੭. ਵਿਕਾਲਭੋਜਨਸਿਕ੍ਖਾਪਦਵਣ੍ਣਨਾ

੨੪੭. ਸਤ੍ਤਮਸਿਕ੍ਖਾਪਦੇ – ਗਿਰਗ੍ਗਸਮਜ੍ਜੋਤਿ ਗਿਰਿਮ੍ਹਿ ਅਗ੍ਗਸਮਜ੍ਜੋ, ਗਿਰਿਸ੍ਸ ਵਾ ਅਗ੍ਗਦੇਸੇ ਸਮਜ੍ਜੋ. ਸੋ ਕਿਰ ਸਤ੍ਤਮੇ ਦਿਵਸੇ ਭਵਿਸ੍ਸਤੀਤਿ ਨਗਰੇ ਘੋਸਨਾ ਕਰਿਯਤਿ, ਨਗਰਸ੍ਸ ਬਹਿਦ੍ਧਾ ਸਮੇ ਭੂਮਿਭਾਗੇ ਪਬ੍ਬਤਚ੍ਛਾਯਾਯ ਮਹਾਜਨਕਾਯੋ ਸਨ੍ਨਿਪਤਤਿ, ਅਨੇਕਪ੍ਪਕਾਰਾਨਿ ਨਟਨਾਟਕਾਨਿ ਪਵਤ੍ਤਨ੍ਤਿ, ਤੇਸਂ ਦਸ੍ਸਨਤ੍ਥਂ ਮਞ੍ਚਾਤਿਮਞ੍ਚੇ ਬਨ੍ਧਨ੍ਤਿ. ਸਤ੍ਤਰਸਵਗ੍ਗਿਯਾ ਅਪਞ੍ਞਤ੍ਤੇ ਸਿਕ੍ਖਾਪਦੇ ਦਹਰਾਵ ਉਪਸਮ੍ਪਨ੍ਨਾ, ਤੇ ‘‘ਨਾਟਕਾਨਿ ਆਵੁਸੋ ਪਸ੍ਸਿਸ੍ਸਾਮਾ’’ਤਿ ਤਤ੍ਥ ਅਗਮਂਸੁ. ਅਥ ਨੇਸਂ ਞਾਤਕਾ ‘‘ਅਮ੍ਹਾਕਂ ਅਯ੍ਯਾ ਆਗਤਾ’’ਤਿ ਤੁਟ੍ਠਚਿਤ੍ਤਾ ਨ੍ਹਾਪੇਤ੍ਵਾ ਵਿਲਿਮ੍ਪੇਤ੍ਵਾ ਭੋਜੇਤ੍ਵਾ ਅਞ੍ਞਮ੍ਪਿ ਪੂਵਖਾਦਨੀਯਾਦਿਂ ਹਤ੍ਥੇ ਅਦਂਸੁ. ਤੇ ਸਨ੍ਧਾਯ ਵੁਤ੍ਤਂ – ‘‘ਮਨੁਸ੍ਸਾ ਸਤ੍ਤਰਸਵਗ੍ਗਿਯੇ ਭਿਕ੍ਖੂ ਪਸ੍ਸਿਤ੍ਵਾ’’ਤਿਆਦਿ.

੨੪੮-੯. ਵਿਕਾਲੇਤਿ ਵਿਗਤੇ ਕਾਲੇ. ਕਾਲੋਤਿ ਭਿਕ੍ਖੂਨਂ ਭੋਜਨਕਾਲੋ ਅਧਿਪ੍ਪੇਤੋ, ਸੋ ਚ ਸਬ੍ਬਨ੍ਤਿਮੇਨ ਪਰਿਚ੍ਛੇਦੇਨ ਮਜ੍ਝਨ੍ਹਿਕੋ, ਤਸ੍ਮਿਂ ਵੀਤਿਵਤ੍ਤੇਤਿ ਅਧਿਪ੍ਪਾਯੋ. ਤੇਨੇਵਸ੍ਸ ਪਦਭਾਜਨੇ ‘‘ਵਿਕਾਲੋ ਨਾਮ ਮਜ੍ਝਨ੍ਹਿਕੇ ਵੀਤਿਵਤ੍ਤੇ ਯਾਵ ਅਰੁਣੁਗ੍ਗਮਨਾ’’ਤਿ ਵੁਤ੍ਤਂ, ਠਿਤਮਜ੍ਝਨ੍ਹਿਕੋਪਿ ਕਾਲਸਙ੍ਗਹਂ ਗਚ੍ਛਤਿ. ਤਤੋ ਪਟ੍ਠਾਯ ਪਨ ਖਾਦਿਤੁਂ ਵਾ ਭੁਞ੍ਜਿਤੁਂ ਵਾ ਨ ਸਕ੍ਕਾ, ਸਹਸਾ ਪਿਵਿਤੁਂ ਸਕ੍ਕਾ ਭਵੇਯ੍ਯ, ਕੁਕ੍ਕੁਚ੍ਚਕੇਨ ਪਨ ਨ ਕਤ੍ਤਬ੍ਬਂ. ਕਾਲਪਰਿਚ੍ਛੇਦਜਾਨਨਤ੍ਥਞ੍ਚ ਕਾਲਤ੍ਥਮ੍ਭੋ ਯੋਜੇਤਬ੍ਬੋ, ਕਾਲਨ੍ਤਰੇਵ ਭਤ੍ਤਕਿਚ੍ਚਂ ਕਾਤਬ੍ਬਂ.

ਅਵਸੇਸਂ ਖਾਦਨੀਯਂ ਨਾਮਾਤਿ ਏਤ੍ਥ ਯਂ ਤਾਵ ਸਕ੍ਖਲਿਮੋਦਕਾਦਿਪੁਬ੍ਬਣ੍ਣਾਪਰਣ੍ਣਮਯਂ, ਤਤ੍ਥ ਵਤ੍ਤਬ੍ਬਮੇਵ ਨਤ੍ਥਿ. ਯਮ੍ਪਿ ਵਨਮੂਲਾਦਿਪ੍ਪਭੇਦਂ ਆਮਿਸਗਤਿਕਂ ਹੋਤਿ, ਸੇਯ੍ਯਥਿਦਂ – ਮੂਲਖਾਦਨੀਯਂ ਕਨ੍ਦਖਾਦਨੀਯਂ ਮੂਲ਼ਾਲਖਾਦਨੀਯਂ ਮਤ੍ਥਕਖਾਦਨੀਯਂ ਖਨ੍ਧਖਾਦਨੀਯਂ ਤਚਖਾਦਨੀਯਂ ਪਤ੍ਤਖਾਦਨੀਯਂ ਪੁਪ੍ਫਖਾਦਨੀਯਂ ਫਲਖਾਦਨੀਯਂ ਅਟ੍ਠਿਖਾਦਨੀਯਂ ਪਿਟ੍ਠਖਾਦਨੀਯਂ ਨਿਯ੍ਯਾਸਖਾਦਨੀਯਨ੍ਤਿ, ਇਦਮ੍ਪਿ ਖਾਦਨੀਯਸਙ੍ਖ੍ਯਮੇਵ ਗਚ੍ਛਤਿ.

ਤਤ੍ਥ ਪਨ ਆਮਿਸਗਤਿਕਸਲ੍ਲਕ੍ਖਣਤ੍ਥਂ ਇਦਂ ਮੁਖਮਤ੍ਤਨਿਦਸ੍ਸਨਂ – ਮੂਲਖਾਦਨੀਯੇ ਤਾਵ ਮੂਲਕਮੂਲਂ ਖਾਰਕਮੂਲਂ ਚਚ੍ਚੁਮੂਲਂ ਤਮ੍ਬਕਮੂਲਂ ਤਣ੍ਡੁਲੇਯ੍ਯਕਮੂਲਂ ਵਤ੍ਥੁਲੇਯ੍ਯਕਮੂਲਂ ਵਜਕਲਿਮੂਲਂ ਜਜ੍ਝਰੀਮੂਲਨ੍ਤਿ ਏਵਮਾਦੀਨਿ ਸੂਪੇਯ੍ਯਪਣ੍ਣਮੂਲਾਨਿ ਆਮਿਸਗਤਿਕਾਨਿ. ਏਤ੍ਥ ਚ ਵਜਕਲਿਮੂਲੇ ਜਰਟ੍ਠਂ ਛਿਨ੍ਦਿਤ੍ਵਾ ਛਡ੍ਡੇਨ੍ਤਿ, ਤਂ ਯਾਵਜੀਵਿਕਂ ਹੋਤਿ. ਅਞ੍ਞਮ੍ਪਿ ਏਵਰੂਪਂ ਏਤੇਨੇਵ ਨਯੇਨ ਵੇਦਿਤਬ੍ਬਂ. ਮੂਲਕਖਾਰਕਜਜ੍ਝਰੀਮੂਲਾਨਂ ਪਨ ਜਰਟ੍ਠਾਨਿਪਿ ਆਮਿਸਗਤਿਕਾਨੇਵਾਤਿ ਵੁਤ੍ਤਂ. ਯਾਨਿ ਪਨ ਪਾਲ਼ਿਯਂ –

‘‘ਅਨੁਜਾਨਾਮਿ, ਭਿਕ੍ਖਵੇ, ਮੂਲਾਨਿ ਭੇਸਜ੍ਜਾਨਿ ਹਲਿਦ੍ਦਿਂ ਸਿਙ੍ਗਿਵੇਰਂ ਵਚਂ ਵਚਤ੍ਤਂ ਅਤਿਵਿਸਂ ਕਟੁਕਰੋਹਿਣਿਂ ਉਸੀਰਂ ਭਦ੍ਦਮੁਤ੍ਤਕਂ, ਯਾਨਿ ਵਾ ਪਨਞ੍ਞਾਨਿਪਿ ਅਤ੍ਥਿ ਮੂਲਾਨਿ ਭੇਸਜ੍ਜਾਨਿ ਨੇਵ ਖਾਦਨੀਯੇ ਖਾਦਨੀਯਤ੍ਥਂ ਫਰਨ੍ਤਿ, ਨ ਭੋਜਨੀਯੇ ਭੋਜਨੀਯਤ੍ਥਂ ਫਰਨ੍ਤੀ’’ਤਿ (ਮਹਾਵ. ੨੬੩) –

