੯. ਪਣੀਤਭੋਜਨਸਿਕ੍ਖਾਪਦਵਣ੍ਣਨਾ

੨੫੭. ਨਵਮਸਿਕ੍ਖਾਪਦੇ – ਪਣੀਤਭੋਜਨਾਨੀਤਿ ਉਤ੍ਤਮਭੋਜਨਾਨਿ. ਕਸ੍ਸ ਸਮ੍ਪਨ੍ਨਂ ਨ ਮਨਾਪਨ੍ਤਿ ਸਮ੍ਪਤ੍ਤਿਯੁਤ੍ਤਂ ਕਸ੍ਸ ਨ ਪਿਯਂ. ਸਾਦੁਨ੍ਤਿ ਸੁਰਸਂ.

੨੫੯. ਯੋ ਪਨ ਭਿਕ੍ਖੁ ਏਵਰੂਪਾਨਿ ਪਣੀਤਭੋਜਨਾਨਿ ਅਗਿਲਾਨੋ ਅਤ੍ਤਨੋ ਅਤ੍ਥਾਯ ਵਿਞ੍ਞਾਪੇਤ੍ਵਾ ਭੁਞ੍ਜੇਯ੍ਯਾਤਿ ਏਤ੍ਥ ਸੁਦ੍ਧਾਨਿ ਸਪ੍ਪਿਆਦੀਨਿ ਵਿਞ੍ਞਾਪੇਤ੍ਵਾ ਭੁਞ੍ਜਨ੍ਤੋ ਪਾਚਿਤ੍ਤਿਯਂ ਨਾਪਜ੍ਜਤਿ, ਸੇਖਿਯੇਸੁ ਸੂਪੋਦਨਵਿਞ੍ਞਤ੍ਤਿਦੁਕ੍ਕਟਂ ਆਪਜ੍ਜਤਿ, ਓਦਨਸਂਸਟ੍ਠਾਨਿ ਪਨ ਵਿਞ੍ਞਾਪੇਤ੍ਵਾ ਭੁਞ੍ਜਨ੍ਤੋ ਪਾਚਿਤ੍ਤਿਯਂ ਆਪਜ੍ਜਤੀਤਿ ਵੇਦਿਤਬ੍ਬੋ, ਅਯਂ ਕਿਰੇਤ੍ਥ ਅਧਿਪ੍ਪਾਯੋ. ਤੇਨੇਵ ਚ ‘‘ਪਣੀਤਾਨੀ’’ਤਿ ਅਵਤ੍ਵਾ ‘‘ਪਣੀਤਭੋਜਨਾਨੀ’’ਤਿ ਸੁਤ੍ਤੇ ਵੁਤ੍ਤਂ. ‘‘ਪਣੀਤਾਨੀ’’ਤਿ ਹਿ ਵੁਤ੍ਤੇ ਸਪ੍ਪਿਆਦੀਨਂਯੇਵ ਗਹਣਂ ਹੋਤਿ, ‘‘ਪਣੀਤਭੋਜਨਾਨੀ’’ਤਿ ਵੁਤ੍ਤੇ ਪਨ ਪਣੀਤਸਂਸਟ੍ਠਾਨਿ ਸਤ੍ਤਧਞ੍ਞਨਿਬ੍ਬਤ੍ਤਾਨਿ ਭੋਜਨਾਨਿ ਪਣੀਤਭੋਜਨਾਨੀਤਿ ਅਯਮਤ੍ਥੋ ਪਞ੍ਞਾਯਤਿ.

