੯. ਕੂਟਵਿਨਿਚ੍ਛਯਿਕਪੇਤਵਤ੍ਥੁ

੪੯੯. ‘‘ਮਾਲੀ ਕਿਰਿਟੀ ਕਾਯੂਰੀ [ਕੇਯੂਰੀ (ਸੀ.)], ਗਤ੍ਤਾ ਤੇ ਚਨ੍ਦਨੁਸ੍ਸਦਾ;

ਪਸਨ੍ਨਮੁਖਵਣ੍ਣੋਸਿ, ਸੂਰਿਯਵਣ੍ਣੋਵ ਸੋਭਸਿ.

੫੦੦. ‘‘ਅਮਾਨੁਸਾ ਪਾਰਿਸਜ੍ਜਾ, ਯੇ ਤੇਮੇ ਪਰਿਚਾਰਕਾ;

ਦਸ ਕਞ੍ਞਾਸਹਸ੍ਸਾਨਿ, ਯਾ ਤੇਮਾ ਪਰਿਚਾਰਿਕਾ;

ਤਾ [ਕਾ (ਕ.)] ਕਮ੍ਬੁਕਾਯੂਰਧਰਾ, ਕਞ੍ਚਨਾਵੇਲ਼ਭੂਸਿਤਾ.

੫੦੧. ‘‘ਮਹਾਨੁਭਾਵੋਸਿ ਤੁਵਂ, ਲੋਮਹਂਸਨਰੂਪਵਾ;

ਪਿਟ੍ਠਿਮਂਸਾਨਿ ਅਤ੍ਤਨੋ, ਸਾਮਂ ਉਕ੍ਕਚ੍ਚ [ਉਕ੍ਕਡ੍ਢ (ਸੀ.)] ਖਾਦਸਿ.

੫੦੨. ‘‘ਕਿਂ ਨੁ ਕਾਯੇਨ ਵਾਚਾਯ, ਮਨਸਾ ਦੁਕ੍ਕੁਟਂ ਕਤਂ;

ਕਿਸ੍ਸ ਕਮ੍ਮਵਿਪਾਕੇਨ, ਪਿਟ੍ਠਿਮਂਸਾਨਿ ਅਤ੍ਤਨੋ;

ਸਾਮਂ ਉਕ੍ਕਚ੍ਚ ਖਾਦਸੀ’’ਤਿ.

੫੦੩. ‘‘ਅਤ੍ਤਨੋਹਂ ਅਨਤ੍ਥਾਯ, ਜੀਵਲੋਕੇ ਅਚਾਰਿਸਂ;

ਪੇਸੁਞ੍ਞਮੁਸਾਵਾਦੇਨ, ਨਿਕਤਿਵਞ੍ਚਨਾਯ ਚ.

੫੦੪. ‘‘ਤਤ੍ਥਾਹਂ ਪਰਿਸਂ ਗਨ੍ਤ੍ਵਾ, ਸਚ੍ਚਕਾਲੇ ਉਪਟ੍ਠਿਤੇ;

ਅਤ੍ਥਂ ਧਮ੍ਮਂ ਨਿਰਾਕਤ੍ਵਾ [ਨਿਰਂਕਤ੍ਵਾ (ਕ.) ਨਿ + ਆ + ਕਰ + ਤ੍ਵਾ = ਨਿਰਾਕਤ੍ਵਾ], ਅਧਮ੍ਮਮਨੁਵਤ੍ਤਿਸਂ.

੫੦੫. ‘‘ਏਵਂ ਸੋ ਖਾਦਤਤ੍ਤਾਨਂ, ਯੋ ਹੋਤਿ ਪਿਟ੍ਠਿਮਂਸਿਕੋ;

ਯਥਾਹਂ ਅਜ੍ਜ ਖਾਦਾਮਿ, ਪਿਟ੍ਠਿਮਂਸਾਨਿ ਅਤ੍ਤਨੋ.

੫੦੬. ‘‘ਤਯਿਦਂ ਤਯਾ ਨਾਰਦ ਸਾਮਂ ਦਿਟ੍ਠਂ, ਅਨੁਕਮ੍ਪਕਾ ਯੇ ਕੁਸਲਾ ਵਦੇਯ੍ਯੁਂ;

ਮਾ ਪੇਸੁਣਂ ਮਾ ਚ ਮੁਸਾ ਅਭਾਣਿ, ਮਾ ਖੋਸਿ ਪਿਟ੍ਠਿਮਂਸਿਕੋ ਤੁਵ’’ਨ੍ਤਿ.

ਕੂਟਵਿਨਿਚ੍ਛਯਿਕਪੇਤਵਤ੍ਥੁ ਨਵਮਂ.