੧. ਪਰਿਮਣ੍ਡਲਵਗ੍ਗਵਣ੍ਣਨਾ

ਯਾਨਿ ਸਿਕ੍ਖਿਤਸਿਕ੍ਖੇਨ, ਸੇਖਿਯਾਨੀਤਿ ਤਾਦਿਨਾ;

ਭਾਸਿਤਾਨਿ ਅਯਂ ਦਾਨਿ, ਤੇਸਮ੍ਪਿ ਵਣ੍ਣਨਾਕ੍ਕਮੋ.

੫੭੬. ਤਤ੍ਥ ਪਰਿਮਣ੍ਡਲਨ੍ਤਿ ਸਮਨ੍ਤਤੋ ਮਣ੍ਡਲਂ. ਨਾਭਿਮਣ੍ਡਲਂ ਜਾਣੁਮਣ੍ਡਲਨ੍ਤਿ ਉਦ੍ਧਂ ਨਾਭਿਮਣ੍ਡਲਂ ਅਧੋ ਜਾਣੁਮਣ੍ਡਲਂ ਪਟਿਚ੍ਛਾਦੇਨ੍ਤੇਨ ਜਾਣੁਮਣ੍ਡਲਸ੍ਸ ਹੇਟ੍ਠਾ ਜਙ੍ਘਟ੍ਠਿਕਤੋ ਪਟ੍ਠਾਯ ਅਟ੍ਠਙ੍ਗੁਲਮਤ੍ਤਂ ਨਿਵਾਸਨਂ ਓਤਾਰੇਤ੍ਵਾ ਨਿਵਾਸੇਤਬ੍ਬਂ, ਤਤੋ ਪਰਂ ਓਤਾਰੇਨ੍ਤਸ੍ਸ ਦੁਕ੍ਕਟਨ੍ਤਿ ਵੁਤ੍ਤਂ. ਯਥਾ ਨਿਸਿਨ੍ਨਸ੍ਸ ਜਾਣੁਮਣ੍ਡਲਤੋ ਹੇਟ੍ਠਾ ਚਤੁਰਙ੍ਗੁਲਮਤ੍ਤਂ ਪਟਿਚ੍ਛਨ੍ਨਂ ਹੋਤੀਤਿ ਮਹਾਪਚ੍ਚਰਿਯਂ ਵੁਤ੍ਤਂ; ਏਵਂ ਨਿਵਾਸੇਨ੍ਤਸ੍ਸ ਪਨ ਨਿਵਾਸਨਂ ਪਮਾਣਿਕਂ ਵਟ੍ਟਤਿ. ਤਤ੍ਰਿਦਂ ਪਮਾਣਂ – ਦੀਘਤੋ ਮੁਟ੍ਠਿਪਞ੍ਚਕਂ, ਤਿਰਿਯਂ ਅਡ੍ਢਤੇਯ੍ਯਹਤ੍ਥਂ. ਤਾਦਿਸਸ੍ਸ ਪਨ ਅਲਾਭੇ ਤਿਰਿਯਂ ਦ੍ਵਿਹਤ੍ਥਪਮਾਣਮ੍ਪਿ ਵਟ੍ਟਤਿ ਜਾਣੁਮਣ੍ਡਲਪਟਿਚ੍ਛਾਦਨਤ੍ਥਂ, ਨਾਭਿਮਣ੍ਡਲਂ ਪਨ ਚੀਵਰੇਨਾਪਿ ਸਕ੍ਕਾ ਪਟਿਚ੍ਛਾਦੇਤੁਨ੍ਤਿ. ਤਤ੍ਥ ਏਕਪਟ੍ਟਚੀਵਰਂ ਏਵਂ ਨਿਵਤ੍ਥਮ੍ਪਿ ਨਿਵਤ੍ਥਟ੍ਠਾਨੇ ਨ ਤਿਟ੍ਠਤਿ, ਦੁਪਟ੍ਟਂ ਪਨ ਤਿਟ੍ਠਤਿ.

