੫੨੪. ਸਙ੍ਖਪਾਲਜਾਤਕਂ (੪)

੧੪੩. ‘‘ਅਰਿਯਾਵਕਾਸੋਸਿ ਪਸਨ੍ਨਨੇਤ੍ਤੋ, ਮਞ੍ਞੇ ਭਵਂ ਪਬ੍ਬਜਿਤੋ ਕੁਲਮ੍ਹਾ;

ਕਥਂ ਨੁ ਵਿਤ੍ਤਾਨਿ ਪਹਾਯ ਭੋਗੇ, ਪਬ੍ਬਜਿ ਨਿਕ੍ਖਮ੍ਮ ਘਰਾ ਸਪਞ੍ਞ’’ [ਸਪਞ੍ਞੋ (ਸ੍ਯਾ.), ਸਪਞ੍ਞਾ (ਪੀ.)].

੧੪੪. ‘‘ਸਯਂ ਵਿਮਾਨਂ ਨਰਦੇਵ ਦਿਸ੍ਵਾ, ਮਹਾਨੁਭਾਵਸ੍ਸ ਮਹੋਰਗਸ੍ਸ;

ਦਿਸ੍ਵਾਨ ਪੁਞ੍ਞਾਨ ਮਹਾਵਿਪਾਕਂ, ਸਦ੍ਧਾਯਹਂ ਪਬ੍ਬਜਿਤੋਮ੍ਹਿ ਰਾਜ’’.

੧੪੫. ‘‘ਨ ਕਾਮਕਾਮਾ ਨ ਭਯਾ ਨ ਦੋਸਾ, ਵਾਚਂ ਮੁਸਾ ਪਬ੍ਬਜਿਤਾ ਭਣਨ੍ਤਿ;

ਅਕ੍ਖਾਹਿ ਮੇ ਪੁਚ੍ਛਿਤੋ ਏਤਮਤ੍ਥਂ, ਸੁਤ੍ਵਾਨ ਮੇ ਜਾਯਿਹਿਤਿਪ੍ਪਸਾਦੋ’’.

੧੪੬. ‘‘ਵਾਣਿਜ੍ਜ [ਵਣਿਜ੍ਜ (ਪੀ.)] ਰਟ੍ਠਾਧਿਪ ਗਚ੍ਛਮਾਨੋ, ਪਥੇ ਅਦ੍ਦਸਾਸਿਮ੍ਹਿ ਭੋਜਪੁਤ੍ਤੇ [ਮਿਲਾਚਪੁਤ੍ਤੇ (ਸੀ. ਪੀ.)];

ਪਵਦ੍ਧਕਾਯਂ ਉਰਗਂ ਮਹਨ੍ਤਂ, ਆਦਾਯ ਗਚ੍ਛਨ੍ਤੇ ਪਮੋਦਮਾਨੇ’’.

੧੪੭. ‘‘ਸੋਹਂ ਸਮਾਗਮ੍ਮ ਜਨਿਨ੍ਦ ਤੇਹਿ, ਪਹਟ੍ਠਲੋਮੋ ਅਵਚਮ੍ਹਿ ਭੀਤੋ;

ਕੁਹਿਂ ਅਯਂ ਨੀਯਤਿ [ਨਿਯ੍ਯਤਿ (ਕ.)] ਭੀਮਕਾਯੋ, ਨਾਗੇਨ ਕਿਂ ਕਾਹਥ ਭੋਜਪੁਤ੍ਤਾ.

੧੪੮. ‘‘ਨਾਗੋ ਅਯਂ ਨੀਯਤਿ ਭੋਜਨਤ੍ਥਾ [ਭੋਜਨਤ੍ਥਂ (ਸੀ. ਸ੍ਯਾ. ਪੀ.)], ਪਵਦ੍ਧਕਾਯੋ ਉਰਗੋ ਮਹਨ੍ਤੋ;

ਸਾਦੁਞ੍ਚ ਥੂਲਞ੍ਚ ਮੁਦੁਞ੍ਚ ਮਂਸਂ, ਨ ਤ੍ਵਂ ਰਸਞ੍ਞਾਸਿ ਵਿਦੇਹਪੁਤ੍ਤ.

੧੪੯. ‘‘ਇਤੋ ਮਯਂ ਗਨ੍ਤ੍ਵਾ ਸਕਂ ਨਿਕੇਤਂ [ਨਿਕੇਤਨਂ (ਪੀ.)], ਆਦਾਯ ਸਤ੍ਥਾਨਿ ਵਿਕੋਪਯਿਤ੍ਵਾ;

ਮਂਸਾਨਿ ਭੋਕ੍ਖਾਮ [ਭਕ੍ਖਾਮ (ਸ੍ਯਾ.)] ਪਮੋਦਮਾਨਾ, ਮਯਞ੍ਹਿ ਵੇ ਸਤ੍ਤਵੋ ਪਨ੍ਨਗਾਨਂ.

੧੫੦. ‘‘ਸਚੇ ਅਯਂ ਨੀਯਤਿ ਭੋਜਨਤ੍ਥਾ, ਪਵਦ੍ਧਕਾਯੋ ਉਰਗੋ ਮਹਨ੍ਤੋ;

ਦਦਾਮਿ ਵੋ ਬਲਿਬਦ੍ਦਾਨਿ [ਬਲਿਵਦ੍ਦਾਨਿ (ਪੀ.)] ਸੋਲ਼ਸ, ਨਾਗਂ ਇਮਂ ਮੁਞ੍ਚਥ ਬਨ੍ਧਨਸ੍ਮਾ.

੧੫੧. ‘‘ਅਦ੍ਧਾ ਹਿ ਨੋ ਭਕ੍ਖੋ ਅਯਂ ਮਨਾਪੋ, ਬਹੂ ਚ ਨੋ ਉਰਗਾ ਭੁਤ੍ਤਪੁਬ੍ਬਾ [ਬਹੁਂ ਚ ਨੋ ਉਰਗੋ ਭੁਤ੍ਤਪੁਬ੍ਬੋ (ਕ.)];

ਕਰੋਮ ਤੇ ਤਂ ਵਚਨਂ ਅਲ਼ਾਰ [ਆਲ਼ਾਰ (ਕ.) ਏਵਮੁਪਰਿਪਿ], ਮਿਤ੍ਤਞ੍ਚ ਨੋ ਹੋਹਿ ਵਿਦੇਹਪੁਤ੍ਤ.

੧੫੨. ‘‘ਤਦਸ੍ਸੁ ਤੇ ਬਨ੍ਧਨਾ ਮੋਚਯਿਂਸੁ, ਯਂ ਨਤ੍ਥੁਤੋ ਪਟਿਮੋਕ੍ਕਸ੍ਸ ਪਾਸੇ;

ਮੁਤ੍ਤੋ ਚ ਸੋ ਬਨ੍ਧਨਾ ਨਾਗਰਾਜਾ, ਪਕ੍ਕਾਮਿ ਪਾਚੀਨਮੁਖੋ ਮੁਹੁਤ੍ਤਂ.

੧੫੩. ‘‘ਗਨ੍ਤ੍ਵਾਨ ਪਾਚੀਨਮੁਖੋ ਮੁਹੁਤ੍ਤਂ, ਪੁਣ੍ਣੇਹਿ ਨੇਤ੍ਤੇਹਿ ਪਲੋਕਯੀ ਮਂ;

ਤਦਾਸ੍ਸਹਂ ਪਿਟ੍ਠਿਤੋ ਅਨ੍ਵਗਚ੍ਛਿਂ, ਦਸਙ੍ਗੁਲਿਂ ਅਞ੍ਜਲਿਂ ਪਗ੍ਗਹੇਤ੍ਵਾ.

੧੫੪. ‘‘ਗਚ੍ਛੇਵ ਖੋ ਤ੍ਵਂ ਤਰਮਾਨਰੂਪੋ, ਮਾ ਤਂ ਅਮਿਤ੍ਤਾ ਪੁਨਰਗ੍ਗਹੇਸੁਂ;

ਦੁਕ੍ਖੋ ਹਿ ਲੁਦ੍ਦੇਹਿ ਪੁਨਾ ਸਮਾਗਮੋ, ਅਦਸ੍ਸਨਂ ਭੋਜਪੁਤ੍ਤਾਨ ਗਚ੍ਛ.

੧੫੫. ‘‘ਅਗਮਾਸਿ ਸੋ ਰਹਦਂ ਵਿਪ੍ਪਸਨ੍ਨਂ, ਨੀਲੋਭਾਸਂ ਰਮਣੀਯਂ ਸੁਤਿਤ੍ਥਂ;

ਸਮੋਤਤਂ [ਸਮੋਨਤਂ (ਸ੍ਯਾ. ਕ.)] ਜਮ੍ਬੁਹਿ ਵੇਤਸਾਹਿ, ਪਾਵੇਕ੍ਖਿ ਨਿਤ੍ਤਿਣ੍ਣਭਯੋ ਪਤੀਤੋ.

