੫੨੭. ਉਮ੍ਮਾਦਨ੍ਤੀਜਾਤਕਂ (੨)

੫੭. ‘‘ਨਿਵੇਸਨਂ ਕਸ੍ਸ ਨੁਦਂ ਸੁਨਨ੍ਦ, ਪਾਕਾਰੇਨ ਪਣ੍ਡੁਮਯੇਨ ਗੁਤ੍ਤਂ;

ਕਾ ਦਿਸ੍ਸਤਿ ਅਗ੍ਗਿਸਿਖਾਵ ਦੂਰੇ, ਵੇਹਾਯਸਂ [ਵੇਹਾਸਯਂ (ਸੀ. ਪੀ.)] ਪਬ੍ਬਤਗ੍ਗੇਵ ਅਚ੍ਚਿ.

੫੮. ‘‘ਧੀਤਾ ਨ੍ਵਯਂ [ਨਯਂ (ਸੀ. ਪੀ.), ਨ੍ਵਾਯਂ (ਸ੍ਯਾ.)] ਕਸ੍ਸ ਸੁਨਨ੍ਦ ਹੋਤਿ, ਸੁਣਿਸਾ ਨ੍ਵਯਂ [ਨਯਂ (ਸੀ. ਪੀ.), ਨ੍ਵਾਯਂ (ਸ੍ਯਾ.)] ਕਸ੍ਸ ਅਥੋਪਿ ਭਰਿਯਾ;

ਅਕ੍ਖਾਹਿ ਮੇ ਖਿਪ੍ਪਮਿਧੇਵ ਪੁਟ੍ਠੋ, ਅਵਾਵਟਾ ਯਦਿ ਵਾ ਅਤ੍ਥਿ ਭਤ੍ਤਾ’’.

੫੯. ‘‘ਅਹਞ੍ਹਿ ਜਾਨਾਮਿ ਜਨਿਨ੍ਦ ਏਤਂ, ਮਤ੍ਯਾ ਚ ਪੇਤ੍ਯਾ ਚ ਅਥੋਪਿ ਅਸ੍ਸਾ;

ਤਵੇਵ ਸੋ ਪੁਰਿਸੋ ਭੂਮਿਪਾਲ, ਰਤ੍ਤਿਨ੍ਦਿਵਂ ਅਪ੍ਪਮਤ੍ਤੋ ਤਵਤ੍ਥੇ.

੬੦. ‘‘ਇਦ੍ਧੋ ਚ ਫੀਤੋ ਚ ਸੁਵਡ੍ਢਿਤੋ [ਸੁਬਾਲ਼੍ਹਿਕੋ (ਪੀ.)] ਚ, ਅਮਚ੍ਚੋ ਚ ਤੇ ਅਞ੍ਞਤਰੋ ਜਨਿਨ੍ਦ;

ਤਸ੍ਸੇਸਾ ਭਰਿਯਾਭਿਪਾਰਕਸ੍ਸ [ਅਹਿਪਾਰਕਸ੍ਸ (ਸੀ. ਪੀ.), ਅਭਿਪਾਦਕਸ੍ਸ (ਕ.)], ਉਮ੍ਮਾਦਨ੍ਤੀ [ਉਮ੍ਮਾਦਨ੍ਤੀਤਿ (ਕ.)] ਨਾਮਧੇਯ੍ਯੇਨ ਰਾਜ’’.

੬੧. ‘‘ਅਮ੍ਭੋ ਅਮ੍ਭੋ ਨਾਮਮਿਦਂ ਇਮਿਸ੍ਸਾ, ਮਤ੍ਯਾ ਚ ਪੇਤ੍ਯਾ ਚ ਕਤਂ ਸੁਸਾਧੁ;

ਤਦਾ [ਤਥਾ (ਸੀ. ਸ੍ਯਾ. ਪੀ.)] ਹਿ ਮਯ੍ਹਂ ਅਵਲੋਕਯਨ੍ਤੀ, ਉਮ੍ਮਤ੍ਤਕਂ ਉਮ੍ਮਦਨ੍ਤੀ ਅਕਾਸਿ’’.

੬੨. ‘‘ਯਾ ਪੁਣ੍ਣਮਾਸੇ [ਪੁਣ੍ਣਮਾਯੇ (ਕ.)] ਮਿਗਮਨ੍ਦਲੋਚਨਾ, ਉਪਾਵਿਸਿ ਪੁਣ੍ਡਰੀਕਤ੍ਤਚਙ੍ਗੀ;

ਦ੍ਵੇ ਪੁਣ੍ਣਮਾਯੋ ਤਦਹੂ ਅਮਞ੍ਞਹਂ, ਦਿਸ੍ਵਾਨ ਪਾਰਾਵਤਰਤ੍ਤਵਾਸਿਨਿਂ.

