੨. ਸਾਣਵਾਸੀਥੇਰਪੇਤਵਤ੍ਥੁ

੪੦੮. ਕੁਣ੍ਡਿਨਾਗਰਿਯੋ ਥੇਰੋ, ਸਾਣਵਾਸਿ [ਸਾਨੁਵਾਸਿ (ਸੀ.), ਸਾਨਵਾਸਿ (ਸ੍ਯਾ.)] ਨਿਵਾਸਿਕੋ;

ਪੋਟ੍ਠਪਾਦੋਤਿ ਨਾਮੇਨ, ਸਮਣੋ ਭਾਵਿਤਿਨ੍ਦ੍ਰਿਯੋ.

੪੦੯. ਤਸ੍ਸ ਮਾਤਾ ਪਿਤਾ ਭਾਤਾ, ਦੁਗ੍ਗਤਾ ਯਮਲੋਕਿਕਾ;

ਪਾਪਕਮ੍ਮਂ ਕਰਿਤ੍ਵਾਨ, ਪੇਤਲੋਕਂ ਇਤੋ ਗਤਾ.

੪੧੦. ਤੇ ਦੁਗ੍ਗਤਾ ਸੂਚਿਕਟ੍ਟਾ, ਕਿਲਨ੍ਤਾ ਨਗ੍ਗਿਨੋ ਕਿਸਾ;

ਉਤ੍ਤਸਨ੍ਤਾ [ਓਤ੍ਤਪ੍ਪਨ੍ਤਾ (ਸ੍ਯਾ. ਕ.)] ਮਹਤ੍ਤਾਸਾ [ਮਹਾਤਾਸਾ (ਸੀ.)], ਨ ਦਸ੍ਸੇਨ੍ਤਿ ਕੁਰੂਰਿਨੋ [ਕੁਰੁਦ੍ਦਿਨੋ (ਕ.)].

੪੧੧. ਤਸ੍ਸ ਭਾਤਾ ਵਿਤਰਿਤ੍ਵਾ, ਨਗ੍ਗੋ ਏਕਪਥੇਕਕੋ;

ਚਤੁਕੁਣ੍ਡਿਕੋ ਭਵਿਤ੍ਵਾਨ, ਥੇਰਸ੍ਸ ਦਸ੍ਸਯੀਤੁਮਂ.

੪੧੨. ਥੇਰੋ ਚਾਮਨਸਿਕਤ੍ਵਾ, ਤੁਣ੍ਹੀਭੂਤੋ ਅਤਿਕ੍ਕਮਿ;

ਸੋ ਚ ਵਿਞ੍ਞਾਪਯੀ ਥੇਰਂ, ‘ਭਾਤਾ ਪੇਤਗਤੋ ਅਹਂ’.

੪੧੩. ‘‘ਮਾਤਾ ਪਿਤਾ ਚ ਤੇ ਭਨ੍ਤੇ, ਦੁਗ੍ਗਤਾ ਯਮਲੋਕਿਕਾ;

ਪਾਪਕਮ੍ਮਂ ਕਰਿਤ੍ਵਾਨ, ਪੇਤਲੋਕਂ ਇਤੋ ਗਤਾ.

੪੧੪. ‘‘ਤੇ ਦੁਗ੍ਗਤਾ ਸੂਚਿਕਟ੍ਟਾ, ਕਿਲਨ੍ਤਾ ਨਗ੍ਗਿਨੋ ਕਿਸਾ;

ਉਤ੍ਤਸਨ੍ਤਾ ਮਹਤ੍ਤਾਸਾ, ਨ ਦਸ੍ਸੇਨ੍ਤਿ ਕੁਰੂਰਿਨੋ.

੪੧੫. ‘‘ਅਨੁਕਮ੍ਪਸ੍ਸੁ ਕਾਰੁਣਿਕੋ, ਦਤ੍ਵਾ ਅਨ੍ਵਾਦਿਸਾਹਿ ਨੋ;

ਤਵ ਦਿਨ੍ਨੇਨ ਦਾਨੇਨ, ਯਾਪੇਸ੍ਸਨ੍ਤਿ ਕੁਰੂਰਿਨੋ’’ਤਿ.