ਓਲਮ੍ਬੇਨ੍ਤੋ ਨਿਵਾਸੇਤਿ ਆਪਤ੍ਤਿ ਦੁਕ੍ਕਟਸ੍ਸਾਤਿ ਏਤ੍ਥ ਨ ਕੇਵਲਂ ਪੁਰਤੋ ਚ ਪਚ੍ਛਤੋ ਚ ਓਲਮ੍ਬੇਤ੍ਵਾ ਨਿਵਾਸੇਨ੍ਤਸ੍ਸੇਵ ਦੁਕ੍ਕਟਂ, ਯੇ ਪਨਞ੍ਞੇ ‘‘ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਗਿਹਿਨਿਵਤ੍ਥਂ ਨਿਵਾਸੇਨ੍ਤਿ ਹਤ੍ਥਿਸੋਣ੍ਡਕਂ ਮਚ੍ਛਵਾਲਕਂ ਚਤੁਕ੍ਕਣ੍ਣਕਂ ਤਾਲਵਣ੍ਟਕਂ ਸਤਵਲਿਕਂ ਨਿਵਾਸੇਨ੍ਤੀ’’ਤਿਆਦਿਨਾ (ਚੂਲ਼ਵ. ੨੮੦) ਨਯੇਨ ਖਨ੍ਧਕੇ ਨਿਵਾਸਨਦੋਸਾ ਵੁਤ੍ਤਾ, ਤਥਾ ਨਿਵਾਸੇਨ੍ਤਸ੍ਸਾਪਿ ਦੁਕ੍ਕਟਮੇਵ. ਤੇ ਸਬ੍ਬੇ ਵੁਤ੍ਤਨਯੇਨ ਪਰਿਮਣ੍ਡਲਂ ਨਿਵਾਸੇਨ੍ਤਸ੍ਸ ਨ ਹੋਨ੍ਤਿ. ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰਤੋ ਪਨ ਤਤ੍ਥੇਵ ਆਵਿ ਭਵਿਸ੍ਸਤਿ.

ਅਸਞ੍ਚਿਚ੍ਚਾਤਿ ਪੁਰਤੋ ਵਾ ਪਚ੍ਛਤੋ ਵਾ ਓਲਮ੍ਬੇਤ੍ਵਾ ਨਿਵਾਸੇਸ੍ਸਾਮੀਤਿ ਏਵਂ ਅਸਞ੍ਚਿਚ੍ਚ; ਅਥ ਖੋ ਪਰਿਮਣ੍ਡਲਂਯੇਵ ਨਿਵਾਸੇਸ੍ਸਾਮੀਤਿ ਵਿਰਜ੍ਝਿਤ੍ਵਾ ਅਪਰਿਮਣ੍ਡਲਂ ਨਿਵਾਸੇਨ੍ਤਸ੍ਸ ਅਨਾਪਤ੍ਤਿ. ਅਸ੍ਸਤਿਯਾਤਿ ਅਞ੍ਞਵਿਹਿਤਸ੍ਸਾਪਿ ਤਥਾ ਨਿਵਾਸੇਨ੍ਤਸ੍ਸ ਅਨਾਪਤ੍ਤਿ. ਅਜਾਨਨ੍ਤਸ੍ਸਾਤਿ ਏਤ੍ਥ ਨਿਵਾਸਨਵਤ੍ਤਂ ਅਜਾਨਨ੍ਤਸ੍ਸ ਮੋਕ੍ਖੋ ਨਤ੍ਥਿ. ਨਿਵਾਸਨਵਤ੍ਤਞ੍ਹਿ ਸਾਧੁਕਂ ਉਗ੍ਗਹੇਤਬ੍ਬਂ, ਤਸ੍ਸ ਅਨੁਗ੍ਗਹਣਮੇਵਸ੍ਸ ਅਨਾਦਰਿਯਂ. ਤਂ ਪਨ ਸਞ੍ਚਿਚ੍ਚ ਅਨੁਗ੍ਗਣ੍ਹਨ੍ਤਸ੍ਸ ਯੁਜ੍ਜਤਿ, ਤਸ੍ਮਾ ਉਗ੍ਗਹਿਤਵਤ੍ਤੋਪਿ ਯੋ ਆਰੁਲ਼੍ਹਭਾਵਂ ਵਾ ਓਰੁਲ਼੍ਹਭਾਵਂ ਵਾ ਨ ਜਾਨਾਤਿ, ਤਸ੍ਸ ਅਨਾਪਤ੍ਤਿ. ਕੁਰੁਨ੍ਦਿਯਂ ਪਨ ‘‘ਪਰਿਮਣ੍ਡਲਂ ਨਿਵਾਸੇਤੁਂ ਅਜਾਨਨ੍ਤਸ੍ਸ ਅਨਾਪਤ੍ਤੀ’’ਤਿ ਵੁਤ੍ਤਂ. ਯੋ ਪਨ ਸੁਕ੍ਖਜਙ੍ਘੋ ਵਾ ਮਹਾਪਿਣ੍ਡਿਕਮਂਸੋ ਵਾ ਹੋਤਿ, ਤਸ੍ਸ ਸਾਰੁਪ੍ਪਤ੍ਥਾਯ ਜਾਣੁਮਣ੍ਡਲਤੋ ਅਟ੍ਠਙ੍ਗੁਲਾਧਿਕਮ੍ਪਿ ਓਤਾਰੇਤ੍ਵਾ ਨਿਵਾਸੇਤੁਂ ਵਟ੍ਟਤਿ.

