੫੫. ਆਸਵਕ੍ਖਯਞਾਣਨਿਦ੍ਦੇਸੋ
੧੦੭. ਕਥਂ ਚਤੁਸਟ੍ਠਿਯਾ ਆਕਾਰੇਹਿ ਤਿਣ੍ਣਨ੍ਨਂ ਇਨ੍ਦ੍ਰਿਯਾਨਂ ਵਸਿਭਾਵਤਾ ਪਞ੍ਞਾ ਆਸਵਾਨਂ ਖਯੇ ਞਾਣਂ? ਕਤਮੇਸਂ ਤਿਣ੍ਣਨ੍ਨਂ ਇਨ੍ਦ੍ਰਿਯਾਨਂ? ਅਨਞ੍ਞਾਤਞ੍ਞਸ੍ਸਾਮੀਤਿਨ੍ਦ੍ਰਿਯਸ੍ਸ ਅਞ੍ਞਿਨ੍ਦ੍ਰਿਯਸ੍ਸ ਅਞ੍ਞਾਤਾਵਿਨ੍ਦ੍ਰਿਯਸ੍ਸ.
ਅਨਞ੍ਞਾਤਞ੍ਞਸ੍ਸਾਮੀਤਿਨ੍ਦ੍ਰਿਯਂ ਕਤਿ ਠਾਨਾਨਿ ਗਚ੍ਛਤਿ, ਅਞ੍ਞਿਨ੍ਦ੍ਰਿਯਂ ਕਤਿ ਠਾਨਾਨਿ ਗਚ੍ਛਤਿ, ਅਞ੍ਞਾਤਾਵਿਨ੍ਦ੍ਰਿਯਂ ਕਤਿ ਠਾਨਾਨਿ ਗਚ੍ਛਤਿ? ਅਨਞ੍ਞਾਤਞ੍ਞਸ੍ਸਾਮੀਤਿਨ੍ਦ੍ਰਿਯਂ ਏਕਂ ਠਾਨਂ ਗਚ੍ਛਤਿ – ਸੋਤਾਪਤ੍ਤਿਮਗ੍ਗਂ. ਅਞ੍ਞਿਨ੍ਦ੍ਰਿਯਂ ਛ ਠਾਨਾਨਿ ਗਚ੍ਛਤਿ – ਸੋਤਾਪਤ੍ਤਿਫਲਂ, ਸਕਦਾਗਾਮਿਮਗ੍ਗਂ, ਸਕਦਾਗਾਮਿਫਲਂ, ਅਨਾਗਾਮਿਮਗ੍ਗਂ, ਅਨਾਗਾਮਿਫਲਂ, ਅਰਹਤ੍ਤਮਗ੍ਗਂ. ਅਞ੍ਞਾਤਾਵਿਨ੍ਦ੍ਰਿਯਂ ਏਕਂ ਠਾਨਂ ਗਚ੍ਛਤਿ – ਅਰਹਤ੍ਤਫਲਂ.
ਸੋਤਾਪਤ੍ਤਿਮਗ੍ਗਕ੍ਖਣੇ ਅਨਞ੍ਞਾਤਞ੍ਞਸ੍ਸਾਮੀਤਿਨ੍ਦ੍ਰਿਯਸ੍ਸ ਸਦ੍ਧਿਨ੍ਦ੍ਰਿਯਂ ਅਧਿਮੋਕ੍ਖਪਰਿਵਾਰਂ ਹੋਤਿ, ਵੀਰਿਯਿਨ੍ਦ੍ਰਿਯਂ ਪਗ੍ਗਹਪਰਿਵਾਰਂ ਹੋਤਿ, ਸਤਿਨ੍ਦ੍ਰਿਯਂ ਉਪਟ੍ਠਾਨਪਰਿਵਾਰਂ ਹੋਤਿ, ਸਮਾਧਿਨ੍ਦ੍ਰਿਯਂ ਅਵਿਕ੍ਖੇਪਪਰਿਵਾਰਂ ਹੋਤਿ, ਪਞ੍ਞਿਨ੍ਦ੍ਰਿਯਂ ਦਸ੍ਸਨਪਰਿਵਾਰਂ ਹੋਤਿ, ਮਨਿਨ੍ਦ੍ਰਿਯਂ ਵਿਜਾਨਨਪਰਿਵਾਰਂ ਹੋਤਿ, ਸੋਮਨਸ੍ਸਿਨ੍ਦ੍ਰਿਯਂ ਅਭਿਸਨ੍ਦਨਪਰਿਵਾਰਂ ਹੋਤਿ, ਜੀਵਿਤਿਨ੍ਦ੍ਰਿਯਂ ਪਵਤ੍ਤਸਨ੍ਤਤਾਧਿਪਤੇਯ੍ਯਪਰਿਵਾਰਂ ਹੋਤਿ. ਸੋਤਾਪਤ੍ਤਿਮਗ੍ਗਕ੍ਖਣੇ ਜਾਤਾ ਧਮ੍ਮਾ ਠਪੇਤ੍ਵਾ ਚਿਤ੍ਤਸਮੁਟ੍ਠਾਨਂ ਰੂਪਂ ਸਬ੍ਬੇਵ ਕੁਸਲਾ ਹੋਨ੍ਤਿ, ਸਬ੍ਬੇਵ ਅਨਾਸਵਾ ਹੋਨ੍ਤਿ, ਸਬ੍ਬੇਵ ਨਿਯ੍ਯਾਨਿਕਾ ਹੋਨ੍ਤਿ, ਸਬ੍ਬੇਵ ਅਪਚਯਗਾਮਿਨੋ ਹੋਨ੍ਤਿ, ਸਬ੍ਬੇਵ ਲੋਕੁਤ੍ਤਰਾ ਹੋਨ੍ਤਿ, ਸਬ੍ਬੇਵ ਨਿਬ੍ਬਾਨਾਰਮ੍ਮਣਾ ਹੋਨ੍ਤਿ. ਸੋਤਾਪਤ੍ਤਿਮਗ੍ਗਕ੍ਖਣੇ ਅਨਞ੍ਞਾਤਞ੍ਞਸ੍ਸਾਮੀਤਿਨ੍ਦ੍ਰਿਯਸ੍ਸ ਇਮਾਨਿ ਅਟ੍ਠਿਨ੍ਦ੍ਰਿਯਾਨਿ ਸਹਜਾਤਪਰਿਵਾਰਾ ਹੋਨ੍ਤਿ, ਅਞ੍ਞਮਞ੍ਞਪਰਿਵਾਰਾ ਹੋਨ੍ਤਿ, ਨਿਸ੍ਸਯਪਰਿਵਾਰਾ ਹੋਨ੍ਤਿ, ਸਮ੍ਪਯੁਤ੍ਤਪਰਿਵਾਰਾ ਹੋਨ੍ਤਿ, ਸਹਗਤਾ ਹੋਨ੍ਤਿ, ਸਹਜਾਤਾ ਹੋਨ੍ਤਿ, ਸਂਸਟ੍ਠਾ ਹੋਨ੍ਤਿ, ਸਮ੍ਪਯੁਤ੍ਤਾ ਹੋਨ੍ਤਿ. ਤੇਵ ਤਸ੍ਸ ਆਕਾਰਾ ਚੇਵ ਹੋਨ੍ਤਿ ਪਰਿਵਾਰਾ ਚ.
ਸੋਤਾਪਤ੍ਤਿਫਲਕ੍ਖਣੇ ਅਞ੍ਞਿਨ੍ਦ੍ਰਿਯਸ੍ਸ ਸਦ੍ਧਿਨ੍ਦ੍ਰਿਯਂ ਅਧਿਮੋਕ੍ਖਪਰਿਵਾਰਂ ਹੋਤਿ, ਵੀਰਿਯਿਨ੍ਦ੍ਰਿਯਂ ਪਗ੍ਗਹਪਰਿਵਾਰਂ ਹੋਤਿ, ਸਤਿਨ੍ਦ੍ਰਿਯਂ ਉਪਟ੍ਠਾਨਪਰਿਵਾਰਂ ਹੋਤਿ, ਸਮਾਧਿਨ੍ਦ੍ਰਿਯਂ ਅਵਿਕ੍ਖੇਪਪਰਿਵਾਰਂ ਹੋਤਿ, ਪਞ੍ਞਿਨ੍ਦ੍ਰਿਯਂ ਦਸ੍ਸਨਪਰਿਵਾਰਂ ਹੋਤਿ, ਮਨਿਨ੍ਦ੍ਰਿਯਂ ਵਿਜਾਨਨਪਰਿਵਾਰਂ ਹੋਤਿ, ਸੋਮਨਸ੍ਸਿਨ੍ਦ੍ਰਿਯਂ ਅਭਿਸਨ੍ਦਨਪਰਿਵਾਰਂ ਹੋਤਿ, ਜੀਵਿਤਿਨ੍ਦ੍ਰਿਯਂ ਪਵਤ੍ਤਸਨ੍ਤਤਾਧਿਪਤੇਯ੍ਯਪਰਿਵਾਰਂ ਹੋਤਿ. ਸੋਤਾਪਤ੍ਤਿਫਲਕ੍ਖਣੇ ਜਾਤਾ ਧਮ੍ਮਾ ਸਬ੍ਬੇਵ ਅਬ੍ਯਾਕਤਾ ਹੋਨ੍ਤਿ, ਠਪੇਤ੍ਵਾ ਚਿਤ੍ਤਸਮੁਟ੍ਠਾਨਂ ਰੂਪਂ ਸਬ੍ਬੇਵ ਅਨਾਸਵਾ ਹੋਨ੍ਤਿ, ਸਬ੍ਬੇਵ ਲੋਕੁਤ੍ਤਰਾ ਹੋਨ੍ਤਿ, ਸਬ੍ਬੇਵ ਨਿਬ੍ਬਾਨਾਰਮ੍ਮਣਾ ਹੋਨ੍ਤਿ. ਸੋਤਾਪਤ੍ਤਿਫਲਕ੍ਖਣੇ ਅਞ੍ਞਿਨ੍ਦ੍ਰਿਯਸ੍ਸ ਇਮਾਨਿ ਅਟ੍ਠਿਨ੍ਦ੍ਰਿਯਾਨਿ ਸਹਜਾਤਪਰਿਵਾਰਾ ਹੋਨ੍ਤਿ, ਅਞ੍ਞਮਞ੍ਞਪਰਿਵਾਰਾ ਹੋਨ੍ਤਿ, ਨਿਸ੍ਸਯਪਰਿਵਾਰਾ ਹੋਨ੍ਤਿ, ਸਮ੍ਪਯੁਤ੍ਤਪਰਿਵਾਰਾ ਹੋਨ੍ਤਿ, ਸਹਗਤਾ ਹੋਨ੍ਤਿ, ਸਹਜਾਤਾ ਹੋਨ੍ਤਿ, ਸਂਸਟ੍ਠਾ ਹੋਨ੍ਤਿ, ਸਮ੍ਪਯੁਤ੍ਤਾ ਹੋਨ੍ਤਿ. ਤੇਵ ਤਸ੍ਸ ਆਕਾਰਾ ਚੇਵ ਹੋਨ੍ਤਿ ਪਰਿਵਾਰਾ ਚ.
ਸਕਦਾਗਾਮਿਮਗ੍ਗਕ੍ਖਣੇ …ਪੇ… ਸਕਦਾਗਾਮਿਫਲਕ੍ਖਣੇ…ਪੇ… ਅਨਾਗਾਮਿਮਗ੍ਗਕ੍ਖਣੇ…ਪੇ… ਅਨਾਗਾਮਿਫਲਕ੍ਖਣੇ…ਪੇ… ਅਰਹਤ੍ਤਮਗ੍ਗਕ੍ਖਣੇ ਅਞ੍ਞਿਨ੍ਦ੍ਰਿਯਸ੍ਸ ਸਦ੍ਧਿਨ੍ਦ੍ਰਿਯਂ ਅਧਿਮੋਕ੍ਖਪਰਿਵਾਰਂ ਹੋਤਿ…ਪੇ… ਜੀਵਿਤਿਨ੍ਦ੍ਰਿਯਂ ਪਵਤ੍ਤਸਨ੍ਤਤਾਧਿਪਤੇਯ੍ਯਪਰਿਵਾਰਂ ਹੋਤਿ. ਅਰਹਤ੍ਤਮਗ੍ਗਕ੍ਖਣੇ ਜਾਤਾ ਧਮ੍ਮਾ ਠਪੇਤ੍ਵਾ ਚਿਤ੍ਤਸਮੁਟ੍ਠਾਨਂ ਰੂਪਂ ਸਬ੍ਬੇਵ ਕੁਸਲਾ ਹੋਨ੍ਤਿ, ਸਬ੍ਬੇਵ ਅਨਾਸਵਾ ਹੋਨ੍ਤਿ, ਸਬ੍ਬੇਵ ਨਿਯ੍ਯਾਨਿਕਾ ਹੋਨ੍ਤਿ, ਸਬ੍ਬੇਵ ਅਪਚਯਗਾਮਿਨੋ ਹੋਨ੍ਤਿ, ਸਬ੍ਬੇਵ ਲੋਕੁਤ੍ਤਰਾ ਹੋਨ੍ਤਿ, ਸਬ੍ਬੇਵ ਨਿਬ੍ਬਾਨਾਰਮ੍ਮਣਾ ਹੋਨ੍ਤਿ. ਅਰਹਤ੍ਤਮਗ੍ਗਕ੍ਖਣੇ ਅਞ੍ਞਿਨ੍ਦ੍ਰਿਯਸ੍ਸ ਇਮਾਨਿ ਅਟ੍ਠਿਨ੍ਦ੍ਰਿਯਾਨਿ ਸਹਜਾਤਪਰਿਵਾਰਾ ਹੋਨ੍ਤਿ, ਅਞ੍ਞਮਞ੍ਞਪਰਿਵਾਰਾ ਹੋਨ੍ਤਿ, ਨਿਸ੍ਸਯਪਰਿਵਾਰਾ ਹੋਨ੍ਤਿ, ਸਮ੍ਪਯੁਤ੍ਤਪਰਿਵਾਰਾ ਹੋਨ੍ਤਿ, ਸਹਗਤਾ ਹੋਨ੍ਤਿ, ਸਹਜਾਤਾ ਹੋਨ੍ਤਿ, ਸਂਸਟ੍ਠਾ ਹੋਨ੍ਤਿ, ਸਮ੍ਪਯੁਤ੍ਤਾ ਹੋਨ੍ਤਿ. ਤੇਵ ਤਸ੍ਸ ਆਕਾਰਾ ਚੇਵ ਹੋਨ੍ਤਿ ਪਰਿਵਾਰਾ ਚ.