੪੧੬. ਥੇਰੋ ਚਰਿਤ੍ਵਾ ਪਿਣ੍ਡਾਯ, ਭਿਕ੍ਖੂ ਅਞ੍ਞੇ ਚ ਦ੍ਵਾਦਸ;

ਏਕਜ੍ਝਂ ਸਨ੍ਨਿਪਤਿਂਸੁ, ਭਤ੍ਤਵਿਸ੍ਸਗ੍ਗਕਾਰਣਾ.

੪੧੭. ਥੇਰੋ ਸਬ੍ਬੇਵ ਤੇ ਆਹ, ‘‘ਯਥਾਲਦ੍ਧਂ ਦਦਾਥ ਮੇ;

ਸਙ੍ਘਭਤ੍ਤਂ ਕਰਿਸ੍ਸਾਮਿ, ਅਨੁਕਮ੍ਪਾਯ ਞਾਤਿਨਂ’’.

੪੧੮. ਨਿਯ੍ਯਾਦਯਿਂਸੁ ਥੇਰਸ੍ਸ, ਥੇਰੋ ਸਙ੍ਘਂ ਨਿਮਨ੍ਤਯਿ;

ਦਤ੍ਵਾ ਅਨ੍ਵਾਦਿਸਿ ਥੇਰੋ, ਮਾਤੁ ਪਿਤੁ ਚ ਭਾਤੁਨੋ;

‘‘ਇਦਂ ਮੇ ਞਾਤੀਨਂ ਹੋਤੁ, ਸੁਖਿਤਾ ਹੋਨ੍ਤੁ ਞਾਤਯੋ’’.

੪੧੯. ਸਮਨਨ੍ਤਰਾਨੁਦ੍ਦਿਟ੍ਠੇ, ਭੋਜਨਂ ਉਦਪਜ੍ਜਥ;

ਸੁਚਿਂ ਪਣੀਤਂ ਸਮ੍ਪਨ੍ਨਂ, ਅਨੇਕਰਸਬ੍ਯਞ੍ਜਨਂ.

੪੨੦. ਤਤੋ ਉਦ੍ਦਸ੍ਸਯੀ [ਉਦ੍ਦਿਸਯੀ (ਸੀ. ਕ.), ਉਦ੍ਦਿਸ੍ਸਤਿ (ਸ੍ਯਾ. ਕ.)] ਭਾਤਾ, ਵਣ੍ਣਵਾ ਬਲਵਾ ਸੁਖੀ;

‘‘ਪਹੂਤਂ ਭੋਜਨਂ ਭਨ੍ਤੇ, ਪਸ੍ਸ ਨਗ੍ਗਾਮ੍ਹਸੇ ਮਯਂ;

ਤਥਾ ਭਨ੍ਤੇ ਪਰਕ੍ਕਮ, ਯਥਾ ਵਤ੍ਥਂ ਲਭਾਮਸੇ’’ਤਿ.

੪੨੧. ਥੇਰੋ ਸਙ੍ਕਾਰਕੂਟਮ੍ਹਾ, ਉਚ੍ਚਿਨਿਤ੍ਵਾਨ ਨਨ੍ਤਕੇ;

ਪਿਲੋਤਿਕਂ ਪਟਂ ਕਤ੍ਵਾ, ਸਙ੍ਘੇ ਚਾਤੁਦ੍ਦਿਸੇ ਅਦਾ.

੪੨੨. ਦਤ੍ਵਾ ਅਨ੍ਵਾਦਿਸੀ ਥੇਰੋ, ਮਾਤੁ ਪਿਤੁ ਚ ਭਾਤੁਨੋ;

‘‘ਇਦਂ ਮੇ ਞਾਤੀਨਂ ਹੋਤੁ, ਸੁਖਿਤਾ ਹੋਨ੍ਤੁ ਞਾਤਯੋ’’.