ਵੁਤ੍ਤਾਨਿ, ਤਾਨਿ ਯਾਵਜੀਵਿਕਾਨਿ. ਤੇਸਂ ਚੂਲ਼ਪਞ੍ਚਮੂਲਂ ਮਹਾਪਞ੍ਚਮੂਲਨ੍ਤਿਆਦਿਨਾ ਨਯੇਨ ਗਣਿਯਮਾਨਾਨਂ ਗਣਨਾਯ ਅਨ੍ਤੋ ਨਤ੍ਥਿ. ਖਾਦਨੀਯਤ੍ਥਂ ਭੋਜਨੀਯਤ੍ਥਞ੍ਚ ਫਰਣਾਭਾਵੋਯੇਵ ਪਨ ਤੇਸਂ ਲਕ੍ਖਣਂ. ਤਸ੍ਮਾ ਯਂਕਿਞ੍ਚਿ ਮੂਲਂ ਤੇਸੁ ਤੇਸੁ ਜਨਪਦੇਸੁ ਪਕਤਿਆਹਾਰਵਸੇਨ ਮਨੁਸ੍ਸਾਨਂ ਖਾਦਨੀਯਤ੍ਥਂ ਭੋਜਨੀਯਤ੍ਥਞ੍ਚ ਫਰਤਿ, ਤਂ ਯਾਵਕਾਲਿਕਂ; ਇਤਰਂ ਯਾਵਜੀਵਿਕਨ੍ਤਿ ਵੇਦਿਤਬ੍ਬਂ. ਤੇਸੁ ਬਹੁਂ ਵਤ੍ਵਾਪਿ ਹਿ ਇਮਸ੍ਮਿਂਯੇਵ ਲਕ੍ਖਣੇ ਠਾਤਬ੍ਬਂ. ਨਾਮਸਞ੍ਞਾਸੁ ਪਨ ਵੁਚ੍ਚਮਾਨਾਸੁ ਤਂ ਤਂ ਨਾਮਂ ਅਜਾਨਨ੍ਤਾਨਂ ਸਮ੍ਮੋਹੋਯੇਵ ਹੋਤਿ, ਤਸ੍ਮਾ ਨਾਮਸਞ੍ਞਾਯ ਆਦਰਂ ਅਕਤ੍ਵਾ ਲਕ੍ਖਣਮੇਵ ਦਸ੍ਸਿਤਂ.

ਯਥਾ ਚ ਮੂਲੇ; ਏਵਂ ਕਨ੍ਦਾਦੀਸੁਪਿ ਯਂ ਲਕ੍ਖਣਂ ਦਸ੍ਸਿਤਂ, ਤਸ੍ਸੇਵ ਵਸੇਨ ਵਿਨਿਚ੍ਛਯੋ ਵੇਦਿਤਬ੍ਬੋ. ਯਞ੍ਚ ਤਂ ਪਾਲ਼ਿਯਂ ਹਲਿਦ੍ਦਾਦਿ ਅਟ੍ਠਵਿਧਂ ਵੁਤ੍ਤਂ, ਤਸ੍ਸ ਖਨ੍ਧਤਚਪੁਪ੍ਫਫਲਮ੍ਪਿ ਸਬ੍ਬਂ ਯਾਵਜੀਵਿਕਨ੍ਤਿ ਵੁਤ੍ਤਂ.

ਕਨ੍ਦਖਾਦਨੀਯੇ ਦੁਵਿਧੋ ਕਨ੍ਦੋ – ਦੀਘੋ ਚ ਰਸ੍ਸੋ ਚ ਭਿਸਕਿਂਸੁਕਕਨ੍ਦਾਦਿ ਵਟ੍ਟੋ ਉਪ੍ਪਲਕਸੇਰੁਕਕਨ੍ਦਾਦਿ, ਯਂ ‘‘ਗਣ੍ਠੀ’’ਤਿਪਿ ਵਦਨ੍ਤਿ. ਤਤ੍ਥ ਸਬ੍ਬੇਸਂ ਕਨ੍ਦਾਨਂ ਜਿਣ੍ਣਜਰਟ੍ਠਾਨਞ੍ਚ ਛਲ੍ਲਿ ਚ ਸੁਖੁਮਮੂਲਾਨਿ ਚ ਯਾਵਜੀਵਿਕਾਨਿ. ਤਰੁਣੋ ਪਨ ਸੁਖਖਾਦਨੀਯੋ, ਸਾਲਕਲ੍ਯਾਣੀਪੋਤਕਕਨ੍ਦੋ ਕਿਂਸੁਕਪੋਤਕਕਨ੍ਦੋ ਅਮ੍ਬਾਟਕਕਨ੍ਦੋ ਕੇਤਕਕਨ੍ਦੋ ਮਾਲੁਵਕਨ੍ਦੋ ਭਿਸਸਙ੍ਖਾਤੋ ਪਦੁਮਪੁਣ੍ਡਰੀਕਕਨ੍ਦੋ ਪਿਣ੍ਡਾਲੁਮਸਾਲੁਆਦਯੋ ਚ ਖੀਰਵਲ੍ਲਿਕਨ੍ਦੋ ਆਲੁਵਕਨ੍ਦੋ ਸਿਗ੍ਗੁਕਨ੍ਦੋ ਤਾਲਕਨ੍ਦੋ ਨੀਲੁਪ੍ਪਲਰਤ੍ਤੁਪ੍ਪਲਕੁਮੁਦਸੋਗਨ੍ਧਿਕਾਨਂ ਕਨ੍ਦਾ ਕਦਲਿਕਨ੍ਦੋ ਵੇਲ਼ੁਕਨ੍ਦੋ ਕਸੇਰੁਕਕਨ੍ਦੋਤਿ ਏਵਮਾਦਯੋ ਤੇਸੁ ਤੇਸੁ ਜਨਪਦੇਸੁ ਪਕਤਿਆਹਾਰਵਸੇਨ ਮਨੁਸ੍ਸਾਨਂ ਖਾਦਨੀਯਤ੍ਥਞ੍ਚ ਭੋਜਨੀਯਤ੍ਥਞ੍ਚ ਫਰਣਕਕਨ੍ਦਾ ਯਾਵਕਾਲਿਕਾ.

