ਅਪਰਦੁਤਿਯਗਾਥਾਸਙ੍ਗਣਿਕਂ

(੧) ਕਾਯਿਕਾਦਿਆਪਤ੍ਤਿਵਣ੍ਣਨਾ

੪੭੪. ‘‘ਕਤਿ ਆਪਤ੍ਤਿਯੋ ਕਾਯਿਕਾ’’ਤਿਆਦਿਗਾਥਾਨਂ ਵਿਸ੍ਸਜ੍ਜਨੇ ਛ ਆਪਤ੍ਤਿਯੋ ਕਾਯਿਕਾਤਿ ਅਨ੍ਤਰਪੇਯ੍ਯਾਲੇ ਚਤੁਤ੍ਥੇਨ ਆਪਤ੍ਤਿਸਮੁਟ੍ਠਾਨੇਨ ਛ ਆਪਤ੍ਤਿਯੋ ਆਪਜ੍ਜਤਿ, ‘‘ਭਿਕ੍ਖੁ ਮੇਥੁਨਂ ਧਮ੍ਮਂ ਪਟਿਸੇਵਤਿ, ਆਪਤ੍ਤਿ ਪਾਰਾਜਿਕਸ੍ਸਾ’’ਤਿਆਦਿਨਾ ਨਯੇਨ ਵੁਤ੍ਤਾਪਤ੍ਤਿਯੋ. ਕਾਯਦ੍ਵਾਰੇ ਸਮੁਟ੍ਠਿਤਤ੍ਤਾ ਹਿ ਏਤਾ ਕਾਯਿਕਾਤਿ ਵੁਚ੍ਚਨ੍ਤਿ. ਛ ਵਾਚਸਿਕਾਤਿ ਤਸ੍ਮਿਂਯੇਵ ਅਨ੍ਤਰਪੇਯ੍ਯਾਲੇ ਪਞ੍ਚਮੇਨ ਆਪਤ੍ਤਿਸਮੁਟ੍ਠਾਨੇਨ ਛ ਆਪਤ੍ਤਿਯੋ ਆਪਜ੍ਜਤਿ, ‘‘ਭਿਕ੍ਖੁ ਪਾਪਿਚ੍ਛੋ ਇਚ੍ਛਾਪਕਤੋ’’ਤਿਆਦਿਨਾ ਨਯੇਨ ਵੁਤ੍ਤਾਪਤ੍ਤਿਯੋ. ਛਾਦੇਨ੍ਤਸ੍ਸ ਤਿਸ੍ਸੋਤਿ ਵਜ੍ਜਪਟਿਚ੍ਛਾਦਿਕਾਯ ਭਿਕ੍ਖੁਨਿਯਾ ਪਾਰਾਜਿਕਂ, ਭਿਕ੍ਖੁਸ੍ਸ ਸਙ੍ਘਾਦਿਸੇਸਪਟਿਚ੍ਛਾਦਨੇ ਪਾਚਿਤ੍ਤਿਯਂ, ਅਤ੍ਤਨੋ ਦੁਟ੍ਠੁਲ੍ਲਾਪਤ੍ਤਿਪਟਿਚ੍ਛਾਦਨੇ ਦੁਕ੍ਕਟਂ. ਪਞ੍ਚ ਸਂਸਗ੍ਗਪਚ੍ਚਯਾਤਿ ਭਿਕ੍ਖੁਨਿਯਾ ਕਾਯਸਂਸਗ੍ਗੇ ਪਾਰਾਜਿਕਂ, ਭਿਕ੍ਖੁਨੋ ਸਙ੍ਘਾਦਿਸੇਸੋ, ਕਾਯੇਨ ਕਾਯਪਟਿਬਦ੍ਧੇ ਥੁਲ੍ਲਚ੍ਚਯਂ, ਨਿਸ੍ਸਗ੍ਗਿਯੇਨ ਕਾਯਪਟਿਬਦ੍ਧੇ ਦੁਕ੍ਕਟਂ, ਅਙ੍ਗੁਲਿਪਤੋਦਕੇ ਪਾਚਿਤ੍ਤਿਯਨ੍ਤਿ ਇਮਾ ਕਾਯਸਂਸਗ੍ਗਪਚ੍ਚਯਾ ਪਞ੍ਚਾਪਤ੍ਤਿਯੋ.

ਅਰੁਣੁਗ੍ਗੇ ਤਿਸ੍ਸੋਤਿ ਏਕਰਤ੍ਤਛਾਰਤ੍ਤਸਤ੍ਤਾਹਦਸਾਹਮਾਸਾਤਿਕ੍ਕਮਵਸੇਨ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ, ਭਿਕ੍ਖੁਨਿਯਾ ਰਤ੍ਤਿਵਿਪ੍ਪਵਾਸੇ ਸਙ੍ਘਾਦਿਸੇਸੋ, ‘‘ਪਠਮਮ੍ਪਿ ਯਾਮਂ ਛਾਦੇਤਿ, ਦੁਤਿਯਮ੍ਪਿ ਤਤਿਯਮ੍ਪਿ ਯਾਮਂ ਛਾਦੇਤਿ, ਉਦ੍ਧਸ੍ਤੇ ਅਰੁਣੇ ਛਨ੍ਨਾ ਹੋਤਿ ਆਪਤ੍ਤਿ, ਯੋ ਛਾਦੇਤਿ ਸੋ ਦੁਕ੍ਕਟਂ ਦੇਸਾਪੇਤਬ੍ਬੋ’’ਤਿ ਇਮਾ ਅਰੁਣੁਗ੍ਗੇ ਤਿਸ੍ਸੋ ਆਪਤ੍ਤਿਯੋ ਆਪਜ੍ਜਤਿ. ਦ੍ਵੇ ਯਾਵਤਤਿਯਕਾਤਿ ਏਕਾਦਸ ਯਾਵਤਤਿਯਕਾ ਨਾਮ, ਪਞ੍ਞਤ੍ਤਿਵਸੇਨ ਪਨ ਦ੍ਵੇ ਹੋਨ੍ਤਿ ਭਿਕ੍ਖੂਨਂ ਯਾਵਤਤਿਯਕਾ ਭਿਕ੍ਖੁਨੀਨਂ ਯਾਵਤਤਿਯਕਾਤਿ. ਏਕੇਤ੍ਥ ਅਟ੍ਠਵਤ੍ਥੁਕਾਤਿ ਭਿਕ੍ਖੁਨੀਨਂਯੇਵ ਏਕਾ ਏਤ੍ਥ ਇਮਸ੍ਮਿਂ ਸਾਸਨੇ ਅਟ੍ਠਵਤ੍ਥੁਕਾ ਨਾਮ. ਏਕੇਨ ਸਬ੍ਬਸਙ੍ਗਹੋਤਿ ‘‘ਯਸ੍ਸ ਸਿਯਾ ਆਪਤ੍ਤਿ, ਸੋ ਆਵਿਕਰੇਯ੍ਯਾ’’ਤਿ ਇਮਿਨਾ ਏਕੇਨ ਨਿਦਾਨੁਦ੍ਦੇਸੇਨ ਸਬ੍ਬਸਿਕ੍ਖਾਪਦਾਨਞ੍ਚ ਸਬ੍ਬਪਾਤਿਮੋਕ੍ਖੁਦ੍ਦੇਸਾਨਞ੍ਚ ਸਙ੍ਗਹੋ ਹੋਤਿ.

ਵਿਨਯਸ੍ਸ ਦ੍ਵੇ ਮੂਲਾਨੀਤਿ ਕਾਯੋ ਚੇਵ ਵਾਚਾ ਚ. ਗਰੁਕਾ ਦ੍ਵੇ ਵੁਤ੍ਤਾਤਿ ਪਾਰਾਜਿਕਸਙ੍ਘਾਦਿਸੇਸਾ. ਦ੍ਵੇ ਦੁਟ੍ਠੁਲ੍ਲਚ੍ਛਾਦਨਾਤਿ ਵਜ੍ਜਪਟਿਚ੍ਛਾਦਿਕਾਯ ਪਾਰਾਜਿਕਂ ਸਙ੍ਘਾਦਿਸੇਸਂ ਪਟਿਚ੍ਛਾਦਕਸ੍ਸ ਪਾਚਿਤ੍ਤਿਯਨ੍ਤਿ ਇਮਾ ਦ੍ਵੇ ਦੁਟ੍ਠੁਲ੍ਲਚ੍ਛਾਦਨਾਪਤ੍ਤਿਯੋ ਨਾਮ.

ਗਾਮਨ੍ਤਰੇ ਚਤਸ੍ਸੋਤਿ ‘‘ਭਿਕ੍ਖੁ ਭਿਕ੍ਖੁਨਿਯਾ ਸਦ੍ਧਿਂ ਸਂਵਿਦਹਤਿ, ਦੁਕ੍ਕਟਂ; ਅਞ੍ਞਸ੍ਸ ਗਾਮਸ੍ਸ ਉਪਚਾਰਂ ਓਕ੍ਕਮਤਿ, ਪਾਚਿਤ੍ਤਿਯਂ; ਭਿਕ੍ਖੁਨਿਯਾ ਗਾਮਨ੍ਤਰਂ ਗਚ੍ਛਨ੍ਤਿਯਾ ਪਰਿਕ੍ਖਿਤ੍ਤੇ ਗਾਮੇ ਪਠਮਪਾਦੇ ਥੁਲ੍ਲਚ੍ਚਯਂ, ਦੁਤਿਯਪਾਦੇ ਸਙ੍ਘਾਦਿਸੇਸੋ; ਅਪਰਿਕ੍ਖਿਤ੍ਤਸ੍ਸ ਪਠਮਪਾਦੇ ਉਪਚਾਰੋਕ੍ਕਮਨੇ ਥੁਲ੍ਲਚ੍ਚਯਂ, ਦੁਤਿਯਪਾਦੇ ਸਙ੍ਘਾਦਿਸੇਸੋ’’ਤਿ ਇਮਾ ਗਾਮਨ੍ਤਰੇ ਦੁਕ੍ਕਟਪਾਚਿਤ੍ਤਿਯਥੁਲ੍ਲਚ੍ਚਯਸਙ੍ਘਆਦਿਸੇਸਵਸੇਨ ਚਤਸ੍ਸੋ ਆਪਤ੍ਤਿਯੋ. ਚਤਸ੍ਸੋ ਨਦਿਪਾਰਪਚ੍ਚਯਾਤਿ ‘‘ਭਿਕ੍ਖੁ ਭਿਕ੍ਖੁਨਿਯਾ ਸਦ੍ਧਿਂ ਸਂਵਿਦਹਤਿ, ਦੁਕ੍ਕਟਂ; ਨਾਵਂ ਅਭਿਰੁਹਤਿ, ਪਾਚਿਤ੍ਤਿਯਂ; ਭਿਕ੍ਖੁਨਿਯਾ ਨਦਿਪਾਰਂ ਗਚ੍ਛਨ੍ਤਿਯਾ ਉਤ੍ਤਰਣਕਾਲੇ ਪਠਮਪਾਦੇ ਥੁਲ੍ਲਚ੍ਚਯਂ, ਦੁਤਿਯਪਾਦੇ ਸਙ੍ਘਾਦਿਸੇਸੋ’’ਤਿ ਇਮਾ ਚਤਸ੍ਸੋ. ਏਕਮਂਸੇ ਥੁਲ੍ਲਚ੍ਚਯਨ੍ਤਿ ਮਨੁਸ੍ਸਮਂਸੇ. ਨਵਮਂਸੇਸੁ ਦੁਕ੍ਕਟਨ੍ਤਿ ਸੇਸਅਕਪ੍ਪਿਯਮਂਸੇਸੁ.

