੩੩. ਅਰਣਵਿਹਾਰਞਾਣਨਿਦ੍ਦੇਸੋ

੮੨. ਕਥਂ ਦਸ੍ਸਨਾਧਿਪਤੇਯ੍ਯਂ ਸਨ੍ਤੋ ਚ ਵਿਹਾਰਾਧਿਗਮੋ ਪਣੀਤਾਧਿਮੁਤ੍ਤਤਾ ਪਞ੍ਞਾ ਅਰਣਵਿਹਾਰੇ ਞਾਣਂ? ਦਸ੍ਸਨਾਧਿਪਤੇਯ੍ਯਨ੍ਤਿ ਅਨਿਚ੍ਚਾਨੁਪਸ੍ਸਨਾ ਦਸ੍ਸਨਾਧਿਪਤੇਯ੍ਯਂ, ਦੁਕ੍ਖਾਨੁਪਸ੍ਸਨਾ ਦਸ੍ਸਨਾਧਿਪਤੇਯ੍ਯਂ, ਅਨਤ੍ਤਾਨੁਪਸ੍ਸਨਾ ਦਸ੍ਸਨਾਧਿਪਤੇਯ੍ਯਂ, ਰੂਪੇ ਅਨਿਚ੍ਚਾਨੁਪਸ੍ਸਨਾ ਦਸ੍ਸਨਾਧਿਪਤੇਯ੍ਯਂ, ਰੂਪੇ ਦੁਕ੍ਖਾਨੁਪਸ੍ਸਨਾ ਦਸ੍ਸਨਾਧਿਪਤੇਯ੍ਯਂ, ਰੂਪੇ ਅਨਤ੍ਤਾਨੁਪਸ੍ਸਨਾ ਦਸ੍ਸਨਾਧਿਪਤੇਯ੍ਯਂ; ਵੇਦਨਾਯ…ਪੇ… ਸਞ੍ਞਾਯ… ਸਙ੍ਖਾਰੇਸੁ… ਵਿਞ੍ਞਾਣੇ… ਚਕ੍ਖੁਸ੍ਮਿਂ…ਪੇ… ਜਰਾਮਰਣੇ ਅਨਿਚ੍ਚਾਨੁਪਸ੍ਸਨਾ ਦਸ੍ਸਨਾਧਿਪਤੇਯ੍ਯਂ, ਜਰਾਮਰਣੇ ਦੁਕ੍ਖਾਨੁਪਸ੍ਸਨਾ ਦਸ੍ਸਨਾਧਿਪਤੇਯ੍ਯਂ, ਜਰਾਮਰਣੇ ਅਨਤ੍ਤਾਨੁਪਸ੍ਸਨਾ ਦਸ੍ਸਨਾਧਿਪਤੇਯ੍ਯਂ.

ਸਨ੍ਤੋ ਚ ਵਿਹਾਰਾਧਿਗਮੋਤਿ ਸੁਞ੍ਞਤੋ ਵਿਹਾਰੋ ਸਨ੍ਤੋ ਵਿਹਾਰਾਧਿਗਮੋ. ਅਨਿਮਿਤ੍ਤੋ ਵਿਹਾਰੋ ਸਨ੍ਤੋ ਵਿਹਾਰਾਧਿਗਮੋ. ਅਪ੍ਪਣਿਹਿਤੋ ਵਿਹਾਰੋ ਸਨ੍ਤੋ ਵਿਹਾਰਾਧਿਗਮੋ.

ਪਣੀਤਾਧਿਮੁਤ੍ਤਤਾਤਿ ਸੁਞ੍ਞਤੇ ਅਧਿਮੁਤ੍ਤਤਾ ਪਣੀਤਾਧਿਮੁਤ੍ਤਤਾ. ਅਨਿਮਿਤ੍ਤੇ ਅਧਿਮੁਤ੍ਤਤਾ ਪਣੀਤਾਧਿਮੁਤ੍ਤਤਾ. ਅਪ੍ਪਣਿਹਿਤੇ ਅਧਿਮੁਤ੍ਤਤਾ ਪਣੀਤਾਧਿਮੁਤ੍ਤਤਾ.