ਖੀਰਵਲ੍ਲਿਕਨ੍ਦੋ ਅਧੋਤੋ ਯਾਵਜੀਵਿਕੋ, ਧੋਤੋ ਯਾਵਕਾਲਿਕੋ. ਖੀਰਕਾਕੋਲੀਜੀਵਿਕਉਸਭਕਲਸੁਣਾਦਿਕਨ੍ਦਾ ਪਨ ਯਾਵਜੀਵਿਕਾ. ਤੇ ਪਾਲ਼ਿਯਂ – ‘‘ਯਾਨਿ ਵਾ ਪਨਞ੍ਞਾਨਿਪਿ ਅਤ੍ਥਿ ਮੂਲਾਨਿ ਭੇਸਜ੍ਜਾਨੀ’’ਤਿ ਏਵਂ ਮੂਲਭੇਸਜ੍ਜਸਙ੍ਗਹੇਨੇਵ ਸਙ੍ਗਹਿਤਾ.

ਮੂਲ਼ਾਲਖਾਦਨੀਯੇ ਪਨ ਪਦੁਮਮੂਲ਼ਾਲਂ ਪੁਣ੍ਡਰੀਕਮੁਲ਼ਾਲਸਦਿਸਮੇਵ. ਏਰਕਮੂਲਂ ਕਨ੍ਦੁਲਮੂਲਨ੍ਤਿ ਏਵਮਾਦਿ ਤੇਸੁ ਤੇਸੁ ਜਨਪਦੇਸੁ ਪਕਤਿਆਹਾਰਵਸੇਨ ਮਨੁਸ੍ਸਾਨਂ ਖਾਦਨੀਯਤ੍ਥਞ੍ਚ ਭੋਜਨੀਯਤ੍ਥਞ੍ਚ ਫਰਣਕਮੁਲ਼ਾਲਂ ਯਾਵਕਾਲਿਕਂ. ਹਲਿਦ੍ਦਿਸਿਙ੍ਗਿਵੇਰਮਕਚਿਚਤੁਰਸ੍ਸਵਲ੍ਲਿਕੇਤਕਤਾਲਹਿਨ੍ਤਾਲਕੁਨ੍ਤਾਲਨਾਲ਼ਿਕੇਰਪੂਗਰੁਕ੍ਖਾਦਿਮੁਲ਼ਾਲਂ ਪਨ ਯਾਵਜੀਵਿਕਂ, ਤਂ ਸਬ੍ਬਮ੍ਪਿ ਪਾਲ਼ਿਯਂ – ‘‘ਯਾਨਿ ਵਾ ਪਨਞ੍ਞਾਨਿਪਿ ਅਤ੍ਥਿ ਮੂਲਾਨਿ ਭੇਸਜ੍ਜਾਨੀ’’ਤਿ (ਮਹਾਵ. ੨੬੩) ਏਵਂ ਮੂਲਭੇਸਜ੍ਜਸਙ੍ਗਹੇਨੇਵ ਸਙ੍ਗਹਿਤਂ.

ਮਤ੍ਥਕਖਾਦਨੀਯੇ ਤਾਲਹਿਨ੍ਤਾਲਕੁਨ੍ਤਾਲਕੇਤਕਨਾਲ਼ਿਕੇਰਪੂਗਰੁਕ੍ਖਖਜ੍ਜੂਰੀਵੇਤ੍ਤਏਰਕਕਦਲੀਨਂ ਕਲ਼ੀਰਸਙ੍ਖਾਤਾ ਮਤ੍ਥਕਾ ਵੇਣੁਕਲ਼ੀਰੋ ਨਲ਼ਕਲ਼ੀਰੋ ਉਚ੍ਛੁਕਲ਼ੀਰੋ ਮੂਲਕਕਲ਼ੀਰੋ ਸਾਸਪਕਲ਼ੀਰੋ ਸਤਾਵਰਿਕਲ਼ੀਰੋ ਸਤ੍ਤਨ੍ਨਂ ਧਞ੍ਞਾਨਂ ਕਲ਼ੀਰਾਤਿ ਏਵਮਾਦਿ ਤੇਸੁ ਤੇਸੁ ਜਨਪਦੇਸੁ ਪਕਤਿਆਹਾਰਵਸੇਨ ਮਨੁਸ੍ਸਾਨਂ ਖਾਦਨੀਯਤ੍ਥਂ ਭੋਜਨੀਯਤ੍ਥਞ੍ਚ ਫਰਣਕੋ ਰੁਕ੍ਖਵਲ੍ਲਿਆਦੀਨਂ ਮਤ੍ਥਕੋ ਯਾਵਕਾਲਿਕੋ. ਹਲਿਦ੍ਦਿਸਿਙ੍ਗਿਵੇਰਵਚਮਕਚਿਲਸੁਣਾਨਂਕਲ਼ੀਰਾ ਤਾਲਹਿਨ੍ਤਾਲਕੁਨ੍ਤਾਲਨਾਲ਼ਿਕੇਰਕਲ਼ੀਰਾਨਞ੍ਚ ਛਿਨ੍ਦਿਤ੍ਵਾ ਪਾਤਿਤੋ ਜਰਟ੍ਠਬੁਨ੍ਦੋ ਯਾਵਜੀਵਿਕੋ.

ਖਨ੍ਧਖਾਦਨੀਯੇ ਅਨ੍ਤੋਪਥਵੀਗਤੋ ਸਾਲਕਲ੍ਯਾਣੀਖਨ੍ਧੋ ਉਚ੍ਛੁਖਨ੍ਧੋ ਨੀਲੁਪ੍ਪਲਰਤ੍ਤੁਪ੍ਪਲਕੁਮੁਦਸੋਗਨ੍ਧਿਕਾਨਂ ਖਨ੍ਧਕਾਤਿ ਏਵਮਾਦਿ ਤੇਸੁ ਤੇਸੁ ਜਨਪਦੇਸੁ ਪਕਤਿਆਹਾਰਵਸੇਨ ਮਨੁਸ੍ਸਾਨਂ ਖਾਦਨੀਯਤ੍ਥਂ ਭੋਜਨੀਯਤ੍ਥਞ੍ਚ ਫਰਣਕੋ ਖਨ੍ਧੋ ਯਾਵਕਾਲਿਕੋ. ਉਪ੍ਪਲਜਾਤੀਨਂ ਪਣ੍ਣਦਣ੍ਡਕੋ ਪਦੁਮਜਾਤੀਨਂ ਸਬ੍ਬੋਪਿ ਦਣ੍ਡਕੋ ਕਾਰਵਿਨ੍ਦਕਦਣ੍ਡਾਦਯੋ ਚ ਅਵਸੇਸਸਬ੍ਬਖਨ੍ਧਾ ਯਾਵਜੀਵਿਕਾ.

