੨੫-੨੮. ਪਟਿਸਮ੍ਭਿਦਾਞਾਣਨਿਦ੍ਦੇਸੋ

੭੬. ਕਥਂ ਅਤ੍ਥਨਾਨਤ੍ਤੇ ਪਞ੍ਞਾ ਅਤ੍ਥਪਟਿਸਮ੍ਭਿਦੇ ਞਾਣਂ, ਧਮ੍ਮਨਾਨਤ੍ਤੇ ਪਞ੍ਞਾ ਧਮ੍ਮਪਟਿਸਮ੍ਭਿਦੇ ਞਾਣਂ, ਨਿਰੁਤ੍ਤਿਨਾਨਤ੍ਤੇ ਪਞ੍ਞਾ ਨਿਰੁਤ੍ਤਿਪਟਿਸਮ੍ਭਿਦੇ ਞਾਣਂ, ਪਟਿਭਾਨਨਾਨਤ੍ਤੇ ਪਞ੍ਞਾ ਪਟਿਭਾਨਪਟਿਸਮ੍ਭਿਦੇ ਞਾਣਂ? ਸਦ੍ਧਿਨ੍ਦ੍ਰਿਯਂ ਧਮ੍ਮੋ, ਵੀਰਿਯਿਨ੍ਦ੍ਰਿਯਂ ਧਮ੍ਮੋ, ਸਤਿਨ੍ਦ੍ਰਿਯਂ ਧਮ੍ਮੋ, ਸਮਾਧਿਨ੍ਦ੍ਰਿਯਂ ਧਮ੍ਮੋ, ਪਞ੍ਞਿਨ੍ਦ੍ਰਿਯਂ ਧਮ੍ਮੋ. ਅਞ੍ਞੋ ਸਦ੍ਧਿਨ੍ਦ੍ਰਿਯਂ ਧਮ੍ਮੋ, ਅਞ੍ਞੋ ਵੀਰਿਯਿਨ੍ਦ੍ਰਿਯਂ ਧਮ੍ਮੋ, ਅਞ੍ਞੋ ਸਤਿਨ੍ਦ੍ਰਿਯਂ ਧਮ੍ਮੋ, ਅਞ੍ਞੋ ਸਮਾਧਿਨ੍ਦ੍ਰਿਯਂ ਧਮ੍ਮੋ, ਅਞ੍ਞੋ ਪਞ੍ਞਿਨ੍ਦ੍ਰਿਯਂ ਧਮ੍ਮੋ. ਯੇਨ ਞਾਣੇਨ ਇਮੇ ਨਾਨਾ ਧਮ੍ਮਾ ਞਾਤਾ, ਤੇਨੇਵ ਞਾਣੇਨ ਇਮੇ ਨਾਨਾ ਧਮ੍ਮਾ ਪਟਿਵਿਦਿਤਾਤਿ. ਤੇਨ ਵੁਚ੍ਚਤਿ – ‘‘ਧਮ੍ਮਨਾਨਤ੍ਤੇ ਪਞ੍ਞਾ ਧਮ੍ਮਪਟਿਸਮ੍ਭਿਦੇ ਞਾਣਂ’’.

ਅਧਿਮੋਕ੍ਖਟ੍ਠੋ ਅਤ੍ਥੋ, ਪਗ੍ਗਹਟ੍ਠੋ ਅਤ੍ਥੋ, ਉਪਟ੍ਠਾਨਟ੍ਠੋ ਅਤ੍ਥੋ, ਅਵਿਕ੍ਖੇਪਟ੍ਠੋ ਅਤ੍ਥੋ, ਦਸ੍ਸਨਟ੍ਠੋ ਅਤ੍ਥੋ. ਅਞ੍ਞੋ ਅਧਿਮੋਕ੍ਖਟ੍ਠੋ ਅਤ੍ਥੋ, ਅਞ੍ਞੋ ਪਗ੍ਗਹਟ੍ਠੋ ਅਤ੍ਥੋ, ਅਞ੍ਞੋ ਉਪਟ੍ਠਾਨਟ੍ਠੋ ਅਤ੍ਥੋ, ਅਞ੍ਞੋ ਅਵਿਕ੍ਖੇਪਟ੍ਠੋ ਅਤ੍ਥੋ, ਅਞ੍ਞੋ ਦਸ੍ਸਨਟ੍ਠੋ ਅਤ੍ਥੋ. ਯੇਨ ਞਾਣੇਨ ਇਮੇ ਨਾਨਾ ਅਤ੍ਥਾ ਞਾਤਾ, ਤੇਨੇਵ ਞਾਣੇਨ ਇਮੇ ਨਾਨਾ ਅਤ੍ਥਾ ਪਟਿਵਿਦਿਤਾਤਿ. ਤੇਨ ਵੁਚ੍ਚਤਿ ‘‘ਅਤ੍ਥਨਾਨਤ੍ਤੇ ਪਞ੍ਞਾ ਅਤ੍ਥਪਟਿਸਮ੍ਭਿਦੇ ਞਾਣਂ’’.