੧੫੬. ‘‘ਸੋ ਤਂ ਪਵਿਸ੍ਸ ਨ ਚਿਰਸ੍ਸ ਨਾਗੋ, ਦਿਬ੍ਬੇਨ ਮੇ ਪਾਤੁਰਹੁਂ ਜਨਿਨ੍ਦ;

ਉਪਟ੍ਠਹੀ ਮਂ ਪਿਤਰਂਵ ਪੁਤ੍ਤੋ, ਹਦਯਙ੍ਗਮਂ ਕਣ੍ਣਸੁਖਂ ਭਣਨ੍ਤੋ.

੧੫੭. ‘‘ਤ੍ਵਂ ਮੇਸਿ ਮਾਤਾ ਚ ਪਿਤਾ [ਪਿਤਾ ਚ (ਪੀ.)] ਅਲ਼ਾਰ, ਅਬ੍ਭਨ੍ਤਰੋ ਪਾਣਦਦੋ ਸਹਾਯੋ;

ਸਕਞ੍ਚ ਇਦ੍ਧਿਂ ਪਟਿਲਾਭਕੋਸ੍ਮਿ [ਪਟਿਲਾਭਿਤੋਸ੍ਮਿ (ਪੀ.)], ਅਲ਼ਾਰ ਪਸ੍ਸ ਮੇ ਨਿਵੇਸਨਾਨਿ;

ਪਹੂਤਭਕ੍ਖਂ ਬਹੁਅਨ੍ਨਪਾਨਂ, ਮਸਕ੍ਕਸਾਰਂ ਵਿਯ ਵਾਸਵਸ੍ਸ’’.

੧੫੮. ‘‘ਤਂ ਭੂਮਿਭਾਗੇਹਿ ਉਪੇਤਰੂਪਂ, ਅਸਕ੍ਖਰਾ ਚੇਵ ਮੁਦੂ ਸੁਭਾ ਚ;

ਨੀਚਤ੍ਤਿਣਾ [ਨੀਚਾ ਤਿਣਾ (ਸ੍ਯਾ. ਪੀ.)] ਅਪ੍ਪਰਜਾ ਚ ਭੂਮਿ, ਪਾਸਾਦਿਕਾ ਯਤ੍ਥ ਜਹਨ੍ਤਿ ਸੋਕਂ.

੧੫੯. ‘‘ਅਨਾਵਕੁਲਾ ਵੇਲ਼ੁਰਿਯੂਪਨੀਲਾ, ਚਤੁਦ੍ਦਿਸਂ ਅਮ੍ਬਵਨਂ ਸੁਰਮ੍ਮਂ;

ਪਕ੍ਕਾ ਚ ਪੇਸੀ ਚ ਫਲਾ ਸੁਫੁਲ੍ਲਾ, ਨਿਚ੍ਚੋਤੁਕਾ ਧਾਰਯਨ੍ਤੀ ਫਲਾਨਿ.

੧੬੦. ‘‘ਤੇਸਂ ਵਨਾਨਂ ਨਰਦੇਵ ਮਜ੍ਝੇ, ਨਿਵੇਸਨਂ ਭਸ੍ਸਰਸਨ੍ਨਿਕਾਸਂ;

ਰਜਤਗ੍ਗਲ਼ਂ ਸੋਵਣ੍ਣਮਯਂ ਉਲ਼ਾਰਂ, ਓਭਾਸਤੀ ਵਿਜ੍ਜੁਰਿਵਨ੍ਤਲਿਕ੍ਖੇ.

੧੬੧. ‘‘ਮਣੀਮਯਾ ਸੋਣ੍ਣਮਯਾ [ਸੋਵਣ੍ਣਮਯਾ (ਸੀ. ਸ੍ਯਾ. ਪੀ.)] ਉਲ਼ਾਰਾ, ਅਨੇਕਚਿਤ੍ਤਾ ਸਤਤਂ ਸੁਨਿਮ੍ਮਿਤਾ;

ਪਰਿਪੂਰਾ ਕਞ੍ਞਾਹਿ ਅਲਙ੍ਕਤਾਭਿ, ਸੁਵਣ੍ਣਕਾਯੂਰਧਰਾਹਿ ਰਾਜ.