ਦ੍ਵੇ ਵਾਚਸਿਕਾ ਰਤ੍ਤਿਨ੍ਤਿ ਭਿਕ੍ਖੁਨੀ ਰਤ੍ਤਨ੍ਧਕਾਰੇ ਅਪ੍ਪਦੀਪੇ ਪੁਰਿਸੇਨ ਸਦ੍ਧਿਂ ਹਤ੍ਥਪਾਸੇ ਠਿਤਾ ਸਲ੍ਲਪਤਿ, ਪਾਚਿਤ੍ਤਿਯਂ; ਹਤ੍ਥਪਾਸਂ ਵਿਜਹਿਤ੍ਵਾ ਠਿਤਾ ਸਲ੍ਲਪਤਿ, ਦੁਕ੍ਕਟਂ. ਦ੍ਵੇ ਵਾਚਸਿਕਾ ਦਿਵਾਤਿ ਭਿਕ੍ਖੁਨੀ ਦਿਵਾ ਪਟਿਚ੍ਛਨ੍ਨੇ ਓਕਾਸੇ ਪੁਰਿਸੇਨ ਸਦ੍ਧਿਂ ਹਤ੍ਥਪਾਸੇ ਠਿਤਾ ਸਲ੍ਲਪਤਿ, ਪਾਚਿਤ੍ਤਿਯਂ; ਹਤ੍ਥਪਾਸਂ ਵਿਜਹਿਤ੍ਵਾ ਸਲ੍ਲਪਤਿ, ਦੁਕ੍ਕਟਂ. ਦਦਮਾਨਸ੍ਸ ਤਿਸ੍ਸੋਤਿ ਮਰਣਾਧਿਪ੍ਪਾਯੋ ਮਨੁਸ੍ਸਸ੍ਸ ਵਿਸਂ ਦੇਤਿ, ਸੋ ਚੇ ਤੇਨ ਮਰਤਿ, ਪਾਰਾਜਿਕਂ; ਯਕ੍ਖਪੇਤਾਨਂ ਦੇਤਿ, ਤੇ ਚੇ ਮਰਨ੍ਤਿ, ਥੁਲ੍ਲਚ੍ਚਯਂ; ਤਿਰਚ੍ਛਾਨਗਤਸ੍ਸ ਦੇਤਿ, ਸੋ ਚੇ ਮਰਤਿ, ਪਾਚਿਤ੍ਤਿਯਂ; ਅਞ੍ਞਾਤਿਕਾਯ ਭਿਕ੍ਖੁਨਿਯਾ ਚੀਵਰਦਾਨੇ ਪਾਚਿਤ੍ਤਿਯਨ੍ਤਿ ਏਵਂ ਦਦਮਾਨਸ੍ਸ ਤਿਸ੍ਸੋ ਆਪਤ੍ਤਿਯੋ. ਚਤ੍ਤਾਰੋ ਚ ਪਟਿਗ੍ਗਹੇਤਿ ਹਤ੍ਥਗ੍ਗਾਹ-ਵੇਣਿਗ੍ਗਾਹੇਸੁ ਸਙ੍ਘਾਦਿਸੇਸੋ, ਮੁਖੇਨ ਅਙ੍ਗਜਾਤਗ੍ਗਹਣੇ ਪਾਰਾਜਿਕਂ, ਅਞ੍ਞਾਤਿਕਾਯ ਭਿਕ੍ਖੁਨਿਯਾ ਚੀਵਰਪਟਿਗ੍ਗਹਣੇ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ, ਅਵਸ੍ਸੁਤਾਯ ਅਵਸ੍ਸੁਤਸ੍ਸ ਹਤ੍ਥਤੋ ਖਾਦਨੀਯਂ ਭੋਜਨੀਯਂ ਪਟਿਗ੍ਗਣ੍ਹਨ੍ਤਿਯਾ ਥੁਲ੍ਲਚ੍ਚਯਂ; ਏਵਂ ਪਟਿਗ੍ਗਹੇ ਚਤ੍ਤਾਰੋ ਆਪਤ੍ਤਿਕ੍ਖਨ੍ਧਾ ਹੋਨ੍ਤਿ.

(੨) ਦੇਸਨਾਗਾਮਿਨਿਯਾਦਿਵਣ੍ਣਨਾ

੪੭੫. ਪਞ੍ਚ ਦੇਸਨਾਗਾਮਿਨਿਯੋਤਿ ਲਹੁਕਾ ਪਞ੍ਚ. ਛ ਸਪ੍ਪਟਿਕਮ੍ਮਾਤਿ ਪਾਰਾਜਿਕਂ ਠਪੇਤ੍ਵਾ ਅਵਸੇਸਾ. ਏਕੇਤ੍ਥ ਅਪ੍ਪਟਿਕਮ੍ਮਾਤਿ ਏਕਾ ਪਾਰਾਜਿਕਾਪਤ੍ਤਿ.

ਵਿਨਯਗਰੁਕਾ ਦ੍ਵੇ ਵੁਤ੍ਤਾਤਿ ਪਾਰਾਜਿਕਞ੍ਚੇਵ ਸਙ੍ਘਾਦਿਸੇਸਞ੍ਚ. ਕਾਯਵਾਚਸਿਕਾਨਿ ਚਾਤਿ ਸਬ੍ਬਾਨੇਵ ਸਿਕ੍ਖਾਪਦਾਨਿ ਕਾਯਵਾਚਸਿਕਾਨਿ, ਮਨੋਦ੍ਵਾਰੇ ਪਞ੍ਞਤ੍ਤਂ ਏਕਸਿਕ੍ਖਾਪਦਮ੍ਪਿ ਨਤ੍ਥਿ. ਏਕੋ ਵਿਕਾਲੇ ਧਞ੍ਞਰਸੋਤਿ ਲੋਣਸੋਵੀਰਕਂ. ਅਯਮੇਵ ਹਿ ਏਕੋ ਧਞ੍ਞਰਸੋ ਵਿਕਾਲੇ ਵਟ੍ਟਤਿ. ਏਕਾ ਞਤ੍ਤਿਚਤੁਤ੍ਥੇਨ ਸਮ੍ਮੁਤੀਤਿ ਭਿਕ੍ਖੁਨੋਵਾਦਕਸਮ੍ਮੁਤਿ. ਅਯਮੇਵ ਹਿ ਏਕਾ ਞਤ੍ਤਿਚਤੁਤ੍ਥਕਮ੍ਮੇਨ ਸਮ੍ਮੁਤਿ ਅਨੁਞ੍ਞਾਤਾ.

ਪਾਰਾਜਿਕਾ ਕਾਯਿਕਾ ਦ੍ਵੇਤਿ ਭਿਕ੍ਖੂਨਂ ਮੇਥੁਨਪਾਰਾਜਿਕਂ ਭਿਕ੍ਖੁਨੀਨਞ੍ਚ ਕਾਯਸਂਸਗ੍ਗਪਾਰਾਜਿਕਂ. ਦ੍ਵੇ ਸਂਵਾਸਭੂਮਿਯੋਤਿ ਅਤ੍ਤਨਾ ਵਾ ਅਤ੍ਤਾਨਂ ਸਮਾਨਸਂਵਾਸਕਂ ਕਰੋਤਿ, ਸਮਗ੍ਗੋ ਵਾ ਸਙ੍ਘੋ ਉਕ੍ਖਿਤ੍ਤਂ ਓਸਾਰੇਤਿ. ਕੁਰੁਨ੍ਦਿਯਂ ਪਨ ‘‘ਸਮਾਨਸਂਵਾਸਕਭੂਮਿ ਚ ਨਾਨਾਸਂਵਾਸਕਭੂਮਿ ਚਾ’’ਤਿ ਏਵਂ ਦ੍ਵੇ ਸਂਵਾਸਭੂਮਿਯੋ ਵੁਤ੍ਤਾ. ਦ੍ਵਿਨ੍ਨਂ ਰਤ੍ਤਿਚ੍ਛੇਦੋਤਿ ਪਾਰਿਵਾਸਿਕਸ੍ਸ ਚ ਮਾਨਤ੍ਤਚਾਰਿਕਸ੍ਸ ਚ ਪਞ੍ਞਤ੍ਤਾ. ਦ੍ਵਙ੍ਗੁਲਾ ਦੁਵੇਤਿ ਦ੍ਵੇ ਦ੍ਵਙ੍ਗੁਲਪਞ੍ਞਤ੍ਤਿਯੋ, ‘‘ਦ੍ਵਙ੍ਗੁਲਪਬ੍ਬਪਰਮਂ ਆਦਾਤਬ੍ਬ’’ਨ੍ਤਿ ਅਯਮੇਕਾ, ‘‘ਦ੍ਵਙ੍ਗੁਲਂ ਵਾ ਦ੍ਵੇਮਾਸਂ ਵਾ’’ਤਿ ਅਯਮੇਕਾ.

ਦ੍ਵੇ ਅਤ੍ਤਾਨਂ ਵਧਿਤ੍ਵਾਨਾਤਿ ਭਿਕ੍ਖੁਨੀ ਅਤ੍ਤਾਨਂ ਵਧਿਤ੍ਵਾ ਦ੍ਵੇ ਆਪਤ੍ਤਿਯੋ ਆਪਜ੍ਜਤਿ; ਵਧਤਿ ਰੋਦਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ; ਵਧਤਿ ਨ ਰੋਦਤਿ, ਆਪਤ੍ਤਿ ਦੁਕ੍ਕਟਸ੍ਸ. ਦ੍ਵੀਹਿ ਸਙ੍ਘੋ ਭਿਜ੍ਜਤੀਤਿ ਕਮ੍ਮੇਨ ਚ ਸਲਾਕਗ੍ਗਾਹੇਨ ਚ. ਦ੍ਵੇਤ੍ਥ ਪਠਮਾਪਤ੍ਤਿਕਾਤਿ ਏਤ੍ਥ ਸਕਲੇਪਿ ਵਿਨਯੇ ਦ੍ਵੇ ਪਠਮਾਪਤ੍ਤਿਕਾ ਉਭਿਨ੍ਨਂ ਪਞ੍ਞਤ੍ਤਿਵਸੇਨ. ਇਤਰਥਾ ਪਨ ਨਵ ਭਿਕ੍ਖੂਨਂ ਨਵ ਭਿਕ੍ਖੁਨੀਨਨ੍ਤਿ ਅਟ੍ਠਾਰਸ ਹੋਨ੍ਤਿ. ਞਤ੍ਤਿਯਾ ਕਰਣਾ ਦੁਵੇਤਿ ਦ੍ਵੇ ਞਤ੍ਤਿਕਿਚ੍ਚਾਨਿ – ਕਮ੍ਮਞ੍ਚ ਕਮ੍ਮਪਾਦਕਾ ਚ. ਨਵਸੁ ਠਾਨੇਸੁ ਕਮ੍ਮਂ ਹੋਤਿ, ਦ੍ਵੀਸੁ ਕਮ੍ਮਪਾਦਭਾਵੇਨ ਤਿਟ੍ਠਤਿ.