ਅਰਹਤ੍ਤਫਲਕ੍ਖਣੇ ਅਞ੍ਞਾਤਾਵਿਨ੍ਦ੍ਰਿਯਸ੍ਸ ਸਦ੍ਧਿਨ੍ਦ੍ਰਿਯਂ ਅਧਿਮੋਕ੍ਖਪਰਿਵਾਰਂ ਹੋਤਿ, ਵੀਰਿਯਿਨ੍ਦ੍ਰਿਯਂ ਪਗ੍ਗਹਪਰਿਵਾਰਂ ਹੋਤਿ, ਸਤਿਨ੍ਦ੍ਰਿਯਂ ਉਪਟ੍ਠਾਨਪਰਿਵਾਰਂ ਹੋਤਿ, ਸਮਾਧਿਨ੍ਦ੍ਰਿਯਂ ਅਵਿਕ੍ਖੇਪਪਰਿਵਾਰਂ ਹੋਤਿ, ਪਞ੍ਞਿਨ੍ਦ੍ਰਿਯਂ ਦਸ੍ਸਨਪਰਿਵਾਰਂ ਹੋਤਿ, ਮਨਿਨ੍ਦ੍ਰਿਯਂ ਵਿਜਾਨਨਪਰਿਵਾਰਂ ਹੋਤਿ, ਸੋਮਨਸ੍ਸਿਨ੍ਦ੍ਰਿਯਂ ਅਭਿਸਨ੍ਦਨਪਰਿਵਾਰਂ ਹੋਤਿ, ਜੀਵਿਤਿਨ੍ਦ੍ਰਿਯਂ ਪਵਤ੍ਤਸਨ੍ਤਤਾਧਿਪਤੇਯ੍ਯਪਰਿਵਾਰਂ ਹੋਤਿ. ਅਰਹਤ੍ਤਫਲਕ੍ਖਣੇ ਜਾਤਾ ਧਮ੍ਮਾ ਸਬ੍ਬੇਵ ਅਬ੍ਯਾਕਤਾ ਹੋਨ੍ਤਿ, ਠਪੇਤ੍ਵਾ ਚਿਤ੍ਤਸਮੁਟ੍ਠਾਨਂ ਰੂਪਂ ਸਬ੍ਬੇਵ ਅਨਾਸਵਾ ਹੋਨ੍ਤਿ, ਸਬ੍ਬੇਵ ਲੋਕੁਤ੍ਤਰਾ ਹੋਨ੍ਤਿ, ਸਬ੍ਬੇਵ ਨਿਬ੍ਬਾਨਾਰਮ੍ਮਣਾ ਹੋਨ੍ਤਿ. ਅਰਹਤ੍ਤਫਲਕ੍ਖਣੇ ਅਞ੍ਞਾਤਾਵਿਨ੍ਦ੍ਰਿਯਸ੍ਸ ਇਮਾਨਿ ਅਟ੍ਠਿਨ੍ਦ੍ਰਿਯਾਨਿ ਸਹਜਾਤਪਰਿਵਾਰਾ ਹੋਨ੍ਤਿ, ਅਞ੍ਞਮਞ੍ਞਪਰਿਵਾਰਾ ਹੋਨ੍ਤਿ, ਨਿਸ੍ਸਯਪਰਿਵਾਰਾ ਹੋਨ੍ਤਿ, ਸਮ੍ਪਯੁਤ੍ਤਪਰਿਵਾਰਾ ਹੋਨ੍ਤਿ, ਸਹਗਤਾ ਹੋਨ੍ਤਿ, ਸਹਜਾਤਾ ਹੋਨ੍ਤਿ, ਸਂਸਟ੍ਠਾ ਹੋਨ੍ਤਿ, ਸਮ੍ਪਯੁਤ੍ਤਾ ਹੋਨ੍ਤਿ. ਤੇਵ ਤਸ੍ਸ ਆਕਾਰਾ ਚੇਵ ਹੋਨ੍ਤਿ ਪਰਿਵਾਰਾ ਚ. ਇਤਿ ਇਮਾਨਿ ਅਟ੍ਠਟ੍ਠਕਾਨਿ ਚਤੁਸਟ੍ਠਿ ਹੋਨ੍ਤਿ.