੬੩. ‘‘ਅਲ਼ਾਰਪਮ੍ਹੇਹਿ ਸੁਭੇਹਿ ਵਗ੍ਗੁਭਿ, ਪਲੋਭਯਨ੍ਤੀ ਮਂ ਯਦਾ ਉਦਿਕ੍ਖਤਿ;

ਵਿਜਮ੍ਭਮਾਨਾ ਹਰਤੇਵ ਮੇ ਮਨੋ, ਜਾਤਾ ਵਨੇ ਕਿਮ੍ਪੁਰਿਸੀਵ ਪਬ੍ਬਤੇ.

੬੪. ‘‘ਤਦਾ ਹਿ ਬ੍ਰਹਤੀ ਸਾਮਾ, ਆਮੁਤ੍ਤਮਣਿਕੁਣ੍ਡਲਾ;

ਏਕਚ੍ਚਵਸਨਾ ਨਾਰੀ, ਮਿਗੀ ਭਨ੍ਤਾਵੁਦਿਕ੍ਖਤਿ.

੬੫. ‘‘ਕਦਾਸ੍ਸੁ ਮਂ ਤਮ੍ਬਨਖਾ ਸੁਲੋਮਾ, ਬਾਹਾਮੁਦੂ ਚਨ੍ਦਨਸਾਰਲਿਤ੍ਤਾ;

ਵਟ੍ਟਙ੍ਗੁਲੀ ਸਨ੍ਨਤਧੀਰਕੁਤ੍ਤਿਯਾ, ਨਾਰੀ ਉਪਞ੍ਞਿਸ੍ਸਤਿ ਸੀਸਤੋ ਸੁਭਾ.

੬੬. ‘‘ਕਦਾਸ੍ਸੁ ਮਂ ਕਞ੍ਚਨਜਾਲੁਰਚ੍ਛਦਾ, ਧੀਤਾ ਤਿਰੀਟਿਸ੍ਸ ਵਿਲਗ੍ਗਮਜ੍ਝਾ;

ਮੁਦੂਹਿ ਬਾਹਾਹਿ ਪਲਿਸ੍ਸਜਿਸ੍ਸਤਿ, ਬ੍ਰਹਾਵਨੇ ਜਾਤਦੁਮਂਵ ਮਾਲੁਵਾ.

੬੭. ‘‘ਕਦਾਸ੍ਸੁ [ਕਦਾਸ੍ਸੁ ਮਂ (ਸ੍ਯਾ. ਕ.)] ਲਾਖਾਰਸਰਤ੍ਤਸੁਚ੍ਛਵੀ, ਬਿਨ੍ਦੁਤ੍ਥਨੀ ਪੁਣ੍ਡਰੀਕਤ੍ਤਚਙ੍ਗੀ;

ਮੁਖਂ ਮੁਖੇਨ ਉਪਨਾਮਯਿਸ੍ਸਤਿ, ਸੋਣ੍ਡੋਵ ਸੋਣ੍ਡਸ੍ਸ ਸੁਰਾਯ ਥਾਲਂ.

੬੮. ‘‘ਯਦਾਦ੍ਦਸਂ [ਯਥਾਦ੍ਦਸਂ (ਪੀ.)] ਤਂ ਤਿਟ੍ਠਨ੍ਤਿਂ, ਸਬ੍ਬਭਦ੍ਦਂ [ਸਬ੍ਬਗਤ੍ਤਂ (ਸੀ. ਸ੍ਯਾ. ਪੀ.)] ਮਨੋਰਮਂ;

ਤਤੋ ਸਕਸ੍ਸ ਚਿਤ੍ਤਸ੍ਸ, ਨਾਵਬੋਧਾਮਿ ਕਞ੍ਚਿਨਂ [ਕਿਞ੍ਚਿਨਂ (ਕ.), ਕਿਞ੍ਚਨਂ (ਪੀ.)].

੬੯. ‘‘ਉਮ੍ਮਾਦਨ੍ਤਿਮਹਂ ਦਟ੍ਠਾ [ਦਿਟ੍ਠਾ (ਸੀ. ਸ੍ਯਾ. ਪੀ. ਕ.)], ਆਮੁਤ੍ਤਮਣਿਕੁਣ੍ਡਲਂ;

ਨ ਸੁਪਾਮਿ ਦਿਵਾਰਤ੍ਤਿਂ, ਸਹਸ੍ਸਂਵ ਪਰਾਜਿਤੋ.

੭੦. ‘‘ਸਕ੍ਕੋ ਚੇ [ਚ (ਸੀ. ਪੀ.)] ਮੇ ਵਰਂ ਦਜ੍ਜਾ, ਸੋ ਚ ਲਬ੍ਭੇਥ ਮੇ ਵਰੋ;

ਏਕਰਤ੍ਤਂ ਦ੍ਵਿਰਤ੍ਤਂ [ਦਿਰਤ੍ਤਂ (ਪੀ.)] ਵਾ, ਭਵੇਯ੍ਯਂ ਅਭਿਪਾਰਕੋ;

ਉਮ੍ਮਾਦਨ੍ਤ੍ਯਾ ਰਮਿਤ੍ਵਾਨ, ਸਿਵਿਰਾਜਾ ਤਤੋ ਸਿਯਂ’’ [ਸਿਯਾ (ਸ੍ਯਾ. ਪੀ.)].