ਤਚਖਾਦਨੀਯੇ ਉਚ੍ਛੁਤਚੋਵ ਏਕੋ ਯਾਵਕਾਲਿਕੋ, ਸੋਪਿ ਸਰਸੋ. ਸੇਸੋ ਸਬ੍ਬੋ ਯਾਵਜੀਵਿਕੋ. ਤੇਸਂ ਪਨ ਮਤ੍ਥਕਖਨ੍ਧਤਚਾਨਂ ਤਿਣ੍ਣਂ ਪਾਲ਼ਿਯਂ ਕਸਾਵਭੇਸਜ੍ਜੇਨ ਸਙ੍ਗਹੋ ਵੇਦਿਤਬ੍ਬੋ. ਵੁਤ੍ਤਞ੍ਹੇਤਂ –

‘‘ਅਨੁਜਾਨਾਮਿ, ਭਿਕ੍ਖਵੇ, ਕਸਾਵਾਨਿ ਭੇਸਜ੍ਜਾਨਿ ਨਿਮ੍ਬਕਸਾਵਂ, ਕੁਟਜਕਸਾਵਂ, ਪਟੋਲਕਸਾਵਂ, ਫਗ੍ਗਵਕਸਾਵਂ ਨਤ੍ਤਮਾਲਕਸਾਵਂ, ਯਾਨਿ ਵਾ ਪਨਞ੍ਞਾਨਿਪਿ ਅਤ੍ਥਿ ਕਸਾਵਾਨਿ ਭੇਸਜ੍ਜਾਨਿ ਨੇਵ ਖਾਦਨੀਯੇ ਖਾਦਨੀਯਤ੍ਥਂ ਫਰਨ੍ਤਿ, ਨ ਭੋਜਨੀਯੇ ਭੋਜਨੀਯਤ੍ਥਂ ਫਰਨ੍ਤੀ’’ਤਿ (ਮਹਾਵ. ੨੬੩).

ਏਤ੍ਥ ਹਿ ਏਤੇਸਮ੍ਪਿ ਸਙ੍ਗਹੋ ਸਿਜ੍ਝਤਿ. ਵੁਤ੍ਤਕਸਾਵਾਨਿ ਚ ਸਬ੍ਬਾਨਿ ਕਪ੍ਪਿਯਾਨੀਤਿ ਵੇਦਿਤਬ੍ਬਾਨਿ.

ਪਤ੍ਤਖਾਦਨੀਯੇ ਮੂਲਕਂ ਖਾਰਕੋ ਚਚ੍ਚੁ ਤਮ੍ਬਕੋ ਤਣ੍ਡੁਲੇਯ੍ਯਕੋ ਪਪੁਨ੍ਨਾਗੋ ਵਤ੍ਥੁਲੇਯ੍ਯਕੋ ਵਜਕਲਿ ਜਜ੍ਝਰੀ ਸੇਲ੍ਲੁ ਸਿਗ੍ਗੁ ਕਾਸਮਦ੍ਦਕੋ ਉਮ੍ਮਾ ਚੀਨਮੁਗ੍ਗੋ ਮਾਸੋ ਰਾਜਮਾਸੋ ਠਪੇਤ੍ਵਾ ਮਹਾਨਿਪ੍ਫਾਵਂ ਅਵਸੇਸਨਿਪ੍ਫਾਵੋ ਅਗ੍ਗਿਮਨ੍ਥੋ ਸੁਨਿਸਨ੍ਨਕੋ ਸੇਤਵਰਣੋ ਨਾਲ਼ਿਕਾ ਭੂਮਿਯਂ ਜਾਤਲੋਣੀਤਿ ਏਤੇਸਂ ਪਤ੍ਤਾਨਿ ਅਞ੍ਞਾਨਿ ਚ ਏਵਰੂਪਾਨਿ ਤੇਸੁ ਤੇਸੁ ਜਨਪਦੇਸੁ ਪਕਤਿਆਹਾਰਵਸੇਨ ਮਨੁਸ੍ਸਾਨਂ ਖਾਦਨੀਯਤ੍ਥਂ ਭੋਜਨੀਯਤ੍ਥਞ੍ਚ ਫਰਣਕਾਨਿ ਪਤ੍ਤਾਨਿ ਏਕਂਸੇਨ ਯਾਵਕਾਲਿਕਾਨਿ. ਯਾ ਪਨਞ੍ਞਾ ਮਹਾਨਖਪਿਟ੍ਠਿਮਤ੍ਤਾ ਪਣ੍ਣਲੋਣਿ ਰੁਕ੍ਖੇ ਚ ਗਚ੍ਛੇ ਚ ਆਰੋਹਤਿ, ਤਸ੍ਸਾ ਪਤ੍ਤਂ ਯਾਵਜੀਵਿਕਂ. ਬ੍ਰਹ੍ਮੀਪਤ੍ਤਞ੍ਚ ਯਾਵਕਾਲਿਕਨ੍ਤਿ ਦੀਪਵਾਸਿਨੋ ਵਦਨ੍ਤਿ. ਅਮ੍ਬਪਲ੍ਲਵਂ ਯਾਵਕਾਲਿਕਂ, ਅਸੋਕਪਲ੍ਲਵਂ ਪਨ ਯਾਵਜੀਵਿਕਂ.

