੫੧. ਸੋਤਧਾਤੁਵਿਸੁਦ੍ਧਿਞਾਣਨਿਦ੍ਦੇਸੋ

੧੦੩. ਕਥਂ ਵਿਤਕ੍ਕਵਿਪ੍ਫਾਰਵਸੇਨ ਨਾਨਤ੍ਤੇਕਤ੍ਤਸਦ੍ਦਨਿਮਿਤ੍ਤਾਨਂ ਪਰਿਯੋਗਾਹਣੇ ਪਞ੍ਞਾ ਸੋਤਧਾਤੁਵਿਸੁਦ੍ਧਿਞਾਣਂ? ਇਧ ਭਿਕ੍ਖੁ ਛਨ੍ਦਸਮਾਧਿ…ਪੇ… ਵੀਰਿਯਸਮਾਧਿ… ਚਿਤ੍ਤਸਮਾਧਿ… ਵੀਮਂਸਾਸਮਾਧਿਪਧਾਨਸਙ੍ਖਾਰਸਮਨ੍ਨਾਗਤਂ ਇਦ੍ਧਿਪਾਦਂ ਭਾਵੇਤਿ. ਸੋ ਇਮੇਸੁ ਚਤੂਸੁ ਇਦ੍ਧਿਪਾਦੇਸੁ ਚਿਤ੍ਤਂ ਪਰਿਭਾਵੇਤਿ ਪਰਿਦਮੇਤਿ, ਮੁਦੁਂ ਕਰੋਤਿ ਕਮ੍ਮਨਿਯਂ. ਸੋ ਇਮੇਸੁ ਚਤੂਸੁ ਇਦ੍ਧਿਪਾਦੇਸੁ ਚਿਤ੍ਤਂ ਪਰਿਭਾਵੇਤ੍ਵਾ ਪਰਿਦਮੇਤ੍ਵਾ, ਮੁਦੁਂ ਕਰਿਤ੍ਵਾ ਕਮ੍ਮਨਿਯਂ ਦੂਰੇਪਿ ਸਦ੍ਦਾਨਂ ਸਦ੍ਦਨਿਮਿਤ੍ਤਂ ਮਨਸਿ ਕਰੋਤਿ, ਸਨ੍ਤਿਕੇਪਿ ਸਦ੍ਦਾਨਂ ਸਦ੍ਦਨਿਮਿਤ੍ਤਂ ਮਨਸਿ ਕਰੋਤਿ, ਓਲ਼ਾਰਿਕਾਨਮ੍ਪਿ ਸਦ੍ਦਾਨਂ ਸਦ੍ਦਨਿਮਿਤ੍ਤਂ ਮਨਸਿ ਕਰੋਤਿ, ਸੁਖੁਮਾਨਮ੍ਪਿ ਸਦ੍ਦਾਨਂ ਸਦ੍ਦਨਿਮਿਤ੍ਤਂ ਮਨਸਿ ਕਰੋਤਿ, ਸਣ੍ਹਸਣ੍ਹਾਨਮ੍ਪਿ ਸਦ੍ਦਾਨਂ ਸਦ੍ਦਨਿਮਿਤ੍ਤਂ ਮਨਸਿ ਕਰੋਤਿ, ਪੁਰਤ੍ਥਿਮਾਯਪਿ ਦਿਸਾਯ ਸਦ੍ਦਾਨਂ ਸਦ੍ਦਨਿਮਿਤ੍ਤਂ ਮਨਸਿ ਕਰੋਤਿ, ਪਚ੍ਛਿਮਾਯਪਿ ਦਿਸਾਯ ਸਦ੍ਦਾਨਂ ਸਦ੍ਦਨਿਮਿਤ੍ਤਂ ਮਨਸਿ ਕਰੋਤਿ, ਉਤ੍ਤਰਾਯਪਿ ਦਿਸਾਯ ਸਦ੍ਦਾਨਂ ਸਦ੍ਦਨਿਮਿਤ੍ਤਂ ਮਨਸਿ ਕਰੋਤਿ, ਦਕ੍ਖਿਣਾਯਪਿ ਦਿਸਾਯ ਸਦ੍ਦਾਨਂ ਸਦ੍ਦਨਿਮਿਤ੍ਤਂ ਮਨਸਿ ਕਰੋਤਿ, ਪੁਰਤ੍ਥਿਮਾਯਪਿ ਅਨੁਦਿਸਾਯ ਸਦ੍ਦਾਨਂ ਸਦ੍ਦਨਿਮਿਤ੍ਤਂ ਮਨਸਿ ਕਰੋਤਿ, ਪਚ੍ਛਿਮਾਯਪਿ ਅਨੁਦਿਸਾਯ ਸਦ੍ਦਾਨਂ ਸਦ੍ਦਨਿਮਿਤ੍ਤਂ ਮਨਸਿ ਕਰੋਤਿ, ਉਤ੍ਤਰਾਯਪਿ ਅਨੁਦਿਸਾਯ ਸਦ੍ਦਾਨਂ ਸਦ੍ਦਨਿਮਿਤ੍ਤਂ ਮਨਸਿ ਕਰੋਤਿ, ਦਕ੍ਖਿਣਾਯਪਿ ਅਨੁਦਿਸਾਯ ਸਦ੍ਦਾਨਂ ਸਦ੍ਦਨਿਮਿਤ੍ਤਂ ਮਨਸਿ ਕਰੋਤਿ, ਹੇਟ੍ਠਿਮਾਯਪਿ ਦਿਸਾਯ ਸਦ੍ਦਾਨਂ ਸਦ੍ਦਨਿਮਿਤ੍ਤਂ ਮਨਸਿ ਕਰੋਤਿ, ਉਪਰਿਮਾਯਪਿ ਦਿਸਾਯ ਸਦ੍ਦਾਨਂ ਸਦ੍ਦਨਿਮਿਤ੍ਤਂ ਮਨਸਿ ਕਰੋਤਿ. ਸੋ ਤਥਾਭਾਵਿਤੇਨ ਚਿਤ੍ਤੇਨ ਪਰਿਸੁਦ੍ਧੇਨ ਪਰਿਯੋਦਾਤੇਨ ਸੋਤਧਾਤੁਵਿਸੁਦ੍ਧਿਞਾਣਾਯ ਚਿਤ੍ਤਂ ਅਭਿਨੀਹਰਤਿ ਅਭਿਨਿਨ੍ਨਾਮੇਤਿ. ਸੋ ਦਿਬ੍ਬਾਯ ਸੋਤਧਾਤੁਯਾ ਵਿਸੁਦ੍ਧਾਯ ਅਤਿਕ੍ਕਨ੍ਤਮਾਨੁਸਿਕਾਯ ਉਭੋ ਸਦ੍ਦੇ ਸੁਣਾਤਿ – ਦਿਬ੍ਬੇ ਚ ਮਾਨੁਸੇ ਚ ਯੇ ਦੂਰੇ ਸਨ੍ਤਿਕੇ ਚ. ਤਂ ਞਾਤਟ੍ਠੇਨ ਞਾਣਂ, ਪਜਾਨਨਟ੍ਠੇਨ ਪਞ੍ਞਾ. ਤੇਨ ਵੁਚ੍ਚਤਿ – ‘‘ਵਿਤਕ੍ਕਵਿਪ੍ਫਾਰਵਸੇਨ ਨਾਨਤ੍ਤੇਕਤ੍ਤਸਦ੍ਦਨਿਮਿਤ੍ਤਾਨਂ ਪਰਿਯੋਗਾਹਣੇ ਪਞ੍ਞਾ ਸੋਤਧਾਤੁਵਿਸੁਦ੍ਧਿਞਾਣਂ’’.

ਸੋਤਧਾਤੁਵਿਸੁਦ੍ਧਿਞਾਣਨਿਦ੍ਦੇਸੋ ਏਕਪਞ੍ਞਾਸਮੋ.