੭੧. ‘‘ਭੂਤਾਨਿ ਮੇ ਭੂਤਪਤੀ ਨਮਸ੍ਸਤੋ, ਆਗਮ੍ਮ ਯਕ੍ਖੋ ਇਦਮੇਤਦਬ੍ਰਵਿ;

ਰਞ੍ਞੋ ਮਨੋ ਉਮ੍ਮਦਨ੍ਤ੍ਯਾ ਨਿਵਿਟ੍ਠੋ, ਦਦਾਮਿ ਤੇ ਤਂ ਪਰਿਚਾਰਯਸ੍ਸੁ’’.

੭੨. ‘‘ਪੁਞ੍ਞਾ ਵਿਧਂਸੇ ਅਮਰੋ ਨ ਚਮ੍ਹਿ, ਜਨੋ ਚ ਮੇ ਪਾਪਮਿਦਞ੍ਚ [ਪਾਪਮਿਦਨ੍ਤਿ (ਸੀ. ਪੀ.)] ਜਞ੍ਞਾ;

ਭੁਸੋ ਚ ਤ੍ਯਸ੍ਸ ਮਨਸੋ ਵਿਘਾਤੋ, ਦਤ੍ਵਾ ਪਿਯਂ ਉਮ੍ਮਦਨ੍ਤਿਂ ਅਦਟ੍ਠਾ’’.

੭੩. ‘‘ਜਨਿਨ੍ਦ ਨਾਞ੍ਞਤ੍ਰ ਤਯਾ ਮਯਾ ਵਾ, ਸਬ੍ਬਾਪਿ ਕਮ੍ਮਸ੍ਸ ਕਤਸ੍ਸ ਜਞ੍ਞਾ;

ਯਂ ਤੇ ਮਯਾ ਉਮ੍ਮਦਨ੍ਤੀ ਪਦਿਨ੍ਨਾ, ਭੁਸੇਹਿ ਰਾਜਾ ਵਨਥਂ ਸਜਾਹਿ’’.

੭੪. ‘‘ਯੋ ਪਾਪਕਂ ਕਮ੍ਮ ਕਰਂ ਮਨੁਸ੍ਸੋ, ਸੋ ਮਞ੍ਞਤਿ ਮਾਯਿਦ [ਮਾਯਿਧ (ਕ.)] ਮਞ੍ਞਿਂਸੁ ਅਞ੍ਞੇ;

ਪਸ੍ਸਨ੍ਤਿ ਭੂਤਾਨਿ ਕਰੋਨ੍ਤਮੇਤਂ, ਯੁਤ੍ਤਾ ਚ ਯੇ ਹੋਨ੍ਤਿ ਨਰਾ ਪਥਬ੍ਯਾ.

੭੫. ‘‘ਅਞ੍ਞੋ ਨੁ ਤੇ ਕੋਚਿ [ਕੋਧ (ਪੀ.)] ਨਰੋ ਪਥਬ੍ਯਾ, ਸਦ੍ਧੇਯ੍ਯ [ਸਦ੍ਦਹੇਯ੍ਯ (ਸੀ.)] ਲੋਕਸ੍ਮਿ ਨ ਮੇ ਪਿਯਾਤਿ;

ਭੁਸੋ ਚ ਤ੍ਯਸ੍ਸ ਮਨਸੋ ਵਿਘਾਤੋ, ਦਤ੍ਵਾ ਪਿਯਂ ਉਮ੍ਮਦਨ੍ਤਿਂ ਅਦਟ੍ਠਾ’’.

੭੬. ‘‘ਅਦ੍ਧਾ ਪਿਯਾ ਮਯ੍ਹ ਜਨਿਨ੍ਦ ਏਸਾ, ਨ ਸਾ ਮਮਂ ਅਪ੍ਪਿਯਾ ਭੂਮਿਪਾਲ;

ਗਚ੍ਛੇਵ ਤ੍ਵਂ ਉਮ੍ਮਦਨ੍ਤਿਂ ਭਦਨ੍ਤੇ, ਸੀਹੋਵ ਸੇਲਸ੍ਸ ਗੁਹਂ ਉਪੇਤਿ’’.

੭੭. ‘‘ਨ ਪੀਲ਼ਿਤਾ ਅਤ੍ਤਦੁਖੇਨ ਧੀਰਾ, ਸੁਖਪ੍ਫਲਂ ਕਮ੍ਮ ਪਰਿਚ੍ਚਜਨ੍ਤਿ;

ਸਮ੍ਮੋਹਿਤਾ ਵਾਪਿ ਸੁਖੇਨ ਮਤ੍ਤਾ, ਨ ਪਾਪਕਮ੍ਮਞ੍ਚ [ਪਾਪਕਂ ਕਮ੍ਮ (ਪੀ.)] ਸਮਾਚਰਨ੍ਤਿ’’.

