੮. ਵਿਪਲ੍ਲਾਸਕਥਾ

੨੩੬. ਪੁਰਿਮਨਿਦਾਨਂ. ‘‘ਚਤ੍ਤਾਰੋਮੇ, ਭਿਕ੍ਖਵੇ [ਅ. ਨਿ. ੪.੪੯ ਪਸ੍ਸਿਤਬ੍ਬਾ], ਸਞ੍ਞਾਵਿਪਲ੍ਲਾਸਾ ਚਿਤ੍ਤਵਿਪਲ੍ਲਾਸਾ ਦਿਟ੍ਠਿਵਿਪਲ੍ਲਾਸਾ. ਕਤਮੇ ਚਤ੍ਤਾਰੋ? ਅਨਿਚ੍ਚੇ, ਭਿਕ੍ਖਵੇ, ਨਿਚ੍ਚਨ੍ਤਿ ਸਞ੍ਞਾਵਿਪਲ੍ਲਾਸੋ ਚਿਤ੍ਤਵਿਪਲ੍ਲਾਸੋ ਦਿਟ੍ਠਿਵਿਪਲ੍ਲਾਸੋ. ਦੁਕ੍ਖੇ, ਭਿਕ੍ਖਵੇ, ਸੁਖਨ੍ਤਿ ਸਞ੍ਞਾਵਿਪਲ੍ਲਾਸੋ ਚਿਤ੍ਤਵਿਪਲ੍ਲਾਸੋ ਦਿਟ੍ਠਿਵਿਪਲ੍ਲਾਸੋ. ਅਨਤ੍ਤਨਿ, ਭਿਕ੍ਖਵੇ, ਅਤ੍ਤਾਤਿ ਸਞ੍ਞਾਵਿਪਲ੍ਲਾਸੋ ਚਿਤ੍ਤਵਿਪਲ੍ਲਾਸੋ ਦਿਟ੍ਠਿਵਿਪਲ੍ਲਾਸੋ. ਅਸੁਭੇ, ਭਿਕ੍ਖਵੇ, ਸੁਭਨ੍ਤਿ ਸਞ੍ਞਾਵਿਪਲ੍ਲਾਸੋ ਚਿਤ੍ਤਵਿਪਲ੍ਲਾਸੋ ਦਿਟ੍ਠਿਵਿਪਲ੍ਲਾਸੋ. ਇਮੇ ਖੋ, ਭਿਕ੍ਖਵੇ, ਚਤ੍ਤਾਰੋ ਸਞ੍ਞਾਵਿਪਲ੍ਲਾਸਾ ਚਿਤ੍ਤਵਿਪਲ੍ਲਾਸਾ ਦਿਟ੍ਠਿਵਿਪਲ੍ਲਾਸਾ.

‘‘ਚਤ੍ਤਾਰੋਮੇ, ਭਿਕ੍ਖਵੇ, ਨਸਞ੍ਞਾਵਿਪਲ੍ਲਾਸਾ ਨਚਿਤ੍ਤਵਿਪਲ੍ਲਾਸਾ ਨਦਿਟ੍ਠਿਵਿਪਲ੍ਲਾਸਾ. ਕਤਮੇ ਚਤ੍ਤਾਰੋ? ਅਨਿਚ੍ਚੇ, ਭਿਕ੍ਖਵੇ, ਅਨਿਚ੍ਚਨ੍ਤਿ ਨਸਞ੍ਞਾਵਿਪਲ੍ਲਾਸੋ ਨਚਿਤ੍ਤਵਿਪਲ੍ਲਾਸੋ ਨਦਿਟ੍ਠਿਵਿਪਲ੍ਲਾਸੋ. ਦੁਕ੍ਖੇ, ਭਿਕ੍ਖਵੇ, ਦੁਕ੍ਖਨ੍ਤਿ ਨਸਞ੍ਞਾਵਿਪਲ੍ਲਾਸੋ ਨਚਿਤ੍ਤਵਿਪਲ੍ਲਾਸੋ ਨਦਿਟ੍ਠਿਵਿਪਲ੍ਲਾਸੋ. ਅਨਤ੍ਤਨਿ, ਭਿਕ੍ਖਵੇ, ਅਨਤ੍ਤਾਤਿ ਨਸਞ੍ਞਾਵਿਪਲ੍ਲਾਸੋ ਨਚਿਤ੍ਤਵਿਪਲ੍ਲਾਸੋ ਨਦਿਟ੍ਠਿਵਿਪਲ੍ਲਾਸੋ. ਅਸੁਭੇ, ਭਿਕ੍ਖਵੇ, ਅਸੁਭਨ੍ਤਿ ਨਸਞ੍ਞਾਵਿਪਲ੍ਲਾਸੋ ਨਚਿਤ੍ਤਵਿਪਲ੍ਲਾਸੋ ਨਦਿਟ੍ਠਿਵਿਪਲ੍ਲਾਸੋ. ਇਮੇ ਖੋ, ਭਿਕ੍ਖਵੇ, ਚਤ੍ਤਾਰੋ ਨਸਞ੍ਞਾਵਿਪਲ੍ਲਾਸਾ ਨਚਿਤ੍ਤਵਿਪਲ੍ਲਾਸਾ ਨਦਿਟ੍ਠਿਵਿਪਲ੍ਲਾਸਾ’’ਤਿ.

