੧੯. ਧਮ੍ਮਟ੍ਠਵਗ੍ਗੋ

੨੫੬. ਨ ਤੇਨ ਹੋਤਿ ਧਮ੍ਮਟ੍ਠੋ, ਯੇਨਤ੍ਥਂ ਸਾਹਸਾ [ਸਹਸਾ (ਸੀ. ਸ੍ਯਾ. ਕ.)] ਨਯੇ;

ਯੋ ਚ ਅਤ੍ਥਂ ਅਨਤ੍ਥਞ੍ਚ, ਉਭੋ ਨਿਚ੍ਛੇਯ੍ਯ ਪਣ੍ਡਿਤੋ.

੨੫੭. ਅਸਾਹਸੇਨ ਧਮ੍ਮੇਨ, ਸਮੇਨ ਨਯਤੀ ਪਰੇ;

ਧਮ੍ਮਸ੍ਸ ਗੁਤ੍ਤੋ ਮੇਧਾਵੀ, ‘‘ਧਮ੍ਮਟ੍ਠੋ’’ਤਿ ਪਵੁਚ੍ਚਤਿ.

੨੫੮. ਨ ਤੇਨ ਪਣ੍ਡਿਤੋ ਹੋਤਿ, ਯਾਵਤਾ ਬਹੁ ਭਾਸਤਿ;

ਖੇਮੀ ਅਵੇਰੀ ਅਭਯੋ, ‘‘ਪਣ੍ਡਿਤੋ’’ਤਿ ਪਵੁਚ੍ਚਤਿ.

੨੫੯. ਨ ਤਾਵਤਾ ਧਮ੍ਮਧਰੋ, ਯਾਵਤਾ ਬਹੁ ਭਾਸਤਿ;

ਯੋ ਚ ਅਪ੍ਪਮ੍ਪਿ ਸੁਤ੍ਵਾਨ, ਧਮ੍ਮਂ ਕਾਯੇਨ ਪਸ੍ਸਤਿ;

ਸ ਵੇ ਧਮ੍ਮਧਰੋ ਹੋਤਿ, ਯੋ ਧਮ੍ਮਂ ਨਪ੍ਪਮਜ੍ਜਤਿ.

੨੬੦. ਨ ਤੇਨ ਥੇਰੋ ਸੋ ਹੋਤਿ [ਥੇਰੋ ਹੋਤਿ (ਸੀ. ਸ੍ਯਾ.)], ਯੇਨਸ੍ਸ ਪਲਿਤਂ ਸਿਰੋ;

ਪਰਿਪਕ੍ਕੋ ਵਯੋ ਤਸ੍ਸ, ‘‘ਮੋਘਜਿਣ੍ਣੋ’’ਤਿ ਵੁਚ੍ਚਤਿ.

੨੬੧. ਯਮ੍ਹਿ ਸਚ੍ਚਞ੍ਚ ਧਮ੍ਮੋ ਚ, ਅਹਿਂਸਾ ਸਂਯਮੋ ਦਮੋ;

ਸ ਵੇ ਵਨ੍ਤਮਲੋ ਧੀਰੋ, ‘‘ਥੇਰੋ’’ ਇਤਿ [ਸੋ ਥੇਰੋਤਿ (ਸ੍ਯਾ. ਕ.)] ਪਵੁਚ੍ਚਤਿ.

੨੬੨. ਨ ਵਾਕ੍ਕਰਣਮਤ੍ਤੇਨ, ਵਣ੍ਣਪੋਕ੍ਖਰਤਾਯ ਵਾ;

ਸਾਧੁਰੂਪੋ ਨਰੋ ਹੋਤਿ, ਇਸ੍ਸੁਕੀ ਮਚ੍ਛਰੀ ਸਠੋ.

੨੬੩. ਯਸ੍ਸ ਚੇਤਂ ਸਮੁਚ੍ਛਿਨ੍ਨਂ, ਮੂਲਘਚ੍ਚਂ ਸਮੂਹਤਂ;

ਸ ਵਨ੍ਤਦੋਸੋ ਮੇਧਾਵੀ, ‘‘ਸਾਧੁਰੂਪੋ’’ਤਿ ਵੁਚ੍ਚਤਿ.

