੧੭. ਚਰਿਯਾਨਾਨਤ੍ਤਞਾਣਨਿਦ੍ਦੇਸੋ

੬੮. ਕਥਂ ਚਰਿਯਾਵਵਤ੍ਥਾਨੇ ਪਞ੍ਞਾ ਚਰਿਯਾਨਾਨਤ੍ਤੇ ਞਾਣਂ? ਚਰਿਯਾਤਿ ਤਿਸ੍ਸੋ ਚਰਿਯਾਯੋ – ਵਿਞ੍ਞਾਣਚਰਿਯਾ, ਅਞ੍ਞਾਣਚਰਿਯਾ, ਞਾਣਚਰਿਯਾ.

ਕਤਮਾ ਵਿਞ੍ਞਾਣਚਰਿਯਾ? ਦਸ੍ਸਨਤ੍ਥਾਯ ਆਵਜ੍ਜਨਕਿਰਿਯਾਬ੍ਯਾਕਤਾ ਵਿਞ੍ਞਾਣਚਰਿਯਾ ਰੂਪੇਸੁ, ਦਸ੍ਸਨਟ੍ਠੋ ਚਕ੍ਖੁਵਿਞ੍ਞਾਣਂ ਵਿਞ੍ਞਾਣਚਰਿਯਾ ਰੂਪੇਸੁ, ਦਿਟ੍ਠਤ੍ਤਾ ਅਭਿਨਿਰੋਪਨਾ ਵਿਪਾਕਮਨੋਧਾਤੁ [ਅਭਿਨਿਰੋਪਨਵਿਪਾਕਮਨੋਧਾਤੁ (ਸ੍ਯਾ.)] ਵਿਞ੍ਞਾਣਚਰਿਯਾ ਰੂਪੇਸੁ, ਅਭਿਨਿਰੋਪਿਤਤ੍ਤਾ ਵਿਪਾਕਮਨੋਵਿਞ੍ਞਾਣਧਾਤੁ ਵਿਞ੍ਞਾਣਚਰਿਯਾ ਰੂਪੇਸੁ. ਸਵਨਤ੍ਥਾਯ ਆਵਜ੍ਜਨਕਿਰਿਯਾਬ੍ਯਾਕਤਾ ਵਿਞ੍ਞਾਣਚਰਿਯਾ ਸਦ੍ਦੇਸੁ, ਸਵਨਤ੍ਥੋ ਸੋਤਵਿਞ੍ਞਾਣਂ ਵਿਞ੍ਞਾਣਚਰਿਯਾ ਸਦ੍ਦੇਸੁ, ਸੁਤਤ੍ਤਾ ਅਭਿਨਿਰੋਪਨਾ ਵਿਪਾਕਮਨੋਧਾਤੁ ਵਿਞ੍ਞਾਣਚਰਿਯਾ ਸਦ੍ਦੇਸੁ, ਅਭਿਨਿਰੋਪਿਤਤ੍ਤਾ ਵਿਪਾਕਮਨੋਵਿਞ੍ਞਾਣਧਾਤੁ ਵਿਞ੍ਞਾਣਚਰਿਯਾ ਸਦ੍ਦੇਸੁ. ਘਾਯਨਤ੍ਥਾਯ ਆਵਜ੍ਜਨਕਿਰਿਯਾਬ੍ਯਾਕਤਾ ਵਿਞ੍ਞਾਣਚਰਿਯਾ ਗਨ੍ਧੇਸੁ, ਘਾਯਨਟ੍ਠੋ [ਘਾਯਨਤ੍ਥੋ (ਸ੍ਯਾ. ਕ.)] ਘਾਨਵਿਞ੍ਞਾਣਂ ਵਿਞ੍ਞਾਣਚਰਿਯਾ ਗਨ੍ਧੇਸੁ, ਘਾਯਿਤਤ੍ਤਾ ਅਭਿਨਿਰੋਪਨਾ ਵਿਪਾਕਮਨੋਧਾਤੁ ਵਿਞ੍ਞਾਣਚਰਿਯਾ ਗਨ੍ਧੇਸੁ, ਅਭਿਨਿਰੋਪਿਤਤ੍ਤਾ ਵਿਪਾਕਮਨੋਵਿਞ੍ਞਾਣਧਾਤੁ ਵਿਞ੍ਞਾਣਚਰਿਯਾ ਗਨ੍ਧੇਸੁ. ਸਾਯਨਤ੍ਥਾਯ ਆਵਜ੍ਜਨਕਿਰਿਯਾਬ੍ਯਾਕਤਾ ਵਿਞ੍ਞਾਣਚਰਿਯਾ ਰਸੇਸੁ, ਸਾਯਨਟ੍ਠੋ ਜਿਵ੍ਹਾਵਿਞ੍ਞਾਣਂ ਵਿਞ੍ਞਾਣਚਰਿਯਾ ਰਸੇਸੁ, ਸਾਯਿਤਤ੍ਤਾ ਅਭਿਨਿਰੋਪਨਾ ਵਿਪਾਕਮਨੋਧਾਤੁ ਵਿਞ੍ਞਾਣਚਰਿਯਾ ਰਸੇਸੁ, ਅਭਿਨਿਰੋਪਿਤਤ੍ਤਾ ਵਿਪਾਕਮਨੋਵਿਞ੍ਞਾਣਧਾਤੁ ਵਿਞ੍ਞਾਣਚਰਿਯਾ ਰਸੇਸੁ. ਫੁਸਨਤ੍ਥਾਯ ਆਵਜ੍ਜਨਕਿਰਿਯਾਬ੍ਯਾਕਤਾ ਵਿਞ੍ਞਾਣਚਰਿਯਾ ਫੋਟ੍ਠਬ੍ਬੇਸੁ, ਫੁਸਨਟ੍ਠੋ ਕਾਯਵਿਞ੍ਞਾਣਂ ਵਿਞ੍ਞਾਣਚਰਿਯਾ ਫੋਟ੍ਠਬ੍ਬੇਸੁ, ਫੁਟ੍ਠਤ੍ਤਾ ਅਭਿਨਿਰੋਪਨਾ ਵਿਪਾਕਮਨੋਧਾਤੁ ਵਿਞ੍ਞਾਣਚਰਿਯਾ ਫੋਟ੍ਠਬ੍ਬੇਸੁ, ਅਭਿਨਿਰੋਪਿਤਤ੍ਤਾ ਵਿਪਾਕਮਨੋਵਿਞ੍ਞਾਣਧਾਤੁ ਵਿਞ੍ਞਾਣਚਰਿਯਾ ਫੋਟ੍ਠਬ੍ਬੇਸੁ. ਵਿਜਾਨਨਤ੍ਥਾਯ ਆਵਜ੍ਜਨਕਿਰਿਯਾਬ੍ਯਾਕਤਾ ਵਿਞ੍ਞਾਣਚਰਿਯਾ ਧਮ੍ਮੇਸੁ, ਵਿਜਾਨਨਟ੍ਠੋ ਮਨੋਵਿਞ੍ਞਾਣਂ ਵਿਞ੍ਞਾਣਚਰਿਯਾ ਧਮ੍ਮੇਸੁ, ਵਿਞ੍ਞਾਤਤ੍ਤਾ ਅਭਿਨਿਰੋਪਨਾ ਵਿਪਾਕਮਨੋਧਾਤੁ ਵਿਞ੍ਞਾਣਚਰਿਯਾ ਧਮ੍ਮੇਸੁ, ਅਭਿਨਿਰੋਪਿਤਤ੍ਤਾ ਵਿਪਾਕਮਨੋਵਿਞ੍ਞਾਣਧਾਤੁ ਵਿਞ੍ਞਾਣਚਰਿਯਾ ਧਮ੍ਮੇਸੁ.

੬੯. ਵਿਞ੍ਞਾਣਚਰਿਯਾਤਿ ਕੇਨਟ੍ਠੇਨ ਵਿਞ੍ਞਾਣਚਰਿਯਾ? ਨੀਰਾਗਾ ਚਰਤੀਤਿ – ਵਿਞ੍ਞਾਣਚਰਿਯਾ. ਨਿਦ੍ਦੋਸਾ ਚਰਤੀਤਿ – ਵਿਞ੍ਞਾਣਚਰਿਯਾ. ਨਿਮ੍ਮੋਹਾ ਚਰਤੀਤਿ – ਵਿਞ੍ਞਾਣਚਰਿਯਾ. ਨਿਮ੍ਮਾਨਾ ਚਰਤੀਤਿ – ਵਿਞ੍ਞਾਣਚਰਿਯਾ. ਨਿਦ੍ਦਿਟ੍ਠਿ ਚਰਤੀਤਿ – ਵਿਞ੍ਞਾਣਚਰਿਯਾ ਨਿਉਦ੍ਧਚ੍ਚਾ ਚਰਤੀਤਿ – ਵਿਞ੍ਞਾਣਚਰਿਯਾ. ਨਿਬ੍ਬਿਚਿਕਿਚ੍ਛਾ ਚਰਤੀਤਿ – ਵਿਞ੍ਞਾਣਚਰਿਯਾ. ਨਾਨੁਸਯਾ ਚਰਤੀਤਿ – ਵਿਞ੍ਞਾਣਚਰਿਯਾ. ਰਾਗਵਿਪ੍ਪਯੁਤ੍ਤਾ ਚਰਤੀਤਿ – ਵਿਞ੍ਞਾਣਚਰਿਯਾ. ਦੋਸਵਿਪ੍ਪਯੁਤ੍ਤਾ ਚਰਤੀਤਿ – ਵਿਞ੍ਞਾਣਚਰਿਯਾ. ਮੋਹਵਿਪ੍ਪਯੁਤ੍ਤਾ ਚਰਤੀਤਿ – ਵਿਞ੍ਞਾਣਚਰਿਯਾ. ਮਾਨਵਿਪ੍ਪਯੁਤ੍ਤਾ ਚਰਤੀਤਿ – ਵਿਞ੍ਞਾਣਚਰਿਯਾ. ਦਿਟ੍ਠਿਵਿਪ੍ਪਯੁਤ੍ਤਾ ਚਰਤੀਤਿ – ਵਿਞ੍ਞਾਣਚਰਿਯਾ. ਉਦ੍ਧਚ੍ਚਵਿਪ੍ਪਯੁਤ੍ਤਾ ਚਰਤੀਤਿ – ਵਿਞ੍ਞਾਣਚਰਿਯਾ. ਵਿਚਿਕਿਚ੍ਛਾਵਿਪ੍ਪਯੁਤ੍ਤਾ ਚਰਤੀਤਿ – ਵਿਞ੍ਞਾਣਚਰਿਯਾ. ਅਨੁਸਯਵਿਪ੍ਪਯੁਤ੍ਤਾ ਚਰਤੀਤਿ – ਵਿਞ੍ਞਾਣਚਰਿਯਾ. ਕੁਸਲੇਹਿ ਕਮ੍ਮੇਹਿ ਸਮ੍ਪਯੁਤ੍ਤਾ ਚਰਤੀਤਿ – ਵਿਞ੍ਞਾਣਚਰਿਯਾ. ਅਕੁਸਲੇਹਿ ਕਮ੍ਮੇਹਿ ਵਿਪ੍ਪਯੁਤ੍ਤਾ ਚਰਤੀਤਿ – ਵਿਞ੍ਞਾਣਚਰਿਯਾ. ਸਾਵਜ੍ਜੇਹਿ ਕਮ੍ਮੇਹਿ ਵਿਪ੍ਪਯੁਤ੍ਤਾ ਚਰਤੀਤਿ – ਵਿਞ੍ਞਾਣਚਰਿਯਾ. ਅਨਵਜ੍ਜੇਹਿ ਕਮ੍ਮੇਹਿ ਸਮ੍ਪਯੁਤ੍ਤਾ ਚਰਤੀਤਿ – ਵਿਞ੍ਞਾਣਚਰਿਯਾ. ਕਣ੍ਹੇਹਿ ਕਮ੍ਮੇਹਿ ਵਿਪ੍ਪਯੁਤ੍ਤਾ ਚਰਤੀਤਿ – ਵਿਞ੍ਞਾਣਚਰਿਯਾ. ਸੁਕ੍ਕੇਹਿ ਕਮ੍ਮੇਹਿ ਸਮ੍ਪਯੁਤ੍ਤਾ ਚਰਤੀਤਿ – ਵਿਞ੍ਞਾਣਚਰਿਯਾ. ਸੁਖੁਦ੍ਰਯੇਹਿ ਕਮ੍ਮੇਹਿ ਸਮ੍ਪਯੁਤ੍ਤਾ ਚਰਤੀਤਿ – ਵਿਞ੍ਞਾਣਚਰਿਯਾ. ਦੁਕ੍ਖੁਦ੍ਰਯੇਹਿ ਕਮ੍ਮੇਹਿ ਵਿਪ੍ਪਯੁਤ੍ਤਾ ਚਰਤੀਤਿ – ਵਿਞ੍ਞਾਣਚਰਿਯਾ. ਸੁਖਵਿਪਾਕੇਹਿ ਕਮ੍ਮੇਹਿ ਸਮ੍ਪਯੁਤ੍ਤਾ ਚਰਤੀਤਿ – ਵਿਞ੍ਞਾਣਚਰਿਯਾ. ਦੁਕ੍ਖਵਿਪਾਕੇਹਿ ਕਮ੍ਮੇਹਿ ਵਿਪ੍ਪਯੁਤ੍ਤਾ ਚਰਤੀਤਿ – ਵਿਞ੍ਞਾਣਚਰਿਯਾ. ਵਿਞ੍ਞਾਤੇ ਚਰਤੀਤਿ – ਵਿਞ੍ਞਾਣਚਰਿਯਾ. ਵਿਞ੍ਞਾਣਸ੍ਸ ਏਵਰੂਪਾ ਚਰਿਯਾ ਹੋਤੀਤਿ – ਵਿਞ੍ਞਾਣਚਰਿਯਾ. ਪਕਤਿਪਰਿਸੁਦ੍ਧਮਿਦਂ ਚਿਤ੍ਤਂ ਨਿਕ੍ਕਿਲੇਸਟ੍ਠੇਨਾਤਿ – ਵਿਞ੍ਞਾਣਚਰਿਯਾ. ਅਯਂ ਵਿਞ੍ਞਾਣਚਰਿਯਾ.