੧੬੨. ‘‘ਸੋ ਸਙ੍ਖਪਾਲੋ ਤਰਮਾਨਰੂਪੋ, ਪਾਸਾਦਮਾਰੁਯ੍ਹ ਅਨੋਮਵਣ੍ਣੋ;

ਸਹਸ੍ਸਥਮ੍ਭਂ ਅਤੁਲਾਨੁਭਾਵਂ, ਯਤ੍ਥਸ੍ਸ ਭਰਿਯਾ ਮਹੇਸੀ ਅਹੋਸਿ.

੧੬੩. ‘‘ਏਕਾ ਚ ਨਾਰੀ ਤਰਮਾਨਰੂਪਾ, ਆਦਾਯ ਵੇਲ਼ੁਰਿਯਮਯਂ ਮਹਗ੍ਘਂ;

ਸੁਭਂ ਮਣਿਂ ਜਾਤਿਮਨ੍ਤੂਪਪਨ੍ਨਂ, ਅਚੋਦਿਤਾ ਆਸਨਮਬ੍ਭਿਹਾਸਿ.

੧੬੪. ‘‘ਤਤੋ ਮਂ ਉਰਗੋ ਹਤ੍ਥੇ ਗਹੇਤ੍ਵਾ, ਨਿਸੀਦਯੀ ਪਾਮੁਖਆਸਨਸ੍ਮਿਂ;

ਇਦਮਾਸਨਂ ਅਤ੍ਰ ਭਵਂ ਨਿਸੀਦਤੁ, ਭਵਞ੍ਹਿ ਮੇ ਅਞ੍ਞਤਰੋ ਗਰੂਨਂ.

੧੬੫. ‘‘ਅਞ੍ਞਾ ਚ ਨਾਰੀ ਤਰਮਾਨਰੂਪਾ, ਆਦਾਯ ਵਾਰਿਂ ਉਪਸਙ੍ਕਮਿਤ੍ਵਾ;

ਪਾਦਾਨਿ ਪਕ੍ਖਾਲਯੀ ਮੇ ਜਨਿਨ੍ਦ, ਭਰਿਯਾਵ [ਭਰਿਯਾ ਚ (ਪੀ.)] ਭਤ੍ਤੂ ਪਤਿਨੋ ਪਿਯਸ੍ਸ.

੧੬੬. ‘‘ਅਪਰਾ ਚ ਨਾਰੀ ਤਰਮਾਨਰੂਪਾ, ਪਗ੍ਗਯ੍ਹ ਸੋਵਣ੍ਣਮਯਾਯ [ਸੋਵਣ੍ਣਮਯਾ (ਪੀ.)] ਪਾਤਿਯਾ;

ਅਨੇਕਸੂਪਂ ਵਿਵਿਧਂ ਵਿਯਞ੍ਜਨਂ, ਉਪਨਾਮਯੀ ਭਤ੍ਤ ਮਨੁਞ੍ਞਰੂਪਂ.

੧੬੭. ‘‘ਤੁਰਿਯੇਹਿ [ਤੂਰਿਯੇਹਿ (ਕ.)] ਮਂ ਭਾਰਤ ਭੁਤ੍ਤਵਨ੍ਤਂ, ਉਪਟ੍ਠਹੁਂ ਭਤ੍ਤੁ ਮਨੋ ਵਿਦਿਤ੍ਵਾ;

ਤਤੁਤ੍ਤਰਿਂ [ਤਦੁਤ੍ਤਰਿਂ (ਕ.)] ਮਂ ਨਿਪਤੀ ਮਹਨ੍ਤਂ, ਦਿਬ੍ਬੇਹਿ ਕਾਮੇਹਿ ਅਨਪ੍ਪਕੇਹਿ.

੧੬੮. ‘‘ਭਰਿਯਾ ਮਮੇਤਾ ਤਿਸਤਾ ਅਲ਼ਾਰ, ਸਬ੍ਬਤ੍ਤਮਜ੍ਝਾ ਪਦੁਮੁਤ੍ਤਰਾਭਾ;

ਅਲ਼ਾਰ ਏਤਾਸ੍ਸੁ ਤੇ ਕਾਮਕਾਰਾ, ਦਦਾਮਿ ਤੇ ਤਾ ਪਰਿਚਾਰਯਸ੍ਸੁ.

