੨੨. ਨਿਰਯਵਗ੍ਗੋ

੩੦੬. ਅਭੂਤਵਾਦੀ ਨਿਰਯਂ ਉਪੇਤਿ, ਯੋ ਵਾਪਿ [ਯੋ ਚਾਪਿ (ਸੀ. ਪੀ. ਕ.)] ਕਤ੍ਵਾ ਨ ਕਰੋਮਿ ਚਾਹ [ਨ ਕਰੋਮੀਤਿ ਚਾਹ (ਸ੍ਯਾ.)];

ਉਭੋਪਿ ਤੇ ਪੇਚ੍ਚ ਸਮਾ ਭਵਨ੍ਤਿ, ਨਿਹੀਨਕਮ੍ਮਾ ਮਨੁਜਾ ਪਰਤ੍ਥ.

੩੦੭. ਕਾਸਾਵਕਣ੍ਠਾ ਬਹਵੋ, ਪਾਪਧਮ੍ਮਾ ਅਸਞ੍ਞਤਾ;

ਪਾਪਾ ਪਾਪੇਹਿ ਕਮ੍ਮੇਹਿ, ਨਿਰਯਂ ਤੇ ਉਪਪਜ੍ਜਰੇ.

੩੦੮. ਸੇਯ੍ਯੋ ਅਯੋਗੁਲ਼ੋ ਭੁਤ੍ਤੋ, ਤਤ੍ਤੋ ਅਗ੍ਗਿਸਿਖੂਪਮੋ;

ਯਞ੍ਚੇ ਭੁਞ੍ਜੇਯ੍ਯ ਦੁਸ੍ਸੀਲੋ, ਰਟ੍ਠਪਿਣ੍ਡਮਸਞ੍ਞਤੋ.

੩੦੯. ਚਤ੍ਤਾਰਿ ਠਾਨਾਨਿ ਨਰੋ ਪਮਤ੍ਤੋ, ਆਪਜ੍ਜਤਿ ਪਰਦਾਰੂਪਸੇਵੀ;

ਅਪੁਞ੍ਞਲਾਭਂ ਨ ਨਿਕਾਮਸੇਯ੍ਯਂ, ਨਿਨ੍ਦਂ ਤਤੀਯਂ ਨਿਰਯਂ ਚਤੁਤ੍ਥਂ.

੩੧੦. ਅਪੁਞ੍ਞਲਾਭੋ ਚ ਗਤੀ ਚ ਪਾਪਿਕਾ, ਭੀਤਸ੍ਸ ਭੀਤਾਯ ਰਤੀ ਚ ਥੋਕਿਕਾ;

ਰਾਜਾ ਚ ਦਣ੍ਡਂ ਗਰੁਕਂ ਪਣੇਤਿ, ਤਸ੍ਮਾ ਨਰੋ ਪਰਦਾਰਂ ਨ ਸੇਵੇ.

੩੧੧. ਕੁਸੋ ਯਥਾ ਦੁਗ੍ਗਹਿਤੋ, ਹਤ੍ਥਮੇਵਾਨੁਕਨ੍ਤਤਿ;

ਸਾਮਞ੍ਞਂ ਦੁਪ੍ਪਰਾਮਟ੍ਠਂ, ਨਿਰਯਾਯੁਪਕਡ੍ਢਤਿ.

੩੧੨. ਯਂ ਕਿਞ੍ਚਿ ਸਿਥਿਲਂ ਕਮ੍ਮਂ, ਸਂਕਿਲਿਟ੍ਠਞ੍ਚ ਯਂ ਵਤਂ;

ਸਙ੍ਕਸ੍ਸਰਂ ਬ੍ਰਹ੍ਮਚਰਿਯਂ, ਨ ਤਂ ਹੋਤਿ ਮਹਪ੍ਫਲਂ.

੩੧੩. ਕਯਿਰਾ ਚੇ ਕਯਿਰਾਥੇਨਂ [ਕਯਿਰਾ ਨਂ (ਕ.)], ਦਲ਼੍ਹਮੇਨਂ ਪਰਕ੍ਕਮੇ;

ਸਿਥਿਲੋ ਹਿ ਪਰਿਬ੍ਬਾਜੋ, ਭਿਯ੍ਯੋ ਆਕਿਰਤੇ ਰਜਂ.

੩੧੪. ਅਕਤਂ ਦੁਕ੍ਕਟਂ ਸੇਯ੍ਯੋ, ਪਚ੍ਛਾ ਤਪ੍ਪਤਿ ਦੁਕ੍ਕਟਂ;

ਕਤਞ੍ਚ ਸੁਕਤਂ ਸੇਯ੍ਯੋ, ਯਂ ਕਤ੍ਵਾ ਨਾਨੁਤਪ੍ਪਤਿ.

੩੧੫. ਨਗਰਂ ਯਥਾ ਪਚ੍ਚਨ੍ਤਂ, ਗੁਤ੍ਤਂ ਸਨ੍ਤਰਬਾਹਿਰਂ;

ਏਵਂ ਗੋਪੇਥ ਅਤ੍ਤਾਨਂ, ਖਣੋ ਵੋ [ਖਣੋ ਵੇ (ਸੀ. ਪੀ. ਕ.)] ਮਾ ਉਪਚ੍ਚਗਾ;

ਖਣਾਤੀਤਾ ਹਿ ਸੋਚਨ੍ਤਿ, ਨਿਰਯਮ੍ਹਿ ਸਮਪ੍ਪਿਤਾ.

੩੧੬. ਅਲਜ੍ਜਿਤਾਯੇ ਲਜ੍ਜਨ੍ਤਿ, ਲਜ੍ਜਿਤਾਯੇ ਨ ਲਜ੍ਜਰੇ;

ਮਿਚ੍ਛਾਦਿਟ੍ਠਿਸਮਾਦਾਨਾ, ਸਤ੍ਤਾ ਗਚ੍ਛਨ੍ਤਿ ਦੁਗ੍ਗਤਿਂ.

੩੧੭. ਅਭਯੇ ਭਯਦਸ੍ਸਿਨੋ, ਭਯੇ ਚਾਭਯਦਸ੍ਸਿਨੋ;

ਮਿਚ੍ਛਾਦਿਟ੍ਠਿਸਮਾਦਾਨਾ, ਸਤ੍ਤਾ ਗਚ੍ਛਨ੍ਤਿ ਦੁਗ੍ਗਤਿਂ.

੩੧੮. ਅਵਜ੍ਜੇ ਵਜ੍ਜਮਤਿਨੋ, ਵਜ੍ਜੇ ਚਾਵਜ੍ਜਦਸ੍ਸਿਨੋ;

ਮਿਚ੍ਛਾਦਿਟ੍ਠਿਸਮਾਦਾਨਾ, ਸਤ੍ਤਾ ਗਚ੍ਛਨ੍ਤਿ ਦੁਗ੍ਗਤਿਂ.

੩੧੯. ਵਜ੍ਜਞ੍ਚ ਵਜ੍ਜਤੋ ਞਤ੍ਵਾ, ਅਵਜ੍ਜਞ੍ਚ ਅਵਜ੍ਜਤੋ;

ਸਮ੍ਮਾਦਿਟ੍ਠਿਸਮਾਦਾਨਾ, ਸਤ੍ਤਾ ਗਚ੍ਛਨ੍ਤਿ ਸੁਗ੍ਗਤਿਂ.

ਨਿਰਯਵਗ੍ਗੋ ਦ੍ਵਾਵੀਸਤਿਮੋ ਨਿਟ੍ਠਿਤੋ.