ਪਞ੍ਚ ਧਮ੍ਮੇ ਸਨ੍ਦਸ੍ਸੇਤੁਂ ਬ੍ਯਞ੍ਜਨਨਿਰੁਤ੍ਤਾਭਿਲਾਪਾ, ਪਞ੍ਚ ਅਤ੍ਥੇ ਸਨ੍ਦਸ੍ਸੇਤੁਂ ਬ੍ਯਞ੍ਜਨਨਿਰੁਤ੍ਤਾਭਿਲਾਪਾ. ਅਞ੍ਞਾ ਧਮ੍ਮਨਿਰੁਤ੍ਤਿਯੋ, ਅਞ੍ਞਾ ਅਤ੍ਥਨਿਰੁਤ੍ਤਿਯੋ. ਯੇਨ ਞਾਣੇਨ ਇਮਾ ਨਾਨਾ ਨਿਰੁਤ੍ਤਿਯੋ ਞਾਤਾ, ਤੇਨੇਵ ਞਾਣੇਨ ਇਮਾ ਨਾਨਾ ਨਿਰੁਤ੍ਤਿਯੋ ਪਟਿਵਿਦਿਤਾਤਿ. ਤੇਨ ਵੁਚ੍ਚਤਿ – ‘‘ਨਿਰੁਤ੍ਤਿਨਾਨਤ੍ਤੇ ਪਞ੍ਞਾ ਨਿਰੁਤ੍ਤਿਪਟਿਸਮ੍ਭਿਦੇ ਞਾਣਂ’’.

ਪਞ੍ਚਸੁ ਧਮ੍ਮੇਸੁ ਞਾਣਾਨਿ, ਪਞ੍ਚਸੁ ਅਤ੍ਥੇਸੁ ਞਾਣਾਨਿ, ਦਸਸੁ ਨਿਰੁਤ੍ਤੀਸੁ ਞਾਣਾਨਿ. ਅਞ੍ਞਾਨਿ ਧਮ੍ਮੇਸੁ ਞਾਣਾਨਿ, ਅਞ੍ਞਾਨਿ ਅਤ੍ਥੇਸੁ ਞਾਣਾਨਿ, ਅਞ੍ਞਾਨਿ ਨਿਰੁਤ੍ਤੀਸੁ ਞਾਣਾਨਿ. ਯੇਨ ਞਾਣੇਨ ਇਮੇ ਨਾਨਾ ਞਾਣਾ ਞਾਤਾ, ਤੇਨੇਵ ਞਾਣੇਨ ਇਮੇ ਨਾਨਾ ਞਾਣਾ ਪਟਿਵਿਦਿਤਾਤਿ. ਤੇਨ ਵੁਚ੍ਚਤਿ – ‘‘ਪਟਿਭਾਨਨਾਨਤ੍ਤੇ ਪਞ੍ਞਾ ਪਟਿਭਾਨਪਟਿਸਮ੍ਭਿਦੇ ਞਾਣਂ’’.

