੫. ਕੁਮਾਰਪੇਤਵਤ੍ਥੁ

੪੫੩. ਅਚ੍ਛੇਰਰੂਪਂ ਸੁਗਤਸ੍ਸ ਞਾਣਂ, ਸਤ੍ਥਾ ਯਥਾ ਪੁਗ੍ਗਲਂ ਬ੍ਯਾਕਾਸਿ;

ਉਸ੍ਸਨ੍ਨਪੁਞ੍ਞਾਪਿ ਭਵਨ੍ਤਿ ਹੇਕੇ, ਪਰਿਤ੍ਤਪੁਞ੍ਞਾਪਿ ਭਵਨ੍ਤਿ ਹੇਕੇ.

੪੫੪. ਅਯਂ ਕੁਮਾਰੋ ਸੀਵਥਿਕਾਯ ਛਡ੍ਡਿਤੋ, ਅਙ੍ਗੁਟ੍ਠਸ੍ਨੇਹੇਨ ਯਾਪੇਤਿ ਰਤ੍ਤਿਂ;

ਨ ਯਕ੍ਖਭੂਤਾ ਨ ਸਰੀਸਪਾ [ਸਿਰਿਂਸਪਾ (ਸੀ. ਸ੍ਯਾ. ਪੀ.)] ਵਾ, ਵਿਹੇਠਯੇਯ੍ਯੁਂ ਕਤਪੁਞ੍ਞਂ ਕੁਮਾਰਂ.

੪੫੫. ਸੁਨਖਾਪਿਮਸ੍ਸ ਪਲਿਹਿਂਸੁ ਪਾਦੇ, ਧਙ੍ਕਾ ਸਿਙ੍ਗਾਲਾ [ਸਿਗਾਲਾ (ਸੀ. ਸ੍ਯਾ. ਪੀ.)] ਪਰਿਵਤ੍ਤਯਨ੍ਤਿ;

ਗਬ੍ਭਾਸਯਂ ਪਕ੍ਖਿਗਣਾ ਹਰਨ੍ਤਿ, ਕਾਕਾ ਪਨ ਅਕ੍ਖਿਮਲਂ ਹਰਨ੍ਤਿ.

੪੫੬. ਨਯਿਮਸ੍ਸ [ਨ ਇਮਸ੍ਸ (ਸ੍ਯਾ.), ਨਿਮਸ੍ਸ (ਕ.)] ਰਕ੍ਖਂ ਵਿਦਹਿਂਸੁ ਕੇਚਿ, ਨ ਓਸਧਂ ਸਾਸਪਧੂਪਨਂ ਵਾ;

ਨਕ੍ਖਤ੍ਤਯੋਗਮ੍ਪਿ ਨ ਅਗ੍ਗਹੇਸੁਂ [ਨ ਉਗ੍ਗਹੇਸੁਂ (ਕ.)], ਨ ਸਬ੍ਬਧਞ੍ਞਾਨਿਪਿ ਆਕਿਰਿਂਸੁ.

੪੫੭. ਏਤਾਦਿਸਂ ਉਤ੍ਤਮਕਿਚ੍ਛਪਤ੍ਤਂ, ਰਤ੍ਤਾਭਤਂ ਸੀਵਥਿਕਾਯ ਛਡ੍ਡਿਤਂ;

ਨੋਨੀਤਪਿਣ੍ਡਂਵ ਪਵੇਧਮਾਨਂ, ਸਸਂਸਯਂ ਜੀਵਿਤਸਾਵਸੇਸਂ.

੪੫੮. ਤਮਦ੍ਦਸਾ ਦੇਵਮਨੁਸ੍ਸਪੂਜਿਤੋ, ਦਿਸ੍ਵਾ ਚ ਤਂ ਬ੍ਯਾਕਰਿ ਭੂਰਿਪਞ੍ਞੋ;

‘‘ਅਯਂ ਕੁਮਾਰੋ ਨਗਰਸ੍ਸਿਮਸ੍ਸ, ਅਗ੍ਗਕੁਲਿਕੋ ਭਵਿਸ੍ਸਤਿ ਭੋਗਤੋ ਚ’’ [ਭੋਗਵਾ ਚ (ਸ੍ਯਾ. ਕ.)].

੪੫੯. ‘‘ਕਿਸ੍ਸ [ਕਿਂ’ਸ (?)] ਵਤਂ ਕਿਂ ਪਨ ਬ੍ਰਹ੍ਮਚਰਿਯਂ, ਕਿਸ੍ਸ ਸੁਚਿਣ੍ਣਸ੍ਸ ਅਯਂ ਵਿਪਾਕੋ;

ਏਤਾਦਿਸਂ ਬ੍ਯਸਨਂ ਪਾਪੁਣਿਤ੍ਵਾ, ਤਂ ਤਾਦਿਸਂ ਪਚ੍ਚਨੁਭੋਸ੍ਸਤਿਦ੍ਧਿ’’ਨ੍ਤਿ.

੪੬੦. ਬੁਦ੍ਧਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ, ਪੂਜਂ ਅਕਾਸਿ ਜਨਤਾ ਉਲ਼ਾਰਂ;

ਤਤ੍ਰਸ੍ਸ ਚਿਤ੍ਤਸ੍ਸਹੁ ਅਞ੍ਞਥਤ੍ਤਂ, ਵਾਚਂ ਅਭਾਸਿ ਫਰੁਸਂ ਅਸਬ੍ਭਂ.

੪੬੧. ਸੋ ਤਂ ਵਿਤਕ੍ਕਂ ਪਵਿਨੋਦਯਿਤ੍ਵਾ, ਪੀਤਿਂ ਪਸਾਦਂ ਪਟਿਲਦ੍ਧਾ ਪਚ੍ਛਾ;

ਤਥਾਗਤਂ ਜੇਤਵਨੇ ਵਸਨ੍ਤਂ, ਯਾਗੁਯਾ ਉਪਟ੍ਠਾਸਿ ਸਤ੍ਤਰਤ੍ਤਂ.

੪੬੨. ਤਸ੍ਸ [ਤਂ’ਸ (?)] ਵਤਂ ਤਂ ਪਨ ਬ੍ਰਹ੍ਮਚਰਿਯਂ, ਤਸ੍ਸ ਸੁਚਿਣ੍ਣਸ੍ਸ ਅਯਂ ਵਿਪਾਕੋ;

ਏਤਾਦਿਸਂ ਬ੍ਯਸਨਂ ਪਾਪੁਣਿਤ੍ਵਾ, ਤਂ ਤਾਦਿਸਂ ਪਚ੍ਚਨੁਭੋਸ੍ਸਤਿਦ੍ਧਿਂ.

੪੬੩. ਠਤ੍ਵਾਨ ਸੋ ਵਸ੍ਸਸਤਂ ਇਧੇਵ, ਸਬ੍ਬੇਹਿ ਕਾਮੇਹਿ ਸਮਙ੍ਗਿਭੂਤੋ;

ਕਾਯਸ੍ਸ ਭੇਦਾ ਅਭਿਸਮ੍ਪਰਾਯਂ, ਸਹਬ੍ਯਤਂ ਗਚ੍ਛਤਿ ਵਾਸਵਸ੍ਸਾਤਿ.

ਕੁਮਾਰਪੇਤਵਤ੍ਥੁ ਪਞ੍ਚਮਂ.