੧੬੯. ‘‘ਸਂਵਚ੍ਛਰਂ ਦਿਬ੍ਬਰਸਾਨੁਭੁਤ੍ਵਾ, ਤਦਾਸ੍ਸੁਹਂ [ਤਦਸ੍ਸਹਂ (ਪੀ.)] ਉਤ੍ਤਰਿਮਜ੍ਝਭਾਸਿਂ [ਉਤ੍ਤਰਿ ਪਚ੍ਚਭਾਸਿਂ (ਸੀ. ਸ੍ਯਾ.), ਉਤ੍ਤਰਿਂ ਪਚ੍ਚਭਾਸਿਂ (ਪੀ.)];

ਨਾਗਸ੍ਸਿਦਂ ਕਿਨ੍ਤਿ ਕਥਞ੍ਚ ਲਦ੍ਧਂ, ਕਥਜ੍ਝਗਮਾਸਿ ਵਿਮਾਨਸੇਟ੍ਠਂ’’.

੧੭੦. ‘‘ਅਧਿਚ੍ਚ ਲਦ੍ਧਂ ਪਰਿਣਾਮਜਂ ਤੇ, ਸਯਂਕਤਂ ਉਦਾਹੁ ਦੇਵੇਹਿ ਦਿਨ੍ਨਂ;

ਪੁਚ੍ਛਾਮਿ ਤਂ [ਤੇ (ਪੀ.)] ਨਾਗਰਾਜੇਤਮਤ੍ਥਂ, ਕਥਜ੍ਝਗਮਾਸਿ ਵਿਮਾਨਸੇਟ੍ਠਂ’’.

੧੭੧. ‘‘ਨਾਧਿਚ੍ਚ ਲਦ੍ਧਂ ਨ ਪਰਿਣਾਮਜਂ ਮੇ, ਨ ਸਯਂਕਤਂ ਨਾਪਿ ਦੇਵੇਹਿ ਦਿਨ੍ਨਂ;

ਸਕੇਹਿ ਕਮ੍ਮੇਹਿ ਅਪਾਪਕੇਹਿ, ਪੁਞ੍ਞੇਹਿ ਮੇ ਲਦ੍ਧਮਿਦਂ ਵਿਮਾਨਂ’’.

੧੭੨. ‘‘ਕਿਂ ਤੇ ਵਤਂ ਕਿਂ ਪਨ ਬ੍ਰਹ੍ਮਚਰਿਯਂ, ਕਿਸ੍ਸ ਸੁਚਿਣ੍ਣਸ੍ਸ ਅਯਂ ਵਿਪਾਕੋ;

ਅਕ੍ਖਾਹਿ ਮੇ ਨਾਗਰਾਜੇਤਮਤ੍ਥਂ, ਕਥਂ ਨੁ ਤੇ ਲਦ੍ਧਮਿਦਂ ਵਿਮਾਨਂ’’.

੧੭੩. ‘‘ਰਾਜਾ ਅਹੋਸਿਂ ਮਗਧਾਨਮਿਸ੍ਸਰੋ, ਦੁਯ੍ਯੋਧਨੋ ਨਾਮ ਮਹਾਨੁਭਾਵੋ;

ਸੋ ਇਤ੍ਤਰਂ ਜੀਵਿਤਂ ਸਂਵਿਦਿਤ੍ਵਾ, ਅਸਸ੍ਸਤਂ ਵਿਪਰਿਣਾਮਧਮ੍ਮਂ.

੧੭੪. ‘‘ਅਨ੍ਨਞ੍ਚ ਪਾਨਞ੍ਚ ਪਸਨ੍ਨਚਿਤ੍ਤੋ, ਸਕ੍ਕਚ੍ਚ ਦਾਨਂ ਵਿਪੁਲਂ ਅਦਾਸਿਂ [ਅਦਾਸਿ (ਪੀ.)];

ਓਪਾਨਭੂਤਂ ਮੇ ਘਰਂ ਤਦਾਸਿ, ਸਨ੍ਤਪ੍ਪਿਤਾ ਸਮਣਬ੍ਰਾਹ੍ਮਣਾ ਚ.

੧੭੫. [ਅਯਂ ਗਾਥਾ ਪੀ. ਪੋਤ੍ਥਕੇ ਨਤ੍ਥਿ] ‘‘ਮਾਲਞ੍ਚ ਗਨ੍ਧਞ੍ਚ ਵਿਲੇਪਨਞ੍ਚ, ਪਦੀਪਿਯਂ [ਪਦੀਪਯਂ (ਸ੍ਯਾ. ਕ.)] ਯਾਨਮੁਪਸ੍ਸਯਞ੍ਚ;

ਅਚ੍ਛਾਦਨਂ ਸੇਯ੍ਯਮਥਨ੍ਨਪਾਨਂ, ਸਕ੍ਕਚ੍ਚ ਦਾਨਾਨਿ ਅਦਮ੍ਹ ਤਤ੍ਥ [ਅਯਂ ਗਾਥਾ ਪੀ. ਪੋਤ੍ਥਕੇ ਨਤ੍ਥਿ].

