੧੯. ਧਮ੍ਮਨਾਨਤ੍ਤਞਾਣਨਿਦ੍ਦੇਸੋ

੭੩. ਕਥਂ ਨਵਧਮ੍ਮਵਵਤ੍ਥਾਨੇ ਪਞ੍ਞਾ ਧਮ੍ਮਨਾਨਤ੍ਤੇ ਞਾਣਂ? ਕਥਂ ਧਮ੍ਮੇ ਵਵਤ੍ਥੇਤਿ? ਕਾਮਾਵਚਰੇ ਧਮ੍ਮੇ ਕੁਸਲਤੋ ਵਵਤ੍ਥੇਤਿ, ਅਕੁਸਲਤੋ ਵਵਤ੍ਥੇਤਿ, ਅਬ੍ਯਾਕਤਤੋ ਵਵਤ੍ਥੇਤਿ. ਰੂਪਾਵਚਰੇ ਧਮ੍ਮੇ ਕੁਸਲਤੋ ਵਵਤ੍ਥੇਤਿ, ਅਬ੍ਯਾਕਤਤੋ ਵਵਤ੍ਥੇਤਿ. ਅਰੂਪਾਵਚਰੇ ਧਮ੍ਮੇ ਕੁਸਲਤੋ ਵਵਤ੍ਥੇਤਿ, ਅਬ੍ਯਾਕਤਤੋ ਵਵਤ੍ਥੇਤਿ. ਅਪਰਿਯਾਪਨ੍ਨੇ ਧਮ੍ਮੇ ਕੁਸਲਤੋ ਵਵਤ੍ਥੇਤਿ, ਅਬ੍ਯਾਕਤਤੋ ਵਵਤ੍ਥੇਤਿ.

ਕਥਂ ਕਾਮਾਵਚਰੇ ਧਮ੍ਮੇ ਕੁਸਲਤੋ ਵਵਤ੍ਥੇਤਿ, ਅਕੁਸਲਤੋ ਵਵਤ੍ਥੇਤਿ, ਅਬ੍ਯਾਕਤਤੋ ਵਵਤ੍ਥੇਤਿ? ਦਸ ਕੁਸਲਕਮ੍ਮਪਥੇ ਕੁਸਲਤੋ ਵਵਤ੍ਥੇਤਿ, ਦਸ ਅਕੁਸਲਕਮ੍ਮਪਥੇ ਅਕੁਸਲਤੋ ਵਵਤ੍ਥੇਤਿ, ਰੂਪਞ੍ਚ ਵਿਪਾਕਞ੍ਚ ਕਿਰਿਯਞ੍ਚ ਅਬ੍ਯਾਕਤਤੋ ਵਵਤ੍ਥੇਤਿ – ਏਵਂ ਕਾਮਾਵਚਰੇ ਧਮ੍ਮੇ ਕੁਸਲਤੋ ਵਵਤ੍ਥੇਤਿ, ਅਕੁਸਲਤੋ ਵਵਤ੍ਥੇਤਿ, ਅਬ੍ਯਾਕਤਤੋ ਵਵਤ੍ਥੇਤਿ.

ਕਥਂ ਰੂਪਾਵਚਰੇ ਧਮ੍ਮੇ ਕੁਸਲਤੋ ਵਵਤ੍ਥੇਤਿ, ਅਬ੍ਯਾਕਤਤੋ ਵਵਤ੍ਥੇਤਿ? ਇਧਟ੍ਠਸ੍ਸ ਚਤ੍ਤਾਰਿ ਝਾਨਾਨਿ ਕੁਸਲਤੋ ਵਵਤ੍ਥੇਤਿ, ਤਤ੍ਰੂਪਪਨ੍ਨਸ੍ਸ ਚਤ੍ਤਾਰਿ ਝਾਨਾਨਿ ਅਬ੍ਯਾਕਤਤੋ ਵਵਤ੍ਥੇਤਿ – ਏਵਂ ਰੂਪਾਵਚਰੇ ਧਮ੍ਮੇ ਕੁਸਲਤੋ ਵਵਤ੍ਥੇਤਿ, ਅਬ੍ਯਾਕਤਤੋ ਵਵਤ੍ਥੇਤਿ.