ਕਤਮਾ ਅਞ੍ਞਾਣਚਰਿਯਾ? ਮਨਾਪਿਯੇਸੁ ਰੂਪੇਸੁ ਰਾਗਸ੍ਸ ਜਵਨਤ੍ਥਾਯ ਆਵਜ੍ਜਨਕਿਰਿਯਾਬ੍ਯਾਕਤਾ ਵਿਞ੍ਞਾਣਚਰਿਯਾ; ਰਾਗਸ੍ਸ ਜਵਨਾ ਅਞ੍ਞਾਣਚਰਿਯਾ. ਅਮਨਾਪਿਯੇਸੁ ਰੂਪੇਸੁ ਦੋਸਸ੍ਸ ਜਵਨਤ੍ਥਾਯ ਆਵਜ੍ਜਨਕਿਰਿਯਾਬ੍ਯਾਕਤਾ ਵਿਞ੍ਞਾਣਚਰਿਯਾ; ਦੋਸਸ੍ਸ ਜਵਨਾ ਅਞ੍ਞਾਣਚਰਿਯਾ. ਤਦੁਭਯੇਨ ਅਸਮਪੇਕ੍ਖਨਸ੍ਮਿਂ ਵਤ੍ਥੁਸ੍ਮਿਂ ਮੋਹਸ੍ਸ ਜਵਨਤ੍ਥਾਯ ਆਵਜ੍ਜਨਕਿਰਿਯਾਬ੍ਯਾਕਤਾ ਵਿਞ੍ਞਾਣਚਰਿਯਾ; ਮੋਹਸ੍ਸ ਜਵਨਾ ਅਞ੍ਞਾਣਚਰਿਯਾ. ਵਿਨਿਬਨ੍ਧਸ੍ਸ ਮਾਨਸ੍ਸ ਜਵਨਤ੍ਥਾਯ ਆਵਜ੍ਜਨਕਿਰਿਯਾਬ੍ਯਾਕਤਾ ਵਿਞ੍ਞਾਣਚਰਿਯਾ; ਮਾਨਸ੍ਸ ਜਵਨਾ ਅਞ੍ਞਾਣਚਰਿਯਾ. ਪਰਾਮਟ੍ਠਾਯ ਦਿਟ੍ਠਿਯਾ ਜਵਨਤ੍ਥਾਯ ਆਵਜ੍ਜਨਕਿਰਿਯਾਬ੍ਯਾਕਤਾ ਵਿਞ੍ਞਾਣਚਰਿਯਾ; ਦਿਟ੍ਠਿਯਾ ਜਵਨਾ ਅਞ੍ਞਾਣਚਰਿਯਾ. ਵਿਕ੍ਖੇਪਗਤਸ੍ਸ ਉਦ੍ਧਚ੍ਚਸ੍ਸ ਜਵਨਤ੍ਥਾਯ ਆਵਜ੍ਜਨਕਿਰਿਯਾਬ੍ਯਾਕਤਾ ਵਿਞ੍ਞਾਣਚਰਿਯਾ; ਉਦ੍ਧਚ੍ਚਸ੍ਸ ਜਵਨਾ ਅਞ੍ਞਾਣਚਰਿਯਾ. ਅਨਿਟ੍ਠਙ੍ਗਤਾਯ ਵਿਚਿਕਿਚ੍ਛਾਯ ਜਵਨਤ੍ਥਾਯ ਆਵਜ੍ਜਨਕਿਰਿਯਾਬ੍ਯਾਕਤਾ ਵਿਞ੍ਞਾਣਚਰਿਯਾ; ਵਿਚਿਕਿਚ੍ਛਾਯ ਜਵਨਾ ਅਞ੍ਞਾਣਚਰਿਯਾ. ਥਾਮਗਤਸ੍ਸ ਅਨੁਸਯਸ੍ਸ ਜਵਨਤ੍ਥਾਯ ਆਵਜ੍ਜਨਕਿਰਿਯਾਬ੍ਯਾਕਤਾ ਵਿਞ੍ਞਾਣਚਰਿਯਾ; ਅਨੁਸਯਸ੍ਸ ਜਵਨਾ ਅਞ੍ਞਾਣਚਰਿਯਾ.