੭੮. ‘‘ਤੁਵਞ੍ਹਿ ਮਾਤਾ ਚ ਪਿਤਾ ਚ ਮਯ੍ਹਂ, ਭਤ੍ਤਾ ਪਤੀ ਪੋਸਕੋ ਦੇਵਤਾ ਚ;

ਦਾਸੋ ਅਹਂ ਤੁਯ੍ਹ ਸਪੁਤ੍ਤਦਾਰੋ, ਯਥਾਸੁਖਂ ਸਾਮਿ [ਸਿਬ੍ਬ (ਸੀ.), ਸੀਵਿ (ਸ੍ਯਾ.)] ਕਰੋਹਿ ਕਾਮਂ’’.

੭੯. ‘‘ਯੋ ਇਸ੍ਸਰੋਮ੍ਹੀਤਿ ਕਰੋਤਿ ਪਾਪਂ, ਕਤ੍ਵਾ ਚ ਸੋ ਨੁਤ੍ਤਸਤੇ [ਨੁਤ੍ਤਪਤੇ (ਪੀ.)] ਪਰੇਸਂ;

ਨ ਤੇਨ ਸੋ ਜੀਵਤਿ ਦੀਘਮਾਯੁ [ਦੀਘਮਾਯੁਂ (ਸੀ. ਸ੍ਯਾ.)], ਦੇਵਾਪਿ ਪਾਪੇਨ ਸਮੇਕ੍ਖਰੇ ਨਂ.

੮੦. ‘‘ਅਞ੍ਞਾਤਕਂ ਸਾਮਿਕੇਹੀ ਪਦਿਨ੍ਨਂ, ਧਮ੍ਮੇ ਠਿਤਾ ਯੇ ਪਟਿਚ੍ਛਨ੍ਤਿ ਦਾਨਂ;

ਪਟਿਚ੍ਛਕਾ ਦਾਯਕਾ ਚਾਪਿ ਤਤ੍ਥ, ਸੁਖਪ੍ਫਲਞ੍ਞੇਵ ਕਰੋਨ੍ਤਿ ਕਮ੍ਮਂ’’.

੮੧. ‘‘ਅਞ੍ਞੋ ਨੁ ਤੇ ਕੋਚਿ ਨਰੋ ਪਥਬ੍ਯਾ, ਸਦ੍ਧੇਯ੍ਯ ਲੋਕਸ੍ਮਿ ਨ ਮੇ ਪਿਯਾਤਿ;

ਭੁਸੋ ਚ ਤ੍ਯਸ੍ਸ ਮਨਸੋ ਵਿਘਾਤੋ, ਦਤ੍ਵਾ ਪਿਯਂ ਉਮ੍ਮਦਨ੍ਤਿਂ ਅਦਟ੍ਠਾ’’.

੮੨. ‘‘ਅਦ੍ਧਾ ਪਿਯਾ ਮਯ੍ਹ ਜਨਿਨ੍ਦ ਏਸਾ, ਨ ਸਾ ਮਮਂ ਅਪ੍ਪਿਯਾ ਭੂਮਿਪਾਲ;

ਯਂ ਤੇ ਮਯਾ ਉਮ੍ਮਦਨ੍ਤੀ ਪਦਿਨ੍ਨਾ, ਭੁਸੇਹਿ ਰਾਜਾ ਵਨਥਂ ਸਜਾਹਿ’’.

੮੩. ‘‘ਯੋ ਅਤ੍ਤਦੁਕ੍ਖੇਨ ਪਰਸ੍ਸ ਦੁਕ੍ਖਂ, ਸੁਖੇਨ ਵਾ ਅਤ੍ਤਸੁਖਂ ਦਹਾਤਿ;

ਯਥੇਵਿਦਂ ਮਯ੍ਹ ਤਥਾ ਪਰੇਸਂ, ਯੋ [ਸੋ (ਪੀ.)] ਏਵਂ ਜਾਨਾਤਿ [ਪਜਾਨਾਤਿ (ਕ.)] ਸ ਵੇਦਿ ਧਮ੍ਮਂ.

੮੪. ‘‘ਅਞ੍ਞੋ ਨੁ ਤੇ ਕੋਚਿ ਨਰੋ ਪਥਬ੍ਯਾ, ਸਦ੍ਧੇਯ੍ਯ ਲੋਕਸ੍ਮਿ ਨ ਮੇ ਪਿਯਾਤਿ;

ਭੁਸੋ ਚ ਤ੍ਯਸ੍ਸ ਮਨਸੋ ਵਿਘਾਤੋ, ਦਤ੍ਵਾ ਪਿਯਂ ਉਮ੍ਮਦਨ੍ਤਿਂ ਅਦਟ੍ਠਾ’’.

੮੫. ‘‘ਜਨਿਨ੍ਦ ਜਾਨਾਸਿ ਪਿਯਾ ਮਮੇਸਾ, ਨ ਸਾ ਮਮਂ ਅਪ੍ਪਿਯਾ ਭੂਮਿਪਾਲ;

ਪਿਯੇਨ ਤੇ ਦਮ੍ਮਿ ਪਿਯਂ ਜਨਿਨ੍ਦ, ਪਿਯਦਾਯਿਨੋ ਦੇਵ ਪਿਯਂ ਲਭਨ੍ਤਿ’’.