ਪਾਣਾਤਿਪਾਤੇ ਤਿਸ੍ਸੋਤਿ ‘‘ਅਨੋਦਿਸ੍ਸ ਓਪਾਤਂ ਖਣਤਿ, ਸਚੇ ਮਨੁਸ੍ਸੋ ਮਰਤਿ, ਪਾਰਾਜਿਕਂ; ਯਕ੍ਖਪੇਤਾਨਂ ਮਰਣੇ ਥੁਲ੍ਲਚ੍ਚਯਂ; ਤਿਰਚ੍ਛਾਨਗਤਸ੍ਸ ਮਰਣੇ ਪਾਚਿਤ੍ਤਿਯ’’ਨ੍ਤਿ ਇਮਾ ਤਿਸ੍ਸੋ ਹੋਨ੍ਤਿ. ਵਾਚਾ ਪਾਰਾਜਿਕਾ ਤਯੋਤਿ ਵਜ੍ਜਪਟਿਚ੍ਛਾਦਿਕਾਯ ਉਕ੍ਖਿਤ੍ਤਾਨੁਵਤ੍ਤਿਕਾਯ ਅਟ੍ਠਵਤ੍ਥੁਕਾਯਾਤਿ. ਕੁਰੁਨ੍ਦਿਯਂ ਪਨ ‘‘ਆਣਤ੍ਤਿਯਾ ਅਦਿਨ੍ਨਾਦਾਨੇ, ਮਨੁਸ੍ਸਮਰਣੇ, ਉਤ੍ਤਰਿਮਨੁਸ੍ਸਧਮ੍ਮਉਲ੍ਲਪਨੇ ਚਾ’’ਤਿ ਏਵਂ ਤਯੋ ਵੁਤ੍ਤਾ. ਓਭਾਸਨਾ ਤਯੋਤਿ ਵਚ੍ਚਮਗ੍ਗਂ ਪਸ੍ਸਾਵਮਗ੍ਗਂ ਆਦਿਸ੍ਸ ਵਣ੍ਣਾਵਣ੍ਣਭਾਸਨੇ ਸਙ੍ਘਾਦਿਸੇਸੋ, ਵਚ੍ਚਮਗ੍ਗਂ ਪਸ੍ਸਾਵਮਗ੍ਗਂ ਠਪੇਤ੍ਵਾ ਅਧਕ੍ਖਕਂ ਉਬ੍ਭਜਾਣੁਮਣ੍ਡਲਂ ਆਦਿਸ੍ਸ ਵਣ੍ਣਾਵਣ੍ਣਭਣਨੇ ਥੁਲ੍ਲਚ੍ਚਯਂ, ਉਬ੍ਭਕ੍ਖਕਂ ਅਧੋਜਾਣੁਮਣ੍ਡਲਂ ਆਦਿਸ੍ਸ ਵਣ੍ਣਾਵਣ੍ਣਭਣਨੇ ਦੁਕ੍ਕਟਂ. ਸਞ੍ਚਰਿਤ੍ਤੇਨ ਵਾ ਤਯੋਤਿ ਪਟਿਗ੍ਗਣ੍ਹਾਤਿ ਵੀਮਂਸਤਿ ਪਚ੍ਚਾਹਰਤਿ, ਆਪਤ੍ਤਿ ਸਙ੍ਘਾਦਿਸੇਸਸ੍ਸ; ਪਟਿਗ੍ਗਣ੍ਹਾਤਿ ਵੀਮਂਸਤਿ ਨ ਪਚ੍ਚਾਹਰਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ; ਪਟਿਗ੍ਗਣ੍ਹਾਤਿ ਨ ਵੀਮਂਸਤਿ ਨ ਪਚ੍ਚਾਹਰਤਿ, ਆਪਤ੍ਤਿ ਦੁਕ੍ਕਟਸ੍ਸਾਤਿ ਇਮੇ ਸਞ੍ਚਰਿਤ੍ਤੇਨ ਕਾਰਣਭੂਤੇਨ ਤਯੋ ਆਪਤ੍ਤਿਕ੍ਖਨ੍ਧਾ ਹੋਨ੍ਤਿ.

ਤਯੋ ਪੁਗ੍ਗਲਾ ਨ ਉਪਸਮ੍ਪਾਦੇਤਬ੍ਬਾਤਿ ਅਦ੍ਧਾਨਹੀਨੋ ਅਙ੍ਗਹੀਨੋ ਵਤ੍ਥੁਵਿਪਨ੍ਨੋ ਚ ਤੇਸਂ ਨਾਨਾਕਰਣਂ ਵੁਤ੍ਤਮੇਵ. ਅਪਿਚੇਤ੍ਥ ਯੋ ਪਤ੍ਤਚੀਵਰੇਨ ਅਪਰਿਪੂਰੋ, ਪਰਿਪੂਰੋ ਚ ਨ ਯਾਚਤਿ, ਇਮੇਪਿ ਅਙ੍ਗਹੀਨੇਨੇਵ ਸਙ੍ਗਹਿਤਾ. ਮਾਤੁਘਾਤਕਾਦਯੋ ਚ ਕਰਣਦੁਕ੍ਕਟਕਾ ਪਣ੍ਡਕਉਭਤੋਬ੍ਯਞ੍ਜਨਕਤਿਰਚ੍ਛਾਨਗਤਸਙ੍ਖਾਤੇਨ ਵਤ੍ਥੁਵਿਪਨ੍ਨੇਨੇਵ ਸਙ੍ਗਹਿਤਾਤਿ ਵੇਦਿਤਬ੍ਬਾ. ਏਸ ਨਯੋ ਕੁਰੁਨ੍ਦਿਯਂ ਵੁਤ੍ਤੋ. ਤਯੋ ਕਮ੍ਮਾਨਂ ਸਙ੍ਗਹਾਤਿ ਞਤ੍ਤਿਕਪ੍ਪਨਾ, ਵਿਪ੍ਪਕਤਪਚ੍ਚਤ੍ਤਂ, ਅਤੀਤਕਰਣਨ੍ਤਿ. ਤਤ੍ਥ ‘‘ਦਦੇਯ੍ਯ ਕਰੇਯ੍ਯਾ’’ਤਿਆਦਿਭੇਦਾ ਞਤ੍ਤਿਕਪ੍ਪਨਾ; ‘‘ਦੇਤਿ ਕਰੋਤੀ’’ਤਿਆਦਿਭੇਦਂ ਵਿਪ੍ਪਕਤਪਚ੍ਚਤ੍ਤਂ; ‘‘ਦਿਨ੍ਨਂ ਕਤ’’ਨ੍ਤਿਆਦਿਭੇਦਂ ਅਤੀਤਕਰਣਂ ਨਾਮਾਤਿ ਇਮੇਹਿ ਤੀਹਿ ਕਮ੍ਮਾਨਿ ਸਙ੍ਗਯ੍ਹਨ੍ਤਿ. ਅਪਰੇਹਿਪਿ ਤੀਹਿ ਕਮ੍ਮਾਨਿ ਸਙ੍ਗਯ੍ਹਨ੍ਤਿ – ਵਤ੍ਥੁਨਾ, ਞਤ੍ਤਿਯਾ, ਅਨੁਸ੍ਸਾਵਨਾਯਾਤਿ. ਵਤ੍ਥੁਸਮ੍ਪਨ੍ਨਞ੍ਹਿ ਞਤ੍ਤਿਸਮ੍ਪਨ੍ਨਂ ਅਨੁਸ੍ਸਾਵਨਸਮ੍ਪਨ੍ਨਞ੍ਚ ਕਮ੍ਮਂ ਨਾਮ ਹੋਤਿ, ਤੇਨ ਵੁਤ੍ਤਂ ‘‘ਤਯੋ ਕਮ੍ਮਾਨਂ ਸਙ੍ਗਹਾ’’ਤਿ. ਨਾਸਿਤਕਾ ਤਯੋ ਨਾਮ ਮੇਤ੍ਤਿਯਂ ਭਿਕ੍ਖੁਨਿਂ ਨਾਸੇਥ, ਦੂਸਕੋ ਨਾਸੇਤਬ੍ਬੋ, ਦਸਹਙ੍ਗੇਹਿ ਸਮਨ੍ਨਾਗਤੋ ਸਾਮਣੇਰੋ ਨਾਸੇਤਬ੍ਬੋ, ਕਣ੍ਟਕਂ ਸਮਣੁਦ੍ਦੇਸਂ ਨਾਸੇਥਾਤਿ ਏਵਂ ਲਿਙ੍ਗਸਂਵਾਸਦਣ੍ਡਕਮ੍ਮਨਾਸਨਾਵਸੇਨ ਤਯੋ ਨਾਸਿਤਕਾ ਵੇਦਿਤਬ੍ਬਾ. ਤਿਣ੍ਣਨ੍ਨਂ ਏਕਵਾਚਿਕਾਤਿ ‘‘ਅਨੁਜਾਨਾਮਿ ਭਿਕ੍ਖਵੇ ਦ੍ਵੇ ਤਯੋ ਏਕਾਨੁਸ੍ਸਾਵਨੇ ਕਾਤੁ’’ਨ੍ਤਿ ਵਚਨਤੋ ਤਿਣ੍ਣਂ ਜਨਾਨਂ ਏਕੁਪਜ੍ਝਾਯੇਨ ਨਾਨਾਚਰਿਯੇਨ ਏਕਾਨੁਸ੍ਸਾਵਨਾ ਵਟ੍ਟਤਿ.

ਅਦਿਨ੍ਨਾਦਾਨੇ ਤਿਸ੍ਸੋਤਿ ਪਾਦੇ ਵਾ ਅਤਿਰੇਕਪਾਦੇ ਵਾ ਪਾਰਾਜਿਕਂ, ਅਤਿਰੇਕਮਾਸਕੇ ਥੁਲ੍ਲਚ੍ਚਯਂ, ਮਾਸਕੇ ਵਾ ਊਨਮਾਸਕੇ ਵਾ ਦੁਕ੍ਕਟਂ. ਚਤਸ੍ਸੋ ਮੇਥੁਨਪਚ੍ਚਯਾਤਿ ਅਕ੍ਖਯਿਤੇ ਪਾਰਾਜਿਕਂ, ਯੇਭੁਯ੍ਯੇਨ ਖਯਿਤੇ ਥੁਲ੍ਲਚ੍ਚਯਂ, ਵਿਵਟਕਤੇ ਮੁਖੇ ਦੁਕ੍ਕਟਂ, ਜਤੁਮਟ੍ਠਕੇ ਪਾਚਿਤ੍ਤਿਯਂ. ਛਿਨ੍ਦਨ੍ਤਸ੍ਸ ਤਿਸ੍ਸੋਤਿ ਵਨਪ੍ਪਤਿਂ ਛਿਨ੍ਦਨ੍ਤਸ੍ਸ ਪਾਰਾਜਿਕਂ, ਭੂਤਗਾਮੇ ਪਾਚਿਤ੍ਤਿਯਂ, ਅਙ੍ਗਜਾਤੇ ਥੁਲ੍ਲਚ੍ਚਯਂ. ਪਞ੍ਚ ਛਡ੍ਡਿਤਪਚ੍ਚਯਾਤਿ ਅਨੋਦਿਸ੍ਸ ਵਿਸਂ ਛਡ੍ਡੇਤਿ, ਸਚੇ ਤੇਨ ਮਨੁਸ੍ਸੋ ਮਰਤਿ, ਪਾਰਾਜਿਕਂ; ਯਕ੍ਖਪੇਤੇਸੁ ਥੁਲ੍ਲਚ੍ਚਯਂ; ਤਿਰਚ੍ਛਾਨਗਤੇ ਪਾਚਿਤ੍ਤਿਯਂ; ਵਿਸ੍ਸਟ੍ਠਿਛਡ੍ਡਨੇ ਸਙ੍ਘਾਦਿਸੇਸੋ; ਸੇਖਿਯੇਸੁ ਹਰਿਤੇ ਉਚ੍ਚਾਰਪਸ੍ਸਾਵਛਡ੍ਡਨੇ ਦੁਕ੍ਕਟਂ – ਇਮਾ ਛਡ੍ਡਿਤਪਚ੍ਚਯਾ ਪਞ੍ਚਾਪਤ੍ਤਿਯੋ ਹੋਨ੍ਤਿ.