ਇਦਾਨਿ ਵਿਞ੍ਞਾਪੇਤਿ ਪਯੋਗੇ ਦੁਕ੍ਕਟਨ੍ਤਿਆਦੀਸੁ ਅਯਂ ਵਿਨਿਚ੍ਛਯੋ – ‘‘ਸਪ੍ਪਿਨਾ ਭਤ੍ਤਂ ਦੇਹਿ, ਸਪ੍ਪਿਂ ਆਕਿਰਿਤ੍ਵਾ ਦੇਹਿ, ਸਪ੍ਪਿਮਿਸ੍ਸਕਂ ਕਤ੍ਵਾ ਦੇਹਿ, ਸਹਸਪ੍ਪਿਨਾ ਦੇਹਿ, ਸਪ੍ਪਿਞ੍ਚ ਭਤ੍ਤਞ੍ਚ ਦੇਹੀ’’ਤਿ ਵਿਞ੍ਞਾਪੇਨ੍ਤਸ੍ਸ ਵਿਞ੍ਞਤ੍ਤਿਯਾ ਦੁਕ੍ਕਟਂ, ਪਟਿਗ੍ਗਹਣੇ ਦੁਕ੍ਕਟਂ, ਅਜ੍ਝੋਹਾਰੇ ਪਾਚਿਤ੍ਤਿਯਂ. ‘‘ਸਪ੍ਪਿਭਤ੍ਤਂ ਦੇਹੀ’’ਤਿ ਵੁਤ੍ਤੇ ਪਨ ਯਸ੍ਮਾ ਸਾਲਿਭਤ੍ਤਂ ਵਿਯ ਸਪ੍ਪਿਭਤ੍ਤਂ ਨਾਮ ਨਤ੍ਥਿ; ਤਸ੍ਮਾ ਸੂਪੋਦਨਵਿਞ੍ਞਤ੍ਤਿਦੁਕ੍ਕਟਮੇਵ ਵੇਦਿਤਬ੍ਬਂ.

ਸਚੇ ਪਨ ‘‘ਸਪ੍ਪਿਨਾ ਭਤ੍ਤਂ ਦੇਹੀ’’ਤਿ ਵੁਤ੍ਤੇ ਭਤ੍ਤਂ ਦਤ੍ਵਾ ‘‘ਸਪ੍ਪਿਂ ਕਤ੍ਵਾ ਭੁਞ੍ਜਾ’’ਤਿ ਨਵਨੀਤਂ ਵਾ ਖੀਰਂ ਵਾ ਦਧਿਂ ਵਾ ਦੇਤਿ, ਮੂਲਂ ਵਾ ਪਨ ਦੇਤਿ, ‘‘ਇਮਿਨਾ ਸਪ੍ਪਿਂ ਗਹੇਤ੍ਵਾ ਭੁਞ੍ਜਾ’’ਤਿ ਯਥਾਵਤ੍ਥੁਕਮੇਵ. ‘‘ਗੋਸਪ੍ਪਿਨਾ ਭਤ੍ਤਂ ਦੇਹੀ’’ਤਿ ਵੁਤ੍ਤੇ ਪਨ ਗੋਸਪ੍ਪਿਨਾ ਵਾ ਦੇਤੁ, ਗੋਸਪ੍ਪਿਮ੍ਹਿ ਅਸਤਿ, ਪੁਰਿਮਨਯੇਨੇਵ ਗੋਨਵਨੀਤਾਦੀਨਿ ਵਾ ਗਾਵਿਂਯੇਵ ਵਾ ਦੇਤੁ ‘‘ਇਤੋ ਸਪ੍ਪਿਨਾ ਭੁਞ੍ਜਾ’’ਤਿ ਯਥਾਵਤ੍ਥੁਕਮੇਵ. ਸਚੇ ਪਨ ਗੋਸਪ੍ਪਿਨਾ ਯਾਚਿਤੋ ਅਜਿਯਾ ਸਪ੍ਪਿਆਦੀਹਿ ਦੇਤਿ, ਵਿਸਙ੍ਕੇਤਂ. ਏਵਞ੍ਹਿ ਸਤਿ ਅਞ੍ਞਂ ਯਾਚਿਤੇਨ ਅਞ੍ਞਂ ਦਿਨ੍ਨਂ ਨਾਮ ਹੋਤਿ, ਤਸ੍ਮਾ ਅਨਾਪਤ੍ਤਿ. ਏਸ ਨਯੋ ਅਜਿਯਾ ਸਪ੍ਪਿਨਾ ਦੇਹੀਤਿ ਆਦੀਸੁਪਿ.

‘‘ਕਪ੍ਪਿਯਸਪ੍ਪਿਨਾ ਦੇਹੀ’’ਤਿ ਵੁਤ੍ਤੇ ਅਕਪ੍ਪਿਯਸਪ੍ਪਿਨਾ ਦੇਤਿ, ਵਿਸਙ੍ਕੇਤਮੇਵ. ‘‘ਅਕਪ੍ਪਿਯਸਪ੍ਪਿਨਾਤਿ ਵੁਤ੍ਤੇ ਅਕਪ੍ਪਿਯਸਪ੍ਪਿਨਾ ਦੇਤਿ, ਪਟਿਗ੍ਗਹਣੇਪਿ ਪਰਿਭੋਗੇਪਿ ਦੁਕ੍ਕਟਮੇਵ. ਅਕਪ੍ਪਿਯਸਪ੍ਪਿਮ੍ਹਿ ਅਸਤਿ ਪੁਰਿਮਨਯੇਨੇਵ ਅਕਪ੍ਪਿਯਨਵਨੀਤਾਦੀਨਿ ਦੇਤਿ ‘‘ਸਪ੍ਪਿਂ ਕਤ੍ਵਾ ਭੁਞ੍ਜਾ’’ਤਿ ਅਕਪ੍ਪਿਯਸਪ੍ਪਿਨਾਵ ਦਿਨ੍ਨਂ ਹੋਤਿ. ‘‘ਅਕਪ੍ਪਿਯਸਪ੍ਪਿਨਾ’’ਤਿ ਵੁਤ੍ਤੇ ਕਪ੍ਪਿਯੇਨ ਦੇਤਿ, ਵਿਸਙ੍ਕੇਤਂ. ‘‘ਸਪ੍ਪਿਨਾ’’ਤਿ ਵੁਤ੍ਤੇ ਸੇਸੇਸੁ ਨਵਨੀਤਾਦੀਸੁ ਅਞ੍ਞਤਰੇਨ ਦੇਤਿ, ਵਿਸਙ੍ਕੇਤਮੇਵ. ਏਸ ਨਯੋ ਨਵਨੀਤੇਨ ਦੇਹੀਤਿਆਦੀਸੁਪਿ. ਯੇਨ ਯੇਨ ਹਿ ਵਿਞ੍ਞਤ੍ਤਿ ਹੋਤਿ, ਤਸ੍ਮਿਂ ਵਾ ਤਸ੍ਸ ਮੂਲੇ ਵਾ ਲਦ੍ਧੇ, ਤਂ ਤਂ ਲਦ੍ਧਮੇਵ ਹੋਤਿ.

ਸਚੇ ਪਨ ਅਞ੍ਞਂ ਪਾਲ਼ਿਯਾ ਆਗਤਂ ਵਾ ਅਨਾਗਤਂ ਵਾ ਦੇਨ੍ਤਿ, ਵਿਸਙ੍ਕੇਤਂ. ਪਾਲ਼ਿਯਂ ਆਗਤਨਵਨੀਤਾਦੀਨਿ ਠਪੇਤ੍ਵਾ ਅਞ੍ਞੇਹਿ ਨਵਨੀਤਾਦੀਹਿ ਵਿਞ੍ਞਾਪੇਨ੍ਤਸ੍ਸ ਦੁਕ੍ਕਟਂ. ਯਥਾ ਚ ‘‘ਸਪ੍ਪਿਭਤ੍ਤਂ ਦੇਹੀ’’ਤਿ ਵੁਤ੍ਤੇ ਸਾਲਿਭਤ੍ਤਸ੍ਸ ਵਿਯ ਸਪ੍ਪਿਭਤ੍ਤਸ੍ਸ ਅਭਾਵਾ ਸੂਪੋਦਨਵਿਞ੍ਞਤ੍ਤਿਦੁਕ੍ਕਟਮੇਵ ਹੋਤੀਤਿ ਵੁਤ੍ਤਂ. ਏਵਂ ਨਵਨੀਤਭਤ੍ਤਂ ਦੇਹੀਤਿਆਦੀਸੁਪਿ. ਪਟਿਪਾਟਿਯਾ ਏਕਮੇਕਂ ਵਿਤ੍ਥਾਰੇਤ੍ਵਾ ਵੁਚ੍ਚਮਾਨੇਪਿ ਹਿ ਅਯਮੇਵਤ੍ਥੋ ਵਤ੍ਤਬ੍ਬੋ ਸਿਯਾ, ਸੋ ਚ ਸਙ੍ਖੇਪੇਨਪਿ ਸਕ੍ਕਾ ਞਾਤੁਂ, ਕਿਂ ਤਤ੍ਥ ਵਿਤ੍ਥਾਰੇਨ? ਤੇਨ ਵੁਤ੍ਤਂ – ‘‘ਏਸ ਨਯੋ ਨਵਨੀਤੇਨ ਦੇਹੀਤਿਆਦੀਸੁਪੀ’’ਤਿ.

ਸਚੇ ਪਨ ਸਬ੍ਬੇਹਿਪਿ ਸਪ੍ਪਿਆਦੀਹਿ ਏਕਟ੍ਠਾਨੇ ਵਾ ਨਾਨਾਟ੍ਠਾਨੇ ਵਾ ਵਿਞ੍ਞਾਪੇਤ੍ਵਾ ਪਟਿਲਦ੍ਧਂ ਏਕਭਾਜਨੇ ਆਕਿਰਿਤ੍ਵਾ ਏਕਰਸਂ ਕਤ੍ਵਾ ਤਤੋ ਕੁਸਗ੍ਗੇਨਾਪਿ ਜਿਵ੍ਹਗ੍ਗੇ ਬਿਨ੍ਦੁਂ ਠਪੇਤ੍ਵਾ ਅਜ੍ਝੋਹਰਤਿ, ਨਵ ਪਾਚਿਤ੍ਤਿਯਾਨਿ ਆਪਜ੍ਜਤਿ. ਵੁਤ੍ਤਮ੍ਪਿ ਚੇਤਂ ਪਰਿਵਾਰੇ –

‘‘ਕਾਯਿਕਾਨਿ ਨ ਵਾਚਸਿਕਾਨਿ,

ਸਬ੍ਬਾਨਿ ਨਾਨਾਵਤ੍ਥੁਕਾਨਿ;

ਅਪੁਬ੍ਬਂ ਅਚਰਿਮਂ ਆਪਜ੍ਜੇਯ੍ਯ ਏਕਤੋ,

ਪਞ੍ਹਾਮੇਸਾ ਕੁਸਲੇਹਿ ਚਿਨ੍ਤਿਤਾ’’ਤਿ. (ਪਰਿ. ੪੮੧);

੨੬੧. ਅਗਿਲਾਨੋ ਗਿਲਾਨਸਞ੍ਞੀਤਿ ਏਤ੍ਥ ਸਚੇ ਗਿਲਾਨਸਞ੍ਞੀਪਿ ਹੁਤ੍ਵਾ ਭੇਸਜ੍ਜਤ੍ਥਾਯ ਪਞ੍ਚ ਭੇਸਜ੍ਜਾਨਿ ਵਿਞ੍ਞਾਪੇਤਿ, ਮਹਾਨਾਮਸਿਕ੍ਖਾਪਦੇਨ ਕਾਰੇਤਬ੍ਬੋ. ਨਵ ਪਣੀਤਭੋਜਨਾਨਿ ਵਿਞ੍ਞਾਪੇਨ੍ਤੋ ਪਨ ਇਮਿਨਾ ਸਿਕ੍ਖਾਪਦੇਨ ਕਾਰੇਤਬ੍ਬੋ. ਭਿਕ੍ਖੁਨੀਨਂ ਪਨ ਏਤਾਨਿ ਪਾਟਿਦੇਸਨੀਯਵਤ੍ਥੂਨਿ ਹੋਨ੍ਤਿ, ਸੂਪੋਦਨਵਿਞ੍ਞਤ੍ਤਿਯਂ ਉਭਯੇਸਮ੍ਪਿ ਸੇਖਪਣ੍ਣਤ੍ਤਿਦੁਕ੍ਕਟਮੇਵ. ਸੇਸਮੇਤ੍ਥ ਉਤ੍ਤਾਨਮੇਵ.

ਚਤੁਸਮੁਟ੍ਠਾਨਂ – ਕਾਯਤੋ ਕਾਯਵਾਚਤੋ ਕਾਯਚਿਤ੍ਤਤੋ ਕਾਯਵਾਚਾਚਿਤ੍ਤਤੋ ਚ ਸਮੁਟ੍ਠਾਤਿ,

ਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤਿਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਪਣੀਤਭੋਜਨਸਿਕ੍ਖਾਪਦਂ ਨਵਮਂ.