੧੫. ਸੁਖਵਗ੍ਗੋ

੧੯੭. ਸੁਸੁਖਂ ਵਤ ਜੀਵਾਮ, ਵੇਰਿਨੇਸੁ ਅਵੇਰਿਨੋ;

ਵੇਰਿਨੇਸੁ ਮਨੁਸ੍ਸੇਸੁ, ਵਿਹਰਾਮ ਅਵੇਰਿਨੋ.

੧੯੮. ਸੁਸੁਖਂ ਵਤ ਜੀਵਾਮ, ਆਤੁਰੇਸੁ ਅਨਾਤੁਰਾ;

ਆਤੁਰੇਸੁ ਮਨੁਸ੍ਸੇਸੁ, ਵਿਹਰਾਮ ਅਨਾਤੁਰਾ.

੧੯੯. ਸੁਸੁਖਂ ਵਤ ਜੀਵਾਮ, ਉਸ੍ਸੁਕੇਸੁ ਅਨੁਸ੍ਸੁਕਾ;

ਉਸ੍ਸੁਕੇਸੁ ਮਨਸ੍ਸੇਸੁ, ਵਿਹਰਾਮ ਅਨੁਸ੍ਸੁਕਾ.

੨੦੦. ਸੁਸੁਖਂ ਵਤ ਜੀਵਾਮ, ਯੇਸਂ ਨੋ ਨਤ੍ਥਿ ਕਿਞ੍ਚਨਂ;

ਪੀਤਿਭਕ੍ਖਾ ਭਵਿਸ੍ਸਾਮ, ਦੇਵਾ ਆਭਸ੍ਸਰਾ ਯਥਾ.

੨੦੧. ਜਯਂ ਵੇਰਂ ਪਸਵਤਿ, ਦੁਕ੍ਖਂ ਸੇਤਿ ਪਰਾਜਿਤੋ;

ਉਪਸਨ੍ਤੋ ਸੁਖਂ ਸੇਤਿ, ਹਿਤ੍ਵਾ ਜਯਪਰਾਜਯਂ.

੨੦੨. ਨਤ੍ਥਿ ਰਾਗਸਮੋ ਅਗ੍ਗਿ, ਨਤ੍ਥਿ ਦੋਸਸਮੋ ਕਲਿ;

ਨਤ੍ਥਿ ਖਨ੍ਧਸਮਾ [ਖਨ੍ਧਾਦਿਸਾ (ਸੀ. ਸ੍ਯਾ. ਪੀ. ਰੂਪਸਿਦ੍ਧਿਯਾ ਸਮੇਤਿ)] ਦੁਕ੍ਖਾ, ਨਤ੍ਥਿ ਸਨ੍ਤਿਪਰਂ ਸੁਖਂ.

੨੦੩. ਜਿਘਚ੍ਛਾਪਰਮਾ ਰੋਗਾ, ਸਙ੍ਖਾਰਪਰਮਾ [ਸਙ੍ਕਾਰਾ ਪਰਮਾ (ਬਹੂਸੁ)] ਦੁਖਾ;

ਏਤਂ ਞਤ੍ਵਾ ਯਥਾਭੂਤਂ, ਨਿਬ੍ਬਾਨਂ ਪਰਮਂ ਸੁਖਂ.

੨੦੪. ਆਰੋਗ੍ਯਪਰਮਾ ਲਾਭਾ, ਸਨ੍ਤੁਟ੍ਠਿਪਰਮਂ ਧਨਂ;

ਵਿਸ੍ਸਾਸਪਰਮਾ ਞਾਤਿ [ਵਿਸ੍ਸਾਸਪਰਮੋ ਞਾਤਿ (ਕ. ਸੀ.), ਵਿਸ੍ਸਾਸਪਰਮਾ ਞਾਤੀ (ਸੀ. ਅਟ੍ਠ.), ਵਿਸ੍ਸਾਸਾ ਪਰਮਾ ਞਾਤਿ (ਕ.)], ਨਿਬ੍ਬਾਨਂ ਪਰਮਂ [ਨਿਬ੍ਬਾਣਪਰਮਂ (ਕ. ਸੀ.)] ਸੁਖਂ.

੨੦੫. ਪਵਿਵੇਕਰਸਂ ਪਿਤ੍ਵਾ [ਪੀਤ੍ਵਾ (ਸੀ. ਸ੍ਯਾ. ਕਂ. ਪੀ.)], ਰਸਂ ਉਪਸਮਸ੍ਸ ਚ;

ਨਿਦ੍ਦਰੋ ਹੋਤਿ ਨਿਪ੍ਪਾਪੋ, ਧਮ੍ਮਪੀਤਿਰਸਂ ਪਿਵਂ.

੨੦੬. ਸਾਹੁ ਦਸ੍ਸਨਮਰਿਯਾਨਂ, ਸਨ੍ਨਿਵਾਸੋ ਸਦਾ ਸੁਖੋ;

ਅਦਸ੍ਸਨੇਨ ਬਾਲਾਨਂ, ਨਿਚ੍ਚਮੇਵ ਸੁਖੀ ਸਿਯਾ.

੨੦੭. ਬਾਲਸਙ੍ਗਤਚਾਰੀ [ਬਾਲਸਙ੍ਗਤਿਚਾਰੀ (ਕ.)] ਹਿ, ਦੀਘਮਦ੍ਧਾਨ ਸੋਚਤਿ;

ਦੁਕ੍ਖੋ ਬਾਲੇਹਿ ਸਂਵਾਸੋ, ਅਮਿਤ੍ਤੇਨੇਵ ਸਬ੍ਬਦਾ;

ਧੀਰੋ ਚ ਸੁਖਸਂਵਾਸੋ, ਞਾਤੀਨਂਵ ਸਮਾਗਮੋ.

੨੦੮. ਤਸ੍ਮਾ ਹਿ –

ਧੀਰਞ੍ਚ ਪਞ੍ਞਞ੍ਚ ਬਹੁਸ੍ਸੁਤਞ੍ਚ, ਧੋਰਯ੍ਹਸੀਲਂ ਵਤਵਨ੍ਤਮਰਿਯਂ;

ਤਂ ਤਾਦਿਸਂ ਸਪ੍ਪੁਰਿਸਂ ਸੁਮੇਧਂ, ਭਜੇਥ ਨਕ੍ਖਤ੍ਤਪਥਂਵ ਚਨ੍ਦਿਮਾ [ਤਸ੍ਮਾ ਹਿ ਧੀਰਂ ਪਞ੍ਞਞ੍ਚ, ਬਹੁਸ੍ਸੁਤਞ੍ਚ ਧੋਰਯ੍ਹਂ; ਸੀਲਂ ਧੁਤਵਤਮਰਿਯਂ, ਤਂ ਤਾਦਿਸਂ ਸਪ੍ਪੁਰਿਸਂ; ਸੁਮੇਧਂ ਭਜੇਥ ਨਕ੍ਖਤ੍ਤਪਥਂਵ ਚਨ੍ਦਿਮਾ; (ਕ.)].

ਸੁਖਵਗ੍ਗੋ ਪਨ੍ਨਰਸਮੋ ਨਿਟ੍ਠਿਤੋ.