ਪਾਚਿਤ੍ਤਿਯੇਨ ਦੁਕ੍ਕਟਾ ਕਤਾਤਿ ਭਿਕ੍ਖੁਨੋਵਾਦਕਵਗ੍ਗਸ੍ਮਿਂ ਦਸਸੁ ਸਿਕ੍ਖਾਪਦੇਸੁ ਪਾਚਿਤ੍ਤਿਯੇਨ ਸਦ੍ਧਿਂ ਦੁਕ੍ਕਟਾ ਕਤਾ ਏਵਾਤਿ ਅਤ੍ਥੋ. ਚਤੁਰੇਤ੍ਥ ਨਵਕਾ ਵੁਤ੍ਤਾਤਿ ਪਠਮਸਿਕ੍ਖਾਪਦਮ੍ਹਿਯੇਵ ਅਧਮ੍ਮਕਮ੍ਮੇ ਦ੍ਵੇ, ਧਮ੍ਮਕਮ੍ਮੇ ਦ੍ਵੇਤਿ ਏਵਂ ਚਤ੍ਤਾਰੋ ਨਵਕਾ ਵੁਤ੍ਤਾਤਿ ਅਤ੍ਥੋ. ਦ੍ਵਿਨ੍ਨਂ ਚੀਵਰੇਨ ਚਾਤਿ ਭਿਕ੍ਖੂਨਂ ਸਨ੍ਤਿਕੇ ਉਪਸਮ੍ਪਨ੍ਨਾਯ ਚੀਵਰਂ ਦੇਨ੍ਤਸ੍ਸ ਪਾਚਿਤ੍ਤਿਯਂ, ਭਿਕ੍ਖੁਨੀਨਂ ਸਨ੍ਤਿਕੇ ਉਪਸਮ੍ਪਨ੍ਨਾਯ ਦੇਨ੍ਤਸ੍ਸ ਦੁਕ੍ਕਟਨ੍ਤਿ ਏਵਂ ਦ੍ਵਿਨ੍ਨਂ ਭਿਕ੍ਖੁਨੀਨਂ ਚੀਵਰਂ ਦੇਨ੍ਤਸ੍ਸ ਚੀਵਰੇਨ ਕਾਰਣਭੂਤੇਨ ਆਪਤ੍ਤਿ ਹੋਤੀਤਿ ਅਤ੍ਥੋ.

ਅਟ੍ਠ ਪਾਟਿਦੇਸਨੀਯਾਤਿ ਪਾਲ਼ਿਯਂ ਆਗਤਾ ਏਵ. ਭੁਞ੍ਜਨ੍ਤਾਮਕਧਞ੍ਞੇਨ ਪਾਚਿਤ੍ਤਿਯੇਨ ਦੁਕ੍ਕਟਾ ਕਤਾਤਿ ਆਮਕਧਞ੍ਞਂ ਵਿਞ੍ਞਾਪੇਤ੍ਵਾ ਭੁਞ੍ਜਨ੍ਤਿਯਾ ਪਾਚਿਤ੍ਤਿਯੇਨ ਸਦ੍ਧਿਂ ਦੁਕ੍ਕਟਾ ਕਤਾਯੇਵ.

ਗਚ੍ਛਨ੍ਤਸ੍ਸ ਚਤਸ੍ਸੋਤਿ ਭਿਕ੍ਖੁਨਿਯਾ ਵਾ ਮਾਤੁਗਾਮੇਨ ਵਾ ਸਦ੍ਧਿਂ ਸਂਵਿਧਾਯ ਗਚ੍ਛਨ੍ਤਸ੍ਸ ਦੁਕ੍ਕਟਂ, ਗਾਮੂਪਚਾਰੋਕ੍ਕਮਨੇ ਪਾਚਿਤ੍ਤਿਯਂ, ਯਾ ਭਿਕ੍ਖੁਨੀ ਏਕਾ ਗਾਮਨ੍ਤਰਂ ਗਚ੍ਛਤਿ, ਤਸ੍ਸਾ ਗਾਮੂਪਚਾਰਂ ਓਕ੍ਕਮਨ੍ਤਿਯਾ ਪਠਮਪਾਦੇ ਥੁਲ੍ਲਚ੍ਚਯਂ, ਦੁਤਿਯਪਾਦੇ ਸਙ੍ਘਾਦਿਸੇਸੋਤਿ ਗਚ੍ਛਨ੍ਤਸ੍ਸ ਇਮਾ ਚਤਸ੍ਸੋ ਆਪਤ੍ਤਿਯੋ ਹੋਨ੍ਤਿ. ਠਿਤਸ੍ਸ ਚਾਪਿ ਤਤ੍ਤਕਾਤਿ ਠਿਤਸ੍ਸਪਿ ਚਤਸ੍ਸੋ ਏਵਾਤਿ ਅਤ੍ਥੋ. ਕਥਂ? ਭਿਕ੍ਖੁਨੀ ਅਨ੍ਧਕਾਰੇ ਵਾ ਪਟਿਚ੍ਛਨ੍ਨੇ ਵਾ ਓਕਾਸੇ ਮਿਤ੍ਤਸਨ੍ਥਵਵਸੇਨ ਪੁਰਿਸਸ੍ਸ ਹਤ੍ਥਪਾਸੇ ਤਿਟ੍ਠਤਿ, ਪਾਚਿਤ੍ਤਿਯਂ; ਹਤ੍ਥਪਾਸਂ ਵਿਜਹਿਤ੍ਵਾ ਤਿਟ੍ਠਤਿ, ਦੁਕ੍ਕਟਂ; ਅਰੁਣੁਗ੍ਗਮਨਕਾਲੇ ਦੁਤਿਯਿਕਾਯ ਹਤ੍ਥਪਾਸਂ ਵਿਜਹਨ੍ਤੀ ਤਿਟ੍ਠਤਿ, ਥੁਲ੍ਲਚ੍ਚਯਂ; ਵਿਜਹਿਤ੍ਵਾ ਤਿਟ੍ਠਤਿ, ਸਙ੍ਘਾਦਿਸੇਸੋਤਿ ਨਿਸਿਨ੍ਨਸ੍ਸ ਚਤਸ੍ਸੋ ਆਪਤ੍ਤਿਯੋ. ਨਿਪਨ੍ਨਸ੍ਸਾਪਿ ਤਤ੍ਤਕਾਤਿ ਸਚੇਪਿ ਹਿ ਸਾ ਨਿਸੀਦਤਿ ਵਾ ਨਿਪਜ੍ਜਤਿ ਵਾ, ਏਤਾਯੇਵ ਚਤਸ੍ਸੋ ਆਪਤ੍ਤਿਯੋ ਆਪਜ੍ਜਤਿ.

(੩) ਪਾਚਿਤ੍ਤਿਯਵਣ੍ਣਨਾ

੪੭੬. ਪਞ੍ਚ ਪਾਚਿਤ੍ਤਿਯਾਨੀਤਿ ਪਞ੍ਚ ਭੇਸਜ੍ਜਾਨਿ ਪਟਿਗ੍ਗਹੇਤ੍ਵਾ ਨਾਨਾਭਾਜਨੇਸੁ ਵਾ ਏਕਭਾਜਨੇ ਵਾ ਅਮਿਸ੍ਸੇਤ੍ਵਾ ਠਪਿਤਾਨਿ ਹੋਨ੍ਤਿ, ਸਤ੍ਤਾਹਾਤਿਕ੍ਕਮੇ ਸੋ ਭਿਕ੍ਖੁ ਪਞ੍ਚ ਪਾਚਿਤ੍ਤਿਯਾਨਿ ਸਬ੍ਬਾਨਿ ਨਾਨਾਵਤ੍ਥੁਕਾਨਿ ਏਕਕ੍ਖਣੇ ਆਪਜ੍ਜਤਿ, ‘‘ਇਮਂ ਪਠਮਂ ਆਪਨ੍ਨੋ, ਇਮਂ ਪਚ੍ਛਾ’’ਤਿ ਨ ਵਤ੍ਤਬ੍ਬੋ.

ਨਵ ਪਾਚਿਤ੍ਤਿਯਾਨੀਤਿ ਯੋ ਭਿਕ੍ਖੁ ਨਵ ਪਣੀਤਭੋਜਨਾਨਿ ਵਿਞ੍ਞਾਪੇਤ੍ਵਾ ਤੇਹਿ ਸਦ੍ਧਿਂ ਏਕਤੋ ਏਕਂ ਕਬਲ਼ਂ ਓਮਦ੍ਦਿਤ੍ਵਾ ਮੁਖੇ ਪਕ੍ਖਿਪਿਤ੍ਵਾ ਪਰਗਲ਼ਂ ਅਤਿਕ੍ਕਾਮੇਤਿ, ਅਯਂ ਨਵ ਪਾਚਿਤ੍ਤਿਯਾਨਿ ਸਬ੍ਬਾਨਿ ਨਾਨਾਵਤ੍ਥੁਕਾਨਿ ਏਕਕ੍ਖਣੇ ਆਪਜ੍ਜਤਿ ‘‘ਇਮਂ ਪਠਮਂ ਆਪਨ੍ਨੋ, ਇਮਂ ਪਚ੍ਛਾ’’ਤਿ ਨ ਵਤ੍ਤਬ੍ਬੋ. ਏਕਵਾਚਾਯ ਦੇਸੇਯ੍ਯਾਤਿ ‘‘ਅਹਂ, ਭਨ੍ਤੇ, ਪਞ੍ਚ ਭੇਸਜ੍ਜਾਨਿ ਪਟਿਗ੍ਗਹੇਤ੍ਵਾ ਸਤ੍ਤਾਹਂ ਅਤਿਕ੍ਕਾਮੇਤ੍ਵਾ ਪਞ੍ਚ ਆਪਤ੍ਤਿਯੋ ਆਪਨ੍ਨੋ, ਤਾ ਤੁਮ੍ਹਮੂਲੇ ਪਟਿਦੇਸੇਮੀ’’ਤਿ ਏਵਂ ਏਕਵਾਚਾਯ ਦੇਸੇਯ੍ਯ, ਦੇਸਿਤਾਵ ਹੋਨ੍ਤਿ, ਦ੍ਵੀਹਿ ਤੀਹਿ ਵਾਚਾਹਿ ਕਿਚ੍ਚਂ ਨਾਮ ਨਤ੍ਥਿ. ਦੁਤਿਯਵਿਸ੍ਸਜ੍ਜਨੇਪਿ ‘‘ਅਹਂ, ਭਨ੍ਤੇ, ਨਵ ਪਣੀਤਭੋਜਨਾਨਿ ਵਿਞ੍ਞਾਪੇਤ੍ਵਾ ਭੁਞ੍ਜਿਤ੍ਵਾ ਨਵ ਆਪਤ੍ਤਿਯੋ ਆਪਨ੍ਨੋ, ਤਾ ਤੁਮ੍ਹਮੂਲੇ ਪਟਿਦੇਸੇਮੀ’’ਤਿ ਵਤ੍ਤਬ੍ਬਂ.

