੭. ਮਿਗਲੁਦ੍ਦਕਪੇਤਵਤ੍ਥੁ

੪੭੮. ‘‘ਨਰਨਾਰਿਪੁਰਕ੍ਖਤੋ ਯੁਵਾ, ਰਜਨੀਯੇਹਿ ਕਾਮਗੁਣੇਹਿ [ਕਾਮੇਹਿ (ਕ.)] ਸੋਭਸਿ;

ਦਿਵਸਂ ਅਨੁਭੋਸਿ ਕਾਰਣਂ, ਕਿਮਕਾਸਿ ਪੁਰਿਮਾਯ ਜਾਤਿਯਾ’’ਤਿ.

੪੭੯. ‘‘ਅਹਂ ਰਾਜਗਹੇ ਰਮ੍ਮੇ, ਰਮਣੀਯੇ ਗਿਰਿਬ੍ਬਜੇ;

ਮਿਗਲੁਦ੍ਦੋ ਪੁਰੇ ਆਸਿਂ, ਲੋਹਿਤਪਾਣਿ ਦਾਰੁਣੋ.

੪੮੦. ‘‘ਅਵਿਰੋਧਕਰੇਸੁ ਪਾਣਿਸੁ, ਪੁਥੁਸਤ੍ਤੇਸੁ ਪਦੁਟ੍ਠਮਾਨਸੋ;

ਵਿਚਰਿਂ ਅਤਿਦਾਰੁਣੋ ਸਦਾ [ਤਦਾ (ਸੀ.)], ਪਰਹਿਂਸਾਯ ਰਤੋ ਅਸਞ੍ਞਤੋ.

੪੮੧. ‘‘ਤਸ੍ਸ ਮੇ ਸਹਾਯੋ ਸੁਹਦਯੋ [ਸੁਹਦੋ (ਸੀ.)], ਸਦ੍ਧੋ ਆਸਿ ਉਪਾਸਕੋ;

ਸੋਪਿ [ਸੋ ਹਿ (ਸ੍ਯਾ.)] ਮਂ ਅਨੁਕਮ੍ਪਨ੍ਤੋ, ਨਿਵਾਰੇਸਿ ਪੁਨਪ੍ਪੁਨਂ.

੪੮੨. ‘‘‘ਮਾਕਾਸਿ ਪਾਪਕਂ ਕਮ੍ਮਂ, ਮਾ ਤਾਤ ਦੁਗ੍ਗਤਿਂ ਅਗਾ;

ਸਚੇ ਇਚ੍ਛਸਿ ਪੇਚ੍ਚ ਸੁਖਂ, ਵਿਰਮ ਪਾਣਵਧਾ ਅਸਂਯਮਾ’.

੪੮੩. ‘‘ਤਸ੍ਸਾਹਂ ਵਚਨਂ ਸੁਤ੍ਵਾ, ਸੁਖਕਾਮਸ੍ਸ ਹਿਤਾਨੁਕਮ੍ਪਿਨੋ;

ਨਾਕਾਸਿਂ ਸਕਲਾਨੁਸਾਸਨਿਂ, ਚਿਰਪਾਪਾਭਿਰਤੋ ਅਬੁਦ੍ਧਿਮਾ.

੪੮੪. ‘‘ਸੋ ਮਂ ਪੁਨ ਭੂਰਿਸੁਮੇਧਸੋ, ਅਨੁਕਮ੍ਪਾਯ ਸਂਯਮੇ ਨਿਵੇਸਯਿ;

‘ਸਚੇ ਦਿਵਾ ਹਨਸਿ ਪਾਣਿਨੋ, ਅਥ ਤੇ ਰਤ੍ਤਿਂ ਭਵਤੁ ਸਂਯਮੋ’.

੪੮੫. ‘‘ਸ੍ਵਾਹਂ ਦਿਵਾ ਹਨਿਤ੍ਵਾ ਪਾਣਿਨੋ, ਵਿਰਤੋ ਰਤ੍ਤਿਮਹੋਸਿ ਸਞ੍ਞਤੋ;

ਰਤ੍ਤਾਹਂ ਪਰਿਚਾਰੇਮਿ, ਦਿਵਾ ਖਜ੍ਜਾਮਿ ਦੁਗ੍ਗਤੋ.

੪੮੬. ‘‘ਤਸ੍ਸ ਕਮ੍ਮਸ੍ਸ ਕੁਸਲਸ੍ਸ, ਅਨੁਭੋਮਿ ਰਤ੍ਤਿਂ ਅਮਾਨੁਸਿਂ;

ਦਿਵਾ ਪਟਿਹਤਾਵ [ਪਟਿਹਤਾ ਚ (ਕ.)] ਕੁਕ੍ਕੁਰਾ, ਉਪਧਾਵਨ੍ਤਿ ਸਮਨ੍ਤਾ ਖਾਦਿਤੁਂ.

੪੮੭. ‘‘ਯੇ ਚ ਤੇ ਸਤਤਾਨੁਯੋਗਿਨੋ, ਧੁਵਂ ਪਯੁਤ੍ਤਾ ਸੁਗਤਸ੍ਸ ਸਾਸਨੇ;

ਮਞ੍ਞਾਮਿ ਤੇ ਅਮਤਮੇਵ ਕੇਵਲਂ, ਅਧਿਗਚ੍ਛਨ੍ਤਿ ਪਦਂ ਅਸਙ੍ਖਤ’’ਨ੍ਤਿ.

ਮਿਗਲੁਦ੍ਦਕਪੇਤਵਤ੍ਥੁ ਸਤ੍ਤਮਂ.