੭੭. ਸਦ੍ਧਾਬਲਂ ਧਮ੍ਮੋ, ਵੀਰਿਯਬਲਂ ਧਮ੍ਮੋ, ਸਤਿਬਲਂ ਧਮ੍ਮੋ, ਸਮਾਧਿਬਲਂ ਧਮ੍ਮੋ, ਪਞ੍ਞਾਬਲਂ ਧਮ੍ਮੋ. ਅਞ੍ਞੋ ਸਦ੍ਧਾਬਲਂ ਧਮ੍ਮੋ, ਅਞ੍ਞੋ ਵੀਰਿਯਬਲਂ ਧਮ੍ਮੋ, ਅਞ੍ਞੋ ਸਤਿਬਲਂ ਧਮ੍ਮੋ, ਅਞ੍ਞੋ ਸਮਾਧਿਬਲਂ ਧਮ੍ਮੋ, ਅਞ੍ਞੋ ਪਞ੍ਞਾਬਲਂ ਧਮ੍ਮੋ. ਯੇਨ ਞਾਣੇਨ ਇਮੇ ਨਾਨਾ ਧਮ੍ਮਾ ਞਾਤਾ, ਤੇਨੇਵ ਞਾਣੇਨ ਇਮੇ ਨਾਨਾ ਧਮ੍ਮਾ ਪਟਿਵਿਦਿਤਾਤਿ. ਤੇਨ ਵੁਚ੍ਚਤਿ – ‘‘ਧਮ੍ਮਨਾਨਤ੍ਤੇ ਪਞ੍ਞਾ ਧਮ੍ਮਪਟਿਸਮ੍ਭਿਦੇ ਞਾਣਂ’’.

ਅਸ੍ਸਦ੍ਧਿਯੇ ਅਕਮ੍ਪਿਯਟ੍ਠੋ ਅਤ੍ਥੋ. ਕੋਸਜ੍ਜੇ ਅਕਮ੍ਪਿਯਟ੍ਠੋ ਅਤ੍ਥੋ. ਪਮਾਦੇ ਅਕਮ੍ਪਿਯਟ੍ਠੋ ਅਤ੍ਥੋ. ਉਦ੍ਧਚ੍ਚੇ ਅਕਮ੍ਪਿਯਟ੍ਠੋ ਅਤ੍ਥੋ. ਅਵਿਜ੍ਜਾਯ ਅਕਮ੍ਪਿਯਟ੍ਠੋ ਅਤ੍ਥੋ. ਅਞ੍ਞੋ ਅਸ੍ਸਦ੍ਧਿਯੇ ਅਕਮ੍ਪਿਯਟ੍ਠੋ ਅਤ੍ਥੋ, ਅਞ੍ਞੋ ਕੋਸਜ੍ਜੇ ਅਕਮ੍ਪਿਯਟ੍ਠੋ ਅਤ੍ਥੋ, ਅਞ੍ਞੋ ਪਮਾਦੇ ਅਕਮ੍ਪਿਯਟ੍ਠੋ ਅਤ੍ਥੋ, ਅਞ੍ਞੋ ਉਦ੍ਧਚ੍ਚੇ ਅਕਮ੍ਪਿਯਟ੍ਠੋ ਅਤ੍ਥੋ, ਅਞ੍ਞੋ ਅਵਿਜ੍ਜਾਯ ਅਕਮ੍ਪਿਯਟ੍ਠੋ ਅਤ੍ਥੋ. ਯੇਨ ਞਾਣੇਨ ਇਮੇ ਨਾਨਾ ਅਤ੍ਥਾ ਞਾਤਾ, ਤੇਨੇਵ ਞਾਣੇਨ ਇਮੇ ਨਾਨਾ ਅਤ੍ਥਾ ਪਟਿਵਿਦਿਤਾਤਿ. ਤੇਨ ਵੁਚ੍ਚਤਿ – ‘‘ਅਤ੍ਥਨਾਨਤ੍ਤੇ ਪਞ੍ਞਾ ਅਤ੍ਥਪਟਿਸਮ੍ਭਿਦੇ ਞਾਣਂ’’.