ਕਥਂ ਅਰੂਪਾਵਚਰੇ ਧਮ੍ਮੇ ਕੁਸਲਤੋ ਵਵਤ੍ਥੇਤਿ, ਅਬ੍ਯਾਕਤਤੋ ਵਵਤ੍ਥੇਤਿ? ਇਧਟ੍ਠਸ੍ਸ ਚਤਸ੍ਸੋ ਅਰੂਪਾਵਚਰਸਮਾਪਤ੍ਤਿਯੋ ਕੁਸਲਤੋ ਵਵਤ੍ਥੇਤਿ, ਤਤ੍ਰੂਪਪਨ੍ਨਸ੍ਸ ਚਤਸ੍ਸੋ ਅਰੂਪਾਵਚਰਸਮਾਪਤ੍ਤਿਯੋ ਅਬ੍ਯਾਕਤਤੋ ਵਵਤ੍ਥੇਤਿ – ਏਵਂ ਅਰੂਪਾਵਚਰੇ ਧਮ੍ਮੇ ਕੁਸਲਤੋ ਵਵਤ੍ਥੇਤਿ, ਅਬ੍ਯਾਕਤਤੋ ਵਵਤ੍ਥੇਤਿ.

ਕਥਂ ਅਪਰਿਯਾਪਨ੍ਨੇ ਧਮ੍ਮੇ ਕੁਸਲਤੋ ਵਵਤ੍ਥੇਤਿ, ਅਬ੍ਯਾਕਤਤੋ ਵਵਤ੍ਥੇਤਿ? ਚਤ੍ਤਾਰੋ ਅਰਿਯਮਗ੍ਗੇ ਕੁਸਲਤੋ ਵਵਤ੍ਥੇਤਿ, ਚਤ੍ਤਾਰਿ ਚ ਸਾਮਞ੍ਞਫਲਾਨਿ ਨਿਬ੍ਬਾਨਞ੍ਚ ਅਬ੍ਯਾਕਤਤੋ ਵਵਤ੍ਥੇਤਿ – ਏਵਂ ਅਪਰਿਯਾਪਨ੍ਨੇ ਧਮ੍ਮੇ ਕੁਸਲਤੋ ਵਵਤ੍ਥੇਤਿ, ਅਬ੍ਯਾਕਤਤੋ ਵਵਤ੍ਥੇਤਿ. ਏਵਂ ਧਮ੍ਮੇ ਵਵਤ੍ਥੇਤਿ.

ਨਵ ਪਾਮੋਜ੍ਜਮੂਲਕਾ ਧਮ੍ਮਾ. ਅਨਿਚ੍ਚਤੋ ਮਨਸਿਕਰੋਤੋ ਪਾਮੋਜ੍ਜਂ ਜਾਯਤਿ, ਪਮੁਦਿਤਸ੍ਸ ਪੀਤਿ ਜਾਯਤਿ, ਪੀਤਿਮਨਸ੍ਸ ਕਾਯੋ ਪਸ੍ਸਮ੍ਭਤਿ, ਪਸ੍ਸਦ੍ਧਕਾਯੋ ਸੁਖਂ ਵੇਦੇਤਿ, ਸੁਖਿਨੋ ਚਿਤ੍ਤਂ ਸਮਾਧਿਯਤਿ. ਸਮਾਹਿਤੇ ਚਿਤ੍ਤੇ ਯਥਾਭੂਤਂ ਪਜਾਨਾਤਿ ਪਸ੍ਸਤਿ. ਯਥਾਭੂਤਂ ਜਾਨਂ ਪਸ੍ਸਂ ਨਿਬ੍ਬਿਨ੍ਦਤਿ, ਨਿਬ੍ਬਿਨ੍ਦਂ ਵਿਰਜ੍ਜਤਿ, ਵਿਰਾਗਾ ਵਿਮੁਚ੍ਚਤਿ. ਦੁਕ੍ਖਤੋ ਮਨਸਿਕਰੋਤੋ ਪਾਮੋਜ੍ਜਂ ਜਾਯਤਿ…ਪੇ… ਅਨਤ੍ਤਤੋ ਮਨਸਿਕਰੋਤੋ ਪਾਮੋਜ੍ਜਂ ਜਾਯਤਿ…ਪੇ… ਵਿਮੁਚ੍ਚਤਿ.

