੩. ਤਤਿਯਸਿਕ੍ਖਾਪਦਵਣ੍ਣਨਾ

੯੪੧. ਤਤਿਯੇ – ਉਲ਼ਾਰਸਮ੍ਭਾਵਿਤਾਤਿ ਉਲ਼ਾਰਕੁਲਾ ਪਬ੍ਬਜਿਤਤ੍ਤਾ ਗੁਣੇਹਿ ਚ ਉਲ਼ਾਰਤ੍ਤਾ ਉਲ਼ਾਰਾਤਿ ਸਮ੍ਭਾਵਿਤਾ. ਇਸ੍ਸਾਪਕਤਾਤਿ ਇਸ੍ਸਾਯ ਅਪਕਤਾ; ਅਭਿਭੂਤਾਤਿ ਅਤ੍ਥੋ. ਸਞ੍ਞਤ੍ਤਿ ਬਹੁਲਾ ਏਤਾਸਨ੍ਤਿ ਸਞ੍ਞਤ੍ਤਿਬਹੁਲਾ; ਦਿਵਸਂ ਮਹਾਜਨਂ ਸਞ੍ਞਾਪਯਮਾਨਾਤਿ ਅਤ੍ਥੋ. ਵਿਞ੍ਞਤ੍ਤਿ ਬਹੁਲਾ ਏਤਾਸਨ੍ਤਿ ਵਿਞ੍ਞਤ੍ਤਿਬਹੁਲਾ. ਵਿਞ੍ਞਤ੍ਤੀਤਿ ਹੇਤੂਦਾਹਰਣਾਦੀਹਿ ਵਿਵਿਧੇਹਿ ਨਯੇਹਿ ਞਾਪਨਾ ਵੇਦਿਤਬ੍ਬਾ, ਨ ਯਾਚਨਾ.

੯੪੩. ਚਙ੍ਕਮਨੇ ਨਿਵਤ੍ਤਨਗਣਨਾਯ ਆਪਤ੍ਤਿਯੋ ਵੇਦਿਤਬ੍ਬਾ. ਤਿਟ੍ਠਤਿ ਵਾਤਿਆਦੀਸੁ ਪਯੋਗਗਣਨਾਯ. ਉਦ੍ਦਿਸਤਿ ਵਾਤਿਆਦੀਸੁ ਪਦਾਦਿਗਣਨਾਯ. ਸੇਸਂ ਉਤ੍ਤਾਨਮੇਵ.

ਤਿਸਮੁਟ੍ਠਾਨਂ – ਕਿਰਿਯਾਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਲੋਕਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਅਕੁਸਲਚਿਤ੍ਤਂ, ਦੁਕ੍ਖਵੇਦਨਨ੍ਤਿ.

ਤਤਿਯਸਿਕ੍ਖਾਪਦਂ.