੩੯੩. ਵਿਘਾਸਾਦਜਾਤਕਂ (੬-੨-੮)

੧੨੨. ਸੁਸੁਖਂ ਵਤ ਜੀਵਨ੍ਤਿ, ਯੇ ਜਨਾ ਵਿਘਾਸਾਦਿਨੋ;

ਦਿਟ੍ਠੇਵ ਧਮ੍ਮੇ ਪਾਸਂਸਾ, ਸਮ੍ਪਰਾਯੇ ਚ ਸੁਗ੍ਗਤੀ.

੧੨੩. ਸੁਕਸ੍ਸ [ਸੁਵਸ੍ਸ (ਸੀ. ਸ੍ਯਾ. ਪੀ.)] ਭਾਸਮਾਨਸ੍ਸ, ਨ ਨਿਸਾਮੇਥ ਪਣ੍ਡਿਤਾ;

ਇਦਂ ਸੁਣਾਥ ਸੋਦਰਿਯਾ, ਅਮ੍ਹੇਵਾਯਂ ਪਸਂਸਤਿ.

੧੨੪. ਨਾਹਂ ਤੁਮ੍ਹੇ ਪਸਂਸਾਮਿ, ਕੁਣਪਾਦਾ ਸੁਣਾਥ ਮੇ;

ਉਚ੍ਛਿਟ੍ਠਭੋਜਿਨੋ [ਭੋਜਨਾ (ਕ.)] ਤੁਮ੍ਹੇ, ਨ ਤੁਮ੍ਹੇ ਵਿਘਾਸਾਦਿਨੋ.

੧੨੫. ਸਤ੍ਤਵਸ੍ਸਾ ਪਬ੍ਬਜਿਤਾ, ਮੇਜ੍ਝਾਰਞ੍ਞੇ [ਮਜ੍ਝੇਰਞ੍ਞੇ (ਕ.)] ਸਿਖਣ੍ਡਿਨੋ;

ਵਿਘਾਸੇਨੇਵ ਯਾਪੇਨ੍ਤਾ, ਮਯਂ ਚੇ ਭੋਤੋ ਗਾਰਯ੍ਹਾ;

ਕੇ ਨੁ ਭੋਤੋ ਪਸਂਸਿਯਾ.

੧੨੬. ਤੁਮ੍ਹੇ ਸੀਹਾਨਂ ਬ੍ਯਗ੍ਘਾਨਂ, ਵਾਲ਼ਾਨਞ੍ਚਾਵਸਿਟ੍ਠਕਂ;

ਉਚ੍ਛਿਟ੍ਠੇਨੇਵ ਯਾਪੇਨ੍ਤਾ, ਮਞ੍ਞਿਵ੍ਹੋ ਵਿਘਾਸਾਦਿਨੋ.

੧੨੭. ਯੇ ਬ੍ਰਾਹ੍ਮਣਸ੍ਸ ਸਮਣਸ੍ਸ, ਅਞ੍ਞਸ੍ਸ ਵਾ [ਅਞ੍ਞਸ੍ਸ ਚ (ਸੀ. ਸ੍ਯਾ.), ਅਞ੍ਞਸ੍ਸੇਵ (ਪੀ.)] ਵਨਿਬ੍ਬਿਨੋ [ਵਣਿਬ੍ਬਿਨੋ (ਸੀ. ਸ੍ਯਾ.)];

ਦਤ੍ਵਾਵ [ਦਤ੍ਵਾਨ (ਪੀ. ਕ.)] ਸੇਸਂ ਭੁਞ੍ਜਨ੍ਤਿ, ਤੇ ਜਨਾ ਵਿਘਾਸਾਦਿਨੋਤਿ.

ਵਿਘਾਸਾਦਜਾਤਕਂ ਅਟ੍ਠਮਂ.