੧੦. ਖਲ੍ਲਾਟਿਯਪੇਤਿਵਤ੍ਥੁ

੫੮. ‘‘ਕਾ ਨੁ ਅਨ੍ਤੋਵਿਮਾਨਸ੍ਮਿਂ, ਤਿਟ੍ਠਨ੍ਤੀ ਨੂਪਨਿਕ੍ਖਮਿ;

ਉਪਨਿਕ੍ਖਮਸ੍ਸੁ ਭਦ੍ਦੇ, ਪਸ੍ਸਾਮ ਤਂ ਬਹਿਟ੍ਠਿਤ’’ਨ੍ਤਿ.

੫੯. ‘‘ਅਟ੍ਟੀਯਾਮਿ ਹਰਾਯਾਮਿ, ਨਗ੍ਗਾ ਨਿਕ੍ਖਮਿਤੁਂ ਬਹਿ;

ਕੇਸੇਹਮ੍ਹਿ ਪਟਿਚ੍ਛਨ੍ਨਾ, ਪੁਞ੍ਞਂ ਮੇ ਅਪ੍ਪਕਂ ਕਤ’’ਨ੍ਤਿ.

੬੦. ‘‘ਹਨ੍ਦੁਤ੍ਤਰੀਯਂ ਦਦਾਮਿ ਤੇ, ਇਦਂ ਦੁਸ੍ਸਂ ਨਿਵਾਸਯ;

ਇਦਂ ਦੁਸ੍ਸਂ ਨਿਵਾਸੇਤ੍ਵਾ, ਏਹਿ ਨਿਕ੍ਖਮ ਸੋਭਨੇ;

ਉਪਨਿਕ੍ਖਮਸ੍ਸੁ ਭਦ੍ਦੇ, ਪਸ੍ਸਾਮ ਤਂ ਬਹਿਟ੍ਠਿਤ’’ਨ੍ਤਿ.

੬੧. ‘‘ਹਤ੍ਥੇਨ ਹਤ੍ਥੇ ਤੇ ਦਿਨ੍ਨਂ, ਨ ਮਯ੍ਹਂ ਉਪਕਪ੍ਪਤਿ;

ਏਸੇਤ੍ਥੁਪਾਸਕੋ ਸਦ੍ਧੋ, ਸਮ੍ਮਾਸਮ੍ਬੁਦ੍ਧਸਾਵਕੋ.

੬੨. ‘‘ਏਤਂ ਅਚ੍ਛਾਦਯਿਤ੍ਵਾਨ, ਮਮ ਦਕ੍ਖਿਣਮਾਦਿਸ;

ਤਥਾਹਂ [ਅਥਾਹਂ (ਸੀ.)] ਸੁਖਿਤਾ ਹੇਸ੍ਸਂ, ਸਬ੍ਬਕਾਮਸਮਿਦ੍ਧਿਨੀ’’ਤਿ.

੬੩. ਤਞ੍ਚ ਤੇ ਨ੍ਹਾਪਯਿਤ੍ਵਾਨ, ਵਿਲਿਮ੍ਪੇਤ੍ਵਾਨ ਵਾਣਿਜਾ;

ਵਤ੍ਥੇਹਚ੍ਛਾਦਯਿਤ੍ਵਾਨ, ਤਸ੍ਸਾ ਦਕ੍ਖਿਣਮਾਦਿਸੁਂ.

੬੪. ਸਮਨਨ੍ਤਰਾਨੁਦ੍ਦਿਟ੍ਠੇ [ਸਮਨਨ੍ਤਰਾ ਅਨੁਦ੍ਦਿਟ੍ਠੇ (ਸ੍ਯਾ. ਕ.)], ਵਿਪਾਕੋ ਉਦਪਜ੍ਜਥ [ਉਪਪਜ੍ਜਥ (ਸੀ. ਸ੍ਯਾ.)];

ਭੋਜਨਚ੍ਛਾਦਨਪਾਨੀਯਂ [ਭੋਜਨਚ੍ਛਾਦਨਂ ਪਾਨੀਯਂ (ਸ੍ਯਾ. ਕ.)], ਦਕ੍ਖਿਣਾਯ ਇਦਂ ਫਲਂ.