ਵਤ੍ਥੁਂ ਕਿਤ੍ਤੇਤ੍ਵਾ ਦੇਸੇਯ੍ਯਾਤਿ ‘‘ਅਹਂ, ਭਨ੍ਤੇ, ਪਞ੍ਚ ਭੇਸਜ੍ਜਾਨਿ ਪਟਿਗ੍ਗਹੇਤ੍ਵਾ ਸਤ੍ਤਾਹਂ ਅਤਿਕ੍ਕਾਮੇਸਿਂ, ਯਥਾਵਤ੍ਥੁਕਂ ਤਂ ਤੁਮ੍ਹਮੂਲੇ ਪਟਿਦੇਸੇਮੀ’’ਤਿ ਏਵਂ ਵਤ੍ਥੁਂ ਕਿਤ੍ਤੇਤ੍ਵਾ ਦੇਸੇਯ੍ਯ, ਦੇਸਿਤਾਵ ਹੋਨ੍ਤਿ ਆਪਤ੍ਤਿਯੋ, ਆਪਤ੍ਤਿਯਾ ਨਾਮਗ੍ਗਹਣੇਨ ਕਿਚ੍ਚਂ ਨਤ੍ਥਿ. ਦੁਤਿਯਵਿਸ੍ਸਜ੍ਜਨੇਪਿ ‘‘ਅਹਂ, ਭਨ੍ਤੇ, ਨਵ ਪਣੀਤਭੋਜਨਾਨਿ ਵਿਞ੍ਞਾਪੇਤ੍ਵਾ ਭੁਤ੍ਤੋ, ਯਥਾਵਤ੍ਥੁਕਂ ਤਂ ਤੁਮ੍ਹਮੂਲੇ ਪਟਿਦੇਸੇਮੀ’’ਤਿ ਵਤ੍ਤਬ੍ਬਂ.

ਯਾਵਤਤਿਯਕੇ ਤਿਸ੍ਸੋਤਿ ਉਕ੍ਖਿਤ੍ਤਾਨੁਵਤ੍ਤਿਕਾਯ ਪਾਰਾਜਿਕਂ ਭੇਦਕਾਨੁਵਤ੍ਤਕਾਨਂ ਕੋਕਾਲਿਕਾਦੀਨਂ ਸਙ੍ਘਾਦਿਸੇਸਂ, ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਚਣ੍ਡਕਾਲ਼ਿਕਾਯ ਚ ਭਿਕ੍ਖੁਨਿਯਾ ਪਾਚਿਤ੍ਤਿਯਨ੍ਤਿ ਇਮਾ ਯਾਵਤਤਿਯਕਾ ਤਿਸ੍ਸੋ ਆਪਤ੍ਤਿਯੋ. ਛ ਵੋਹਾਰਪਚ੍ਚਯਾਤਿ ਪਯੁਤ੍ਤਵਾਚਾਪਚ੍ਚਯਾ ਛ ਆਪਤ੍ਤਿਯੋ ਆਪਜ੍ਜਤੀਤਿ ਅਤ੍ਥੋ. ਕਥਂ? ਆਜੀਵਹੇਤੁ ਆਜੀਵਕਾਰਣਾ ਪਾਪਿਚ੍ਛੋ ਇਚ੍ਛਾਪਕਤੋ ਅਸਨ੍ਤਂ ਅਭੂਤਂ ਉਤ੍ਤਰਿਮਨੁਸ੍ਸਧਮ੍ਮਂ ਉਲ੍ਲਪਤਿ, ਆਪਤ੍ਤਿ ਪਾਰਾਜਿਕਸ੍ਸ. ਆਜੀਵਹੇਤੁ ਆਜੀਵਕਾਰਣਾ ਸਞ੍ਚਰਿਤ੍ਤਂ ਸਮਾਪਜ੍ਜਤਿ, ਆਪਤ੍ਤਿ ਸਙ੍ਘਾਦਿਸੇਸਸ੍ਸ. ਆਜੀਵਹੇਤੁ ਆਜੀਵਕਾਰਣਾ ਯੋ ਤੇ ਵਿਹਾਰੇ ਵਸਤਿ ਸੋ ਅਰਹਾਤਿ ਵਦਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਆਜੀਵਹੇਤੁ ਆਜੀਵਕਾਰਣਾ ਭਿਕ੍ਖੁ ਪਣੀਤਭੋਜਨਾਨਿ ਅਤ੍ਤਨੋ ਅਤ੍ਥਾਯ ਵਿਞ੍ਞਾਪੇਤ੍ਵਾ ਭੁਞ੍ਜਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਆਜੀਵਹੇਤੁ ਆਜੀਵਕਾਰਣਾ ਭਿਕ੍ਖੁਨੀ ਪਣੀਤਭੋਜਨਾਨਿ ਅਤ੍ਤਨੋ ਅਤ੍ਥਾਯ ਵਿਞ੍ਞਾਪੇਤ੍ਵਾ ਭੁਞ੍ਜਤਿ, ਆਪਤ੍ਤਿ ਪਾਟਿਦੇਸਨੀਯਸ੍ਸ. ਆਜੀਵਹੇਤੁ ਆਜੀਵਕਾਰਣਾ ਸੂਪਂ ਵਾ ਓਦਨਂ ਵਾ ਅਗਿਲਾਨੋ ਅਤ੍ਤਨੋ ਅਤ੍ਥਾਯ ਵਿਞ੍ਞਾਪੇਤ੍ਵਾ ਭੁਞ੍ਜਤਿ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਖਾਦਨ੍ਤਸ੍ਸ ਤਿਸ੍ਸੋਤਿ ਮਨੁਸ੍ਸਮਂਸੇ ਥੁਲ੍ਲਚ੍ਚਯਂ, ਅਵਸੇਸੇਸੁ ਅਕਪ੍ਪਿਯਮਂਸੇਸੁ ਦੁਕ੍ਕਟਂ, ਭਿਕ੍ਖੁਨਿਯਾ ਲਸੁਣੇ ਪਾਚਿਤ੍ਤਿਯਂ. ਪਞ੍ਚ ਭੋਜਨਪਚ੍ਚਯਾਤਿ ਅਵਸ੍ਸੁਤਾ ਅਵਸ੍ਸੁਤਸ੍ਸ ਪੁਰਿਸਸ੍ਸ ਹਤ੍ਥਤੋ ਭੋਜਨਂ ਗਹੇਤ੍ਵਾ ਤਤ੍ਥੇਵ ਮਨੁਸ੍ਸਮਂਸਂ ਲਸੁਣਂ ਅਤ੍ਤਨੋ ਅਤ੍ਥਾਯ ਵਿਞ੍ਞਾਪੇਤ੍ਵਾ ਗਹਿਤਪਣੀਤਭੋਜਨਾਨਿ ਅਵਸੇਸਞ੍ਚ ਅਕਪ੍ਪਿਯਮਂਸਂ ਪਕ੍ਖਿਪਿਤ੍ਵਾ ਵੋਮਿਸ੍ਸਕਂ ਓਮਦ੍ਦਿਤ੍ਵਾ ਅਜ੍ਝੋਹਰਮਾਨਾ ਸਙ੍ਘਾਦਿਸੇਸਂ, ਥੁਲ੍ਲਚ੍ਚਯਂ, ਪਾਚਿਤ੍ਤਿਯਂ, ਪਾਟਿਦੇਸਨੀਯਂ, ਦੁਕ੍ਕਟਨ੍ਤਿ ਇਮਾ ਪਞ੍ਚ ਆਪਤ੍ਤਿਯੋ ਭੋਜਨਪਚ੍ਚਯਾ ਆਪਜ੍ਜਤਿ.

ਪਞ੍ਚ ਠਾਨਾਨੀਤਿ ‘‘ਉਕ੍ਖਿਤ੍ਤਾਨੁਵਤ੍ਤਿਕਾਯ ਭਿਕ੍ਖੁਨਿਯਾ ਯਾਵਤਤਿਯਂ ਸਮਨੁਭਾਸਨਾਯ ਅਪ੍ਪਟਿਨਿਸ੍ਸਜ੍ਜਨ੍ਤਿਯਾ ਞਤ੍ਤਿਯਾ ਦੁਕ੍ਕਟਂ, ਦ੍ਵੀਹਿ ਕਮ੍ਮਵਾਚਾਹਿ ਥੁਲ੍ਲਚ੍ਚਯਂ, ਕਮ੍ਮਵਾਚਾਪਰਿਯੋਸਾਨੇ ਆਪਤ੍ਤਿ ਪਾਰਾਜਿਕਸ੍ਸ, ਸਙ੍ਘਭੇਦਾਯ ਪਰਕ੍ਕਮਨਾਦੀਸੁ ਸਙ੍ਘਾਦਿਸੇਸੋ, ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਪਾਚਿਤ੍ਤਿਯ’’ਨ੍ਤਿ ਏਵਂ ਸਬ੍ਬਾ ਯਾਵਤਤਿਯਕਾ ਪਞ੍ਚ ਠਾਨਾਨਿ ਗਚ੍ਛਨ੍ਤਿ. ਪਞ੍ਚਨ੍ਨਞ੍ਚੇਵ ਆਪਤ੍ਤੀਤਿ ਆਪਤ੍ਤਿ ਨਾਮ ਪਞ੍ਚਨ੍ਨਂ ਸਹਧਮ੍ਮਿਕਾਨਂ ਹੋਤਿ, ਤਤ੍ਥ ਦ੍ਵਿਨ੍ਨਂ ਨਿਪ੍ਪਰਿਯਾਯੇਨ ਆਪਤ੍ਤਿਯੇਵ, ਸਿਕ੍ਖਾਮਾਨਸਾਮਣੇਰਿਸਾਮਣੇਰਾਨਂ ਪਨ ਅਕਪ੍ਪਿਯਤ੍ਤਾ ਨ ਵਟ੍ਟਤਿ. ਇਮਿਨਾ ਪਰਿਯਾਯੇਨ ਤੇਸਂ ਆਪਤ੍ਤਿ ਨ ਦੇਸਾਪੇਤਬ੍ਬਾ, ਦਣ੍ਡਕਮ੍ਮਂ ਪਨ ਤੇਸਂ ਕਾਤਬ੍ਬਂ. ਪਞ੍ਚਨ੍ਨਂ ਅਧਿਕਰਣੇਨ ਚਾਤਿ ਅਧਿਕਰਣਞ੍ਚ ਪਞ੍ਚਨ੍ਨਮੇਵਾਤਿ ਅਤ੍ਥੋ. ਏਤੇਸਂਯੇਵ ਹਿ ਪਞ੍ਚਨ੍ਨਂ ਪਤ੍ਤਚੀਵਰਾਦੀਨਂ ਅਤ੍ਥਾਯ ਵਿਨਿਚ੍ਛਯਵੋਹਾਰੋ ਅਧਿਕਰਣਨ੍ਤਿ ਵੁਚ੍ਚਤਿ, ਗਿਹੀਨਂ ਪਨ ਅਡ੍ਡਕਮ੍ਮਂ ਨਾਮ ਹੋਤਿ.