ਰੂਪਂ ਅਨਿਚ੍ਚਤੋ ਮਨਸਿਕਰੋਤੋ ਪਾਮੋਜ੍ਜਂ ਜਾਯਤਿ…ਪੇ… ਰੂਪਂ ਦੁਕ੍ਖਤੋ ਮਨਸਿਕਰੋਤੋ…ਪੇ… ਵੇਦਨਂ… ਸਞ੍ਞਂ… ਸਙ੍ਖਾਰੇ… ਵਿਞ੍ਞਾਣਂ… ਚਕ੍ਖੁਂ…ਪੇ… ਜਰਾਮਰਣਂ ਅਨਿਚ੍ਚਤੋ ਮਨਸਿਕਰੋਤੋ ਪਾਮੋਜ੍ਜਂ ਜਾਯਤਿ…ਪੇ… ਜਰਾਮਰਣਂ ਦੁਕ੍ਖਤੋ ਮਨਸਿਕਰੋਤੋ ਪਾਮੋਜ੍ਜਂ ਜਾਯਤਿ…ਪੇ… ਜਰਾਮਰਣਂ ਅਨਤ੍ਤਤੋ ਮਨਸਿਕਰੋਤੋ ਪਾਮੋਜ੍ਜਂ ਜਾਯਤਿ, ਪਮੁਦਿਤਸ੍ਸ ਪੀਤਿ ਜਾਯਤਿ, ਪੀਤਿਮਨਸ੍ਸ ਕਾਯੋ ਪਸ੍ਸਮ੍ਭਤਿ, ਪਸ੍ਸਦ੍ਧਕਾਯੋ ਸੁਖਂ ਵੇਦੇਤਿ, ਸੁਖਿਨੋ ਚਿਤ੍ਤਂ ਸਮਾਧਿਯਤਿ. ਸਮਾਹਿਤੇ ਚਿਤ੍ਤੇ ਯਥਾਭੂਤਂ ਪਜਾਨਾਤਿ ਪਸ੍ਸਤਿ. ਯਥਾਭੂਤਂ ਜਾਨਂ ਪਸ੍ਸਂ ਨਿਬ੍ਬਿਨ੍ਦਤਿ, ਨਿਬ੍ਬਿਨ੍ਦਂ ਵਿਰਜ੍ਜਤਿ, ਵਿਰਾਗਾ ਵਿਮੁਚ੍ਚਤਿ. ਇਮੇ ਨਵ ਪਾਮੋਜ੍ਜਮੂਲਕਾ ਧਮ੍ਮਾ.

