮਿ, ਅਵਿਜ੍ਜਾਯ ਪਭੇਦਨਂ’’.

੧੧੧੪. ‘‘ਕਿਂਸੁ ਸਂਯੋਜਨੋ ਲੋਕੋ, ਕਿਂਸੁ ਤਸ੍ਸ ਵਿਚਾਰਣਂ;

ਕਿਸ੍ਸਸ੍ਸ ਵਿਪ੍ਪਹਾਨੇਨ, ਨਿਬ੍ਬਾਨਂ ਇਤਿ ਵੁਚ੍ਚਤਿ’’.

੧੧੧੫. ‘‘ਨਨ੍ਦਿਸਂਯੋਜਨੋ ਲੋਕੋ, ਵਿਤਕ੍ਕਸ੍ਸ ਵਿਚਾਰਣਂ;

ਤਣ੍ਹਾਯ ਵਿਪ੍ਪਹਾਨੇਨ, ਨਿਬ੍ਬਾਨਂ ਇਤਿ ਵੁਚ੍ਚਤਿ’’.

੧੧੧੬. ‘‘ਕਥਂ ਸਤਸ੍ਸ ਚਰਤੋ, ਵਿਞ੍ਞਾਣਂ ਉਪਰੁਜ੍ਝਤਿ;

ਭਗਵਨ੍ਤਂ ਪੁਟ੍ਠੁਮਾਗਮ੍ਮ, ਤਂ ਸੁਣੋਮ ਵਚੋ ਤਵ’’.

੧੧੧੭. ‘‘ਅਜ੍ਝਤ੍ਤਞ੍ਚ ਬਹਿਦ੍ਧਾ ਚ, ਵੇਦਨਂ ਨਾਭਿਨਨ੍ਦਤੋ;

ਏਵਂ ਸਤਸ੍ਸ ਚਰਤੋ, ਵਿਞ੍ਞਾਣਂ ਉਪਰੁਜ੍ਝਤੀ’’ਤਿ.

ਉਦਯਮਾਣਵਪੁਚ੍ਛਾ ਤੇਰਸਮਾ ਨਿਟ੍ਠਿਤਾ.