੮੬. ‘‘ਸੋ ਨੂਨਾਹਂ ਵਧਿਸ੍ਸਾਮਿ, ਅਤ੍ਤਾਨਂ ਕਾਮਹੇਤੁਕਂ;

ਨ ਹਿ ਧਮ੍ਮਂ ਅਧਮ੍ਮੇਨ, ਅਹਂ ਵਧਿਤੁਮੁਸ੍ਸਹੇ’’.

੮੭. ‘‘ਸਚੇ ਤੁਵਂ ਮਯ੍ਹ ਸਤਿਂ [ਸਨ੍ਤਿ (ਕ.)] ਜਨਿਨ੍ਦ, ਨ ਕਾਮਯਾਸਿ ਨਰਵੀਰ ਸੇਟ੍ਠ;

ਚਜਾਮਿ ਨਂ ਸਬ੍ਬਜਨਸ੍ਸ ਸਿਬ੍ਯਾ [ਸਿਬ੍ਬ (ਸੀ. ਪੀ.), ਮਜ੍ਝੇ (ਸ੍ਯਾ.)], ਮਯਾ ਪਮੁਤ੍ਤਂ ਤਤੋ ਅਵ੍ਹਯੇਸਿ [ਅਵ੍ਹਯਾਸਿ (ਕ.)] ਨਂ’’.

੮੮. ‘‘ਅਦੂਸਿਯਂ ਚੇ ਅਭਿਪਾਰਕ ਤ੍ਵਂ, ਚਜਾਸਿ ਕਤ੍ਤੇ ਅਹਿਤਾਯ ਤ੍ਯਸ੍ਸ;

ਮਹਾ ਚ ਤੇ ਉਪਵਾਦੋਪਿ ਅਸ੍ਸ, ਨ ਚਾਪਿ ਤ੍ਯਸ੍ਸ ਨਗਰਮ੍ਹਿ ਪਕ੍ਖੋ’’.

੮੯. ‘‘ਅਹਂ ਸਹਿਸ੍ਸਂ ਉਪਵਾਦਮੇਤਂ, ਨਿਨ੍ਦਂ ਪਸਂਸਂ ਗਰਹਞ੍ਚ ਸਬ੍ਬਂ;

ਮਮੇਤਮਾਗਚ੍ਛਤੁ ਭੂਮਿਪਾਲ, ਯਥਾਸੁਖਂ ਸਿਵਿ [ਸਿਬ੍ਬ (ਸੀ. ਪੀ.)] ਕਰੋਹਿ ਕਾਮਂ’’.

੯੦. ‘‘ਯੋ ਨੇਵ ਨਿਨ੍ਦਂ ਨ ਪਨਪ੍ਪਸਂਸਂ, ਆਦਿਯਤਿ ਗਰਹਂ ਨੋਪਿ ਪੂਜਂ;

ਸਿਰੀ ਚ ਲਕ੍ਖੀ ਚ ਅਪੇਤਿ ਤਮ੍ਹਾ, ਆਪੋ ਸੁਵੁਟ੍ਠੀਵ ਯਥਾ ਥਲਮ੍ਹਾ’’.

੯੧. ‘‘ਯਂ ਕਿਞ੍ਚਿ ਦੁਕ੍ਖਞ੍ਚ ਸੁਖਞ੍ਚ ਏਤ੍ਤੋ, ਧਮ੍ਮਾਤਿਸਾਰਞ੍ਚ ਮਨੋਵਿਘਾਤਂ;

ਉਰਸਾ ਅਹਂ ਪਚ੍ਚੁਤ੍ਤਰਿਸ੍ਸਾਮਿ [ਪਟਿਚ੍ਛਿਸ੍ਸਾਮਿ (ਸੀ. ਸ੍ਯਾ.), ਪਚ੍ਚੁਪਦਿਸ੍ਸਾਮਿ (ਪੀ.)] ਸਬ੍ਬਂ, ਪਥਵੀ ਯਥਾ ਥਾਵਰਾਨਂ ਤਸਾਨਂ’’.

੯੨. ‘‘ਧਮ੍ਮਾਤਿਸਾਰਞ੍ਚ ਮਨੋਵਿਘਾਤਂ, ਦੁਕ੍ਖਞ੍ਚ ਨਿਚ੍ਛਾਮਿ ਅਹਂ ਪਰੇਸਂ;

ਏਕੋਵਿਮਂ ਹਾਰਯਿਸ੍ਸਾਮਿ ਭਾਰਂ, ਧਮ੍ਮੇ ਠਿਤੋ ਕਿਞ੍ਚਿ ਅਹਾਪਯਨ੍ਤੋ’’.