੧੭੬. ‘‘ਤਂ ਮੇ ਵਤਂ ਤਂ ਪਨ ਬ੍ਰਹ੍ਮਚਰਿਯਂ, ਤਸ੍ਸ ਸੁਚਿਣ੍ਣਸ੍ਸ ਅਯਂ ਵਿਪਾਕੋ;

ਤੇਨੇਵ ਮੇ ਲਦ੍ਧਮਿਦਂ ਵਿਮਾਨਂ, ਪਹੂਤਭਕ੍ਖਂ ਬਹੁਅਨ੍ਨਪਾਨਂ’’;

‘‘ਨਚ੍ਚੇਹਿ ਗੀਤੇਹਿ ਚੁਪੇਤਰੂਪਂ, ਚਿਰਟ੍ਠਿਤਿਕਂ ਨ ਚ ਸਸ੍ਸਤਾਯਂ.

੧੭੭. ‘‘ਅਪ੍ਪਾਨੁਭਾਵਾ ਤਂ ਮਹਾਨੁਭਾਵਂ, ਤੇਜਸ੍ਸਿਨਂ ਹਨ੍ਤਿ ਅਤੇਜਵਨ੍ਤੋ;

ਕਿਮੇਵ ਦਾਠਾਵੁਧ ਕਿਂ ਪਟਿਚ੍ਚ, ਹਤ੍ਥਤ੍ਤ [ਹਤ੍ਥਤ੍ਥ (ਸੀ. ਸ੍ਯਾ. ਪੀ.)] ਮਾਗਚ੍ਛਿ ਵਨਿਬ੍ਬਕਾਨਂ [ਵਣਿਬ੍ਬਕਾਨਂ (ਸੀ.)].

੧੭੮. ‘‘ਭਯਂ ਨੁ ਤੇ ਅਨ੍ਵਗਤਂ ਮਹਨ੍ਤਂ, ਤੇਜੋ ਨੁ ਤੇ ਨਾਨ੍ਵਗਂ ਦਨ੍ਤਮੂਲਂ;

ਕਿਮੇਵ ਦਾਠਾਵੁਧ ਕਿਂ ਪਟਿਚ੍ਚ, ਕਿਲੇਸਮਾਪਜ੍ਜਿ ਵਨਿਬ੍ਬਕਾਨਂ’’.

੧੭੯. ‘‘ਨ ਮੇ ਭਯਂ ਅਨ੍ਵਗਤਂ ਮਹਨ੍ਤਂ, ਤੇਜੋ ਨ ਸਕ੍ਕਾ ਮਮ ਤੇਹਿ ਹਨ੍ਤੁਂ [ਤੇਭਿਹਨ੍ਤੁਂ (ਸ੍ਯਾ. ਕ.)];

ਸਤਞ੍ਚ ਧਮ੍ਮਾਨਿ ਸੁਕਿਤ੍ਤਿਤਾਨਿ, ਸਮੁਦ੍ਦਵੇਲਾਵ ਦੁਰਚ੍ਚਯਾਨਿ.

੧੮੦. ‘‘ਚਾਤੁਦ੍ਦਸਿਂ ਪਞ੍ਚਦਸਿਂ ਅਲ਼ਾਰ, ਉਪੋਸਥਂ ਨਿਚ੍ਚਮੁਪਾਵਸਾਮਿ;

ਅਥਾਗਮੁਂ ਸੋਲ਼ਸ ਭੋਜਪੁਤ੍ਤਾ, ਰਜ੍ਜੁਂ ਗਹੇਤ੍ਵਾਨ ਦਲ਼੍ਹਞ੍ਚ ਪਾਸਂ.

੧੮੧. ‘‘ਭੇਤ੍ਵਾਨ ਨਾਸਂ ਅਤਿਕਸ੍ਸ [ਅਨ੍ਤਕਸ੍ਸ (ਕ.)] ਰਜ੍ਜੁਂ, ਨਯਿਂਸੁ ਮਂ ਸਮ੍ਪਰਿਗਯ੍ਹ ਲੁਦ੍ਦਾ;

ਏਤਾਦਿਸਂ ਦੁਕ੍ਖਮਹਂ ਤਿਤਿਕ੍ਖਂ [ਤਿਤਿਕ੍ਖਿਂ (ਪੀ.)], ਉਪੋਸਥਂ ਅਪ੍ਪਟਿਕੋਪਯਨ੍ਤੋ’’.