ਪਞ੍ਚਨ੍ਨਂ ਵਿਨਿਚ੍ਛਯੋ ਹੋਤੀਤਿ ਪਞ੍ਚਨ੍ਨਂ ਸਹਧਮ੍ਮਿਕਾਨਂਯੇਵ ਵਿਨਿਚ੍ਛਯੋ ਨਾਮ ਹੋਤਿ. ਪਞ੍ਚਨ੍ਨਂ ਵੂਪਸਮੇਨ ਚਾਤਿ ਏਤੇਸਂਯੇਵ ਪਞ੍ਚਨ੍ਨਂ ਅਧਿਕਰਣਂ ਵਿਨਿਚ੍ਛਿਤਂ ਵੂਪਸਨ੍ਤਂ ਨਾਮ ਹੋਤੀਤਿ ਅਤ੍ਥੋ. ਪਞ੍ਚਨ੍ਨਞ੍ਚੇਵ ਅਨਾਪਤ੍ਤੀਤਿ ਏਤੇਸਂਯੇਵ ਪਞ੍ਚਨ੍ਨਂ ਅਨਾਪਤ੍ਤਿ ਨਾਮ ਹੋਤੀਤਿ ਅਤ੍ਥੋ. ਤੀਹਿ ਠਾਨੇਹਿ ਸੋਭਤੀਤਿ ਸਙ੍ਘਾਦੀਹਿ ਤੀਹਿ ਕਾਰਣੇਹਿ ਸੋਭਤਿ. ਕਤਵੀਤਿਕ੍ਕਮੋ ਹਿ ਪੁਗ੍ਗਲੋ ਸਪ੍ਪਟਿਕਮ੍ਮਂ ਆਪਤ੍ਤਿਂ ਸਙ੍ਘਮਜ੍ਝੇ ਗਣਮਜ੍ਝੇ ਪੁਗ੍ਗਲਸਨ੍ਤਿਕੇ ਵਾ ਪਟਿਕਰਿਤ੍ਵਾ ਅਬ੍ਭੁਣ੍ਹਸੀਲੋ ਪਾਕਤਿਕੋ ਹੋਤਿ, ਤਸ੍ਮਾ ਤੀਹਿ ਠਾਨੇਹਿ ਸੋਭਤੀਤਿ ਵੁਚ੍ਚਤਿ.

ਦ੍ਵੇ ਕਾਯਿਕਾ ਰਤ੍ਤਿਨ੍ਤਿ ਭਿਕ੍ਖੁਨੀ ਰਤ੍ਤਨ੍ਧਕਾਰੇ ਪੁਰਿਸਸ੍ਸ ਹਤ੍ਥਪਾਸੇ ਠਾਨਨਿਸਜ੍ਜਸਯਨਾਨਿ ਕਪ੍ਪਯਮਾਨਾ ਪਾਚਿਤ੍ਤਿਯਂ, ਹਤ੍ਥਪਾਸਂ ਵਿਜਹਿਤ੍ਵਾ ਠਾਨਾਦੀਨਿ ਕਪ੍ਪਯਮਾਨਾ ਦੁਕ੍ਕਟਨ੍ਤਿ ਦ੍ਵੇ ਕਾਯਦ੍ਵਾਰਸਮ੍ਭਵਾ ਆਪਤ੍ਤਿਯੋ ਰਤ੍ਤਿਂ ਆਪਜ੍ਜਤਿ. ਦ੍ਵੇ ਕਾਯਿਕਾ ਦਿਵਾਤਿ ਏਤੇਨੇਵ ਉਪਾਯੇਨ ਦਿਵਾ ਪਟਿਚ੍ਛਨ੍ਨੇ ਓਕਾਸੇ ਦ੍ਵੇ ਆਪਤ੍ਤਿਯੋ ਆਪਜ੍ਜਤਿ. ਨਿਜ੍ਝਾਯਨ੍ਤਸ੍ਸ ਏਕਾ ਆਪਤ੍ਤੀਤਿ ‘‘ਨ ਚ, ਭਿਕ੍ਖਵੇ, ਸਾਰਤ੍ਤੇਨ ਮਾਤੁਗਾਮਸ੍ਸ ਅਙ੍ਗਜਾਤਂ ਉਪਨਿਜ੍ਝਾਯਿਤਬ੍ਬਂ. ਯੋ ਉਪਨਿਜ੍ਝਾਯੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਪਾਰਾ. ੨੬੬) ਨਿਜ੍ਝਾਯਨ੍ਤਸ੍ਸ ਅਯਮੇਕਾ ਆਪਤ੍ਤਿ. ਏਕਾ ਪਿਣ੍ਡਪਾਤਪਚ੍ਚਯਾਤਿ ‘‘ਨ ਚ, ਭਿਕ੍ਖਵੇ, ਭਿਕ੍ਖਾਦਾਯਿਕਾਯ ਮੁਖਂ ਓਲੋਕੇਤਬ੍ਬ’’ਨ੍ਤਿ (ਚੂਲ਼ਵ. ੩੬੬) ਏਤ੍ਥ ਦੁਕ੍ਕਟਾਪਤ੍ਤਿ, ਅਨ੍ਤਮਸੋ ਯਾਗੁਂ ਵਾ ਬ੍ਯਞ੍ਜਨਂ ਵਾ ਦੇਨ੍ਤਸ੍ਸ ਸਾਮਣੇਰਸ੍ਸਾਪਿ ਹਿ ਮੁਖਂ ਉਲ੍ਲੋਕਯਤੋ ਦੁਕ੍ਕਟਮੇਵ. ਕੁਰੁਨ੍ਦਿਯਂ ਪਨ ‘‘ਏਕਾ ਪਿਣ੍ਡਪਾਤਪਚ੍ਚਯਾਤਿ ਭਿਕ੍ਖੁਨਿਪਰਿਪਾਚਿਤਂ ਪਿਣ੍ਡਪਾਤਂ ਭੁਞ੍ਜਨ੍ਤਸ੍ਸ ਪਾਚਿਤ੍ਤਿਯ’’ਨ੍ਤਿ ਵੁਤ੍ਤਂ.

ਅਟ੍ਠਾਨਿਸਂਸੇ ਸਮ੍ਪਸ੍ਸਨ੍ਤਿ ਕੋਸਮ੍ਬਕਕ੍ਖਨ੍ਧਕੇ ਵੁਤ੍ਤਾਨਿਸਂਸੇ. ਉਕ੍ਖਿਤ੍ਤਕਾ ਤਯੋ ਵੁਤ੍ਤਾਤਿ ਆਪਤ੍ਤਿਯਾ ਅਦਸ੍ਸਨੇ ਅਪ੍ਪਟਿਕਮ੍ਮੇ ਪਾਪਿਕਾਯ ਚ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇਤਿ. ਤੇਚਤ੍ਤਾਲੀਸ ਸਮ੍ਮਾਵਤ੍ਤਨਾਤਿ ਤੇਸਂਯੇਵ ਉਕ੍ਖਿਤ੍ਤਕਾਨਂ ਏਤ੍ਤਕੇਸੁ ਵਤ੍ਤੇਸੁ ਵਤ੍ਤਨਾ.

ਪਞ੍ਚਠਾਨੇ ਮੁਸਾਵਾਦੋਤਿ ਪਾਰਾਜਿਕਸਙ੍ਘਾਦਿਸੇਸਥੁਲ੍ਲਚ੍ਚਯਪਾਚਿਤ੍ਤਿਯਦੁਕ੍ਕਟਸਙ੍ਖਾਤੇ ਪਞ੍ਚਟ੍ਠਾਨੇ ਮੁਸਾਵਾਦੋ ਗਚ੍ਛਤਿ. ਚੁਦ੍ਦਸ ਪਰਮਨ੍ਤਿ ਵੁਚ੍ਚਤੀਤਿ ਦਸਾਹਪਰਮਾਦਿਨਯੇਨ ਹੇਟ੍ਠਾ ਵੁਤ੍ਤਂ. ਦ੍ਵਾਦਸ ਪਾਟਿਦੇਸਨੀਯਾਤਿ ਭਿਕ੍ਖੂਨਂ ਚਤ੍ਤਾਰਿ ਭਿਕ੍ਖੁਨੀਨਂ ਅਟ੍ਠ. ਚਤੁਨ੍ਨਂ ਦੇਸਨਾਯ ਚਾਤਿ ਚਤੁਨ੍ਨਂ ਅਚ੍ਚਯਦੇਸਨਾਯਾਤਿ ਅਤ੍ਥੋ. ਕਤਮਾ ਪਨ ਸਾਤਿ? ਦੇਵਦਤ੍ਤੇਨ ਪਯੋਜਿਤਾਨਂ ਅਭਿਮਾਰਾਨਂ ਅਚ੍ਚਯਦੇਸਨਾ, ਅਨੁਰੁਦ੍ਧਤ੍ਥੇਰਸ੍ਸ ਉਪਟ੍ਠਾਯਿਕਾਯ ਅਚ੍ਚਯਦੇਸਨਾ, ਵਡ੍ਢਸ੍ਸ ਲਿਚ੍ਛਵਿਨੋ ਅਚ੍ਚਯਦੇਸਨਾ, ਵਾਸਭਗਾਮਿਯਤ੍ਥੇਰਸ੍ਸ ਉਕ੍ਖੇਪਨੀਯਕਮ੍ਮਂ ਕਤ੍ਵਾ ਆਗਤਾਨਂ ਭਿਕ੍ਖੂਨਂ ਅਚ੍ਚਯਦੇਸਨਾਤਿ ਅਯਂ ਚਤੁਨ੍ਨਂ ਅਚ੍ਚਯਦੇਸਨਾ ਨਾਮ.

ਅਟ੍ਠਙ੍ਗਿਕੋ ਮੁਸਾਵਾਦੋਤਿ ‘‘ਪੁਬ੍ਬੇਵਸ੍ਸ ਹੋਤਿ ਮੁਸਾ ਭਣਿਸ੍ਸ’’ਨ੍ਤਿ ਆਦਿਂ ਕਤ੍ਵਾ ‘‘ਵਿਨਿਧਾਯ ਸਞ੍ਞ’’ਨ੍ਤਿ ਪਰਿਯੋਸਾਨੇਹਿ (ਪਾਚਿ. ੪-੫; ਪਰਿ. ੪੫੯) ਅਟ੍ਠਹਿ ਅਙ੍ਗੇਹਿ ਅਟ੍ਠਙ੍ਗਿਕੋ. ਉਪੋਸਥਙ੍ਗਾਨਿਪਿ ਪਾਣਂ ਨ ਹਨੇਤਿਆਦਿਨਾ ਨਯੇਨ ਵੁਤ੍ਤਾਨੇਵ. ਅਟ੍ਠ ਦੂਤੇਯ੍ਯਙ੍ਗਾਨੀਤਿ ‘‘ਇਧ, ਭਿਕ੍ਖਵੇ, ਭਿਕ੍ਖੁ ਸੋਤਾ ਚ ਹੋਤਿ ਸਾਵੇਤਾ ਚਾ’’ਤਿਆਦਿਨਾ (ਚੂਲ਼ਵ. ੩੪੭) ਨਯੇਨ ਸਙ੍ਘਭੇਦਕੇ ਵੁਤ੍ਤਾਨਿ. ਅਟ੍ਠ ਤਿਤ੍ਥਿਯਵਤ੍ਤਾਨਿ ਮਹਾਖਨ੍ਧਕੇ ਵੁਤ੍ਤਾਨਿ.

ਅਟ੍ਠਵਾਚਿਕਾ ਉਪਸਮ੍ਪਦਾਤਿ ਭਿਕ੍ਖੁਨੀਨਂ ਉਪਸਮ੍ਪਦਂ ਸਨ੍ਧਾਯ ਵੁਤ੍ਤਂ. ਅਟ੍ਠਨ੍ਨਂ ਪਚ੍ਚੁਟ੍ਠਾਤਬ੍ਬਨ੍ਤਿ ਭਤ੍ਤਗ੍ਗੇ ਅਟ੍ਠਨ੍ਨਂ ਭਿਕ੍ਖੁਨੀਨਂ ਇਤਰਾਹਿ ਪਚ੍ਚੁਟ੍ਠਾਯ ਆਸਨਂ ਦਾਤਬ੍ਬਂ. ਭਿਕ੍ਖੁਨੋਵਾਦਕੋ ਅਟ੍ਠਹੀਤਿ ਅਟ੍ਠਹਙ੍ਗੇਹਿ ਸਮਨ੍ਨਾਗਤੋ ਭਿਕ੍ਖੁ ਭਿਕ੍ਖੁਨੋਵਾਦਕੋ ਸਮ੍ਮਨ੍ਨਿਤਬ੍ਬੋ.