ਯਾਨਿ ਵਾ ਪਨਞ੍ਞਾਨਿ ਪਾਲ਼ਿਯਂ –

‘‘ਅਨੁਜਾਨਾਮਿ, ਭਿਕ੍ਖਵੇ, ਪਣ੍ਣਾਨਿ ਭੇਸਜ੍ਜਾਨਿ ਨਿਮ੍ਬਪਣ੍ਣਂ ਕੁਟਜਪਣ੍ਣਂ ਪਟੋਲਪਣ੍ਣਂ ਸੁਲਸਿਪਣ੍ਣਂ ਕਪ੍ਪਾਸਕਪਣ੍ਣਂ ਯਾਨਿ ਵਾ ਪਨਞ੍ਞਾਨਿਪਿ ਅਤ੍ਥਿ ਪਣ੍ਣਾਨਿ ਭੇਸਜ੍ਜਾਨਿ ਨੇਵ ਖਾਦਨੀਯੇ ਖਾਦਨੀਯਤ੍ਥਂ ਫਰਨ੍ਤਿ ਨ ਭੋਜਨੀਯੇ ਭੋਜਨੀਯਤ੍ਥਂ ਫਰਨ੍ਤੀ’’ਤਿ (ਮਹਾਵ. ੨੬੩) –

ਵੁਤ੍ਤਾਨਿ, ਤਾਨਿ ਯਾਵਜੀਵਿਕਾਨਿ. ਨ ਕੇਵਲਞ੍ਚ ਪਣ੍ਣਾਨਿਯੇਵ ਤੇਸਂ ਪੁਪ੍ਫਫਲਾਦੀਨਿਪਿ ਯਾਵਜੀਵਿਕਾਨਿ. ਪਣ੍ਣਾਨਂ ਫਗ੍ਗਵਪਣ੍ਣਂ ਅਜ੍ਜੁਕਪਣ੍ਣਂ ਫਣਿਜ੍ਜਕਪਣ੍ਣਂ ਪਟੋਲਪਣ੍ਣਂ ਤਮ੍ਬੂਲਪਣ੍ਣਂ ਪਦੁਮਿਨਿਪਣ੍ਣਨ੍ਤਿ ਏਵਂ ਗਣਨਵਸੇਨ ਅਨ੍ਤੋ ਨਤ੍ਥਿ.

ਪੁਪ੍ਫਖਾਦਨੀਯੇ ਮੂਲਕਪੁਪ੍ਫਂ ਖਾਰਕਪੁਪ੍ਫਂ ਚਚ੍ਚੁਪੁਪ੍ਫਂ ਤਮ੍ਬਕਪੁਪ੍ਫਂ ਵਜਕਲਿਪੁਪ੍ਫਂ ਜਜ੍ਝਰੀਪੁਪ੍ਫਂ ਚੂਲ਼ਨਿਪ੍ਫਾਵਪੁਪ੍ਫਂ ਮਹਾਨਿਪ੍ਫਾਵਪੁਪ੍ਫਂ ਕਸੇਰੁਕਪੁਪ੍ਫਂ ਨਾਲ਼ਿਕੇਰਤਾਲਕੇਤਕਾਨਂ ਤਰੁਣਪੁਪ੍ਫਾਨਿ ਸੇਤਵਰਣਪੁਪ੍ਫਂ ਸਿਗ੍ਗੁਪੁਪ੍ਫਂ ਉਪ੍ਪਲਪਦੁਮਜਾਤਿਕਾਨਂ ਪੁਪ੍ਫਾਨਿ ਕਣ੍ਣਿਕਮਤ੍ਤਂ ਅਗਨ੍ਧਿਕਪੁਪ੍ਫਂ ਕਲ਼ੀਰਪੁਪ੍ਫਂ ਜੀਵਨ੍ਤੀਪੁਪ੍ਫਨ੍ਤਿ ਏਵਮਾਦਿ ਤੇਸੁ ਤੇਸੁ ਜਨਪਦੇਸੁ ਪਕਤਿਆਹਾਰਵਸੇਨ ਮਨੁਸ੍ਸਾਨਂ ਖਾਦਨੀਯਤ੍ਥਂ ਭੋਜਨੀਯਤ੍ਥਞ੍ਚ ਫਰਣਕਪੁਪ੍ਫਂ ਯਾਵਕਾਲਿਕਂ. ਅਸੋਕਬਕੁਲਕੁਯ੍ਯਕਪੁਨ੍ਨਾਗਚਮ੍ਪਕਜਾਤਿਕਣਵੀਰਕਣਿਕਾਰਕੁਨ੍ਦਨਵਮਾਲਿਕਮਲ੍ਲਿਕਾਦੀਨਂ ਪਨ ਪੁਪ੍ਫਂ ਯਾਵਜੀਵਿਕਂ ਤਸ੍ਸ ਗਣਨਾਯ ਅਨ੍ਤੋ ਨਤ੍ਥਿ. ਪਾਲ਼ਿਯਂ ਪਨਸ੍ਸ ਕਸਾਵਭੇਸਜ੍ਜੇਨੇਵ ਸਙ੍ਗਹੋ ਵੇਦਿਤਬ੍ਬੋ.