੧੮੨. ‘‘ਏਕਾਯਨੇ ਤਂ ਪਥੇ ਅਦ੍ਦਸਂਸੁ, ਬਲੇਨ ਵਣ੍ਣੇਨ ਚੁਪੇਤਰੂਪਂ;

ਸਿਰਿਯਾ ਪਞ੍ਞਾਯ ਚ ਭਾਵਿਤੋਸਿ, ਕਿਂ ਪਤ੍ਥਯਂ [ਕਿਮਤ੍ਥਿਯਂ (ਸੀ. ਸ੍ਯਾ. ਪੀ.)] ਨਾਗ ਤਪੋ ਕਰੋਸਿ.

੧੮੩. ‘‘ਨ ਪੁਤ੍ਤਹੇਤੂ ਨ ਧਨਸ੍ਸ ਹੇਤੁ, ਨ ਆਯੁਨੋ ਚਾਪਿ ਅਲ਼ਾਰ ਹੇਤੁ;

ਮਨੁਸ੍ਸਯੋਨਿਂ ਅਭਿਪਤ੍ਥਯਾਨੋ, ਤਸ੍ਮਾ ਪਰਕ੍ਕਮ੍ਮ ਤਪੋ ਕਰੋਮਿ’’.

੧੮੪. ‘‘ਤ੍ਵਂ ਲੋਹਿਤਕ੍ਖੋ ਵਿਹਤਨ੍ਤਰਂਸੋ, ਅਲਙ੍ਕਤੋ ਕਪ੍ਪਿਤਕੇਸਮਸ੍ਸੁ;

ਸੁਰੋਸਿਤੋ ਲੋਹਿਤਚਨ੍ਦਨੇਨ, ਗਨ੍ਧਬ੍ਬਰਾਜਾਵ ਦਿਸਾ ਪਭਾਸਸਿ [ਪਭਾਸਿ (ਕ.)].

੧੮੫. ‘‘ਦੇਵਿਦ੍ਧਿਪਤ੍ਤੋਸਿ ਮਹਾਨੁਭਾਵੋ, ਸਬ੍ਬੇਹਿ ਕਾਮੇਹਿ ਸਮਙ੍ਗਿਭੂਤੋ;

ਪੁਚ੍ਛਾਮਿ ਤਂ ਨਾਗਰਾਜੇਤਮਤ੍ਥਂ, ਸੇਯ੍ਯੋ ਇਤੋ ਕੇਨ ਮਨੁਸ੍ਸਲੋਕੋ’’.

੧੮੬. ‘‘ਅਲ਼ਾਰ ਨਾਞ੍ਞਤ੍ਰ ਮਨੁਸ੍ਸਲੋਕਾ, ਸੁਦ੍ਧੀ ਵ ਸਂਵਿਜ੍ਜਤਿ ਸਂਯਮੋ ਵਾ;

ਅਹਞ੍ਚ ਲਦ੍ਧਾਨ ਮਨੁਸ੍ਸਯੋਨਿਂ, ਕਾਹਾਮਿ ਜਾਤਿਮਰਣਸ੍ਸ ਅਨ੍ਤਂ’’.

੧੮੭. ‘‘ਸਂਵਚ੍ਛਰੋ ਮੇ ਵਸਤੋ [ਵੁਸਿਤੋ (ਪੀ.)] ਤਵਨ੍ਤਿਕੇ, ਅਨ੍ਨੇਨ ਪਾਨੇਨ ਉਪਟ੍ਠਿਤੋਸ੍ਮਿ;

ਆਮਨ੍ਤਯਿਤ੍ਵਾਨ ਪਲੇਮਿ ਨਾਗ, ਚਿਰਪ੍ਪਵੁਟ੍ਠੋਸ੍ਮਿ [ਚਿਰਪ੍ਪਵੁਤ੍ਥੋ ਅਸ੍ਮਿ (ਪੀ.)] ਅਹਂ ਜਨਿਨ੍ਦ’’.