ਅਰਣਵਿਹਾਰੋਤਿ ਪਠਮਂ ਝਾਨਂ ਅਰਣਵਿਹਾਰੋ. ਦੁਤਿਯਂ ਝਾਨਂ ਅਰਣਵਿਹਾਰੋ. ਤਤਿਯਂ ਝਾਨਂ ਅਰਣਵਿਹਾਰੋ. ਚਤੁਤ੍ਥਂ ਝਾਨਂ ਅਰਣਵਿਹਾਰੋ. ਆਕਾਸਾਨਞ੍ਚਾਯਤਨਸਮਾਪਤ੍ਤਿ ਅਰਣਵਿਹਾਰੋ…ਪੇ… ਨੇਵਸਞ੍ਞਾਨਾਸਞ੍ਞਾਯਤਨਸਮਾਪਤ੍ਤਿ ਅਰਣਵਿਹਾਰੋ.

ਅਰਣਵਿਹਾਰੋਤਿ ਕੇਨਟ੍ਠੇਨ ਅਰਣਵਿਹਾਰੋ? ਪਠਮੇਨ ਝਾਨੇਨ ਨੀਵਰਣੇ ਹਰਤੀਤਿ – ਅਰਣਵਿਹਾਰੋ. ਦੁਤਿਯੇਨ ਝਾਨੇਨ ਵਿਤਕ੍ਕਵਿਚਾਰੇ ਹਰਤੀਤਿ – ਅਰਣਵਿਹਾਰੋ. ਤਤਿਯੇਨ ਝਾਨੇਨ ਪੀਤਿਂ ਹਰਤੀਤਿ – ਅਰਣਵਿਹਾਰੋ. ਚਤੁਤ੍ਥੇਨ ਝਾਨੇਨ ਸੁਖਦੁਕ੍ਖੇ ਹਰਤੀਤਿ – ਅਰਣਵਿਹਾਰੋ. ਆਕਾਸਾਨਞ੍ਚਾਯਤਨਸਮਾਪਤ੍ਤਿਯਾ ਰੂਪਸਞ੍ਞਂ ਪਟਿਘਸਞ੍ਞਂ ਨਾਨਤ੍ਤਸਞ੍ਞਂ ਹਰਤੀਤਿ – ਅਰਣਵਿਹਾਰੋ. ਵਿਞ੍ਞਾਣਞ੍ਚਾਯਤਨਸਮਾਪਤ੍ਤਿਯਾ ਆਕਾਸਾਨਞ੍ਚਾਯਤਨਸਞ੍ਞਂ ਹਰਤੀਤਿ – ਅਰਣਵਿਹਾਰੋ. ਆਕਿਞ੍ਚਞ੍ਞਾਯਤਨਸਮਾਪਤ੍ਤਿਯਾ ਵਿਞ੍ਞਾਣਞ੍ਚਾਯਤਨਸਞ੍ਞਂ ਹਰਤੀਤਿ – ਅਰਣਵਿਹਾਰੋ. ਨੇਵਸਞ੍ਞਾਨਾਸਞ੍ਞਾਯਤਨਸਮਾਪਤ੍ਤਿਯਾ ਆਕਿਞ੍ਚਞ੍ਞਾਯਤਨਸਞ੍ਞਂ ਹਰਤੀਤਿ – ਅਰਣਵਿਹਾਰੋ. ਅਯਂ ਅਰਣਵਿਹਾਰੋ. ਤਂ ਞਾਤਟ੍ਠੇਨ ਞਾਣਂ, ਪਜਾਨਨਟ੍ਠੇਨ ਪਞ੍ਞਾ. ਤੇਨ ਵੁਚ੍ਚਤਿ – ‘‘ਦਸ੍ਸਨਾਧਿਪਤੇਯ੍ਯਂ ਸਨ੍ਤੋ ਚ ਵਿਹਾਰਾਧਿਗਮੋ ਪਣੀਤਾਧਿਮੁਤ੍ਤਤਾ ਪਞ੍ਞਾ ਅਰਣਵਿਹਾਰੇ ਞਾਣਂ’’.

ਅਰਣਵਿਹਾਰਞਾਣਨਿਦ੍ਦੇਸੋ ਤੇਤ੍ਤਿਂਸਤਿਮੋ.