੬੫. ਤਤੋ ਸੁਦ੍ਧਾ ਸੁਚਿਵਸਨਾ, ਕਾਸਿਕੁਤ੍ਤਮਧਾਰਿਨੀ;

ਹਸਨ੍ਤੀ ਵਿਮਾਨਾ ਨਿਕ੍ਖਮਿ, ‘ਦਕ੍ਖਿਣਾਯ ਇਦਂ ਫਲ’’’ਨ੍ਤਿ.

੬੬. ‘‘ਸੁਚਿਤ੍ਤਰੂਪਂ ਰੁਚਿਰਂ, ਵਿਮਾਨਂ ਤੇ ਪਭਾਸਤਿ;

ਦੇਵਤੇ ਪੁਚ੍ਛਿਤਾਚਿਕ੍ਖ, ਕਿਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ.

੬੭. ‘‘ਭਿਕ੍ਖੁਨੋ ਚਰਮਾਨਸ੍ਸ, ਦੋਣਿਨਿਮ੍ਮਜ੍ਜਨਿਂ ਅਹਂ;

ਅਦਾਸਿਂ ਉਜੁਭੂਤਸ੍ਸ, ਵਿਪ੍ਪਸਨ੍ਨੇਨ ਚੇਤਸਾ.

੬੮. ‘‘ਤਸ੍ਸ ਕਮ੍ਮਸ੍ਸ ਕੁਸਲਸ੍ਸ, ਵਿਪਾਕਂ ਦੀਘਮਨ੍ਤਰਂ;

ਅਨੁਭੋਮਿ ਵਿਮਾਨਸ੍ਮਿਂ, ਤਞ੍ਚ ਦਾਨਿ ਪਰਿਤ੍ਤਕਂ.

੬੯. ‘‘ਉਦ੍ਧਂ ਚਤੂਹਿ ਮਾਸੇਹਿ, ਕਾਲਂਕਿਰਿਯਾ [ਕਾਲਂਕਿਰਿਯਾ (ਕ.)] ਭਵਿਸ੍ਸਤਿ;

ਏਕਨ੍ਤਕਟੁਕਂ ਘੋਰਂ, ਨਿਰਯਂ ਪਪਤਿਸ੍ਸਹਂ.

੭੦. [ਮ. ਨਿ. ੩.੨੫੦, ੨੬੭; ਅ. ਨਿ. ੩.੩੬; ਪੇ. ਵ. ੨੪੦, ੬੯੩] ‘‘ਚਤੁਕ੍ਕਣ੍ਣਂ ਚਤੁਦ੍ਵਾਰਂ, ਵਿਭਤ੍ਤਂ ਭਾਗਸੋ ਮਿਤਂ;

ਅਯੋਪਾਕਾਰਪਰਿਯਨ੍ਤਂ, ਅਯਸਾ ਪਟਿਕੁਜ੍ਜਿਤਂ.

੭੧. ‘‘ਤਸ੍ਸ ਅਯੋਮਯਾ ਭੂਮਿ, ਜਲਿਤਾ ਤੇਜਸਾ ਯੁਤਾ;

ਸਮਨ੍ਤਾ ਯੋਜਨਸਤਂ, ਫਰਿਤ੍ਵਾ ਤਿਟ੍ਠਤਿ ਸਬ੍ਬਦਾ.

੭੨. ‘‘ਤਤ੍ਥਾਹਂ ਦੀਘਮਦ੍ਧਾਨਂ, ਦੁਕ੍ਖਂ ਵੇਦਿਸ੍ਸ ਵੇਦਨਂ;

ਫਲਞ੍ਚ ਪਾਪਕਮ੍ਮਸ੍ਸ, ਤਸ੍ਮਾ ਸੋਚਾਮਹਂ ਭੁਸ’’ਨ੍ਤਿ.

ਖਲ੍ਲਾਟਿਯਪੇਤਿਵਤ੍ਥੁ ਦਸਮਂ.