ਫਲਖਾਦਨੀਯੇ ਪਨਸਲਬੁਜਤਾਲਨਾਲ਼ਿਕੇਰਅਮ੍ਬਜਮ੍ਬੂਅਮ੍ਬਾਟਕਤਿਨ੍ਤਿਣਿਕਮਾਤੁਲੁਙ੍ਗਕਪਿਤ੍ਥਲਾਬੁਕੁਮ੍ਭਣ੍ਡਪੁਸ੍ਸਫਲਤਿਮ੍ਬਰੂਸਕਤਿਪੁਸਵਾਤਿਙ੍ਗਣਚੋਚਮੋਚਮਧੁਕਾਦੀਨਂ ਫਲਾਨਿ ਯਾਨਿ ਲੋਕੇ ਤੇਸੁ ਤੇਸੁ ਜਨਪਦੇਸੁ ਪਕਤਿਆਹਾਰਵਸੇਨ ਮਨੁਸ੍ਸਾਨਂ ਖਾਦਨੀਯਤ੍ਥਂ ਭੋਜਨੀਯਤ੍ਥਞ੍ਚ ਫਰਨ੍ਤਿ, ਸਬ੍ਬਾਨਿ ਤਾਨਿ ਯਾਵਕਾਲਿਕਾਨਿ. ਨਾਮਗਣਨਵਸੇਨ ਨੇਸਂ ਨ ਸਕ੍ਕਾ ਪਰਿਯਨ੍ਤਂ ਦਸ੍ਸੇਤੁਂ. ਯਾਨਿ ਪਨ ਪਾਲ਼ਿਯਂ –

‘‘ਅਨੁਜਾਨਾਮਿ, ਭਿਕ੍ਖਵੇ, ਫਲਾਨਿ ਭੇਸਜ੍ਜਾਨਿ – ਬਿਲਙ੍ਗਂ, ਪਿਪ੍ਫਲਿਂ, ਮਰਿਚਂ, ਹਰੀਤਕਂ, ਵਿਭੀਤਕਂ, ਆਮਲਕਂ, ਗੋਟ੍ਠਫਲਂ, ਯਾਨਿ ਵਾ ਪਨਞ੍ਞਾਨਿਪਿ ਅਤ੍ਥਿ ਫਲਾਨਿ ਭੇਸਜ੍ਜਾਨਿ ਨੇਵ ਖਾਦਨੀਯੇ ਖਾਦਨੀਯਤ੍ਥਂ ਫਰਨ੍ਤਿ ਨ ਭੋਜਨੀਯੇ ਭੋਜਨੀਯਤ੍ਥਂ ਫਰਨ੍ਤੀ’’ਤਿ (ਮਹਾਵ. ੨੬੩) –

ਵੁਤ੍ਤਾਨਿ, ਤਾਨਿ ਯਾਵਜੀਵਿਕਾਨਿ. ਤੇਸਮ੍ਪਿ ਅਪਰਿਪਕ੍ਕਾਨਿ ਅਚ੍ਛਿਵ ਬਿਮ੍ਬਵਰਣਕੇਤਕਕਾਸ੍ਮਰੀਆਦੀਨਂ ਫਲਾਨਿ ਜਾਤਿਫਲਂ ਕਟੁਕਫਲਂ ਏਲ਼ਾ ਤਕ੍ਕੋਲਨ੍ਤਿ ਏਵਂ ਨਾਮਵਸੇਨ ਨ ਸਕ੍ਕਾ ਪਰਿਯਨ੍ਤਂ ਦਸ੍ਸੇਤੁਂ.

ਅਟ੍ਠਿਖਾਦਨੀਯੇ ਲਬੁਜਟ੍ਠਿ ਪਨਸਟ੍ਠਿ ਅਮ੍ਬਾਟਕਟ੍ਠਿ ਸਾਲਟ੍ਠਿ ਖਜ੍ਜੂਰੀਕੇਤਕਤਿਮ੍ਬਰੂਸਕਾਨਂ ਤਰੁਣਫਲਟ੍ਠਿ ਤਿਨ੍ਤਿਣਿਕਟ੍ਠਿ ਬਿਮ੍ਬਫਲਟ੍ਠਿ ਉਪ੍ਪਲ ਪਦੁਮਜਾਤੀਨਂ ਪੋਕ੍ਖਰਟ੍ਠੀਤਿ ਏਵਮਾਦੀਨਿ ਤੇਸੁ ਤੇਸੁ ਜਨਪਦੇਸੁ ਮਨੁਸ੍ਸਾਨਂ ਪਕਤਿਆਹਾਰਵਸੇਨ ਖਾਦਨੀਯਤ੍ਥਂ ਭੋਜਨੀਯਤ੍ਥਞ੍ਚ ਫਰਣਕਾਨਿ ਅਟ੍ਠੀਨਿ ਯਾਵਕਾਲਿਕਾਨਿ. ਮਧੁਕਟ੍ਠਿ ਪੁਨ੍ਨਾਗਟ੍ਠਿ ਹਰੀਤਕਾਦੀਨਂ ਅਟ੍ਠੀਨਿ ਸਿਦ੍ਧਤ੍ਥਕਟ੍ਠਿ ਰਾਜਿਕਟ੍ਠੀਤਿ ਏਵਮਾਦੀਨਿ ਅਟ੍ਠੀਨਿ ਯਾਵਜੀਵਿਕਾਨਿ. ਤੇਸਂ ਪਾਲ਼ਿਯਂ ਫਲਭੇਸਜ੍ਜੇਨੇਵ ਸਙ੍ਗਹੋ ਵੇਦਿਤਬ੍ਬੋ.

