੧੫. ਸੇਟ੍ਠਿਪੁਤ੍ਤਪੇਤਵਤ੍ਥੁ

੮੦੨. [ਜਾ. ੧.੪.੫੪ ਜਾਤਕੇਪਿ] ‘‘ਸਟ੍ਠਿਵਸ੍ਸਸਹਸ੍ਸਾਨਿ, ਪਰਿਪੁਣ੍ਣਾਨਿ ਸਬ੍ਬਸੋ;

ਨਿਰਯੇ ਪਚ੍ਚਮਾਨਾਨਂ, ਕਦਾ ਅਨ੍ਤੋ ਭਵਿਸ੍ਸਤਿ’’.

੮੦੩. [ਜਾ. ੧.੪.੫੫ ਜਾਤਕੇਪਿ] ‘‘ਨਤ੍ਥਿ ਅਨ੍ਤੋ ਕੁਤੋ ਅਨ੍ਤੋ, ਨ ਅਨ੍ਤੋ ਪਟਿਦਿਸ੍ਸਤਿ;

ਤਥਾ ਹਿ ਪਕਤਂ ਪਾਪਂ, ਤੁਯ੍ਹਂ ਮਯ੍ਹਞ੍ਚ ਮਾਰਿਸਾ [ਮਮ ਤੁਯ੍ਹਞ੍ਚ ਮਾਰਿਸ (ਸੀ. ਸ੍ਯਾ. ਪੀ.)].

੮੦੪. [ਜਾ. ੧.੪.੫੩ ਜਾਤਕੇਪਿ] ‘‘ਦੁਜ੍ਜੀਵਿਤਮਜੀਵਮ੍ਹ, ਯੇ ਸਨ੍ਤੇ ਨ ਦਦਮ੍ਹਸੇ;

ਸਨ੍ਤੇਸੁ ਦੇਯ੍ਯਧਮ੍ਮੇਸੁ, ਦੀਪਂ ਨਾਕਮ੍ਹ ਅਤ੍ਤਨੋ.

੮੦੫. [ਜਾ. ੧.੪.੫੬ ਜਾਤਕੇਪਿ] ‘‘ਸੋਹਂ ਨੂਨ ਇਤੋ ਗਨ੍ਤ੍ਵਾ, ਯੋਨਿਂ ਲਦ੍ਧਾਨ ਮਾਨੁਸਿਂ;

ਵਦਞ੍ਞੂ ਸੀਲਸਮ੍ਪਨ੍ਨੋ, ਕਾਹਾਮਿ ਕੁਸਲਂ ਬਹੁ’’ਨ੍ਤਿ.

ਸੇਟ੍ਠਿਪੁਤ੍ਤਪੇਤਵਤ੍ਥੁ ਪਨ੍ਨਰਸਮਂ.