੭੪. ਨਵ ਯੋਨਿਸੋ ਮਨਸਿਕਾਰਮੂਲਕਾ ਧਮ੍ਮਾ. ਅਨਿਚ੍ਚਤੋ ਯੋਨਿਸੋ ਮਨਸਿਕਰੋਤੋ ਪਾਮੋਜ੍ਜਂ ਜਾਯਤਿ, ਪਮੁਦਿਤਸ੍ਸ ਪੀਤਿ ਜਾਯਤਿ, ਪੀਤਿਮਨਸ੍ਸ ਕਾਯੋ ਪਸ੍ਸਮ੍ਭਤਿ, ਪਸ੍ਸਦ੍ਧਕਾਯੋ ਸੁਖਂ ਵੇਦੇਤਿ, ਸੁਖਿਨੋ ਚਿਤ੍ਤਂ ਸਮਾਧਿਯਤਿ. ਸਮਾਹਿਤੇਨ ਚਿਤ੍ਤੇਨ ‘‘ਇਦਂ ਦੁਕ੍ਖ’’ਨ੍ਤਿ ਯਥਾਭੂਤਂ ਪਜਾਨਾਤਿ, ‘‘ਅਯਂ ਦੁਕ੍ਖਸਮੁਦਯੋ’’ਤਿ ਯਥਾਭੂਤਂ ਪਜਾਨਾਤਿ, ‘‘ਅਯਂ ਦੁਕ੍ਖਨਿਰੋਧੋ’’ਤਿ ਯਥਾਭੂਤਂ ਪਜਾਨਾਤਿ, ‘‘ਅਯਂ ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ’’ਤਿ ਯਥਾਭੂਤਂ ਪਜਾਨਾਤਿ. ਦੁਕ੍ਖਤੋ ਯੋਨਿਸੋ ਮਨਸਿਕਰੋਤੋ ਪਾਮੋਜ੍ਜਂ ਜਾਯਤਿ, ਪਮੁਦਿਤਸ੍ਸ ਪੀਤਿ ਜਾਯਤਿ, ਪੀਤਿਮਨਸ੍ਸ ਕਾਯੋ ਪਸ੍ਸਮ੍ਭਤਿ, ਪਸ੍ਸਦ੍ਧਕਾਯੋ ਸੁਖਂ ਵੇਦੇਤਿ, ਸੁਖਿਨੋ ਚਿਤ੍ਤਂ ਸਮਾਧਿਯਤਿ. ਸਮਾਹਿਤੇਨ ਚਿਤ੍ਤੇਨ ‘‘ਇਦਂ ਦੁਕ੍ਖ’’ਨ੍ਤਿ ਯਥਾਭੂਤਂ ਪਜਾਨਾਤਿ, ‘‘ਅਯਂ ਦੁਕ੍ਖਸਮੁਦਯੋ’’ਤਿ ਯਥਾਭੂਤਂ ਪਜਾਨਾਤਿ, ‘‘ਅਯਂ ਦੁਕ੍ਖਨਿਰੋਧੋ’’ਤਿ ਯਥਾਭੂਤਂ ਪਜਾਨਾਤਿ, ‘‘ਅਯਂ ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ’’ਤਿ ਯਥਾਭੂਤਂ ਪਜਾਨਾਤਿ. ਅਨਤ੍ਤਤੋ ਯੋਨਿਸੋ ਮਨਸਿਕਰੋਤੋ ਪਾਮੋਜ੍ਜਂ ਜਾਯਤਿ…ਪੇ….

ਰੂਪਂ ਅਨਿਚ੍ਚਤੋ ਯੋਨਿਸੋ ਮਨਸਿਕਰੋਤੋ ਪਾਮੋਜ੍ਜਂ ਜਾਯਤਿ…ਪੇ… ਰੂਪਂ ਦੁਕ੍ਖਤੋ ਯੋਨਿਸੋ ਮਨਸਿਕਰੋਤੋ ਪਾਮੋਜ੍ਜਂ ਜਾਯਤਿ…ਪੇ… ਰੂਪਂ ਅਨਤ੍ਤਤੋ ਯੋਨਿਸੋ ਮਨਸਿਕਰੋਤੋ ਪਾਮੋਜ੍ਜਂ ਜਾਯਤਿ…ਪੇ… ਵੇਦਨਂ… ਸਞ੍ਞਂ… ਸਙ੍ਖਾਰੇ… ਵਿਞ੍ਞਾਣਂ… ਚਕ੍ਖੁਂ…ਪੇ… ਜਰਾਮਰਣਂ ਅਨਿਚ੍ਚਤੋ ਯੋਨਿਸੋ ਮਨਸਿਕਰੋਤੋ ਪਾਮੋਜ੍ਜਂ ਜਾਯਤਿ…ਪੇ… ਜਰਾਮਰਣਂ ਦੁਕ੍ਖਤੋ ਯੋਨਿਸੋ ਮਨਸਿਕਰੋਤੋ ਪਾਮੋਜ੍ਜਂ ਜਾਯਤਿ…ਪੇ… ਜਰਾਮਰਣਂ ਅਨਤ੍ਤਤੋ ਯੋਨਿਸੋ ਮਨਸਿਕਰੋਤੋ ਪਾਮੋਜ੍ਜਂ ਜਾਯਤਿ, ਪਮੁਦਿਤਸ੍ਸ ਪੀਤਿ ਜਾਯਤਿ, ਪੀਤਿਮਨਸ੍ਸ ਕਾਯੋ ਪਸ੍ਸਮ੍ਭਤਿ, ਪਸ੍ਸਦ੍ਧਕਾਯੋ ਸੁਖਂ ਵੇਦੇਤਿ, ਸੁਖਿਨੋ ਚਿਤ੍ਤਂ ਸਮਾਧਿਯਤਿ. ਸਮਾਹਿਤੇਨ ਚਿਤ੍ਤੇਨ ‘‘ਇਦਂ ਦੁਕ੍ਖ’’ਨ੍ਤਿ ਯਥਾਭੂਤਂ ਪਜਾਨਾਤਿ, ‘‘ਅਯਂ ਦੁਕ੍ਖਸਮੁਦਯੋ’’ਤਿ ਯਥਾਭੂਤਂ ਪਜਾਨਾਤਿ, ‘‘ਅਯਂ ਦੁਕ੍ਖਨਿਰੋਧੋ’’ਤਿ ਯਥਾਭੂਤਂ ਪਜਾਨਾਤਿ, ‘‘ਅਯਂ ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ’’ਤਿ ਯਥਾਭੂਤਂ ਪਜਾਨਾਤਿ. ਇਮੇ ਨਵ ਯੋਨਿਸੋ ਮਨਸਿਕਾਰਮੂਲਕਾ ਧਮ੍ਮਾ.