੨੬੪. ਨ ਮੁਣ੍ਡਕੇਨ ਸਮਣੋ, ਅਬ੍ਬਤੋ ਅਲਿਕਂ ਭਣਂ;

ਇਚ੍ਛਾਲੋਭਸਮਾਪਨ੍ਨੋ, ਸਮਣੋ ਕਿਂ ਭਵਿਸ੍ਸਤਿ.

੨੬੫. ਯੋ ਚ ਸਮੇਤਿ ਪਾਪਾਨਿ, ਅਣੁਂ ਥੂਲਾਨਿ ਸਬ੍ਬਸੋ;

ਸਮਿਤਤ੍ਤਾ ਹਿ ਪਾਪਾਨਂ, ‘‘ਸਮਣੋ’’ਤਿ ਪਵੁਚ੍ਚਤਿ.

੨੬੬. ਨ ਤੇਨ ਭਿਕ੍ਖੁ ਸੋ ਹੋਤਿ, ਯਾਵਤਾ ਭਿਕ੍ਖਤੇ ਪਰੇ;

ਵਿਸ੍ਸਂ ਧਮ੍ਮਂ ਸਮਾਦਾਯ, ਭਿਕ੍ਖੁ ਹੋਤਿ ਨ ਤਾਵਤਾ.

੨੬੭. ਯੋਧ ਪੁਞ੍ਞਞ੍ਚ ਪਾਪਞ੍ਚ, ਬਾਹੇਤ੍ਵਾ ਬ੍ਰਹ੍ਮਚਰਿਯਵਾ [ਬ੍ਰਹ੍ਮਚਰਿਯਂ (ਕ.)];

ਸਙ੍ਖਾਯ ਲੋਕੇ ਚਰਤਿ, ਸ ਵੇ ‘‘ਭਿਕ੍ਖੂ’’ਤਿ ਵੁਚ੍ਚਤਿ.

੨੬੮. ਨ ਮੋਨੇਨ ਮੁਨੀ ਹੋਤਿ, ਮੂਲ਼੍ਹਰੂਪੋ ਅਵਿਦ੍ਦਸੁ;

ਯੋ ਚ ਤੁਲਂਵ ਪਗ੍ਗਯ੍ਹ, ਵਰਮਾਦਾਯ ਪਣ੍ਡਿਤੋ.

੨੬੯. ਪਾਪਾਨਿ ਪਰਿਵਜ੍ਜੇਤਿ, ਸ ਮੁਨੀ ਤੇਨ ਸੋ ਮੁਨਿ;

ਯੋ ਮੁਨਾਤਿ ਉਭੋ ਲੋਕੇ, ‘‘ਮੁਨਿ’’ ਤੇਨ ਪਵੁਚ੍ਚਤਿ.

੨੭੦. ਨ ਤੇਨ ਅਰਿਯੋ ਹੋਤਿ, ਯੇਨ ਪਾਣਾਨਿ ਹਿਂਸਤਿ;

ਅਹਿਂਸਾ ਸਬ੍ਬਪਾਣਾਨਂ, ‘‘ਅਰਿਯੋ’’ਤਿ ਪਵੁਚ੍ਚਤਿ.

੨੭੧. ਨ ਸੀਲਬ੍ਬਤਮਤ੍ਤੇਨ, ਬਾਹੁਸਚ੍ਚੇਨ ਵਾ ਪਨ;

ਅਥ ਵਾ ਸਮਾਧਿਲਾਭੇਨ, ਵਿਵਿਤ੍ਤਸਯਨੇਨ ਵਾ.

੨੭੨. ਫੁਸਾਮਿ ਨੇਕ੍ਖਮ੍ਮਸੁਖਂ, ਅਪੁਥੁਜ੍ਜਨਸੇਵਿਤਂ;

ਭਿਕ੍ਖੁ ਵਿਸ੍ਸਾਸਮਾਪਾਦਿ, ਅਪ੍ਪਤ੍ਤੋ ਆਸਵਕ੍ਖਯਂ.

ਧਮ੍ਮਟ੍ਠਵਗ੍ਗੋ ਏਕੂਨਵੀਸਤਿਮੋ ਨਿਟ੍ਠਿਤੋ.