(੧) ਅਵਿਪ੍ਪਵਾਸਪਞ੍ਹਾਵਣ੍ਣਨਾ

੪੭੯. ਸੇਦਮੋਚਨਗਾਥਾਸੁ ਅਸਂਵਾਸੋਤਿ ਉਪੋਸਥਪਵਾਰਣਾਦਿਨਾ ਸਂਵਾਸੇਨ ਅਸਂਵਾਸੋ. ਸਮ੍ਭੋਗੋ ਏਕਚ੍ਚੋ ਤਹਿਂ ਨ ਲਬ੍ਭਤੀਤਿ ਅਕਪ੍ਪਿਯਸਮ੍ਭੋਗੋ ਨ ਲਬ੍ਭਤਿ, ਨਹਾਪਨਭੋਜਨਾਦਿਪਟਿਜਗ੍ਗਨਂ ਪਨ ਮਾਤਰਾਯੇਵ ਕਾਤੁਂ ਲਬ੍ਭਤਿ. ਅਵਿਪ੍ਪਵਾਸੇਨ ਅਨਾਪਤ੍ਤੀਤਿ ਸਹਗਾਰਸੇਯ੍ਯਾਯ ਅਨਾਪਤ੍ਤਿ. ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾਤਿ ਏਸਾ ਪਞ੍ਹਾ ਕੁਸਲੇਹਿ ਪਣ੍ਡਿਤੇਹਿ ਚਿਨ੍ਤਿਤਾ. ਅਸ੍ਸਾ ਵਿਸ੍ਸਜ੍ਜਨਂ ਦਾਰਕਮਾਤੁਯਾ ਭਿਕ੍ਖੁਨਿਯਾ ਵੇਦਿਤਬ੍ਬਂ, ਤਸ੍ਸਾ ਹਿ ਪੁਤ੍ਤਂ ਸਨ੍ਧਾਯੇਤਂ ਵੁਤ੍ਤਨ੍ਤਿ.

ਅਵਿਸ੍ਸਜ੍ਜਿਤਗਾਥਾ ਗਰੁਭਣ੍ਡਂ ਸਨ੍ਧਾਯ ਵੁਤ੍ਤਾ, ਅਤ੍ਥੋ ਪਨਸ੍ਸਾ ਗਰੁਭਣ੍ਡਵਿਨਿਚ੍ਛਯੇ ਵੁਤ੍ਤੋਯੇਵ.

ਦਸ ਪੁਗ੍ਗਲੇ ਨ ਵਦਾਮੀਤਿ ਸੇਨਾਸਨਕ੍ਖਨ੍ਧਕੇ ਵੁਤ੍ਤੇ ਦਸ ਪੁਗ੍ਗਲੇ ਨ ਵਦਾਮਿ. ਏਕਾਦਸ ਵਿਵਜ੍ਜਿਯਾਤਿ ਯੇ ਮਹਾਖਨ੍ਧਕੇ ਏਕਾਦਸ ਵਿਵਜ੍ਜਨੀਯਪੁਗ੍ਗਲਾ ਵੁਤ੍ਤਾ, ਤੇਪਿ ਨ ਵਦਾਮਿ. ਅਯਂ ਪਞ੍ਹਾ ਨਗ੍ਗਂ ਭਿਕ੍ਖੁਂ ਸਨ੍ਧਾਯ ਵੁਤ੍ਤਾ.

ਕਥਂ ਨੁ ਸਿਕ੍ਖਾਯ ਅਸਾਧਾਰਣੋਤਿ ਪਞ੍ਹਾ ਨਹਾਪਿਤਪੁਬ੍ਬਕਂ ਭਿਕ੍ਖੁਂ ਸਨ੍ਧਾਯ ਵੁਤ੍ਤਾ. ਅਯਞ੍ਹਿ ਖੁਰਭਣ੍ਡਂ ਪਰਿਹਰਿਤੁਂ ਨ ਲਭਤਿ, ਅਞ੍ਞੇ ਲਭਨ੍ਤਿ; ਤਸ੍ਮਾ ਸਿਕ੍ਖਾਯ ਅਸਾਧਾਰਣੋ.

ਤਂ ਪੁਗ੍ਗਲਂ ਕਤਮਂ ਵਦਨ੍ਤਿ ਬੁਦ੍ਧਾਤਿ ਅਯਂ ਪਞ੍ਹਾ ਨਿਮ੍ਮਿਤਬੁਦ੍ਧਂ ਸਨ੍ਧਾਯ ਵੁਤ੍ਤਾ.