੪੨੩. ਸਮਨਨ੍ਤਰਾਨੁਦ੍ਦਿਟ੍ਠੇ, ਵਤ੍ਥਾਨਿ ਉਦਪਜ੍ਜਿਸੁਂ;

ਤਤੋ ਸੁਵਤ੍ਥਵਸਨੋ, ਥੇਰਸ੍ਸ ਦਸ੍ਸਯੀਤੁਮਂ.

੪੨੪. ‘‘ਯਾਵਤਾ ਨਨ੍ਦਰਾਜਸ੍ਸ, ਵਿਜਿਤਸ੍ਮਿਂ ਪਟਿਚ੍ਛਦਾ;

ਤਤੋ ਬਹੁਤਰਾ ਭਨ੍ਤੇ, ਵਤ੍ਥਾਨਚ੍ਛਾਦਨਾਨਿ ਨੋ.

੪੨੫. ‘‘ਕੋਸੇਯ੍ਯਕਮ੍ਬਲੀਯਾਨਿ, ਖੋਮ ਕਪ੍ਪਾਸਿਕਾਨਿ ਚ;

ਵਿਪੁਲਾ ਚ ਮਹਗ੍ਘਾ ਚ, ਤੇਪਾਕਾਸੇਵਲਮ੍ਬਰੇ.

੪੨੬. ‘‘ਤੇ ਮਯਂ ਪਰਿਦਹਾਮ, ਯਂ ਯਂ ਹਿ ਮਨਸੋ ਪਿਯਂ;

ਤਥਾ ਭਨ੍ਤੇ ਪਰਕ੍ਕਮ, ਯਥਾ ਗੇਹਂ ਲਭਾਮਸੇ’’ਤਿ.

੪੨੭. ਥੇਰੋ ਪਣ੍ਣਕੁਟਿਂ ਕਤ੍ਵਾ, ਸਙ੍ਘੇ ਚਾਤੁਦ੍ਦਿਸੇ ਅਦਾ;

ਦਤ੍ਵਾ ਅਨ੍ਵਾਦਿਸੀ ਥੇਰੋ, ਮਾਤੁ ਪਿਤੁ ਚ ਭਾਤੁਨੋ;

‘‘ਇਦਂ ਮੇ ਞਾਤੀਨਂ ਹੋਤੁ, ਸੁਖਿਤਾ ਹੋਨ੍ਤੁ ਞਾਤਯੋ’’.

੪੨੮. ਸਮਨਨ੍ਤਰਾਨੁਦ੍ਦਿਟ੍ਠੇ, ਘਰਾਨਿ ਉਦਪਜ੍ਜਿਸੁਂ;

ਕੂਟਾਗਾਰਨਿਵੇਸਨਾ, ਵਿਭਤ੍ਤਾ ਭਾਗਸੋ ਮਿਤਾ.

੪੨੯. ‘‘ਨ ਮਨੁਸ੍ਸੇਸੁ ਈਦਿਸਾ, ਯਾਦਿਸਾ ਨੋ ਘਰਾ ਇਧ;

ਅਪਿ ਦਿਬ੍ਬੇਸੁ ਯਾਦਿਸਾ, ਤਾਦਿਸਾ ਨੋ ਘਰਾ ਇਧ.

੪੩੦. ‘‘ਦਦ੍ਦਲ੍ਲਮਾਨਾ ਆਭੇਨ੍ਤਿ [ਆਭਨ੍ਤਿ (ਕ.)], ਸਮਨ੍ਤਾ ਚਤੁਰੋ ਦਿਸਾ;

‘ਤਥਾ ਭਨ੍ਤੇ ਪਰਕ੍ਕਮ, ਯਥਾ ਪਾਨੀਯਂ ਲਭਾਮਸੇ’’ਤਿ.