ਮਨਾਪਿਯੇਸੁ ਸਦ੍ਦੇਸੁ…ਪੇ… ਮਨਾਪਿਯੇਸੁ ਗਨ੍ਧੇਸੁ…ਪੇ… ਮਨਾਪਿਯੇਸੁ ਰਸੇਸੁ…ਪੇ… ਮਨਾਪਿਯੇਸੁ ਫੋਟ੍ਠਬ੍ਬੇਸੁ…ਪੇ… ਮਨਾਪਿਯੇਸੁ ਧਮ੍ਮੇਸੁ ਰਾਗਸ੍ਸ ਜਵਨਤ੍ਥਾਯ ਆਵਜ੍ਜਨਕਿਰਿਯਾਬ੍ਯਾਕਤਾ ਵਿਞ੍ਞਾਣਚਰਿਯਾ; ਰਾਗਸ੍ਸ ਜਵਨਾ ਅਞ੍ਞਾਣਚਰਿਯਾ. ਅਮਨਾਪਿਯੇਸੁ ਧਮ੍ਮੇਸੁ ਦੋਸਸ੍ਸ ਜਵਨਤ੍ਥਾਯ ਆਵਜ੍ਜਨਕਿਰਿਯਾਬ੍ਯਾਕਤਾ ਵਿਞ੍ਞਾਣਚਰਿਯਾ; ਦੋਸਸ੍ਸ ਜਵਨਾ ਅਞ੍ਞਾਣਚਰਿਯਾ. ਤਦੁਭਯੇਨ ਅਸਮਪੇਕ੍ਖਨਸ੍ਮਿਂ ਵਤ੍ਥੁਸ੍ਮਿਂ ਮੋਹਸ੍ਸ ਜਵਨਤ੍ਥਾਯ ਆਵਜ੍ਜਨਕਿਰਿਯਾਬ੍ਯਾਕਤਾ ਵਿਞ੍ਞਾਣਚਰਿਯਾ; ਮੋਹਸ੍ਸ ਜਵਨਾ ਅਞ੍ਞਾਣਚਰਿਯਾ. ਵਿਨਿਬਨ੍ਧਸ੍ਸ ਮਾਨਸ੍ਸ ਜਵਨਤ੍ਥਾਯ ਆਵਜ੍ਜਨਕਿਰਿਯਾਬ੍ਯਾਕਤਾ ਵਿਞ੍ਞਾਣਚਰਿਯਾ; ਮਾਨਸ੍ਸ ਜਵਨਾ ਅਞ੍ਞਾਣਚਰਿਯਾ. ਪਰਾਮਟ੍ਠਾਯ ਦਿਟ੍ਠਿਯਾ ਜਵਨਤ੍ਥਾਯ ਆਵਜ੍ਜਨਕਿਰਿਯਾਬ੍ਯਾਕਤਾ ਵਿਞ੍ਞਾਣਚਰਿਯਾ; ਦਿਟ੍ਠਿਯਾ ਜਵਨਾ ਅਞ੍ਞਾਣਚਰਿਯਾ. ਵਿਕ੍ਖੇਪਗਤਸ੍ਸ ਉਦ੍ਧਚ੍ਚਸ੍ਸ ਜਵਨਤ੍ਥਾਯ ਆਵਜ੍ਜਨਕਿਰਿਯਾਬ੍ਯਾਕਤਾ ਵਿਞ੍ਞਾਣਚਰਿਯਾ; ਉਦ੍ਧਚ੍ਚਸ੍ਸ ਜਵਨਾ ਅਞ੍ਞਾਣਚਰਿਯਾ; ਅਨਿਟ੍ਠਙ੍ਗਤਾਯ ਵਿਚਿਕਿਚ੍ਛਾਯ ਜਵਨਤ੍ਥਾਯ ਆਵਜ੍ਜਨਕਿਰਿਯਾਬ੍ਯਾਕਤਾ ਵਿਞ੍ਞਾਣਚਰਿਯਾ; ਵਿਚਿਕਿਚ੍ਛਾਯ ਜਵਨਾ ਅਞ੍ਞਾਣਚਰਿਯਾ. ਥਾਮਗਤਸ੍ਸ ਅਨੁਸਯਸ੍ਸ ਜਵਨਤ੍ਥਾਯ ਆਵਜ੍ਜਨਕਿਰਿਯਾਬ੍ਯਾਕਤਾ ਵਿਞ੍ਞਾਣਚਰਿਯਾ; ਅਨੁਸਯਸ੍ਸ ਜਵਨਾ ਅਞ੍ਞਾਣਚਰਿਯਾ.