੯੩. ‘‘ਸਗ੍ਗੂਪਗਂ ਪੁਞ੍ਞਕਮ੍ਮਂ ਜਨਿਨ੍ਦ, ਮਾ ਮੇ ਤੁਵਂ ਅਨ੍ਤਰਾਯਂ ਅਕਾਸਿ;

ਦਦਾਮਿ ਤੇ ਉਮ੍ਮਦਨ੍ਤਿਂ ਪਸਨ੍ਨੋ, ਰਾਜਾਵ ਯਞ੍ਞੇ ਧਨਂ ਬ੍ਰਾਹ੍ਮਣਾਨਂ’’.

੯੪. ‘‘ਅਦ੍ਧਾ ਤੁਵਂ ਕਤ੍ਤੇ ਹਿਤੇਸਿ ਮਯ੍ਹਂ, ਸਖਾ ਮਮਂ ਉਮ੍ਮਦਨ੍ਤੀ ਤੁਵਞ੍ਚ;

ਨਿਨ੍ਦੇਯ੍ਯੁ ਦੇਵਾ ਪਿਤਰੋ ਚ ਸਬ੍ਬੇ, ਪਾਪਞ੍ਚ ਪਸ੍ਸਂ ਅਭਿਸਮ੍ਪਰਾਯਂ’’.

੯੫. ‘‘ਨ ਹੇਤਧਮ੍ਮਂ ਸਿਵਿਰਾਜ ਵਜ੍ਜੁਂ, ਸਨੇਗਮਾ ਜਾਨਪਦਾ ਚ ਸਬ੍ਬੇ;

ਯਂ ਤੇ ਮਯਾ ਉਮ੍ਮਦਨ੍ਤੀ ਪਦਿਨ੍ਨਾ, ਭੁਸੇਹਿ ਰਾਜਾ ਵਨਥਂ ਸਜਾਹਿ’’.

੯੬. ‘‘ਅਦ੍ਧਾ ਤੁਵਂ ਕਤ੍ਤੇ ਹਿਤੇਸਿ ਮਯ੍ਹਂ, ਸਖਾ ਮਮਂ ਉਮ੍ਮਦਨ੍ਤੀ ਤੁਵਞ੍ਚ;

ਸਤਞ੍ਚ ਧਮ੍ਮਾਨਿ ਸੁਕਿਤ੍ਤਿਤਾਨਿ, ਸਮੁਦ੍ਦਵੇਲਾਵ ਦੁਰਚ੍ਚਯਾਨਿ’’.

੯੭. ‘‘ਆਹੁਨੇਯ੍ਯੋ ਮੇਸਿ ਹਿਤਾਨੁਕਮ੍ਪੀ, ਧਾਤਾ ਵਿਧਾਤਾ ਚਸਿ ਕਾਮਪਾਲੋ;

ਤਯੀ ਹੁਤਾ ਰਾਜ ਮਹਪ੍ਫਲਾ ਹਿ [ਮਹਪ੍ਫਲਾ ਹਿ ਮੇ (ਪੀ.)], ਕਾਮੇਨ ਮੇ ਉਮ੍ਮਦਨ੍ਤਿਂ ਪਟਿਚ੍ਛ’’.

੯੮. ‘‘ਅਦ੍ਧਾ ਹਿ ਸਬ੍ਬਂ ਅਭਿਪਾਰਕ ਤ੍ਵਂ, ਧਮ੍ਮਂ ਅਚਾਰੀ ਮਮ ਕਤ੍ਤੁਪੁਤ੍ਤ;

ਅਞ੍ਞੋ ਨੁ ਤੇ ਕੋ ਇਧ ਸੋਤ੍ਥਿਕਤ੍ਤਾ, ਦ੍ਵਿਪਦੋ ਨਰੋ ਅਰੁਣੇ ਜੀਵਲੋਕੇ’’.

੯੯. ‘‘ਤੁਵਂ ਨੁ ਸੇਟ੍ਠੋ ਤ੍ਵਮਨੁਤ੍ਤਰੋਸਿ, ਤ੍ਵਂ ਧਮ੍ਮਗੂ [ਧਮ੍ਮਗੁਤ੍ਤੋ (ਸੀ.)] ਧਮ੍ਮਵਿਦੂ ਸੁਮੇਧੋ;

ਸੋ ਧਮ੍ਮਗੁਤ੍ਤੋ ਚਿਰਮੇਵ ਜੀਵ, ਧਮ੍ਮਞ੍ਚ ਮੇ ਦੇਸਯ ਧਮ੍ਮਪਾਲ’’.

੧੦੦. ‘‘ਤਦਿਙ੍ਘ ਅਭਿਪਾਰਕ, ਸੁਣੋਹਿ ਵਚਨਂ ਮਮ;

ਧਮ੍ਮਂ ਤੇ ਦੇਸਯਿਸ੍ਸਾਮਿ, ਸਤਂ ਆਸੇਵਿਤਂ ਅਹਂ.

੧੦੧. ‘‘ਸਾਧੁ ਧਮ੍ਮਰੁਚਿ ਰਾਜਾ, ਸਾਧੁ ਪਞ੍ਞਾਣਵਾ ਨਰੋ;

ਸਾਧੁ ਮਿਤ੍ਤਾਨਮਦ੍ਦੁਬ੍ਭੋ, ਪਾਪਸ੍ਸਾਕਰਣਂ ਸੁਖਂ.

੧੦੨. ‘‘ਅਕ੍ਕੋਧਨਸ੍ਸ ਵਿਜਿਤੇ, ਠਿਤਧਮ੍ਮਸ੍ਸ ਰਾਜਿਨੋ;

ਸੁਖਂ ਮਨੁਸ੍ਸਾ ਆਸੇਥ, ਸੀਤਚ੍ਛਾਯਾਯ ਸਙ੍ਘਰੇ.

੧੦੩. ‘‘ਨ ਚਾਹਮੇਤਂ ਅਭਿਰੋਚਯਾਮਿ, ਕਮ੍ਮਂ ਅਸਮੇਕ੍ਖਕਤਂ ਅਸਾਧੁ;

ਯੇ ਵਾਪਿ ਞਤ੍ਵਾਨ ਸਯਂ ਕਰੋਨ੍ਤਿ, ਉਪਮਾ ਇਮਾ ਮਯ੍ਹਂ ਤੁਵਂ ਸੁਣੋਹਿ.

੧੦੪. ‘‘ਗਵਂ ਚੇ ਤਰਮਾਨਾਨਂ, ਜਿਮ੍ਹਂ ਗਚ੍ਛਤਿ ਪੁਙ੍ਗਵੋ;

ਸਬ੍ਬਾ ਤਾ ਜਿਮ੍ਹਂ ਗਚ੍ਛਨ੍ਤਿ, ਨੇਤ੍ਤੇ ਜਿਮ੍ਹਂ ਗਤੇ ਸਤਿ.

੧੦੫. ‘‘ਏਵਮੇਵ [ਏਵਮੇਵਂ (ਪੀ.)] ਮਨੁਸ੍ਸੇਸੁ, ਯੋ ਹੋਤਿ ਸੇਟ੍ਠਸਮ੍ਮਤੋ;

ਸੋ ਚੇ ਅਧਮ੍ਮਂ ਚਰਤਿ, ਪਗੇਵ ਇਤਰਾ ਪਜਾ;

ਸਬ੍ਬਂ ਰਟ੍ਠਂ ਦੁਖਂ ਸੇਤਿ, ਰਾਜਾ ਚੇ ਹੋਤਿ ਅਧਮ੍ਮਿਕੋ.

੧੦੬. ‘‘ਗਵਂ ਚੇ ਤਰਮਾਨਾਨਂ, ਉਜੁਂ ਗਚ੍ਛਤਿ ਪੁਙ੍ਗਵੋ;

ਸਬ੍ਬਾ ਗਾਵੀ ਉਜੁਂ ਯਨ੍ਤਿ, ਨੇਤ੍ਤੇ ਉਜੁਂ ਗਤੇ ਸਤਿ.

੧੦੭. ‘‘ਏਵਮੇਵ ਮਨੁਸ੍ਸੇਸੁ, ਯੋ ਹੋਤਿ ਸੇਟ੍ਠਸਮ੍ਮਤੋ;

ਸੋ ਸਚੇ ਧਮ੍ਮਂ ਚਰਤਿ, ਪਗੇਵ ਇਤਰਾ ਪਜਾ;

ਸਬ੍ਬਂ ਰਟ੍ਠਂ ਸੁਖਂ ਸੇਤਿ, ਰਾਜਾ ਚੇ ਹੋਤਿ ਧਮ੍ਮਿਕੋ.

੧੦੮. ‘‘ਨ ਚਾਪਾਹਂ ਅਧਮ੍ਮੇਨ, ਅਮਰਤ੍ਤਮਭਿਪਤ੍ਥਯੇ;

ਇਮਂ ਵਾ ਪਥਵਿਂ ਸਬ੍ਬਂ, ਵਿਜੇਤੁਂ ਅਭਿਪਾਰਕ.

੧੦੯. ‘‘ਯਞ੍ਹਿ ਕਿਞ੍ਚਿ ਮਨੁਸ੍ਸੇਸੁ, ਰਤਨਂ ਇਧ ਵਿਜ੍ਜਤਿ;

ਗਾਵੋ ਦਾਸੋ ਹਿਰਞ੍ਞਞ੍ਚ, ਵਤ੍ਥਿਯਂ ਹਰਿਚਨ੍ਦਨਂ.

੧੧੦. ‘‘ਅਸ੍ਸਿਤ੍ਥਿਯੋ [ਅਸ੍ਸਿਤ੍ਥਿਯੋ ਚ (ਸੀ.)] ਰਤਨਂ ਮਣਿਕਞ੍ਚ, ਯਞ੍ਚਾਪਿ ਮੇ ਚਨ੍ਦਸੂਰਿਯਾ ਅਭਿਪਾਲਯਨ੍ਤਿ;

ਨ ਤਸ੍ਸ ਹੇਤੁ ਵਿਸਮਂ ਚਰੇਯ੍ਯਂ, ਮਜ੍ਝੇ ਸਿਵੀਨਂ ਉਸਭੋਮ੍ਹਿ ਜਾਤੋ.