੪੩੧. ਥੇਰੋ ਕਰਣਂ [ਕਰਕਂ (ਸੀ. ਸ੍ਯਾ. ਪੀ.)] ਪੂਰੇਤ੍ਵਾ, ਸਙ੍ਘੇ ਚਾਤੁਦ੍ਦਿਸੇ ਅਦਾ;

ਦਤ੍ਵਾ ਅਨ੍ਵਾਦਿਸੀ ਥੇਰੋ, ਮਾਤੁ ਪਿਤੁ ਚ ਭਾਤੁਨੋ;

‘‘ਇਦਂ ਮੇ ਞਾਤੀਨਂ ਹੋਤੁ, ਸੁਖਿਤਾ ਹੋਨ੍ਤੁ ਞਾਤਯੋ’.

੪੩੨. ਸਮਨਨ੍ਤਰਾਨੁਦ੍ਦਿਟ੍ਠੇ, ਪਾਨੀਯਂ ਉਦਪਜ੍ਜਥ;

ਗਮ੍ਭੀਰਾ ਚਤੁਰਸ੍ਸਾ ਚ, ਪੋਕ੍ਖਰਞ੍ਞੋ ਸੁਨਿਮ੍ਮਿਤਾ.

੪੩੩. ਸੀਤੋਦਿਕਾ ਸੁਪ੍ਪਤਿਤ੍ਥਾ, ਸੀਤਾ ਅਪ੍ਪਟਿਗਨ੍ਧਿਯਾ;

ਪਦੁਮੁਪ੍ਪਲਸਞ੍ਛਨ੍ਨਾ, ਵਾਰਿਕਿਞ੍ਜਕ੍ਖਪੂਰਿਤਾ.

੪੩੪. ਤਤ੍ਥ ਨ੍ਹਤ੍ਵਾ ਪਿਵਿਤ੍ਵਾ ਚ, ਥੇਰਸ੍ਸ ਪਟਿਦਸ੍ਸਯੁਂ;

‘‘ਪਹੂਤਂ ਪਾਨੀਯਂ ਭਨ੍ਤੇ, ਪਾਦਾ ਦੁਕ੍ਖਾ ਫਲਨ੍ਤਿ ਨੋ’’.

੪੩੫. ‘‘ਆਹਿਣ੍ਡਮਾਨਾ ਖਞ੍ਜਾਮ, ਸਕ੍ਖਰੇ ਕੁਸਕਣ੍ਟਕੇ;

‘ਤਥਾ ਭਨ੍ਤੇ ਪਰਕ੍ਕਮ, ਯਥਾ ਯਾਨਂ ਲਭਾਮਸੇ’’’ਤਿ.

੪੩੬. ਥੇਰੋ ਸਿਪਾਟਿਕਂ ਲਦ੍ਧਾ, ਸਙ੍ਘੇ ਚਾਤੁਦ੍ਦਿਸੇ ਅਦਾ;

ਦਤ੍ਵਾ ਅਨ੍ਵਾਦਿਸੀ ਥੇਰੋ, ਮਾਤੁ ਪਿਤੁ ਚ ਭਾਤੁਨੋ;

‘‘ਇਦਂ ਮੇ ਞਾਤੀਨਂ ਹੋਤੁ, ਸੁਖਿਤਾ ਹੋਨ੍ਤੁ ਞਾਤਯੋ’’.

੪੩੭. ਸਮਨਨ੍ਤਰਾਨੁਦ੍ਦਿਟ੍ਠੇ, ਪੇਤਾ ਰਥੇਨ ਮਾਗਮੁਂ;

‘‘ਅਨੁਕਮ੍ਪਿਤਮ੍ਹ ਭਦਨ੍ਤੇ, ਭਤ੍ਤੇਨਚ੍ਛਾਦਨੇਨ ਚ.

੪੩੮. ‘‘ਘਰੇਨ ਪਾਨੀਯਦਾਨੇਨ, ਯਾਨਦਾਨੇਨ ਚੂਭਯਂ;

ਮੁਨਿਂ ਕਾਰੁਣਿਕਂ ਲੋਕੇ, ਭਨ੍ਤੇ ਵਨ੍ਦਿਤੁਮਾਗਤਾ’’ਤਿ.

ਸਾਣਵਾਸੀਥੇਰਪੇਤਵਤ੍ਥੁ ਦੁਤਿਯਂ.