੭੦. ਅਞ੍ਞਾਣਚਰਿਯਾਤਿ ਕੇਨਟ੍ਠੇਨ ਅਞ੍ਞਾਣਚਰਿਯਾ? ਸਰਾਗਾ ਚਰਤੀਤਿ – ਅਞ੍ਞਾਣਚਰਿਯਾ. ਸਦੋਸਾ ਚਰਤੀਤਿ – ਅਞ੍ਞਾਣਚਰਿਯਾ. ਸਮੋਹਾ ਚਰਤੀਤਿ – ਅਞ੍ਞਾਣਚਰਿਯਾ. ਸਮਾਨਾ ਚਰਤੀਤਿ – ਅਞ੍ਞਾਣਚਰਿਯਾ. ਸਦਿਟ੍ਠਿ ਚਰਤੀਤਿ – ਅਞ੍ਞਾਣਚਰਿਯਾ. ਸਉਦ੍ਧਚ੍ਚਾ ਚਰਤੀਤਿ – ਅਞ੍ਞਾਣਚਰਿਯਾ. ਸਵਿਚਿਕਿਚ੍ਛਾ ਚਰਤੀਤਿ – ਅਞ੍ਞਾਣਚਰਿਯਾ. ਸਾਨੁਸਯਾ ਚਰਤੀਤਿ – ਅਞ੍ਞਾਣਚਰਿਯਾ. ਰਾਗਸਮ੍ਪਯੁਤ੍ਤਾ ਚਰਤੀਤਿ – ਅਞ੍ਞਾਣਚਰਿਯਾ. ਦੋਸਸਮ੍ਪਯੁਤ੍ਤਾ ਚਰਤੀਤਿ – ਅਞ੍ਞਾਣਚਰਿਯਾ. ਮੋਹਸਮ੍ਪਯੁਤ੍ਤਾ ਚਰਤੀਤਿ – ਅਞ੍ਞਾਣਚਰਿਯਾ. ਮਾਨਸਮ੍ਪਯੁਤ੍ਤਾ ਚਰਤੀਤਿ – ਅਞ੍ਞਾਣਚਰਿਯਾ. ਦਿਟ੍ਠਿਸਮ੍ਪਯੁਤ੍ਤਾ ਚਰਤੀਤਿ – ਅਞ੍ਞਾਣਚਰਿਯਾ. ਉਦ੍ਧਚ੍ਚਸਮ੍ਪਯੁਤ੍ਤਾ ਚਰਤੀਤਿ – ਅਞ੍ਞਾਣਚਰਿਯਾ. ਵਿਚਿਕਿਚ੍ਛਾਸਮ੍ਪਯੁਤ੍ਤਾ ਚਰਤੀਤਿ – ਅਞ੍ਞਾਣਚਰਿਯਾ. ਅਨੁਸਯਸਮ੍ਪਯੁਤ੍ਤਾ ਚਰਤੀਤਿ – ਅਞ੍ਞਾਣਚਰਿਯਾ. ਕੁਸਲੇਹਿ ਕਮ੍ਮੇਹਿ ਵਿਪ੍ਪਯੁਤ੍ਤਾ ਚਰਤੀਤਿ – ਅਞ੍ਞਾਣਚਰਿਯਾ. ਅਕੁਸਲੇਹਿ ਕਮ੍ਮੇਹਿ ਸਮ੍ਪਯੁਤ੍ਤਾ ਚਰਤੀਤਿ – ਅਞ੍ਞਾਣਚਰਿਯਾ. ਸਾਵਜ੍ਜੇਹਿ ਕਮ੍ਮੇਹਿ ਸਮ੍ਪਯੁਤ੍ਤਾ ਚਰਤੀਤਿ – ਅਞ੍ਞਾਣਚਰਿਯਾ. ਅਨਵਜ੍ਜੇਹਿ ਕਮ੍ਮੇਹਿ ਵਿਪ੍ਪਯੁਤ੍ਤਾ ਚਰਤੀਤਿ – ਅਞ੍ਞਾਣਚਰਿਯਾ. ਕਣ੍ਹੇਹਿ ਕਮ੍ਮੇਹਿ ਸਮ੍ਪਯੁਤ੍ਤਾ ਚਰਤੀਤਿ – ਅਞ੍ਞਾਣਚਰਿਯਾ. ਸੁਕ੍ਕੇਹਿ ਕਮ੍ਮੇਹਿ ਵਿਪ੍ਪਯੁਤ੍ਤਾ ਚਰਤੀਤਿ – ਅਞ੍ਞਾਣਚਰਿਯਾ. ਸੁਖੁਦ੍ਰਯੇਹਿ ਕਮ੍ਮੇਹਿ ਵਿਪ੍ਪਯੁਤ੍ਤਾ ਚਰਤੀਤਿ – ਅਞ੍ਞਾਣਚਰਿਯਾ. ਦੁਕ੍ਖੁਦ੍ਰਯੇਹਿ ਕਮ੍ਮੇਹਿ ਸਮ੍ਪਯੁਤ੍ਤਾ ਚਰਤੀਤਿ – ਅਞ੍ਞਾਣਚਰਿਯਾ. ਸੁਖਵਿਪਾਕੇਹਿ ਕਮ੍ਮੇਹਿ ਵਿਪ੍ਪਯੁਤ੍ਤਾ ਚਰਤੀਤਿ – ਅਞ੍ਞਾਣਚਰਿਯਾ. ਦੁਕ੍ਖਵਿਪਾਕੇਹਿ ਕਮ੍ਮੇਹਿ ਸਮ੍ਪਯੁਤ੍ਤਾ ਚਰਤੀਤਿ – ਅਞ੍ਞਾਣਚਰਿਯਾ. ਅਞ੍ਞਾਤੇ ਚਰਤੀਤਿ – ਅਞ੍ਞਾਣਚਰਿਯਾ. ਅਞ੍ਞਾਣਸ੍ਸ ਏਵਰੂਪਾ ਚਰਿਯਾ ਹੋਤੀਤਿ – ਅਞ੍ਞਾਣਚਰਿਯਾ. ਅਯਂ ਅਞ੍ਞਾਣਚਰਿਯਾ.