ਆਸਵਾਤਿ ਕਤਮੇ ਤੇ ਆਸਵਾ? ਕਾਮਾਸਵੋ, ਭਵਾਸਵੋ, ਦਿਟ੍ਠਾਸਵੋ, ਅਵਿਜ੍ਜਾਸਵੋ. ਕਤ੍ਥੇਤੇ ਆਸਵਾ ਖੀਯਨ੍ਤਿ? ਸੋਤਾਪਤ੍ਤਿਮਗ੍ਗੇਨ ਅਨਵਸੇਸੋ ਦਿਟ੍ਠਾਸਵੋ ਖੀਯਤਿ, ਅਪਾਯਗਮਨੀਯੋ ਕਾਮਾਸਵੋ ਖੀਯਤਿ, ਅਪਾਯਗਮਨੀਯੋ ਭਵਾਸਵੋ ਖੀਯਤਿ, ਅਪਾਯਗਮਨੀਯੋ ਅਵਿਜ੍ਜਾਸਵੋ ਖੀਯਤਿ. ਏਤ੍ਥੇਤੇ ਆਸਵਾ ਖੀਯਨ੍ਤਿ. ਸਕਦਾਗਾਮਿਮਗ੍ਗੇਨ ਓਲ਼ਾਰਿਕੋ ਕਾਮਾਸਵੋ ਖੀਯਤਿ, ਤਦੇਕਟ੍ਠੋ ਭਵਾਸਵੋ ਖੀਯਤਿ, ਤਦੇਕਟ੍ਠੋ ਅਵਿਜ੍ਜਾਸਵੋ ਖੀਯਤਿ. ਏਤ੍ਥੇਤੇ ਆਸਵਾ ਖੀਯਨ੍ਤਿ. ਅਨਾਗਾਮਿਮਗ੍ਗੇਨ ਅਨਵਸੇਸੋ ਕਾਮਾਸਵੋ ਖੀਯਤਿ, ਤਦੇਕਟ੍ਠੋ ਭਵਾਸਵੋ ਖੀਯਤਿ, ਤਦੇਕਟ੍ਠੋ ਅਵਿਜ੍ਜਾਸਵੋ ਖੀਯਤਿ. ਏਤ੍ਥੇਤੇ ਆਸਵਾ ਖੀਯਨ੍ਤਿ. ਅਰਹਤ੍ਤਮਗ੍ਗੇਨ ਅਨਵਸੇਸੋ ਭਵਾਸਵੋ ਖੀਯਤਿ, ਅਨਵਸੇਸੋ ਅਵਿਜ੍ਜਾਸਵੋ ਖੀਯਤਿ. ਏਤ੍ਥੇਤੇ ਆਸਵਾ ਖੀਯਨ੍ਤਿ. ਤਂ ਞਾਤਟ੍ਠੇਨ ਞਾਣਂ, ਪਜਾਨਨਟ੍ਠੇਨ ਪਞ੍ਞਾ. ਤੇਨ ਵੁਚ੍ਚਤਿ – ‘‘ਚਤੁਸਟ੍ਠਿਯਾ ਆਕਾਰੇਹਿ ਤਿਣ੍ਣਨ੍ਨਂ ਇਨ੍ਦ੍ਰਿਯਾਨਂ ਵਸਿਭਾਵਤਾ ਪਞ੍ਞਾ ਆਸਵਾਨਂ ਖਯੇ ਞਾਣਂ’’.
ਆਸਵਕ੍ਖਯਞਾਣਨਿਦ੍ਦੇਸੋ ਪਞ੍ਚਪਞ੍ਞਾਸਮੋ.