੧੧੧. ‘‘ਨੇਤਾ ਹਿਤਾ [ਨੇਤਾਭਿ ਤਾ (ਸੀ.)] ਉਗ੍ਗਤੋ ਰਟ੍ਠਪਾਲੋ, ਧਮ੍ਮਂ ਸਿਵੀਨਂ ਅਪਚਾਯਮਾਨੋ;

ਸੋ ਧਮ੍ਮਮੇਵਾਨੁਵਿਚਿਨ੍ਤਯਨ੍ਤੋ, ਤਸ੍ਮਾ ਸਕੇ ਚਿਤ੍ਤਵਸੇ ਨ ਵਤ੍ਤੋ’’.

੧੧੨. ‘‘ਅਦ੍ਧਾ ਤੁਵਂ ਮਹਾਰਾਜ, ਨਿਚ੍ਚਂ ਅਬ੍ਯਸਨਂ ਸਿਵਂ;

ਕਰਿਸ੍ਸਸਿ ਚਿਰਂ ਰਜ੍ਜਂ, ਪਞ੍ਞਾ ਹਿ ਤਵ ਤਾਦਿਸੀ.

੧੧੩. ‘‘ਏਤਂ ਤੇ ਅਨੁਮੋਦਾਮ, ਯਂ ਧਮ੍ਮਂ ਨਪ੍ਪਮਜ੍ਜਸਿ;

ਧਮ੍ਮਂ ਪਮਜ੍ਜ ਖਤ੍ਤਿਯੋ, ਰਟ੍ਠਾ [ਠਾਨਾ (ਸੀ.)] ਚਵਤਿ ਇਸ੍ਸਰੋ.

੧੧੪. ‘‘ਧਮ੍ਮਂ ਚਰ ਮਹਾਰਾਜ, ਮਾਤਾਪਿਤੂਸੁ ਖਤ੍ਤਿਯ;

ਇਧ ਧਮ੍ਮਂ ਚਰਿਤ੍ਵਾਨ, ਰਾਜ ਸਗ੍ਗਂ ਗਮਿਸ੍ਸਸਿ.

੧੧੫. ‘‘ਧਮ੍ਮਂ ਚਰ ਮਹਾਰਾਜ, ਪੁਤ੍ਤਦਾਰੇਸੁ ਖਤ੍ਤਿਯ…ਪੇ….

੧੧੬. ‘‘ਧਮ੍ਮਂ ਚਰ ਮਹਾਰਾਜ, ਮਿਤ੍ਤਾਮਚ੍ਚੇਸੁ ਖਤ੍ਤਿਯ…ਪੇ….

੧੧੭. ‘‘ਧਮ੍ਮਂ ਚਰ ਮਹਾਰਾਜ, ਵਾਹਨੇਸੁ ਬਲੇਸੁ ਚ…ਪੇ….

੧੧੮. ‘‘ਧਮ੍ਮਂ ਚਰ ਮਹਾਰਾਜ, ਗਾਮੇਸੁ ਨਿਗਮੇਸੁ ਚ…ਪੇ….

੧੧੯. ‘‘ਧਮ੍ਮਂ ਚਰ ਮਹਾਰਾਜ, ਰਟ੍ਠੇਸੁ ਜਨਪਦੇਸੁ ਚ…ਪੇ….

੧੨੦. ‘‘ਧਮ੍ਮਂ ਚਰ ਮਹਾਰਾਜ, ਸਮਣਬ੍ਰਾਹ੍ਮਣੇਸੁ ਚ…ਪੇ….

੧੨੧. ‘‘ਧਮ੍ਮਂ ਚਰ ਮਹਾਰਾਜ, ਮਿਗਪਕ੍ਖੀਸੁ ਖਤ੍ਤਿਯ…ਪੇ….

੧੨੨. ‘‘ਧਮ੍ਮਂ ਚਰ ਮਹਾਰਾਜ, ਧਮ੍ਮੋ ਚਿਣ੍ਣੋ ਸੁਖਾਵਹੋ;

ਇਧ ਧਮ੍ਮਂ ਚਰਿਤ੍ਵਾਨ, ਰਾਜ ਸਗ੍ਗਂ ਗਮਿਸ੍ਸਸਿ.

੧੨੩. ‘‘ਧਮ੍ਮਂ ਚਰ ਮਹਾਰਾਜ, ਸਇਨ੍ਦਾ ਦੇਵਾ ਸਬ੍ਰਹ੍ਮਕਾ;

ਸੁਚਿਣ੍ਣੇਨ ਦਿਵਂ ਪਤ੍ਤਾ, ਮਾ ਧਮ੍ਮਂ ਰਾਜ ਪਾਮਦੋ’’ਤਿ.

ਉਮ੍ਮਾਦਨ੍ਤੀਜਾਤਕਂ ਦੁਤਿਯਂ.