੭੧. ਕਤਮਾ ਞਾਣਚਰਿਯਾ? ਅਨਿਚ੍ਚਾਨੁਪਸ੍ਸਨਤ੍ਥਾਯ ਆਵਜ੍ਜਨਕਿਰਿਯਾਬ੍ਯਾਕਤਾ ਵਿਞ੍ਞਾਣਚਰਿਯਾ; ਅਨਿਚ੍ਚਾਨੁਪਸ੍ਸਨਾ ਞਾਣਚਰਿਯਾ. ਦੁਕ੍ਖਾਨੁਪਸ੍ਸਨਤ੍ਥਾਯ ਆਵਜ੍ਜਨਕਿਰਿਯਾਬ੍ਯਾਕਤਾ ਵਿਞ੍ਞਾਣਚਰਿਯਾ; ਦੁਕ੍ਖਾਨੁਪਸ੍ਸਨਾ ਞਾਣਚਰਿਯਾ. ਅਨਤ੍ਤਾਨੁਪਸ੍ਸਨਤ੍ਥਾਯ ਆਵਜ੍ਜਨਕਿਰਿਯਾਬ੍ਯਾਕਤਾ ਵਿਞ੍ਞਾਣਚਰਿਯਾ; ਅਨਤ੍ਤਾਨੁਪਸ੍ਸਨਾ ਞਾਣਚਰਿਯਾ. ਨਿਬ੍ਬਿਦਾਨੁਪਸ੍ਸਨਤ੍ਥਾਯ…ਪੇ… ਵਿਰਾਗਾਨੁਪਸ੍ਸਨਤ੍ਥਾਯ… ਨਿਰੋਧਾਨੁਪਸ੍ਸਨਤ੍ਥਾਯ… ਪਟਿਨਿਸ੍ਸਗ੍ਗਾਨੁਪਸ੍ਸਨਤ੍ਥਾਯ… ਖਯਾਨੁਪਸ੍ਸਨਤ੍ਥਾਯ… ਵਯਾਨੁਪਸ੍ਸਨਤ੍ਥਾਯ… ਵਿਪਰਿਣਾਮਾਨੁਪਸ੍ਸਨਤ੍ਥਾਯ… ਅਨਿਮਿਤ੍ਤਾਨੁਪਸ੍ਸਨਤ੍ਥਾਯ… ਅਪ੍ਪਣਿਹਿਤਾਨੁਪਸ੍ਸਨਤ੍ਥਾਯ… ਸੁਞ੍ਞਤਾਨੁਪਸ੍ਸਨਤ੍ਥਾਯ… ਅਧਿਪਞ੍ਞਾਧਮ੍ਮਾਨੁਪਸ੍ਸਨਤ੍ਥਾਯ… ਯਥਾਭੂਤਞਾਣਦਸ੍ਸਨਤ੍ਥਾਯ… ਆਦੀਨਵਾਨੁਪਸ੍ਸਨਤ੍ਥਾਯ… ਪਟਿਸਙ੍ਖਾਨੁਪਸ੍ਸਨਤ੍ਥਾਯ ਆਵਜ੍ਜਨਕਿਰਿਯਾਬ੍ਯਾਕਤਾ ਵਿਞ੍ਞਾਣਚਰਿਯਾ; ਪਟਿਸਙ੍ਖਾਨੁਪਸ੍ਸਨਾ ਞਾਣਚਰਿਯਾ. ਵਿਵਟ੍ਟਨਾਨੁਪਸ੍ਸਨਾ ਞਾਣਚਰਿਯਾ. ਸੋਤਾਪਤ੍ਤਿਮਗ੍ਗੋ ਞਾਣਚਰਿਯਾ. ਸੋਤਾਪਤ੍ਤਿਫਲਸਮਾਪਤ੍ਤਿ ਞਾਣਚਰਿਯਾ. ਸਕਦਾਗਾਮਿਮਗ੍ਗੋ ਞਾਣਚਰਿਯਾ. ਸਕਦਾਗਾਮਿਫਲਸਮਾਪਤ੍ਤਿ ਞਾਣਚਰਿਯਾ. ਅਨਾਗਾਮਿਮਗ੍ਗੋ ਞਾਣਚਰਿਯਾ. ਅਨਾਗਾਮਿਫਲਸਮਾਪਤ੍ਤਿ ਞਾਣਚਰਿਯਾ. ਅਰਹਤ੍ਤਮਗ੍ਗੋ ਞਾਣਚਰਿਯਾ. ਅਰਹਤ੍ਤਫਲਸਮਾਪਤ੍ਤਿ ਞਾਣਚਰਿਯਾ.