ਪਞ੍ਚ ਧਮ੍ਮੇ ਸਨ੍ਦਸ੍ਸੇਤੁਂ ਬ੍ਯਞ੍ਜਨਨਿਰੁਤ੍ਤਾਭਿਲਾਪਾ, ਪਞ੍ਚ ਅਤ੍ਥੇ ਸਨ੍ਦਸ੍ਸੇਤੁਂ ਬ੍ਯਞ੍ਜਨਨਿਰੁਤ੍ਤਾਭਿਲਾਪਾ. ਅਞ੍ਞਾ ਧਮ੍ਮਨਿਰੁਤ੍ਤਿਯੋ, ਅਞ੍ਞਾ ਅਤ੍ਥਨਿਰੁਤ੍ਤਿਯੋ. ਯੇਨ ਞਾਣੇਨ ਇਮਾ ਨਾਨਾ ਨਿਰੁਤ੍ਤਿਯੋ ਞਾਤਾ, ਤੇਨੇਵ ਞਾਣੇਨ ਇਮਾ ਨਾਨਾ ਨਿਰੁਤ੍ਤਿਯੋ ਪਟਿਵਿਦਿਤਾਤਿ. ਤੇਨ ਵੁਚ੍ਚਤਿ – ‘‘ਨਿਰੁਤ੍ਤਿਨਾਨਤ੍ਤੇ ਪਞ੍ਞਾ ਨਿਰੁਤ੍ਤਿਪਟਿਸਮ੍ਭਿਦੇ ਞਾਣਂ’’.

ਪਞ੍ਚਸੁ [ਪਞ੍ਚ (?)] ਧਮ੍ਮੇਸੁ ਞਾਣਾਨਿ, ਪਞ੍ਚਸੁ [ਪਞ੍ਚ (?)] ਅਤ੍ਥੇਸੁ ਞਾਣਾਨਿ, ਦਸਸੁ [ਦਸ (?)] ਨਿਰੁਤ੍ਤੀਸੁ ਞਾਣਾਨਿ. ਅਞ੍ਞਾਨਿ ਧਮ੍ਮੇਸੁ ਞਾਣਾਨਿ, ਅਞ੍ਞਾਨਿ ਅਤ੍ਥੇਸੁ ਞਾਣਾਨਿ, ਅਞ੍ਞਾਨਿ ਨਿਰੁਤ੍ਤੀਸੁ ਞਾਣਾਨਿ. ਯੇਨ ਞਾਣੇਨ ਇਮੇ ਨਾਨਾ ਞਾਣਾ ਞਾਤਾ, ਤੇਨੇਵ ਞਾਣੇਨ ਇਮੇ ਨਾਨਾ ਞਾਣਾ ਪਟਿਵਿਦਿਤਾਤਿ. ਤੇਨ ਵੁਚ੍ਚਤਿ – ‘‘ਪਟਿਭਾਨਨਾਨਤ੍ਤੇ ਪਞ੍ਞਾ ਪਟਿਭਾਨਪਟਿਸਮ੍ਭਿਦੇ ਞਾਣਂ’’.

