੩. ਖਮ੍ਭਕਤਵਗ੍ਗਵਣ੍ਣਨਾ

੫੯੬-੮. ਖਮ੍ਭਕਤੋ ਨਾਮ ਕਟਿਯਂ ਹਤ੍ਥਂ ਠਪੇਤ੍ਵਾ ਕਤਖਮ੍ਭੋ. ਓਗੁਣ੍ਠਿਤੋਤਿ ਸਸੀਸਂ ਪਾਰੁਤੋ.

੬੦੦. ਉਕ੍ਕੁਟਿਕਾਯਾਤਿ ਏਤ੍ਥ ਉਕ੍ਕੁਟਿਕਾ ਵੁਚ੍ਚਤਿ ਪਣ੍ਹਿਯੋ ਉਕ੍ਖਿਪਿਤ੍ਵਾ ਅਗ੍ਗਪਾਦੇਹਿ ਵਾ, ਅਗ੍ਗਪਾਦੇ ਵਾ ਉਕ੍ਖਿਪਿਤ੍ਵਾ ਪਣ੍ਹੀਹਿਯੇਵ ਵਾ ਭੂਮਿਂ ਫੁਸਨ੍ਤਸ੍ਸ ਗਮਨਂ. ਕਰਣਵਚਨਂ ਪਨੇਤ੍ਥ ਵੁਤ੍ਤਲਕ੍ਖਣਮੇਵ.

੬੦੧. ਦੁਸ੍ਸਪਲ੍ਲਤ੍ਥਿਕਾਯਾਤਿ ਏਤ੍ਥ ਆਯੋਗਪਲ੍ਲਤ੍ਥਿਕਾਪਿ ਦੁਸ੍ਸਪਲ੍ਲਤ੍ਥਿਕਾ ਏਵ.

੬੦੨. ਸਕ੍ਕਚ੍ਚਨ੍ਤਿ ਸਤਿਂ ਉਪਟ੍ਠਪੇਤ੍ਵਾ.

੬੦੩. ਆਕਿਰਨ੍ਤੇਪੀਤਿ ਪਿਣ੍ਡਪਾਤਂ ਦੇਨ੍ਤੇਪਿ. ਪਤ੍ਤਸਞ੍ਞੀਤਿ ਪਤ੍ਤੇ ਸਞ੍ਞਂ ਕਤ੍ਵਾ.

੬੦੪. ਸਮਸੂਪਕੋ ਨਾਮ ਯਤ੍ਥ ਭਤ੍ਤਸ੍ਸ ਚਤੁਤ੍ਥਭਾਗਪ੍ਪਮਾਣੋ ਸੂਪੋ ਹੋਤਿ. ਮੁਗ੍ਗਸੂਪੋ ਮਾਸਸੂਪੋਤਿ ਏਤ੍ਥ ਕੁਲਤ੍ਥਾਦੀਹਿ ਕਤਸੂਪਾਪਿ ਸਙ੍ਗਹਂ ਗਚ੍ਛਨ੍ਤਿਯੇਵਾਤਿ ਮਹਾਪਚ੍ਚਰਿਯਂ ਵੁਤ੍ਤਂ. ਰਸਰਸੇਤਿ ਏਤ੍ਥ ਠਪੇਤ੍ਵਾ ਦ੍ਵੇ ਸੂਪੇ ਅਵਸੇਸਾਨਿ ਓਲੋਣੀਸਾਕਸੂਪੇਯ੍ਯਮਚ੍ਛਰਸਮਂਸਰਸਾਦੀਨਿ ਰਸਰਸਾਤਿ ਵੇਦਿਤਬ੍ਬਾਨਿ. ਤਂ ਰਸਰਸਂ ਬਹੁਮ੍ਪਿ ਗਣ੍ਹਨ੍ਤਸ੍ਸ ਅਨਾਪਤ੍ਤਿ.

