੧੦. ਕਪ੍ਪਮਾਣਵਪੁਚ੍ਛਾ

੧੦੯੮. ‘‘ਮਜ੍ਝੇ ਸਰਸ੍ਮਿਂ ਤਿਟ੍ਠਤਂ, (ਇਚ੍ਚਾਯਸ੍ਮਾ ਕਪ੍ਪੋ)

ਓਘੇ ਜਾਤੇ ਮਹਬ੍ਭਯੇ;

ਜਰਾਮਚ੍ਚੁਪਰੇਤਾਨਂ, ਦੀਪਂ ਪਬ੍ਰੂਹਿ ਮਾਰਿਸ;

ਤ੍ਵਞ੍ਚ ਮੇ ਦੀਪਮਕ੍ਖਾਹਿ, ਯਥਾਯਿਦਂ ਨਾਪਰਂ ਸਿਯਾ’’.

੧੦੯੯. ‘‘ਮਜ੍ਝੇ ਸਰਸ੍ਮਿਂ ਤਿਟ੍ਠਤਂ, (ਕਪ੍ਪਾਤਿ ਭਗਵਾ)

ਓਘੇ ਜਾਤੇ ਮਹਬ੍ਭਯੇ;

ਜਰਾਮਚ੍ਚੁਪਰੇਤਾਨਂ, ਦੀਪਂ ਪਬ੍ਰੂਮਿ ਕਪ੍ਪ ਤੇ.

੧੧੦੦. ‘‘ਅਕਿਞ੍ਚਨਂ ਅਨਾਦਾਨਂ, ਏਤਂ ਦੀਪਂ ਅਨਾਪਰਂ;

ਨਿਬ੍ਬਾਨਂ ਇਤਿ [ਨਿਬ੍ਬਾਨਮੀਤਿ (ਸੀ.)] ਨਂ ਬ੍ਰੂਮਿ, ਜਰਾਮਚ੍ਚੁਪਰਿਕ੍ਖਯਂ.

੧੧੦੧. ‘‘ਏਤਦਞ੍ਞਾਯ ਯੇ ਸਤਾ, ਦਿਟ੍ਠਧਮ੍ਮਾਭਿਨਿਬ੍ਬੁਤਾ;

ਨ ਤੇ ਮਾਰਵਸਾਨੁਗਾ, ਨ ਤੇ ਮਾਰਸ੍ਸ ਪਦ੍ਧਗੂ’’ਤਿ [ਪਟ੍ਠਗੂਤਿ (ਸ੍ਯਾ. ਕ.)].

ਕਪ੍ਪਮਾਣਵਪੁਚ੍ਛਾ ਦਸਮਾ ਨਿਟ੍ਠਿਤਾ.