ਸਤਿਸਮ੍ਬੋਜ੍ਝਙ੍ਗੋ ਧਮ੍ਮੋ, ਧਮ੍ਮਵਿਚਯਸਮ੍ਬੋਜ੍ਝਙ੍ਗੋ ਧਮ੍ਮੋ, ਵੀਰਿਯਸਮ੍ਬੋਜ੍ਝਙ੍ਗੋ ਧਮ੍ਮੋ, ਪੀਤਿਸਮ੍ਬੋਜ੍ਝਙ੍ਗੋ ਧਮ੍ਮੋ, ਪਸ੍ਸਦ੍ਧਿਸਮ੍ਬੋਜ੍ਝਙ੍ਗੋ ਧਮ੍ਮੋ, ਸਮਾਧਿਸਮ੍ਬੋਜ੍ਝਙ੍ਗੋ ਧਮ੍ਮੋ, ਉਪੇਕ੍ਖਾਸਮ੍ਬੋਜ੍ਝਙ੍ਗੋ ਧਮ੍ਮੋ. ਅਞ੍ਞੋ ਸਤਿਸਮ੍ਬੋਜ੍ਝਙ੍ਗੋ ਧਮ੍ਮੋ, ਅਞ੍ਞੋ ਧਮ੍ਮਵਿਚਯਸਮ੍ਬੋਜ੍ਝਙ੍ਗੋ ਧਮ੍ਮੋ, ਅਞ੍ਞੋ ਵੀਰਿਯਸਮ੍ਬੋਜ੍ਝਙ੍ਗੋ ਧਮ੍ਮੋ, ਅਞ੍ਞੋ ਪੀਤਿਸਮ੍ਬੋਜ੍ਝਙ੍ਗੋ ਧਮ੍ਮੋ, ਅਞ੍ਞੋ ਪਸ੍ਸਦ੍ਧਿਸਮ੍ਬੋਜ੍ਝਙ੍ਗੋ ਧਮ੍ਮੋ, ਅਞ੍ਞੋ ਸਮਾਧਿਸਮ੍ਬੋਜ੍ਝਙ੍ਗੋ ਧਮ੍ਮੋ, ਅਞ੍ਞੋ ਉਪੇਕ੍ਖਾਸਮ੍ਬੋਜ੍ਝਙ੍ਗੋ ਧਮ੍ਮੋ. ਯੇਨ ਞਾਣੇਨ ਇਮੇ ਨਾਨਾ ਧਮ੍ਮਾ ਞਾਤਾ, ਤੇਨੇਵ ਞਾਣੇਨ ਇਮੇ ਨਾਨਾ ਧਮ੍ਮਾ ਪਟਿਵਿਦਿਤਾਤਿ. ਤੇਨ ਵੁਚ੍ਚਤਿ – ‘‘ਧਮ੍ਮਨਾਨਤ੍ਤੇ ਪਞ੍ਞਾ ਧਮ੍ਮਪਟਿਸਮ੍ਭਿਦੇ ਞਾਣਂ’’.

ਉਪਟ੍ਠਾਨਟ੍ਠੋ ਅਤ੍ਥੋ, ਪਵਿਚਯਟ੍ਠੋ ਅਤ੍ਥੋ, ਪਗ੍ਗਹਟ੍ਠੋ ਅਤ੍ਥੋ, ਫਰਣਟ੍ਠੋ ਅਤ੍ਥੋ, ਉਪਸਮਟ੍ਠੋ ਅਤ੍ਥੋ, ਅਵਿਕ੍ਖੇਪਟ੍ਠੋ ਅਤ੍ਥੋ, ਪਟਿਸਙ੍ਖਾਨਟ੍ਠੋ ਅਤ੍ਥੋ. ਅਞ੍ਞੋ ਉਪਟ੍ਠਾਨਟ੍ਠੋ ਅਤ੍ਥੋ, ਅਞ੍ਞੋ ਪਵਿਚਯਟ੍ਠੋ ਅਤ੍ਥੋ, ਅਞ੍ਞੋ ਪਗ੍ਗਹਟ੍ਠੋ ਅਤ੍ਥੋ, ਅਞ੍ਞੋ ਫਰਣਟ੍ਠੋ ਅਤ੍ਥੋ, ਅਞ੍ਞੋ ਉਪਸਮਟ੍ਠੋ ਅਤ੍ਥੋ, ਅਞ੍ਞੋ ਅਵਿਕ੍ਖੇਪਟ੍ਠੋ ਅਤ੍ਥੋ, ਅਞ੍ਞੋ ਪਟਿਸਙ੍ਖਾਨਟ੍ਠੋ ਅਤ੍ਥੋ. ਯੇਨ ਞਾਣੇਨ ਇਮੇ ਨਾਨਾ ਅਤ੍ਥਾ ਞਾਤਾ, ਤੇਨੇਵ ਞਾਣੇਨ ਇਮੇ ਨਾਨਾ ਅਤ੍ਥਾ ਪਟਿਵਿਦਿਤਾਤਿ. ਤੇਨ ਵੁਚ੍ਚਤਿ – ‘‘ਅਤ੍ਥਨਾਨਤ੍ਤੇ ਪਞ੍ਞਾ ਅਤ੍ਥਪਟਿਸਮ੍ਭਿਦੇ ਞਾਣਂ’’.