ਅਧੋਨਾਭਿਂ ਵਿਵਜ੍ਜਿਯਾਤਿ ਅਧੋਨਾਭਿਂ ਵਿਵਜ੍ਜੇਤ੍ਵਾ. ਅਯਂ ਪਞ੍ਹਾ ਯਂ ਤਂ ਅਸੀਸਕਂ ਕਬਨ੍ਧਂ, ਯਸ੍ਸ ਉਰੇ ਅਕ੍ਖੀਨਿ ਚੇਵ ਮੁਖਞ੍ਚ ਹੋਤਿ, ਤਂ ਸਨ੍ਧਾਯ ਵੁਤ੍ਤਾ.

ਭਿਕ੍ਖੁ ਸਞ੍ਞਾਚਿਕਾਯ ਕੁਟਿਨ੍ਤਿ ਅਯਂ ਪਞ੍ਹਾ ਤਿਣਚ੍ਛਾਦਨਂ ਕੁਟਿਂ ਸਨ੍ਧਾਯ ਵੁਤ੍ਤਾ. ਦੁਤਿਯਪਞ੍ਹਾ ਸਬ੍ਬਮਤ੍ਤਿਕਾਮਯਂ ਕੁਟਿਂ ਸਨ੍ਧਾਯ ਵੁਤ੍ਤਾ.

ਆਪਜ੍ਜੇਯ੍ਯ ਗਰੁਕਂ ਛੇਜ੍ਜਵਤ੍ਥੁਨ੍ਤਿ ਅਯਂ ਪਞ੍ਹਾ ਵਜ੍ਜਪਟਿਚ੍ਛਾਦਿਕਂ ਭਿਕ੍ਖੁਨਿਂ ਸਨ੍ਧਾਯ ਵੁਤ੍ਤਾ. ਦੁਤਿਯਪਞ੍ਹਾ ਪਣ੍ਡਕਾਦਯੋ ਅਭਬ੍ਬਪੁਗ੍ਗਲੇ ਸਨ੍ਧਾਯ ਵੁਤ੍ਤਾ. ਏਕਾਦਸਪਿ ਹਿ ਤੇ ਗਿਹਿਭਾਵੇਯੇਵ ਪਾਰਾਜਿਕਂ ਪਤ੍ਤਾ.

ਵਾਚਾਤਿ ਵਾਚਾਯ ਅਨਾਲਪਨ੍ਤੋ. ਗਿਰਂ ਨੋ ਚ ਪਰੇ ਭਣੇਯ੍ਯਾਤਿ ‘‘ਇਤਿ ਇਮੇ ਸੋਸ੍ਸਨ੍ਤੀ’’ਤਿ ਪਰਪੁਗ੍ਗਲੇ ਸਨ੍ਧਾਯ ਸਦ੍ਦਮ੍ਪਿ ਨ ਨਿਚ੍ਛਾਰੇਯ੍ਯ. ਅਯਂ ਪਞ੍ਹਾ ‘‘ਸਨ੍ਤਿਂ ਆਪਤ੍ਤਿਂ ਨਾਵਿਕਰੇਯ੍ਯ, ਸਮ੍ਪਜਾਨਮੁਸਾਵਾਦਸ੍ਸ ਹੋਤੀ’’ਤਿ ਇਮਂ ਮੁਸਾਵਾਦਂ ਸਨ੍ਧਾਯ ਵੁਤ੍ਤਾ. ਤਸ੍ਸ ਹਿ ਭਿਕ੍ਖੁਨੋ ਅਧਮ੍ਮਿਕਾਯ ਪਟਿਞ੍ਞਾਯ ਤੁਣ੍ਹੀਭੂਤਸ੍ਸ ਨਿਸਿਨ੍ਨਸ੍ਸ ਮਨੋਦ੍ਵਾਰੇ ਆਪਤ੍ਤਿ ਨਾਮ ਨਤ੍ਥਿ. ਯਸ੍ਮਾ ਪਨ ਆਵਿਕਾਤਬ੍ਬਂ ਨ ਆਵਿਕਰੋਤਿ, ਤੇਨਸ੍ਸ ਵਚੀਦ੍ਵਾਰੇ ਅਕਿਰਿਯਤੋ ਅਯਂ ਆਪਤ੍ਤਿ ਸਮੁਟ੍ਠਾਤੀਤਿ ਵੇਦਿਤਬ੍ਬਾ.