ਞਾਣਚਰਿਯਾਤਿ ਕੇਨਟ੍ਠੇਨ ਞਾਣਚਰਿਯਾ? ਨੀਰਾਗਾ ਚਰਤੀਤਿ – ਞਾਣਚਰਿਯਾ. ਨਿਦ੍ਦੋਸਾ ਚਰਤੀਤਿ – ਞਾਣਚਰਿਯਾ…ਪੇ… ਨਾਨੁਸਯਾ ਚਰਤੀਤਿ – ਞਾਣਚਰਿਯਾ. ਰਾਗਵਿਪ੍ਪਯੁਤ੍ਤਾ ਚਰਤੀਤਿ – ਞਾਣਚਰਿਯਾ. ਦੋਸਵਿਪ੍ਪਯੁਤ੍ਤਾ ਚਰਤੀਤਿ – ਞਾਣਚਰਿਯਾ. ਮੋਹਵਿਪ੍ਪਯੁਤ੍ਤਾ ਚਰਤੀਤਿ – ਞਾਣਚਰਿਯਾ. ਮਾਨਵਿਪ੍ਪਯੁਤ੍ਤਾ…ਪੇ… ਦਿਟ੍ਠਿਵਿਪ੍ਪਯੁਤ੍ਤਾ… ਉਦ੍ਧਚ੍ਚਵਿਪ੍ਪਯੁਤ੍ਤਾ… ਵਿਚਿਕਿਚ੍ਛਾਵਿਪ੍ਪਯੁਤ੍ਤਾ… ਅਨੁਸਯਵਿਪ੍ਪਯੁਤ੍ਤਾ… ਕੁਸਲੇਹਿ ਕਮ੍ਮੇਹਿ ਸਮ੍ਪਯੁਤ੍ਤਾ… ਅਕੁਸਲੇਹਿ ਕਮ੍ਮੇਹਿ ਵਿਪ੍ਪਯੁਤ੍ਤਾ… ਸਾਵਜ੍ਜੇਹਿ ਕਮ੍ਮੇਹਿ ਵਿਪ੍ਪਯੁਤ੍ਤਾ… ਅਨਵਜ੍ਜੇਹਿ ਕਮ੍ਮੇਹਿ ਸਮ੍ਪਯੁਤ੍ਤਾ… ਕਣ੍ਹੇਹਿ ਕਮ੍ਮੇਹਿ ਵਿਪ੍ਪਯੁਤ੍ਤਾ… ਸੁਕ੍ਕੇਹਿ ਕਮ੍ਮੇਹਿ ਸਮ੍ਪਯੁਤ੍ਤਾ… ਸੁਖੁਦ੍ਰਯੇਹਿ ਕਮ੍ਮੇਹਿ ਸਮ੍ਪਯੁਤ੍ਤਾ… ਦੁਕ੍ਖੁਦ੍ਰਯੇਹਿ ਕਮ੍ਮੇਹਿ ਵਿਪ੍ਪਯੁਤ੍ਤਾ… ਸੁਖਵਿਪਾਕੇਹਿ ਕਮ੍ਮੇਹਿ ਸਮ੍ਪਯੁਤ੍ਤਾ ਚਰਤੀਤਿ – ਞਾਣਚਰਿਯਾ. ਦੁਕ੍ਖਵਿਪਾਕੇਹਿ ਕਮ੍ਮੇਹਿ ਵਿਪ੍ਪਯੁਤ੍ਤਾ ਚਰਤੀਤਿ – ਞਾਣਚਰਿਯਾ. ਞਾਤੇ ਚਰਤੀਤਿ – ਞਾਣਚਰਿਯਾ. ਞਾਣਸ੍ਸ ਏਵਰੂਪਾ ਚਰਿਯਾ ਹੋਤੀਤਿ – ਞਾਣਚਰਿਯਾ. ਅਯਂ ਞਾਣਚਰਿਯਾ. ਅਞ੍ਞਾ ਵਿਞ੍ਞਾਣਚਰਿਯਾ, ਅਞ੍ਞਾ ਅਞ੍ਞਾਣਚਰਿਯਾ, ਅਞ੍ਞਾ ਞਾਣਚਰਿਯਾਤਿ. ਤਂ ਞਾਤਟ੍ਠੇਨ ਞਾਣਂ, ਪਜਾਨਨਟ੍ਠੇਨ ਪਞ੍ਞਾ. ਤੇਨ ਵੁਚ੍ਚਤਿ – ‘‘ਚਰਿਯਾਵਵਤ੍ਥਾਨੇ ਪਞ੍ਞਾ ਚਰਿਯਾਨਾਨਤ੍ਤੇ ਞਾਣਂ’’.

ਚਰਿਯਾਨਾਨਤ੍ਤਞਾਣਨਿਦ੍ਦੇਸੋ ਸਤ੍ਤਰਸਮੋ.