ਏਕਸ੍ਸ ਛੇਜ੍ਜਨ੍ਤਿ ਗਾਥਾਯ ਨਵਸੁ ਜਨੇਸੁ ਯੋ ਸਲਾਕਂ ਗਾਹੇਤ੍ਵਾ ਸਙ੍ਘਂ ਭਿਨ੍ਦਤਿ, ਤਸ੍ਸੇਵ ਛੇਜ੍ਜਂ ਹੋਤਿ, ਦੇਵਦਤ੍ਤੋ ਵਿਯ ਪਾਰਾਜਿਕਂ ਆਪਜ੍ਜਤਿ. ਭੇਦਕਾਨੁਵਤ੍ਤਕਾਨਂ ਚਤੁਨ੍ਨਂ ਥੁਲ੍ਲਚ੍ਚਯਂ ਕੋਕਾਲਿਕਾਦੀਨਂ ਵਿਯ, ਧਮ੍ਮਵਾਦੀਨਂ ਚਤੁਨ੍ਨਂ ਅਨਾਪਤ੍ਤਿ. ਇਮਾ ਪਨ ਆਪਤ੍ਤਿਯੋ ਚ ਅਨਾਪਤ੍ਤਿਯੋ ਚ ਸਬ੍ਬੇਸਂ ਏਕਵਤ੍ਥੁਕਾ ਸਙ੍ਘਭੇਦਵਤ੍ਥੁਕਾ ਏਵ.

ਨਵ ਆਘਾਤਵਤ੍ਥੂਨੀਤਿ ਗਾਥਾਯ ਨਵਹੀਤਿ ਨਵਹਿ ਭਿਕ੍ਖੂਹਿ ਸਙ੍ਘੋ ਭਿਜ੍ਜਤਿ. ਞਤ੍ਤਿਯਾ ਕਰਣਾ ਨਵਾਤਿ ਞਤ੍ਤਿਯਾ ਕਾਤਬ੍ਬਾਨਿ ਕਮ੍ਮਾਨਿ ਨਵਾਤਿ ਅਤ੍ਥੋ. ਸੇਸਂ ਉਤ੍ਤਾਨਮੇਵ.

(੪) ਅਵਨ੍ਦਨੀਯਪੁਗ੍ਗਲਾਦਿਵਣ੍ਣਨਾ

੪੭੭. ਦਸ ਪੁਗ੍ਗਲਾ ਨਾਭਿਵਾਦੇਤਬ੍ਬਾਤਿ ਸੇਨਾਸਨਕ੍ਖਨ੍ਧਕੇ ਵੁਤ੍ਤਾ ਦਸ ਜਨਾ. ਅਞ੍ਜਲਿ ਸਾਮੀਚੇਨ ਚਾਤਿ ਸਾਮੀਚਿਕਮ੍ਮੇਨ ਸਦ੍ਧਿਂ ਅਞ੍ਜਲਿ ਚ ਤੇਸਂ ਨ ਕਾਤਬ੍ਬੋ, ਨੇਵ ਪਾਨੀਯਾਪੁਚ੍ਛਨਤਾਲਵਣ੍ਟਗ੍ਗਹਣਾਦਿ ਖਨ੍ਧਕਵਤ੍ਤਂ ਤੇਸਂ ਦਸ੍ਸੇਤਬ੍ਬਂ, ਨ ਅਞ੍ਜਲਿ ਪਗ੍ਗਣ੍ਹਿਤਬ੍ਬੋਤਿ ਅਤ੍ਥੋ. ਦਸਨ੍ਨਂ ਦੁਕ੍ਕਟਨ੍ਤਿ ਤੇਸਂਯੇਵ ਦਸਨ੍ਨਂ ਏਵਂ ਕਰੋਨ੍ਤਸ੍ਸ ਦੁਕ੍ਕਟਂ ਹੋਤਿ. ਦਸ ਚੀਵਰਧਾਰਣਾਤਿ ਦਸ ਦਿਵਸਾਨਿ ਅਤਿਰੇਕਚੀਵਰਸ੍ਸ ਧਾਰਣਾ ਅਨੁਞ੍ਞਾਤਾਤਿ ਅਤ੍ਥੋ.

ਪਞ੍ਚਨ੍ਨਂ ਵਸ੍ਸਂਵੁਟ੍ਠਾਨਂ, ਦਾਤਬ੍ਬਂ ਇਧ ਚੀਵਰਨ੍ਤਿ ਪਞ੍ਚਨ੍ਨਂ ਸਹਧਮ੍ਮਿਕਾਨਂ ਸਮ੍ਮੁਖਾਵ ਦਾਤਬ੍ਬਂ. ਸਤ੍ਤਨ੍ਨਂ ਸਨ੍ਤੇਤਿ ਦਿਸਾਪਕ੍ਕਨ੍ਤਉਮ੍ਮਤ੍ਤਕਖਿਤ੍ਤਚਿਤ੍ਤਵੇਦਨਾਟ੍ਟਾਨਂ ਤਿਣ੍ਣਞ੍ਚ ਉਕ੍ਖਿਤ੍ਤਕਾਨਨ੍ਤਿ ਇਮੇਸਂ ਸਤ੍ਤਨ੍ਨਂ ਸਨ੍ਤੇ ਪਤਿਰੂਪੇ ਗਾਹਕੇ ਪਰਮ੍ਮੁਖਾਪਿ ਦਾਤਬ੍ਬਂ. ਸੋਲ਼ਸਨ੍ਨਂ ਨ ਦਾਤਬ੍ਬਨ੍ਤਿ ਸੇਸਾਨਂ ਚੀਵਰਕ੍ਖਨ੍ਧਕੇ ਵੁਤ੍ਤਾਨਂ ਪਣ੍ਡਕਾਦੀਨਂ ਸੋਲ਼ਸਨ੍ਨਂ ਨ ਦਾਤਬ੍ਬਂ.

ਕਤਿਸਤਂ ਰਤ੍ਤਿਸਤਂ, ਆਪਤ੍ਤਿਯੋ ਛਾਦਯਿਤ੍ਵਾਨਾਤਿ ਕਤਿਸਤਂ ਆਪਤ੍ਤਿਯੋ ਰਤ੍ਤਿਸਤਂ ਛਾਦਯਿਤ੍ਵਾਨ. ਦਸਸਤਂ ਰਤ੍ਤਿਸਤਂ, ਆਪਤ੍ਤਿਯੋ ਛਾਦਯਿਤ੍ਵਾਨਾਤਿ ਦਸਸਤਂ ਆਪਤ੍ਤਿਯੋ ਰਤ੍ਤਿਸਤਂ ਛਾਦਯਿਤ੍ਵਾਨ. ਅਯਞ੍ਹੇਤ੍ਥ ਸਙ੍ਖੇਪਤ੍ਥੋ – ਯੋ ਦਿਵਸੇ ਸਤਂ ਸਤਂ ਸਙ੍ਘਾਦਿਸੇਸਾਪਤ੍ਤਿਯੋ ਆਪਜ੍ਜਿਤ੍ਵਾ ਦਸ ਦਸ ਦਿਵਸੇ ਪਟਿਚ੍ਛਾਦੇਤਿ, ਤੇਨ ਰਤ੍ਤਿਸਤਂ ਆਪਤ੍ਤਿਸਹਸ੍ਸਂ ਪਟਿਚ੍ਛਾਦਿਤਂ ਹੋਤਿ, ਸੋ ਸਬ੍ਬਾਵ ਤਾ ਆਪਤ੍ਤਿਯੋ ਦਸਾਹਪਟਿਚ੍ਛਨ੍ਨਾਤਿ ਪਰਿਵਾਸਂ ਯਾਚਿਤ੍ਵਾ ਦਸ ਰਤ੍ਤਿਯੋ ਵਸਿਤ੍ਵਾਨ ਮੁਚ੍ਚੇਯ੍ਯ ਪਾਰਿਵਾਸਿਕੋਤਿ.

ਦ੍ਵਾਦਸ ਕਮ੍ਮਦੋਸਾ ਵੁਤ੍ਤਾਤਿ ਅਪਲੋਕਨਕਮ੍ਮਂ ਅਧਮ੍ਮੇਨਵਗ੍ਗਂ, ਅਧਮ੍ਮੇਨਸਮਗ੍ਗਂ, ਧਮ੍ਮੇਨਵਗ੍ਗਂ, ਤਥਾ ਞਤ੍ਤਿਕਮ੍ਮਞਤ੍ਤਿਦੁਤਿਯਕਮ੍ਮਞਤ੍ਤਿਚਤੁਤ੍ਥਕਮ੍ਮਾਨਿਪੀਤਿ ਏਵਂ ਏਕੇਕਸ੍ਮਿਂ ਕਮ੍ਮੇ ਤਯੋ ਤਯੋ ਕਤ੍ਵਾ ਦ੍ਵਾਦਸ ਕਮ੍ਮਦੋਸਾ ਵੁਤ੍ਤਾ.

ਚਤਸ੍ਸੋ ਕਮ੍ਮਸਮ੍ਪਤ੍ਤਿਯੋਤਿ ਅਪਲੋਕਨਕਮ੍ਮਂ ਧਮ੍ਮੇਨਸਮਗ੍ਗਂ, ਤਥਾ ਸੇਸਾਨਿਪੀਤਿ ਏਵਂ ਚਤਸ੍ਸੋ ਕਮ੍ਮਸਮ੍ਪਤ੍ਤਿਯੋ ਵੁਤ੍ਤਾ.

ਛ ਕਮ੍ਮਾਨੀਤਿ ਅਧਮ੍ਮੇਨਵਗ੍ਗਕਮ੍ਮਂ, ਅਧਮ੍ਮੇਨਸਮਗ੍ਗਕਮ੍ਮਂ, ਧਮ੍ਮਪਤਿਰੂਪਕੇਨਵਗ੍ਗਕਮ੍ਮਂ, ਧਮ੍ਮਪਤਿਰੂਪਕੇਨਸਮਗ੍ਗਕਮ੍ਮਂ, ਧਮ੍ਮੇਨਵਗ੍ਗਕਮ੍ਮਂ, ਧਮ੍ਮੇਨਸਮਗ੍ਗਕਮ੍ਮਨ੍ਤਿ ਏਵਂ ਛ ਕਮ੍ਮਾਨਿ ਵੁਤ੍ਤਾਨਿ. ਏਕੇਤ੍ਥ ਧਮ੍ਮਿਕਾ ਕਤਾਤਿ ਏਕਂ ਧਮ੍ਮੇਨ ਸਮਗ੍ਗਕਮ੍ਮਮੇਵੇਤ੍ਥ ਧਮ੍ਮਿਕਂ ਕਤਨ੍ਤਿ ਅਤ੍ਥੋ. ਦੁਤਿਯਗਾਥਾਵਿਸ੍ਸਜ੍ਜਨੇਪਿ ਏਤਦੇਵ ਧਮ੍ਮਿਕਂ.