ਸਙ੍ਘਾਦਿਸੇਸਾ ਚਤੁਰੋਤਿ ਅਯਂ ਪਞ੍ਹਾ ਅਰੁਣੁਗ੍ਗੇ ਗਾਮਨ੍ਤਰਪਰਿਯਾਪਨ੍ਨਂ ਨਦਿਪਾਰਂ ਓਕ੍ਕਨ੍ਤਭਿਕ੍ਖੁਨਿਂ ਸਨ੍ਧਾਯ ਵੁਤ੍ਤਾ, ਸਾ ਹਿ ਸਕਗਾਮਤੋ ਪਚ੍ਚੂਸਸਮਯੇ ਨਿਕ੍ਖਮਿਤ੍ਵਾ ਅਰੁਣੁਗ੍ਗਮਨਕਾਲੇ ਵੁਤ੍ਤਪ੍ਪਕਾਰਂ ਨਦਿਪਾਰਂ ਓਕ੍ਕਨ੍ਤਮਤ੍ਤਾਵ ਰਤ੍ਤਿਵਿਪ੍ਪਵਾਸਗਾਮਨ੍ਤਰਨਦਿਪਾਰਗਣਮ੍ਹਾਓਹੀਯਨਲਕ੍ਖਣੇਨ ਏਕਪ੍ਪਹਾਰੇਨੇਵ ਚਤੁਰੋ ਸਙ੍ਘਾਦਿਸੇਸੇ ਆਪਜ੍ਜਤਿ.

ਸਿਯਾ ਆਪਤ੍ਤਿਯੋ ਨਾਨਾਤਿ ਅਯਂ ਪਞ੍ਹਾ ਏਕਤੋਉਪਸਮ੍ਪਨ੍ਨਾ ਦ੍ਵੇ ਭਿਕ੍ਖੁਨਿਯੋ ਸਨ੍ਧਾਯ ਵੁਤ੍ਤਾ. ਤਾਸੁ ਹਿ ਭਿਕ੍ਖੂਨਂ ਸਨ੍ਤਿਕੇ ਏਕਤੋਉਪਸਮ੍ਪਨ੍ਨਾਯ ਹਤ੍ਥਤੋ ਗਣ੍ਹਨ੍ਤਸ੍ਸ ਪਾਚਿਤ੍ਤਿਯਂ, ਭਿਕ੍ਖੁਨੀਨਂ ਸਨ੍ਤਿਕੇ ਏਕਤੋਉਪਸਮ੍ਪਨ੍ਨਾਯ ਹਤ੍ਥਤੋ ਗਣ੍ਹਨ੍ਤਸ੍ਸ ਦੁਕ੍ਕਟਂ.

ਚਤੁਰੋ ਜਨਾ ਸਂਵਿਧਾਯਾਤਿ ਆਚਰਿਯੋ ਚ ਤਯੋ ਚ ਅਨ੍ਤੇਵਾਸਿਕਾ ਛਮਾਸਕਂ ਭਣ੍ਡਂ ਅਵਹਰਿਂਸੁ, ਆਚਰਿਯਸ੍ਸ ਸਾਹਤ੍ਥਿਕਾ ਤਯੋ ਮਾਸਕਾ, ਆਣਤ੍ਤਿਯਾਪਿ ਤਯੋਵ ਤਸ੍ਮਾ ਥੁਲ੍ਲਚ੍ਚਯਂ ਆਪਜ੍ਜਤਿ, ਇਤਰੇਸਂ ਸਾਹਤ੍ਥਿਕੋ ਏਕੇਕੋ, ਆਣਤ੍ਤਿਕਾ ਪਞ੍ਚਾਤਿ ਤਸ੍ਮਾ ਪਾਰਾਜਿਕਂ ਆਪਜ੍ਜਿਂਸੁ. ਅਯਮੇਤ੍ਥ ਸਙ੍ਖੇਪੋ. ਵਿਤ੍ਥਾਰੋ ਪਨ ਅਦਿਨ੍ਨਾਦਾਨਪਾਰਾਜਿਕੇ ਸਂਵਿਦਾਵਹਾਰਵਣ੍ਣਨਾਯਂ ਵੁਤ੍ਤੋ.