੧੮੮. ‘‘ਪੁਤ੍ਤਾ ਚ ਦਾਰਾ ਅਨੁਜੀਵਿਨੋ ਚ [ਚ’ਨੁਜੀਵਿਨੋ (ਸ੍ਯਾ. ਪੀ.)], ਨਿਚ੍ਚਾਨੁਸਿਟ੍ਠਾ ਉਪਤਿਟ੍ਠਤੇ ਤਂ;

ਕਚ੍ਚਿਨ੍ਨੁ ਤਂ ਨਾਭਿਸਪਿਤ੍ਥ [ਨਾਭਿਸਂਸਿਤ੍ਥ (ਸ੍ਯਾ. ਪੀ.)] ਕੋਚਿ, ਪਿਯਞ੍ਹਿ ਮੇ ਦਸ੍ਸਨਂ ਤੁਯ੍ਹਂ [ਤੁਯ੍ਹ (ਪੀ.)] ਅਲ਼ਾਰ’’.

੧੮੯. ‘‘ਯਥਾਪਿ ਮਾਤੂ ਚ ਪਿਤੂ ਅਗਾਰੇ, ਪੁਤ੍ਤੋ ਪਿਯੋ ਪਟਿਵਿਹਿਤੋ ਵਸੇਯ੍ਯ [ਸੇਯ੍ਯੋ (ਪੀ.)];

ਤਤੋਪਿ ਮਯ੍ਹਂ ਇਧਮੇਵ ਸੇਯ੍ਯੋ, ਚਿਤ੍ਤਞ੍ਹਿ ਤੇ ਨਾਗ ਮਯੀ ਪਸਨ੍ਨਂ’’.

੧੯੦. ‘‘ਮਣੀ ਮਮਂ ਵਿਜ੍ਜਤਿ ਲੋਹਿਤਙ੍ਕੋ [ਲੋਹਿਤਙ੍ਗੋ (ਕ.)], ਧਨਾਹਰੋ ਮਣਿਰਤਨਂ ਉਲ਼ਾਰਂ;

ਆਦਾਯ ਤ੍ਵਂ [ਤਂ (ਪੀ.)] ਗਚ੍ਛ ਸਕਂ ਨਿਕੇਤਂ, ਲਦ੍ਧਾ ਧਨਂ ਤਂ ਮਣਿਮੋਸ੍ਸਜਸ੍ਸੁ’’.

੧੯੧. ‘‘ਦਿਟ੍ਠਾ ਮਯਾ ਮਾਨੁਸਕਾਪਿ ਕਾਮਾ, ਅਸਸ੍ਸਤਾ ਵਿਪਰਿਣਾਮਧਮ੍ਮਾ;

ਆਦੀਨਵਂ ਕਾਮਗੁਣੇਸੁ ਦਿਸ੍ਵਾ, ਸਦ੍ਧਾਯਹਂ ਪਬ੍ਬਜਿਤੋਮ੍ਹਿ ਰਾਜ.

੧੯੨. ‘‘ਦੁਮਪ੍ਫਲਾਨੀਵ ਪਤਨ੍ਤਿ ਮਾਣਵਾ, ਦਹਰਾ ਚ ਵੁਦ੍ਧਾ ਚ ਸਰੀਰਭੇਦਾ;

ਏਤਮ੍ਪਿ ਦਿਸ੍ਵਾ ਪਬ੍ਬਜਿਤੋਮ੍ਹਿ ਰਾਜ, ਅਪਣ੍ਣਕਂ ਸਾਮਞ੍ਞਮੇਵ ਸੇਯ੍ਯੋ’’.

੧੯੩. ‘‘ਅਦ੍ਧਾ ਹਵੇ ਸੇਵਿਤਬ੍ਬਾ ਸਪਞ੍ਞਾ, ਬਹੁਸ੍ਸੁਤਾ ਯੇ ਬਹੁਠਾਨਚਿਨ੍ਤਿਨੋ;

ਨਾਗਞ੍ਚ ਸੁਤ੍ਵਾਨ ਤਵਞ੍ਚਲ਼ਾਰ, ਕਾਹਾਮਿ ਪੁਞ੍ਞਾਨਿ ਅਨਪ੍ਪਕਾਨਿ’’.

੧੯੪. ‘‘ਅਦ੍ਧਾ ਹਵੇ ਸੇਵਿਤਬ੍ਬਾ ਸਪਞ੍ਞਾ, ਬਹੁਸ੍ਸੁਤਾ ਯੇ ਬਹੁਠਾਨਚਿਨ੍ਤਿਨੋ;

ਨਾਗਞ੍ਚ ਸੁਤ੍ਵਾਨ ਮਮਞ੍ਚ ਰਾਜ, ਕਰੋਹਿ ਪੁਞ੍ਞਾਨਿ ਅਨਪ੍ਪਕਾਨੀ’’ਤਿ.

ਸਙ੍ਖਪਾਲਜਾਤਕਂ ਚਤੁਤ੍ਥਂ.