੧੬. ਅਤ੍ਥਦਸ੍ਸੀਬੁਦ੍ਧਵਂਸੋ
੧. ਤਤ੍ਥੇਵ ਮਣ੍ਡਕਪ੍ਪਮ੍ਹਿ, ਅਤ੍ਥਦਸ੍ਸੀ ਮਹਾਯਸੋ;
ਮਹਾਤਮਂ ਨਿਹਨ੍ਤ੍ਵਾਨ, ਪਤ੍ਤੋ ਸਮ੍ਬੋਧਿਮੁਤ੍ਤਮਂ.
੨. ਬ੍ਰਹ੍ਮੁਨਾ ਯਾਚਿਤੋ ਸਨ੍ਤੋ, ਧਮ੍ਮਚਕ੍ਕਂ ਪਵਤ੍ਤਯਿ;
ਅਮਤੇਨ ਤਪ੍ਪਯੀ ਲੋਕਂ, ਦਸਸਹਸ੍ਸਿਸਦੇਵਕਂ.
੩. ਤਸ੍ਸਾਪਿ ਲੋਕਨਾਥਸ੍ਸ, ਅਹੇਸੁਂ ਅਭਿਸਮਯਾ ਤਯੋ;
ਕੋਟਿਸਤਸਹਸ੍ਸਾਨਂ, ਪਠਮਾਭਿਸਮਯੋ ਅਹੁ.
੪. ਯਦਾ ਬੁਦ੍ਧੋ ਅਤ੍ਥਦਸ੍ਸੀ, ਚਰਤੇ ਦੇਵਚਾਰਿਕਂ;
ਕੋਟਿਸਤਸਹਸ੍ਸਾਨਂ, ਦੁਤਿਯਾਭਿਸਮਯੋ ਅਹੁ.
੫. ਪੁਨਾਪਰਂ ਯਦਾ ਬੁਦ੍ਧੋ, ਦੇਸੇਸਿ ਪਿਤੁਸਨ੍ਤਿਕੇ;
ਕੋਟਿਸਤਸਹਸ੍ਸਾਨਂ, ਤਤਿਯਾਭਿਸਮਯੋ ਅਹੁ.
੬. ਸਨ੍ਨਿਪਾਤਾ ਤਯੋ ਆਸੁਂ, ਤਸ੍ਸਾਪਿ ਚ ਮਹੇਸਿਨੋ;
ਖੀਣਾਸਵਾਨਂ ਵਿਮਲਾਨਂ, ਸਨ੍ਤਚਿਤ੍ਤਾਨ ਤਾਦਿਨਂ.
੭. ਅਟ੍ਠਨਵੁਤਿਸਹਸ੍ਸਾਨਂ, ਪਠਮੋ ਆਸਿ ਸਮਾਗਮੋ;
ਅਟ੍ਠਾਸੀਤਿਸਹਸ੍ਸਾਨਂ, ਦੁਤਿਯੋ ਆਸਿ ਸਮਾਗਮੋ.
੮. ਅਟ੍ਠਸਤ੍ਤਤਿਸਤਸਹਸ੍ਸਾਨਂ, ਤਤਿਯੋ ਆਸਿ ਸਮਾਗਮੋ;
ਅਨੁਪਾਦਾ ਵਿਮੁਤ੍ਤਾਨਂ, ਵਿਮਲਾਨਂ ਮਹੇਸਿਨਂ.
੯. ਅਹਂ ਤੇਨ ਸਮਯੇਨ, ਜਟਿਲੋ ਉਗ੍ਗਤਾਪਨੋ;
ਸੁਸੀਮੋ ਨਾਮ ਨਾਮੇਨ, ਮਹਿਯਾ ਸੇਟ੍ਠਸਮ੍ਮਤੋ.
੧੦. ਦਿਬ੍ਬਂ ਮਨ੍ਦਾਰਵਂ ਪੁਪ੍ਫਂ, ਪਦੁਮਂ ਪਾਰਿਛਤ੍ਤਕਂ;
ਦੇਵਲੋਕਾਹਰਿਤ੍ਵਾਨ, ਸਮ੍ਬੁਦ੍ਧਮਭਿਪੂਜਯਿਂ.
੧੧. ਸੋਪਿ ਮਂ ਬੁਦ੍ਧੋ ਬ੍ਯਾਕਾਸਿ, ਅਤ੍ਥਦਸ੍ਸੀ ਮਹਾਮੁਨਿ;
‘‘ਅਟ੍ਠਾਰਸੇ ਕਪ੍ਪਸਤੇ, ਅਯਂ ਬੁਦ੍ਧੋ ਭਵਿਸ੍ਸਤਿ.
੧੨. ‘‘ਪਧਾਨਂ ਪਦਹਿਤ੍ਵਾਨ…ਪੇ… ਹੇਸ੍ਸਾਮ ਸਮ੍ਮੁਖਾ ਇਮਂ’’.
੧੩. ਤਸ੍ਸਾਪਿ ਵਚਨਂ ਸੁਤ੍ਵਾ, ਹਟ੍ਠੋ [ਤੁਟ੍ਠੋ (ਸ੍ਯਾ. ਕਂ.)] ਸਂਵਿਗ੍ਗਮਾਨਸੋ;
ਉਤ੍ਤਰਿਂ ਵਤਮਧਿਟ੍ਠਾਸਿਂ, ਦਸਪਾਰਮਿਪੂਰਿਯਾ.
੧੪. ਸੋਭਣਂ ਨਾਮ ਨਗਰਂ, ਸਾਗਰੋ ਨਾਮ ਖਤ੍ਤਿਯੋ;
ਸੁਦਸ੍ਸਨਾ ਨਾਮ ਜਨਿਕਾ, ਅਤ੍ਥਦਸ੍ਸਿਸ੍ਸ ਸਤ੍ਥੁਨੋ.