ਗਿਲਾਨਸ੍ਸਾਤਿ ਜਙ੍ਘਾਯ ਵਾ ਪਾਦੇ ਵਾ ਵਣੋ ਹੋਤਿ, ਉਕ੍ਖਿਪਿਤ੍ਵਾ ਵਾ ਓਤਾਰੇਤ੍ਵਾ ਵਾ ਨਿਵਾਸੇਤੁਂ ਵਟ੍ਟਤਿ. ਆਪਦਾਸੂਤਿ ਵਾਲ਼ਮਿਗਾ ਵਾ ਚੋਰਾ ਵਾ ਅਨੁਬਨ੍ਧਨ੍ਤਿ, ਏਵਰੂਪਾਸੁ ਆਪਦਾਸੁ ਅਨਾਪਤ੍ਤਿ. ਸੇਸਮੇਤ੍ਥ ਉਤ੍ਤਾਨਮੇਵ.

ਪਠਮਪਾਰਾਜਿਕਸਮੁਟ੍ਠਾਨਂ – ਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਲੋਕਵਜ੍ਜਂ, ਕਾਯਕਮ੍ਮਂ, ਅਕੁਸਲਚਿਤ੍ਤਂ, ਦੁਕ੍ਖਵੇਦਨਨ੍ਤਿ. ਫੁਸ੍ਸਦੇਵਤ੍ਥੇਰੋ ‘‘ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਤਿਵੇਦਨ’’ਨ੍ਤਿ ਆਹ. ਉਪਤਿਸ੍ਸਤ੍ਥੇਰੋ ਪਨ ‘‘ਅਨਾਦਰਿਯਂ ਪਟਿਚ੍ਚਾ’’ਤਿ ਵੁਤ੍ਤਤ੍ਤਾ ‘‘ਲੋਕਵਜ੍ਜਂ, ਅਕੁਸਲਚਿਤ੍ਤਂ, ਦੁਕ੍ਖਵੇਦਨ’’ਨ੍ਤਿ ਆਹ.