ਨਵ ਨਾਨਤ੍ਤਾ – ਧਾਤੁਨਾਨਤ੍ਤਂ ਪਟਿਚ੍ਚ ਉਪ੍ਪਜ੍ਜਤਿ ਫਸ੍ਸਨਾਨਤ੍ਤਂ, ਫਸ੍ਸਨਾਨਤ੍ਤਂ ਪਟਿਚ੍ਚ ਉਪ੍ਪਜ੍ਜਤਿ ਵੇਦਨਾਨਾਨਤ੍ਤਂ, ਵੇਦਨਾਨਾਨਤ੍ਤਂ ਪਟਿਚ੍ਚ ਉਪ੍ਪਜ੍ਜਤਿ ਸਞ੍ਞਾਨਾਨਤ੍ਤਂ, ਸਞ੍ਞਾਨਾਨਤ੍ਤਂ ਪਟਿਚ੍ਚ ਉਪ੍ਪਜ੍ਜਤਿ ਸਙ੍ਕਪ੍ਪਨਾਨਤ੍ਤਂ, ਸਙ੍ਕਪ੍ਪਨਾਨਤ੍ਤਂ ਪਟਿਚ੍ਚ ਉਪ੍ਪਜ੍ਜਤਿ ਛਨ੍ਦਨਾਨਤ੍ਤਂ, ਛਨ੍ਦਨਾਨਤ੍ਤਂ ਪਟਿਚ੍ਚ ਉਪ੍ਪਜ੍ਜਤਿ ਪਰਿਲ਼ਾਹਨਾਨਤ੍ਤਂ, ਪਰਿਲ਼ਾਹਨਾਨਤ੍ਤਂ ਪਟਿਚ੍ਚ ਉਪ੍ਪਜ੍ਜਤਿ ਪਰਿਯੇਸਨਾਨਾਨਤ੍ਤਂ, ਪਰਿਯੇਸਨਾਨਾਨਤ੍ਤਂ ਪਟਿਚ੍ਚ ਉਪ੍ਪਜ੍ਜਤਿ ਲਾਭਨਾਨਤ੍ਤਂ – ਇਮੇ ਨਵ ਨਾਨਤ੍ਤਾ. ਤਂ ਞਾਤਟ੍ਠੇਨ ਞਾਣਂ, ਪਜਾਨਨਟ੍ਠੇਨ ਪਞ੍ਞਾ. ਤੇਨ ਵੁਚ੍ਚਤਿ – ‘‘ਨਵਧਮ੍ਮਵਵਤ੍ਥਾਨੇ ਪਞ੍ਞਾ ਧਮ੍ਮਨਾਨਤ੍ਤੇ ਞਾਣਂ’’.

ਧਮ੍ਮਨਾਨਤ੍ਤਞਾਣਨਿਦ੍ਦੇਸੋ ਏਕੂਨਵੀਸਤਿਮੋ.