੪੩੯. ਚਤੁਦ੍ਵਾਰਜਾਤਕਂ (੧)

੧. ਚਤੁਦ੍ਵਾਰਮਿਦਂ ਨਗਰਂ, ਆਯਸਂ ਦਲ਼੍ਹਪਾਕਾਰਂ;

ਓਰੁਦ੍ਧਪਟਿਰੁਦ੍ਧੋਸ੍ਮਿ, ਕਿਂ ਪਾਪਂ ਪਕਤਂ ਮਯਾ.

੨. ਸਬ੍ਬੇ ਅਪਿਹਿਤਾ ਦ੍ਵਾਰਾ, ਓਰੁਦ੍ਧੋਸ੍ਮਿ ਯਥਾ ਦਿਜੋ;

ਕਿਮਾਧਿਕਰਣਂ ਯਕ੍ਖ, ਚਕ੍ਕਾਭਿਨਿਹਤੋ ਅਹਂ.

੩. ਲਦ੍ਧਾ ਸਤਸਹਸ੍ਸਾਨਿ, ਅਤਿਰੇਕਾਨਿ ਵੀਸਤਿ;

ਅਨੁਕਮ੍ਪਕਾਨਂ ਞਾਤੀਨਂ, ਵਚਨਂ ਸਮ੍ਮ ਨਾਕਰਿ.

੪. ਲਙ੍ਘਿਂ ਸਮੁਦ੍ਦਂ ਪਕ੍ਖਨ੍ਦਿ, ਸਾਗਰਂ ਅਪ੍ਪਸਿਦ੍ਧਿਕਂ;

ਚਤੁਬ੍ਭਿ ਅਟ੍ਠਜ੍ਝਗਮਾ, ਅਟ੍ਠਾਹਿਪਿ ਚ ਸੋਲ਼ਸ.

੫. ਸੋਲ਼ਸਾਹਿ ਚ ਬਾਤ੍ਤਿਂਸ, ਅਤ੍ਰਿਚ੍ਛਂ ਚਕ੍ਕਮਾਸਦੋ;

ਇਚ੍ਛਾਹਤਸ੍ਸ ਪੋਸਸ੍ਸ, ਚਕ੍ਕਂ ਭਮਤਿ ਮਤ੍ਥਕੇ.

੬. ਉਪਰਿਵਿਸਾਲਾ ਦੁਪ੍ਪੂਰਾ, ਇਚ੍ਛਾ ਵਿਸਟਗਾਮਿਨੀ [ਵਿਸਟਗਾਮਿਨਿਂ (ਪੀ. ਕ.)];

ਯੇ ਚ ਤਂ ਅਨੁਗਿਜ੍ਝਨ੍ਤਿ, ਤੇ ਹੋਨ੍ਤਿ ਚਕ੍ਕਧਾਰਿਨੋ.

੭. ਬਹੁਭਣ੍ਡਂ [ਬਹੁਂ ਭਣ੍ਡਂ (ਸੀ. ਪੀ.)] ਅਵਹਾਯ, ਮਗ੍ਗਂ ਅਪ੍ਪਟਿਵੇਕ੍ਖਿਯ;

ਯੇਸਞ੍ਚੇਤਂ ਅਸਙ੍ਖਾਤਂ, ਤੇ ਹੋਨ੍ਤਿ ਚਕ੍ਕਧਾਰਿਨੋ.

੮. ਕਮ੍ਮਂ ਸਮੇਕ੍ਖੇ ਵਿਪੁਲਞ੍ਚ ਭੋਗਂ, ਇਚ੍ਛਂ ਨ ਸੇਵੇਯ੍ਯ ਅਨਤ੍ਥਸਂਹਿਤਂ;

ਕਰੇਯ੍ਯ ਵਾਕ੍ਯਂ ਅਨੁਕਮ੍ਪਕਾਨਂ, ਤਂ ਤਾਦਿਸਂ ਨਾਤਿਵਤ੍ਤੇਯ੍ਯ ਚਕ੍ਕਂ.

੯. ਕੀਵਚਿਰਂ ਨੁ ਮੇ ਯਕ੍ਖ, ਚਕ੍ਕਂ ਸਿਰਸਿ ਠਸ੍ਸਤਿ;

ਕਤਿ ਵਸ੍ਸਸਹਸ੍ਸਾਨਿ, ਤਂ ਮੇ ਅਕ੍ਖਾਹਿ ਪੁਚ੍ਛਿਤੋ.

੧੦. ਅਤਿਸਰੋ ਪਚ੍ਚਸਰੋ [ਅਚ੍ਚਸਰੋ (ਸੀ. ਸ੍ਯਾ. ਪੀ.)], ਮਿਤ੍ਤਵਿਨ੍ਦ ਸੁਣੋਹਿ ਮੇ;

ਚਕ੍ਕਂ ਤੇ ਸਿਰਸਿ [ਸਿਰਸ੍ਮਿ (ਸ੍ਯਾ.)] ਮਾਵਿਦ੍ਧਂ, ਨ ਤਂ ਜੀਵਂ ਪਮੋਕ੍ਖਸੀਤਿ.

ਚਤੁਦ੍ਵਾਰਜਾਤਕਂ ਪਠਮਂ.