੩੫. ਪਰਿਨਿਬ੍ਬਾਨਞਾਣਨਿਦ੍ਦੇਸੋ

੮੬. ਕਥਂ ਸਮ੍ਪਜਾਨਸ੍ਸ ਪਵਤ੍ਤਪਰਿਯਾਦਾਨੇ ਪਞ੍ਞਾ ਪਰਿਨਿਬ੍ਬਾਨੇ ਞਾਣਂ? ਇਧ ਸਮ੍ਪਜਾਨੋ ਨੇਕ੍ਖਮ੍ਮੇਨ ਕਾਮਚ੍ਛਨ੍ਦਸ੍ਸ ਪਵਤ੍ਤਂ ਪਰਿਯਾਦਿਯਤਿ, ਅਬ੍ਯਾਪਾਦੇਨ ਬ੍ਯਾਪਾਦਸ੍ਸ ਪਵਤ੍ਤਂ ਪਰਿਯਾਦਿਯਤਿ, ਆਲੋਕਸਞ੍ਞਾਯ ਥਿਨਮਿਦ੍ਧਸ੍ਸ ਪਵਤ੍ਤਂ ਪਰਿਯਾਦਿਯਤਿ, ਅਵਿਕ੍ਖੇਪੇਨ ਉਦ੍ਧਚ੍ਚਸ੍ਸ ਪਵਤ੍ਤਂ ਪਰਿਯਾਦਿਯਤਿ, ਧਮ੍ਮਵਵਤ੍ਥਾਨੇਨ ਵਿਚਿਕਿਚ੍ਛਾਯ…ਪੇ… ਞਾਣੇਨ ਅਵਿਜ੍ਜਾਯ… ਪਾਮੋਜ੍ਜੇਨ ਅਰਤਿਯਾ … ਪਠਮੇਨ ਝਾਨੇਨ ਨੀਵਰਣਾਨਂ ਪਵਤ੍ਤਂ ਪਰਿਯਾਦਿਯਤਿ…ਪੇ… ਅਰਹਤ੍ਤਮਗ੍ਗੇਨ ਸਬ੍ਬਕਿਲੇਸਾਨਂ ਪਵਤ੍ਤਂ ਪਰਿਯਾਦਿਯਤਿ.

ਅਥ ਵਾ ਪਨ ਸਮ੍ਪਜਾਨਸ੍ਸ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬਾਯਨ੍ਤਸ੍ਸ ਇਦਞ੍ਚੇਵ ਚਕ੍ਖੁਪਵਤ੍ਤਂ ਪਰਿਯਾਦਿਯਤਿ, ਅਞ੍ਞਞ੍ਚ ਚਕ੍ਖੁਪਵਤ੍ਤਂ ਨ ਉਪ੍ਪਜ੍ਜਤਿ. ਇਦਞ੍ਚੇਵ ਸੋਤਪਵਤ੍ਤਂ…ਪੇ… ਘਾਨਪਵਤ੍ਤਂ… ਜਿਵ੍ਹਾਪਵਤ੍ਤਂ… ਕਾਯਪਵਤ੍ਤਂ… ਮਨੋਪਵਤ੍ਤਂ ਪਰਿਯਾਦਿਯਤਿ, ਅਞ੍ਞਞ੍ਚ ਮਨੋਪਵਤ੍ਤਂ ਨ ਉਪ੍ਪਜ੍ਜਤਿ. ਇਦਂ ਸਮ੍ਪਜਾਨਸ੍ਸ ਪਵਤ੍ਤਪਰਿਯਾਦਾਨੇ ਪਞ੍ਞਾ ਪਰਿਨਿਬ੍ਬਾਨੇ ਞਾਣਂ. ਤਂ ਞਾਤਟ੍ਠੇਨ ਞਾਣਂ, ਪਜਾਨਨਟ੍ਠੇਨ ਪਞ੍ਞਾ. ਤੇਨ ਵੁਚ੍ਚਤਿ – ‘‘ਸਮ੍ਪਜਾਨਸ੍ਸ ਪਵਤ੍ਤਪਰਿਯਾਦਾਨੇ ਪਞ੍ਞਾ ਪਰਿਨਿਬ੍ਬਾਨੇ ਞਾਣਂ’’.

ਪਰਿਨਿਬ੍ਬਾਨਞਾਣਨਿਦ੍ਦੇਸੋ ਪਞ੍ਚਤਿਂਸਤਿਮੋ.