੫੭੭. ਪਰਿਮਣ੍ਡਲਂ ਪਾਰੁਪਿਤਬ੍ਬਨ੍ਤਿ ‘‘ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਗਿਹਿਪਾਰੁਤਂ ਪਾਰੁਪਨ੍ਤੀ’’ਤਿ (ਚੂਲ਼ਵ. ੨੮੦) ਏਵਂ ਵੁਤ੍ਤਂ ਅਨੇਕਪ੍ਪਕਾਰਂ ਗਿਹਿਪਾਰੁਪਨਂ ਅਪਾਰੁਪਿਤ੍ਵਾ ਇਧ ਵੁਤ੍ਤਨਯੇਨੇਵ ਉਭੋ ਕਣ੍ਣੇ ਸਮਂ ਕਤ੍ਵਾ ਪਾਰੁਪਨਵਤ੍ਤਂ ਪੂਰੇਨ੍ਤੇਨ ਪਰਿਮਣ੍ਡਲਂ ਪਾਰੁਪਿਤਬ੍ਬਂ. ਇਮਾਨਿ ਚ ਦ੍ਵੇ ਸਿਕ੍ਖਾਪਦਾਨਿ ਅਵਿਸੇਸੇਨ ਵੁਤ੍ਤਾਨਿ. ਤਸ੍ਮਾ ਵਿਹਾਰੇਪਿ ਅਨ੍ਤਰਘਰੇਪਿ ਪਰਿਮਣ੍ਡਲਮੇਵ ਨਿਵਾਸੇਤਬ੍ਬਞ੍ਚ ਪਾਰੁਪਿਤਬ੍ਬਞ੍ਚਾਤਿ. ਸਮੁਟ੍ਠਾਨਾਦੀਨਿ ਪਠਮਸਿਕ੍ਖਾਪਦੇ ਵੁਤ੍ਤਨਯੇਨੇਵ ਵੇਦਿਤਬ੍ਬਾਨਿ ਸਦ੍ਧਿਂ ਥੇਰਵਾਦੇਨ.

੫੭੮. ਕਾਯਂ ਵਿਵਰਿਤ੍ਵਾਤਿ ਜਤ੍ਤੁਮ੍ਪਿ ਉਰਮ੍ਪਿ ਵਿਵਰਿਤ੍ਵਾ. ਸੁਪ੍ਪਟਿਚ੍ਛਨ੍ਨੇਨਾਤਿ ਨ ਸਸੀਸਂ ਪਾਰੁਤੇਨ; ਅਥ ਖੋ ਗਣ੍ਠਿਕਂ ਪਟਿਮੁਞ੍ਚਿਤ੍ਵਾ ਅਨੁਵਾਤਨ੍ਤੇਨ ਗੀਵਂ ਪਟਿਚ੍ਛਾਦੇਤ੍ਵਾ ਉਭੋ ਕਣ੍ਣੇ ਸਮਂ ਕਤ੍ਵਾ ਪਟਿਸਂਹਰਿਤ੍ਵਾ ਯਾਵ ਮਣਿਬਨ੍ਧਂ ਪਟਿਚ੍ਛਾਦੇਤ੍ਵਾ ਅਨ੍ਤਰਘਰੇ ਗਨ੍ਤਬ੍ਬਂ. ਦੁਤਿਯਸਿਕ੍ਖਾਪਦੇ – ਗਲਵਾਟਕਤੋ ਪਟ੍ਠਾਯ ਸੀਸਂ ਮਣਿਬਨ੍ਧਤੋ ਪਟ੍ਠਾਯ ਹਤ੍ਥੇ ਪਿਣ੍ਡਿਕਮਂਸਤੋ ਚ ਪਟ੍ਠਾਯ ਪਾਦੇ ਵਿਵਰਿਤ੍ਵਾ ਨਿਸੀਦਿਤਬ੍ਬਂ.

੫੭੯. ਵਾਸੂਪਗਤਸ੍ਸਾਤਿ ਵਾਸਤ੍ਥਾਯ ਉਪਗਤਸ੍ਸ ਰਤ੍ਤਿਭਾਗੇ ਵਾ ਦਿਵਸਭਾਗੇ ਵਾ ਕਾਯਂ ਵਿਵਰਿਤ੍ਵਾਪਿ ਨਿਸੀਦਤੋ ਅਨਾਪਤ੍ਤਿ.