ਸਤ੍ਤ ਧਮ੍ਮੇ ਸਨ੍ਦਸ੍ਸੇਤੁਂ ਬ੍ਯਞ੍ਜਨਨਿਰੁਤ੍ਤਾਭਿਲਾਪਾ, ਸਤ੍ਤ ਅਤ੍ਥੇ ਸਨ੍ਦਸ੍ਸੇਤੁਂ ਬ੍ਯਞ੍ਜਨਨਿਰੁਤ੍ਤਾਭਿਲਾਪਾ. ਅਞ੍ਞਾ ਧਮ੍ਮਨਿਰੁਤ੍ਤਿਯੋ, ਅਞ੍ਞਾ ਅਤ੍ਥਨਿਰੁਤ੍ਤਿਯੋ. ਯੇਨ ਞਾਣੇਨ ਇਮਾ ਨਾਨਾ ਨਿਰੁਤ੍ਤਿਯੋ ਞਾਤਾ, ਤੇਨੇਵ ਞਾਣੇਨ ਇਮਾ ਨਾਨਾ ਨਿਰੁਤ੍ਤਿਯੋ ਪਟਿਵਿਦਿਤਾਤਿ. ਤੇਨ ਵੁਚ੍ਚਤਿ – ‘‘ਨਿਰੁਤ੍ਤਿਨਾਨਤ੍ਤੇ ਪਞ੍ਞਾ ਨਿਰੁਤ੍ਤਿਪਟਿਸਮ੍ਭਿਦੇ ਞਾਣਂ’’.

ਸਤ੍ਤਸੁ ਧਮ੍ਮੇਸੁ ਞਾਣਾਨਿ, ਸਤ੍ਤਸੁ ਅਤ੍ਥੇਸੁ ਞਾਣਾਨਿ, ਚੁਦ੍ਦਸਸੁ ਨਿਰੁਤ੍ਤੀਸੁ ਞਾਣਾਨਿ. ਅਞ੍ਞਾਨਿ ਧਮ੍ਮੇਸੁ ਞਾਣਾਨਿ, ਅਞ੍ਞਾਨਿ ਅਤ੍ਥੇਸੁ ਞਾਣਾਨਿ, ਅਞ੍ਞਾਨਿ ਨਿਰੁਤ੍ਤੀਸੁ ਞਾਣਾਨਿ. ਯੇਨ ਞਾਣੇਨ ਇਮੇ ਨਾਨਾ ਞਾਣਾ ਞਾਤਾ, ਤੇਨੇਵ ਞਾਣੇਨ ਇਮੇ ਨਾਨਾ ਞਾਣਾ ਪਟਿਵਿਦਿਤਾਤਿ. ਤੇਨ ਵੁਚ੍ਚਤਿ – ‘‘ਪਟਿਭਾਨਨਾਨਤ੍ਤੇ ਪਞ੍ਞਾ ਪਟਿਭਾਨਪਟਿਸਮ੍ਭਿਦੇ ਞਾਣਂ’’.

ਸਮ੍ਮਾਦਿਟ੍ਠਿ ਧਮ੍ਮੋ, ਸਮ੍ਮਾਸਙ੍ਕਪ੍ਪੋ ਧਮ੍ਮੋ, ਸਮ੍ਮਾਵਾਚਾ ਧਮ੍ਮੋ, ਸਮ੍ਮਾਕਮ੍ਮਨ੍ਤੋ ਧਮ੍ਮੋ, ਸਮ੍ਮਾਆਜੀਵੋ ਧਮ੍ਮੋ, ਸਮ੍ਮਾਵਾਯਾਮੋ ਧਮ੍ਮੋ, ਸਮ੍ਮਾਸਤਿ ਧਮ੍ਮੋ, ਸਮ੍ਮਾਸਮਾਧਿ ਧਮ੍ਮੋ. ਅਞ੍ਞੋ ਸਮ੍ਮਾਦਿਟ੍ਠਿ ਧਮ੍ਮੋ, ਅਞ੍ਞੋ ਸਮ੍ਮਾਸਙ੍ਕਪ੍ਪੋ ਧਮ੍ਮੋ, ਅਞ੍ਞੋ ਸਮ੍ਮਾਵਾਚਾ ਧਮ੍ਮੋ, ਅਞ੍ਞੋ ਸਮ੍ਮਾਕਮ੍ਮਨ੍ਤੋ ਧਮ੍ਮੋ, ਅਞ੍ਞੋ ਸਮ੍ਮਾਆਜੀਵੋ ਧਮ੍ਮੋ, ਅਞ੍ਞੋ ਸਮ੍ਮਾਵਾਯਾਮੋ ਧਮ੍ਮੋ, ਅਞ੍ਞੋ ਸਮ੍ਮਾਸਤਿ ਧਮ੍ਮੋ, ਅਞ੍ਞੋ ਸਮ੍ਮਾਸਮਾਧਿ ਧਮ੍ਮੋ. ਯੇਨ ਞਾਣੇਨ ਇਮੇ ਨਾਨਾ ਧਮ੍ਮਾ ਞਾਤਾ, ਤੇਨੇਵ ਞਾਣੇਨ ਇਮੇ ਨਾਨਾ ਧਮ੍ਮਾ ਪਟਿਵਿਦਿਤਾਤਿ. ਤੇਨ ਵੁਚ੍ਚਤਿ – ‘‘ਧਮ੍ਮਨਾਨਤ੍ਤੇ ਪਞ੍ਞਾ ਧਮ੍ਮਪਟਿਸਮ੍ਭਿਦੇ ਞਾਣਂ’’.