੧੫. ਦਸਵਸ੍ਸਸਹਸ੍ਸਾਨਿ, ਅਗਾਰਂ ਅਜ੍ਝ ਸੋ ਵਸਿ;
ਅਮਰਗਿਰਿ ਸੁਗਿਰਿ ਵਾਹਨਾ, ਤਯੋ ਪਾਸਾਦਮੁਤ੍ਤਮਾ.
੧੬. ਤੇਤ੍ਤਿਂਸਞ੍ਚ ਸਹਸ੍ਸਾਨਿ, ਨਾਰਿਯੋ ਸਮਲਙ੍ਕਤਾ;
ਵਿਸਾਖਾ ਨਾਮ ਨਾਰੀ ਚ, ਸੇਲੋ ਨਾਮਾਸਿ ਅਤ੍ਰਜੋ.
੧੭. ਨਿਮਿਤ੍ਤੇ ਚਤੁਰੋ ਦਿਸ੍ਵਾ, ਅਸ੍ਸਯਾਨੇਨ ਨਿਕ੍ਖਮਿ;
ਅਨੂਨਅਟ੍ਠਮਾਸਾਨਿ, ਪਧਾਨਂ ਪਦਹੀ ਜਿਨੋ.
੧੮. ਬ੍ਰਹ੍ਮੁਨਾ ਯਾਚਿਤੋ ਸਨ੍ਤੋ, ਅਤ੍ਥਦਸ੍ਸੀ ਮਹਾਯਸੋ;
ਵਤ੍ਤਿ ਚਕ੍ਕਂ ਮਹਾਵੀਰੋ, ਅਨੋਮੁਯ੍ਯਾਨੇ ਨਰਾਸਭੋ.
੧੯. ਸਨ੍ਤੋ ਚ ਉਪਸਨ੍ਤੋ ਚ, ਅਹੇਸੁਂ ਅਗ੍ਗਸਾਵਕਾ;
ਅਭਯੋ ਨਾਮੁਪਟ੍ਠਾਕੋ, ਅਤ੍ਥਦਸ੍ਸਿਸ੍ਸ ਸਤ੍ਥੁਨੋ.
੨੦. ਧਮ੍ਮਾ ਚੇਵ ਸੁਧਮ੍ਮਾ ਚ, ਅਹੇਸੁਂ ਅਗ੍ਗਸਾਵਿਕਾ;
ਬੋਧਿ ਤਸ੍ਸ ਭਗਵਤੋ, ਚਮ੍ਪਕੋਤਿ ਪਵੁਚ੍ਚਤਿ.
੨੧. ਨਕੁਲੋ ਚ ਨਿਸਭੋ ਚ, ਅਹੇਸੁਂ ਅਗ੍ਗੁਪਟ੍ਠਕਾ;
ਮਕਿਲਾ ਚ ਸੁਨਨ੍ਦਾ ਚ, ਅਹੇਸੁਂ ਅਗ੍ਗੁਪਟ੍ਠਿਕਾ.
੨੨. ਸੋਪਿ ਬੁਦ੍ਧੋ ਅਸਮਸਮੋ, ਅਸੀਤਿਹਤ੍ਥਮੁਗ੍ਗਤੋ;
ਸੋਭਤੇ ਸਾਲਰਾਜਾਵ, ਉਲ਼ੁਰਾਜਾਵ ਪੂਰਿਤੋ.
੨੩. ਤਸ੍ਸ ਪਾਕਤਿਕਾ ਰਂਸੀ, ਅਨੇਕਸਤਕੋਟਿਯੋ;
ਉਦ੍ਧਂ ਅਧੋ ਦਸ ਦਿਸਾ, ਫਰਨ੍ਤਿ ਯੋਜਨਂ ਸਦਾ.
੨੪. ਸੋਪਿ ਬੁਦ੍ਧੋ ਨਰਾਸਭੋ, ਸਬ੍ਬਸਤ੍ਤੁਤ੍ਤਮੋ ਮੁਨਿ;
ਵਸ੍ਸਸਤਸਹਸ੍ਸਾਨਿ, ਲੋਕੇ ਅਟ੍ਠਾਸਿ ਚਕ੍ਖੁਮਾ.
੨੫. ਅਤੁਲਂ ਦਸ੍ਸੇਤ੍ਵਾ ਓਭਾਸਂ, ਵਿਰੋਚੇਤ੍ਵਾ ਸਦੇਵਕੇ [ਅਤੁਲਂ ਦਸ੍ਸਯਿਤ੍ਵਾਨ, ਓਭਾਸੇਤ੍ਵਾ ਸਦੇਵਕੇ (ਸੀ. ਕ.)];
ਸੋਪਿ ਅਨਿਚ੍ਚਤਂ ਪਤ੍ਤੋ, ਯਥਗ੍ਗੁਪਾਦਾਨਸਙ੍ਖਯਾ.
੨੬. ਅਤ੍ਥਦਸ੍ਸੀ ਜਿਨਵਰੋ, ਅਨੋਮਾਰਾਮਮ੍ਹਿ ਨਿਬ੍ਬੁਤੋ;
ਧਾਤੁਵਿਤ੍ਥਾਰਿਕਂ ਆਸਿ, ਤੇਸੁ ਤੇਸੁ ਪਦੇਸਤੋਤਿ.
ਅਤ੍ਥਦਸ੍ਸਿਸ੍ਸ ਭਗਵਤੋ ਵਂਸੋ ਚੁਦ੍ਦਸਮੋ.