੩. ਕੁਰੁਙ੍ਗਵਗ੍ਗੋ

੨੧. ਞਾਤਮੇਤਂ ਕੁਰੁਙ੍ਗਸ੍ਸ, ਯਂ ਤ੍ਵਂ ਸੇਪਣ੍ਣਿ ਸਿਯ੍ਯਸਿ [ਸੇਯ੍ਯਸਿ (ਸੀ. ਸ੍ਯਾ. ਪੀ.)];

ਅਞ੍ਞਂ ਸੇਪਣ੍ਣਿ ਗਚ੍ਛਾਮਿ, ਨ ਮੇ ਤੇ ਰੁਚ੍ਚਤੇ ਫਲਨ੍ਤਿ.

ਕੁਰੁਙ੍ਗਮਿਗਜਾਤਕਂ ਪਠਮਂ.

੨੨. ਯੇ ਕੁਕ੍ਕੁਰਾ ਰਾਜਕੁਲਮ੍ਹਿ ਵਦ੍ਧਾ, ਕੋਲੇਯ੍ਯਕਾ ਵਣ੍ਣਬਲੂਪਪਨ੍ਨਾ;

ਤੇਮੇ ਨ ਵਜ੍ਝਾ ਮਯਮਸ੍ਮ ਵਜ੍ਝਾ, ਨਾਯਂ ਸਘਚ੍ਚਾ ਦੁਬ੍ਬਲਘਾਤਿਕਾਯਨ੍ਤਿ.

ਕੁਕ੍ਕੁਰਜਾਤਕਂ ਦੁਤਿਯਂ.

੨੩. ਅਪਿ ਪਸ੍ਸੇਨ ਸੇਮਾਨੋ, ਸਲ੍ਲੇਭਿ ਸਲ੍ਲਲੀਕਤੋ;

ਸੇਯ੍ਯੋਵ ਵਲ਼ਵਾ ਗੋਜੋ [ਭੋਜ੍ਜੋ (ਸੀ.), ਭੋਜ੍ਝੋ (ਸ੍ਯਾ. ਪੀ.)], ਯੁਞ੍ਜ ਮਞ੍ਞੇਵ ਸਾਰਥੀਤਿ.

ਗੋਜਾਨੀਯ [ਭੋਜਾਜਾਨੀਯ (ਸੀ. ਸ੍ਯਾ. ਪੀ.)] ਜਾਤਕਂ ਤਤਿਯਂ.

੨੪. ਯਦਾ ਯਦਾ ਯਤ੍ਥ ਯਦਾ, ਯਤ੍ਥ ਯਤ੍ਥ ਯਦਾ ਯਦਾ;

ਆਜਞ੍ਞੋ ਕੁਰੁਤੇ ਵੇਗਂ, ਹਾਯਨ੍ਤਿ ਤਤ੍ਥ ਵਾਲ਼ਵਾਤਿ.

ਆਜਞ੍ਞਜਾਤਕਂ ਚਤੁਤ੍ਥਂ.

੨੫. ਅਞ੍ਞਮਞ੍ਞੇਹਿ ਤਿਤ੍ਥੇਹਿ, ਅਸ੍ਸਂ ਪਾਯੇਹਿ ਸਾਰਥਿ;

ਅਚ੍ਚਾਸਨਸ੍ਸ ਪੁਰਿਸੋ, ਪਾਯਾਸਸ੍ਸਪਿ ਤਪ੍ਪਤੀਤਿ.

ਤਿਤ੍ਥਜਾਤਕਂ ਪਞ੍ਚਮਂ.

੨੬. ਪੁਰਾਣਚੋਰਾਨ ਵਚੋ ਨਿਸਮ੍ਮ, ਮਹਿਲ਼ਾਮੁਖੋ ਪੋਥਯਮਨ੍ਵਚਾਰੀ;

ਸੁਸਞ੍ਞਤਾਨਞ੍ਹਿ ਵਚੋ ਨਿਸਮ੍ਮ, ਗਜੁਤ੍ਤਮੋ ਸਬ੍ਬਗੁਣੇਸੁ ਅਟ੍ਠਾਤਿ.

ਮਹਿਲ਼ਾਮੁਖਜਾਤਕਂ ਛਟ੍ਠਂ.

੨੭. ਨਾਲਂ ਕਬਲ਼ਂ ਪਦਾਤਵੇ, ਨ ਚ ਪਿਣ੍ਡਂ ਨ ਕੁਸੇ ਨ ਘਂਸਿਤੁਂ;

ਮਞ੍ਞਾਮਿ ਅਭਿਣ੍ਹਦਸ੍ਸਨਾ, ਨਾਗੋ ਸ੍ਨੇਹਮਕਾਸਿ [ਸਿਨੇਹਮਕਾਸਿ (ਸੀ. ਸ੍ਯਾ. ਪੀ.)] ਕੁਕ੍ਕੁਰੇਤਿ.

ਅਭਿਣ੍ਹਜਾਤਕਂ ਸਤ੍ਤਮਂ.

੨੮. ਮਨੁਞ੍ਞਮੇਵ ਭਾਸੇਯ੍ਯ, ਨਾਮਨੁਞ੍ਞਂ ਕੁਦਾਚਨਂ;

ਮਨੁਞ੍ਞਂ ਭਾਸਮਾਨਸ੍ਸ, ਗਰੁਂ ਭਾਰਂ ਉਦਦ੍ਧਰਿ;

ਧਨਞ੍ਚ ਨਂ ਅਲਾਭੇਸਿ, ਤੇਨ ਚਤ੍ਤਮਨੋ ਅਹੂਤਿ.

ਨਨ੍ਦਿਵਿਸਾਲਜਾਤਕਂ ਅਟ੍ਠਮਂ.

੨੯. ਯਤੋ ਯਤੋ ਗਰੁ ਧੁਰਂ, ਯਤੋ ਗਮ੍ਭੀਰਵਤ੍ਤਨੀ;

ਤਦਾਸ੍ਸੁ ਕਣ੍ਹਂ ਯੁਞ੍ਜਨ੍ਤਿ, ਸ੍ਵਾਸ੍ਸੁ ਤਂ ਵਹਤੇ ਧੁਰਨ੍ਤਿ.

ਕਣ੍ਹਜਾਤਕਂ ਨਵਮਂ.

੩੦. ਮਾ ਮੁਨਿਕਸ੍ਸ ਪਿਹਯਿ, ਆਤੁਰਨ੍ਨਾਨਿ ਭੁਞ੍ਜਤਿ;

ਅਪ੍ਪੋਸ੍ਸੁਕ੍ਕੋ ਭੁਸਂ ਖਾਦ, ਏਤਂ ਦੀਘਾਯੁਲਕ੍ਖਣਨ੍ਤਿ.

ਮੁਨਿਕਜਾਤਕਂ ਦਸਮਂ.

ਕੁਰੁਙ੍ਗਵਗ੍ਗੋ ਤਤਿਯੋ.

ਤਸ੍ਸੁਦ੍ਦਾਨਂ –

ਕੁਰੁਙ੍ਗਸ੍ਸ ਕੁਕ੍ਕੁਰਗੋਜਵਰੋ, ਪੁਨ ਵਾਲ਼ਵਸ੍ਸਸਿਰਿਵ੍ਹਯਨੋ [ਸਿਰਿਵਯਨੋ (ਸਬ੍ਬਤ੍ਥ)];

ਮਹਿਲ਼ਾਮੁਖਨਾਮਨੁਞ੍ਞਵਰੋ, ਵਹਤੇ ਧੁਰ ਮੁਨਿਕੇਨ ਦਸਾਤਿ.