ਦਸ੍ਸਨਟ੍ਠੋ ਅਤ੍ਥੋ, ਅਭਿਨਿਰੋਪਨਟ੍ਠੋ ਅਤ੍ਥੋ, ਪਰਿਗ੍ਗਹਟ੍ਠੋ ਅਤ੍ਥੋ, ਸਮੁਟ੍ਠਾਨਟ੍ਠੋ ਅਤ੍ਥੋ, ਵੋਦਾਨਟ੍ਠੋ ਅਤ੍ਥੋ, ਪਗ੍ਗਹਟ੍ਠੋ ਅਤ੍ਥੋ, ਉਪਟ੍ਠਾਨਟ੍ਠੋ ਅਤ੍ਥੋ, ਅਵਿਕ੍ਖੇਪਟ੍ਠੋ ਅਤ੍ਥੋ. ਅਞ੍ਞੋ ਦਸ੍ਸਨਟ੍ਠੋ ਅਤ੍ਥੋ, ਅਞ੍ਞੋ ਅਭਿਨਿਰੋਪਨਟ੍ਠੋ ਅਤ੍ਥੋ, ਅਞ੍ਞੋ ਪਰਿਗ੍ਗਹਟ੍ਠੋ ਅਤ੍ਥੋ, ਅਞ੍ਞੋ ਸਮੁਟ੍ਠਾਨਟ੍ਠੋ ਅਤ੍ਥੋ, ਅਞ੍ਞੋ ਵੋਦਾਨਟ੍ਠੋ ਅਤ੍ਥੋ, ਅਞ੍ਞੋ ਪਗ੍ਗਹਟ੍ਠੋ ਅਤ੍ਥੋ, ਅਞ੍ਞੋ ਉਪਟ੍ਠਾਨਟ੍ਠੋ ਅਤ੍ਥੋ, ਅਞ੍ਞੋ ਅਵਿਕ੍ਖੇਪਟ੍ਠੋ ਅਤ੍ਥੋ. ਯੇਨ ਞਾਣੇਨ ਇਮੇ ਨਾਨਾ ਅਤ੍ਥਾ ਞਾਤਾ ਤੇਨੇਵ ਞਾਣੇਨ ਇਮੇ ਨਾਨਾ ਅਤ੍ਥਾ ਪਟਿਵਿਦਿਤਾਤਿ. ਤੇਨ ਵੁਚ੍ਚਤਿ – ‘‘ਅਤ੍ਥਨਾਨਤ੍ਤੇ ਪਞ੍ਞਾ ਅਤ੍ਥਪਟਿਸਮ੍ਭਿਦੇ ਞਾਣਂ’’.