ਪਿਟ੍ਠਖਾਦਨੀਯੇ ਸਤ੍ਤਨ੍ਨਂ ਤਾਵ ਧਞ੍ਞਾਨਂ ਧਞ੍ਞਾਨੁਲੋਮਾਨਂ ਅਪਰਣ੍ਣਾਨਞ੍ਚ ਪਿਟ੍ਠਂ ਪਨਸਪਿਟ੍ਠਂ ਲਬੁਜਪਿਟ੍ਠਂ ਅਮ੍ਬਾਟਕਪਿਟ੍ਠਂ ਸਾਲਪਿਟ੍ਠਂ ਧੋਤਕਤਾਲਪਿਟ੍ਠਞ੍ਚ ਖੀਰਵਲ੍ਲਿਪਿਟ੍ਠਞ੍ਚਾਤਿ ਏਵਮਾਦੀਨਿ ਤੇਸੁ ਤੇਸੁ ਜਨਪਦੇਸੁ ਪਕਤਿਆਹਾਰਵਸੇਨ ਮਨੁਸ੍ਸਾਨਂ ਖਾਦਨੀਯਤ੍ਥਂ ਭੋਜਨੀਯਤ੍ਥਞ੍ਚ ਫਰਣਕਾਨਿ ਪਿਟ੍ਠਾਨਿ ਯਾਵਕਾਲਿਕਾਨਿ. ਅਧੋਤਕਂ ਤਾਲਪਿਟ੍ਠਂ ਖੀਰਵਲ੍ਲਿਪਿਟ੍ਠਂ ਅਸ੍ਸਗਨ੍ਧਾਦਿਪਿਟ੍ਠਾਨਿ ਚ ਯਾਵਜੀਵਿਕਾਨਿ. ਤੇਸਂ ਪਾਲ਼ਿਯਂ ਕਸਾਵੇਹਿ ਚ ਮੂਲਫਲੇਹਿ ਚ ਸਙ੍ਘਹੋ ਵੇਦਿਤਬ੍ਬੋ.

ਨਿਯ੍ਯਾਸਖਾਦਨੀਯੇ ਏਕੋ ਉਚ੍ਛੁਨਿਯ੍ਯਾਸੋਵ ਸਤ੍ਤਾਹਕਾਲਿਕੋ. ਸੇਸਾ ‘‘ਅਨੁਜਾਨਾਮਿ, ਭਿਕ੍ਖਵੇ, ਜਤੂਨਿ ਭੇਸਜ੍ਜਾਨਿ – ਹਿਙ੍ਗੁਂ ਹਿਙ੍ਗੁਜਤੁਂ ਹਿਙ੍ਗੁਸਿਪਾਟਿਕਂ ਤਕਂ ਤਕਪਤ੍ਤਿਂ ਤਕਪਣ੍ਣਿਂ ਸਜ੍ਜੁਲਸਂ ਯਾਨਿ ਵਾ ਪਨਞ੍ਞਾਨਿਪਿ ਅਤ੍ਥਿ ਜਤੂਨਿ ਭੇਸਜ੍ਜਾਨੀ’’ਤਿ (ਮਹਾਵ. ੨੬੩) ਏਵਂ ਪਾਲ਼ਿਯਂ ਵੁਤ੍ਤਨਿਯ੍ਯਾਸਾ ਯਾਵਜੀਵਿਕਾ. ਤਤ੍ਥ ਯੇਵਾਪਨਕਵਸੇਨ ਸਙ੍ਗਹਿਤਾਨਂ ਅਮ੍ਬਨਿਯ੍ਯਾਸੋ ਕਣਿਕਾਰਨਿਯ੍ਯਾਸੋਤਿ ਏਵਂ ਨਾਮਵਸੇਨ ਨ ਸਕ੍ਕਾ ਪਰਿਯਨ੍ਤਂ ਦਸ੍ਸੇਤੁਂ. ਏਵਂ ਇਮੇਸੁ ਮੂਲਖਾਦਨੀਯਾਦੀਸੁ ਯਂਕਿਞ੍ਚਿ ਯਾਵਕਾਲਿਕਂ, ਸਬ੍ਬਮ੍ਪਿ ਇਮਸ੍ਮਿਂ ਅਤ੍ਥੇ ‘‘ਅਵਸੇਸਂ ਖਾਦਨੀਯਂ ਨਾਮਾ’’ਤਿ ਸਙ੍ਗਹਿਤਂ.

ਭੋਜਨੀਯਂ ਨਾਮ ਪਞ੍ਚ ਭੋਜਨਾਨੀਤਿਆਦਿਮ੍ਹਿ ਯਂ ਵਤ੍ਤਬ੍ਬਂ ਤਂ ਵੁਤ੍ਤਮੇਵ. ਖਾਦਿਸ੍ਸਾਮਿ ਭੁਞ੍ਜਿਸ੍ਸਾਮੀਤਿ, ਪਟਿਗ੍ਗਣ੍ਹਾਤੀਤਿ ਯੋ ਭਿਕ੍ਖੁ ਵਿਕਾਲੇ ਏਤਂ ਖਾਦਨੀਯਂ ਭੋਜਨੀਯਞ੍ਚ ਪਟਿਗ੍ਗਣ੍ਹਾਤਿ, ਤਸ੍ਸ ਪਟਿਗ੍ਗਹਣੇ ਤਾਵ ਆਪਤ੍ਤਿ ਦੁਕ੍ਕਟਸ੍ਸ. ਸੇਸਮੇਤ੍ਥ ਉਤ੍ਤਾਨਮੇਵ.

ਏਲ਼ਕਲੋਮਸਮੁਟ੍ਠਾਨਂ – ਕਾਯਤੋ ਚ ਕਾਯਚਿਤ੍ਤਤੋ ਚ ਸਮੁਟ੍ਠਾਤਿ, ਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.

ਵਿਕਾਲਭੋਜਨਸਿਕ੍ਖਾਪਦਂ ਸਤ੍ਤਮਂ.