ਯਂ ਦੇਸਿਤਾਤਿ ਯਾਨਿ ਦੇਸਿਤਾਨਿ ਵੁਤ੍ਤਾਨਿ ਪਕਾਸਿਤਾਨਿ. ਅਨਨ੍ਤਜਿਨੇਨਾਤਿਆਦੀਸੁ ਪਰਿਯਨ੍ਤਪਰਿਚ੍ਛੇਦਭਾਵਰਹਿਤਤ੍ਤਾ ਅਨਨ੍ਤਂ ਵੁਚ੍ਚਤਿ ਨਿਬ੍ਬਾਨਂ, ਤਂ ਭਗਵਤਾ ਰਞ੍ਞਾ ਸਪਤ੍ਤਗਣਂ ਅਭਿਮਦ੍ਦਿਤ੍ਵਾ ਰਜ੍ਜਂ ਵਿਯ ਕਿਲੇਸਗਣਂ ਅਭਿਮਦ੍ਦਿਤ੍ਵਾ ਜਿਤਂ ਵਿਜਿਤਂ ਅਧਿਗਤਂ ਸਮ੍ਪਤ੍ਤਂ, ਤਸ੍ਮਾ ਭਗਵਾ ‘‘ਅਨਨ੍ਤਜਿਨੋ’’ਤਿ ਵੁਚ੍ਚਤਿ. ਸ੍ਵੇਵ ਇਟ੍ਠਾਨਿਟ੍ਠੇਸੁ ਨਿਬ੍ਬਿਕਾਰਤਾਯ ਤਾਦਿ, ਵਿਕ੍ਖਮ੍ਭਨਤਦਙ੍ਗਸਮੁਚ੍ਛੇਦਪਟਿਪਸ੍ਸਦ੍ਧਿਨਿਸ੍ਸਰਣਵਿਵੇਕਸਙ੍ਖਾਤਂ ਵਿਵੇਕਪਞ੍ਚਕਂ ਅਦ੍ਦਸਾਤਿ ਵਿਵੇਕਦਸ੍ਸੀ; ਤੇਨ ਅਨਨ੍ਤਜਿਨੇਨ ਤਾਦਿਨਾ ਵਿਵੇਕਦਸ੍ਸਿਨਾ ਯਾਨਿ ਆਪਤ੍ਤਿਕ੍ਖਨ੍ਧਾਨਿ ਦੇਸਿਤਾਨਿ ਵੁਤ੍ਤਾਨਿ. ਏਕੇਤ੍ਥ ਸਮ੍ਮਤਿ ਵਿਨਾ ਸਮਥੇਹੀਤਿ ਅਯਮੇਤ੍ਥ ਪਦਸਮ੍ਬਨ੍ਧੋ, ਯਾਨਿ ਸਤ੍ਥਾਰਾ ਸਤ੍ਤ ਆਪਤ੍ਤਿਕ੍ਖਨ੍ਧਾਨਿ ਦੇਸਿਤਾਨਿ, ਤਤ੍ਥ ਏਕਾਪਿ ਆਪਤ੍ਤਿ ਵਿਨਾ ਸਮਥੇਹਿ ਨ ਸਮ੍ਮਤਿ, ਅਥ ਖੋ ਛ ਸਮਥਾ ਚਤ੍ਤਾਰਿ ਅਧਿਕਰਣਾਨੀਤਿ ਸਬ੍ਬੇਪਿਮੇ ਧਮ੍ਮਾ ਸਮ੍ਮੁਖਾਵਿਨਯੇਨ ਸਮ੍ਮਨ੍ਤਿ, ਸਮਾਯੋਗਂ ਗਚ੍ਛਨ੍ਤਿ. ਏਤ੍ਥ ਪਨ ਏਕੋ ਸਮ੍ਮੁਖਾਵਿਨਯੋਵ ਵਿਨਾ ਸਮਥੇਹਿ ਸਮ੍ਮਤਿ, ਸਮਥਭਾਵਂ ਗਚ੍ਛਤਿ. ਨ ਹਿ ਤਸ੍ਸ ਅਞ੍ਞੇਨ ਸਮਥੇਨ ਵਿਨਾ ਅਨਿਪ੍ਫਤ੍ਤਿ ਨਾਮ ਅਤ੍ਥਿ. ਤੇਨ ਵੁਤ੍ਤਂ – ‘‘ਏਕੇਤ੍ਥ ਸਮ੍ਮਤਿ ਵਿਨਾ ਸਮਥੇਹੀ’’ਤਿ. ਇਮਿਨਾ ਤਾਵ ਅਧਿਪ੍ਪਾਯੇਨ ਅਟ੍ਠਕਥਾਸੁ ਅਤ੍ਥੋ ਵੁਤ੍ਤੋ. ਮਯਂ ਪਨ ‘‘ਵਿਨਾ’’ਤਿ ਨਿਪਾਤਸ੍ਸ ਪਟਿਸੇਧਨਮਤ੍ਤਮਤ੍ਥਂ ਗਹੇਤ੍ਵਾ ‘‘ਏਕੇਤ੍ਥ ਸਮ੍ਮਤਿ ਵਿਨਾ ਸਮਥੇਹੀ’’ਤਿ ਏਤੇਸੁ ਸਤ੍ਤਸੁ ਆਪਤ੍ਤਿਕ੍ਖਨ੍ਧੇਸੁ ਏਕੋ ਪਾਰਾਜਿਕਾਪਤ੍ਤਿਕ੍ਖਨ੍ਧੋ ਵਿਨਾ ਸਮਥੇਹਿ ਸਮ੍ਮਤੀਤਿ ਏਤਮਤ੍ਥਂ ਰੋਚੇਯ੍ਯਾਮ. ਵੁਤ੍ਤਮ੍ਪਿ ਚੇਤਂ ‘‘ਯਾ ਸਾ ਆਪਤ੍ਤਿ ਅਨਵਸੇਸਾ, ਸਾ ਆਪਤ੍ਤਿ ਨ ਕਤਮੇਨ ਅਧਿਕਰਣੇਨ ਕਤਮਮ੍ਹਿ ਠਾਨੇ ਨ ਕਤਮੇਨ ਸਮਥੇਨ ਸਮ੍ਮਤੀ’’ਤਿ.

ਛਊਨਦਿਯਡ੍ਢਸਤਾਤਿ ‘‘ਇਧ, ਉਪਾਲਿ, ਭਿਕ੍ਖੁ ਅਧਮ੍ਮਂ ਧਮ੍ਮੋਤਿ ਦੀਪੇਤਿ, ਤਸ੍ਮਿਂ ਅਧਮ੍ਮਦਿਟ੍ਠਿ ਭੇਦੇ ਅਧਮ੍ਮਦਿਟ੍ਠਿ, ਤਸ੍ਮਿਂ ਅਧਮ੍ਮਦਿਟ੍ਠਿ ਭੇਦੇ ਧਮ੍ਮਦਿਟ੍ਠਿ, ਤਸ੍ਮਿਂ ਅਧਮ੍ਮਦਿਟ੍ਠਿ ਭੇਦੇ ਵੇਮਤਿਕੋ, ਤਸ੍ਮਿਂ ਧਮ੍ਮਦਿਟ੍ਠਿ ਭੇਦੇ ਅਧਮ੍ਮਦਿਟ੍ਠਿ, ਤਸ੍ਮਿਂ ਧਮ੍ਮਦਿਟ੍ਠਿ ਭੇਦੇ ਵੇਮਤਿਕੋ, ਤਸ੍ਮਿਂ ਵੇਮਤਿਕੋ ਭੇਦੇ ਅਧਮ੍ਮਦਿਟ੍ਠਿ, ਤਸ੍ਮਿਂ ਵੇਮਤਿਕੋ ਭੇਦੇ ਧਮ੍ਮਦਿਟ੍ਠਿ, ਤਸ੍ਮਿਂ ਵੇਮਤਿਕੋ ਭੇਦੇ ਵੇਮਤਿਕੋ’’ਤਿ ਏਵਂ ਯਾਨਿ ਅਟ੍ਠਾਰਸਨ੍ਨਂ ਭੇਦਕਰਵਤ੍ਥੂਨਂ ਵਸੇਨ ਅਟ੍ਠਾਰਸ ਅਟ੍ਠਕਾਨਿ ਸਙ੍ਘਭੇਦਕਕ੍ਖਨ੍ਧਕੇ ਵੁਤ੍ਤਾਨਿ, ਤੇਸਂ ਵਸੇਨ ਛਊਨਦਿਯਡ੍ਢਸਤਂ ਆਪਾਯਿਕਾ ਵੇਦਿਤਬ੍ਬਾ.

ਅਟ੍ਠਾਰਸ ਅਨਾਪਾਯਿਕਾਤਿ ‘‘ਇਧ, ਉਪਾਲਿ, ਭਿਕ੍ਖੁ ਅਧਮ੍ਮਂ ਧਮ੍ਮੋਤਿ ਦੀਪੇਤਿ, ਤਸ੍ਮਿਂ ਧਮ੍ਮਦਿਟ੍ਠਿ ਭੇਦੇ ਧਮ੍ਮਦਿਟ੍ਠਿ ਅਵਿਨਿਧਾਯ ਦਿਟ੍ਠਿਂ ਅਵਿਨਿਧਾਯ ਖਨ੍ਤਿਂ ਅਵਿਨਿਧਾਯ ਰੁਚਿਂ ਅਵਿਨਿਧਾਯ ਭਾਵਂ ਅਨੁਸ੍ਸਾਵੇਤਿ, ਸਲਾਕਂ ਗਾਹੇਤਿ ‘ਅਯਂ ਧਮ੍ਮੋ, ਅਯਂ ਵਿਨਯੋ, ਇਦਂ ਸਤ੍ਥੁਸਾਸਨਂ, ਇਮਂ ਗਣ੍ਹਥ, ਇਮਂ ਰੋਚੇਥਾ’ਤਿ, ਅਯਮ੍ਪਿ ਖੋ, ਉਪਾਲਿ, ਸਙ੍ਘਭੇਦਕੋ ਨ ਆਪਾਯਿਕੋ ਨ ਨੇਰਯਿਕੋ ਨ ਕਪ੍ਪਟ੍ਠੋ ਨ ਅਤੇਕਿਚ੍ਛੋ’’ਤਿ ਏਵਂ ਏਕੇਕਸ੍ਮਿਂ ਵਤ੍ਥੁਸ੍ਮਿਂ ਏਕੇਕਂ ਕਤ੍ਵਾ ਸਙ੍ਘਭੇਦਕਕ੍ਖਨ੍ਧਕਾਵਸਾਨੇ ਵੁਤ੍ਤਾ ਅਟ੍ਠਾਰਸ ਜਨਾ. ਅਟ੍ਠਾਰਸ ਅਟ੍ਠਕਾ ਛਊਨਦਿਯਡ੍ਢਸਤਵਿਸ੍ਸਜ੍ਜਨੇ ਵੁਤ੍ਤਾਯੇਵ.

(੫) ਸੋਲ਼ਸਕਮ੍ਮਾਦਿਵਣ੍ਣਨਾ

੪੭੮. ਕਤਿ ਕਮ੍ਮਾਨੀਤਿਆਦੀਨਂ ਸਬ੍ਬਗਾਥਾਨਂ ਵਿਸ੍ਸਜ੍ਜਨਂ ਉਤ੍ਤਾਨਮੇਵਾਤਿ.

ਅਪਰਦੁਤਿਯਗਾਥਾਸਙ੍ਗਣਿਕਵਣ੍ਣਨਾ ਨਿਟ੍ਠਿਤਾ.