‘‘ਅਨਿਚ੍ਚੇ ਨਿਚ੍ਚਸਞ੍ਞਿਨੋ, ਦੁਕ੍ਖੇ ਚ ਸੁਖਸਞ੍ਞਿਨੋ;

ਅਨਤ੍ਤਨਿ ਚ ਅਤ੍ਤਾਤਿ [ਅਤ੍ਤਸਞ੍ਞਿਨੋ (ਸ੍ਯਾ.) ਅ. ਨਿ. ੪.੪੯ ਪਸ੍ਸਿਤਬ੍ਬਾ], ਅਸੁਭੇ ਸੁਭਸਞ੍ਞਿਨੋ;

ਮਿਚ੍ਛਾਦਿਟ੍ਠਿਹਤਾ ਸਤ੍ਤਾ, ਖਿਤ੍ਤਚਿਤ੍ਤਾ ਵਿਸਞ੍ਞਿਨੋ.

‘‘ਤੇ ਯੋਗਯੁਤ੍ਤਾ ਮਾਰਸ੍ਸ, ਅਯੋਗਕ੍ਖੇਮਿਨੋ ਜਨਾ;

ਸਤ੍ਤਾ ਗਚ੍ਛਨ੍ਤਿ ਸਂਸਾਰਂ, ਜਾਤਿਮਰਣਗਾਮਿਨੋ.

‘‘ਯਦਾ ਚ ਬੁਦ੍ਧਾ ਲੋਕਸ੍ਮਿਂ, ਉਪ੍ਪਜ੍ਜਨ੍ਤਿ ਪਭਙ੍ਕਰਾ;

ਤੇ ਇਮਂ ਧਮ੍ਮਂ ਪਕਾਸੇਨ੍ਤਿ, ਦੁਕ੍ਖੂਪਸਮਗਾਮਿਨਂ.

‘‘ਤੇਸਂ ਸੁਤ੍ਵਾਨ ਸਪ੍ਪਞ੍ਞਾ, ਸਚਿਤ੍ਤਂ ਪਚ੍ਚਲਦ੍ਧੁ [ਪਚ੍ਚਲਦ੍ਧੁਂ (ਸ੍ਯਾ.), ਪਚ੍ਚਲਦ੍ਧਾ ਅ. ਨਿ. ੪.੪੯] ਤੇ;

ਅਨਿਚ੍ਚਂ ਅਨਿਚ੍ਚਤੋ ਦਕ੍ਖੁਂ, ਦੁਕ੍ਖਮਦ੍ਦਕ੍ਖੁ ਦੁਕ੍ਖਤੋ.

‘‘ਅਨਤ੍ਤਨਿ ਅਨਤ੍ਤਾਤਿ, ਅਸੁਭਂ ਅਸੁਭਤਦ੍ਦਸੁਂ;

ਸਮ੍ਮਾਦਿਟ੍ਠਿਸਮਾਦਾਨਾ, ਸਬ੍ਬਂ ਦੁਕ੍ਖਂ ਉਪਚ੍ਚਗੁ’’ਨ੍ਤਿ.

ਇਮੇ ਚਤ੍ਤਾਰੋ ਵਿਪਲ੍ਲਾਸਾ ਦਿਟ੍ਠਿਸਮ੍ਪਨ੍ਨਸ੍ਸ ਪੁਗ੍ਗਲਸ੍ਸ ਪਹੀਨਾ, ਅਪ੍ਪਹੀਨਾਤਿ. ਕੇਚਿ ਪਹੀਨਾ, ਕੇਚਿ ਅਪ੍ਪਹੀਨਾ? ਅਨਿਚ੍ਚੇ ਨਿਚ੍ਚਨ੍ਤਿ ਸਞ੍ਞਾਵਿਪਲ੍ਲਾਸੋ ਚਿਤ੍ਤਵਿਪਲ੍ਲਾਸੋ ਦਿਟ੍ਠਿਵਿਪਲ੍ਲਾਸੋ ਪਹੀਨੋ. ਦੁਕ੍ਖੇ ਸੁਖਨ੍ਤਿ ਸਞ੍ਞਾ ਉਪ੍ਪਜ੍ਜਤਿ, ਚਿਤ੍ਤਂ ਉਪ੍ਪਜ੍ਜਤਿ, ਦਿਟ੍ਠਿਵਿਪਲ੍ਲਾਸੋ ਪਹੀਨੋ. ਅਨਤ੍ਤਨਿ ਅਤ੍ਤਾਤਿ ਸਞ੍ਞਾਵਿਪਲ੍ਲਾਸੋ ਚਿਤ੍ਤਵਿਪਲ੍ਲਾਸੋ ਦਿਟ੍ਠਿਵਿਪਲ੍ਲਾਸੋ ਪਹੀਨੋ. ਅਸੁਭੇ ਸੁਭਨ੍ਤਿ ਸਞ੍ਞਾ ਉਪ੍ਪਜ੍ਜਤਿ, ਚਿਤ੍ਤਂ ਉਪ੍ਪਜ੍ਜਤਿ, ਦਿਟ੍ਠਿਵਿਪਲ੍ਲਾਸੋ ਪਹੀਨੋ. ਦ੍ਵੀਸੁ ਵਤ੍ਥੂਸੁ ਛ ਵਿਪਲ੍ਲਾਸਾ ਪਹੀਨਾ. ਦ੍ਵੀਸੁ ਵਤ੍ਥੂਸੁ ਦ੍ਵੇ ਵਿਪਲ੍ਲਾਸਾ ਪਹੀਨਾ, ਚਤ੍ਤਾਰੋ ਵਿਪਲ੍ਲਾਸਾ ਅਪ੍ਪਹੀਨਾ. ਚਤੂਸੁ ਵਤ੍ਥੂਸੁ ਅਟ੍ਠ ਵਿਪਲ੍ਲਾਸਾ ਪਹੀਨਾ, ਚਤ੍ਤਾਰੋ ਵਿਪਲ੍ਲਾਸਾ ਅਪ੍ਪਹੀਨਾਤਿ.

ਵਿਪਲ੍ਲਾਸਕਥਾ ਨਿਟ੍ਠਿਤਾ.