੬੦੫. ਸਮਤਿਤ੍ਤਿਕਨ੍ਤਿ ਸਮਪੁਣ੍ਣਂ ਸਮਭਰਿਤਂ. ਥੂਪੀਕਤਂ ਪਿਣ੍ਡਪਾਤਂ ਪਟਿਗ੍ਗਣ੍ਹਾਤਿ, ਆਪਤ੍ਤਿ ਦੁਕ੍ਕਟਸ੍ਸਾਤਿ ਏਤ੍ਥ ਥੂਪੀਕਤੋ ਨਾਮ ਪਤ੍ਤਸ੍ਸ ਅਨ੍ਤੋਮੁਖਵਟ੍ਟਿਲੇਖਂ ਅਤਿਕ੍ਕਮਿਤ੍ਵਾ ਕਤੋ; ਪਤ੍ਤੇ ਪਕ੍ਖਿਤ੍ਤੋ ਰਚਿਤੋ ਪੂਰਿਤੋਤਿ ਅਤ੍ਥੋ. ਏਵਂ ਕਤਂ ਅਗਹੇਤ੍ਵਾ ਅਨ੍ਤੋਮੁਖਵਟ੍ਟਿਲੇਖਾਸਮਪ੍ਪਮਾਣੋ ਗਹੇਤਬ੍ਬੋ.

ਤਤ੍ਥ ਥੂਪੀਕਤਂ ਨਾਮ ‘‘ਪਞ੍ਚਹਿ ਭੋਜਨੇਹਿ ਕਤ’’ਨ੍ਤਿ ਅਭਯਤ੍ਥੇਰੋ ਆਹ. ਤਿਪਿਟਕਚੂਲ਼ਨਾਗਤ੍ਥੇਰੋ ਪਨ ‘‘ਪਿਣ੍ਡਪਾਤੋ ਨਾਮ ਯਾਗੁਪਿ ਭਤ੍ਤਮ੍ਪਿ ਖਾਦਨੀਯਮ੍ਪਿ ਚੁਣ੍ਣਪਿਣ੍ਡੋਪਿ ਦਨ੍ਤਕਟ੍ਠਮ੍ਪਿ ਦਸਿਕਸੁਤ੍ਤਮ੍ਪੀ’’ਤਿ ਇਦਂ ਸੁਤ੍ਤਂ ਵਤ੍ਵਾ ਦਸਿਕਸੁਤ੍ਤਮ੍ਪਿ ਥੂਪੀਕਤਂ ਨ ਵਟ੍ਟਤੀਤਿ ਆਹ. ਤੇਸਂ ਵਾਦਂ ਸੁਤ੍ਵਾ ਭਿਕ੍ਖੂ ਰੋਹਣਂ ਗਨ੍ਤ੍ਵਾ ਚੂਲ਼ਸੁਮਨਤ੍ਥੇਰਂ ਪੁਚ੍ਛਿਂਸੁ – ‘‘ਭਨ੍ਤੇ ਥੂਪੀਕਤਪਿਣ੍ਡਪਾਤੋ ਕੇਨ ਪਰਿਚ੍ਛਿਨ੍ਨੋ’’ਤਿ? ਤੇਸਞ੍ਚ ਥੇਰਾਨਂ ਵਾਦਂ ਆਰੋਚੇਸੁਂ. ਥੇਰੋ ਸੁਤ੍ਵਾ ਆਹ – ‘‘ਅਹੋ, ਚੂਲ਼ਨਾਗੋ ਸਾਸਨਤੋ ਭਟ੍ਠੋ, ਅਹਂ ਏਤਸ੍ਸ ਸਤ੍ਤਕ੍ਖਤ੍ਤੁਂ ਵਿਨਯਂ ਵਾਚੇਨ੍ਤੋ ਨ ਕਦਾਚਿ ਏਵਂ ਅਵਚਂ, ਅਯਂ ਕੁਤੋ ਲਭਿਤ੍ਵਾ ਏਵਂ ਵਦਸੀ’’ਤਿ. ਭਿਕ੍ਖੂ ਥੇਰਂ ਯਾਚਿਂਸੁ – ‘‘ਕਥੇਥ ਦਾਨਿ, ਭਨ੍ਤੇ, ਕੇਨ ਪਰਿਚ੍ਛਿਨ੍ਨੋ’’ਤਿ? ‘‘ਯਾਵਕਾਲਿਕੇਨਾਵੁਸੋ’’ਤਿ ਥੇਰੋ ਆਹ. ਤਸ੍ਮਾ ਯਂਕਿਞ੍ਚਿ ਯਾਗੁਭਤ੍ਤਂ ਵਾ ਫਲਾਫਲਂ ਵਾ ਆਮਿਸਜਾਤਿਕਂ ਸਮਤਿਤ੍ਤਿਕਮੇਵ ਗਹੇਤਬ੍ਬਂ. ਤਞ੍ਚ ਖੋ ਅਧਿਟ੍ਠਾਨੁਪਗੇਨ ਪਤ੍ਤੇਨ, ਇਤਰੇਨ ਪਨ ਥੂਪੀਕਤਮ੍ਪਿ ਵਟ੍ਟਤਿ. ਯਾਮਕਾਲਿਕਸਤ੍ਤਾਹਕਾਲਿਕਯਾਵਜੀਵਿਕਾਨਿ ਪਨ ਅਧਿਟ੍ਠਾਨੁਪਗਪਤ੍ਤੇਪਿ ਥੂਪੀਕਤਾਨਿ ਵਟ੍ਟਨ੍ਤਿ. ਦ੍ਵੀਸੁ ਪਤ੍ਤੇਸੁ ਭਤ੍ਤਂ ਗਹੇਤ੍ਵਾ ਏਕਸ੍ਮਿਂ ਪੂਰੇਤ੍ਵਾ ਵਿਹਾਰਂ ਪੇਸੇਤੁਂ ਵਟ੍ਟਤੀਤਿ ਮਹਾਪਚ੍ਚਰਿਯਂ ਪਨ ਵੁਤ੍ਤਂ. ਯਂ ਪਤ੍ਤੇ ਪਕ੍ਖਿਪਿਯਮਾਨਂ ਪੂਵਉਚ੍ਛੁਖਣ੍ਡਫਲਾਫਲਾਦਿ ਹੇਟ੍ਠਾ ਓਰੋਹਤਿ, ਤਂ ਥੂਪੀਕਤਂ ਨਾਮ ਨ ਹੋਤਿ. ਪੂਵਵਟਂਸਕਂ ਠਪੇਤ੍ਵਾ ਪਿਣ੍ਡਪਾਤਂ ਦੇਨ੍ਤਿ, ਥੂਪੀਕਤਮੇਵ ਹੋਤਿ. ਪੁਪ੍ਫਵਟਂਸਕਤਕ੍ਕੋਲਕਟੁਕਫਲਾਦਿਵਟਂਸਕੇ ਪਨ ਠਪੇਤ੍ਵਾ ਦਿਨ੍ਨਂ ਥੂਪੀਕਤਂ ਨ ਹੋਤਿ. ਭਤ੍ਤਸ੍ਸ ਉਪਰਿ ਥਾਲਕਂ ਵਾ ਪਤ੍ਤਂ ਵਾ ਠਪੇਤ੍ਵਾ ਪੂਰੇਤ੍ਵਾ ਗਣ੍ਹਾਤਿ, ਥੂਪੀਕਤਂ ਨਾਮ ਨ ਹੋਤਿ. ਕੁਰੁਨ੍ਦਿਯਮ੍ਪਿ ਵੁਤ੍ਤਂ – ‘‘ਥਾਲਕੇ ਵਾ ਪਣ੍ਣੇ ਵਾ ਪਕ੍ਖਿਪਿਤ੍ਵਾ ਤਂ ਪਤ੍ਤਮਤ੍ਥਕੇ ਠਪੇਤ੍ਵਾ ਦੇਨ੍ਤਿ, ਪਾਟੇਕ੍ਕਭਾਜਨਂ ਵਟ੍ਟਤੀ’’ਤਿ.

ਇਧ ਅਨਾਪਤ੍ਤਿਯਂ ਗਿਲਾਨੋ ਨ ਆਗਤੋ, ਤਸ੍ਮਾ ਗਿਲਾਨਸ੍ਸਪਿ ਥੂਪੀਕਤਂ ਨ ਵਟ੍ਟਤਿ. ਸਬ੍ਬਤ੍ਥ ਪਨ ਪਟਿਗ੍ਗਹੇਤੁਮੇਵ ਨ ਵਟ੍ਟਤਿ. ਪਟਿਗ੍ਗਹਿਤਂ ਪਨ ਸੁਪਟਿਗ੍ਗਹਿਤਮੇਵ ਹੋਤਿ, ਪਰਿਭੁਞ੍ਜਿਤੁਂ ਵਟ੍ਟਤੀਤਿ.

ਤਤਿਯੋ ਵਗ੍ਗੋ.