ਅਟ੍ਠ ਧਮ੍ਮੇ ਸਨ੍ਦਸ੍ਸੇਤੁਂ ਬ੍ਯਞ੍ਜਨਨਿਰੁਤ੍ਤਾਭਿਲਾਪਾ, ਅਟ੍ਠ ਅਤ੍ਥੇ ਸਨ੍ਦਸ੍ਸੇਤੁਂ ਬ੍ਯਞ੍ਜਨਨਿਰੁਤ੍ਤਾਭਿਲਾਪਾ. ਅਞ੍ਞਾ ਧਮ੍ਮਨਿਰੁਤ੍ਤਿਯੋ, ਅਞ੍ਞਾ ਅਤ੍ਥਨਿਰੁਤ੍ਤਿਯੋ. ਯੇਨ ਞਾਣੇਨ ਇਮਾ ਨਾਨਾ ਨਿਰੁਤ੍ਤਿਯੋ ਞਾਤਾ, ਤੇਨੇਵ ਞਾਣੇਨ ਇਮਾ ਨਾਨਾ ਨਿਰੁਤ੍ਤਿਯੋ ਪਟਿਵਿਦਿਤਾਤਿ. ਤੇਨ ਵੁਚ੍ਚਤਿ – ‘‘ਨਿਰੁਤ੍ਤਿਨਾਨਤ੍ਤੇ ਪਞ੍ਞਾ ਨਿਰੁਤ੍ਤਿਪਟਿਸਮ੍ਭਿਦੇ ਞਾਣਂ’’.

ਅਟ੍ਠਸੁ ਧਮ੍ਮੇਸੁ ਞਾਣਾਨਿ, ਅਟ੍ਠਸੁ ਅਤ੍ਥੇਸੁ ਞਾਣਾਨਿ ਸੋਲ਼ਸਸੁ ਨਿਰੁਤ੍ਤੀਸੁ ਞਾਣਾਨਿ. ਅਞ੍ਞਾਨਿ ਧਮ੍ਮੇਸੁ ਞਾਣਾਨਿ, ਅਞ੍ਞਾਨਿ ਅਤ੍ਥੇਸੁ ਞਾਣਾਨਿ, ਅਞ੍ਞਾਨਿ ਨਿਰੁਤ੍ਤੀਸੁ ਞਾਣਾਨਿ. ਯੇਨ ਞਾਣੇਨ ਇਮੇ ਨਾਨਾ ਞਾਣਾ ਞਾਤਾ, ਤੇਨੇਵ ਞਾਣੇਨ ਇਮੇ ਨਾਨਾ ਞਾਣਾ ਪਟਿਵਿਦਿਤਾਤਿ. ਤੇਨ ਵੁਚ੍ਚਤਿ – ‘‘ਪਟਿਭਾਨਨਾਨਤ੍ਤੇ ਪਞ੍ਞਾ ਪਟਿਭਾਨਪਟਿਸਮ੍ਭਿਦੇ ਞਾਣਂ’’. ਤਂ ਞਾਤਟ੍ਠੇਨ ਞਾਣਂ, ਪਜਾਨਨਟ੍ਠੇਨ ਪਞ੍ਞਾ. ਤੇਨ ਵੁਚ੍ਚਤਿ – ‘‘ਅਤ੍ਥਨਾਨਤ੍ਤੇ ਪਞ੍ਞਾ ਅਤ੍ਥਪਟਿਸਮ੍ਭਿਦੇ ਞਾਣਂ. ਧਮ੍ਮਨਾਨਤ੍ਤੇ ਪਞ੍ਞਾ ਧਮ੍ਮਪਟਿਸਮ੍ਭਿਦੇ ਞਾਣਂ. ਨਿਰੁਤ੍ਤਿਨਾਨਤ੍ਤੇ ਪਞ੍ਞਾ ਨਿਰੁਤ੍ਤਿਪਟਿਸਮ੍ਭਿਦੇ ਞਾਣਂ. ਪਟਿਭਾਨਨਾਨਤ੍ਤੇ ਪਞ੍ਞਾ ਪਟਿਭਾਨਪਟਿਸਮ੍ਭਿਦੇ ਞਾਣਂ’’.

ਪਟਿਸਮ੍ਭਿਦਾਞਾਣਨਿਦ੍ਦੇਸੋ ਅਟ੍ਠਵੀਸਤਿਮੋ.