੫੮੦. ਸੁਸਂਵੁਤੋਤਿ ਹਤ੍ਥਂ ਵਾ ਪਾਦਂ ਵਾ ਅਕੀਲ਼ਾਪੇਨ੍ਤੋ; ਸੁਵਿਨੀਤੋਤਿ ਅਤ੍ਥੋ.

੫੮੨. ਓਕ੍ਖਿਤ੍ਤਚਕ੍ਖੂਤਿ ਹੇਟ੍ਠਾ ਖਿਤ੍ਤਚਕ੍ਖੁ ਹੁਤ੍ਵਾ. ਯੁਗਮਤ੍ਤਂ ਪੇਕ੍ਖਮਾਨੋਤਿ ਯੁਗਯੁਤ੍ਤਕੋ ਹਿ ਦਨ੍ਤੋ ਆਜਾਨੇਯ੍ਯੋ ਯੁਗਮਤ੍ਤਂ ਪੇਕ੍ਖਤਿ, ਪੁਰਤੋ ਚਤੁਹਤ੍ਥਪ੍ਪਮਾਣਂ ਭੂਮਿਭਾਗਂ; ਇਮਿਨਾਪਿ ਏਤ੍ਤਕਂ ਪੇਕ੍ਖਨ੍ਤੇਨ ਗਨ੍ਤਬ੍ਬਂ. ਯੋ ਅਨਾਦਰਿਯਂ ਪਟਿਚ੍ਚ ਤਹਂ ਤਹਂ ਓਲੋਕੇਨ੍ਤੋਤਿ ਯੋ ਤਂਤਂਦਿਸਾਭਾਗਂ ਪਾਸਾਦਂ ਕੂਟਾਗਾਰਂ ਵੀਥਿਂ ਓਲੋਕੇਨ੍ਤੋ ਗਚ੍ਛਤਿ, ਆਪਤ੍ਤਿ ਦੁਕ੍ਕਟਸ੍ਸ. ਏਕਸ੍ਮਿਂ ਪਨ ਠਾਨੇ ਠਤ੍ਵਾ ਹਤ੍ਥਿਅਸ੍ਸਾਦਿਪਰਿਸ੍ਸਯਾਭਾਵਂ ਓਲੋਕੇਤੁਂ ਵਟ੍ਟਤਿ. ਨਿਸੀਦਨ੍ਤੇਨਾਪਿ ਓਕ੍ਖਿਤ੍ਤਚਕ੍ਖੁਨਾਵ ਨਿਸੀਦਿਤਬ੍ਬਂ.

੫੮੪. ਉਕ੍ਖਿਤ੍ਤਕਾਯਾਤਿ ਉਕ੍ਖੇਪੇਨ; ਇਤ੍ਥਮ੍ਭੂਤਲਕ੍ਖਣੇ ਕਰਣਵਚਨਂ ਏਕਤੋ ਵਾ ਉਭਤੋ ਵਾ ਉਕ੍ਖਿਤ੍ਤਚੀਵਰੋ ਹੁਤ੍ਵਾਤਿ ਅਤ੍ਥੋ. ਅਨ੍ਤੋਇਨ੍ਦਖੀਲਤੋ ਪਟ੍ਠਾਯ ਨ ਏਵਂ ਗਨ੍ਤਬ੍ਬਂ. ਨਿਸਿਨ੍ਨਕਾਲੇ ਪਨ ਧਮਕਰਣਂ ਨੀਹਰਨ੍ਤੇਨਾਪਿ ਚੀਵਰਂ ਅਨੁਕ੍ਖਿਪਿਤ੍ਵਾਵ ਨੀਹਰਿਤਬ੍ਬਨ੍ਤਿ.

ਪਠਮੋ ਵਗ੍ਗੋ.